_ طلقني يا يونس
الصدمة ألجمتني أطلقها إزاي يعني أطلق مريم مراتي وحبيبتي ، صدمتي أتحولت لسُكات بصيت لعيونها
لقيت فيهم وجع ويأس
مريم يئست من علاقتنا وأنا بقيت حاسس إني عاجز
، عمري ما كنت ضعيف غير قصادها
مريم أنا إزاي وصلتها لكده مش هقبل إنها تتعذب في قُربي بالشكل ده
_ ليه
حاولت أتمسك بأي خيط
_ عشان أنا طرف تالت يا يونس مراتك حامل وهتكملوا حياتكوا سوا أنا دخلي إيه ؟
هتقولي في ناس كتير بتعيش كده بس أنا مش متحملة وخلاص تعبت
كمل حياتك مع مراتك وطفلك إلي جاي وسيبني أكمل حياتي أنا كمان ، إحنا الحياة بينا بقت صعبة يا يونس
باللَّه خلينا نفترق بالمعروف ونراعي العشرة إلي بينا
سكت أنا مش عارف أواجهها إزاي ، إتنهدت وأنا بنهي الحكاية ده الجزء المفقود
_ مريم أنا مازلت بحبك بس أنا شايفة بتدبلي في قُربي
وأنا ميرضينيش إنه حبيبتي تبقى كده وقُربي بيضعفها
، مش هجبرك على حاجة بس إدينا فرصة طيب وصديقني هبقى أحسن يا مريم
صرخت فيا
_ كفاية بقى ، إتجوزت عليا و أهملتني و أهلك بيكرهوني ناقص إيه تاني يا يونس ناقص إيه تاني ، كفاية بقى وأرحمني وطلقني أنا تعبت
حاولت بعدها أرجعها عن رأيها لكنها كانت مُصرة ، تَم الطلاق وكانت فترة سيئة جداً عليا
بس أنا السبب أنا إلي أنبهرت بعلاقة جديدة ومشاعر جديدة وأهملتها وقبل كده إني سبت أمي ترمي سمومها في ودني ، أنا السبب مريم ضاعت وأنا السبب
إنتَ السبب يا يونس إنتَ اهملتها ، بس أنا طلعت لها كام مرة أول ما رجعت من السفر بس بردو أنا عارف أنه مريم بتكره الإهمال وجت على نفسها وأتحملت جوازي ومعاملة أمي حقيقي هو مفيش مبرر للي عملته
_ سلام عليكم
_ وعليكم السلام ، إزيك يا يونس يا إبني ؟
_ الحمد لله يا عمي إزاي حضرتك ؟
وصلتني تنهيدته من الموبايل
_ مش كويس يا يونس ، إيه إلي حصل بينك وبين مريم يا يونس ؟
إتنهدت وكلمته بصراحة
_ أنا أهملت مريم يا عمي وإتجوزت عليها ممكن الجواز كان بسبب ضغط أمي وضعفي في لحظة دمرت حياتي ، أنا حاولت أرجع علاقتي بمريم بس هي مكنتش قابلة وجود يارا وحقها وكمان إهتمامي بقى مقسوم وأنا مقدرتش أعدل للأسف والله فكرت أطلق يارا وأرجع علاقتي بمريم لكن يارا بقت حامل وصعب أسيبها وهي حامل ومريم فاجئتني بطلبها للطلاق وهي معاها حق في رد فعلها ، أرجوك يا عمي حاول تخليها ترجع وأنا هصلح كل شئ أرجوك
_ إنتَ جرحتها كتير يا يونس وأنا مقدرش أجبرها على شئ بس أنا هحاول معاها وربنا ييسر
إستنيت بس هي كانت رافضة أو ممكن مكنتش في وعيها أنا ومريم بينا قصة حب كبيرة ، لكن الإهمال يفسد كل شىء مهما كان عظيم
