.
.
.
.
.
______♡.
-زهراء : فزيت من نومي تقريباً الساعه ٩ونص ضليت متمدده بمكاني وافكر بألي صار الصبح شلون انمار مهتم بيه وطمني اكثر من ثبتلي رجولته وانو هوه ماجبرني على شي اني ما اريده،
اخذتني صفنه واتذكرت بوسته إلي ومن شهكت وهو يهدي بيه ويكول لا تخافين ماسويت شي بس بوسه ضليت اضحك والخجل ماليني ، كمت من الجربايه ورتبته ورحت اشوف نفسي بالمرايه وجهي احمر ضليت صافنه على نفسي ليش هلكد بالي مشغول بأنمار وتفكيري بس بي ضربت كصتي وضليت ارزل بنفسي ،..
دخلت للحمام اخذت شاور دافي وطلعت نشفت شعري بالشسوار وبدلت لبست فستان بيتي نازك لون ماروني مرتب على جسمي وبي سلسله ذهبيه ع الخصر خليت مكياج صباحي خفيف وسويت شعري ضفيره راخيه ورفعت خصله من كذلتي بفيونكه ذهبيه ناعمه ، اجيت اريد اخلي عطر واتذكرت عطري إلي أنطيته لأنمار ابتسمت بعدهه مسحت الأبتسامه بسرعه واني اكول لنفسي (ثكلي ولا تفكرين بي هواي) خليت عطر ونزلت ،..
لكيت الشيخ والشيخه كاعدين رحت صبحت عليهم وباركولي بعدهه الشيخ اشر للحجيه حتى تجيب شي وراحت وجابت بأيده علبه سوده باوعلي الشيخ بأبتسامه وكال ..
-ابو انمار : هاي هديه بسيطه مني ومن الشيخه انشالله تعجبج .
اجت الحجيه انطت العلبه للشيخ فتحه وطلع منه كلاده ذهب كلش حلوه ،.
-زهراء : شكراً شيخ كلكم ذوق ليش تعبتو نفسكم .
-ابو انمار : لا بويه هاي حقج تستاهلين الأغلى .
انطه الكلاده للحجيه اجت تريد لبستني ياهه وباستني وكالت ..
-ام انمار : بالعافيه لاكتلج وصدك من كال الذهب يلوك للذهب .
-ابتسمتله وكلت :الله يعافيج حجيه وبسته من خده .
وكلت : اني رايحه احضر الريوك محتاجين شي قبل ما اروح ؟
-الحجيه : لا يمه اني والشيخ تريكنه روحي كعدي حنين وتريكن سوه .
-هزيت راسي وكلت : تمام .
دكيت باب غرفه حنين مره ومرتين وماكو اي جواب دخلت ولكيته نايمه ومخليه المخده على راسهه رحتله وكلت ..
-زهراء : يله حنون كعدي
-حنين : عوفيني نايمه شوي واكوم حبابه
-زهراء : لا عيني يله كومي اني اضل كاعده وحدي ، يله تكومين لو اجيب ماي بارد .
-طفرت من الجربايه وكالت : لا كايمه كلشي ولا الماي .
-كعدت يمه وضليت اضحك وكلت : شدعوه هيج تخافين من الماي مثلاً راح اذب عليج ماي من صدك بس اني متعوده قبل هيج جنت اكعد اختي .
-حنين : اي ما احب الماي لان انمار كل يوم يكعدني بالماي ،. بعدهه ابتسمت وغمزت وكالت :بس انتو امس تزوجتو يمته تشابهت اطباعكم .
-زهراء : هههه لا مو قصة شبه بس صارت صدفه.
-تربعت واتدنت يمي وكالت وهيه مبتسمه : اي سولفيلي شنو صار امس وشلونه اخوي وياج .
-زهراء : ماصار شي بس سوالف خاصه بالمتزوجين وضحكت .
-فتحت عيونه وكالت : اي انطيني تفاصيل .
-زهراء : يعني شكلج بس نمت بحضنه وباساني وحضني ياا عززه هو اصلاً وصاني شنو يصير بالغرفه ما يطلع .
-حنين : هههههه هذا اخوي ما عرفته طلع رومانسي .
-زهراء : هههههه يله كافي عيب كومي غسلي اني رايحه اسوي ريوك حتى ناكل اني وياج .
-حنين : خوش جايه ، بس شعجب ما اجه انمار كعدني ؟
-زهراء : ليش ما تدرين اليوم انمار نزل واجب من الصبح .
-حنين : ياا صدك راح ويمته يرجع ماكال .
- زهراء : لا بس كال من تخلص المهمه ارجع .
-حنين : انشالله يرجعلنه سالم .
-هزيت راسي بأبتسامه ورحت للمطبخ سويت ريوك واجتي حنين اكلنه وهيه ضلت تعزل المواعين وتحضر الغده واني رحت نضفت البيت وبخرته ورجعت يم حنين اساعدهه شوي واندك الباب رحنه اني وحنين نشوف منو طلعت ساره جايه سلمت على اهلهه واجت باستني وباركتلي من وره خشمهه شكلهه مجبوره اني واكفه واجتي رهف بنت ساره حضنتي وكالت : هلو عمه انتي عروسه.
-شلتهه وبسته وكلت : اي يا حلوه بس اني مو عمه اسمي زهراء ،
-ضحكت وكالت : خوش ادلج زهواء (اكلج زهراء) .
-ضحكت على طريقة نطقهه ما تلفض حرف الراء ضليت ابوس بيهه وهيه تضحك ، اجتي ساره اخذت رهف مني وكالت : وين انمار بعده نايم ؟
-زهراء : لا طلع واجب من الصبح .
-ضحكت وكالت : هههه مبين شرد منج عرف انو انتي مو من مستواه.
-ابتسمت وكلت : لا ما شرد بس عنده شغل وطلع .
-اجت حنين وكالت : شنو هالحجي ساره مو عيب لو هنا انمار تحجين هالشكل .
-ساره : وانتي ليش تتدخلين بدل ما توكفين وياي تدافعين للفصليه.
-حنين : اني وي الحق وهسه اشوفج انتي الغلطانه وبعدين شنو فصليه صارت زوجة اخونه ولو انمار يسمع هالحجي يزعل عليج .
-ساره : يله كافي هسه اني شحجيت وبعدين هو ما يسمع إلا اذا انتي كلتي اله .
-حنين : اي عادي بس يجي اني اكله .
-زهراء : كافي حنون انسي مو حاجه نكبر الموضوع .
-حنين : تمام مثل ما تردين حبي.
-داخلي نار من حجي ساره حاولت اخفي وابتسمت وكلت : يله تعاي نصب الغده اني وياج .
-حنين : يله امشي .
-صبينه الغده وكعدنه ما اشتهيت اكل شفت رهف تزعج امهه وما تقبل تاكل صحتلهه وكلت..
-زهراء :تعاي رهوف اني اوكلج .
-اجتي تركض وكعدت يمي ،
-ساره : لا تحاولين ما تخليج توكلينهه تريد تلعب بالأكل .
-هزيت راسي بأبتسامه وكلت : لا هسه رهوفه الحلوه تاكل وما تعبني مو صح رهوف؟
-ضلت تضحك وكالت : اي .
ضليت اوكل بيهه والعبه ابد ما تعبتني هيه حلوه وسوالفه تجنن تدخل الكلب بسرعه ، خلصت وكمت غسلت وغسلت رهف وياي وعزلنه المطبخ اني وحنين وساره سويت صينيه جاي واخذته قدمت للشيخ والشيخه وساره وحنين وكعدت يمهم ،
وره شوي اجت رهف لازمه بيده نستله ككو ومتلفه وجهه وايديه وملابسهه بحيث موصله النستله لشعرهه ، ضلينه نضحك على شكلهه كامت ساره تريد تبدللهه اجتي تركض وكالت : ما مااريد ماما اريد عمه زهراء تبدلني .
-ابتسمت وكلت : انطيني ملابسه اني ابدله .
-ساره : لا خاف ما تعرفين تعاي ماما خلي ابدلج .
-ضلت رهف مجلبه بيه وما تقبل تروح لامهه ، كلت : لا اعرف هم جنت قبل مسؤوله عن اخوي الصغير.
-هزت راسهه وراحت جابت ملابس رهف وانطتني ، اخذت رهف وصعدنه لغرفتي دخلته للحمام غسلته وبدلته نشفت شعرهه وخليتلهه قراصات من عندي عطرتهه وخليتلهه مورد شفايف وصبغتلهه اضافرهه ، اني شنو اسوي هيه بس ساكته وتضحكلي كملنه ونزلنه اني وياهه ، راحت تركض لأمهه فرحانه توريهه اضافرهه وشعرهه ، باوعلتي ساره ابتسمت
وكالت : شكراً تعبتج .
-زهراء : عفواً مسويت شي هيه بنتج حلوه .
-حنين : والله مشتهيه كيكه، زهراء تعرفين تسوين كيك
-زهراء : اي اعرف تردين اسوي ؟
-حنين : صدك تعرفين يا ريت يله سويلنه .
-زهراء : تمام شنو تحبين كيكه شوكولا او كيكة برتقال؟
-حنين : لا كيكة برتقال احلى مو ؟
-زهراء : تمام .
رحت للمطبخ وبديت اسوي بالكيكه كملت ودخلتهه للفرن وسويت جاي مهيل يصير طيب وي الكيك ، اجت حنين للمطبخ وهيه تكول : اوييليي شنو هالريحه تجنن.
-زهراء : هههه انشالله هم يطلع الطعم يجنن .
-حنين : يمته تكمل اني جعت من هسه .
-زهراء : خلصت بس شوي واطلعه من الفرن .
كملت الكيكه وسويته قطع رتبته بالصينيه وصبيت الجاي واخذتهم ورحت للصاله قدمت للشيخ والشيخه وخليت الصينيه يم حنين وساره ورحت كعدت يمهن ، اخذت قطعه وكلت : ها حنون ما انطيتي رأيج .
-حنين : كلش طيبه عاشت ايدج ، بعد كل يوم اخليج تسويلنه مثله .
-زهراء : بالعافيه تدللين يمتى ما تردين بس كولي .
-عجبتهم الكيكه وكلهم كالو عاشت ايدج ، خلص اليوم عادي بس سوالف وحالات ساره المتقلبه ساعه تصير حبابه وياي وتضحك وتسولف وساعه تكرهني وتصيحلي الفصليه ،
ثاني يوم تقريباً الساعه٣ الضهر جنت كاعده بالغرفه اندك الباب ودخلت حنين وكالت : زهراء اجو بيت عمي ابو احمد تعاي نزلي .
-زهراء :ها ومنو اجه منهم يعني احمد جاي لو لا
-حنين : لا ماجاي شحده انمار مهدده اذا يجي يكتله .
-زهراء : تمام يله بس ابدل وانزل .
طلعت حنين واني كمت بدلت ورتبت نفسي ونزلت واني متردده ، سلمت عليهم ورحت للمطبخ حضرت الضيافه وقدمتلهم وكعدت ، ملاك وامهه بس يباوعلي ويخزرن غلست عنهن وسويت روحي ما منتبهه ، كامت ملاك وكالت : زهراء تعاي شوي للمطبخ .
-كلت : اوك جايه .
-رحت وراهه ، باوعتلي ورفعت صبعه بوجهي وحجت بتهديد وكالت .
-ملاك : سمعيني يالفصليه انتي اخذتي فهد ومات وهسه اجيتي على انمار لا عيني ما اخلي الج إلا اندمج على اليوم الي اجيتي بي هنا .
-باوعت بأستغراب وكلت بكل برود : تمام الي تكدرين علي سوي .
-ضلت تخزر بيه عفتهه ورحت اجتي حنين وسئلتني على ملاك سولفتله شنو كالتلي ،ضحكت حنين وكالت :
عوفيه تولي هاي بايخه ما عده شغل وعمل تريد بس تزوج كتلت روحهه على خواني واثنينهم ما يردونه .
-ابتسمت وكلت : لا اني اصلاً ما اهميت لكلامهه.
-حنين : تعاي خلي نكعد يمهم.
-رحنه اني وحنين كعدنه بالصاله اجه اتصال للشيخه شافت تلفونهه وكالت بفرح : هذا انمار اتصل ، فتحته وضلت تحجي ويا وتوصي يدير باله على نفسه بعدهه اشرتلي حتى احجي ويا كلت ما اريد بس الحجيه كالت : هو انمار يريد يحجي وياج .
-اخذت التلفون من ايدهه وكلت :الو انمار الحمدلله على سلامتك.
-اجاني صوته كال : هلا بنيتي الله يسلمج شلونج .
-زهراء : تمام زينه انته شلونك.
-انمار : الحمدلله بخير روحي بمكان وحدج اريد احجي وياج بموضوع .
-زهراء: تمام ، طلعت للطارمه وكعدت على المرجوحه وكلت : تفضل اسمعك .
-انمار : سمعت جايين بيت عمي ابو احمد اليوم مو
-زهراء :اي
-انمار : احمد جاي لو لا ووين كاعد .
-زهراء : لا ما جاي بس ام احمد وملاك .
-خوش حجي وشوفي تلبسين عدل ولا تلبسين ضيك ويبرز جسمج و ممنوع تخلين اي شي بوجهج والحجاب لا تنزعينه سمعتيني زهراء .
-استغربت من طلباته والصراحه ضجت من تحكمه الزايد كلت : اوك بس محد عدنه ليش هلكد ملتزمه.
-انمار : سمعي كلامي وبدون حجي زايد.
-زهراء : اوف تمام محتاج شي .
- اي .
- شنو ؟
- اجي انام يمج .
- عزه والله من تجي ما انام يمك التوبه هاي اول مره واخر مره.
-هههه مو هو بكيفج .
- ليش عندك اعتراض؟
-اجي ونشوف الله كريم ، يله مع السلامه ديري بالج على نفسج ومن تردين تنامين شغلي الدفايه .
-تمام وانته هم ، باي .
-كطعت التلفون وكمت اريد ادخل لكيت ملاك واكفه وتباوعلي ما عاجبهه انطيت التلفون للحجيه ورحت للمطبخ اسوي العشه ،....
خلص اسبوع كامل نفس الروتين والملل ، يوم جان الجو كلش حلو السمه مليانه غيوم ومطر خفيف جنت كاعده على المرجوحه لابسه فستان شتوي ميدي لون بيج وشعري مسرحته وعفته مفتوح وي قراصه ناعمه ومخليه مكياج خفيف بس خليت حمره لون غامق شوي ، جان شكلي مرتب اني اعشق المطر كاعده وبالي سرح افكر بأهلي شكد مشتاقتلهم ولو ما صارت المشكله جان هسه اني بيت اهلي ،.
فجأه انفتح باب الشارع اني كمت جان يمي شالي خليته على راسي ورحت اشوف منو ، جان انمار واكف بالباب وبيده جنطته ويمه رجال هم لابس عسكري ضلو يسولفون شوي وراح ، اجه انمار دخل بس شافني ابتسم وكال : ماكو سلام ؟
-بادلته الابتسامه وكلت : حمدلله على سلامتك ، نورت بيتك .
-ضحك وكال : الله يسلمج منور باهله .
-ابتسمتله ورحت اخذ الجنطه من ايده ماقبل ، دخلنه سوه للبيت راح جانت ساره عدنه اجو سلمو علي ويتحمدوله السلامه وراح كعد يمهم واجت رهف بس شافته راحت تركض وكعدت بحضنه ضل يبوس بيهه وهيه تضحكله ، ضلو يسولفون سوه رحت جبت مي وقدمتله اخذه مني وابتسم ، وره شوي كام وكال : من رخصتكم اصعد ارتاح شوي .
-الشيخ : مرخوص ابني روح ارتاح .
راح صعد واجتي حنين دفعتني وكالت : روحي صعدي وراه شعندج كاعده .
-زهراء : شسوي صاعده من يحتاج شي يصيحلي .
-حنين : ولج لا تصيرين فاهيه روحي صعدي يمه .
-زهراء : اوف اي كولي مليتي مني وتردين تطرديني .
-حنين : ههههه اي مليت منج يلا روحي .
-زهراء : تمام صاعده وبعد ما تشوفيني ، كمت وصعدت للغرفه دكيت الباب كلت خاف مشغول اجاني صوته كال : تفضل.
-دخلت للغرفه بس شافني ضحك وكال : هاي انتي ليش دكيتي الباب .
-زهراء : كلت خاف مشغول او هيج شي .
-اجه تقرب مني وكال : هاا هيج تكولين .
-زهراء : اي اااا شسمه محتاج شي احضرلك الملابس او الحمام شنو تريد اسوي .
-انمار : اي بس حضريلي الحمام .
-راح كعد على الجربايه ،نزعت شالي ورحت حضرت الحمام واخذتله تراك هم خليته استحيت اطلع ملابسه الداخليه هو يتصرف ورحت يمه وكلت: كملت الحمام .
-انمار : عاشت ايدج ، كام نزع الستره وشفت لون احمر على قميصه بكتفه قريب على صدره تقربت يمه وسئلت ..
-زهراء : انمار هذا دم على قميصك لو شنو ؟
-راح يشوف بالمرايه وفتح دكمة القميص حاول ينزعه ما كدر شكله متوجع ، رحت يمه وكلت : خليني اساعدك .، ما رفض نزعت منه القميص وشفته جان لاف صدره وكله دم شهكت وسئلت باستغراب ..
-زهراء : عزه انمار هاي شنو وين متعور شوف الدم
-انمار : لاتخافين مابي شي بس اصابه خفيفه وهذا الدم لان تحركت هواي .
-زهراء : شلون ما اخاف يمكن تموت من هذا النزيف .
-انمار : ههههه لا ما أموت متعود فتره واطيب .
-زهراء : اوك وهسه شلون راح تدخل تغسل يعني تكدر بهاي الحاله .
-انمار :يعني اذا ما اكدر راح تساعديني انتي ، كال هيج وغمز .
-اني ضليت صافنه وهو طكهه ضحكه وراح للحمام ، ضليت كاعده بالغرفه خاف يحتاج شي ، وره شوي طلع انمار من الحمام جان لابس بس بجامه وعضلاته بارزه خجلت درت وجهي اضيع الموقف ، جان واكف يم المرايه ينشف شعره دار علي وكال : زهراء اكو علاكه تضميد بالجراره الي يمج جيبيه ، كمت اخذته وانطيته أله بعدهه سئلني : تعرفين تضمدين لو تخافين ،
-(اني عادي ما اخاف من هالاشياء يعني عندي جرأه وما اخاف من الدم والجروح).
-كلت : اي اعرف ، كعد على الكرسي الي كبال المرايه وكال : يله سوي حتى تتعلمين لان مرات من اتصوب مااكدر اضمد نفسي .
-كلت : يعني انت كل ماتنزل واجب تتصوب ؟
-انمار : مو دائماً حسب الحظ.
-نزلت وصرت قريبه منه حاولت اخفي خجلي وبديت اضمد وهو ما انطه اي ردة فعل باوعتله باستغراب وكلت : ما جاي تتوجع ؟
-انمار :يعني ترديني اتوجع
-زهراء : لا بس يعني جرحك شوي جبير وما انطيت اي ردة فعل .
-انمار : لا موقصة ما متوجع بس تعودت لان هاي مو اول مره .
-زهراء :هاا تمام .
-كملت وردت اكوم لزمني من ايدي وكال : اوكفي لا ترحين .
-زهراء : ها محتاج شي
-ضل ساكت وصافن بوجهي ، باوعتله بنضرة استفهام بعدهه كال : تعبان ، ونزل عيونه على شفايفي وقرب وجهه ، فتحت عيني بصدمه ودفعته وكمت ، ضل يباوعلي بأستغراب وبعصبيه اجه يمي وكال : ليش رفضتيني .
-زهراء : لأن انه ما اريد وانت مو كلت ما راح تجبرني على شي اني ما اريده .
-ضل يخزر وكال : هاي اول واخر مره تدفعيني وبعدين انه شسويت لو ماخذج جان شسويتي ؟
-زهراء : تمام اسفه وما اعيده بعد بس انت هم حباب لا تسوي هيج مره ثانيه .
-انمار : لا اسوي الاريده وانتي الممنونه فهمتي لو لا ، كالهه بصياح .
-نزلت دمعتي ومسحتهه بسرعه وهزيت راسي بمعنى اي وكلت : تمام .
-راح تمدد على الجربايه رحتله وكلت : راح انزل احضرلك الاكل تريد شي قبل ما انزل .
-انمار : لا ما اريد اكل راح انام تعاي نامي يمي .
-توترت وكلت اذا ارفض هسه يعصب علي ويمكن يكتلني ، رحت ونمت على طرف الجربايه .
-انمار : تعاي اتدني لا تطيحين ما اكلج .
-تدنيت وصرت قريبه منه ، جان نايم على ضهره بس اتقربت دار علي مد ايده على شعري جان نازل على وجهي ورفعه وكال : اي سولفي شنو صار هالاسبوع .
-زهراء : ها ااا لا مصار شي ايام عاديه .
-انمار : تمام يله راح انام ضلي هنا لا تنزلين .
-زهراء : شسوي هنا ما نعسانه .
-انمار : خوش عود من انام نزلي ، نام وخله ايده على خصري ووجهه صار بركبتي حضني حيل ما كدرت اتحرك ضليت ساكته ومتوتره من انفاسه الي بركبتي وكل شوي يقوي الحضنه ، حجيت بصوت ناصي : انمار جاي تأذيني وخر شوي ، حجه بصوت بين نايم وكاعد كال : اشش نامي وبدون صوت .
-سكتت وضليت اغفي ونمت بدون ما احس ...
.
.
-ترقبوا الاحداث الجايه ..
انتضروني في بارت جديد ،♡