((((((( الكبيره ٢)))))))
#لولو_محمد
الحلقه ٩٦
عباده نايم جنب خديجه منبه تليفونه يرن يطفيه بسرعه خديجه تصحى
خديجه / صباح الخير ... هدخل الحمام الاول
عباده / صباح النور ... اتفضلى
عباده يقوم يقعد على السرير و يمسك الموبايل يبص فيه و خديجه تروح الحمام عباده يلاقي رسالتين من دياب على الواتس يفتح
دياب / نجاه اتكلمت اكتر من مكالمه فى التليفون امبارح بالليل منهم مكالمه طويله مع يونس ... ما سمعتهاش بس بعتها لحضرتك لو تحب تسمعها ... انا بس لفت انتباهى طول المكالمه و التوقيت
عباده ملامحه تتغير و يفتح الدرج و يطلع الايربود و يبدأ يسمع الفويس و هو عمال يفرك
خديجه تطلع من الحمام تشوف ملامحه تتخض
خديجه / فى ايه يا عباده مالك
عباده يشاور لها بصابعه تسكت تقف تتابعه
خديجه / استر يا رب
عباده يقوم يدخل الحمام و يقفل عليه الباب و خديجه متابعاه و مرعوبه
....................
فى اوضه نجاه
نجاه / بس دى حاجه كويسه على فكره بدات بصوفيا بكره مامتك و بعدين اقتنعوا ما اقتنعوش انتى كدا كدا حياتك ماشيه هم بقي عاوزين يكونوا جزء منها تمام مش عاوزين براحتهم
مهره قاعده شايله الهم نجاه تمسك وشها تخليها تبص لها
نجاه / ما تفكريش فى حد غير نفسك و بس
مهره تبص الناحيه التانيه
نجاه / كل حاجه فى اولها صعبه المهم نرضي يا بنتى اقسم بالله الواحد عاش حاجات لما بيقعد يفتكرها يستغرب نجى منها ازاى و لسه قادر يقف على رجليه و يكمل و الله هتتعدل و ربنا هيفاجئك بعوضه
مهره تعيط
نجاه / لا حول و لا قوه الا بالله يا رب ... انتى مش كنتى عوزاهم يعرفوا الحقيقه اديهم عرفوا
مهره تمد ايدها تجيب الموبايل و تكتب
مهره / انهى حقيقه
نجاه / الحقيقه اللى تخصهم انتى مش مجبره تبرري اى حاجه لاى حد ... هى ما وقفتش جنبك وقتها ما تجيش تحاسبك مش من حقها .. و لا من حق اى حد
مهره تتنهد و تهز راسها بتكبير دماغ
نجاه / بصي كبرى دماغك و اهدى و اتعاملى عادى خالص و ما تفكريش فى اى حاجه لحد ما توصل و سبيها على ربنا و بعدين هيحصل ايه اسوء من اللى حصل يعني
مهره تبص لها بطرف عينها
نجاه / لا بجد ايه فى الدنيا اسوء ممكن يحصل
.......................
فى شقه عويس
ام نسمه / بس الموضوع ده ما يتسكتش عليه
عويس / أعلى ما فى خيله يركبه
ام نسمه / لو مش خايف على نفسك خاف على عيالك دا ما بيدخلش الحجز حتى فى واحد فيهم
عويس / يعني ايه !! اطاطى و اديهاله
ام نسمه / ما قولتش كدا بس ... نسيب له الجمل بما حمل ... ارض الله واسعه
عويس / و هى بنتك راضيه تكبر لحد ما هى مصغرانا كلنا وسط الناس و مخليه اللى ما يشترى يتفرج علينا
ام نسمه / طب و العمل
عويس / انا هروح اتكلم مع فيراس
ام نسمه / هتتكلم معاه فى ايه و هو ماله بكل ده اصلا
عويس/ يتصرف يتحرك يكلمها يحاول يلين دماغها
ام نسمه / نعم !!
عويس / اعمل ايه يعني
ام نسمه / محمود مات يا عويس محمود اتقتل يا ابو نسمه
عويس / ما هو ده الحل الوحيد انها تتجوز
ام عويس / مش هتقدر تجبرها ما عادتش تحت طوعك
عويس / اللى تكبر على ابوها تستاهل قطم رقبتها
ام عويس / و الكبير هيسكت لك
عويس / اكيد لا ... بس مفيش حاجه ما لهاش حل ... بس قبل اى حاجه لازم اتكلم مع فيراس و اشوف ناوى يكمل لحد فين
ام عويس/ ايام عبد الهادى كان هو اللى رايدها و مستعد يحارب صابر عشان بيحبها انما فيراس ما بيحبهاش و لا تفرق معاه و لو هيحارب هيحارب عشان الارض
عويس / بنتك مش قليله و زى ما قدرت تكسب عبد الهادى هتكسب فيراس باذن الله
ام عويس / التانى كان بيحبها
عويس / و دا أبن عمها و بيحبها و هيصونها ... بقولك ايه بناقص قاعدتك اللى ما بيجيش من وراها غير حرقه الدم انا رايح اشوف اللى ورايا ... ادى اللى بناخده من قاعده الحريم ... عن اذنك
...................
فى عربيه على الطريق
شاب سايق و جابر قاعد جنبه و فى اتنين رجاله قاعدين ورا واحد منهم على رجله عيل صغير اربع او خمس سنين
الشاب / بس الحوار ما كانش مستاهل المشوار و الله كنا هنقوم بالواجب برده يعني مش هنقصر رقبتك يا ابن عمى
جابر / عارف يا قاسم و الله بس اهو بغير جو مش اكتر اول ما الكبير كلمنى قولت على الله يلا
قاسم / ما انتوا بصراحه مقفلينها جامد على نفسكوا يا ابنى انت صغير اللى قدك خاربينها شمال و يمين مش انت قاعد لى فى البيت زى الولايا هتشوف حريم فين انت و لا هتتجوز ازاى بوضعك ده
جابر يبص له و يضحك
جابر/ و الله ما رادد عليك ... مش قادر لك اصلا
شاب ١ ورا / يا عم سهله انوى انت بس و عروستك عندى
شاي ٢ / يا جدعان انتوا بتستهبلوا و لا انتوا بجد مش عارفين ... جابر متكلم على بنت عمه ... نجاه بنت الكبير عباده الزيني
شاب ١ / يا جدع قول كلام غير ده ... ما لقيتش غير دى يا جابر
جابر يلف يبص له باستفهام و ضيق
شاب ١ / دى ماسكه ديل قطه كل يومين فى حوار شكل
قاسم / هى دى اللى همام كسر رجلها .. صح
شاب ٢ / يا عم هو عباده الزيني عنده غيرها مالك مصطبح و لا انت ايه حكايتك
قاسم / يا عم و انا كنت موظف السجل المدني بتاع الصعيد هو احنا نعرف عن حريمهم حاجه و لا شفناهم اصلا
جابر / و انت عاوز تشوفهم ليه اصلا ما ربنا يبارك لك فى اللى عندك
قاسم يقرص على الدريكسيون و يبص على الطفل بسرعه و يكمل سواقه
جابر / فى ايه ؟! انا قولت حاجه و لا ايه ؟!
قاسم / ام مازن تعيش انت
جابر / لا حول و لا قوه الا بالله ازاى و امتى
قاسم/ حصلت مضاعفات فى الولاده و ربنا استرد أمانته يومين تلاته و حصلته و ما فضليش غير المجرم اللى ورا اللى شبطان فى ديلى اربعه و عشرين ساعه ده
قاسم يضحك بحزن
جابر / ربنا يبارك لك فيه و يجعله خلف صالح
قاسم / امين عقبالك ... اهو البنزينه هناك اهو ننزل نص ساعه نشرب حاجه و ناكل لقمه و ندخل الحمام و نكمل مش هنطول باذن الله
جابر / براحتك
قاسم يدخل البنزينه و جابر مضايق و محرج
.....................
فى اوضه عباده
نجاه / طب ممكن حضرتك تهدى بس عشان نعرف نتكلم
عباده / انا كدا هادى بس لو عاوزه تشوفى وش تانى انا مش هتاخر عنك ما دام كدا كدا مفيش سمعان كلام بقي
نجاه/ ليه بس كل ده ما حضرتك سمعت المكالمه انا غلطت فى ايه
عباده / كلامك معاه من الأصل غلط... انتى هتستهبلى
نجاه / ماشي بس اكيد يعني مش متصله ادلع كان فى موقف و انا شرحت لحضرتك الدنيا ما خبيتش حاجه و بعدين ما انا عارفه ان الموبايل على السيستم و ان المكالمه ممكن تتسجل و ممكن حد يسمعها و عارفه حدودى المفروض تبقي واثق فيا اكتر من كدا
عباده / انا مش واثق فيه هو هو ايه اللى عاوز اخلف و ابقي اب انتى مالك بيه انتى يبقي اب و لا يبقي بدع
نجاه / ما هو عمى مختار طول الوقت بيقول كدا انه عاوز بنت زيي و حضرتك كنت بتضحك معاه عادى ايه يعني غار من حبى ليك عادى
عباده / بطلى استفزاز يا بت و اتكلمى عدل
نجاه / انا قولت ايه بس طب فهمنى
عباده / للمره الاخيره و بعد كدا هتنسي ابوكى الطيب الحنين ده خالص و هتشوفى منى وش يندمك ... الواد ده يتعمل له بلوك و تنسي اسمه خالص انتى فاهمه و لا لا
نجاه / ما اعمله بلوك عادى ... بس كدا حضرتك هترتاح يعني
عباده / اه هرتاح و ما لقيكيش رايحه تحكيها معاه بروح امك زى اللى حصل فى الجبل
نجاه تبص لعباده بقهر و عنيها تتملى دموع
نجاه/ دى انا !!
عباده/ ما تحطيش نفسك فى موقف زباله و ترجعى تزعلى لما تتلطى امشي عدل زى ما كنتى طول عمرك ماشيه
نجاه تعيط و تحاول تمنعها ما تقدرش تبص فى الارض عباده يقاوم انه يلين
عباده/ اطلعى اوضتك مفيش خروج النهرده
نجاه تروح ناحيه الباب
عباده / استنى
نجاه تبص له
عباده / هاتى موبايلك... مفيش موبايلات
نجاه تديهوله و تبص له مش باصص لها تمشي و تقفل الباب وراها
........................
فى البنزينه
جابر راكب العربيه مع الشباب و قاسم و ابنه مش موجودين
جابر / و مازن بيجى معاكوا فى اى طلعه كدا عادى
شاب ١ / همام ما بقاش يبعت قاسم اصلا الا لو الطريق مضمون
جابر / ايوه يعنى علاطول فى ايده كدا
شاب ٢ / الواد من بعد امه ما بيروحش لحد غير ابوه و مش قابل حد من الحريم و الله دا راح تابع مع دكتور بتاع مش عارف ايه كدا ليكون الموضوع كبير خصوصا ان الواد يعني هيدخل على مرحله دراسه و تعليم هيفارق ابوه ازاى دا حتى النومه بينام فى نفس السرير
جابر / فراق الام صعب طبعا
شاب ١ / خصوصا لو فجاه و دا كان عيل صغير ما يفهمش فى الدنيا غيرها فجاه قالتله هروح المستشفي اجيب اخوك ما رجعتش طبيعي جدا اللى هو فيه طب دا لو كان له اب تانى غير قاسم كان الموضوع بقي نيله على سواد قاسم واخد الواد فى حضنه و مخفف عنه و مدلعه على الآخر اشي فسح و خروجات و هدايا و لعب و لبس
جابر / و هى الحاجات دى هتغنى عن الام برده
شاب ٢ / و الله أمى قالت له يشوف له واحده بنت حلال يتجوزها بس هو اللى رافض بس ابويا بيقول لها ما تضغطيش عليه الموضوع لسه جديد و مش سهل
شاب ١ / هو بس عشان مفيش واحده شدته انما لما النصيب يبعت هتلاقيه هو اللى بيسعى ورا الموضوع بأيديه و سنانه
جابر / ما اعتقدش الموضوع كدا الواحد لما بيحب ما بيقدرش يتخيل نفسه مع اى واحده تانيه
شاب ١ / يا عم الكلام ده فى السيما الحياه ما بتقفش على حد
شاب ٢ / اشمعن بتقف عند الحريم
شاب ١ / و هو الحريم دلوقت بيقفوا على حد ... ربنا يستر على ولايانا
جابر / اسكت ياله اسكت دا انت فقرى
قاسم يطلع من البنزينه شايل كيس كبير و شايل مازن على كتفه
شاب ٢ / اسكتوا بقي قاسم جاى غيروا السيره غيروا السيره
..........................
فى شقه جوزيف
الباب يخبط جوزيف يروح يفتح يلاقي عباده
جوزيف / اهلا اتفضل
عباده يدخل من غير كلام جوزيف يقفل الباب عباده يقعد
جوزيف/ تحب تشرب حاجه
عباده/ تعال اقعد عاوزك
جوزيف يهز راسه و يروح يقعد
جوزيف / اؤمر
عباده / هى اخره الحكايه دى ايه ؟
جوزيف / انهى حكايه
عباده يكتم جواه
عباده/ الميكروزفت و المجلس و انت و اللى معاك اخركوا ايه عشان انا جبت أخرى
جوزيف / بدرى اوى... جبته بدرى اوى
عباده/ انا ممكن أضحى باى حاجه اجازف بكل حاجه ... الا نجاه ... خط ... خطوط حمر
جوزيف / اطمن .. مفيش اى حاجه هتحصل لها باذن الله
عباده / و ايه التمن بقي ان شاء الله
جوزيف / اى كان التمن هتفرق فى ايه المهم تبقي بخير
عباده / لا مش اى كان ... فى حاجات فيها تموت عندى اهون
جوزيف / ازاى يعني... و ايه بقي الحاجات اللى اهم من بنتك دى ان شاء الله ... فى الوقت اللى هى مستعده تموت عشانك دا ردك يعني
عباده / فى حاجات انت ما تفهمهاش
جوزيف/ و جايلى ليه ما دام انا ما افهمهاش
عباده / عشان تبعد بالزوق و الأدب قبل ما افقد اعصابى و اعمل حاجات نندم عليها كلنا
جوزيف / اه ... طب ما تيجي دوغرى كدا زى الرجاله و تقولى ايه مشكلتك بالظبط
عباده / كلمتك كتير بالادب و طلبت تبعد عن بنتى بس انت بتلف تلف و ترجع لها ... اه عارف ان اللى عنده معزه يربطها و انا مش هغلب فى بنتى بس قولت انبهك اخر مره عشان خاطر عضم التربه
جوزيف/ طب ما تنسي عضم التربه و تنسي المعزه و تنسي بنتك و توريني نفسك ... اصلك هتتشطر عليها ليه و هى ما عملتش حاجه غلط اصلا
عباده / دا كلامك يعني
جوزيف / انت عاوز منها ايه اكتر من اللى بتقدمه عشانك ... يا اخى على الاقل حبها قد ما بتحبك اسمعها و حس بيها شوف هى عاوزه ايه شوف ايه اللى هيسعدها ... ما تغلطش غلطه ناس تانين .. و لا هو انا بقول ايه اصلا ما انت كنت شريك فى الغلطه من البدايه
عباده / انت بتقول ايه يا جدع انت
جوزيف / تفتكر لو عدى مليون سنه على نسمه و صابر مش هيجي يوم و يجتمعوا برده فى الاخر ... لو كان فى امل ان اللى فى قلوبهم يموت كان مات من زمان
عباده/ دى قصه و دى قصه تانيه خالص مفيش مقارنه بينهم و بعدين فى فرق كبير بينك و بين صابر
جوزيف / هو احسن منى مليون مره ... كنت وقفت معاه يعني
عباده/ وقفت معاها هى
جوزيف / وقفت مع مين انت هتستهبل انت كنت عارف انها بتحبه و خايفه من ابوها ما حاولتش تطمنها و خليت الوحيدين اللى عارفين الحقيقه يكدبوا عشان تقهر و تحرم اتنين بيحبوا بعض عشان خاطر واحد طماع و التانى انانى ذنب كل لحظه الاتنين دول اتوجعوا فيها طول السنين دى فى رقبتك انت
عباده / انا ما قصرتش معاهم و الاتنين فاهمين موقفى و بعدين ما تخرجناش من موضوعنا انا بكلمك عن
جوزيف/ عن نفسك عن عباده الزيني كبير الزنايته و كبير البلد و اللى الكل بيحترمه و يقدره الكل بيعمل له ألف حساب و بيخاف منه انما انا لا لا بطاطى لك و لا بخاف منك بالعكس انا اللى راعبك انا الوحيد اللى قدرت اكسر هيبتك اللى انت بتعيش عليها عشان كدا رايح تتشطر على الوحيده فى الدنيا دى اللى لو دوست عليها عمرها ما هتزعل منك و تعوض فيها نقصك
عباده / خلصت هبل
جوزيف/ هتضطردنى من البلد ؟
عباده/ تؤ ... بس بما انك جامد اوى كدا و انا ضعيف اوى كدا خليني ارفع حمايتي عنك ... خلي اهل البلد يعرفوا انت مين و يقرروا ان كانوا مسامحين فى حقوقهم و دمهم اللى عندك و لا لا
جوزيف يفتح ايديه و هو مبتسم
جوزيف / اهلا و سهلا اللى له حاجه عندى يتفضل يجي ياخدها و هى الحياه ايه غير البقاء للاقوى بس هتقول لهم كنت حامينى دا لو كنت حامينى ليه ... لما تقول للناس حقيقتي هتقولهم انك سكت ليه
عباده/ عشان كنت فاكرك اتغيرت و بقيت بنادم كنت بديك فرصه
جوزيف / انت عمرك ما اديتنى و لا هتديني فرصه بدليل انى ما عملتش اى حاجه و جاى دلوقت تبخ فيا سمك و فاكر انى هسكت لك ... مش فاهم انت جايب الثقه دى منين
عباده / ما لكش دعوه ببنتى
جوزيف / مش بمزاجك قولت بنتك مش عيله بنتك كبيره و ليها دماغ و شخصيه و من واجبك تحترم رغبتها و بعدين ما لكش دعوه بنتى و من شويه اللى عنده معزه يربطها انت فاكر فى ايه بيني و بين بنتك اصلا بنتك ما غلطتش فى اى حاجه و لا انا و بعدين دا أنت من قريب كنت سامح لى ادربها
عباده / و بعدها طردتك من البلد و رجعت غصب عنى وضع و انفرض عليا و قولت امين ما يبقاش رضينا بالهم و الهم مش راضي بينا يعني خف و خلى عندك دم
جوزيف / انت عاوز ايه دلوقت
عباده / اللى عاوزه قولته
جوزيف/ و انا قولت لا ... انا مش هعمل حاجه من وراك انا بقولك فى وشك مش هقدر ابعد كل اللى اقدر اطمنك بيه أنى مش عاوز ائذيها و مش هقبل ليها أذى عاوز ايه تانى
عباده/ انت ليه مش قادر تفهم ان قربك منها هو الاذى بعينه
جوزيف / انت ليه مش عاوز تفهم ان حياتى و حياه بنتك مربوطين ببعض
عباده/ على جثتى
جوزيف / ما هو يا جثتك يا جثتنا احنا الاتنين لو هى بعدت هيقتلونى و لو انا بعدت هيقتلوها انت ليه مش قادر تشوف الصوره لحد دلوقت
عباده / انا كفيل ببنتى
جوزيف / على يدى ... يا اخى دا انا لسه ما خفتش ... بقولك ايه خلاصه الكلام ... روح قولت لأهل البلد انا مين و ارفع عنى حمايتك ... اقولك ... طلع مسدسك و اقتلنى و اخلص منى ... بس انا مش هقدر ابعد عن نجاه
عباده / مفيش مشكله تبعد هى
جوزيف / ما تتشطرش عليها ما انا قدامك اهو
عباده يبص لجوزيف من فوق لتحت و يمشي و يرزع الباب وراه
جوزيف / و اخرتها ايه مع ال ..
جوزيف يروح يجيب الموبايل و يتصل بحد
جوزيف / انت فين
.......................
فى المطار فى القاهره
مختار بيتكلم فى التليفون
مختار / و ايه اللى وصل الأمور لكدا ... يعنى هيعمل لها ايه يعني اهدى و انا هكلمه ... ما انا متاكد ان نجاه ما عملتش اى حاجه ... انا قولتلك يا يونس ان ده هيحصل انت ما سمعتش كلامى ... ما لكش دعوه بحد هو كل شويه نفس الجمله ... اهدى و خليك مكانك و ما تعملش اى حاجه لحد ما اوصل ... هركب الطياره و جاى اهو ... اسرع من كدا ايه دا انا حرفيا هطير ... سلام
مختار يتنهد و يتصل بعباده يكنسل عليه
مختار/ و اخرتها يعني
مختار يتصل بدياب
مختار / ايوه يا دياب فى مكالمه تمت امبارح بين يونس و نجاه ابعتلي نسخه منها لو سمحت ... تمام شكرا سلام
مختار يقفل و يروح يقعد جنب صوفيا
صوفيا / واضح ان فى حاجه صح ؟
مختار / مشاكل العيال ما بتخلصش ما تشغليش بالك انتى
صوفيا تهز راسها و تبص فى الساعه
..........................
فى اوضه نجاه
نجاه عماله تعيط و مهره تطبطب عليها الباب يخبط مهره تقوم تلبس الطرحه و تروح تفتح تلاقي عباده
عباده/ نجاه هنا
مهره تهز راسها
عباده / ممكن ادخل
نجاه تمسح دموعها و تقوم تفتح له الباب مهره تشاور لهم هتنزل تحت عباده يبتسم مهره تمشي عباده يدخل و يقفل الباب
عباده/ اقعدى
نجاه تروح تقعد و عباده يقعد جنبها و يديها الموبايل
نجاه / مش عوزاه
عباده / انا خايف عليكي
نجاه تهز راسها
عباده/ حطى نفسك مكانى طيب
نجاه / انا عملت ايه طيب
عباده/ ما دى فى حد ذاتها مصيبه يا قلب ابوكى انا ربيتك و واثق فيكي و برميكي فى النار و وسط الرجاله و انا مطمن بس الجدع ده غيرهم
نجاه / انا برده عملت ايه ؟
عباده / ابعدى عنه
نجاه تبص الناحيه التانيه و هى بتهز فى رجلها
عباده / ما ردتيش يعني
نجاه / انا ... مفيش اى حاجه بيني و بينه ... مفيش
عباده / حلو خليها على الوضع ده و ما تتعامليش معاه نهائى
نجاه / طب هو عمل ايه فهمنى
عباده / مش فاهم السؤال هو ايه اللى عمل ايه هو ما اتنيلش ما عملش ايه
نجاه / يابا انا مش قادره افهمك انتى ما كنتش كدا انت بقيت عصبى جدا طول الوقت
عباده / قربه منك معصبنى اسمه و اسمك فى جمله واحده بتجنن انا مش هستحمل حاجه زى دى
نجاه / زى ايه ؟! هو ايه اللى حصل لكل ده ... حضرتك بس لو تهدى و تفكر فيها بطريقه تانيه تلاقى انك ممكن تستفيد منه جدا
عباده / الله الغنى
نجاه / و ليه لا ... و بعدين هو فعلا اتغير و بقي انسان تانى ... يابا دا رمى نفسه فى النار عشانى و عشان جابر هتقتنع انه كويس امتى و انت بتدفنه
عباده/ مش قادر استحمل انك بتدافعى عنه
نجاه / حضرتك اغلى عندى من الدنيا كلها اقسم بالله
عباده / يبقي تقطعي مع الواد ده نهائى
نجاه / حاضر بس اسمعنى
عباده يبص الناحيه التانيه
نجاه/ هو انا لو اتجوزت جابر بكره هتدى ليونس فرصه ؟!
عباده يبص لها بصدمه
نجاه / ما انا هبقي متجوزه ساعتها و هتتاكد ان اى تعامل هيحصل مش هيكون له فيه اى نيه وحشه
عباده / انتى واعيه للى بتقوليه
نجاه / ما انا مش عارفه اريح حضرتك اعمل ايه
عباده/ انتى فاكره جابر ده ايه ؟! الحمد لله انه لا معانا و لا سمع الهبل ده ... انتى فكراه استبن عندك
نجاه / ما هو العريس الوحيد اللى شاريني و حضرتك موافق عليه اروح اجيب عريس منين دلوقت
عباده / و لما تتجوزيه يا بنت عباده الزيني هتعيشي معاه ازاى لا لا هو هيعيش معاكى ازاى هيقبل بقي هو اللى ما كنتش انا قابله
نجاه / و هو لازم يكون فى تعامل بيني و بين يونس ما تتعاملوا انتوا
عباده / دا ببجاحته بيقولى انه هنا عشانك و ان حياتكوا مربوطه ببعض
نجاه / ما دى الحقيقه يابا
عباده/ ما تستفزنيش
نجاه / سكت
عباده يتنهد
نجاه / اديله فرصه
عباده/ لا
نجاه / قرب منه و انسي انه كان جوزيف فى يوم من الايام
عباده / رحم الله امرئ عرف قدر نفسه مش هقدر بتجنن بموت انتى ايه ما بتحسيش
نجاه / تمام مش لازم حضرتك تتعامل معاه دايركت عمى مختار بيعرف دياب بيعرف دا حتى جابر بقي بيعرف
عباده / اى حد الا انتى
نجاه / و انا كنت اتعاملت فين بس
عباده / امال المكالمه دى ايه ... دا حتى مجيته الجبل عرفت ان انتى اللى قولتيله يجي و شوفتك بعيني و انتى اللى بتروحي تتكلمى معاه
نجاه / كنت بطمن عليه
عباده / من باقي عيلتك هو
نجاه / فدانى يابا
عباده / ابوس ايدك بقي ارحميني
نجاه / تمام انا نصحتك و حضرتك حر بس يوم القيامه لما يقف قدام ربنا و يقول انك ظلمته و كنت عون للشيطان عليه ما تبقاش تزعل منى
عباده / دا انا ؟
نجاه / ايوه لأن حضرتك رافض تجاهد نفسك و شيطانك رافض تصدق ان ممكن انسان يتوب حضرتك اخترت الدنيا مع ان
عباده / مع انك هبله و بتحرقى جاز على الفاضي
نجاه / انا مش هتكلم فى الموضوع ده تانى
عباده / يا ريت
عباده يبص قدامه و يرجع يبص لنجاه بصاله
عباده/ ما تدافعيش عنه اوى كدا ما تقفيليش عشانه انا ما عنديش نقطه ضعف غيرك ما تسمحيش ليهم يكسرونى بيكي
نجاه عنيها تتملى دموع
نجاه / حضرتك شايفني نقطه ضعفك !!
عباده / انتى الوحيده اللى تقدرى تكسريني يا نجاه
نجاه / اموت و لا اعملهاش ما تقولش كدا
عباده / ابعدى عن الجدع ده يا نجاه ... عشان خاطرى
نجاه تهز راسها حاضر و تمسح وشها
عباده / اوعدك انى هديله فرصه و هحاول اساعده ... طول ما انتوا بعاد عن بعض دا شرطى الوحيد
نجاه / دى حاجه ترجع لحضرتك انا كدا كدا هبعد
عباده يقوم يبوس راسها و يطلع بره
....................
فى مضيفه الزنايته
صوفيا و مهره قاعدين مع بعض
صوفيا / البيت ما عادش بيت كل حاجه فجاه اتغيرت ماما فى ملكوت لوحدها و بياتريس تقمصت دور اللى هتعدل المايله و هى اللى هتمشي شغل بابا و طول الليل و النهار فى الشركه ... ايه يعني هتتعلم الشغل كله فى يومين هى فالحه فى دراستها لما هتفلح فى الشغل
مهره تهز راسها و هى باصه فى الارض
صوفيا / الوضع ما يفرقش كتير عند باباكى مروان اتقبض عليه فى قضيه مخدرات فى بلد عقوبه المخدرات فيها الإعدام و ايلين خطوبتها اتفسخت و سيرتها بقت على كل لسان بس على الاقل عندها اللى يهتم بيها احنا ما عندناش بابا اختفى و ماما انتى عرفاها كويس... انا مش عارفه انتى ممكن تعمليلى ايه بس انا تايهه و مش عارفه اعمل حاجه و لوحدى ... اول مره اكون لوحدي كدا
مهره تكتب
مهره / صحابك و زمايلك ؟
صوفيا / مش قادره اتعامل مع الناس مش قادره اثق فى حد بحس انهم شمتانين فيا كل ما بشوف اتنين بيتوشوشوا بقول اكيد بيتكلموا عنى
مهره / هيتكلموا عنك فى ايه انتى ما فيش عندك اى حاجه تستعرى منها اى حد هيتكلم عليكي غالبا بيحسدك او غيران منك
صوفيا / انتى بتهزرى صح ابويا باعنا عشان واحده تانيه و أمى لسه بتجرى وراه حتى بعد ما طلقها
مهره / و الناس هتعرف الحاجات دى منين
صوفيا تبص لمهره و تبص فى الارض
صوفيا/ ارجعى معايا ارجعى لبيتك
مهره تهز راسها لا
صوفيا / عمران قالى كل حاجه
مهره تبص لصوفيا
صوفيا / قالى انكوا ما اتجوزتوش و ان كل دى تمثيليه عشان يطلعوكى من المصحه اللى مروان دبسك فيها و اهو مروان خد عقابه و انتى خفيتي الحمد لله ... ارجعى بيتك و عيشي وسطينا ... احنا اولى بيكى منهم
مهره تهز راسها لا
صوفيا / مهره انا ما ليش غيرك
مهره تبص فى الارض
صوفيا/ انتى زعلانه منى ؟
مهره تهز راسها لا
صوفيا / طب انتى متابعه مع حد عشان صوتك ده
مهره تهز راسها اه صوفيا تحضنها
صوفيا / هم ناس كويسين على فكره
مهره تبتسم
صوفيا / بس احنا اهلك احنا اولى بيكي
مهره تبص فى الارض
صوفيا/ انتى مش واثقه فينا صح؟! ... حقك بصراحه ... اذا كنت انا ما عدتش قادره اثق فيهم ... حاسه انهم هيختفوا هم كمان و هصحى ما الاقيش ليا اى حد ... انا خايفه
مهره تحضنها و تكتب
مهره / انسي الناس كلها و ركزى على مستقبلك و دراستك
صوفيا/ يعني مش هتيجي معايا برده هتسبيني فى الظروف دى ... دا انا سافرت اخر الدنيا مع راجل غريب ما اعرفوش عشان اجيلك ... دا ردك !!
مهره تبص فى الارض
صوفيا / مهره عشان خاطرى ... انا خايفه و انا لوحدى
مهره تبص لها و تتنهد و تهز راسها اه صوفيا تفرح
صوفيا / بجد !! هترجعى معايا بجد ؟!
مهره تهز راسها اه صوفيا تحضنها مهره تطبطب عليها
..........................
فى مكتب الزنايته
مختار / ما انت اللى قليت من نفسك قدامه
عباده / يمين بالله اخسرك اوعى للى بتقوله
مختار / يعني ايه تروح تقوله الكلام ده يعني ايه
عباده / انا عملت الصح و كل واحد منهم دلوقت ملزوم قدامى لوحده و نجاه وعدتني انها مش هتتعامل معاه تانى لو هو بقي قرب منها يمين بالله ما أسمى عليه خلصت بقي انا استحملت كتير يا جدع
مختار / طب ممكن تهدى و تفهمنى ليه كل ده اصلا ... شوفت ايه المكالمه ما كانش فيها اى حاجه اصلا
عباده / المكالمه فى حد ذاتها جريمه
مختار/ عشان مع يونس
عباده / عشان مع زفت
مختار/ طب لو سمحت راجع نفسك
عباده/ بدل ما تتعب روحك معايا عقله خليه يبعد عنها دا بيتحدانى يا جدع دا بيقول انى اجرمت فى حق نسمه و صابر
مختار / كلنا لينا دور
عباده/ انت كمان يا مختار
مختار / هنكر يعني ما كلنا عارفين انهم كانوا بيحبوا بعض ... و لسه بيحبوا بعض و مع كدا وقفنا بينهم
عباده / البت قالت قدامك
مختار/ كانت خايفه من ابوها
عباده / انا ما ليش فى الكلام ده ما هى وقفت قصاد ابوها ألمرادى و وقفت معاها انا ما غلطتش فى حقها هى اللى كدبت
مختار / مش هنفتح فى القديم
عباده / هو اللى فتح لااااا و البجح بيقولى ان الحكايه هتتكرر يقصد يعني ان هو و نجاه بيحبوا بعض شوفت البجح شوفت
مختار / كان هيتجنن لتطلع غلك على نجاه
عباده/ قلب أمه!! هيبقي احن على بنتى منى و لا ايه... نجاه نفسها اعترفت بغلطها و مش هتكرره تانى
مختار / طب اهدى
عباده / انا هادى هو بس يبقي بعيد عن بنتى و انا هبقي فى منتهى الهدوء
مختار يتنهد عباده بيفرك
مختار / انا هروح اتكلم معاه و احاول اهديه
عباده / ما يولع انت كنت خلفته و نسيته
مختار/ يا سيدي لو ما كانش عشان عضم التربه اعتبرنا محتاجين
عباده / ما شوفناش من وراه غير ال
مختار/ هقنعه يبعد عنها
عباده / تمام
مختار/ بس ما اضمنش الوضع ده هيستمر لامتى
عباده / يا اخى انت حد مسلطك عليا طب يمين بالله
مختار/ ما تحلفش انا مش مستفيد حاجه من كل ده انا اساسا تعبت مش قادر مش عارف اللمها بايظه من كل ناحيه تعبت
عباده / انت اللى تاعب روحك و بدل ما تطلع ترتاح هتجرى تراضيه و تطيب خاطره
مختار / اهدى يا عباده اهدى
مختار يقوم و يمشي عباده يتنهد
..................