⌠فصلية الضابط انمار ⌡
⌠ بقلم _ Zahraa Al-Fartousi ⌡
لا تنسون التصويت والتعليق ع كل فقره + متابعة حسابي ♡.
اتمنى لكم قراءه ممتعه ..♡ .
- انمار يگول :
⎤ مجرد حُب كِسر كل القِوانين
وخِرج عِن سَيطرة گلبي وتمُرد
على حُكم المَذاهب والتقاليد .
احُبك يـ العِيونك مِالهن حَد !
احِبك اكثر مَن العَني يحِچون ..
واكِثر مَن صِراع الروج والسَد
واكثِر مِن حَجم تقصِيري وياك
مِن تحِتاجني ويتأخِر الردّ
واحُبك لكن مِدري شگد . بسِ ها
مو حِلوة من احُبك اعِرف شگِد 🤎!. ⎣
__________________________________
〈زهراء〉
:- بعد ما اتطمنت على انمار وعرفت انو هو بخير اتصلت على حنين حتى اتفق وياهه انو ترتبلي الأمور حتى ارجع للبيت بدون ما يدري انمار ...
حجزت صالون ورحنه اني وامي .. سويت اظافري رتبتهم وتنضيف بشره وللجسم وكصيت شوي من أطراف شعري ، اني احب لون شعري ما ردت اغيره بس سويت خصله وحده لون اشگر من ناحية التغيير ..
رجعت للبيت جهزت اغراضي واخذت شاور ورتبت نفسي واتصلت على ابوي حتى يجي ياخذني لبيت
اهل انمار ..
تقريباً الساعه ٥ العصر دخلت لبيتهم .. استقبلوني ورحت اول شي سلمت ع الشيخ والشيخه و جانو كلش فرحانين بجيتي وحنين وساره واكفات على جهه ويضحكن اجتي حنين حضنتني وكالت :
- " نورتي البيت ام الزوز مشتاقيلج .
- " هههه نوركم هذا عمري والله اني اكثر "
ضليت كاعده يمهم بالصاله شوي واترخصت حتى اصعد لغرفتي اعزل اغراضي ..
اجتي حنين وياي حتى تساعدني ،..
صعدت لغرفتي اول ما دخلت ضليت واكفه باوعت لغرفتي وابتسمت اتذكرت كعدتنه وضحكتنه وعركاتنه اني وانمار ضحكت ودخلت ..
بديت اعزل اغراضي ورتبت الغرفه غيرتهه كُلهه شغلت بخور واترخصت من حنين انو ادخل للحمام ..
دخلت غسلت وبدلت لبست قفطان نازك لون بيج ورتبت شالي وخليت مكياج مرتب وعطرت ونزلت ..
الساعه ٧ تقريباً سمعنه صوت رمي وهوسه بره عرفنه انمار وصل ..
كاموا الشيخ والشيخه وجان زوج ساره موجود طلعو كلهم يستقبلونه ورحنه اني وحنين وساره نباوع من الشباك ..
جان انمار واكف يم السياره واصدقائه ياسر وليث ساندينه وجان اكو هواي ناس اغلبهم جانو لابسين عسكري نص يرمي ونص يهوس والحجيه راحت حضنت انمار وتهلهل ..
انتبهلنه انمار وياسر حنين رأساً طفرت بس انه
ضليت واكفه اباوع
انمار عكد حاجبه وضحك ابتسمت بوجهه ورحت نزلت حتى استقبله ..
دخلو كلهم للمضيف شوي واجه انمار للصاله رحت يمه ابتسمت وكلت :
- " ليش طولت ؟"
- " لو ادري انتي هنا جان اجيت من الصبح "
كال هيج واشرلي بأيده بمعنى "تعاي بحضني ..
حضنته وكلت :
- " الحمدلله ع سلامتك ابو فصعوني "
باسني بخدي وكال :
- " الله يسلمج بعد عيني "
-" شلون صرت بعدك تعبان ؟
-" گولي هَلا و مَرحبا و يطيح كل التَعَب .
ضحكت وكلت بهمس :
- " يا هَلا ومَرحبا بأبو فصعوني"
ابتسم وكال :
-" هلا بيچ ام فصعوني"
اجت حنين حضنته حيل عقج ملامحه مبين توجع ، ضحك وكال :
-" علكيفج بويه صح ما متت بس راح تموتيني "
ضلينه نضحك ، دخل كعد يمنه شوي وكال :
- " يله يابه اني رايح للمضيف عيب من الخطار "
كال هيج وكام رحت يمه اساعده ..
خله ايده على كتفي وكال :
- يمتى اجيتي ؟
= العصر اجيت .
- نورتي البيت حبيبتي .
ابتسمت طلعنه بالطارمه ضل يباوع مجان احد موجود ، باوعلي وعض شفته وابتسم وهمس :
- " محد موجود هنا .."
رفعت حاجبي وكلت : ايي ؟"
تقرب علي وباسني حيل بعدهه راح ودخل للمضيف ..
ضحكت ودرت جان اشوف حنين واكفه وفاتحه عيونهه بصدمه .. بعدهه طكتهه ضحكه بصوت عالي وكالت :
- " اخوي جنه مستعجل ؟"
- " ههههه انجبي ولج عيب "
- " والله ما تستحون هاي ثاني مره اشوفكم "
ضليت اضحك من الفشله ودخلت ...
البيت انملى خطار علمود انمار أجو زلم ونسوان ..
التهينه اني والبنات بالمطبخ جهه نحضر ضيافه وجهه نغسل مواعين وجهه نرتب ونقدم ...
صارت الساعه ١٢ بليل يله البيت صار هدوء ،
اجتمعنه كُلنه بالصاله نسولف سوه ونضحك اني كاعده يم الحجيه تسألني على الحمل ووضعي وتوصيني أدير بالي على نفسي وانمار ..
كام انمار واترخص حتى يصعد للغرفه باوعتلي حنين وكالت :
" عيني روحي ساعدي اخوي المستعجل" وغمزت ..
باوعلهه انمار وكال :
- " بيمن مستعجل ولج ؟
حنين : " هههه لا سلامتك شغله بيناتنه اني وزهراء .
خزرتهه وكلت بصوت ناصي : حنوون فضحتينه ..
ضلت تضحك ،
رحت سندته وصعدنه سوه للغرفه كعد ع الجربايه واني يمه باوعلي وابتسم وكال :
- " شنو هيه الشغله الي بينج انتي وحنين ؟"
- " ههههه حنين خلصت اليوم كله تصنف علينه لأن شافتك وانت تبوسني بالطارمه ."
- " هاا ههههه عود انه شفت ما اكو احد يمتى اجت .
عدل كعدته وتقرب علي وكال :
- يله هسه ما اكو احد .. " كال هيج وغمز "
كمت من يمه وكلت :
- " لا حبيبي مو هسه .. بسته بخده ورحت فتحت كنتوره حضرت ملابس أله وكلت ..
-" هسه كوم غسل وارتاح حتى انطيك علاجك "
- " يله خوش "
راح دخل الحمام شوي وطلع لابس بس البجامه جان صدره وكتفه كله لافينه راح كعد يم الميز وكال :
- " عيني ام الزوز انطيني علاكة الادويه"
كمت وكلت :
- صار عيني .
انطيته الدوه وكلاص مي وضليت واكفه يمه اخذت المشط ارتب بشعره باوعلي من المرايه ضحك وگال :
" ولج شسويتي بيه صرت عبد الحليم هههه"
- " ههههه والله حلو عليك "
اخذت الشسوار وضليت انشف شعره ، خلصت وكعدت كباله ارتب شعره ولحيته بأيدي ..
محاوط خصري بأيديه وكل شوي يبوسني ويشمني ويكول :
- " ويا سمارچ تارس عيوني عشكك ..
"أنتي ياگـمرة ليلي الوحيـدة ".
ابتسمت وكلت :
- " سَند گلبي، سِر أبتسامتي وكُل گلي ..
بسته بخده وكمت ، گلت :
-" يله حبيبي تكوم ترتاح .
كام وكال :
-" انتي راحتي يبعد عيني .
راح تمدد ع الجربايه ساعدته ورتبت المخده إله ورحت اخذت بجامتي ودخلت للحمام اخذت شاور ع السريع وبدلت وطلعت ..
نشفت شعري وعفته مفتوح وعطرت وخليت بس تنت وكبست رموشي ورحت تمددت يمه شوي ومد ايده على خصري وجراني علي صرت بحضنه ..
بعدت عنه شوي وكلت :
- " انمار خاف أذيك واني ما ادري "
-" نامي ومالج شغل ما تأذيني .
-" اوك .
-" يمته تكليلي احبك ؟
ابتسمت وبسته بهدوء وكلت بهمس :
احبگ يبعد عيوني .
ابتسم وخله وجهه بركبتي ...
ضليت نايمه بحضنه وكل شوي يبوس شي
بوجهي .. محاوطه ركبته بأيدي وايدي الثانيه امشي بيهه على شعره ..
همس :
" ام الزوز نمتي ؟
- " لا عيني تريد شي "
- " اريد احجي وياج
- " اوك اسمعك حبيبي "
گال :
- " شوفي بنيتي هذا الأسبوع راح يكون متعب شوي من ناحية خطار وشغل .. من هسه اكلج ممنوع تضلين واكفه بالمطبخ حدج تسوين شغله زغيرة وتگعدين ممنوع تتعبين نفسج تمام ..
صارت هاي المشكله وعدت على خير طلعتي منهه بسلامه ما اريد يصير بيج شي خوش لا تشغلين بالي عليج حبيبتي انتي "
-" انشالله عيني لا تشغل بالك ..
بعدهه صفنت بعيونه وعكدت حاجبي وكلت :
- " اممم انماار انت توصيني تخاف علي لو على فهد ؟
ضحك وگال :
- " عليكم اثنينكم .
- " اوك صدكت .
ضليت العب بشعري وأراوي الخصله وهمست :
- " ما حسيت اكو شي متغير بيه ؟
ضل يباوعلي بتركيز وهو عاكد حاجبه .. مد أيده على شعري وكال :
- " هاي شنو مغيره لون شعرج ؟
- " لاا بس خصله وحده ، شنو رأيك ..
- " جؤ جؤ شلون احنه وياج ؟!
- " ليش حبيبي يعني مو حلو احجي الصدُك .
- " هوه حلو ولايكلچ بس انه اخاف شعرچ يخرب .
- " لا ما يخرب .. يله كولي حلو لو لا ؟
- " حلو وكلچ حلوه ما بيج شي مو حلو .
ابتسمت بخجل وحضنته ..
باسني بخدي وگال :
- " بعد شكد ويجي فهد ؟
- " بعد اربع شهور انشالله .
- " انشالله وبعدين تضلين ما تصيحيلي انمار .
-" ليش ؟
- " تضلين تسميني حفاضات حليب ههههه .
- " ههههه ايي .
حضني حيل ونام واني كذالك ...
.
.
.
.
بعد فترة سنه ونص تقريباً جنه مجتمعين اني وحنين وساره بغرفة الحجيه نسولف سوه ..
حنين صار عدهه ٢ بنات تؤام { روز ، ناز } ،
وساره صار عدهه ولد { أدهم } بعد رهف ..
واني ولدت فهد وصار عمره سنه ونص .. كاعدين ملتهين سوالف وضوجه جان انمار وياسر نازلين واجب والبيت فارغ .. كامت حنين وكالت :
= اففف شنو هاذ الاكتئاب تره ضجت .
ساره ضحكت وكالت :
= شنو تردين عيني نركصلج ؟
رفعت حاجبهه تفكر وكالت :
= والله خوش فكره مدام محد بالبيت كومن خل نركص .
- هههههه اي والله صدك خوش فكره .
راحت حنين جابت الديجي وأجت شغلت ساجده عبيد وبدت تهز ..
أخذني الواهس كمت اهز وياهن ..
اهز بخصري واردد بكلمات الأغنيه :
" كافي يا روح الملامه "
.
.
- حنين : نص ساعه ومنشوف غير نفتح الباب ودخل انمار بضهره جنطته .
وزهراء مصعده الدشداشه ورابطتها بالشال وتهز ..
.
.
- زهراء : فجأه البنات كعدن ضليت وحدي اهز واكول :
" سحرني وباگ دلالي ..
.
.
- حنين : انمار فاتح عينه وصافن عليها وهيه منطلقه نأشر ماكو لطشت تهز وتتمايل .
.
.
- زهراء: ليش انتَ على الحبوك تنحب .
انمار بصياح وخزره : هوا اليوم اخلي الحزام يحب ضهرچن .
فزت وندارت بسرعه واحنه گوه ضامين ضحكتنه صارت صفره خطيه تنزل بل دشداشه ومتنزل لأن مربوطه بل شال ..
نزل نضراته لرجلها ورفعها لعيونهه يباوعلهه ويخزر .
دمعت عيونهه وحچت :
- زهراء : فززني صوت خشن انداريت واشوف انمار واكف ويباوعلي ويخزر توترت ضليت اجر بدشداشتي اريد انزلها متنزل ضل يباوعلي من فوك ليجوه وبس يخزر .. عيوني دمعن وكلت بتوتر :
- " ااا شسمه انماار يمتى اجيت ؟"
كال وهو عاكد حاجبه :
- " شنو هاذ الركص وين كاعدين زهرااء ؟
- " هاا مو شسمه جنه ضايجين وكلنه نغير جو ..
راح طفه الديجي وگال : بعدين حسابچ .
كامو حنين وساره يسلمون علي راح باس الحجيه سلم عليهه وطلع من الغرفه وكال موجه كلامه إلي :
- " عيني الضايجه تعاي للغرفه اذا متصير زحمه ..
رحت يم حنين وكلت : تعاي ولج فتحيلي الشال مداينفتح .
ضحكت وكالت : " تعاي حبي تعاي اليوم كلنه مكتولين .
عدلت ملابسي وصعدت للغرفه دكيت الباب
ودخلت .. جان انمار واكف يم الميز ينزع بسترته رحت يمه امشي بهدوء .. گلت :
- حمدلله ع سلامتك عيني .
اندار علي تقرب يمي وهو يخزر بيه وگال :
- " شنو هالركص ست زهراء؟!
ابتسمت احاول اغير الموضوع ضليت افتح بقميصه وگلت بدلع :
- " حبيبي ما اشتاقيتلنه .
ابتسم وحاوط خصري وقرب وجهه قريب مني و گال :
- " مشتاقلج ولج .
- " هههه حتى احنه .
- " وين فهد ؟ شنو نايم ..
- " ايي نايم جوه تريده اروح اجيبه ؟
- " لاا تعاي تردين تشردين موو ..
- ههههه لاا .
جرني من ايدي وحضني يبوس بيه .. شوي واندك الباب دخلت حنين وبيدهه فهد كالت :
- بس يبجي ما عرفت شسويله .
راح انمار خذا من ايدهه ضل يلعب ويا وهو مستمر يبجي شلته بحضني بس بسته سكت .. باوعله انمار وكال :
- " والله مو صوجك .. بعدهه باوعلي وكال : شنو هذا ابنج جنه ما يريدني .
- " ههههه لا مو ما يريدك بس هو متعلق بيه هواي .
خذا من ايدي وضل يلعبه وفهود بس صافن عليه ومطنكر ... وكفت كباله وضليت العب ويا ضل يضحك ..ضل انمار يبوس بي وهو ضل يكركر ومجلب بلحيت ابو .. ضل يناغي بصوت عالي "باباا .. باباا
انمار صفن وگال :
- " سمعتي مو كال بابا لو شنو ؟
-" ايي كالك بابا .
ضحك بصوت عالي وضل يعضعض بخدوده .. جانت هاي اول مره يسمع منه كلمة بابا ، بحيث خلص اليوم كله بس شايله ويفتر بي وكل شوي يكوله "كول بابا ..
.
.
.
.
.
.
< after four years >
< بعد اربع سنوات >
:- نايمه فزيت على صوت فهد يطفر ع الجربايه ويكول :
" مامي يلا كُعدي بابا اجه احنه جوعانين "
ضحكت على طريقة نطقه وكعدت اجه طفر بحضني ويبوس بيه حضنته وضليت ابوس بخدوده واكول :
" اخخ يمه فدوه لفهدي الحلو يا روح مامي
انتَ .. حبيبي وين اختك ؟
- " راحت فيَ يم بابا "
" صدُك يمتى اجه بابا ليش ما كعدتني "
كلت هيج وكمت من الجربايه لزمت فهد من ايده وأمشي بي رحنه سوه للصاله واشوف انمار متمدد ع القنفه ومخلي فيَ على صدره ويلعب وياهه وهيه بس تضحك ..
دخلت بهدوء رحت بسته بخده وكلت :
- " هاي يمتى اجيت ؟
باوعلي وضحك وگال :
- " صح النوم حبيبتي نزلت الصبح جنتي نايمه والتهيت وي الجهال .
- " حمدلله ع سلامتك حبيبي "
كام حضني وضل يبوس بيه بعدت عنه وهمست :
- " انماار عيب هنا كدام الجهال ..
- " هههه مشتاقلج ولج .
- " اني اكثر حبيبي .
- " يبعد عيوني انتي .
فيَ ضلت تبجي راح شالهه وضل يسكت بيهه وهيه مجلبه بركبته تبوس بي وتكول بدلع :
" باابيي " وهو يضحك ويجاوب : "ها يا عيونه لأبوچ"
ضحكت عليهم ورحت جهزت الريوك ..
.
.
•" بعد مرور اربع سنوات استقرينه ببيتنه الجديد اني وعائلتي إلي متكونه من انمار وفهد إلي عمره اربع سنوات وبنتي الصغيره اسمهه " فيَ" عمرهه
سنتين ..
انمار صار كُلش متعلق بأطفاله وخاصةً فيَ جانت معزتهه تختلف وبالأصح جانت هيه تخلق معزتها بحركاتهه ..
فيَ متعلقه بأبوهه كُلش جان بس يطلع للشغل تضل تبجي وتنتضره من يجي يلا تهدء .. وبس يجي تروح تستقبله بالباب تبوسه وتفتحله حذائه وهو يشيلهه ويضل يبوس بيهه بعدهه يكعدهه ع الميز كباله وتضل تفتح بقميصه وتساعده ..
تروح وتجي تبوسه وتتدلع كدامه وتضل تصيحله
"بابي " وهو يتخبل عليهه ومدللهه دلال ..
ما مره اجه للبيت إلا وهو جايب شي ألهم ،.
اما فهد جان عكس اخته طبعه هادء وذكي وتصرفاته مثل ابو بالضبط نفس عكدة الحاجب وتقريباً ماخذ اغلب كلمات ابو .. فهد متعلق بيه اكثر وبنفس الوقت يحب ابو كلش ومتعلق بي ..
علاقتي اني وانمار قوت اكثر من قبل تعلق بيه واني تعلقت بي اكثر ما يخلص يوم إذا ما يسمعني كلامه وغزله ويحسسني بكبر حُبه تجاهي ..
جان وياي بكل خطوه خلصت اربع سنوات بالكليه ما تركني ولا لحضه من ناحية التدريس والتشجيع ضل وياي دائماً حتى أطفالي بفترة الامتحانات هوه يكون مسؤول عنهم واني اضل ادرس ..
خلصت الكليه بنجاح الحمدلله حققت حلمي ووصلت للشي الاريده ..
استلمت شهادة الصيدله بس ما بديت بشغلي كلت اتفرغ لعائلتي سنه او سنتين وبعدين الله كريم "...
.
.
خليت الريوك ع الميز اجه انمار وفيَ بحضنه كعد يوكل بيهه وبفهد ويشاقه وياهم وهم بس يضحكون .. كلت :
" حبيبي فهدي "..
جاوبني وهو يقلد ابو :
- " عُيونه ها يبعد عيوني "
فتحت عيني بصدمه وباوعت لأنمار وضحكت وهو كذلك ضحك .. باوعت لفهد وكلت :
" فهودي شنو كلت ما سمعت ؟
- " يبعد عيوني احبچ "
انمار طكهه ضحكه بصوت عالي وگال موجه الكلام لفهد :
- " ولگ فهد منين سامع هالكلام ؟
كال " أنت مو تكول لمامي احبج اني سمعت "
خزره وكال : " وشنو تكول احبج ولك "
فهد برطم وباوعلي .. اجه بحضني وكال :
- " اني بعد ما احب بابا بس احبج "
بسته بخده وكلت :
- " ليش حبيبي بابا يشاقه وياك .. باوعت لأنمار وكلت : " مو صح بابا تشاقه وي فهودي ؟
انمار كام انطاني فيَ وأخذ فهد من حضني شاله وضل يبوس بي وهو رأساً ضحك وحضن ابو .. انمار باوعلي وكال :
- " حبيبتي خلي نشوف يوم حلو ونطلع الجهال لمدينة الألعاب شتكولين ؟
كمت وكلت :
- " صدُك والله .. ايي نروح .
ضحك وكال :
- " حتى الجهال ما فرحو مثلج .
- " هههه انمااري
- " عيونه .
- " فهدي يكولهه احلى .. كلت هيج والعب بشعر فهد .
انمار مد ايده على خصري وباسني بخدي حيل ..
گلت :
- " سيادتك ؟
- " يبعد المَايرمشن مِن يشَوفنچ .
- " احسك صاير متحبني ..
عكد حاجبه وگال :
- " وشلون عرفتي ؟
- " احساس ..
- ولچ كربونه الاحساسج ما يحس بس بالسوالف الطايح حظها بلكت يحس من افهه بعيونچ واريدچ ؟!
- " ها ؟
- " شنو هاا يبعد الهَا مو عليتي گلبي ..
ابتسمت بوجهه وضليت ساكته .
ضل يضحك وهو شايل فهد بأيد وفيَ بأيد وأخذهم لغرفتهم ..
كملت تعزيل ورتبت البيت ورحت لغرفة الأطفال لكيت انمار نايم وفهد وفيَ بحضنه كلمن بجهه ..
ابتسمت على شكلهم ودخلت غطيتهم وطلعت .
.
.
دخلت لغرفتي أخذت شاور وأجاني مود انو اكشخ ، سويت مكياج يلائم ملامح وجهي وحمره لون غامق صار يجنن ..
بعدهه سرحت شعري وعفته مفتوح وشلت الخصله بفيونكه ناعمه ..
لبست فستان قصير وضيك ضهره مكشوف لون ابيض وبي ورد ناعم كلش نازك ، كملت ولبست اكسسوارات ناعمه تلائم لبسي ، عطرت وطلعت كعدت بالصاله ..
.
اخذت تلفوني واتصلت على امي ضليت احجي وياهه واتطمن عليهم بعدهه حجيت وي اختي وكلت :
- ها عنوبه بشري شنو نتيجه مالتج ؟
= لا الحمدلله نجحت وبمعدل عالي .
- صدُك والله الف مبروك عمريي انشالله اشوفج بأعلى المراتب .
= ههههه شكراً يبارك بيچ .
- شبي صوتج احسج مو على بعضج ؟..
= الصراحه ايي اكو موضوع شوي زاعجني .. بس ما اكدر احجيلج بالتلفون .
- ليش شكو لا تخوفيني شنو صاير ؟!
= لاا مو كلش مهم من تجين احجيلج .
- تمام اشوف يمكن باجر اجي .
= اوك ننتظرج هلا بيج .
ودعتهه وسديته ، اختي نجحت من الخامس راحت للسادس هيه عكسي متحب الاحيائي والطب طموحهه كان قانون وحلمهه تصير محاميه وكلنه وياهه ونشجعهه ع هالشي ،.
رغم هيه نجحت وبشرتني بس ما حسيتهه فرحانه كأنو اكو شي زاعجهه ، بس اكدتلي انو شي مو كلش مهم .. رغم هالشي جنت خايفه عليهه ووعدتهه انو اروحلهه واخليها تشرحلي كلشي مضوجهه وزاعجهه ..
.
.
ضليت اكلب بالتلفون واجه ع بالي إنو صارلي فتره
ما مدلعه عائلتي ..
كمت للمطبخ شغلت اغاني ولبست سماعاتي لأن نايمين وضليت ادندن واشتغل ..
بديت بالحلى سويت كيكه وخليت عليهه صوص شوكلت ، كملتهه ودخلتهه الثلاجه ..
بعدهه ضليت ارتب فواكه بسله وحلويات وعصاير ..
سويت فطائر ودخلتهه الفرن ، كل تركيزي عليهه واتمايل وادندن وي الأغنيه ،.
ما حسيت إلا على ايد انمدت على خصري
وانداريت .. شفت انمار جان توه كاعد ابتسم وهو يباوعلي من فوك ليجوه وگال بصوت ناصي :
- شجاي يسوي الحلو ؟
وخرت سماعتي وحاوطت ركبته بأيدي وكلت :
- اسوي عصرونيه حلوه حتى نكدر نكعد سوه .
= امم تدرين قبل شوي اتصل علي ياسر علمود شغل بس لغيته حتى نطلع .
- بس حبيبي انت اليوم اجيت وتعبان وهم احنه منريد نطلع بس نكعد بالطارمه مدام الجو حلو وهم فهد وفيَ يلعبون وغير مره نطلع .
= خوش يبعد عيوني انتي .
كال هيج وحضني حيل وراد يبوسني واجه فهد يركض ويكول :
- " ماميي فوفه كعدت "
انمار غمض عيونه وهز راسه بإنزعاج وگال :
- " بالوقت المناسب ..
- " ههههه يله حبيبي هسه انبوسك اني وفهد ، شلت فهد باس ابو بخده واني كذالك ..
ضحك وكرص خد فهد وگال :
- " احلى بوسه هههه ، انه رايح اجيب فيَ .
-" تمام عيني .
.
خليت فهد يمي ع الميز ورحت جبت الكيكه اوريهه لفهد وكلت :
- " شووف شنوو سويت لفهدي ..
ضل يصفك ويضحك ويكول :
- كيكة شوكولاا شكراً ماميي .
" كال هيج وهو حضني ويبوس بيه .. اجه انمار شافنه وضحك وكال :
- حتى انه ما بايسج هالكد .
= ههههه غير هذا ابني وحبيبي .
اخذت فيَ منه واني ابوس بيهه .. جانت لابسه بس كيمونه وشورت وشعرهه لحد كتفهه ناعم واسود ورموشهه طوال وخدودهه ورديات طالعه تجنن ..
اخذتهه وكعدتهه بكرسيهه وفهد يمي .. انمار اجه يمي وكال :
- عيني رايح بالصاله ادخن واكمل كم مكالمه عن الشغل واجي أخذهم منج .
ابتسمت وكلت :
- لا حبيبي روح ما عندي شي .
طلع واني شغلت اغاني اطفال وضلينه نغني ونركص سوه اني وفهد وفيَ .. خلصناهه ضحك اخذت فراوله وخليت وحده بأيد فيَ وضلينه اني وفهد نرتبها ع الكيكه ونزينها مثل ما يحب ..
.
مرت نص ساعه واني ملتهيه وي أطفالي اجه انمار باوعلنه وضحك وگال :
= هاي شسويتي بيهم هههه .
- ههههه اني ما دخلني هم يحبون الشوكولا
والفراوله ..
جانت أشكالهم تضحك ملطخين ايديهم ووجههم والملابس عباره عن شوكولا وفراوله ..
گال :
= زين تعاي انتي غيري ملابسهم وانه امشطلهم واكملهم وياج .
- تمام عيني
رحنه للغرفه بديت بفهد غسلته وغيرت لبسه وانطيته لأنمار ضل يمشط شعره ويعطره .. أخذت فيَ كذالك لبستهه نفس فستاني قصير وضهره مكشوف وانطيتهه لأنمار يمشطلهه لبستهه سكارف وحذاء بي شرايط يلتفون ع الرجل صارت تجنن عطرتهه وكلت ..
- يله حبيبي امشي نطلع لسفرتنه .
= هههه يله امشي .
طلعت فرشت بالطارمه ورتبت الاكل الي سويته . وخليت العاب لأطفالي بجهه ..
عندي حديقه كلش حلوه وجبيره وبيهه كُل انواع النباتات والورد وخاصة ورد الجوري الأحمر وردتي المفضله مليانه الحديقه منها ..
كاعده واطفالي يركضون كدامي ويلعبون وصوت ضحكتهم محليه الكعده .. انمار كاعد يمي وكل شوي يشاقيني لو يغازل ..
تمدد وخله راسه بحضني مرت تقريباً ساعتين على كعدتنه خلصناهه ضحك وسوالف ،.
صافن بعيوني وهمس :
- " زهرتي ..
- " عُيونها
- " لا تلوميني ، من آحبچ گوة عَني
يـ الضحكتچ كلفت بس صوت منچ
وكلفت كُل گلبي مني ".
ضحكت وبسته بخده ..
شافونه فهد وفيَ وأجو ركض فهد لازم فيَ من ايدهه واجت شمرت نفسهه بحضن ابوهه وتكوله بدلع
: " بابيي ..
شالهه وضل يلعبهه وهيه تضحكله ..
اجاني فهد باسني وهو يگول :
- " مامي احبچ كلشش .
- " هههه يروحي انت ، اروحلك فدوه انه احبك اكثر .
باوعلنه انمار وعكد حاجبه وگال :
- " واحنه شنو كاعدين هنا ؟
ضحكت اجتي فيَ بحضني تغار من اخوهه وانمار اخذ فهد يلعبه ..
.
.
.
.
تقريباً الساعه ١ بليل نومت أطفالي وانمار جان كاعد بالصاله .. رحت للغرفه دخلت للحمام اخذت شاور
ع السريع ولبست بجامتي وضليت واكفه
امشط شعري ..
شوي وسمعت صوت خطوات انمار رأساً اجه عبالي اسوي مقلب رحت ركض وكفت وره الباب ،.
شوي وما أحس غير انو الباب انفتح وانركع
بوجهي حيل ..
شهكت ولزمت وجهي حسيت شي حار ضل ينزل من أنفي .
انمار ؛
يتفقد وجهي بخوف وگال :
- " شبيچ تأذيتي گسر بأيدي ما ادري بيچ والعباس وبعدين شعندج خاتله وره الباب .
باوعتله واني احاول أبين مابيه شي گتله :
- " ما بيه شي حَبيبي لا تخاف ..
" كلت هيج وابتسمت "
- " شلون ما اخاف وانتي جاي تنزفين كومي اخذج للدكتور .
سحب ايدي
- " گتلك ما بيه شي لا تخاف هسه اكوم اغسل
وينقطع النزف .
- " اخخ منج اخ يعني شتسوين وره الباب ها فهميني؟!
ابتسمت وكلت :
- " مو شسمه كلت اسوي مقلب واشاقه وياك ..
- " هاي نتيجة المقلب تعاي غسلي بعد عيني .
عفته ورحت غسلت وجهي وملابسي صارو عباره
عن دم ..
وكف النزف رحت غيرت لبسي وكعدت ع الجربايه
اجه يمي وهو يباوعلي بقلق وخوف بعدهه
باسني بخدي وگال :
- " خو ما متأذيه بنيتي ؟.
- " لا حبيبي والله ما بيه شي .
احجي واني مبتسمه واباوع بعيونه لزمت ايده وحاوطت اصابعي بأصابعه بعدهه همست :
- خلي ننام تأخر الوقت .
تمدد ودخلت بحضنه .. قوه حضنه علي وكل شوي يتنهد ويبوسني ويهمس :
- تصبحين على خير ، مو قصدي أذيج
بنيتي ..
كلت :
- " وانت من أهلي "
ابتسم .. بسته بخده بهدوء وغفيت ..
.
.
ثاني يوم كعدنه كالعاده على فهد وفيَ يطفرون ع الجربايه حتى نكعد ..
دفنت نفسي بحضنه وكلت :
- " مو بعد وكت ؟
- " ايي والله انه بعدني نعسان .
- " لعد انت نام واني راح أخذهم لغرفتهم .
- " تعاي نامي وعوفيهم انتي منعسانه ؟
- " لا هميالله حتى نجهز نفسنه وتوديني لأهلي .
عكد حاجبه وكال :
- " شعندج رايحه ؟
بسته بخده وكلت :
- " حبيبي صارلي هواي مرايحه ألهم وهم اني مشتاقتلهم كلش .
- "اممم والمطلوب؟
- " المطلوب بعدين توديني .
- " انشالله .
عفته رجع نام وأخذت فهد وفيَ وطلعنه من الغرفه
اول شي رحنه للمطبخ سويت ريوك واكلنه سوه ..
بعدهه اخذتهم لغرفتهم جهزتهم وفيَ رجعت نامت وفهد ضل لازم ايباده وكاعد ..
نضفت البيت ورتبته وسويت اكل وخليته بالثلاجة لأنماري ..
ورحت لغرفتي أخذت ملابس ودخلت للحمام اخذت شاور وطلعت لبست بنطلون وقميص يصير شوي قصير خليت مكياجي مثل العاده ..
جاي اعطر وكعد انمار اجه يمي يباوعلي وهو عاكد حاجبه گال :
- " شنو شو مجهزه نفسج ؟
- " ايي حبيبي مو كتلك .
- " بس ما تباتين .
- " لييش ؟
- " جؤ ماكو ترحين وبليل اجي عليج .
- " انماار ..
- " يا عيونه انتي .. مثل ما كتلج اخذج هسه وبليل اجي عليج .
- " افف تمام .
باسني بخدي وگال :
- يابعَد چلمات گلبي الما گلتهن .
- " ايي قشمرني ..
ضحك بصوت عالي ودخل للحمام ..
كملت نفسي ورتبت شالي طلع من الحمام باوعلي وابتسم اجه يمي يرتب بشعره باوعلي من المرايه ضحك وگال :
- " ليش زعلان الحلو ؟
درت علي وكلت :
- " لا مازعلانه منك
تقرب يمي وكال :
- " چا شبيج يبعد عيوني .
- " بس شوي مشغول بالي على أُختي ..
- " ليش شبيهه خو ما اكو شي .
- " ما ادري انشالله ما اكو شي اروح واشوف .
- " اذا تحتاجين شي اتصلي علي .
- " انشالله عيني .
كمل وكال :
- " جا وين الجهال شنو نامو ؟
- " ايي بدلتهم فيَ نامت بس فهد كاعد .
- " خوش يله بويه امشي .
لكينه فهد حاضن الايباد ونايم راح هو شاله واني أخذت فيَ كعدناهم بالسياره وطلعنه ..
فيَ فزت وراحت بحضن ابوهه وره شوي وصلنه لبيت اهلي ودعت انمار ونزلنه فهد ما رضى يريد يروح
وي ابو .. كال انمار :
- " عوفي حبيبتي روحو انتم وانه بليل اجيبه الج .
- " اوك عيني ديربالك علي ..
باوعت لفهد وكلت :
" حبيبي ضل يم بابا لا تروح منا ومنا .
جاوبني وكال :
" اوكِ ماميي .
* لأن انمار دائماً يحجي لفهد عن شغله والمركز والأسلحه كلش ضل يحب هاي الأشياء ..
وبس يرجع ابو من الشغل يروح يكعد يمه وانمار يضل يحجيله وهو بس صافن علي وكل شوي يسأله ..
فمن فهد عرف انو ابو راح يروح للمركز ما قبل ينزل وراد يروح وي ابو ، وهم انمار ما رفض وقبل
ياخذه ويا ".
دخلت لبيت اهلي استقبلوني وبالأصح استقبلو فيَ واني ضليت واكفه بالباب :)
كلهم أجو علمود فيَ واحد يلعبهه والثاني يغنيلهه ويركص وهيه بس تضحك ..
باوعتلهم وكلت :
- " احم واني شنو هنا نخله مثلاً عالأقل سلمو علي شنو ما مشتاقيلي ؟
باوعتلي امي و ضحكت وكالت :
- " لا يمه حبيبتي انتي الأصل شلون ما مشتاقيلج .
كالت هيج واجت حضنتي بستهه وسلمت عليهه بعدهه اجتي اختي سلمت وكالت :
- " شدعوه عليج صارلج شكد مجايه النه ..
- " ههههه جنت مشغوله وهسه اجيتج .
- " هلا بيج قلبي .
دخلنه سوه للصاله كعدنه نسولف ونضحك اني وامي واختي اخذت فيَ وصعدت لغرفتهه بعد تقريباً ربع ساعه نزلت عنوبه وبيدها فيَ جانت مركبتلها اضافر ورافعه شعرها ثنين كرون وملبستهه فستان ومسويتلهه مكياج لاعبه بيهه لعب ضحكت عليهه وكلت :
- " عززه يمه بنتي ولج هاي شمسويه بيها .
- " ههههه والله جنت مخططه بس تجين اسويلهه هذا اللوك .
- " ياا والله حرام عليج شوف شعرهه شمسويه بي .
ضحكت امي وكالت :
- " زين شنو رأيج بالفستان اني جبته إلهه .
- " هههه لا كلش حلو .
كامت امي وكالت موجهه الكلام لأختي :
- " يله ماما كومي نصب الغده "
كامت اختي راحو للمطبخ واني كمت اخذت فيَ غسلتهه وبدلتهه ورحت اساعدهم بالمطبخ ..
الضهر بعد ما خلصنا غده وراحو نامو صعدت لغرفتي نومت فيَ بعدهه إجتي اختي وكالت :
= " زهراء عادي احجي وياج بموضوع ..
- " ايي تعاي اني اصلاً نومت فيَ حتي نكدر نحجي براحتنه .
اجت كعدت يمي وكالت :
= شوفي راح احجيلج كلشي من البدايه وانتي بس سمعي .
- اوك اسمعج يلا غردي بعد عيني
= بعد عيني ؟ حلوه هاي عجبتني .
- ههههه تعلمتهه من انمار وضلت بلساني .
= هههه يلا راح ابدي انتبهي .
بدت تحجي واني اباوعلهه بتركيز گالت :
- " اني من دخلت اعداديه تعرفت على بنيه كُلش حبابه وخلوقه صارت صديقتي المفضله نسولف سوه ونتمشى سوه ودائماً احنه سوه وصداقتنا مستمره لحد هسه اسمهه " سجى " ..
وتذكرين من رحنه اني وياج لعرس حنين واني هناك شفت ليث صديق انمار ألي حجيتيلي عنه ..
كلت : " ايي شبي كملي ؟
- " فمن شفت ليث رحت حجيتلهه وكلت انو اني انعجبت بي ومن هالحجي البايخ بعد انتي تعرفين سوالف مشاعر المراهقه خلتني حتى احلم بي ..
"تحجي واني مبتسمه بلكوه لازمه ضحكتي ".
- " شو اني من حجيتلهه عن ليث هيه ضلت صافنه وما حجت ولا سئلتني اي شي لحد ثاني يوم هيه صار كلامهه عباره عن :
" شنو رأيج بليث ، لو خطبج انتي راح توافقين ، زين هو حلو برأيج او لا ... الخ "
هيه تسأل واني اجاوب ، ضلينه على هذا الكلام لمدة يومين بعدهه اني سئلتهه اذا تعرف ليث وليش هلكد تسألني عنه كالت
" لا ما تعرفه بس من ناحية الفضول ..
وراهه تقريباً سبوع ، بيوم يصير دوام صباحي والمطر خفيف جان السايق مجاي علي ورحت مشي للمدرسه ولمحت سياره من بعيد عاليه ومضلله صار عندي فضول امشي واباوعلهه ..
وصلت للمدرسه دخلت كملت دوامي وبالحله هم شفت نفس السياره ما اهتميت وكلت يمكن صدفه بس هذا الشي استمر لمدة شهر تقريباً كل يوم اشوف السياره لو من اروح للمدرسه لو بالحله بس ابد ولا مره شفت
منو الي يسوق لأن جانت مضلله وعلطول رافع الجامه ..
ما كلت لأمي وابوي ما ردت اخوفهم ويطلع ما اكو شي بس كلت لصديقتي " سجى ، اشو ثاني يوم ما شفت السياره بس من رجعت للبيت راسلني رقم غريب وكتب بالرساله :
" مرحبا يا حلوه ، اني شخص معجب وأخاف عليج لهذا السبب كليوم اراقبج مجرد اطمئن عليج ونيتي مو سيئه بالعكس وإذا فديوم تحتاجين اي شي هذا رقمي سجلي يمج واتمنى ما تسألين منو اني لأن بالمستقبل راح تتعرفين علي كُلش زين واتمنى الج حياة سعيده وحلوه مثلج "
-" اني قريت الرساله وما جاوبت عفت الرقم وغلست وقررت ثاني يوم بس اشوف السياره اروح اشوف منو هذا إلي مراقبني ،.
انتضرت لثاني يوم رحت من وكت لمحت السياره جايه من بعيد ضليت واكفه منتضرته رفعت ايدي اشرت بمعنى "اوكف ، وكفت السياره واني بس مشيت ورحت يمهه ، السياره تحركت وراحت ..
من رجعت للبيت اجتي رساله من نفس الرقم مكتوب بيهه :
" الفضول مو حلو يا حلوه ، انه كتلج بالمستقبل راح تتعرفين علي ليش مستعجله ؟ ، وبعدين اللبس الي لابسته اليوم ضيك ما اريد اشوفه عليج مره ثانيه .
اجتني جرأه وكتبت :
" ومنو انت حتى تتحكم بلبسي وبعدين هاي آخر مره تراقبني وتراسلني وإلا راح اشتكي عليك فهمت !"
كتب :
" ههههههه ما تكدرين تشتكين علي ، وانه اساساً
ما اريد اتحكم بيج بس كتلج مجرد اخاف عليج "
" ايي ومن منو تخاف علي واصلاً انتَ منو حتى تخاف علي وشلون تعرفني ؟
" إلي يحب يخاف .. انه اعرفج واعرف كلشي عنج وتكدرين تعتبريني صديق غريب شخص عابر إلي يعجبج المهم ابقى على تواصل وياج .
" حبتك حيه انشالله تحب منو ولك ؟
دز ضحكه طويله ..
بعدهه كتبت :
" اني مُستحيل اخون ثقة اهلي لا كصديق ولا كأخ واصلاً اني ما اعرفك .
" بابا انتي ما تفهمين كم مره اعيد الكلام .. انه كتلج ما اريد منج اي شي بس اتطمن عليج وتكدرين تعتبريني صديق وبس "
" ايي كلشش وين اكو صديق يراقب ويعرف كلشي ، كول اريد اخطفج احسن .
" ههههه لو اريد اخطفج جان خطفتج من زمان ما لازمني شي بس للأسف ما عندي هاي السوالف "
ما كتبت شي ضليت صافنه افكر منو هذا تالي كتب :
" من تحتاجين شي لا تترددين تراسليني اي شي راح تلكيني دائماً موجود بس دزي نقطه اوك ؟"
" أتمنى بعد ما تراسلني وتقلل مراقبتك إلي رجاءً "
كتبت هيج وطلعت من المحادثه وخليتهه بالأرشيف وضليت اروح للمدرسة كل يوم اشوف السياره وصار الوضع عادي عندي وتعودت وإذا يوم ما اشوف السياره اضل اراقب الطريق ..
بس بعد ابد مراسلني ، لحد قبل فتره ضليت لمدة شهر كامل ما شفت السياره كلت يمكن راح وبعد ما يراقبني ..
بس صار عندي فضول دخلت على رقمه وكتبت :
" احم بس حبيت اسئل اذا انت عايش او ميت لأن صارلي شهر مشايفه السياره .."
وره ساعه كتب :
" ههههه مبين مشتاقتلي ؟
" لاا شكو بس يعني استغربت لأن اختفيت .
" ايي صح اختفيت جان عندي شغل مهم وبالأصح طلعت من الموت "
" حتى اني طلعت من الموت .
" ليش شكو شبيج خو ما اكو شي مريضه صايرلج شي ؟! "
" ههههه لاا بس اليوم اخر يوم امتحانات .
" يا طاح حضج وكفتي گلبي ، زين شلون جانت امتحاناتج؟
" وانتَ شكو تسأل شعليك يله باي بعد لا تراسل .
" انجبي لج انتي الي راسلتيني وبعدين حتى ما سئلتي علي .
" واني شدخلني اسئل عليك؟
" خوش لا تسألين انه راح اكلج .. انه جنت بالشغل واتصوبت بكتفي .
" عززه يعني انته تشتغل بعصابه؟
" لاا شنو عصابه .. غير شغله .
" هاا يله اوك الحمدلله ع سلامتك باي "
كلت هيج وطلعت من المحادثه الشي الوحيد الي فهمته هو انو شغله خطر مدام متصوب ..
وهاي اخر محادثه صارلي شهر تقريباً وهسه عطلنه يعني بعد ماشفت السياره بس الشي الوحيد الي زاعجني ..
اريد اعرف منو هذا وليش هلكد مراقبني ويعرف كلشي عني شنو نيته وهم اصلاً اني عرفت نيته مو خطف لأن لو يريد يخطفني جان خطفني من قبل وهم اريد اعرف ليش يخاف علي ومن منو .
زهراء :
كملت كلامهه وسكتت طول ما هيه تحجي اني بس صافنه واحاول استوعب إلي تحجي ..
ضحكت بصدمه وكلت :
- " زين بما انو هذا الشي صارله هواي من صار وياج ليش محجيتي إلي يعني لو جانت هذا نيته خطف جان هسه انتي مخطوفه واحنه قارين عليج الفاتحه من زمان "
= " ههههه لاا اسمالله علي .. زين هسه شتنصحيني شنو اسوي اريد اعرف هذا منو .
رفعت حاجبي وكلت :
- " امم افكر ما ادري .. او لاا اصلاً ما يحتاج افكر
ليش ما اكول لأنمار بس انطي الرقم ثواني وتجيج معلومات كامله .
= " هاا بس شسمه عيب هسه شيكول علي .
- " لا والله ميحجي شي بس نشرحله الموضوع عدل وهو يتصرف .
= " اوك بس يمتى .
- " ما ادري خلي اتصل علي واشوفه اذا ما عنده شي اخلي يطلعنه وهم حتى تحجيله براحتج .
= " تمام يله اني رايحه لغرفتي اذا صار شي كوليلي .
هزيت راسي بمعنى اي وفتحت تلفوني اتصلت على انمار وره شوي جاوب گال :
" هلا بنيتي شلونج محتاجه شي ؟
- " هلا حبيبي تمام انتو شلونكم .
- " زينين هذا فهد خلصهه لعب بالمكتب ، الرايح والجاي يطكله تحيه وهو متونس .
- " ههههه يعمري بوسلي يا حباب وكوله هاي من
مامي " .
- "هاا ولج بس الفهد وانه ؟
- " انتَ البوسه الك تختلف ..
- " هاا ههههههه كولي حبيبتي ليش اتصلتي تردين
شي ، فيَ وين ما اسمع صوتهه .
- " فيَ نايمه ، واني اتصلت عليك اريد اطلب شي
اذا ما مشغول ..
- " كولي بنيتي عيوني الج .
- " سالمات حبيبي بس ردت نطلع اني وياك واختي لأن تريد تحجي وياك موضوع .
- " ايي صار من عيوني يمتى تردين ؟
- " نطلع نتعشى سوه بعدين ها شنو رأيك بس فهد وفيَ يضلون هنا عند اهلي .
- " خوش حبيبتي اروح اكمل شغلي وساعه ٨ اتصل عليج الكاج جاهزه خوش حجي ؟
- " تمام عيني باي .
ودعته وسديت التلفون ورحت تمددت شوي ،.
للعصر كمت غسلت ورتبت نفسي ونزلت يم امي واجت اختي كلت لأمي انو انمار راح يطلعنه اني وعنوبه ما رفضت ضلينه كاعدين نسولف سوه ونضحك صارت الساعه ٧ أشرت لأختي حتى نصعد نجهز نفسنه ..
خليت فيَ يم امي وصعدت لغرفتي ،.
اني عندي كم زي مخليته بالكنتور اختاريت زي
رسمي لون بيج وقميص ابيض وشال ابيض لبسته بشكل راخي وكعب .. سويت مكياج بارز وحمره لون بني غامق صار توب عطرت ولبست اكسسوارات نازكه تلائم الزي ونزلت ..
وره ثواني نزلت اختي هم جانت لابسه زي رسمي بس هيه مسويته كاجوال ومكياج ناعم يلائم عمرهه ..
ضلينه كاعدين بعد ربع ساعه تقريباً اجتي رساله من انمار مكتوب بيهه :
" بنيتي انه بالباب طلعو "
كمت وكلت موجهه كلامي لأمي :
" ماما حبيبتي احنه رايحين وما نتأخر هواي عفيه ديربالج على فيَ وبس يصير شي اتصلي علي "
كالت :
- روحي ماما ولا تخافين هاي حفيدتي بعيوني اخليهه .
ابتسمت وطلعنه سوه اني وعنوبه .
رحت للسياره وكلت :
- " هلو حبيبي خو ما تأخرنه عليك .
باوعلي من فوك ليجوه وعكد حاجبه وكال :
- " لا ما تأخرنه بس شكلج راح تأخرينه ..
عرفت يقصد مكياجي باوعت لفهد وكلت :
- " فهدي حبيبي تنزل يم بيت جدو احنه ما نتأخر عليك .
رفض وما قبل ينزل انمار حاول ويا بس قفل إلا يجي ويانه بعدهه انتبهت اله وكلت :
- " فهد .. هاي شنو لابس الله شنو هالزي الجميل ؟"
ضحك وكال :
" بابي جابلي يا اني صرت ضابط " .
رفعت حواجبي وباوعت لأنمار ضحكت وكلت :
- " هاي شنو الزي يجنن علي يمتى جبته أله ؟
- " بس وصلتج وطلعنه كلت خو ما أخذه للمركز هيج فأخذته اشتريتله هذا الزي ولبسته يا واخذته للمركز
لو شايفه شلون يمشي ..
وهو رافع راسه هيبه ، وكلهه تدُكله تحيه وهو
ما قلد لأي أحد .
- " ياا ههههه فدوه لحبيبي طالع لأبو .
انمار رفع حواجبه وعدل قميصه بشقه ..
ضحكنه وصعدنه بالسياره وطلعنه للمول ضلينه نفتر شوي بعدهه رحنه مطعم كعدنه وراح انمار يطلب الاكل .. تقربت يم اختي وكلت :
" عيني هسه قبل لا يوصل الاكل انتي احجي اوك "
= ايي اوك .
وره شوي اجه انمار باوعلي وابتسم بعدهه كال موجه الكلام لأختي :
- شلونج زينب وشخبار الدراسه وياج ناجحه لا ؟
= تمام الحمدلله كلش زينه ، اي ناجحه .
- ايي عفيه الف مبروك بهالمناسبه تطلبيني هديه بما انو انتي اخت زوجتي .
= هههه شكراً .
- ايي سمعت تردين تحجين وياي بموضوع
خير انشالله ؟
= اي ولو ما اريد اتعبك .
- لا العفو شسالفه تفضلي ؟
بدت اختي تحجيله كلشي وانطنته الرقم وتفاصيل السياره وغيره ..
وگال :
- هاي هيه هسه بس اودي الرقم وره نص ساعه تجيج معلومات كامله .
= تمام شكراً ما قصرت .
- لا شسالفه شغلي هذا .
كام انمار ضل يحجي بالتلفون شوي وراح جاب العشه واجه گال :
- راح يجي ليث واخته يكعدون يمنه ما عدكم مشكله مو ؟
باوعت لأختي هيه ضلت صافنه علي واني ضحكت وكلت :
- " لا هلا بيهم خل يجون .
خلصنه عشه وكمنه اني واختي للحمامات نغسل باوعتلي وضحكت وكالت :
= عززه راح يجي ليث هذا الصاك إلي شفته بعرس حنين مو ؟
- ايي ههههه ولج اتأدبي والله عيب .
= يبووي انوب يجي يكعد كبالي غير افقد الوعي .
- ههههه عنوبه لا تفشلينه ولج تره ننكتل اثنينه .
= لا شسالفه اصلاً عادي مو اول مره اشوف حلوين .
- امم زين يله اذا خلصتي خلي نرجع .
= لا لا لحضه تعاي انطيني حمره خلي اطوخ شوي .
- هاا شكلنه هسه ؟
ضلينه نضحك رتبت مكياجي وعطرت وطلعنه رجعنه لمكانه ،.
لكيت انمار ويمه ليث وبنيه اشو عنوبه بس شافت البنيه راحت حضنتهه وضلت تبوس بيهه واني بس اصفن ، عرفتني عليهه وكالت :
= تعاي هاي سجى صديقتي الي كتلج عليها .
- ياا هههه .
سلمت عليهه جانت صدُك بنيه حبابه بس استغربت ليش محاجيه لعنوبه انو هيه اخت ليث .
اول ما كعدنه وليث صديق انمار بس يباوع لأختي وهيه حتى ما منتبهه التهت سوالف وي سجى ..
كعدو انمار وليث على جهه يدخنون واني وعنوبه وسجى على جهه ضلينه نسولف سوه بعدهه سئلتهه عنوبه :
- ولج سجى ليش ما كلتي انو ليث اخوج ؟ ، واني من بداية الدوام اتغزل بي كدامج .
سجى = ههههه شنو يعني اذا عرفتي شراح تستفادين وإذا اخوي عادي .
ضلينه نسولف سوه تقريباً مرت ساعه كامله واحنه نفس كعدتنه باوعت لأنمار واشرتله حتى نكوم نفتر
ما رفض كام وكال :
- يلا كومو نفتر شوي وكلمن يرجع لبيته .
ليث : انه اليوم ما ارجع هنا ابات .
انمار خزره وكال بصوت ناصي بس مسموع :
- انت تسكت وبعدين حسابك بالمركز .
ضلو يضحكون وانمار اخذ فهد ومشو كدامنه
ضلينه نفتر وكل شوي داخلين محل بعدهه اني وانمار دخلنه لمحل عطور وسجى راحت للحمامات واختي ضلت تفتر بالمحل .
زينب ..
افتر بمحل العطور والعمال يركضون وراي ويكولون
" تيست ، واني اجرب دخت من العطور طلعت بره وكفت بباب المحل ،.
مرو مجموعه شباب واحد بيهم ضل يباوعلي بعدهه غمز ورفعلي ايده بيهه ورقه ..
خزرته وضل يضحك بعدهه باوع وراي وفلت وجهه وراح يركض ..
استغربت وهمست بصوت ناصي شنو معقوله شاف جني واخترع ليش شرد ؟.
سمعت صوت وراي كال :
- لاا مو جني يمكن شافني وشرد .
درت وشفت ليث واكف وراي باوعتله بتوتر بعدت عنه وكلت :
- لاا اصلاً اني بس خزرته هو راح .
ضحك وگال :
= انتي بهاي خزرتج ما تخوفين ابو بريص .
ضحكت باستهزاء وكلت :
- اوك يلا فهمنه انتَ ضابط وتخوف من رخصتك .
كلت هيج وبعدت عنه ، اعترض طريقي وكال :
= بس انه اعرف صاحب الرقم الي انطيتي لأنمار ما تردين تعرفين ؟
ابتسمت وكلت :
- صدُك والله تعرفه ؟ منو هوه احجيلي حباب شخص اعرفه لو غريب ؟.
= ايي اعرفه حق المعرفه وهو اصلاً مو غريب عليج بس ما راح اكولج اسمه إلا اتأكد من شي .
- من شنو تتأكد ، زين احجي اسمه ع الاقل ..
= هسه انتي ليش هلكد فضوليه شنو تحبي هالشخص .
- ايي احبه وانت شدخلك شكد تسأل شوي من رخصتك .
كلت هيج ورحت يم اختي ..
زهراء :
اجتي اختي وهيه تدردم ضحكت عليهه وكلت :
- هاا شكو شبيج منو زاعجج ؟
= لا ما اكو شي بعدين احجيلج بس نعست اريد ارجع .
- ايي كملنه شوي ونطلع ..
اشتره انمار كم عطر أله والي هو ذوقه شوي صعب ومو كلشي يعجبه لهذا اتأخرنه شوي كملنه وطلعنه ودعنه ليث واخته وراحو لسيارتهم واحنه اخذنه حلويات لبيتي ولبيت اهلي وطلعنه للبيت نزلنه شوي كعدنه يم اهلي بعدهه اخذنه فيَ وودعت اهلي وطلعنه لبيتنه ..
دخلت للبيت هلكانه اول مادخلت كبل رحت للحمام اخذت شاور راح بي كل تعبي بعدهه رحت اخذت فهد وفيَ لبستهم بجامة النوم وكلمن بجربايته ضل انمار يم فهد يحجيله قصص واني يم فيَ حاضنتي ونايمه مرت نص ساعه يله غفو غطيناهم وطلعنه ..
اول ما دخلت لغرفتي شمرت نفسي ع الجربايه وكلت :
- " عززه شكد تعبت اليوم ..
اجه انمار يمي ضحك وگال :
- " اسمالله عليج من التعب .
ابتسمت ودخلت بحضنه وهمست :
- " محتاجة أغفى بحضنك هيچ أقل شيء ١٠٠ سنة .
شد حضنه علي واستسلمت للتعب وغفيت ..
.
.
.
.
.
:- بعد مرور كم يوم خلصتهن بحب وهدوء وي عائلتي الصغيره ، بيوم جنت طالعه اني وصديقاتي واختي زينب وياي وجان انمار بالمركز عنده شغل واطفالي مخليتهم يم امي ..
تقريباً الساعه ٧ ونص دخلنه لبيت اهلي لكينه بيت عمي ابو ثائر موجودين وبنات عماتي اثنين ..
سلمت وصعدت لغرفتي غسلت وبدلت ونزلت كعدت يمهم سوالف وشقه مر الوقت واترخصو عمي ومرته وبقو بس بنات عماتي يمنه وثائر كاعد يم ابوي ..
.
* اني ذكرت وراح واذكر مره ثانيه .. ثائر بعد ما صار الحادث تغير كلش وصار كلش حباب ومؤدب لدرجة عينه ما يخليهه بعيني حده سلام ومرات يشاقي ويضحك ويروح يعني احسن من قبل هواي ..
- امي وابوي صعدو لغرفتهم وثائر راح يم اخوي بغرفته ..
ضلينه بس البنات نسولف سوه ونضحك اخذنه الواهس وكامت وحده من البنات شدت عبايتهه وتركص واحنه بس نضحك اني جنت لابسه تراك ومسويه شعري ضفيره ..
كامت اختي جابت الديجي وسدت باب الصاله حتى ما يطلع الصوت وشغلت ساجده وضلينه نركص ونضحك اني كمت فتحت شعري واهز وياهن ع الواهس ..
بعد شوي سمعت صوت تلفوني يرن فتحته
جان انمار متصل فيديو رحت على جهه وضليت
احجي ويا ..
شوي وما أحس إلا على باب الصاله انفتح ودخلو اخوي وثائر بس سمعو الديجي ضلو يهزون وي البنات واني ضاله على جهه وما لابسه حجابي ..
حجه انمار وكال :
- " عيني شنو هذا الصوت منو يمج ؟
رأساً كلت بدون ما افكر :
- " بنات عماتي واختي واخوي وثائر مشغلين الديجي وكالبين البيت مسرح .. كلت هيج واني اضحك .
هو رأساً عكد حاجبه وكال :
- " ثائر موجود يمج ؟
كلت :
- " ايي .
اخذ نفس بعصبيه وكال :
- " وانتي هيج واكفه بدون حجاب وبهذا لبسج !.
هزيت راسي وكلت :
- " ايي حبيبي بس شسمه ..
بعدني ما مكمله كلامي ، حجه ثائر موجه الكلام إلي :
" عوفي التلفون وتعاي يمنه ما مليتي ..
ابتسمت وما جاوبت .
حجه انمار بعصبيه وكال :
- " بعدين حسابج سدي هسه عندي شغل .
حجيت بتوتر :
- " انماري بس اصبرلي دقيقه خلي احجيلك .
رأساً غلق المكالمه .. استغربت من ردة فعله ضليت
ادك كل شوي وادز رسائل وما يجاوب ..
اترخصت من البنات وصعدت لغرفتي جانو فهد وفيَ نايمين رحت بوستهم ونمت يمهم ..
ثاني يوم فزيت على تلفوني يرن فتحته جان انمار كال :
- " جهزي نفسج بعد ساعه وانه يمج .
كال هيج وغلق المكالمه .. ضليت كاعده استوعب الوضع اتصلت علي مرتين ما جاوب ، ما ردت اعانده كمت جهزت أطفالي بعدهه لبست زي ع السريع ونزلت ..
لكيت اهلي كاعدين صبحت عليهم وبلغتهم .. امي ما رضت وكالت :
" ليش طالعه من الصبح عالأقل خليهه للعصر وروحي "
كلت :
- " لا ماما حبيبتي مو شسمه انمار تعبان وهم لازم اروح .
امي ما اقتنعت كلش ضليت كاعده يمهه نسولف سوه شوي واجتي رساله من انمار مكتوب :
" طلعو انه بالباب "
كتبت :
" تمام ثواني واجي "
سديت تلفوني وكمت لبست بشت وحجابي ودَعت اهلي وطلعت ..
طلع من السياره اخذ فيَ من ايدي وراح .
طول ما كاعدين بالسياره ما حجه ولا كلمه فيَ ضلت تبجي بحضنه تريدني وهو يلعبهه ما سكتت ..
ردت اخذهه من ايده عكد حاجبه وكال :
- عوفيهه ما تشوفيني جاي العبهه
كلت :
- " اي حبيبي بس هيه تبجي تريدني خلي اسكتهه "
ما جاوب ضل يلعبهه وهيه مستمره تبجي لحد ما وصلنه ..
دخلنه للبيت وهو شايل فيَ ويفتر بيهه نامت بحضنه راح وداهه بغرفتهه ..
اني دخلت لغرفتي عزلت اغراضي اجه انمار دخل للغرفه وسد الباب تقرب يمي وكال :
- " شنو هالطياح الحض زهرااء انه شنو حجيت ع اللبس ؟!
باوعتله وكلت :
- " ليش شنو صاير شبي لبسي ؟
تقرب يمي وهو عاكد حواجبه وبس يخزر ، كال
بصوت عالي :
- شبي لبسج .. لابسه اضيك شي عندج وفاتحه شعرج وتتمركصين كدام هالطايح حضه ابن عمج ***
بعدت من يمه وكلت :
- " كافيي انماار شنو هالحجي ولا تعلي صوتك الجهال كاعدين .
نتر بعصبيه :
- " وانتي جاي تعلميني شلون احجي ؟!
اخذت نفس وكلت :
- " اففف انماار يعني انتَ هسه جاي تسوي مشكله بدون سبب تره ما له داعي هالعصبيه "
كال بصوت عالي :
- " شنوو ما أله داعي يعني إلي سويتي مو سبب كافي زهرااء ..
بهالإثناء انفتح الباب ودخل فهد يركض اجه يمي حضني وهو يباوع لأبو مستغرب .. انمار دار وجهه وضل يستغفر .. اجه جر فهد من حضني وكال :
" روح بابا ضل يم اختك وسد الباب "
فهد برطم وهو يباوعلي كال :
" ماميي اريد اضل يمج "
رحت شلته واني ابوس بي وكلت :
- فهدي حبيبي روح هسه يم فيَ واني ثواني واجي يمك تمام "
ضل يهز راسه بمعنى لا .. عاند ورفض يطلع ضل حاضني ولازم ملابسي وهو يكول :
" اريد يمج "
انمار جان كاعد ع الجربايه ويفرك بوجهه بعصبيه بعدهه اجه وأخذ فهد من حضني وطلعه بباب الغرفه ورفع ايده موجه الكلام لفهد :
" تروح يم اختك ونفس ما اسمعلك اذا سمعت صوتك تبجي لو تريد تجي هنا اطيح حضك "
كال هيج بصوت عالي .. فهد ضل مبرطم وهو يباوع لأبو تجمعت الدموع بعيونه وراح لغرفته ..
دخل انمار وركع الباب رحت يمه وكلت :
- " ليش هيج عليت صوتك على فهد المشكله بيني وبينك أطفالي ما ألهم دخل ، وهمَ اصلاً ما اكو اي مشكله انت جاي تخلق مشكله وبدون سبب "
اجه يمه خزرني وكال :
" هم كالت بدون سبب والعناد إلي عندج شنوو ، وهذا الركص ولبسج كدام ابن عمج ال*** شنوو هاا ؟!
- " ومنو كلك ركصت اصلاً انت فاهم الموضوع غلط خلي احجيلك ..
راح شغل جكارته وكعد ع الجربايه ، طك العِرگ
بكصته وعيونه صارو حمر من العصبيه ، گال :
- ايي احجي اسمعج ..
رحت كعدت يمه وكلت :
- " شوف حبيبي احنه اول ما رجعنه اني والبنات
جانو بيت عمي موجودين ، لليل راحو وبقو بس بنات عماتي كعدنه سوه بالصاله وثائر ضل يم اخوي بغرفته .. يعني احنه وحدنه واني جنت لابسه تراك
لأن بس بنات شغلنه اغاني نغير جو وانته من اتصلت علي نزلو اخوي وثائر علمود الصوت وضلو يتشاقون وي البنات بعدهه بس سديت المكالمه اني راساً صعدت لغرفتي ونمت يعني حتى ما كعدت يمهم ..
هو ملتهي يدخن وحتى ما باوع بوجهي كمت كعدت كباله وكلت :
- " بس هذا الي صار .. ليش ساكت ؟
باوع بعيوني بتركيز وكال :
- " بس هذا كُله ما يبرر لبسج انتي تدرين هُمَ موجودين جان لبستي لبس بي خير مو لابستلي تراك ضيك ومبين معالم جسمج وتفترين كدامهم .
رفعت حواجبي واني اباوع بعيونه كلت :
- " صدك تحجي ؟
ضل يباوع بعيوني وهو عاكد حواجبه ما جاوب ..
كمت من يمه وكلت :
- " تريد تزعل مني ازعل براحتك اني سويت الي علي .
كلت هيج ورحت اخذتلي زي ودخلت للحمام
اخذت شاور وطولت شوي ..
لبست بجامه عريضه لون اسود وبدي قصير كلش
نص ردن لون وردي ..
بعد تقريباً نص ساعه طلعت شفته كاعد ع الجربايه وفهد وفيَ يمه يلعبهم .. رحت بست فهد حيل وهمست :
" يروح ماما انتَ جوعان تريد شي ؟
جاوبني وهو يضحك :
" لا مامي شكراً "
ابتسمتله وأخذت فيَ بستهه وكعدتهه كبالي ع الميز ..
طول ما انه اتحرك انمار عيونه علي ما باوعتله :)
رحت اضحك وي في وانشف شعري كملته وعفته مفتوح وخليت بس تنت وكبست رموشي ،
كعدت اني وفيَ بالكاع صبغت اظافري وهيه بس صافنه علي ..
كملت وصبغتلهه اضافر ايدهه كامت تركض تراوي ايديها لأبوها وتضحك باوعلي وابتسم وباس ايديها واخذهه بحضنه يلعبهه ..
عفتهم وطلعت رتبت البيت بعدهه رحت للمطبخ اجهز الغده ..
وره شوي اجه انمار وكال :
- اريد بس چاي ما جوعان ..
- " اوك .
رحت صبيت كوب جاي وانطيته ، ضل كاعد يمي ويحجي بالتلفون ، اخذت بسكت وكيك رتبتهم وخليتهم يمه ع الميز ..
وره شوي اجه يمي وكال :
- " اليوم بليل ما عندج شي مو ؟
كلت بدون ما اباوعله :
- " ليش ؟
- " خلي نطلع نغير جو وهم علمود فيَ وفهودي اليوم زعلته .
هزيت راسي وكلت : " اوك أخذهم انت اني ما اروح .
- " ليش شعندج ؟
باوعتله وكلت بإنزعاج : " هيج ما مشتهيه اطلع .
ابتسم وعكد حاجبه تقرب يمي وكال :
- " براحتج بس ما اعتقد يقبلون بدونج .
بعدت عنه وكلت : " مشكلتك انتَ ابوهم وتتحمل مسؤوليتهم "
كلت هيج وطلعت من المطبخ .
جبت فهد وفيَ كعدتهم بالمطبخ ورتبت السفره وصبيت الاكل ، وديت فهد لأبو يكوله حتى يجي يتغدى اجه فهد وكال :
" مامي بابا يكول ما اريد ويكول لا تزعلين مني "
ضحكت وكعدت غديتهم واني اكلت شوي وكمت عزلت المطبخ واخذتهم لغرفتهم كلمن بجربايته انتضرت يمهم لحد ما نامو وطلعت ..
رحت لغرفتي كعدت ع الجربايه اباوع بتلفوني ..
شوي واجه انمار تمدد وخله راسه بحضني .. اخذ التلفون من ايدي ولزم أيدي وخلاهه على شعره وكال :
- " راسي يأذيني "
وخرت ايدي وكلت :
- " اشرب علاج وتصير زين .
ضحك وگال :
- " ما اريد علاج بس عصري راسي ويصير زين .
ما جاوبت ضليت امرخ براسه والعب بشعره باوع بعيوني وضحك .. كلت :
- شنو الي يضحك ؟
- " تصيرين حلوه وانتي زعلانه ..
- اممم يعني تريدني اضل زعلانه ؟
- لاا شلون .. انه اصالحج بطريقتي بنيتي انتي .
- "لا تصالحني بعد ما اريدك وما احبك ابد .
كلت هيج وبعدت وكتفت ايدي ودرت وجهي عنه ..
اجه تقرب علي ولزم أيدي بأيد وحده وأيده الثانيه كرص خدي وباسني ، همس :
- شلون ما تحبيني ولچ ؟
درت وجهي امثل انو ما مهتمه ..
دار وجهي بأيده وكال :
- باوعيلي لج مو احجي وياج ؟
باوعت بعيونه واني عاكده حواجبي ،
كلت بصوت ناصي :
- " ممكن تبعد شوي اريد اكوم .
ابتسم وكال :
- " ماكو شوي .
- زين انتَ مو راسك يأذيك؟
- اريد انام .
- اوك نام شنو منتضر ؟
تقرب وحضني حيل وأخذ ايدي وخلاها على شعره وكال :
- لعبي بشعري حتى اكدر انام .
حاوطته بأيديه وضليت امرخ براسه لحد ما غفه وكمت غطيته ونمت ع الطرف ..
.
.
.
.
.
يُتبع
" كُتب البارت بكُل حُب وشغف " ♥️..
لا تنسون التصويت والتعليق + لكم كُل
الحب يبعد عيونيي 🙆🏽♀️♥️..
# Zahraa Al-Fartousi