موسوعة القصص من واقع العراقي ( قصص قصيرة بكتاب واحد )

البارت السادس من قلوب بلا رحمة

#قلوب_بلا_رحمه14
#زينب_الموسوي#
رغم ادعاء بسام ان تقبلني ومحاولاته يساعدني هذا الموقف اكدلي بعد جواه يتمنى لو ممتزوج وحده عاشت تجربة التحرش
دخلت زمن وياي للغرفه وحاولت تعرف منو خليل وساجده مانطيتها معلومات  وبسام طلع غيرت ملابسي ونمت باليل حسيت ايده بالفراش تدورني
اسف شجن بس انتي تطلعين الروح اكو وحده على وجه ولاده تصعد درج تنظف
ابنك مابيه شي ليش خايف
وام ابني متاذيه الله عليج
حجيك اذاني اكثر شوكت تنسى
ماادري اغار عليج حتى من الذكريات وصوتج من كنتي تحجين للدكتوره وتبجين يوميه افكر بيه واسال شلون تحملتي اتمنى انتقم منهم الج حتى ترتاحين
معليك من الصار انصفني انت ترى داحاول اطلع من ظلمه وانت ترجعني  اذا تحبني لاتذكر اسمائهم بعد لاتعيرني بيهم وتخليني احس مذنبه
اخر مره بعد متتكرر طلعت الي عندي  وانتهينا اخذيني انتي اليوم بحضنج ندمان على الي سويته
يله انت وابنك عليه اتحملكم وين اروح ماعندي غيركم
بعده بيوم ولدت امير اخذته بين اديه وحسيت بالمسووليه الي انولدت وياه عاهدته احميه واجنبه الكثيير من الماسي الي عاشته امه واتحمل بسام واهله وماحرمه منهم اعتبرت ولادته ولاده اليه انولدت شجن الام
بذلت كل وسعي بتربية ابني عدت الاشهر الاولى بين السهر والمداره للطفل وبين فرحتي بيه
واول مره افرح بنفسي ان انطيت بسام شي يفرحه
صار عمر ابني ست اشهر بدا يسنن ويبجي هواي عدنان اخوه لبسام كان يمنا واخذ الولد من بسام
هو انتم تعرفون للاطفال جيبه اخذه گعده بحضنه وبدا ينطيه اصبعه يعض بيه اسنانه ماتحملت ركضت على ابني
انطيني امير لاتخلي اصبعك بحلكه انتم تدخنون وكلكم جراثيم
شلت ابني من حضنه اخذته للغرفه وابجي
اجى بسام وراي
لج انتي تخبلتي تكولين على اخوي كلك جراثيم
فدوه لاتلومني مااريد احد يخلي ابني بحضنه واصبعه وكل هذا شمدريني اخوك شيطلع بس هذا ابني لازم احميه
قصدج تصورتي عدنان يتحرش بامير
مو بس هو حتى انت من تتشاقى وياه
من انولد امير واني اراقب الكل اي احد يتقرب منا روح اگعد يم اخوك وهسه  اطلع اعتذر منه بس انوم امير
صارت حياتي عذاب ثاني عبالك داخله حرب ويه العالم كله والكل يريد ياذي ابني
قررت ارجع للعلاج النفسي واني اشوف نفسي اتهم بسام بكل حركه يسويها مع ابنه بالتحرش
بديت اعالج واحضر جلسات بعدها بشهرين بديت اامن بالناس على ابني
صاحني بسام فد يوم وعرفت يريد يرجع للعراق
ليش تريد ترجع وتعوفني هنا
لازم ارجع الشركه الي كنت اعمل بيها صفت اعمالها في العراق وفي عدادات ومكائن اني نصبتها لازم اني الي افكها وفي اشياء عهده سافرت وماسلمتها
ومافي احد غيرك تترك شغلك هنا وتروح
في بس همه طالبيني اني واذا گلت لا الشركات راح تكون حذره بتعاملها وياي وعيب اتركهم زملائي ومعتمدين عليه مااطول حبيبتي شهرين تلاثه
زين اروح وياك مااكدر بدونك
وامير شنو ذنبه الحروالكهرباء يمكن يتمرض واطباء وادويه تعبانه
اتحملي لخاطر امير وارجع  نروح سفره اني وياج بس
لابالله وابني وين اخليه
عند امي تكيف عليه ونبقى بس احنا
حتى نسوي اخ ل امير
ويعني اخو امير ميصير هنا لا سفره
بكيفج تريدين هنا ماعندي مانع
شگد بطران اذا رحت للعراق مر على قبر امي فدوه مشتاقتلها
حتى اني مشتاقلها مره موقفها موقف ملائكه مو بشر ماتت وهي توصيني بيج
الله يرحمها وشغله ثانيه لاتضل عينك على البنات ومن ترجع من شغلك تدخل للبيت مو تظل لازم الباب بحلت المدارس
ماوگفت بالباب الا علمودج وبعد ماسويها ابد
خلي اني اوصيج
البيت هذا والبيت المأجر والمزرعه ومحلات اثنين ماجره كلها باسمي
وعندي اسهم بشركات واراضي كلها سنداتها بالغرفه عندج سيارات اثنين تلث بنايات ماخذتهن شركات ذولي يدفعون سنوي موجوده عندج بالاوراق  بيت زمن بيتي ملكي وباسمي  اشتريته من كان زوجها طالب وعلى مساعدات الدوله وبيت عدنان باسمي هذي دنيا واقدار في حاله موتي كلشي ترثينه انتي وامير انتي الوصيه عليه لحد عمر ١٨سنه بالقانون بس بيت عدنان وزمن متاخذيهن منهم تبقى الهم متخالفين وصيتي
شنو هالحجي وين رايح انت تحارب
محد ضامن عمره وهذي دنياي وانتي زوجتي لازم تعرفين 
كافي تريد تگلي اني غني وعندي فلوس ترى احبك بدون مااعرف املاكك
هسه شگلتي تريدين اخ ل  امير
اريد ليش لا
سافر بسام مكنت اعرف شنو طببعه عمله كان يتصل على طول ويسمع صوت امير ويوصيني عليه
بقيت على رجعته ايام خابرني اگال رايحين لكركوك نسلم كلشي واحجز وارجع
ياريت تحجز بسام والله الليل ماانامه اخاف عليك وهذي داعش وتهديدها
انشاالله ماكو شي
انقطع الاتصال بسام يومين ادك مافي جواب اخابر عدنان نفس الشي يگول ميجاوبني مكابله التلفون وابجي اكيد صاير شي مو طبيعته ميتصل
بقينا يومين بين الصبر والامل العصر  اجى عدنان وزمن وزوجها وعمتي وداد كلهم وجوهم كانت تنقل خبر مشووم
عدنان   بسام صديقه اتصل مفقود وفي اخبار اسير عند داعش
ماعرفت شنو كانت رده فعلي الخبر كان اقوى من اي رده فعل اخذت امير بحضني اريد استجمع قواي واكول  جمله وحده مااگدرت بس دموع شفت امه تبجي زمن منهاره عدنان مدنگ ويبچي هذا الاخذناه من العراق وضيمه هاي امريكا كلها ماكو شغل الا بالعراق
يمه عدنان سافر وراه شوفه يمكن تحصل خبر
هي داعش عدها اخبار هسه يعرفوه امريكي يذبحوه
كومي شجن ناخذج ويانا موتبقين لوحدج
وين اروح اني اظل انتظر بسام يرجع هو عاهد امي وحلف بالقران ميتركني القران يجيبه الي والله يرجع 
ميهون عليه يترك امير
زمن عرفتني دااهذي اني ابقى يمها ورحوا انتم
بقت زمن وعمتي يمنا البجي الي بجيته بذاك اليوم يعادل عمري كله
ياربي بس يرجعلي ماريد ابني يعيش بلا اب مثلي
بدت الايام تتسارع والاخبار مقطوعه
مرت شهرين اشوف ابني يكبر وحسرتي تكبر وياه
اتصلت بجيرانه ابو عقيل حجيتله
گال من الموصل لحد الانبار كلها عند داعش وصعب نحصل خبر بس اروح للشركه بغداد واسال يمكن عدهم خبر
ثاني يوم اتصلت كال الشركه محوله المقر وحصلت ولد كان يشتغل وياه الخبر ماخذيهم داعش ومصيرهم مجهول
ضاع اخر امل عندي وكعت ونقلوني للمستشفى ظليت اسبوع اعاني انهيار عصبي واخذ ابر
طلعت من المستشفى بديت اعود نفسي على الحياه بدون بسام لكن مافكرت يوم اعتبره ميت داخلي موجود عايش
بعد اربع اشهر بدت اطماع اهله وخوفهم مني اسيطر على الاملاك اجتمعوا عندي كلهم
عدنان ام امير لازم نطلع شهاده وفاه لبسام
شنو ليش هو ميت اسم الله عليه رجلي عايش لو كاتليه كان صوروا فديو وبثوه لان امريكي
هذي اوهام يجوز قتلوه وميدرون امريكي
لا بسام عايش اني ادري عايش ويرجع
زمن اگلج كافي من هذا الحجي لو بيج خير ماعفتيه يروح للعراق وكاتب وصيه بالاملاك كلها الج قبل يوم من سفره شلون قشمرتيه والله عمي نادره
ياوصيه هاي الي تحجين عليها
عدنان المحامي گال بسام كاتب وصيه الاملاك كلها الج ول امير وانتي الوصيه عليه ومستحيل اخلي املاك اخويه تروح لواحد ثاني من تتزوجين مره ثانيه
شنو هذا الحجي عدنان اني متزوجه وماكو املاك راح تروح كلشي مثل ماهو يبقى يجي بسام ويتصرف بحلاله
صار عصبي ويصيح
كافي من هذا اللف والدوران نعرفج تعرفينا جايه على الحاضر تاخذين تعب اخوي
خويه لاتعصب الاملاك كلها الك مااريدها بس هذا البيت اعيش بيه اني وابني
الاملاك متصير الي الا بشهادة وفاه لبسام وبعدها تتنازلين الي ولزمن
باجر تروحين گدام القاضي تشهدين زوجج ميت وتاخذين الاملاك وتتنازلين عنها الي واصير وصي عن امير
لو تذبحني مااكول كلمة بسام ميت واخليها تنكتب باوراق رسميه
بسيطه شجن كتلكم مخططه لكلشي
طلعوا خلوني صافنه هذولي اهل بدال ميفكر يسافر يسال عن اخوه يريد يورثه وينك بسام تعال شوف
زداد خوفي وظليت افتر بالبيت انطر على نفسي وابني والتلفون بايدي
بعد ايام اجاني استدعاء من القاضي طالبين شهادتي حتى يصدرون شهاده وفاه
اني مااعرف انكليزي بس المحامي لمتولي اموره ويعرف بالوصيه فهمني وحضرت المحكمه
سالني القاضي عندج دليل زوجج عايش
عندي زوجي يحمل جنسيه امريكيه وداعش يتفاخر بذبح الامريكان ليش مصوروا فديوا اله
من يگول ميت وين جثته
المحامي وضح للقاضي منگدر نحكم بموته مافي دليل واحد على موته ولااتصال من داعش ولا جثه يجوز عايش بالعراق وميريد عائلته
القاضي اقتنع ومااصدر شهادة وفاه والوصيه تكول الا في حالة وفاته الاملاك تصير لشجن
طلعت من المحكمه واني احس انتصرت لبسام
والمفاجاءه كانت بعد تلث ايام من المحكمه