اسكريبت 🕊️
_ لا يا ماما انا مش هتجوز صالونات
_ يا ابني هو انتَ بنت عشان تقول مش هتجوز صالونات ، هتشلني يا ابن بطني
اقتحمتي اختي الكلام بكل برود
_ ايه يسطا ده في ايه ؟ آسيف اخويا عايز يتجوز عن حب
لو مكنتش خريج أزهر وخاتم القرآن كنت عملت فينا ايه ؟
وبعدين يا حبيبي ده اسمه جواز مصونات مش صالونات
_ بالله اتهدي برواياتك الي كلها .....
مسكت بوقي بتوتر
_ ايه يا برو بس في ايه هتفضحنا منك لله
_ البت دي بتقرأ ايه يواد يا آسيف ؟
_ استر عليا الله يستر عليك
ضحكت وانا بقول بصوت عالي
_ تحب اقولها على روايات محمد طارق والواد الي كان في علاقة بينه وبين حماته ، ولا على المخدرات والقُمار والانتحار والإلحاد
_ ايه ؟! نهارك اسود يا لُبنى هو ده الي مضيعة فلوسك عليه وكاتبي المُفضل كاتبي المُفضل ده أنتِ ليلتك سودا معايا
جريت وراها في الشقة وانا حاسس بالانتصار واختفى الشعور ده لما لقيت بابا جي من الشغل وبيبصلي بعتاب
_ احم احم حمد الله على سلامتك يا بابا
_ الله يسلمك ، هغير هدومي واجيلك لينا كلام سوا
امي هي لحقت تشتكيله وفيها ايه لما ابقى مش عايز اتجوز صالونات ولا عايز اتجوز أصلا وابقى طير حُر طليق كده
_ تعالى ورايا على البكلونة يا آسيف
_ حاضر يا بابا
ربنا يرحمني كنت طيب والله
_ والدتك بتشتكي منك ليه يا آسيف
بصيت في الأرض وبعدين اتكلمت بهدوء
_ عشان مش عايز اتجوز صالونات
_ مش عايز تتجوز صالونات ولا مش عايز تتجوز أصلا ؟
_ مش عايز اتجوز أصلا
_ طب ليه ؟
_ عشان حاسس اني مش جاهز ولا مُهيئ للجواز ، قيود لسه وانت عارف أنه نفسي اسافر واعمل ماچيستير
_ وده مش سبب بردو
_ ازاي يا بابا يعني هجيب واحده اظلمها معايا وكام شهر اقولها باي باي انا مسافر ، ومش هقدر اخدها معايا قبل ما اكون عملت فلوس كويسة ومكان للسكن
_ وانت بالنسبه لك السفر اهم من الجواز
_ اه طبعا ، انا لما اسافر و اشتغل أو اخد ماستر من بلد اجنبية هتعامل معاملة تانيه تماماً
_ والاستقرار والدفا والحب ؟ كل ده مش فارق معاك
_ مين قال كده بس بس أنا لسه ٢٦ سنة ومش بنت عشان تخافوا اني اعنس
_ بص يا آسيف انا عارف أنه دماغك ناشفة فانا هتكلم وامري لله ، السر في الرفيق مش في الرحلة أيا كنت عايز تعمل ايه في حياتك مش هتعمله لوحدك ومش هتحاول لوحدك ربك قال " ومن آياته أن خلق لكم أزواجا لتسكنوا إليها وجعل بينكم مودة ورحمة " الجواز اصلا اتخلق عشان تبقوا سكن لبعض ، والنبي عليه الصلاة والسلام قال" من استطاع منكم الباءة فليتزوج " الي اخر الحديث
ليه بقى يا آسيف منفكسش في زوجة و أسرة وحياة مُستقلة انا عارف أنه طول عمرك نفسك تبقى مُستقل والجواز هيحقق لك الاستقلالية دي ليه رافض ؟
