موسوعة القصص من واقع العراقي ( قصص قصيرة بكتاب واحد )

٢- من على ضفاف ضمائرنا

Part ( 2 )
#على ضفاف ضمائرنا
بقلم:  رنا خالد
بعد ما سمعت عمي يكول لزوجته انو بابا هاجر لأمريكا وبعد ميجي. ..حسيت انو الدنيا صارت سودة بعيني. ..وبيومها ظليت ابجي للصبح. ...سوزان ما جانت مفتهمة القصة زين. .بس جانت طول اليوم تبجي ونحيسة ومتقبل تأكل ولا تمشط ولا تقبل تسبح. .
كلما تتقرب منها مرت عمي. .جانت سوزان تعيط وتكولها أريد ماما. ..وأنا من جنت اشوف اختي هيج جنت ابجي وياها عالواهس. ...باختصار كلبنا البيت جحيم. ..ومرت عمي لأن احنا مطالعين من بطنها ومو جهالها جانت تزهك بسرعة وتكتلنا اني وسوزان بالصوندة. .لحد ما تزورك أجسامنا يالله تعوفنا. ...
وتظل تعيط علينا وتكوللنا : الله أكبر على ميعاد ماتت وتركتلي  اثنين علل نحسات على امهن. ..وإني وأختي من جنا نسمع هالكلام على ماما. .جنا نموت قهر. ..جنت اكول حرامات ماتت ماما وهاي ظلت عايشه. ..مرت عمي ما جانت قبل هيج خبيثة. .بس ظهرت على حقيقتها  وعرفناها من عشنا وياها. ...عمي جان حباب كلش. ..بس جان ما يعاملنا بلطف كدام زوجته. ..بس من تروح لأهلها جان يوم عيد بالنسبة النا. ...جان عمي يأخذنا بالسيارة يفرنا يشتريلنه جبس وجلاتين. .. جان يكللنا لا تكولون كدام منال (مرت عمي)...وظلينا على هالحال لحد ما صرت بصف اول متوسط ..وفد يوم من  الأيام جانت أختي سوزان تمتحن بكلوريا صف سادس....جان تتمرض مرت عمي منال. ..وكالت ماكو وحده تروح للمدرسة كعدو نظفو وطبخو. .اني ما بيه حييل. ..خو ما أظل أخدم بيكم وانتم كل وحده أطول مني. ...رجعت سوزان من الامتحان وكللها عمي: عمو سوزان. .مرت عمج تكول انتم كبرتو ولازم تكعدون بالبيت. ..وباجر عكبه تجيكم قسمة زينه وتزوجون. .
سوزان:عمو. ..انت شدتكول؟.تريدني أبطل واعوف مدرستي. ..وصديقاتي. ..لا اني ما أبطل.
بهاللحظه كامت منال وهجمت على سوزان ملختها من الكتل. .شلعت شعرها وإني ظليت اصررخ وعمي ولا كأنما بس يباوع بعيونه. ..بيومها بجينا للصبح لدرجة انو جارتنا أم يونس. .جتي دكت الباب من الصبح محد فتحلها دفعت الباب ودخلت وعبايتها على رأسها وذابتها ليورى هي هيج تسوي من تعصب. ..دخلت أم يونس وهي تكول وينكم...وين صرتو. ..
منال: هلا هلا خالة أم يونس شلونج
أم يونس: هلا الحمد لله. ..شبيكم. .شنو هالعياط البارحة بالليل. ..وشبيهن البنات يبجن
منال: بطرانات بنات ميعاد يردن يدرسن. .شراح يطلعن يعني دكتورات ؟ خلي يكعدن يشتغلن بالبيت اني تعبت وما بيه حيل بعد
أم يونس:ولج حرام عليج منال. ..خايبة سبيتي البنات سباية. ..تره الظلم حرام. .ومحد جبرج تربيهن. .جان ما قبلتي تاخذيهن. .جان شفنالهن  واحد من العشيرة يتبناهن ويدير باله عليهن. ..
منال: يا خالة ليش هيج تحجين انا قصرت وياهن ؟ ياما وكلتهن ومشطتهن ودرت بالي عليهن عبالك بناتي
أم يونس: لو صدك بناتج جان خليتيهن يدرسن ويفيدن نفسهن سودة عليه لا أم لا أبو عايفهن وهايم  وما يسأل عن بناته ...بيش طالبتهن وطالبة امهن. .تره ميعاد جانت خوش مره ومعدله
منال: خالة شبيج واكفه كعدي وهسه سوزان تسويلج ريوك
أم يونس : عزا العزاج منال تردين تبطليهن من المدرسة حتى يخدمن الرايح والجاي. .صدك انتي مو مال إحترام. .يالله فوتي جيبيهم انا اوديهن للدوام. .طول ما انا عايشه هالبنات ما ينظلمن ....
مرت عمي منال صار وجهها أصفر ..لأن أول مره واحد يكسر كلامها. ..وهاي مو أي واحد هاي بيبي أم يونس. .مو بس جارتنا. ..قرايب بابا من بعيد. ..وعلاقتها كلش قوية ابيت جدي الله يرحمه ومربيتهم كلهم بابا وعمو وحتى منال لأن منال جانت بت عم بابا. ...
صاحت بيبي أم يونس بعلو صوتها. ..روان. ..سوزان. .
بلي بيبي. ..كلنا بصوت واحد اني وسوزان
أم يونس :يلا فوتن بدلن وتعالن اوصلجن للإمتحان. .
سوزان وهي فرحانة كلش:بيبي بس اني عندي امتحان. .روان خلصت امتحاناتها وعطلت
راحت سوزان لبست صدريتها وحذائها الرياضي وجواريبها أم الكركش البيض. ..وشكد حلوات كصايبها وشرايطها البيض. ..ظليت اباوعلها مو بعين أخت. .بعين أم. .لأن من يوم اللي تيتمنا حسيت انو انا مسؤوله عن اختي. .....
راحت سوزان للامتحان وغصبن على خشم منال. ..أي عيني هاي مو شويه. .هاي بيبي أم يونس. .كلمتها تمشي على أكبر شارب. ...
ظلت منال تظلم بينا. ...وظل عمي ساكت وبس يباوع بعيونه. ..وظلت بيبي توكفلنا وتدافع علينا. ..واحنا يوم عن يوم نكبر مثل الزرع ...كبرت أجسامنا وبرزت تفاصيلنا اني وأختي وكبرت أحلامنا. ..
و الوضع نفسه. ..ما تغير شي. ..مرى نبجي ومرة نضحك. ..يعني شنو بيدنا. ..هالوضع انفرض علينا وتعودنا عليه. ........
و للحكاية  بقية

بقلمي:رنا خالد

جميع الحقوق محفوظة لكروب I'm queen of my  world 👑                         

جميع الحقوق محفوظة لكتاب موسوعة القصص من واقع العراق by weaam