_ هو ممكن أحلامنا تكون كلها سراب فعلًا؟ يعني ممكن أصحى في يوم أهرب من إلي حلمت بيه؟
سألت السؤال بشكل وأنا قاعدة قصاد نافورة في مكان عشوائى ، حسيت بفراغ جنبي و صوت رخيم بيجاوب
_ ممكن جدًا ، الإنسان بطبعه طماع كل ما يتمنى لحاجة بيبقى متخيل أنه لما يوصلها هيكون أسعد مخلوق في الوجود بس بيكتشف إنه في حاجات أحسن هو محتاج يوصلها فـ طمعه للأحسن بيطغى على فرحته بالي في ايده وبالوقت ممكن يهرب منه فعلًا.
عدلت نضارتي وشديت كم البلوزة بتوتر وأنا بكمل تلقائيًا
_ طب ليه؟ ليه منرضاش بالي في إيدنا ونحتفل بيه وبوصولنا للشيء إلي تعبنا عشان نحققه.
رفع كتافه ببساطة
_ لأنه دي طبيعتنا كـ بشر.
_ مش كل البشر كده.
قُلت بدفاع هجومي ، ابتسم وهو بيبص لحركة النافورة من غير ما يلتفتلي
_ معاكِ حق، بس أنا شخص مش مؤمن بملائكية البشر نهائي وبتوقع منهم الأسوء دايمًا.
رفعت حاجبي بإستغراب
_ ليه السوداوية دي يا أستاذ؟
خرج سيجارة من علبته ومد لي العلبة في حركة خبيثة
_ مش بدخن.
هز رأسه بعدم إكتراث ممكن وهو بيولع السيجارة بكل بساطة ، خد نفس وخرجه ودخان السيجارة بيخرج من بين شفايفه إلي بدأت تتحرك
_ مش سوداوية ، إحنا مش ملايكة ولا منزهين من جميع الأخطاء ، مسمعتش يافث نوح وهو بيقول « وإنتَ المُنزح من جميع الصواب و الواقع في كل الحُزن. » ، طبيعتنا بتفرض علينا نكون كده.
_ في ناس كتير كويسين مش شرط يكونوا مُنزهين من الخطأ بس بيحاولوا.
ابتسم بسخرية وهو بيسأل بغموض
_ لو وقفتِ قدام حد أذاكِ وفي إيدك مسدس ، ومفيش قانون ولا دين ولا مجتمع هتترددي إنك تقتليه؟
بلعت ريقي بصعوبة وأنا بحاول أبين له إنه وجهة نظري صح
_ على حسب الأذى إلي سببهولي.
_ هتقتليه ولا لا؟
بصيت للأرض بيأس و قلت بصوت بارد
_ معرفش.
_ أهو نزعة الخير متفوقتش لو مفيش سلطة عُلية ، فـ نقدر نقول إنه كل البشر جواهم نُسخ قذرة مستنية فتيل الشر يفجرها.
اتنفست و جوايا رفض لكلامه بس هو كمل
_ في إلي بيتفوق عليهم شرهم فـ بيبقوا زي ما إحنا بنشوف ، وفي مش بيتفوق عليه بشكل كامل فـ بيكون في الدرى أكتر لكن مفيش خيار تالت ، ما كامل إلا محمد.
بجد! سيجارة و كلام فلسفي وفي الآخر ما كامل إلا محمد ، إيه الراجل ده!
_ نحاول نكون كويسين على قد ما نقدر.
_ الكلام سهل و البقاء للأصدق.
جسمي اتحفز ولحد دلوقتي هو مبصليش غير وهو بيعرض عليا سيجارته
_ وإنتَ بقى هتحكم على نوايا الناس.؟!
بص للسما وهو بيزفر دخان التبغ ، ابتسم ابتسامة بسيطة متتخطتش شفايفه
_ مليش حق طبعًا إني أحكم عليهم ، بس ممكن تقولي إني قابلت بشر كتير في حياتي خلوني مؤمن و عندي يقين تام بنظريتي.
_ يبقى كل الناس إلي بتقابلها وحشين.
كتفت دراعي وقلت ببرود ، ولكنه فاجأة التفت لي بصلي بصة مُريبة خلتني أرجع لورا شوية قبل ما يدور وشه الناحية التانية
_ جايز ، وجايز تكوني بريئة لدرجة مش مخلياكِ تشوفي دنائة البشر.
_ لا مش فكرة برائة ، لكن في ناس كتير فادت المجتمع وطورته بل وغيرت العالم وناس كانت سبب لهداية ناس كتير ، إزاي أسيب كل دول وأقتنع بنظريتك إلي بتثبت أنه البشر كلهم أوغاد.
رمى عُقب السيجارة في النافورة بكل هنجية
_ تعرف فُلان؟ آه أعرفه ، عاشرته؟ لأ.. يبقى متعرفهوش ، إنتِ عرفتِ الناس دي نيتها إيه من كل إلي بيعملوه ، شوفتِ الإنسان ده لو تجرد من مبادئه و قناعاته هيبقى عامل ازاي ؟ أكيد لأ ، كل ده صورة نسبية ممكن تكون صح أو غلط لكن نصيحة متفترضيش حُسن النية من البشر لأنكِ سوري هتاخدي على وشك.
أنا على وشك إني أضربه بجد! إزاي الإنسان ممكن يكون بكل الثقة دي وهو بيقول كلام متخلف
_ طبعًا أنتِ دلوقتِ بتقولي عليا متخلف ، ومش مقتنعة بولا حرف م إلي قلته وهو حقك ، بس فكري فيها شوية بحيادية من غير هجومك الغير مُبَرر على كل كلمة.
غمض عيني وأنا بحاول أفكر في العالم بدون دين أو قانون ، للأسف التخيل صدمني.. العالم هيبقى عبارة عن كارثة بالمعنى الحرفي ، إنتشار الزنا و السرقة و الإغتصاب و التبرج و التحرش ، الناس هتكون مُرعبة إلا قلة قليلة هتحتفظ بمبادئها ، وده طرح في عقلي سؤال هل لو إحنا بالنقاء ده ربنا كان فرض علينا دين بيحجم شهاوتنا؟ كان هيبقى في قيود وحدود لكل واحد فينا؟ لو الأخلاق و القيم ملهاش علاقة بالدين خاصة في زمنا ده البشر هيكونوا زي ما هما دلوقتِ!
_ تعابير وشك بتدل على أنك بدأتِ تفكري وده شيء مُمتاز ، مش بقولك اقتنعي بكلامي ١٠٠٪ لكن على الأقل متبقيش ساذجة للدرجة دي وأنتِ متوقعة حُسن النية من كل البشر.
تغاضيت عن أنه قالي يا ساذجة وأنا بفكر تاني ، سرحت شوية قبل ما أرد عليه بقوة
_ فكرت و يمكن اقتنعت شوية ، بس ده مش مبدأ إني أتوقع الأسوء من كل البشر ده مش هيخليني حريصة ده هيخليني شخصية مهزوزة معدومة الثقة في البشر ، وكل ده عشان البشر وحشين و مش سالكين يعني.
فتح أيده حواليه وهو بيتنفس بعمق
_ تقبل قبحك واستمتع بهِ لولا قُبحنا ما كنا بشرٌ.
قام من مكانه وهو بيبتسم بثقة
_ معرفتش اسمك؟
_ نِضال.
ضحك بطريقة غريبة وهو بيهز رأسه
_ نِضال بردو ، يظهر أنه بينا شيء مُشترك أخيرًا.
مشي وأنا قاعدة مشوشة مش قادرة أفكر في أي حاجة ، لحد ما جت صاحبتي إلي ساكنة قريب من هنا وهو كان لسه بيبعد
_ إنتِ قابلتيه؟
بصت لها بغرابة
_ قابلت مين؟
بصت لنضال وهي بتهز رأسها
_ نِضال.
_ ماله بقى؟
قعدت جمبي وقالت بصوت خافت
_ بيقولوا أنه مراته اتقتلت بعد ما أُغتصبت من صاحب عمره ، من وقتها وهو بقى مش متزن نفسيًا كأن الصدمة غيرته من شخص متفائل بسيط لشخص معقد غريب ، بيجي كل يوم عند النافورة هنا وبيقعد ساكت بشوفه من شباك الأوضة بتاعتي بس أول مرة أشوفه بيكلم حد.
سِكت وأنا ببص على طيفه بعد ما غاب ، ممكن تكون مجرد صدفة ؟ عقلي وقف أكتر ما هو وأنا ببص لصاحبتي بغموض
_ شكلك هتشوفيني كتير الفترة إلي جاية.
هزت رأسها بعدم فهم وأنا ببتسم ابتسامة بسيطة وصوته بيرن في ودني
«تعرف فُلان؟ آه أعرفه ، عاشرته؟ لأ.. يبقى متعرفهوش ، إنتِ عرفتِ الناس دي نيتها إيه من كل إلي بيعملوه ، شوفتِ الإنسان ده لو تجرد من مبادئه و قناعاته هيبقى عامل ازاي ؟ أكيد لأ ، كل ده صورة نسبية ممكن تكون صح أو غلط لكن نصيحة متفترضيش حُسن النية من البشر لأنكِ سوري هتاخدي على وشك. »
تمت.
#رُميساء_عمرو