موسوعة القصص من واقع العراقي ( قصص قصيرة بكتاب واحد )

-٢-من قصة حياة قذرة

-٢-من قصة حياة قذرة

الجز 5
اني المفروض ابلغ على امي وفاضل الامريكان وماخليهم وياي بملف اللجوء بس امي بهاي الفتره غيرت تصرفاتها وسوت روحها تايبه وتحچبت وتقربت مني كام  واول مره احس تخاف من مصيرها وهي تسمع الجرائم الي تصير ببغداد والقتل وخاصة للمثل جميله وحچت وياي وقنعتني أن هي تغيرت وتريد تتوب وتعيش عيشه نظيفه
جميلة : غنوه ماما شلون صرتي والبنيه من المنظمه شگالت
زينب او غنوة : لاتگولين غنوه اسمي زينب حتى بالملف كتبته لاتخافين الملف مالتنا قوي طفله مغتصبه من مسؤول وامها فنانه مشهوره معارضه وراح يحصلون لجوء حتى تعالج من الوساخه الي ذبيتني بيها انتي وفاضل
جميلة : زينب حبيبتي الفات مات واني هم مثلچ مالگيت الي يوجهني ويرحمني وضعت بهاي الدروب
زينب : انتي لگيت ام واب وبيت وربوچ بس انتي جبتي العار لروحچ وانهزمتي ويه واحد مو عبالچ مادري ترى الكاوليات حجنلي كلشي انتي اختاريتي هذا الطريق
جميلة : ماما هسه اني تبت وعد ماارجع لهذا الطريق وراح نسافر ونعيش هناك وتعالجي وانسي الصار وحتى مدرسه ارجعي وصيري دكتوره مهندسه
زينب : لعد والفلم المصري متريديني امثل بيه
جميلة : ماما انسي كافي وگوليلي الذهب والفلوس الي عندي شلون اخذها وياي يقبلون لو لا اسالي صاحبتچ ام المنظمه هذا تعب العمر خو مااعوفه وحنا رايحين بغربه
زينب : وفاضل راح تاخذيه وياچ
جميلة : ماما اسمه رجال ويانا شنعرف بامريكا شيصير
زينب : فهميه ماله علاقه بيه زين حتى حچي ليحچي وياي وانتي اذا طلع حچيچ جذب والله لابلغ عنچ وعنه
جميلة : ابد ماله علاقه بيچ واني هسه تشوفين ام ثانيه جميله ماتت
زينب : خلي نشوف وراح اسال عن فلوسج
سالت المنظمه گالت متگدرين تاخذين وياچ الا مبلغ بسيط وذهب بس الاستخدام الشخصي لان انتم لاجئيين والمنظمه تتكفل بيكم السكن والعيشه
وخبرت امي چانت عدها صديقه تثق بيها كاوليه مثلها امنت الذهب والفلوس عدها ورى يومين حصلونا الموافقه الامنيه وستعدينا للسفر دخلنا لامريكا ولايه كاليفورنيا ساعه ١١ظهر يوم اربعاء شهر السادس الولايه حاره والمطار ذكرني بالمناظر الي چنت اشوفها بيت الكاوليات ماشاءالله شعب كله كاوليه تريد وحده مستوره حتى العجايز لحمهن مترهل محروگ من الشمس ولابسه شورت
اني بالعراق تعالجت بس الملف مالتي اغتصاب فقرروا علاج نفسي والدوله تكفلت بالعلاج وانطونا شقه وخلو جميله المعينه الصحيه إليه يعني تاخذ راتب مقابل تعتني بيه كل يوم ياخذوني محاضرات عن الاغتصاب وشلون لازم اتعامل وي حياتي وانسى ومااكره نفسي وجسمي ويشجعوني اعبر عن غضبي باي شي بس بدون عنف الشقه الي نطوناها زغيره غرفتين نوم
زينب : جميله انطيني مفتاح غرفتي اريد اقفلها عليه اني ماامن برجلچ هذا
فاضل : زينب ترى انتي بالاوراق بنتي فگولي بابا احسنلچ
زينب : احسنلك انت ماتندگ وياي ترى بالمحاضرات علموني حقوقي واگدر اخبر عليك انت سبب الاغتصاب ولاتنسي اني عاشرت الكاوليات وعلمني الصلافه تدور الدنيا وتفتر وماانسى ثاري صدگني اذا منتقمت منك عاتبني ابد لاتأمن اذا هذاك الضابط سوا بيه سوايته السوده وراح فأنت موجود اقسم بشرفي الي ضاع الا ادفعك الثمن غالي
تابتابع