موسوعة القصص من واقع العراقي ( قصص قصيرة بكتاب واحد )

البارت الاول من قصة قلوب بلا رحمة

قصة قلوب بلا رحمة

بقلم  د. زينب الموسوي  كاتبة المهجر

سأروي قصتي رغم صعوبه ماعشت وعانيت كان الله معي وشملني برحمته الواسعه
اسمي ورده عراقيه اسكن محافظه الديوانيه مواليد ٩٢ انولدت وجدت حياتي مقرره قبل ولادتي امي وفاء تزوجت زغيره زواج يسمونه (صدق او گصه بگصه)  وانتقلت لمنطقه ثانيه مع زوجها محمد هذا الزواج اله مواصفات خاصه يعني اذا وحده من الزوجات زعلت الثانيه يجون اهلها ياخذوها وبعد ولادتي بشهرين خالي طلگ زوجته يعني اخت ابويه وكان لازم امي تتطلك رده فعل
اخذتني امي ورجعنا لبيت اهلها بيتي جدي حقي
صار عمري سنتين خالي جاسم زوج امي لرجال عايش بالبصره وتركتني عند امها بيبي عجميه هذا اسمها
مره كبيره ونظرها على گدها خوالي سبعه كلهم عايشين بيت واحد همه فلح منو يريد يتزوج يبني غرفه
لو اريد احجي عن الظروف الي شفتها احتاج عمر كامل بس انطيكم مثل بسيط نسوان خوالي كانوا من يصير عدهم طفل ويتعبن شغل بيت وتنظيف باليل ينامن واني اسهر اهز كاروك سرير الطفل واذا بچى انضرب مع ان الطفل يبجي جوع ولازم اگعد امه ترضعه عشت خمس سنوات مافد يوم واحد من خوالي مسح على راسي او انطاني نستله   كبرت واني اتحسر على كلمة ماما كانت تزورنا كل سنه بعطلة المدارس يومين واشوف عدها اطفال بس اخاف اتقرب منها ومنهم اخاف من كسرة الگلب مااريد اتعود عليها لان اعرف راح تتركني لحد يوم بالعطله كنت ناجحه لصف الثاني ابتدائي جابتلي هديه تراجي ذهب ولبستني وباستني حيل لحد الان اتذكر بوستها على خدي
عرفت متاخر هذي كانت بوسه وداع للابد باليل اجتمعن بيبي وخالتي ساجده متزوجه وعايشه بغداد قليل تجينا وامي سمعت هذا الحديث
بيبي اخذيها وياج بعد مااتحمل اشوفها تنضرب بسبب وبدون سبب
ساجده يمه البنيه زغيره ماتفيدني خلي تكبر شويه
امي  فدوه لعينج ساجده اخذيها انتي مريضه بالسكر وماعندج اطفال اخذيها يمج على الاقل اطمئن عليها عندج تاكل تشرب
بيبي ولج والله حتى سبح نسوان اخوتج ميخلنها تسبح وشوفيها ميته من الضعف
ساجده اسال خليل اذا قبل. اخذها
اتذكر بعد يومين اخذتني خالتي ساجده بسياره وكان وياها رجال صوته مبحوح تصيحله خليل عرفت هذا زوجها
اول موصلنا اخذتني خاله ودخلتني للحمام سبحتني وهي تسب وتغلط
هذا وسخ العشاير ذبيه واظافرج تگصيها وكلشي قذر وسخ متلعبين بيه كانت تفرك جلدي لحد طلعت الدم مني وبعدين ظلت تبچي وضربتني راشدي وطلعت بقيت بالحمام ابجي  وبدون ملابس تركتني وقت مااعرف شگد دخلت انطتني الملابس وحضنتني وهي منهاره بالبچي بذاك الوقت كنت طفله مااعرف شديصير لكن من كبرت عرفت خالتي عدها انفصام بالشخصيه ولذلك متحب تزور اهلها
ورا ماطلعت من الحمام انطت فلوس لخليل وگالتله
روح جيبلها ملابس اهدومها كلها وسخ وريحة حيوانات
طلع خليل اخذتني لغرفه فوگ كانت حاره فتحت الشباك ومروحه
هذي غرفتج يوميه تنظفيها اذا لگيتها وسخه اموتج كتل وتسمعين كلامي ويوميه تسبحين
خاله اني اخاف لوحدي بالحجره
اذا گلتي حجره مره ثانيه اطردج بالشارع اسمها غرفه وتنامين لوحدج غصبن ماعليج زين
خالتي كانت عصبيه وترجف من تحجي رجع خليل انطاني ملابس لحد الان اتذكر الوانهم وترتيبهم والدانتيل الي عليهم لبست واحد ونزلت تشوفني خاله
حضنتني وباستني
اني مااحب الناس الوسخه القذاره اكرهها صيري نظيفه حتى احبج
حاضر خاله اصير نظيفه
روحي لغرفتي اخذي عطر وبوطره وخلي منهم
اخذهن الي خاله
ئي الج ورده
بستها دفعتني مااحب واحد يبوسني
خاله ساجده كانت مدرسه بالارياف وخليل مدرس  انتقل للارياف وهناك التقوا وتزوجوا وبعد سنتين انتقلوا. لبغداد وعمو خليل مره گالي اني هيه  مهووسه بالنظافه ومتحب احد يقترب منها وحتى الزواج تعتبره قذاره ومن كانت تشوف صديقاتها يحبلون ويجيبون وهي لا صار عدها سكر من القهر
اتذكر كان بيتهم نظيف وريحته حلوه. واتذكر اني كنت انظف طفله بالمدرسه والمعلمات يحبوون يشتمون شعري كنت ادخل للحمام وخاله تباوعني مااترك الليفه الا اذا بدا الدم يطلع من جلدي تگولي كافي صرتي نظيفه
اساعدها بالبيت واغسل مواعين وانظف الحديقه والغروب تشرب حبوب وتنام وعلى طول تتعارك ويه خليل وتسميه ابو الوسخ
واتذكر بالليل بغرفتي يدخل خليل جايبلي نساتل وحلويات وينام بصفي وبعدها بنص ساعه ينطيني الف ويگلي مو تگولين لساجده اني اجيت هنا ترى تذبحج واني اجي حتى متخافين لوحدج
ويطلع كنت اتضايق منه ومن لمساته الي لكن كنت طفله مااعرف شديصير
صار عمري تسع سنين بديت اكرهم اثنينهم هي تضربني على اقل سبب وتريدني نظيفه وانظف ‏
وهو بدا يضربني باليل من ارفض المسه ومن ارفض وابجي يتركني
اخذ مفتاح غرفتي مني
كبرت واني اعيش التحرش باقذر انواعه كرهت جسمي وملابسي واديه احسها قذره
لمن صار عمري عشر سنين كانت عندي صديقه اسمها ايه حجيتله على افعال خليل وياي اثنينه منفتهم. لكن اثنينه عرفنا هذا خطا
اسمعيني ورده مره لاخ احبسي روحج بالحمام واقفليه عليج او بالمطبخ
وخالتي اذا عرفت حابسه روحي مراح تسال ليش
وخلي تعرف لازم تعرف ليش نايمه وتاركتج ويه هذا الحيوان
رجعت من المدرسه تركت جنطتي بالهول خالتي مكانت تقبل الجنطه لازم تصعد بغرفتي بدت تصيح
خايسه جايفه وفتحت الجنطه وطشت كلشي بيها
تعالي لج منيلج هذي الفلوس حراميه احجي منين هذي الفلوس
اسالي رجلج منين انتي عميه متشوفين هاج شوفي رگبتي شنو هذا الي عليها هذي اثار رجلج وانتي نايمه واني متحمله قذارته كرهت نفسي احس بنفسي شيطان وديني لبيت جدي  وديني لابوي هو عايش بغداد
اتصورت راح تضربني وتعاقب خليل تطرده من البيت دارت وجهه وگالت
اتحملي قذارته لعد گاعده عندي مجاني
انتي مرته مو اني حرام عليكم حتى مااحس نفسي طفله انطيني عنوان بيت جدي امي اريد اروح عدهم
ماعندج بيت جد بيبتيج عمت وخوالج ميريدوج وامج رجلها ميريدج
صيري عاقله خليل مدا ياذيج بس تلعبين وياه وشوفي دينطيج فلوس
وديني لابوي لااگل للمديره عليكم وافضحكم
ظربتني وگالت ولج شنو هاللسان متروحين للمدرسه بعد
لا لاتبطليني وديني لابوي
ابوج مااعرفه صار سنين مختفي هسه تنجبين لو ابطلج
انجب واسكت
خلص اني هم راح احجي ويه خليل يخفف جياته يمج
كنت عايش القهر النفسي والجسدي بكل تفاصيله الليل يمر واني ادعي مينفتح الباب اريد انام وهدومي نظيفه ومحد لامسني
ظليت بهذا الوضع وبديت احس نفسي اختلف عن البنات اشوفهم بريئات واني فاقده للبراءه وايه كانت تبتعد عني سالتها
شبيج ايه ليش متحجين وياي
حجيت لامي گالت هذي ورده جذابه وتتصور لاتمشين وياها لا تذب عليج سالفه
بس والله اني مو جذابه بيش احلفلج
عفيه ورده اني اخاف من امي تبطلني اذا عرفت
خسرت صديقاتي وظليت انطوائيه وهملت دراستي وحبست روحي بالغرفه الفوگ ومن صار عمري ١٢ قررت اخلي حد لهذا الوضع

وللحكاية بقية