شقة رقم ٧

ماذا لو.. [ السباعي طلعلهم جني روش ]

ماذا لو.. الحلقة الثانية عشر
- السباعي طلعلهم جني روش -

___________

" اوف هو فين الريموت ده انا مش لاقيه ياااه "

تايهيونغ لوحده في البيت و كان بيدور في كراتين التخزين الي تحت السرير على الريموت الاستبن بتاع التلفزيون بدل الي اتكسر علشان الاستاذ جيمين كان بيتخانق معاه انه عاوز يتفرج علي المسلسل و تاي عاوز يتفرج علي الماتش و انتهى الأمر بالريموت راشق في نص الحيطه متكسر نصين و علشان كده بردو انتهى الحال عند تاي انه بيدور في كل الكراتين

شد كرتونه كانت في اخر السرير عليها غبار كتير و يمكن شبك عنكبوت بس مش كتير فكحله كام كحه كده و حس ان في الصندوق ده الأمل و راح فاتحه لقى حاجات مالهاش اي لازمه و شكلها قديم و متكسر و كان من ضمن الحاجات دي براد شاي صغير لونه نحاس و مصنوع من النحاس و تحس انه مترب بس هو مش مترب فتاي استغرب بيعمل ايه في وسط الكراكيب دي

" مممم هو ايه الي جاب براد الشاي هنا؟؟ ده شكله غالي اصلاً و لو اتباع ممكن يجيب سبوبه كويسه بس يتنظف الأول كويس و اعمله إعلان هيزغلل عينين الناس و يفتكروه قيم و الفلوس هتنزل عليا زي الرز كده هيهيهي الله على تفكيري الجبار هاهاهاها "

ضحك بشر علي تفكيره الجبار و تخيل الفلوس و هي بتلعب في ايده بيلعب بيهم فـ سحب البراد بره الصندوق خلاه في ايده و رجع الكرتونه تاني مكانها تحت السرير وخرج من الاوضه و نسي اصلا هو كان بيدور على ايه من الأصل كل تفكيره في الفلوس الي هيكسبها هيعمل بيها ايه

تاي قعد على الكنبه و في حضنه البراد مسك المفرش الصغيره الزينه الي على الطربيزه و بدا يمسح بيه البراد ولو جين شاف الي بيعمله هيمسح بيه، البلاط بلا تردد

تاي فصل يمسحه لحد ما حس انه نظف بس هو شكله لسه منظفش فـ استغرب و بدأ يمسح عليه بكم تيشيرت لعله ينظف وهو بيتمتم

" ما تنظف بقى ايه الزناخه دي!! من كتر القاعده كمكم فعل كده ولا ايه و الله مش عارف وو.. "

فضل يتمتم لنفسه وهو بيلمع بضمير فجأه البراد بدا يتهز في ايده بقوه فـ نطره بعيد عنه تلقائي وقع علي الارض و غطاه اتفتح بدا يطلع دخان ازرق و تاي عينه وسعت علي الاخر و قرب يتلزق في الكنبه

اتكون الدخان ده و اختفى ظهر منه فجأه بني آدم من غير رجلين طاير في الهواء، لابس زي وشاح باتمان مربوط عند رقبته لونه ازرق، بيكح و بيهوي قصاد مناخيره

" ايه التراب ده كله مش بتنظفوا اول بأول ليه "

تاي لما أدرك الي شافه صوت سريخته جابت اخر الشارع
" عااااااااااااااااا "