شعور الخيانة قاسي خاصة لو من حد قريب منك ، وبتشوف خيانته كل يوم بعينك بس مش قادر تعترض خايف على إلي بينكوا خايف لا كل شئ يتهد وأحلامكوا كلها تنتهي فـ بتسكت
_ ماما ماما ، ممكن أروح ألعب من سارة .
_ روحي يا فاطمة .
مسكت فنجان القهوة خدت منها رشفة مسحت دموعي إلي بدأت تنزل في الفنجان بتعكر مرارته بملوحتها
" فاضي شوية نشرب قهوة في حتة بعيدة
إعزمني على نكتة جديدة وخلي حساب الضحك عليا "
الموبايل رن رديت عليه
_ أيوة يا عُبيدة ، عامل إيه ؟
_ الحمد لله ، إنتِ عاملة إيه .
_ كويسة ، في حاجة ؟
_ لا كنت عايزة أقولك إني هتأخر شوية في الشغل
ضحك بسخرية و جاوبته
_ براحتك يا عُبيدة ، هستناك .
_ تمام يا يقين ، سلام .
رايح يقابلها شوفت الشات إلي في إتفاقهم إمبارح ، عُبيدة مدي الأمان أوي لدرجة إنه مخدتش باله إني مُكتشفة خيانته من فترة ! ، مقدرتش أكمل القهوة و قُمت كبيت بقيتها في الحوض زي مشاعري إلي بتترمي دايماً تحت رجليه ، مسكت الموبايل وأنا بحاول ألهي نفسي ومفكرش في جوزي إلي مع واحدة تانية
_ يقين .
_ نعم يا نور ؟
_ بتعملي حاجة ؟
_ لأ .
_ طيب هكلمك .
...
_ آلو يا يقين
كنت حاسة إنه عندها كتير تقوله
_ إتكلمي يا نور .
_ هو ليه الواحد مش بيتحب زي ماهو عاوز ؟
_ بمعنى ؟
حسيت بصوتها إتهز وقدرت أتخيل شفايفها وهي بترتجف المرارة إلي هي حساها
_ يعني ليه لازم أرضى بطريقته في حبي و إنه هو كده ومينفعش أعترض ، أنا عايشة في جحيم يا يقين
ليه هو مش مُدرك إنه مش دي الطريقة إلي نفسي أتحب بيها ؟ ليه مش بيهتم بيا زي مانا عاوزة ؟ ليه مش بيتحمس لكل حاجة بعملها ؟ ليه بيحبني بطريقة غلط مش قادرة تروي جَفا مشاعري وقلبي ، ليه مش من حقي أعترض يا يقين ؟
_ مين قال مش من حقك تعترضي ؟
_ كله بيقولي إنه كل إنسان لي عيوب ومميزات ومادام إنتِ عيزاه لازم تتقبلي طريقته دي ، طب ماهو أي حاجة بتدايقة مني بيقولي عليها ليه أنا لازم أسكت ؟!
سكت إتلم المتعوس على خايب الرجا
_ فعلاً معاهم حق كل إنسان لي عيوب ولي مميزات وإنتِ مش هتقدري تغيري إلي قدامك خاصة لو هيبقى في بينكوا إرتباط مش هتفصلي على مقاسك يا نور ولا العكس بردو ، مش عايزة أشجعك على حاجة تندمي عليها
بس إنتِ لو حاسة إنه عيوبه إنتِ مش قادرة تتعاملي معاها ولا تتعايشي فـ سبيه هي حياة واحدة و مش مضطرة تعيشيها كلها في وجع قلب ، إختاري إلي يناسبك مش إلي إنتِ شيفاه مناسب هيوفر عليكي كتير وجع وتعاسة و حزن إنتِ في غنى عنهم .
_ بس أنا بحبه يا يقين
_ هي دي إنتِ بتحبي يبقى تقبلي زي ماهو متطالبيش إنه يتغير وهو كمان كده هي طريقته في الحب هو ده أسلوبه، لازم تقبليهم الراجل ده إنتِ هتعيشي معاه عمر يا حبيبتي مينفعش تتمني حاجات مش في لأنه أول ما تتجوزي و تبدأ الحياة الفعلية هتقفي كده وتقولي عقلي كان فين لما تغاطيت عن كل ده ؟!
