فَقيدة أنمار

بارت 12

.
.
.
.
-زهراء : صحيت من النوم واني حاسه بألم قوي ببطني جنت منطيه ضهري لأنمار وهو محاوط خصري بأيديه حاولت افتح ايديه مني حتى اكوم ما كدرت ،
وكلما افتح ايديه يزيد الحضنه درت علي
وهمست : انمار بس شوي اريد اروح للحمام ، هز راسهه وهو مغمض عيونه ووخر مني ،
كمت من الجربايه جانت الساعه ٨ تقريباً بس وكفت الألم زاد ضليت لازمه بطني واتلوى من الوجع ومعدتي ضلت تكلب ،.
عرفت نفسي تمرضت لأن من جنت عند اهلي بس آخذ برد لو اتوتر من شي هيج يصير بيه ، واخلص وقتي لو متمدده بجربايتي لو بالمستشفى ،.
دخلت للحمام وأخذت شاور دافي على أمل إنو يقلل الألم بس حسيته زاد أخذت الشسوار ودخلت للحمام نشفت شعري لان انمار نايم ، وأني طبعي من اتمرض احاول ما ابين يعني ارتب نفسي وما ابين انو اني متوجعه ،
سرحت شعري وخليت مورد خدود وشفايف لان وجهي اصفر وكبست رموشي ما خليت عطر خاف تلعب نفسي ، لبست جواريب حتى ادفي رجلي ورجعت حتى اتمدد لان بعد وكت ، حاولت انام ما كدرت الوجع كل شوي يزيد حضنت بطني حيل بإيديه ونمت ما سيطرت على نفسي لأن بعدني نعسانه او بالأصح صار عندي خمول .

-صحيت من النوم الساعه تقريباً ١٠ونص انمار ما موجود بالغرفه كمت غسلت وبدلت ونزلت لكيت الشيخ والشيخه وحنين كاعدين بالصاله صبحت عليهم وصاحني الشيخ وكال ..
-ابو انمار : بويه زهراء تعاي يمي اريد احجي وياج .
-زهراء : تفضل عمو
-ابو انمار : بنيتي مثل ما تدرين باجر اربعينية فهد الله يرحمه .
-الشيخ يحجي بقهر والحجيه حضنت حنين وضلت تبجي ، هزيت راسي بحزن وكلت : الله يرحمه .
-ابو انمار : احنه باجر طالعين للزياره تجين ويانه ؟
-زهراء : لا شيخ ما اكدر اليوم اني شويه مريضه ، شكراً عمو تفكيرك بيه كافي ، وانشالله ترحون وتجون بالسلامة.
-ابو انمار : براحتج بنتي ،
-حنين : ليش زهراء تعاي ويانه هم تغيرين جو وهم حتى ما تضلين وحدج بالبيت .
-الحجيه : اي يمه امشي ويانه .
-ابتسمت وبست الحجيه وكلت : لا حبيبتي انشالله غير مره .
-الحجيه : يمه ليش تكولين مريضه شبيج شنو يوجعج؟
-زهراء : لا تخلين بالج اني بس شويه حاسه بمغص ببطني انشالله لليل يروح .
-الحجيه : انشالله حبيبه اذا متوجعه كولي حتى ناخذج للطبيب .
-هزيت راسي وكلت : تمام .
بعدهه كلت : محتاجين شي رايحه اسوي ريوك .
-الحجيه : لا يمه روحي انتي تريكي احنه اكلنه قبلج .
-زهراء : تمام بالعافيه .
-الشيخ : بويه اليوم عدنه خطار من الغده لليل ما اوصيجن .
-زهراء وحنين : انشالله.
رحت للمطبخ واشرت لحنين تجي وياي راحت كعدت واني صبيتلي بس جاي ما اشتهي اكل رحت كعدت يمهه وكلت ..
-زهراء : حنون انمار راح للشغل ؟
-حنين : اي عمري كال يرجع من وكت علمود الخطار .
-هزيت راسي وكلت : تمام ، زين شنسوي غده للخطار ؟
-حنين : امي كالت نسوي تمن ابيض وباميه وانمار راح يجيب ويا سمك مشوي .
-زهراء : اوك ، وكمت حتى ابدي اسوي الغده .
-حنين : صبري ع الاقل اكلي شوي اليوم راح نتعب .
-زهراء : لا عمري ما اشتهي .
-حنين : هاي ليش وجهج اصفر ، تعبانه؟
-زهراء : لا عمري شويه حاسه بألم ولعبانه نفسي .
-فتحت عيونه وكالت بفرح : يا الله خاف حامل .
-زهراء : عززه لا ولج بس اخذت برد واني طبيعي جنت عند اهلي كل فتره هيج يصير بيه بس اني جنت اتخربط وياخذوني للمستشفى ادعي اليوم يمر وما اتخربط .
-حنين : ياا ليش هيج عندج علاج شي ؟
-زهراء : لا بس جانو ينطوني ابر مسكن ومغذي واصير زينه ، يله كافي سوالف خلي نكمل لا نتأخر .
-حنين : خوش يله انتي ابدي بالطبخ واني رايحه انضف .
-زهراء : تمام .
-بدينه نشتغل حنين راحت تنضف واني بديت اطبخ ، اسوي بالأكل وادعي يطلع طيب لأن هاي اول مره اطبخ هاي الكميه ، كملت ردت اطلع واجتي حنين وكالت ..
-حنين : زوز اجو الخطار
-زهراء : اوك ، اني صاعده ابدل وانزل .
-حنين : تمام .
-صعدت للغرفه طلعت فستان اسود بي حزام ع الخصر ويصير عريض من جوه لبسته وخليت بس مرطب وكبست رموشي ، جاي امشط شعري ودخل انمار درت علي ابتسمتله وكلت ...
-زهراء : الله يساعدك .
-انمار : ويساعدج .
اجه يمي خله تلفونه والسويج ع الميز ودار علي وكال ..
-انمار : شلونج .
-زهراء : تمام وانت .
-انمار : زين .
-زهراء : احضرلك الحمام ؟
-انمار : لا انتي كملي انه ما عندي شي .
-زهراء : اوك
راح اخذله ملابس ودخل للحمام اني كملت شعري وخليت شال اسود خفيف ، الألم كل شوي يزيد رحت كعدت ع الجربايه وضليت عاصره بطني طلع انمار من الحمام اني رأساً كمت وكلت : محتاج شي قبل ما انزل ؟
-اجه يمي يباوع وخله ايده على كصتي ونزله على خدي وكال : وجهج اصفر ومصخنه شبيج ، مريضه؟ يوجعج شي؟
-وخرت ايده وكلت :لا ما بيه شي .
-انمار : خوش اذا متوجعه لو تردين شي كولي .
-زهراء : اوك.
خليت عطر ونزلت ، جايين هواي خطار رحت سلمت حسيت وجهي خدر ، أجتي حنين تعرفني عليهم اغلبهم يصيرون قرايبهم اجت ملاك كعدت بيني وبين حنين وكالت ..
-ملاك : فصليه كومي سوينه كهوه .
-حنين : تره عدهه اسم وتكدرين تطلبين بأدب .
-زهراء : لا عادي عوفيه حنين .
-ملاك : شدعوه حنين هيج بعتيني علمود هاي الفصليه ، عايزج بس تزعلين مني علمودهه.
-حنين : لا ما بعتج بس تصرفاتج صايره ابد محلوه واي طبعاً ازعل منج لأن هاي زوجة اخوي وما اقبل تحجين عليهه .
-ملاك تباوعلي بعين ونص وكالت : عشتوو صارت مرت اخوج وهو اخوج كل يوميه وي وحده عادي حالهه حال البقيه .
-حسيت الدم صعد الراسي لو اكدر اكتله بس ما اريد اسوي مشاكل ، كلت : ما اسمحلج تتجاوزين لهالدرجه وبعدين شمدريج انمار كل يوم وي وحده يمكن انتي منهن .
-حنين : ملاك تأدبي لا والله اكل لانمار عليج هو يربيج .
-ملاك باستهزاء : لا تره خفت كلش دروحي انتي وياهه .
-حنين : خوش اني الج .
-زهراء : حنون تعاي نروح للمطبخ كافي منا ناس عيب .
-حنين : تمام عمري روحي انتي اني رايحه اسئل امي خاف تحتاج شي واجي وراج .
-زهراء : اوك قلبي ،
رحت للمطبخ بديت احضر المواعين اجتي حنين بدينه نصب اني وياهه وره شوي اجت ساره سلمت وضلت تشتغل ويانه ، كملنه صب الغده واني بالكوه اتحرك من الالم راحو كعدو صاحتني حنين حتى اتغدى كلتله اكل بالمطبخ ، كمت صبيتلي شويه حاولت اكل بس ما كدرت سويت نسكافيه حاره بلكي شوي تخفف الألم طلعت كعدت ع المرجوحه ،
حاسه بجسمي كله يأذيني وراسي يفتر فجأه انفتح باب شفت انمار طلع من المضيف بس شافني اجه يمي وكال ..
-انمار : تغديتي لو بعدج ، وليش كاعده هنا ؟
-زهراء : لا ما اشتهي اكل .
-انمار : ليش ما تشتهين شوفي وجهج اصفر روحي اكلي شوي ما يصير .
-زهراء : لا ما اريد اني من اجوع اكل ، ليش طلعت تريد شي ؟
-انمار : تمام ، اجيت اكلكم حتى تحضرون الجاي لأن خلصنه غده .
-زهراء : اوك رايحه .
كمت اريد ادخل وطلع احمد من المضيف باوعلي بطريقه مقرفه ضل واكف يباوع بتركيز على جسمي ويبتسم ،انمار ضل يخزر بي وصاح علي وكال ..
-انمار : احمد ادخل جوه لا اجي اطيح حضك .
-ما اهتمله دار وجهه وراح انمار راح ورا بعصبيه رأساً لزمته من ايده وكلت : تعال انمار وين رايح .
-انمار : للكبور وين رايح شتردين ؟
-زهراء : انمار لا تعصب عوفه يولي منا خطار عيب تصير مشاكل .
-عقج حاجبه وكال : ششايفتني مكرن يباوعلج وانه اسكت .
-زهراء : زين بس اهده شوي لخاطر اخوك الله يرحمه .
-زفر نفس بقوه وكال : خوش بس انتي هم الج عقاب ، انه شنو كلت على هذا اللبس انتي ليش تعاندين وما تسمعين الحجي بس انه اعلمج بعدين عقابج مو هسه .
-زهراء : ياا هسه اني شعليه .
-انمار : لبسي حجابج عدل ودخلي جوه ومااريد اشوفج هنا .
-زهراء : اوك .
-عفته ودخلت واني بداخلي بس ادردم علي حصلت رزاله بدون سبب كله من ورا هذا السرسرلوكي احمد الله ياخذه ، اني احجي وإجتي حنين ابتسمت بوجهي وكالت : شبيج تحجين وي نفسج تخبلتي؟
-زهراء : ايي تخبلت من وره اخوج كل شوي رزاله ع الماشي .
-حنين : ياا ليش رزلج شمسويه؟
-زهراء : ما مسويه شي بس من وره احمد لأن ضل يباوعلي وانمار شافه واني حصلت الرزاله.
-حنين : يله عادي غير يغار عليج .
-زهراء : ياا على شنو يغار ، يله حب خليني احضر الجاي لا يجي واحصل رزاله ثانيه .
-حنين : ههه يله عادي تتعودين .
-ابتسمتلهه ، صبيت الجاي وطلعت اشوف انمار لكيته كاعد يدخن بالطارمه بس شافني اجه خزرني وكال .
-انمار : انه مو كلت ممنوع تطلعين ؟
-زهراء : بس ردت اصيحلك علمود الجاي .
-انمار : تمام .
اخذ الجاي وطلع وبديت اعزل بالمطبخ اجو حنين وساره ضلينه نغسل مواعين حسيت ضهري انكسر ، خلصت اليوم كله بالمطبخ اشتغل حسيت نفسي هلكت والألم صار مو طبيعي والدوخه لزمتني واحس جسمي كله صار يرجف ،
الخطار راحو تقريباً ساعه ١١ ونص بليل سلمت ع الشيخ والشيخه وبوست حنين لأن كالو الفجر يطلعون وصعدت للغرفه كبل ذبيت نفسي ع الجربايه ضليت اون وابجي من الالم ،
الباب انفتح ودخل انمار بس شافني اجه يمي وكال : ها شبيج ليش تبجين ؟
-مسحت دموعي وكمت وكلت : ما بيه شي .
-انمار : شنو ما بيج شي انه منتبهلج من الصبح انتي حالتج مو زينه كولي شنو يوجعج .؟
-لزمت بطني وكلت : بطني تأذيني كلش ، وبجيت .
-انمار : تعاي كعدي لا تبجين عندي مسكن هسه انطيج ونشوف اذا ما صرتي زينه اخذج للمستشفى.
-هزيت راسي وكلت : انطيني علاج واصير زينه ما اريد اروح للمستشفى.
-انمار : انشالله.
-كعدت ع الجربايه وانمار راح جابلي علاكه مال ادويه وكلاص مي كعد يمي وكال ..
-انمار : تعشيتي ؟ ،مايصير تشربين الدوه اذا ما ماكله .
-زهراء : لا ما اكلت بس عادي انطيني متأذيه كلش .
-عكد حواجبه وكال : شلون وي عنادج احنه .