👑العمـــــــدة👑
♡..مجنــــون ليلــى..
ف.الثانــــــي💫صـــــــراع العشـــــــاق💫
57
وختمات كلامها كتشوف فنور وهي مبتاسمة
نور تبسمات كترجع شعرها اللور:وي ديجا دويت مع بكر فهدشي ديال القايدة لبارح..وهو لي قتارح يتداار هاد الاجتماع ويحضرو فيه هاد السيدات ونص فيهم مزوجين بوزراء وسياسيين انحتاجوهم فالايام جاين على ود الانتخابات ادن خاص شي وحدة قد هاد المسؤولية لي تنوب عليه فالمقر النسوي
حنان :بنتي ليلى معاشرة الناس وعارفة بحق الزمان وكيف خاص تعامل..وهدشي عرفوه لعيالات عليها ختاروها وصوتو عليها داك النهار
الياقوت:فهمتك احنان ولكن الاجواء دحي شعبي وصالون دلكوافورة ماشي هوما اجواء دناس كلاس والسياسة والبورجوازية انا ماشي ضد ليلى بالعكس هي مرت حفيدي وعزيزة عليا ولكن مازال خاصها تعلم بزاف دلحوايج خاص شي وحدة قارية وواعية
حورية شدات فيد ليلى:ليلى فينما حطيتيها كتلمع حنا لي عاشرناها وعارفينها شكا تسوة..
الياقوت:ماشي بحال وكيف قلت ليلى خاص تغبر على الانضار وتعاود تقاد راسها وتعرف اش باغة من هاد الحياة وشنو تابعها عاد تخرج للعالم كيف بغات
حنان بغات تدوي وهي تقاطعها ليلى كتجغم من قهوتها بهدوء علاش تعصب راسها وتفقص وهي قادرة تبين ليهم لعكس خاص تسكوت وجوابها ايكون بلافعال ماشي بالهضرة ولا تنوض تساب معاهم وتشرح ليهم انه قادة بشغالها خليها ديهم على قد عقلهم:الياقوت من واحد الناحية عندها الحق وهي قدوة لينا فهادشي دلبورجوازية ولاكلاس من زمان تبارك الله كاع كلامك صحيح
الياقوت تبسمات فوق خاطرها ونطقات كتشوف ليها فعنيها باغة تقرا اشنو متحت راسها ولكن ماوصلات لوالو:اه تماما وهدشي لي بغيتك تعلميه
ليلى وقفات :ومنك نتعلم الياقوت..
الياقوت غير كتشوف فيها هي ونور..وكيفكرو فكلامها..من هدشي لي وقع هاد الايام عارفينها ماشي ساهل يتلعب معاها وانه ماشي من النوع لي ايسكت على حقو وتدار بيه وماشي حيط قصير يكفي داكشي لي دارت فيهم لبارح حفرو ليها حفرة وطيحاتهم فيها وخلاتهم ضحكة قدام ناس لفيلاج و هوما لي وجدو ليها غا بالسياسة وبلا صداع
ومشات من حداهم وهي كتمتم تحت سنانها:ومالها بنت حي شعبي كوافورة..ماتجيش معاها قايدة الياقوت ..كتقلبو عليا اتلقاوني انوريك البرجوازية ولكلاس كيف دايرين..
دخلات للبيت وتلاحت فوف النمزسية بالجهد وهي تغوت من لوجع تحتها نسات راسها تمتمات:صافي عجبك لحال فرعتي دلمي وزدتي تفووو
تقظات فلجلسة و هزات طليفونها مالقات تا ابل ولا ميصاج من عندو ..دخلات للواتساب ملي تكونيكطة لبارح مع ستة دلعشية..تنهدات كتسورت طليفون:وانا مالي تهنية وراحة ان شاء الله يبقة ديما هكا غابر مهنية من حكامو وصداعو
لتحت..
جلسات هي وياها فواحد جليسة معزولة فالجردة..شعلات الياقوت كارو ونور حداها
الياقوت:شتي فوسط هاد الانتخابات ما ايديهاش تافيها اينساها هاهو ماباتش فالدار وغبر وهي من النوع لي دايرة فيها عزة نفسي ما اتسول ما والو خليها هكا مزيان
نور:عندنا الربح مايجيش للدار متيقة راسها بزاف ولكن واخة هكا الياقوت راه متساهلاش مازال داكشي دلبارح كيحفر فيا
الياقوت:انا كتر منك غير تسناي انا غنورينا اللعب كيف داير
نور خدات منها الكارو وشعلاتو تبرد بيه لاعصاب:خصها دقة صحيحة شي لاخور مامسلكش معاها.سيدة كنزلو منها ونستافزوها بلهضرة وهي مامسوقاش كون كنت فبلاصتها كون قلبت الطبلة راه خطر مما كتصوري داك اللفعة .شنو بان لك فبلان بدر دلبارح
الياقوت كتسوط الدخان:خليني نفكر ونرد عليك ماديري تاحاجة بلا خباري سمعتيني تاحاجة خلي هدشي لي فبالي يصدق وكلشي ابمشي مزيان
نور كتسوط الدخان:راه شحال ما طولات شحال ما ضمنات بلاصتها هنا المشكلة هي لا حملات
الياقوت كتنتر من كاروها:وصافي ها حنا كنفكرو ولحد الساع راه بعيد عليها وملهي مع الانتخابات غا تهناي ما غا يحو ..يك لا نتي لا هي
نور عضات على شفايفها:كتعجبني بالتشيطين الياقوت
الياقوت خدات منها لكارو:راك بحالي غا تهناي شبهتي ليا..وهي لا رميتي هدشي ماخاصوش يشوفك كتكمي سمعتيني خليك ديما هكا زوينة وبريئة فعنيه..يوقع لي يوقع ماخاصش يعرف راه عندك دخل فبلان تصاور
هزات راسها باه :ماغايعرف والو غا تهناي ماشاكش فيا وعمرو ايشك
اما لفوق..
مازال ناعسين بجوج...ولتحت يحساب لهم مشات تقرا حيت تمنية كتكون مشات للمدرسة..
كانت تسعود ونص وهوما فسابع نومة..مخشية بين دراعو وناعسة وشعرها كامل على صدرو مليوح....حتى كتتحرك وكتقيسو فكتافو لمضروب قوص حواجبو وحل عنيه من لوجع..وزاد قوصهم وهو كيشوفها مخشية بين دراعو وناعسة بهدوء ..تنهد كيشوف فيها ويسترجع اش وقع لبارح..فعلا فداك الحالة لي كان فيها بالاعصاب والسكرة يقتلها ولا تقتلو مامسوقش هدا هو مرضو وعيبو ومشكلتو فهاد الحياة انه انسان متهور فوق لخيال وحمق فردة افعالو من صغرو...نزل يديه لشعرها لي على صدرو وجمعو بين يديه كيشوفو شحال رطب وطويل لواه على يديه كيلعب بيه ويفكر بحاليلا لقا فاش يتلاها وباش يلعب هو من النوع لي عزيز عليه يشد فيديه شي حاجة ويلعب بيها ويفكر..بحال الالعاب لي فطليفون..كيلعب ويخمم حتى كيلقة راسو اما رابح ولا خاسر...رجع شاف فيها هي هاد المرة وتفكر الرعب لي ركب فيها وكيفاش خافت عليه وبكات وحضناتو وبقات معاه الليل كامل..مامولفش بالاهتمام بتصرفاتو خلا كلشي يتنفر منو ويدير بينهم وبينو مسافة حتى من مو ماكايعطيهاش فرصة فين تحن فيه وتعرف مالو شحال من مرة مرض بغات تداويه كيهرب منها ويبقة حتى كيبرا الراسو هكا كبر ..طفولتو دوزها كلها مع بكر فالحرب كان الصديق والعدو ديالو فنفس الوقت. كيديوزو النهار بجوج حتى كينعسو...ملي جرا لحاج على بكر وعائلتو مابقة عندو تاواحد مادار صحاب مادار عشران..معرفتو صطحية بالناس...
تنهد كيمسح على راسو هاهي ختو دابة ناعسة قدامو تبسم بخبت كيتخايل شكلو لا شافو هكا معاها ايهرسو ويعفط على رجولتو لي كلشي كيشهد بيها.ميل راسو كيشوف فيها كيف ناعسة مد يديه كيتحسس فجسمها كامل بين يديه ..ماكاينش لي يمنعو انه يدير فيها شي حاجة..بزاف دلافكار جاو لراسو وكلام باه كيتعاود فدماغو..رجع مسح على راسو فاش شافها كتحرك وغادي تفيق...هي حلات عنيها وجات عنيها فعنيه بقات كتشوف فيه شحال وشنقات:اويلييي شكا ندير هناا
ناضت جالسة كتلوي عليها لبينوار وتشوف فراسها واش هي هديك وترجع تشوف فيه..نزلات من النموسية:لا مايمكنش نكون بايتة هنا ويلي اش درت مابقيتش نحشم اويليي يسيقلي بكر وياسين لخبار يقتلونيي..ماعرفتش كيفاش داتني عيني
ورجعات شافت فيه كيف كيشوف فيها بهدوء وفداك لبنوار لي لابسة كبير عليها وشعرها طويل مخبل ..بحال شي مونيكة..
رجعات شهقات بالجهد هاد اامرة:ويليييي الامتحان ويلييي مامشيتش نقرا ناريييي قود..تها الله ياربي شهاد الموصيبة فاتوني جوج امتحانات
هز خدية وضربها بيها من لبعيد صدعاتو:فرعتيلي كري وانا راسي غيطرطق
كنزة:كلو بسبابك والاساتدة صعاب ما ايبغيوش يعاودوه ليا خاصني شهادة طبية ومنين انجيبها ماكانعرفش فهدشي وشغا نقول لبكر لا عيطو ليه فلغياب وهو موصيهم مايعطيوني ورقة تا تكون فخبارو الله ياربي قودت..ها
بدر جمع لوقفة وقرب لعندها وهي ترجع باللور:ضبري لراسك ماتفرعيليش انا دماغي تلى صباح..خرجي
وحل لبكية وشعل كارو على الريق
كنزة كتشوف فكتافو ووجهو كيفاش شاحب:كتافك شوية.
مسح على راسو كيشوف لبعيد وعطاها بالهضر
اما هي رجعات تنهدات كتفكر فحريرتها شغا دير فيها :نمشي نشوف اش ندير ونت الله يسمح ليك مني خرجتي عليا ..
دور وجهو كيشوفها خارجة وكتمتم غا بوحدنا بقة مراقبهاا مزال الافكار كيغليو فدماغو..اما هي خرجات كتسلت نيشان لبيتها بدلات عليها ولبسات حوايج لمدرسة وجلسات كتفكر اش الدير فهاد الموصيبة..
داز الوقت..
هابطة من الدروج ولابسة ومقادة فكامل اناقتها..والابتسامة على وجها.
كانت الياقوت جالسة فصالة هي وحنان ولبنات ومعاهم تا ليلى..
الياقوت شافتها كيف مقادة :فين غادة
نور بابتسامة:عييت بلحفاضة وستريس ديال هاد جوج السيمانات ..عيط لي بكر عاد دابة كيسول فيا وبما انه مشغول ليوم مزال فالاجتماعات ديال الاحزاب قلت ليه نجي عندهم نشوف الاجواء ونيت راكي عارفة عندي مع هدشي دالاجتماعات وتسيير قلت يقدر يحتاجوني من صوتو باينة عيان والروينة عندهم
الياقوت بابتسامة:مزيان سيري وقفي مع راجلك مزوج بجوج وتا وحدة ما فجنبو حشومة تا لمعاودة مزيان ملي فكرتي فيه مسكين ..ونيت فوجي تانتي ورتاحي من الحفاضة وتوجاد شوية
ليلى كانت كتشوف فنور كيف فكامل اناقتها وتصنت لكلامها ادن عيط ليها هي كيسول فيها
ليلى كانت كتشوف فنور وتصنت لكلامها وكيفاش عيط ليها كيسول فيها
حنان تنهدات:ما خلاوهش تا يرتاح ويفرح بزواجو نيشان دخل للخدمة وتمارة
وشافت فليلى:لا بغيتي سيري تانتي ابنتي اش بان لك بكر يعجبو لحال لاشافك راكي شتي ماخلاوش ليه الوقت حتى فين يجي غير يرتاح يشوفنا ويرجع
الياقوت:هدا وقت الانتخابات اتكتر الخدمة ماعندو مايدير بسوق النسا لاحق عليهم يديها فشغالو
ليلى هزات كتافها كتلعب فطليفونها كانت واقفة حدا الشرجم وكتشوف لبرة :الله يعاونو ..ماعندي لاش نمشي ملي غادة نور قاضية لغراد
وشافت فلياقوت:كيف قالت لاحقين على كلشي.شوية بشوية لواحد يصبر..
نور غير مبتاسمة اتمشي دوز معاه نهار تماك فكرات وفكرات وخاص تستاغل فرصة انه مشغول وبعيد على ليلى وتتقرب منو هي ..
سعاد:شوفي الشيوفور يوصلك
نور وراتها سوارت الطموبيل:بغيت نسوك لراسي..
وناضت وتبعاتها الياقوت لبرة..
وقفو حدا الطموبيل كيهضرو وليلى كتشوف فيهم من الشرجم
الياقوت:هكا نبغيك خدمي دماغك وبلاصتك حدا راجلك..وهي خليها جالسة هنا يحساب ليها ايدخل بيها ايولي ملهوف عليها وتابعها خلي الحب ينفعها
نور :واخة هكاك راه ماساهلاش..
الياقوت:مافيها باس تشديه وتباتو تماك خليه يغبر عليها
نور بابتسامة :كوني هانية..
وركبات فالطموبيل وديمارات ومشات.
ليلى كتشوف ودماغها كيدور واخة ماسمعاتش اش قالو فهمات لاياش بغاو يوصلو ..كتشوف نور كيفاش عندها كلشي دياها فقرايتها وضامنة مستقبلها وعندها عائلتها والطموبيل والحالة وتابعينها هي لي ماعندها والو من غير داك الانسان لي كان ليها من صغرها الاب والاخ وكلشي بغاو يبعدوه عليها تاهو الانسان لي عاشت معاه جميع مراحل طفولتها ومراهقتها وكبرها .كانت كتفضلو على باها فاش كان عايش كدوز معاه هو الوقت كتر من مها وباها علمها بزاف دلحوايج فحياتها ونقدها من بزاف دالمثائب كانت اطيح فيهم .ماغايفهموش علاقتها بيه وانه ماشي علاقة عادية وماشي غير علاقة حب وزواج راه علاقة قوة من هدشي باش يجيو بين ليلة وضحاها ويفرقوهم .وينكدو عليها حياتها..كتزيد تتاكد انه الناس خايبين وأنانيين ولما فقتيش ليهم وقويتي راسك يزطمو عليك..وهدشي لي عمرو يكون وعمرهم يحلمو بيه..بكر رباها عمرها تحدر الراس وتستسلم علمها تبغي راسها وتشوف لبعيد..تاهي اتوريهم شكا تسوة وانه تاهي قادرة تفرض راسها وقد المسؤولية وماشي من النوع لي ايهمشوها ويديروها فالجنب..ولي طيح بيها اطيح بيه كتر
شافت فطليفونها زعمة بصاح يكون نساها وسط هاد الروينة وهوما يلاه ولاو بحال اي زوجين ماعيط ماسول ما جات عليه خبر..تنهدات الانتخابات ماشي ساهلين ما ايلقاش الوقت يسول.ولكن هاهي نور عيط وسول فيها وغتمشي دوز معاه النهار زيرات على الطليفون هي لي كانت اول وحدة كيسول فيها فاش كيلقة الوقت من مور الخدمة تبسمات باستهزاء
وتنهدات:زدتي فيه اليلى فين عمرك كنتي كتسوقي لهدشي كان كيغبر بالشهورة فالخدمة بلا تا ابل ماكنتيش تسوقي ماتكونيش حساسة فوق لقياس تاهي مراتو ..فكري فالاهم
وخشات الطليفونها فجيبها هاربة من افكارها وداك الاحاسيس لي ولاو كيزوروها..ورجعات باللور ..كتشوف فلياقوت هديك هي راس لحربة خاص تعطيها الضربة لي تستاهل وبيها اتبدا عاد تشوف الشي لاخور..
طلعات لبيتها كتفكر حتى كتشوف حورية داخلة لعندها وجلسات حداها
حورية:الياقوت واخة جداتي ماكانرتاحش ليها كنحاول نخلي راسي بعيدة عليها..حتى نتي ديري بحالي وبقاي بعيدة عليها.
ليلى:وشكون خلاك انا خارجة سوقهم وهوما لي كينبشو مورايا وانا مايمكنش نخليهم يديرو فيا مابغاو لا هوما لا غيرهم
حورية تنهدات عندها الحق :هو صراحة يستاهلو حيت ماشي من النوع لي كيحشمو..ماغايتقبلوكش وماغايتقبلوش انه كيبغيك نتي وماغايتفرقش عليك هدشي لي مخليهم يبغيو يهرسوك بهضرتهم وينقصو منك ..ماتديش على كلامهم وتهزي فخاطرك حنا عارفينك شكا تسواي وانك قادة براسك وقد المسؤولية
هزات راسها بلا بابتسامة : ماننكرش انه الياقوت عندها الحق من واحد الناحية. الياقوت يحساب ليها هكا نزلات مني وهي ماعارفاش انه فيقات فيها واحد الجانب كنت غافلة عليه ..أتر عليا كلام الناس مرة وحدة نهار وقع لبلان مع صوفي وجرحاتني بكلامها لا عقلتي حيت كنت غافلة على بزاف دلحوايج ولكن دابة لا هدي لي قدامك وحدا خرا.وعمر الواحد يخلي كلام الناس يطيحو ويتأتر بيه بطريقة سلبية ديما شوف الجانب الزوين ومصلاحتك فالموضوع والاجابي فيه وبدل لي غيتبدل ولا شوف شغا الدير حسن ما تبقة حاط يدك على خدك وكتبكي وداير فيها مجروح..مافادني والو داكشي فحياتي من غير كنت غادة فالهاوية..
حورية تبسمات ليها:من ديما كنتي كتعجبيني فجميع حلاتك وعارفاك قدها وتايقفة فيك..ماعلينا بنتيلي ناوية على شي حاجة
ليلى هزات راسها باه وبحماس بدات كتعاود لها وحورية كتصنت ليها وهي مبتاسمة...
فبلاصة خرا..
نزلات من الطموبيل وهي مبتاسمة..ستقبلوها خداو منها الساروت باش يبلاصيو الطموبيل ودخلات للاوطيل..بالضبط فالمقر الخاص باجتماعات الاحزاب ..كانو تماك عيالات كتعرفهم من السياسة جلسات معاهم علامن يسالي هو الاجتماع ..ودخلات معاهم فالمواضيع السياسية وكيف غادين الاحزاب
وحدة من لعيالات:القانون ولا عاطي دور كبير للمراة فمجال السياسة دخلات دخلة صحيحة والصوت ديالها ولا عندو دور مهم فالانتخابات
نور:أكيد تا لمرأة عندها ماتقول وتاهي قادرة تزيد بلبلاد للقدام بافكارها يقدر شي حوايج غافل عليهم الراجل هي تنتابه ليهم
المرأة التانية:تماما..بما انه راجلك دابة ولا مترشح للانتخابات فضاروري ما ايحتاج لمراتو تكون فجنبو ..احم وعلى ماسمعت نتوما جوج بيكم عيالاتو ووحدة فيكم تختارت هي القايدة والقايدة هي لي اتكون فجنبو وفالصورة
نور بابتاسمة:اه ربي حلل وحنا ماعندناش مشكل ..اما موضوع القايدة فوقع مشكل غادي نعاوظو نشوفو الموضوع
المرا:هدشي عمرو وقع ديما كتختار وحدة ماكايتعاودش من موراها التصويت الياقوت هدا هو القانون لي دايرة فلفيلاج اولا؟
نور بلعات ريقها:ماشي قضية ايتعاود التصويت المهم نهار اتجمعو معانا اتفهمو كلشي ويشرفنا تحضرو معانا..
المراة:ضاروري حنا معاكم ..
وكملو كلامهم..
داز الوقت..
كان خارج من داك القاعة لكبيرة وحداه ياسين دوزو نهار طويل عياو بزاف..جاو مع الصحافة قد قد كيصورو فهاد المترشح الجديد وصغيرة ووسيم وشخصية ..لفت الانتباه..وطبعا الصحافة و مواقع التواصل دايرين خدمتهم اول مرة ايترشح واحد بحالو هكا دار ضجة هو الحزب ديالو ..تبسمات وهي خارجة من القاعة لوخرا ووقفات عليه امام انضار الصحافة وشدات ليه فيديه والصحافة كتسول وباغة تعرف شلا حوايج وهو عيان ماعنددوش مع هاد الاجواء..تنهد وحط يديه على خصرها وجرها معاه مخليهم تابعينو وواحد من رجالو كيمنعهم يوصلو ليه:مزال السي العمدة ايدير لقاء صحافي وداك الساع سولو لي بغيتو
وحدة من الصحفيات:واش المدام نور مراتو لولة ولا التانية واش هي لي اتكون فجنبو ..وفين هي مراتو لوخرا
الراجل خنزر لعيالات عمرهم يتبدلو واخة تكون وزيرة ماشي غا صحافية كيبقة فضولها كيقتلها بهاد الموضوع ديال الشرايكات وضرايرات..هوما فموضوع السياسة صدقات كتوسل على شكون لولة ولا الثانية..ما جاوبهاش ..خلاهم يخرجو بلا حتى جواب...
فنفس الاوطيل..
ياسين كيحل صدافات القميجة:لا هدشي بزاف ماحسابليش السياسة فيها هدشي ..باش يتقبل الحزب ودير بلاصتك خاصك ماهي وما لونها فين تبان شي قراية
بكر :دابة عاد اتبدا الخدمة توكد معايا شوية.
ياسين:كون هاني الحزب ديالنا من دابة داير بلاصتو
هز راسو باه وهو كيشوف فالطابليط وداكشي لي كاتبين وتعاليق والاحزاب لوخرين فين واصلين كاينة منافسة قوية ولوخرين عندهم تجارب خاص يعرف يرسم الطريق لي ايسلك .
دور وجهو واشف فنور لي واقفة حداه وقوص حواجبو:فوقاش جيتي
نور:قبيلة كنتي فاجتماع بقيت مع لعيالات فالقاعة لوخرا
هز راسو باه عاد تفكر فاش عيطات ليه وقالتلو اتجي لعندو كان مشغول ومرون ماركزش فكلامها قالها غا واخة وقطع مشات من بالو اصلا
جلس وجلسات حداه رجع راسو اللور كيضرو راسو وعيان بزاف ماناعس ما واكل مزيان مامرتاح حطات يديها على يديه:عيان
بكر:بزااف
شاف فيها:نتي لاباس كي غادة مع التوجاد مابقة والو
هزات راسها باه:شاداني شوية دلخلعة ولكن الحمد لله موجدة مزيان النجاح ضامناه انا بغيت نكون من الاوائل
زير ليها على يديه لي فيديها:تايق فيك مهما عندك دماغ للقراية وكتشوفي بعيد هكا راه اتوصلي
تبسمات:ان شاء الله
وناضت وقفات على راسو وحطات يديها على راسو كتماصي ليه مامنعهاش كان محتاج للمصاج
ياسين شاف فيهم:ايوا الله يعطينا تاحنا لي يدير لنا المصاج
نور تبسمات:تزوج مالك..
ياسين:داكشي لي بان لي نشوف الياقوت صبري فشي وحدة وتزوجني..نمشي عند الحاج وعمي خالد حسن ليا
وخرج مخليهم فراحتهم ملي شاف الطرح بدا يسخن ..ومشا عند الحاج وخالد فالجناح لاخور يجمع معاهم
نرجعو للقصر..
بالضبط فالجردة..
جالسين حدا لابيسين وكتشوف فالطليفون وتصاورهم كيفاش منشورين فالمواقع تواصل الاجتماعي عنيها مشات نيشان ليديه لي على خصرها وكيف جارها وهي مبتاسمة وكيفاش كيديو عليهم ..
جلسات حورية:كون غا لبستي وقاديتي ومشيتي حتى نتي لعندو مافيعا والو
ليلى شافت فيها ورجعات شافت فالطليفون:شغا نمشي الله يهديك
حورية:كتعصبي والله وعيطي ليه وسولي فيه مالكي راه مشغول بزاف يلاهزد قطعت مع ياسين قالك الماكلة مالقاوش الوقت ياكلوها وماناعسينش مزيان
ليلى قلبات ليها الطليفون لوجها:من نيتك شوفي تصاور سيد عيط للي باغيها تكون معاه وراها معاه اش غنمشي ندير وسطهم عادي اصلا راه مراتو ..نيت تهنيني منو خليه يتلاها معاها ويبعد مني
حورية:الله يعطيني برودة قلبك
ليلى هزات كتافها وهي كتسارا من لفايس للانستا وكال لباحات حاطين تصويرتو وكيهضرو عليه و الانتخابات..وعليه هو ونور وانه كوبل زوين حطات الطليفون كترجع شعرها اللور وكتمتم:قالك متواتين مسالين هاد صفحات دسوشيل ميديا
#يتبع زعمة كتبغيه ولا عاد بدات تبغيه ولا غير ولفات بالاهتمام ليها بحدها؟الاراء