ماذا لو.. الحلقة الله اعلم
-يونغي بيوجه رسالة لمحبين الصيف-
_______
رسالتي لمحبين الصيف و فرهضته.. في البداية بس حابب أوضح، هو في ايه يا جماعة.. ايه الي حصل في الجو يا جماعه، هو احنا دخلنا النار واحنا مش دريانين ولا ايه.. الواحد بيخرج الصبح بيرجع كرسبي من بره و جوسي من جوه من كتر العرق و الفرهضه
الشمس واخده توكيل الخليج الصيف ده و طالعه هي وعيالها بترقع فينا وتحرق قفلنا و توحوحه، انا بقيت احس اني عايز استحمى وانا بستحمى في حاجة غلط بتحصل، انا بعرق وانا بستحمى حرام مش كده!
الجو ده مبقاش التكيف حتى يكفيه وهو على ٢٠، ده احنا زمان كنا بنجيبه على ٢٧ و نبقى قاعدين متكتكين بالبطاطين ولا كأننا في الاسكيمو
الله يرحم أيام ما كانت المروحة بتجيب هواء، المروحة دلوقتي مبقتش تحبب هواء ولو جابت بتجيب صهد اكتر من الصهد الي احنا متنيلين قاعدين فيه
الجو لو استمر على كده انا هعتمد الكلوت الزي الرسمي بتاعي و هيبقى اسمي كلوت مان، زي السوبر مان كده بالضبط مهو بأمانه الدنيا بقت لا تطاق
وعلشان الكيكه تكمل بقوا يقطعوا الكهرباء، رسالتي بقى لوزارة الكهرباء الي جايين يكملوا علينا ويموتونا بعرقنا اكتر، حبايبي ربنا يقطعكوا من الدنيا كلها، جايين يقطعوا الكهرباء علينا سبع ساعات، قالك ترشيد كهرباء، انت جاي ترشد في الصيف! وفي عز الظهر، انتوا بتستعبطوا يا جماعه ولا ايه
البرنس الي قاعد على الزرار و بيفصل الكهرباء علينا كل شويه إلهي يفصلوك من الدنيا كلها ونرتاح ، مفيش فن اختيار الوقت خالص، يعني حس بينا، متجيش الساعة اثنين الظهر والشمس طالعه هي وعيالها بيشوونا زي الفراخ الشامورت وتقوم ظارفنا واحد اقطع، ياكش تتقطع في لغالغك يا بعيد
اقطع بليل واحنا مخمودين مش حاسين، اختار مواعيد منك لله هنفطس، الناس كلها هتطلع من بيوتها تبات في العربيات والي مش عندهم عربيه بيشوفولهم اي عربية كارو يقعدوا تحتيها اهي هتكون طراوه اكتر من البيت نفسه
رسالة بقى لمحبين الصيف، ايه بقى ها ايه مبرركوا دلوقتي، عاملي فيها التراس الصيف وانت اصلا قاعد متلقح طول اليوم بالفانيله الحمالات و ضارب الكلوت الكاروهات بتاكل في طبق بطيخ و بتشرشر على نفسك توك القرف وقاعدلي قصاد التكيف واخده بالحضن طول اليوم وتيجي تقولي الصيف حلو
لا ويقولك الصيف هو الانطلاق، انطلاق ايه وقرف أيه تتك طلقه في معاميعك تشيلك نخلص منك و نرتاح، انطلاق ايه وقرف ايه، حاضن التكيف طول الصيف و لا بتنزل ولا بنشوف خلقه اهلك طول الموسم إلهي يعلقوك مع البلح فوق تقعد متطرطر من فوق متعرفش تنزل تاني
الا اما بنشوف وش اهلك طول الصيف الا لما بتروح تشحن كارت الكهرباء، متستفزوناش بقى يا جماعه هي مش ناقصه، وربنا اجيب ابويا وامي و اخواتي و نروح نقعد كلنا عندك في الاوضة و هنشغل التكيفات كلها و تدفع انت الكهرباء في الاخر، وانت عندك الكهرباء مش مقطوعه اصلا
في بقى الي يطلع يقولك الصيف يعني الساحل، ياكش يسحلوك على ظهر جاموسه هبله، ده احنا مش لاقيين فلوس نطلع القناطر يلا احنا لاقيين ناكل يلا انت هتستعبط، ده انت نفسك الي بتكمل بقيه الشهر ب٣٠٠ جنيه ده لو لحقت اصلا تروح بيهم وتقعد تسلف من اهالينا بقيه الشهر وتفرقنا في عيشتنا اكتر ما احنا مقروفين اساساً، لم نفسك واتكلم على قد جيبك يا روح امك
الكهرباء بتقطع و الفاتورة بتزعل والمرتبات قلت و حالتنا بقت في الشلحات خالص، بؤس و حزن مغلي وحالتنا بقت صعبة
نصيحة اخيرة مني من الخبير الاستراتيجي للحرارة الحارقة الي عايش فيها، محدش ينزل الثلاث شهور الي جايين خالص، الزم بيتك احسن ما تلزق في الاسفلت وانت ماشي، بقينا عاملين زي الي عايشين في حلة الضغط عمالين نطقطق، أي مشوار ميجيلكش من وراه فلوس اتنيل خليك قاعد مكانك
و بقى جو واحشني و عايز اشوفك والقصص دي، إلهي توحشك عربية لوري من غير فرامل ميعرفوش يلموك غير المغلقة، أي حد يكلمني هيوفلي عايز اشوفك هعمله بلوك
انا مش عايز حد يوحشني ولا انا وحشني حد انا مش عايز حد ييجي جنبي خالص محدش يكلمني لحد شهر ١٢ الي جاي
الاجواء بقت صعبة والفخاد سلّخت و ورمت الواحد بقى ماشي عامل زي البلونه الهيليوم ماسي مخرم و مورّم من كل حته مش عارف يقعد ولا يقف حتى من كتر التسلخات، تحط المرهم من هنا تزيد التسلخات معرفش في ايه
مزيل العرق و الحموم الكتير، استحموا يا جماعه بالله عليكو حرام والله، استحمى وادعك و افرك كويس، علشان كده كتير، الامكان العامة و الخاصه والمقفوله والمفتوحه وكله بقى لا يطاق، مبقاش في نفس ولا أكسجين ولا حتى ثاني أكسيد الكربون ولا الكبريت
تحس ان في مسابقة في النتانه والقرف على دماغكم، كله بيعلي على نتانه كله، يبقى لسه ضارب محشي امبارح هو وأمه وطالع يعلي على ام سماح الي لسه ضاربه كوارع امبارح هي و جوزها وتيجوا تقعدوا في الشغل جمبي تعموني وتنشروا غازاتكوا السامه عليا واحنا في النص هنموت منكم
كله شغال من تحت و من فوق كده كتير الاوزون هيمشي و يسيبنا من كتر الغازات الي بقت ماليه الجو اكتر من البني آدمين، وهو اتخرم من شويه اهو من قرفكم، هنموت و هننقرض مش هنلحق نكمل، حضارة ٧٠٠٠ سنه هتخلص في بومبه
انا من موقعي هذا اطالب وزارة التموين انها توزع مع التموين مزيل عرق مش عيب ولا حرام، مش عايزين زيت وسكر مش عايزين ناكل اصلا احنا عايزين مزيل عرق، نستحمى، ولع في نفسك بالكلور و الفينيك و، استحمى ادعك و افرك و انضف يلا ريحتك بتوصلي وانت في اخر الشارع
معلش بقى يا جماعه رسالة اخيرة للناس المتطفلين الي مش بيحلالهم الزيارات الا في الصيف، يعني نبقى قاعدين مرحرين في الصاله قاعدين بالسليّبات وفجأه الاقيك قاعد على حجري من غير احم ولا دستور عيب يا جماعه ميصحش كده، مش بلحق اجري انا والحج وشكلنا بيبقى وحش
بالنسبة بقى للاخت فيروز الي قالت حبيتك في الصيف، يعني ماله الشتاء يعني قصّر معاكي في ايه، انا مش قادر افهم حبيتك في الصيف ايه ونيله ايه في التلزيق وقله الحما الي الواحد عايش فيها، يعني دس مش أجواء حب خالص دي أجزاء عكننه و غازات سامه ضاربة في الجو وقرف على دماغكم، مهو مش هيبقى حب وعكننه وقرف
فالناس الي بتحب الصيف متورنيش وشها لحد ديسمبر علشان مطلعش عليها حر الصيف كله وهنزل فيك ضرب لما تقولي ياما ارحميني
يلا انا كده خلصت رسالتي وربنا يقدرنا على فعل الخير والسلام عليكم ورحمة الله وبركاته