شقة رقم ٧

ماذا لو.. [ تاي في المخابرات ]

ماذا لو.. الحلقة ٢٤
{ تاي في المخابرات }

________

" ايه الدنيا الضلمه دي، انا هفضل هنا كتير ولا ايه

١٠.. ٢٠.. ٣٠.. ٤٠.. ٦٠.. ٨٠.. ١٠٠.. ١٢٠.. ١٥٠.. ٣٥٤٧٨

شوفت الفار السندق الي أكل البندق..

طب يا جماعه يالي طافين النور.. يا جماااععاااه.. ياا جماـ"

فجاه لقى حاجة بتتشال من على راسه و الضوء ظهر وظهر معاه شخص أقرع طول شكله مخيف، في اوضه فاضيه وايده مربوطه ورا الكرسي الي مقعدينه عليه ، فـ لف جنبه للي شاله القماشه من على وشه

" لا حط بالبتاعه السوده دي على وشي تاني بعد اذنك "

طنشه وبعد عن الطربيزة يخرج بره وبدأ يقرب منه الراجل المخيف بالنسبه ليه والي كان بيبصله ببصات ثابته حاده خوفته فـ بدأ يعترف على نفسه بنواح

"وربنا يا باشا ما انا الي سرقت الموبايل من جيب البت تايانا واحنا في المواصلات ده الواد عبدو نتانه"

الراجل الاقرع متعجب منه
" موبايل ايه يا ابني؟!"

" ولا انا الي سرقت الخمسين جنيه من جيب الولا جيبمو، اصله كان مكّمر عليهم وبيكذب عليا"

" انت بتقول ايه يا ابني انت؟! "

وقف نواح وبصله
" مش ده السؤال بردو؟! "

الاقرع لسه متعجب منه
" سؤال ايه، انا لسه مقولتش حاجة اصلا! "

" طب امال ايه يا باشا، انت جايبني هنا ليه؟! "

همهم الاقرع ومسك الازازة المشبره من فوق الطربيزة ومدها ليه مردف بإبتسامه جانبيه خبيثه
" تاخد كأس؟ "

بص تاي الازازة وبعدين بصله وقال
" لا بلاش الكأس انا عايز الدوري وياريت الدوري الي بيلعب فيه ميسي"

رده استفز الاقرع ف لطشه بالقفا جامد
" اااعععع ايه يا باشا انا معملتش حاجة حرام، ايدك ثقيله اوي! وبعدين انتوا ماسكين الشخص الغلط مش أنا الي فجرت الجنينة! "

" فجرت جنينة أيه؟ "

" معرفش بس هم الي بيتخطفوا زي حالاتي كده بيكونوا مفجرين حاجة لازم "

الاقرع بدأ يزهق ويتخنق من ردوده
"يا ابني ركز معايا بقى تعبتني وانا لسه متكلمتش يخربيت امك يا اخي! "