العمدة "مجنون ليلى"💙مكتملة💙

💙الجزء 12💙

👑العمـــــــدة👑
♡..مجنــــون ليلـــى..♡
#12

دنياا تقلبات ولا شي كيضرب شي وشي كيفااك..ولاد الحومة مع صحاب لعريس...لعروسة كتبكي..ترون ليها العرس..
ليلى واقفة هي ولبنات وكيتفرجوو فهاد المضاربة..كتشوف داك خونا ولا شرويطة بين يدين بكر فرشخو مزياان..ماتنكرش عجبها فيه برد ليها قلبها كيفاش تجرأ يقيسهاا وعارفة شكا يتسناها من مور هدشي ايمنع عليها شي حاجة سميتها لعراسات ماشي غا شطيح فلعراسات هدشي وزيد زيد..شهقاات وهي كتشوف واحد من صحاب داك خونا كيتسلت بجنوية تحت منو فاتجاه بكر...غوتات ولكن ماتسمعش صوتها فهاد الصداع لي واقع..لقات واحد لقرعة قدامهااا..زربات عليها..وطارت بيها نيشان للراس قبل يوصل ليه تا سال الدم...ولكن ماحكماتوش..ضار لجيهتهاا صاااعر...رجعات اللور جاي لجيهتها.بدات كتقلب باش تزيد ضربو.المهم مامفاكاش ..يلاه ايخطي الخطوة اللولة ليها وهو يجرو من سمطة دسروال من اللور لعندوو ونزل عليه كيضرب فيه  عاد رجعات فيها الروح...ولا لي كيجي قدامو كينزل عليه...وهي ملي كتلقة الغفلة كتعاونهم وتنزل على شي واحد بشي ضربة باي حاجة جات قدامها..
العرس مابقاش عرس ولا ساحة معركة شي كيضرب فشي ولكراسا كاع تهرسو ولكيسان ..ولعريس مابقاش عريس تاهو محشي فالوسط كيتقاتل لعروسة دخلوها لداخل...
جاو شي دراري كيتجاراو تحنا واحد عند بكر:لبولييس فطريق
تهز كيقلب على خوه شافو هاز شلية وغادي بيها لعند واحد بنادم جرو من دراعوو:زيد قداامي
ياسين سمع نفس الشخص كيقولو البوليس فهم لبلان:واخة
بكر مخنزر وبلغوااات كيشوف فليلى:تحركوو
عرفو الليلة ليلتهم وايكمل بيهم فالدار
خرجوو من داك الخزانة مخلينها مرونة وطلعو للدار ...ليلى هاربة سبقاتهم طالعة كتجري عند خالتهاا ..غير دخلات تخشات وسط خالتها وراجلها:خالتيي ..عميي..عتقونييي ..
غير دخلات تخشات وسط خالتها وراجلها:خالتيي ..عميي..عتقونييي ..
داك ساع دخلات حورية وكنزة كيتجاراو تاهوما
كنزة:صافي رتاحيتييي ها هو العرس ترون بسبابك وغنمشيو فرجلين تاحنا معاك
ليلى يلاه أتجاوبها وهي تشوفو داخل كي شي عجاجة وموراه ياسين
حنان مافاهمة والو هي ومحمد:دابة شواقع اويلي مالكم
بكر مشا نيشان قاصدها وبلغوات قبل يوصل ليها:كديري غا لي فراااسك
ليلى تخبات مور ضهر حنان ولصقات فيها :عمي محمد قولو يبعد منيي وما سوقوش فيا
محمد كيشوف فولدو:مالك عوتاني مع البنت
بكر مسح على راسو معصب باغي يوصل ليها باغي يبرد فيها هاد لعافية لي فيه مازال ما طفات هضر وهو عاض على سنانو :راه مامفاكش معاك اليلى ومايفكني منك غا مولانااا
ليلى مأمنة راسها مخبية ومايقدش يوصل ليها وهي وسط مو وباه-:ماشي سوقك فيا كنت قادة براسي ونوقف داك الحيوان عند حدو نت لي عزيز عليك اامشاكل وكطير رونتي عرس الناس وقلبتيه مطايفة دير خير فراسك وماتبقاش تدخل فيا ..راك ما راجلي ما خويا..ما بَّا
بكر  علا حاجبو عاض على سنانو زادت لعبات ليه على الاعصاب ومازال زايدة فيه خلاتو غير كيشوف فيها بلا تاشي ردة فعل من غير داك لغليان لي كيغليه دمو ملداخل ..ماكاينش لي غيخرج عليها من غير فمها وكلامها وراسها لقاصح..وهو ماكايصبرش لهاد قصوحية الراس. وديما يديه سابقاه يا معاها يا مع خوتاتو لوخرين دابة كبرو مابقاوش قد الضرب ولكن هوما لي كيخرجوه على طوعو وليلى اكتر وحدة فيهم كياكلها لحمها..كان بامكانها تبرد معاه وتحل لمشكل معاه بلا ماتجهلو غا بجوج كلمات بالعقل تبردو وتسلك راسها هاهي دابة زادت زنداتو ادن تحمل لي ايجيها
حنان كتقرس فيها باش تسكت وحورية من لبعيد كتدير ليها الاشارات باش تسكت
كنزة كتهمس لياسين:شنو بان لك هاد المرة ايزرق ليها لعين ليمنية ولا ليسرية
ياسين:كنضن هاد المرة شي عاهة مستديمة
وعلى كلامهم كلشي شهق..فاش شافون طلع فوق الطبلة دلماكلة لي حدا مو وباه..ومد يديه وجرهااا من مور مو وباه من شعرها بااجهد لعندوو حركة ماجاتش ليها للباال حتى طير ليها داك الشعر لي زايدة ملتحت مشا الشيكي:أجيي نتفاهمو دابة ابنت خالتي
حنان ناضت :الله ياربي رخييي من لبنت اويلي بكر رخيييي
محمد لي جالس فوق كرسي المتحرك :بكر حبس علياا هدشي ورخيي من البنت دااابة
بكر ماهواش هنااا شادها من شعرها وجرها لعندو وتم خارج بيها من الدار:زيدي قدامي
ليلى :رخيييي منيييي
خرج من دار وطلع هو وياها فدروج نيشان لبيتو لي لفوق وحنان تابعاه اما لبنات ماقدو يديرو والو حيت غايشركهم معاها
حنان :بكر رخيي من لبنت ..بعد منههاا
وصل لباب بيتو ووقف وبالغواات:الوااليييدة هبطيي بحالك هااد بناادمة انا لي كنعرف ليها غبرت شهورا تفورماطات وضصرات بزاف
ليلى كتشوف فحنان :خالتي قولوو يرخييي منيي كنقسم لك بالله راه نبات مانصبح ومانضربش ضربة فهاد اادااار
بكر كيحل باب لبيت:زيدي نسمع ..قلتي تباتي ماتصبحي يااك
حنان يلاه اتدوي وهو يقاطعها:الواليدة هبطي بحالك بغيتي تزيدي تجعريني عليها دقي فهاد لباب
ودخل وزدح لباب خلاها واقفة ماعارفاش اش دير ..ماعندها اصلا مادير بحال ديما هاد الجوج ايحمقوهم ...وعارفة لازادت تدخلات ايزيد يتعصب ويشخد.كتر
نزلات مع الدروج لقات رقية طلعات ولبنات كيعاودو ليها اش وقع
حنان:طلعي فكي بنتك..نتي مها وايسمع منك طلعي
رقية :خليه يربيها الجيفة لوخرا ..حدايا قالها ماتشطحيش والعرس عامر بشماكرية ولبزنازة مادارت غا لي فراسها ورونات العرس ..خليه هو لي كيعرف ليها
حنان:لا حول ولا قوة الا بالله ..واش باغة تسطيني طلعي فكي بنتك
رقية:بنتي وانا كنعرفها كامونية
محمد لي ماقادرش يتحرك ولا يدير شي حاجة فوق داك ااكرسي المتحرك مكمدها فقلبو وساكت  ولكن ماغايدوزهاليهش بالسهل كيفاش ماسمعش منو ودار لي فراسو