【 فصلية الضابط انمار 】
【بقلم _ Zahraa Al-Fartousi 】
لا تنسون التصويت والتعليق ع كل فقره + متابعة حسابي .
،
اتمنى لكم قراءه ممتعه ..♡
.............
من هويتك ،
لِمت روحي الما هوّت بسنين صغري
ومـن لگيتك
روحـي صارت نذر لأهل الهوى العذري
وهيچ اثاري ؟
الحب حلاته يشع سرور ابين صدري
ياغرامك ،
مثل طعمه ، روحي ما شافت سعادة
الدنيا حد الشوف
حلوة حلوة
والگلب ينثر وداده
عيونكم تبرالي نجمة
تدور بيه شما تريد
طافت بروحي حنان
وگرّبت مني البعيد ..
___________________________
"يوم الخميس 23 مارس"..
اول يوم رمضان جان يوم مميز ويجنن ويه
عائلتي ، كعدت من وكت حتى نجهز نفسنه لفطور عائلي عند أهل انمار ..
.
بديت يومي بالقرآن والصلاة وقريتلي كم دعاء
بعدهه رتبت البيت وتوجهت لغرفة أطفالي ..
فتحت الباب بهدوء وكعدت أطفالي ورتبت غرفتهم بعدهه دخلوا أخذوا شاور وبديت اجهزهم ،
لبست فهد دشداشه بيضه وغتره حتى يطقمون هوَ وأيهم وانمار ..
بعدهه جهزت فوفه لبست فستان اسود قصير وفوكه مثل البشت وسويت شعرهه ويفّي بطلب منهه جانت تريد مثل الباربي مالتهه ولبستهه سواراتهه والحجل إلي جابهم إلهه انمار هدية عيد ميلادهه ..
خلصتهه ورحت جبت أدهم وكذلك كملته وريكتهم وكعدوا بالصاله ع التلفزيون .
.
دخلت لغرفتي جهزت ملابسي بهدوء جان انمار نايم ودخلت اخذت شاور ع السريع وطلعت ، سويت مكياج خفيف بعدهه وكفت امشط شعري واتذمر لأن ردت اكصه وانمار ما رضه ،.
اجاني صوته وهو يكول :
- شلون صَباح هذا جعل كُل الصَباحات بوجهج .
باوعتله من المرايه ورفعت حاجبي وكلت :
- ايي شلون صباح مال واحد صارله يوم ونص نايم موو ؟.
ضحك وكام اجه يمي حضني من ضهري وگال :
= شنو هاي حتى اشتاقيتلج بعد ما انام هاي هيه .
- ههههه صح النوم حبيبي ، يله صحصح اليوم معزومين لو نسيت .
= لا يابه ما نسيت شعندي انه ربع ساعه واكمل
وانتي اكيد كاعده من الصبح وبعدج هاا .
تخصرت وكلت :
- لا والله عيني انتَ شعندك مثلاً .. انه بنيه عندي مسؤليات .
كرص خدي وباسه ، گال :
= ههههه جعل محد غيرج عنده مسؤليات .
ابتسمت ودرت ع المرايه امشط شعري واكول :
- يله عيني خلي اكمل شعري ، والله ع العيد اكصه
هو شعري لو شعرك ؟.
= بس عُوفي شعَرچ الخاطر الله .
اخذ المشط من ايدي وضل يمشط شعري ويكول :
= منين تتعاجزين من التمشيط هاا أها خلصنه هوَ
شبي بس انتي اخخ منج تحبين تحركين أعصابي .
- اوي عيني ههههه يله هاي هيه منا ورايح انتَ
تمشط شعري اتفقنا ؟
= اتفقنا .
- اكُلك
= نعم
- جعل محد غيري يحرك أعصابك .
= هههههه
كرص خدي وكال :
= خل اروح من يمج بس أضل بعد افطر .
- يااا ههههه شسالفه .
اجه شم عطري وطبع بوسه خفيفه وكال :
= عطرج بويه عطرج يسطر اللهم إني صائم .
- هههههه يله كافي وخر والله حرام عليك .
كرص خدي وضحك وراح للحمام ،.
كملت نفسي رتبت شالي ورحت شغلت بخور
واجيت لغرفتي ، بخرت نفسي وبعدهه تقربت
يم انمار بخرته ابتسمتلي وهمس :
= منين الگاها يربي مَن الضحُكة لو مَن العيّون ؟
- اندري الله يعينك .
رفع حاجبه وگال بضحكه :
= لاا والله ؟
- ايي والله اصلاً هنيالك علي .
= هنيالي مو .
- شنو عندك اعتراض ؟
= لاا يابه انه ممنون هواي من ربي ورزقني بهيج
وحده حلوه ومعدله وشاطره شنو اريد بعد .
- امم اصبغ اصبغ بعد عمري عادي .
= انچبي شنو اصبغ جاي احجي الصدك .
- خوش خوش .
صحت لفهد وفوفه يجون حتى يشوفهم انمار ،
دخلت فيَ تتدلع بمشيتها ولازمه فستانهه بطرف
اصابعها راحت يم ابوهه وكالت :
- صباح الخيرر بابي .
انمار فتح ايديه والضحكه ونضراته الهه كُلهه
حب وإعجاب :
- هلا وهلا .. ومية هلا شنو هالشيخه الجميله
شنوهالطله الحلوه ماشاءالله بنيتي تخبل طالعه .
شالهه يبوس بيهه ،
بعدهه راح لفهد وكال :
- هاي شطالع ولك كسرّت ع ابوك وباسه بخده .
فهد : ههه شكراً بابا حبيبي .
كعدهم ع الميز يمه وطلع مسك وخله بأيده ومسح
على شعر فهد وفيَ ،
عفتهم ورحت جبت أيهم جان غافي بالكرسي مالته خليته بجربايته ،
بعدهه رتبت تمريه جنت مسويتهه قبل يوم
بمساعدة فيَ ،.
......
"صارت الساعه ٤ العصر تقريباً وصلنه لبيت اهل
انمار ، فهد لازم بيده علبة بقلاوة وفيَ شايله
التمريه وانمار شايل أدهم ،
دخلنه للبيت وبدوا الشيخ والشيخه يرحبون
بفهد وفيَ ألهم معزه خاصه ..
راح انمار كعد يمهم بالصاله وانه رحت للمطبخ
جانت ساره موجوده تسوي الفطور
سلمت عليهه وبديت اساعدهه ، سويت زلاطه
والمشروبات بعدهه حلى بارد ع السريع كملنه
وبديت ارتب السفره ،.
شويه وصارت هوسه وصوت عرفنه اجت حنين ، بعدهه بالباب وتصيح :
حنين : شنوو مسويلنه فطور لو لاا ؟
طلع إلهه انمار وكال بشقه :
- هم أنتي .. هاي شعندج هنا وين ما اروح الكاج ؟
حنين : والله عيني اجيت اتفطر عند اهلي
مشتاقتلهم .
انمار : بس انه سمعت انتي أمس هنا ومتسحره
عندهم ورايحه يمتى لحكتي تشتاقين؟
برطمت وكالت : يعني شنو ارجع ما تريدوني ..
ضحك انمار وراح حضنهه وكال :
- لاا يابه شلون ما نريدج غير الحب انتي .
اجه ياسر جراهه من حضنه وكال :
- كافي كافي يله نريد ندخل شبيك ما شايف
اختك ؟
انمار ضل حاضن حنين وكال وهو عاكد حواجبه :
- شنو عيني خاف تغار على اختي مني نوب؟
ياسر : لا عيوني بس جعت اريد ادخل اكل ..
مد راسه لباب الصاله وكال :
- ويين عمتي الغاليه شمسويتلنه فطورر ؟
انمار هز ايده وغما بنص وجهه وكال :
- ما تصيرلك جاره ضل امشي وره بطنك .
- هههههه شعندي غيرهه .
دخلوا جوه واجتي حنين وكالت :
= ولج والله مشتاقتلج صارلنه شكد ما كاعدين
سوه عندي طن سوالف .
- اي والله حتى انه مشتاقتلج ، يله تعاي خلي
نصب الأكل قبل الأذان .
= اوك يله .
.
كعدنه كلنه سوه ع الفطور وصارت لمتنه
حيل حلوه ،
بعد الأكل كمنه صلينه وعزلنه المطبخ انه
والبنات وسوينه جاي واخذنه الحلى ورحنه
كعدنه بالصاله .
.
جانوا كلهم موجودين الشيخ والشيخه وياسر وزوج ساره واحنه البنات ما عدا أنمار .. تقربت يم حنين وكلت :
- حنون ما شفتي انمار ؟
= حبيبتي شفته اخذ كوبه مال جاي وراح يمكن بالمطبخ او بالطارمه ما ادري .
- أها اوك .
.
التهينه نسولف سوه وكلمن يسأل ع اخبار الثاني ..
باوعتلي حنين وكالت :
= زهراء تدرين بملاك حامل وسقطت الطفل امس .
- ياا خطيه الله يعوضهه .
= نوب هذا ثاني طفل وهسه زوجهه يهددهه
لو تجيب طفل لو يطلكهه .
- عززه شكد متخلف علمود طفل يطلك .
= يمعوده هو اصلاً واحد ادبسز ما ادري هيه شلون وافقت تزَوجه ، تخيلي بالعرس ويبصبص ع النسوان ولا يستحي أبد .
- الله يساعدهه ويعوضهه خطيه .
= و المصيبه انقهرت عليهه احاول اقنع نفسي هيَ تستاهل بس بعدين انقهر .
- لاا ولج خطيه تبقه بشر وحلم كل أنثى الأمومه
نوب تنحرم منهه ، الله يسامحهه ويرزقهه الذريه
يارب .
= آمين يارب .
،
مرت تقريباً نص اكثر من نص ساعة واحنه كاعدين وانمار ماكو ..
ترخصت من البنات وكمت رحت للمطبخ دخلت
وجان انمار واكف منطيني ضهره ومخلي تلفونه
يمه ع الميز وفاتح سبيكر ..
ما حس علي من دخلت ، اجتني صدمه من الكلام
إلي سمعته وانقرفت جان صوت بنيه وجان
الكلام بينهم :
" البنيه بتوسل = ساعده الله يخليك ما عندي غيره
هو أبو بيتي وانه يتيمه ما عندي احد وعندي بنات .
- ايي خويه انه شلون اساعدج وانه بس ضابط وهم اصلاً زوجج شغلته مو يمي ، وإذا تردين تساعدينه خليله محامي زين وإذا ما تكدرين انه اتكفل بي ،
بس مو تكولين تعال طلعه إلي ما اكدر شغلته صعبه .
= لاا لا تكول هيج زين شوف عندي عرض كلش حلو الك وما أتوقع راح ترفضه .
- تفضلي؟
كالت بدلع = شنو رأيك تجي لبيتي نتفاهم انه وياك وهاا اذا ما اعجبك شوف وحده من بناتي إلي تعجبك وعلى مزاجك ما نمنعك .
- استغفرالله شبيج خويه تتاجرين بنفسج وببناتج
إتقي الله ع الأقل احترمي شهر رمضان .
= ههههههه اويي اموت ع اليخاف من الله عشقي
نوب ضابط والله تعال وما تندم واصلاً لا تطلع زوجي ما أريده اريدك انتَ .
- روحي بابه روحي وإذا اتصلتي بعد راح تنسجنين
يم زوجج المره الجايه .
= وأنت موجود موو ؟ هههههه اوك موافقه تعال اسجني .
- اكلي خره لج ساق** مو تكولين عندج بنات
خافي الله بيهم ولو انتي وامثالج ما يعرفون
رب العالمين ولو احجي منا الباجر ما يفيد
وياج ، ورقمي تمسحينه وإياج مره ثانيه تحاولين تتصلين بيه يا نعال ولو انتي نعال برجلي
ما اشتهي البسج .
سده بوجهه وركعه التلفون ع الميز ".
.....
تقربت يمه دار علي وكال :
- ها ام الزوز تردين شي ؟
- لا حبيبي سلامتك ، بس ليش عصبي ومنو هاي التحجي وياهه ؟
كرص خدي وكال :
شغل هذا شغل .
وطلع .
ضليت واكفه بمكاني صافنه ، رحت اخذتلي
كوب جاي ورجعت للصاله كعدت يم الحجيه
وحنين ،
اجه انمار كعد يم الحجيه باس ايدهه
وكال :
= ها حبيبتي محتاجه شي تردين شي .
الحجيه : هلاا بجبيري هلا يمه حبيبي .. لا رايده
بس سلامتك وليدي .
باسهه وگال : خاب اروحلج فدوه انه شلون
حجيه حلوه هاي ياا يابه شكد صاكه .
الحجيه رأساً خدودهه صارن حمر وغطت
وجهه بالشيله وكالت :
= انزوول يمه كافيي روح غازل مرتك عوفني .
= ههههههه راح اكلج ما بيهه مجال .
دفعته بشقه وضلوا يضحكون ،.
.
اجه كعد يمي وتقرب وهمس :
- عيوني انه عندي شغل رايح تردين اوصلج وياي ؟
= لا حبيبي راح نضل هنا نتسحر سوه ، تتأخر لو
تجي من وكت ؟.
- ما ادري يمكن اتأخر شوي عينج ع الجهال ،
مع السلامه .
كال هيج وكام أشر لياسر وكال :
- يله كوم عدنه شغل هميالله .
ياسر : ما يصير تاخذلي إجازه راسي يوجعني؟
- تدري عنتره بن شداد شيگول ؟
ياسر : شيگول ؟.
- يگول " سيفي كان في الهيجا طبيباً ..
يداوي رأس من يشكو الصداعا " ، وهسه إذا ما تكوم اخلي السيف براسك .
= ههههه اشتغل انمار المتنبي اليوم ناوي تخلصهه أشعار علينه موو والله ما اجي وياك .
- انه رايح اذا ما تجي بكيفك ما اسويلك شي بس افصلك وأكص من راتبك .
= اخخ بويه حكم القوي ع الضعيف بعد شنسوي
هاي اجيت يله امشي .
- هاا نوب هسه انه صرت موزين ؟
راح ياسر حضنه وكال :
= لا حبيبي انتَ وين اكو منك اصلاً انه لو ما انت موجود بالشغل جان بطلت من زمان .
- امم يله امشي امشي لا تسخت .
طلعوا سوه وياسر دار عليه وكال :
= خويه الله يساعدج علي شلون متحملته هذا؟
انمار : ولك يااسرر .
= اشاقه حبيبي ابو فهد الغالي تاج وباج تحياتي .
انطا تحيه وطلع كدامه .
متنه من الضحك عليهم ، وره ساعه تقريباً
اترخصت ساره ورجعت لبيتهه وضلينه كاعدات انه وحنين نشوف مسلسل ع التلفزيون والجهال
كاعدين يلعبون يمنه ،.
اجت حنين يمي وجابت بيدهه كاسه مليانه
حب شمسي كعدت وكالت :
= زهرااء اريد اكلج شي ..
باوعت بأستغراب وكلت : كولي شكو شصاير ؟
= ما كو شي حبي شبيج اخترعتي .
- ههه ولج لاا بس كولي شنو تردين تحجين .
= شوفي انه سمعت شي .
- شنوو ؟
= تدرين بالمركز يجون بنات يعني مو بس ولد .
- ايي وشنو يعني ؟
= ولج ما فهمتيني ، قصدي رجولتنه كل يوم
يشوفون شكل وهمه منا حلوين ورتب وانه الصراحه أخاف لا ينحرفون عن الطريق .
- ها هههههههه شبيج حنين شنو ينحرفون
ههههههه عززه يمه .
= ياا شوف الفطيره زين شوفي صفني وياي .
- اوك .
= تخيلي تجيهم وحده حلوه وعيونهه ملونه وشعرهه أشكر وصغيره وتخيلي ياسر لو انمار يحقق وياهه وهيه تبجي وتتموع كدامه وهو يكوم يحضنهه وينطيهه مي ويكلهه لا تبجين موزين على عيونج الحلوه تروحلج فدوه مرتي ،.
طول ماهيه تحجي انه بس صافنه عليهه وعلى
كلامهه ، كلت :
- تحجين صدك لو تتشاقين انتي ؟ هههههه شبيج
حنون وإذا تجيهم بنات عادي المفروض احنه نثق
بيهم وحتى لو يسوونهه انه بالنسبه إلي
ما اسوي اي شي بس أذبحه .
= يممه اخوي ههههه اسمالله شحدهم يسوون هيج .
صفنت وتذكرت المكالمه مالت انمار بالمطبخ تخيلت تجي يمه وتسويله أغراءات ،
سديت عيوني وكلت :
- يمه اسمالله حنين شنو فتحتي علي موضوع
راح تخليني افكر .
= ايي جا شلون لازم نفكر وانه عندي فكره .
- وهيه ؟
= خلي نتصل عليهم كل دقيقه ونراسلهم كل شوي ولازم يجاوبون اذا ماجاوبوا بعد ما نحجي وياهم .
- ياا اي غير عندهم شغل شلون تردين
يجاوبون كل دقيقه ؟
= نكلهم هذا الموجود إذا ما عجبهم بكيفهم بعد .
- امم اوك راح اتصل انه هسه واشوفهم وين .
= يله وسئلي على ياسر وياج .
- تمام .
اخذت التلفون واتصلت مره ومرتين وثلاث وما جاوب باوعت لحنين وهيه صفنت وكالت :
= لا اكيد عندهم شغل ما يكدر يفتح خط .
- ايي مو كتلج .
= بس خاف ما عندهم شغل ؟
- اوفف حنين كافي ناويه تطلكيني اليوم ..
= ياا بله جربي بعد اذا ماجاوب ... يمكن عنده شغل .
ذبيت نفس وأتصلت مره ثانيه شويه وفتح ،
ضحكت وحنين رأساً اجت وفتحت سبيكر وتأشرلي
" سئلي على ياسر "
هزيت راسي بمعنى اي ، اجه صوت انمار
وهو يكول :
- هلا بابا محتاجه شي ليش متصله هواي .
= اهلاً انمار لا بس ردت اسئل يمتى تجي ؟
- عندي شغل هسه اتأخر شوي .
= هاا اوك زين ياسر وين حنين تسأل عنه .
- كاعد بالمكتب كبالي هم يتأخر نرجع سوه .
= تمام يله باي .
- مع السلامه حبيبتي .
باوعت لحنين وكلت :
- هاي شفتي مو كتلج عندهم شغل .
= ايي والله طلعوا مؤدبين وانه أضن بيهم ضن السوء .
- ههههه يله حبيبتي عوفيهم وتعاي نتابع المسلسل احسن .
.
ضلينه للسحور تسحرنه سوه وكلمن رجع لبيته ..
- نومت أطفالي وصليت وكعدت ع الجربايه ، انمار
جان يصلي نوب ضل كاعد يقرا قرآن ، ضليت كاعده اباوعله ومبتسمه ، نوب اجت على بالي حنين وفكرت أنو اسئله ..
خلص كام طبك مصلايته واجه يمي .
كتله :
- تقبل الله
= منا ومنج حبيبتي
اجه تمدد ع الطرف وانطاني ضهره .
كمت رحت بجهته وهمست بصوت ناصي:
- انماار
= امم
- اريد اسئلك سؤال ..
باوعلي وعكد حاجبه كال :
= انتي من هدوئج وكعدتج هسه كبالي مبين
اكو شي جبير .. اي سئلي .
كعد وسند ضهره وانه كعدت كباله باوعت بعيونه وكلت :
- شسمه انمااري انته هم تجيك بنات للمركز يعني
علمود تحقيق او هيج شي يعني ...
= هاا انتي مساع سمعتي المكالمه بالمطبخ وهسه
جايه تسألين موو ؟
- ايي وهم صار عندي فضول عن هذا الموضوع وانه
ما سألتك عن هيج شي ابد .
= امم زين تدرين انتي هاي مساع إلي سمعتي كلامهه كل يوم نشوف عشره منهه .
رفعت حاجبي وكلت : ياا ماشاءالله وانت جنك
متونس عيوني ؟
= هههههه وانتي شايفه الشكولات التجي هناك كلهن من النوع الاربعيني الجاد ويلعبن النفس .
- هاا يعني إذا تجيك وحده زغيرة ما تعلب نفسك ؟؟
فتح عيونه بصدمه وگال :
= شبيج بابه اليوم صاعده هرموناتج ؟
خزرته وكمت وكلت : تصبح على خير .
هو بس يباوع ومصدوم ، رحت لجهتي ونمت تقرب يمي عدل شعري وكال :
= ليش ضايجه اليوم منو محاجيج؟
- محد .
= جا ليش تدورين حجه حتى تزعلين ؟
- اريد انام .
غطيت وجهي ونمت ، جر الغطه مني وسحبني
لحضنه وكال :
= انه لو اريد اصاحب بنات جان من قبل صاحبت
مو هسه من تالي ، بعدين انه جاي اروح اكمل شغلي وارجع شايفتني فد يوم مرقم بنات لو متحرش بوحده حتى هسه اصاحب ؟
رفعت راسي وباوعتله وكلت :
- يعني هسه انتَ ما تصاحب بنات ابد ؟
= ترديني اصاحب ؟
- لااا
= هههههه تعاي نامي احسنلج .
- يعني تقنعني هسه انتَ تحبني وما تباوع لغيري ؟
= شتكولين انتِ ؟
- طبعاً تحبني وإذا تباوع لغيري اموتك والله .
= لا والله ؟
- ايي والله اموتك شنقاً وحرقاً وذبحاً .
= عنيفه مو بيدج .
- تريد تجرب ؟
= ااا هههههه خوش انه اعلمج .
حضني وباسني بخدي حيل وگال :
= خو ما فطرت هسه انه ؟
- بس وخر من يمي شوي وما تفطر .
شد حضنه علي وكال :
اريد انام تعبان .
- نام عيني نام .
ضليت اباوعله وافكر يخوني لو يصاحب بنات
خليت ايديه على ركبته وضليت اخنك بي
وهو نايم .
دفع ايدي وباوعلي وگال :
= شبييج اليوم اجتج الحاله ما تشوفيني نايم ؟
- جاي اتعلم شلون اخنكك اذا تخوني .
= استغفرالله العظيم نامي لأن بعد حركه وحده
وراح اكوم اطيح حضج .
شفته عصب وكلامه جدي رأساً غطيت راسي ونمت ، هو حضني ونام وهمس :
= ادبسز .
- بس تحبني مو ؟
= ايي احبچ .
- عفيه .
ضحك وكال :
= مو اكلج ادبسز ما تصدكين .
- أشكرك .
قوه حضنه علي وهمس :
= ولو عيوني .
ابتسمت وغفيت ..
.
.
.
بعد مرور كم يَوم لطيف وخفيف من أيام شهر رَمَضانْ المُبارَك ...
- انه جنت بالمطبخ أجهز للسحور ، واطفالي
نايمين وانمار جان كاعد بالصاله يقره قرآن ..
جنت اسوي معكرونه بشاميل حسب طلب انمار ، كملت وبقه بس الشوي لهذا عفتهه ورحت غسلت
ايدي وتوضيت ورحت للصاله ،
أخذت محرمي وقرآني وكعدت يم انمار .
اتصدق وباوعلي وگال :
= هلا بعيني ومايها .
بسته بخده وكلت بهدوء :
- يروحي أنتَ .
ابتسم وباس عيوني ، حضني بتك أيد وضلينه
كاعدين نقره سوه إلى أن مرت ساعه ونص او اكثر تقريباً ؛
سديت كتابي وكمت رحت لغرفة أطفالي اطمنت
عليهم ورحت للمطبخ بديت ارتب السفره فتحت الفرن شغلت الغاز ودرت شفت انمار أجه وكف بباب المطبخ يباوعلي ، كال :
= ايي ام الزوز شلونه الشغل يمج ؟
- الحمدلله كلشي تمام .
= يعني كلشي طبيعي انشالله وماكو اي إشكال؟
- اي الحمدلله ليش ؟
= يعني .. كلت خاف اكو احد يزعجج او يجي للصيدليه يذب حجي او هيج شي ، احجيلي انه اتصرف .
- اممم سامع شي انتَ ؟
رحت يمه حضني وگال :
= شتكولين انت؟
- اكول انت تعرف كلشي وهاي صديقتي ليان
جايه حاجيتلك .
= صح الصح .
- عود انه وصيتهه متحجي بس ماشاءالله طلعت مشغله يمي إذاعة اخبار .
= هههه مالهه دخل هيه حجتلي ووصتني ما اكلج لأن انتي عيوني موصيتهه مايوصل هذا الحجي إلي .
- اي بس وصل .
= هسه عوفينه من ليان ، ليش ما حجيتيلي انتِ
ومنو هذا الزمال إلي يزعجج حبيبتي؟
- كلت مو مهم وما ردت اضوجك بهالموضوع .
= لا ما يصير بابا احجي منو هذا وشنو سوا ؟
- ليش ما حاجيتلك ليان ؟
= حجتلي بس اريد اسمع منج .
- اوك ، شوف حبيبي ...
بعدت من يمه واني احجي له ، رحت خليت صينية البشاميل بالفرن وجبت جداحه ،..
نسيت إنو الغاز صارله هواي مفتوح ، قربت الجداحه بس ضغطت بسرعه صار صوت كلش عالي ونار طلعت وانطفت رأساً ، من الخوف والرعب إلي صار ما طلعت اي صوت بس سديت عيوني .
- اخترق مسمعي صوت انمار يصيح بأسمي وهو يتفحصني بخوف وقلق ، لازم وجهي بأثنين ايديه ويباوع بعيوني ويكول :
= زهراء بابا وياي انتِ ، احجي حبيبتي شبيج
ماكو شي لا تخافين صار وراح ، بس تعاي كعدي هنا خلي اشوفج خاف اتأذيتي .
- ما بيه شي انه عوفني اريد اروح اشوف فهد وفيَ خاف كعدوا من الصوت .
= تعاي عوفيهم هسه شوفي ايدج شصار بيهه يابه .
- شنو صار ؟
كلت هيج وباوعت لأيدي إلي صايره حمره وكلهه كزاز وجروح ،..
"لأن جنت مدخله ايدي حتى اشغله ومن انفجر
الجام متكسر وصاير على ايدي ومن الصدمه ما جنت حاسه بألم".
- هااي شنوو عززه انمار ايديي تأذيني .
= اسمالله عليج حبيبتي تعاي بس اهدي بابا
خلي اشوفهه .
انطيته ايدي يباوعلهه تلمس الجروح بأيده
وباسهه وگال :
= تهون يگلبي تهون انشالله ، تعاي اخذج بلكي
اكو طبيب او مستشفى هسه .
- ايي كلش اتأذيني بعد ما اكدر .
باس راسي وهمس :
= بيه ولا بيج يا روحي .
.
دخلت لغرفتي لبست عبايه وحجاب ع السريع طلعت شفت انمار بغرفة أطفالي غطاهم عدل واجه يمي ، مسح دموعي بأيده وكال :
= يله نروح .
.
هو يسوق وكل شوي يباوعلي وانه اباوع لأيدي وأبجي ، ضل يفتر يدور عياده او طبيب محد كاعد
اخر شي رحنه طوارئ ،.
ضمدوا ايدي وانطوني مهدئ انه كاعده وانمار يمي ، كلت :
- انمار حبيبي شوف الجهال خاف كعدوا وحدهم بالبيت .
= هسه شفتهم بعدهم نايمين تردين تشوفيهم ؟
- اي
" مخلين كاميرا بغرفتهم ".
قربلي تلفونه شفتهم نايمين كلمن بجربايته ضليت لازمه تلفونه واباوعلهم لحد ما تقريباً مرت ساعه
وكلت لأنمار :
- اريد ارجع للبيت خاف يكعدون ويخافون لأن
محد يمهم .
= تمام هسه نطلع حبيبتي .
راح شوي واجه بيده علاكه ادويه سئلته :
- شنو هاي ؟
= عصارة حروق ومسكنات .
كمت اجه يمي عدل حجابي وگال :
= يله بابه نروح ؟
- اي يله .
لزم ايدي وطلعنه ، رجعنه للبيت اول ما دخلت رحت لغرفة أطفالي جانت فيَ كاعده تبجي وفهد يسكت بيهه راح انمار شالهه يسكتهه سوالهه الحليب ورجعهه بجربايتهه وكعد يمهه يمسح على شعرهه حتى ترجع تنام وفهد اجه يمي حضني وباوعلي وكال :
" مامي راح نطلع ؟"
لأن جنت لابسه عبايه وشال .
كلت :
- لا حبيبي هسه دنيا ليل تعال ارجع نام .
" اوك تصبحين على خير مامي احبج"
بسته بخده وكلت :
- تصبح على خير يروحي انتَ .
راح نام بجربايته غطيته ورحت لغرفتي أخذت
ملابس ودخلت للحمام بلكوه كدرت اغسل لأن ايد وحده والمفروض ايدي الثانيه ما يوصلهه ماي علمود الحرك ، خلصت وطلعت وكفت كبال المرايه رتبت شعري وكل شوي اباوع لأيدي .
اجه انمار حضني من ضهري حيل وباس خدي وگال :
= ها ام الحب .
- ها حبيبي .
= شلون صرتي بعدهه تأذيج؟
درت علي وكلت :
- شوي تأذيني وهم لافينهه حيل احس ايدي
راح تنكسر .
= تردين افتحهه الج وارخيهه شوي ؟
- ايي يا ريت .
= صار بس ثواني .
رحت كعدت ع الجربايه وهو راح جاب علاكة
الادويه واجه يمي ، انطيته ايدي بده يفتح باللفاف ويكول :
= صدك جذب شدعوه هيج ايدج صايره زركه .
- ايي مو كتله للمضمد لفيتهه حيل يكلي لازم هيج حتى تطيب .
= هو انه بألف يا علي يله كدرت اصبر علي نوب يتمضيك ما جنه رجال .
- هههه عوفه يولي راح صيامنه .
= ههههه .
- اليوم ضلينه بدون سحور .
= امم عادي فدوه الج .
- وباجر هم بدون فطور .
= هم فدوه الج .
- ااا زين بعد رمضان كله ما اطبخ .
= ليش يابه ؟
- لأن فدوه إلي .
= ها هههههه اوك هاي هيه .
....
.
- بهاي الفتره جنت كلش مهتمه بأطفالي وانمار بشكل مو طبيعي لأن جان عندي احساس غريب ما عرفت افسره ..
شكد ما اشوف أطفالي احس بعدني مشتاقتلهم واريدهم بالرغم انو اني ما فاركتهم ابد وحتى شغلي تركته ، لدرجه كل شوي يجون فهد وفوفه لحضني أضل اشمهم وابوسهم لحد ما يهده بالي يله اتركهم ،.
- بليل انمار جان نايم وصار الصبح وانه بعدني
منايمه، كمت ودرت لجهته ودخلت بحضنه بهدوء
بسته بخده ودفنت روحي بحضنه احاول انام ،.
شوي وهمس :
= بعدج ما نايمه ؟
- لا .
باسني وحضني حيل وضل يمسح على شعري
لحد ما غفيت .
- نمت دقايق بس حسيتهه ساعات ، كعدت
متلهفه لأطفالي ، بعدت عن انمار ردت اكوم
وباوعلي بأستغراب وكال :
= ها وين ؟
- اريد اروح يم فهد وفيَ .
= تعاي نامي الصبح من تكعدين شوفيهم .
- لا انمار خليني اروح .
= شوفيهم وتعاي نامي بعد وكت تره .
- اوك .
عفته ورحت لغرفتهم فتحتهه بهدوء ودخلت
ضليت واكفه اباوعلهم لحد ما حسيت نفسي
اريد ابجي بدون سبب ..
رحت يم فهد ضليت امسد على شعره بسته وعدلت غطا بعده رحت لفوفه شلتهه وهي نايمه حضنتهه حيل واشم بعطرهه واهمس لروحي :
" عززه شلون الأمهات يفاركون أطفالهم وانه
يمي واحسني ما شبعانه من شوفتهم".
رجعتهه بجربايتهه ، ورجعت لغرفتي رحت تمددت قريب من انمار وكلت :
- حبيبي احضني حيل .
= تعاي بابا تعاي .
دخلت بحضنه ضل يطبع بوسات خفيفه
على وجهي ويهمس :
= شبيج ليش احسج ضايجه ؟
- ما بيه شي ما ضايجه .
= جا شبيج هاي الفتره متغيره .
- شلون متغيره ؟
= يعني لدرجة ما تردين تطلعين من البيت علمود تضلين يم الجهال وانه من جنت احضنج ما تقبلين جنتي تكولين تجعصني وما تخليني اتنفس .
- هههه اي صح .
= وشنو تغير هسه ، راح اجعصج واشوف .
حضني حيل وگال :
= ها انجعصتي لو بعدج ؟
- هههه براحتك ما اعترض .
= شوفي مو اكلج متغيره .
- أنت أول شخص يگلي "أنتِ ضايجه "
كل الأشخاص إلي بحياتي من يشوفوني يكولون
"عوفوها ، تتدلع ، ما تحمد ربهه"
بس محد يفهم أن آني ضايجه غيرك .
خليت راسي على كتفه وبسته وكلت :
- تدري انه احبك ؟
= صدك ؟
- ايي والله .
= حتى انه .
- شنو انتَ ؟
= احبج حبيبتي .
ابتسمت وكلت :
- خلي ننام نعست .
= ااا نامي منو لازمج انتي ما تقبلين تنامين .
..
بعد يومين بالضبط قررنه نطلع نغير جو ونفطر بره ، رحنه مطعم بعدهه رحنه مدينة العاب بطلب
من فهد .. طولنه لليل يله رجعنه بالطريق
انمار باوعلي وكال :
= ام الزوز ، سمعت انو اختج عند اهلج ؟
- اي ليش ؟
ابتسم وباوعَلي بـ نَظرة سِحلت گلبي سَحل ،
كلت :
- شتريد من اختي ؟
= ما اريد منهه شي بس هيه مو خالت الجهال اكيد مشتاقتلهم فكلت اوديهم ببيت جدهم ومدام هيه موجوده احسن .
- امم لا ما اريد خليهم يمي .
= مو شسمه ..
- شسمه ؟
= عندي سؤال اريد اسئلج يا ..
- اي اسئلني .
= بويه لا تصيرين فاهيه واضح السؤال .
- اي اسئلني بوجودهم شنو راح يصير ما جاي
افهمك .
= ما يصير شي بس ابوج وامج اليوم سئلو على الجهال مشتاقيلهم ووصوني اليوم اوديهم عدهم .
- هاا اوك نوديهم .
.
وصلني للبيت حضرت اغراضهم وخذاهم وراح ،
دخلت اخذت شاور ولبست بجامتي ووكفت اسرح بشعري ، شوي وسمعت صوت خطوات انمار دخل للغرفه وباوعلي وابتسم ،
سد الباب وسند روحه علي اتكتف ووكف يباوعلي ، خلصت شعري وعطرت ورحت يمه وكلت :
- شنو تريد تسألني استاذ انمار ؟
تقرب وعدل شعري وكال :
= بعدج ما تعرفين سؤالي ؟
- لا .
ابتسم وباسني حيل وهمس :
= تعاي افهمج .
حضني وضل يطبع بوسات خفيفه بعدهه رحنه
لعالمنا الخاص نسينه كلشي محد جان موجود ما
عدا انمار وانه وحُبنه وكل شوي يهمس بكلام غزل .
.
للفجر اتفقنا انو نطلع نتسحر بره اتجهزنا سوه
وطلعنه رحنه لمطعم كلش حلو وجان الجو لطيف ، وكعدنا نتسحر شوي وباوعتله وكلت :
- احم اكول انمار .
= يا عُيونه
-اقرالك شعر ؟
باوعلي بصدمه وابتسم وكال :
= يله .
- اوك اسمع ..
" كتلك راح اروح وفرحوا الشمات ... مايدرون
اروحن فدوه لعيونك " .
=هاا هههههه حلوو .
- زين اسمع الثاني اقوى .
= ايي ؟
- " احبك واموت عليك مو موته موتات... نصهن ام العود والباقي كاسات .
= ااا هاي شنو حركات واشعار هههههه .
- لعد شعبالك حتى انه اعرف أقره شعر .
= لا قويه .
- هههههه .
لزم ايدي وباسهه، ابتسمت وكلت :
- تدري شي ..
= شنو ؟
- انه مِرتاحه يمك ،
و أحِس كُل الخساير
بيك ﷲ عوضها .
ابتسم وضل يباوع بعيوني وهمس : احبج انه .
مد ايده على خدي وكال :
= هاي اكو رمش على خدج .
-صدك ما حسيت شلون انتبهت ههه .
= شخص يهتم لمكان الهمزة و
نقطة نهاية الجُملة والفاصلة بين الكلام،
تتوقعين أنه يفَوّت تفاصيل وجهج ؟
- حبيبي انتَ .
.
خلصنه سحور وطلعنه ضلينه نفتر شوي بالسياره
جان اكو ولد صغير بالتقاطع يبيع ورد باوعتله
وكلت :
- شوف هذا الولد خطيه بعده صغير ويشتغل .
شوي ووصل يمنه انمار نزل الجامه وسئله ..
= بابا وين اهلك ؟
الولد : عمو انه ما عندي أهل .
= يعني متوفين ؟
الولد : ما ادري والله ، تشتري ورد ؟
= اي انطيني كل الورد العندك .
الولد بفرحه : صدك عمو ؟
= اي بابا انطيني .
راح بفرحه جمعله كل الورد وغلفه وانطا لأنمار
وكال ..
الولد : الله يحفضلك عائلتك ويخليك ألهم شكراً
عمو هاي اليوم كله ما راح اشتغل .
= حبيبي الله يحفظك وديربالك من الشارع مع السلامه .
حرك السياره وكفنه ع جهه خله الورد بحضني وابتسم
وكال :
= الورد للورد .
- هههه يروحي شكراً .
تقربت يمه وبسته بخده ورجعت مكاني لازمه الورد فرحانه بيهم .
- يله انمار خلي نرجع للبيت احس تعبت .
مسح على خدي وكال :
= صار تدللين حبيبتي .
.
- انمار : حركت السياره وانتبهت اكو سياره كدامنه
ما تمشي عدل كل شوي يبطء السرعه بمكان عام
وأكثر من مره ردت اسوي حادث ،
ضليت مشغل الهورن لحد ما بعدت السياره شوي وضليت امشي طبيعي ،
ورجعت نفس السياره كبالي بس هالمره يمشي
طبيعي لحد ما وكف فجأه
وبدون ما ينطي تنبيه ..
ما حسيت رأساً انكلبت السياره مرتين ووكفت ...
.
- انمار : بهاي اللحظه جان كل همي وخوفي
على زهراء ما همتني روحي ،
سمعت صوت شهكاتهه وهمساتهه بأسمي اكثر
من مره لحد ما اختفى صوتهه ..
فتحت عيوني بثكل جان راسي ينزف
باوعتلهه جانت تباوعلي وترجف ودموع عيونهه
ما وكفت ، حاولت احرك ايدي بلكوه كدرت أمد ايدي الهه لزمت ايدهه احاول اطمنهه ، ابتسمت وكالت بهمس :
" تَدري انه احبك مو ؟"
سديت عيوني بابتسامه بمعنى اي .
رجعت كالت :
" راح تدير بالك على أطفالي وما تحسسهم بفقداني؟"
= لا تحجين هيج ما بيج شي .
همست بشهكه :
" ديربالك عليهم وعلى نفسك ودائماً ذكرهم بيه
لا تنسوني أبد " .
= اشش كافي لا تتعبين نفسج هسه تجي الإسعاف .
ابتسمت ولزمت ايدي حيل وسدت عيونهه ونامت ،.
..
ثواني وحسيت بصوت الإسعاف وصارت أصوات
بره كدروا يطلعونه ،
خذوا زهراء خلوهه بسيارة الإسعاف رحت يمهم
وكلت :
= انه اروح وياهه .
ما اعترضوا الممرضين صعدت يمهه ضليت لازم
ايدهه واردد :
= ما بيهه شي بس انغمى عليهه من الخوف
ما بيهه شي .
الممرضين واحد يباوع للثاني واشوفهم باردين
ما سوو اي شي ، باوعتلهم بأستغراب وكلت :
= ليش كاعدين ما تشوفوهه خاف مجروحه ؟
الممرض : اهده اهده انشالله ما بيهه شي .
هزيت راسي وكلت : انشالله .
.
وصلنه مستشفى خذوهه لغرفه الإسعافات وكالوا تحتاج دم بسرعه .
اتبرعت انه واتصلت على اهلهه يجون خاف
تحتاج بعد .
شوي ووصلوا اجتي امهه تبجي وكالت :
- شبييهه بنتيي شلون صار الحادث؟
ضلت تصرخ وتلطم ويمهه ابو زهراء واثنينهم
حالتهم منتهيه عليهه .
اتصلت على ياسر اجه يمي ضل يسئلني عن
الحادث وتفاصيله ، ما كدرت احجي شي لأن
بالي كله يم زهراء .
.
كاعد ومدنك راسي بحضني اجه على بالي
كلامهه وهيه توصيني همست :
= معقوله يا ربي هيج وتفجعني بأعز إثنين علي ؟!
لاا اسمالله عليهه استغفرالله .
حسيت ايد على جتفي رفعت راسي جان ياسر ..
كال :
- علكيفك وي روحك راح تنجلط شبيك .
= اخخخ ولك كله من وراي انه .
- كافيي تعال كوم خلي يضمدون راسك
راح يخلص دمك .
= عوفني ياسر مو وكتهه .
- هووه شنوو موو وكتهه دكوم احسن لك تره
هنا هسه اجيبهم يخيطون راسك .
انمار رفع راسه وخزر ياسر .
ياسر : والله لو تخزر منا لباجر هسه تكوم وياي ، تره قبل شوي سئلت على زهراء كالوا تطول شوي .
= استغفرالله شبييك انتَ عوفني .
- يعني ما تكوم ؟
= لاا .
- خوش .
راح شوي ورجع ويا مضمد اجه شاف الجرح كال
هذا يحتاج خياط ما ردت اكوم لهذا بس ضمده وراح .
انمار باوع لياسر وكال :
= هسه ارتاحيت ؟
- اي بس لو رايح مخيطيك مو احسن .
= انجب وكافي تلح .
- صار .
..
مرت ساعتين وماكو اي خبر كل شوي يطلعون
دكاتره ويدخلون غيرهم ضلينه واكفين بقلق ،
رحنه انه وياسر نسأل محد يحجي مرت نص ساعه وفتحو باب غرفة زهراء وطلعوا الدكاتره ...
أجو بأتجاهنه ووجوهم ما تبشر بالخير ، كلنه
وكفنه منتظرين واحد منهم ينطق
ويريح كلوبنه إلي وچرت ..
راح ياسر تقرب يم الدكتور وكال :
- شنو دكتور طلعتوا تصفنون بوجوهنه ؟!
ايي احجوو المريضه شلوون صارت فضونه عااد .
انمار = ما بيهه شي ياسر لا تصيح .. لا تفز هيه
تخاف من الصوت العالي .
الدكاتره ضلوا واحد يباوع للثاني وتقدم واحد
منهم وكال :
- وين اهلهه انتو شنو قرابتكم منها ؟
كلنه حجينه بصوت واحد :
" أحنه اهلهه " .
الدكتور : المريضه جانت متعرضه لضربه كلش قويه براسهه وصاير عدهه نزيف داخلي ، وللأسف ..
انمار سد عينه واجه ياسر سنده وكال :
- بس كول يا الله خلنفهم يمعود بعده ما مكمل كلامه .
= شنفهم بعد ولك شنفهم واضحه السالفه .
الدكتور : البقيه بحياتكم والعوض بسلامتكم
احنه نعتذر ما كدرنه ننقذ حياتها للأسف .
ياسر : بس كال هيج الدكتور ام زهراء طاحت
وابو زهراء كعد بالكاع ويبجي بنحيب ،.
اباوع على انمار ساد عيونه حيل ومخلي ايده
على گلبه رحتله وكلت :
- البقيه بحياتك .
خزرني وكال :
= اششش اسكت لا تكولهه ما بيهه شي زهراء .
- انمار بس اهدئ وباوعلي ، زهراء ماتت ماكو
بعد افهمم .
= كافييي اسكت .
جسمه ضل يرجف بشكل مو طبيعي وعيونه
تكلبت، لزمته وكلت :
- ولك رااح تنجلط علكيفك وي روحك .
رفع راسه وضرب بأيده على صدره حيل وصاح
بصوت عالي رج المستشفى كلهه :
= ااخخخخ ياااااااا الله
حسيته مو بوعيه احتار شيسوي يصرخ ساعه
يدك على صدره ساعه يبجي اتخبل ..
باوعلي وكال :
= ياسرر روح كللهم اريد اشوفهه هسه .
- ما يقبلون يكولون باجر تستلم الجثه .
خزرني وصاح بعصبيه :
= جثه !! زهراء صصاارت جثه ولچ اخخخ بويه
كون بيه ولاا بيج .
احتاريت شسوي رحت حاجيت مدير المستشفى بلكوه وافق بس شخص واحد يدخل .
رحت لأنمار جان كاعد وحاني ضهره ويهز برجله بقلق .
- يكولون بس شخص واحد يشوفهه .
كام وباوعلي وكال :
= ايي انه .. بس باوع لأبوهه وامهه ورجع
سد عيونه بقهر وكال :
= ولك اهلهه شلون بيهم ؟!، روح شوفهم خاف
يردون يشوفونهه ؟.
رحت لأبو زهراء حجيتله إلي صار كال :
" اذا تدخل امهه تموت وانه ما اتحمل اشوف بنتي
هيج جثه " كالهه وضل ينحب ويضرب على رجله ،.
اجه ابو زهراء يم انمار خله ايده على جتفه وكال :
" كوم عمو كوم روح شوف زهراء هيه تريدك انتَ"
انمار كام باس راسه وراح دخل .
....
.
.
- انمار :دخلوني للغرفة مالت زهراء ، جانوا
مغطينهه بغطه ابيض خفيف .. اتقربت يمهه وهمست :
" شكد ادبسززيه مغطين وجهج حبيبتي
خانكينج سوده عليه "
وخرت الغطه من وجهه وتقربت عليهه ،
ضليت امشي ايدي على ملامح وجهه واكول
بهمس :
" هيج صارت صدك وراح تحرميني منج ؟"
" هيج وانحرم من عيونج الحلوه وضحكاتج إلي؟" .
" هيج وبعد ما اشم عطرج وابوسج ؟"
" زهراء بابا شلون بيه بدونج ها شلوون ؟"
" زين عوفيني انه .. فهد وفيَ وأدهم منو ألهم غيرج؟ منو يحبهم ويهتم بيهم بكدج ؟ شلون
يكدرون بدونج هاا شلوون زهرااء ".
كعدت يمهه ع الجربايه وأخذتهه لحضني اشم بشعرهه واهمس :
" اخخ يممه " .
لزمت ايدهه بستهه وكلت :
" انتِ مو تحبين ابوس ايدج وعيونج ، تردين ابوسج؟"
ضليت اوزع بوسات خفيفه على وجهه وأبجي ..
ضليت كاعد وماخذهه لحضني ودافن وجهي
بركبتهه اريد اشبع منهه ،.
..
- ياسر : من دخل انمار لغرفة زهراء الدكاتره ضلوا يفترون وكل شوي واحد يجي يكول
" خلي يطلع كافي ما يصير " وبلكوه احاول
اقنعهم ويرحون ،
طول انمار ساعه تقريباً قلقت علي ،
كمت دكيت الباب ودخلت وشفت منضره بحاله
تبجي الصخر ..
بس شافني خزرني وكال :
= اطلع ولك ما تشوفهه ما لابسه حجاب ؟
- انمار اطلع كافي گلبك راح يوكف .
= اطلع مالك شغل .
- انماار ؟..
ضمهه لصَدره وسد عيونه وگال :
" لا تخاف تعَديت مَرحلة الگلب طَگ الوجع
بـِ ضلوعِي"..
.
.
.
.
.
-انمار : خلص رمضان وخلصت روحي ويا ،
بعد وفاة حبيبة روحي وعمري زهراء .. أخذت فهد وفيَ وأدهم وقررت نرجع ببيت أبوي لأن جانوا كلش
مفتقدين امهم لدرجه حتى الأكل والنوم گطعوا ..
زاد خوفي واهتمامي تجاههم وحاولت اوفرلهم
كلشي حتى ما يحسون بالنقص بفقدان امهم ،.
فهد تمرض بشكل مو طبيعي على امه واغلب
وقته بس يبجي ، وفيَ ما تريد احد غيري انه تنام
وتاكل كله بحضني ، اما أدهم خذته اخت زهراء تهتم بي كم يوم ورحت اخذته ،
بهاي الفتره عفت نفسي وشغلي وحاولت اوفر
كل جهدي ووقتي ألهم وأحس كل هذا ومقصر ،.
بين يوم ويوم من اختنك اروح بليل لزهراء وارجع الصبح ، ومرات من تضيگ الدنيا كلش واختنك اروح لبيتي انام بمكانها وادور ريحتهه بالملابس ..
.
.
.
كلام منقول من انمار :
- مرحباً يا فقيدتي .. كيف حالك
اولاً انا مشتاق لكِ جداً .. واعذريني لأنني بكيت
منذ قليل ..
حالي لم يتغير منذ يوم فقدانك!
من آخر منظره لمتحكِ فيها ، وبطريقة أصح من آخر مره رأيت نعشكِ يا حبيبتي ..
كان يغطيك الكفن الأبيض .
انا اتذكر ذلك جيداً يا ملاكي الراحل .
اتذكر مشهد الدخان الأبيض الذي مشى مع نعشكِ .
كُنت اسأل من أشعل البخور من خلفها؟
وسألت الجميع هل احد منكم يرى الدخان الأبيض الذي على شكل غيوم خفيفه .. ولكن لم يراها أحدٍ غيري !.
ما زلت أرفض ان أصدق انكِ رحلتي
لكن الله أودع في قلبي مشهدين في نفس تلك الليله لتقويتي ..
مشهدكِ وانتِ تبتسمين بشده ومشهد الغيوم التي زفتك خارج المنزل ..
اعذريني لاني كل ليله انزوي وحدي وابكي
فقداناً لكِ فكل شيء أصبح ناقص من دونك ..
المنزل ، الأفراح ، الأعياد ، الضحكات وكل شيء مبهج فكلما مرت مناسبه أنسى إن الله اخذكِ بجواره ، واني سأجدك بالمنزل ..
لكن الأعياد تمضي والضحكات تختفي وغيابك وحده لا ينتهي .. وكأنه الحقيقيه الوحيده في أكُذوبة حياتي .
هل يمكنني طلبك يا ملاكي ؟
زوريني في الحلم .. دعيني أقُبلك أرجوكِ
دعيني أخبرك عن ماحصل بالدنيا من بعد غيابك
أضحك معك وابكي ،
ارجوكِ زوريني في منامي .. زوريني !..
.
.
.
النهايه ..
.
الكاتبه :
" الآن قلبي ينزف ، بدلًا من قلمي " ،..
أسأل الله تعالى ان يرحمها ويغفر لها ويرزقها من نعيم جِنانه ، واسألهُ ان يرزق أهلها واطفالها وبالأخص انمار الصبر بفقدانهه ،.
صح تعرفت عليهه بمده قصيره بس جانت احلى
اخت وصديقه إلي .. " الله يرحمها " ويرحم موتاكم .
.
" الأربعاء، ٢٦ أبريل ، ٢٠٢٣".
.
*ملاحظه : جانت اغلب اسماء الابطال مُستعاره .
.
﴿ ᷂وَاذْكُر ᷂رَّبَّكَ ᷂إِذَا ᷂نَسِيتَ ﴾
- ᷂لآ ᷂آلهَ ᷂الا ᷂الله.
- ᷂سبحَان ᷂الله ᷂وَبٓحمده.
- ᷂سبحَآن ᷂الله ᷂العظيم.
- ᷂استغفرالله ᷂واتوب ᷂إليه..