شقة رقم ٧

ماذا لو .. [ يونغي و السنة الجديدة ]

ماذا لو .. الحلقة العاشرة
- يونغي يوجة رسالة بمناسبة العام الجديد -

" كل سنه وانتم طيبين يا جدعان ، سنه جديده علينا جميعا ، ٢٠٢٠ هتبدا خلاص بعد كام يوم فكان في رساله لازم اوصلها لبعض الفئات من البشر هي عارفه نفسها كويس او مش عارفه لانها معندهاش دم ..

و بمناسبة اقتراب العام الجديد، اولا احب اوجه رساله لاي كائن حي كان في حياتي لان ماحدش ضامن عمره ودي رسالتي لاي حد كان في حياتي، اغتابني، فكر يلعب بديله من ورايا او شوه سمعتي او اتكلم عني بالوحش او وقع ما بيني وما بين اي حد انا بحبه و الي اخره.. رسالتي ليك إلهي تنفجر مطرح ما انت واقف ،ياكش تولع مكان ما انت قاعد يا بعيد يجيلك صاروخ ار بي جي 7 راكب يطيرك يوديك زحل ما تبقاش عارف ترجع منين وبعدين انت فاكرني هسامحك يلا ؟ مهو انا مش هسامحك علشان انت عره اصلا جتك ستين نيله تاخدك مطرح ما انت قاعد يا شيخ إلهي تتسخط قرد مسلسل وما يعرفوش وشك من قفاك من التسلخات اللي هتجيلك

و رسالتي لاي حد خسرني او عايز يخسرني او بيفكر و بيستهبل احب اقوللك الباب يفوت جمل و اللي عنده معزه يربطها و صدقني الزريبه فيها حيوانات كثير اوي مش ناقصه حيوانات زياده تتحط فيها ما هي مش ناقصه قرف بصراحه ، روح خذ زمايلك و شوفوا اي زريبه تانيه تقعدوا فيها تتكوا ستين داهيه تاخدكوا جميعا وياريت تسيب الباب موارب علشان لو في حد عاوز يحصلكوا يغور هو كمان مهو الواحد مش ناقص اصله وحسبي الله ونعم الوكيل فيكم و ابقي خد الباب في ايدك و انت ماشي

اه ثانيا بقى و الاهم دي رساله بقى للناس اللي داخله وطالعه في حياتي فاكرها مرجيحه او باب زويله عشان تفضل طالعه داخله خارجه شاربه واكله نايمه اكن مثلا الوكاله من غير بواب او كان بيت ابوك وانا ماعرفش مثلا و الناس اللي بتدخل وقت ما تدخل وتخرج وقت متخرج الناس الرمم دي احب اقولهم هي زريبه يا بابا هي زريبه يا حبيبي؟ انا عايز افهم بس انت ايه ؟؟ مفيش خالص مفيش احساس خالص مفيش اي حاجه في الحياه فاضي انت للدرجه دي فاكر نفسك داخل حمام بيتكم ؟؟ ما تحترم نفسك بقى ، ما انت لو مش قد العيش والملح متكلش منه اصلا يا بابا و وفره للناس الثانيه لكن متقرفنيش مش عاوز اتفضل بالسلامه ولا هي تفاصه وخلاص انا باقوللك اهو نلم نفسنا من الاول احسنلك بدل ما تلاقي جزمه مقاس ٤٩ بتسلم علي فخادك و اماكن اخرى بدون ذكر اسماء ، في ايه نحترم نفسنا من الاول كده ده ايه القرف ده

اخيرا بقى وليس اخرا ، رساله بقى للناس المستجدة في حياتي للسنه الجديده ان شاء الله ، بص يا حبيب قلبي بصي يا حبيبي كده عشان نبقى متفقين فلو انت داخل حياتي على اساس ان انا غطاء وانا اللي اغطيك وقت ما تحتاج و يحميك وقت ما تكون جربان وادفيك وقت ما تكون سقعان و اشربك وقت ما اكون عطشان و شغل الأمومه ده فانت فاهم غلط خالص فياريت ننسحب بهدوء قبل ما نطلع الجزمه انا مش بيبي سيتر يا بابا ولا انت النوغه الي هشتكها يا حبيبي انا باقولك اهو لو انت داخل عشان كده احسنلك تمشي قبل ما اتحول عليك

وثاني حاجه بقى يا حبيبي لو كلمتني وما ردتش عليك فده معناه ان انا مش طايق اشوف وش امك دلوقت ولو اتصلت عليا فانا هارد وقت ما انا عايز انا مش فاتحه كول سنتر هو و ثالث حاجه و الأهم ما تعمليش معامله انا خطيبتك او خطيبك يعني على حسب انت رايح في انهي اتجاه انا مش خطيبتك يا بابا تطلب مني قبل ما انزل اقوللك انا رايح وجاي منين ولبست ايه و هقابل مين و شغل العبط و الهبل ده ف انسى حبيبي انا مش فايق للتخلف ده خالص

انا حياتي مش باب موارب لاي حد عاوز يدخل ويخرج فيها و يقول الي هو عايزه ما هي مش زريبه يا بابا هتخش وقت ما تخش تخرج وقت ما تخرج بعد كده هابقى اعمل الباب كارنيهات عشان مش اي عره فيكم يعرف يدخل ويخرج براحته انت لو هتخش تحترم نفسك

و رساله بقى للناس اللي كانت تعرفني قبل كده وانا قطعت علاقتي بيهم علشان بس فاكرين نفسهم اعلى من برج ايفل ، الله يرحم ايام ما كنت بتستلف منى العشره جنيه عشان تروح بيها يا منتن ودلوقتي عمال تتفشخر بالايفون ١٠ اللي شاريه من جيب ابوك يا عره يا ناقص ده انا كنت بعطف عليك زي الكلب اللولو يا ولا

وفي النهايه لو اي احد محشور في زوره جمله وحشه او كومنت مش لطيف زي وشك و نفسك تقوله فياريت تحتفظ بيه لنفسك يا عره و تموت بيها مخنوق اكرملك و بس كده ده الي كنت حابب أوصله قبل السنه الجديده و يا رب تكون سنه ٢٠٢٠ سعيده عليكو و تخلو من المصائب و الغرائب و الكوارث و السلام عليكم ورحمة الله وبركاته "

_______

ودي كانت رساله يونغي بمناسبه العام الجديد ،و انتم ايه الرساله الي تحبوا توصلوها بمناسبه العام الجديد ؟؟

كنت حابه اني انزل حاجة بمناسبه الموضوع ده بشكل كوميدي، يا رب يكون عجبكوا و دي تصبيره بس عبال ما الفصل ٣١ اخيراً هينزل اليومين دول ترقبوا 🖤