.
.
.
.
-زهراء : جنت كاعده يم الحجيه وحنين اجه انمار وكال ..
-انمار: زهراء الشيخ يريدج بالمضيف .
-هزيت راسي بمعنى اي وكلت : تمام جايه ، مشيت بتوتر دكيت الباب ودخلت لكيت الشيخ كاعد شافني ابتسم وكال ..
-ابو انمار: تعاي بويه دخلي عندي حجي وياج .
-هزيت راسي ودخلت رحت كعدت يمه وكلت : تفضل عمو محتاج شي .
-ابو انمار : سلامتج بنيتي ، سمعي بويه اليوم اتصل علينه عمج ابو ثائر وطلب منه نرجعج لان توفى فهد وكال كعدتج هنا غلط وانتي غريبه عنه ما يصير .
-ابتسمت وكلي امل انو الشيخ راح يوافق على رجعتي لأهلي كمل كلامه وكال ..
-ابو انمار: اني وياه كلامه صح بس احنه بقانون عشيرتنه الفصليه بعد ما يتوفى زوجهه تضل ما ترجع ويعقد عليهه شخص ثاني .
-هنا وجهي صار اصفر وكلت برجفه : لا شيخ الله يخليك خليني ارجع لأهلي فكر بالموضوع اني اريد اهلي ما اريد اضل هنا .
-أبو انمار: ما يصير بنيتي شبيدي عليج ، وبما انو انتي ما مكشوفه على فهد وما تقربلج راح اخلي انمار يعقد عليج وتصيرين مرته ولا تفكرين نفسج فصليه هنا اني كتلج اعتبرينه اهلج والله يشهد اني احبج مثل بنتي حنين وانشالله انمار ما يقصر وياج .
-هنا من الصدمه ضليت ابجي بدون وعي يعني راح اضل فصليه طول عمري وراح يعقد علي انمار بعد خلصت حياتي وما ضل عندي اي امل ،
الشيخ حجه وياي وهدأني حاولت اصيطر على نفسي هديت نفسي وكلت : هذا هو مثل ما تريد ، وكمت وكلت : من رخصتك شيخ اروح لغرفتي .
-ابو انمار : روحي بنيتي فكري بالموضوع وانشالله باجر نعقدلكم .
-هزيت راسي وكلت: تمام ،وطلعت .
-طلعت حسيت نفسي دخت بالكوه امشي رجلي صارو خيوط وما احس بيهم طلعت كعدت على المرجوحه اشم هوه واهدء شوي ،
كعدت ضليت ابجي لحد ماحسيت دموعي نشفو وما ضل بيه حيل ابجي ، هدأت شوي ضليت افكر بنفسي وشنو منتضرني من حياة جديده ،
جان الخوف ماليني ومن افكر انو انمار راح يعقد علي يزيد خوفي اكثر ، نزعت شالي خليته على المرجوحه فتحت شعري رفعت راسي للسماء أشوف النجوم والقمر الي يضوي ، ودمعتي نازله على خدي اجت على بالي اغنيتي المفضله .
*( اسمهه <عد وانه اعد ونشوف>).
-ضليت اغني بصوت ناصي بس مسموع وجنت مطمأنه انو البيت كلهم نايمين فأخذت راحتي ضليت ادندن بكم اغنيه اجت على بالي واضحك على نفسي اني بيا حال وجاي اغني حسيت نفسي تخبلت ،
سندت نفسي على المرجوحه وعليت صوتي شوي واغني ، حسيت شخص وراي وكفت غنه وضليت ساكته خايفه لان البيت كلهم نايمين اخاف ادور واشوف منو وخاف اشوف جني واخترع ،
اخذت شالي وغطيت وجهي من الخوف وكلت بصوت ناصي : اذا اكو جني وراي سوي صوت .
صار صوت مثل دكة الباب طفرت من المرجوحه درت واشوف انمار واكف كبالي ويضحك ،
هدأت شوي واخذت شالي خليته على راسي وكلت : تره ماكو شي يضحك ، وعبرت من يمه ردت ادخل للبيت ولزمني من ايدي وجراني وكال : تعاي لا ترحين اريد احجي وياج .
وخرت ايدي منه وكلت : دنيا ليل عيب نضل وحدنه .
خزرني وكال : ماكو شي عيب كلت تعاي عندي حجي وياج .
اخذت نفس وكلت : اوكي تفضل اسمعك.
-زفر بعصبيه وكال: الشيخ شنو حجه وياج .
-زهراء : ماكو شي مهم هيج حجي عادي واعتقد انته تدري ليش تسألني .
-انمار: اي ادري بالموضوع بس اريد اسمع منج ، واني من اسئل تجاوبيني بأدب مو بنتر ،لا يصير شي ما يعجبج .
-زهراء : اوكي ، كال انو انته راح تعقد علي واني ما ارجع لأهلي واضل فصليه هنا وبس .
-ضل يباوع بوجهي وساكت ،
كلت : انمار انته مو ماتريد تزوج خليني ارجع لأهلي حباب احجي وي الشيخ بلكي يغير رأيه .
-انمار : ومنو كلج اني ما اريد اتزوج ،
وبعدين لو الشيخ يكدر يغير رأيه جان رجعناج لأهلج بس قانون عشايرنه هيج .
-زهراء : اي تمام انته تزوج اكو هواي بنات بس لا تعقد علي حتى لو اصير خدامه هنا اني موافقه بس لا توافق نتزوج حباب .
-حجه بتساؤل وهو هلكد حاجبه وكال : ليش ما ترديني انطيني سبب مقنع بيج شي لو عندج حبيب تردينه ؟
-زهراء : لا مابيه شي ولا عندي حبيب بس اني ما اريد اتزوج .
-انمار : لعد وثائر شنو جان يحجيلي عنج بالمركز يكول جان يحبج ومعجب بيج وكال حجي ما ينكال .
-شهكت بصدمه وكلت :عزهه شنو جان يحجي علي هذا السرسرلوكي حبته حيه انشالله الزاحف .
-ضحك وكال :يعني هسه انتي تقنعيني ما جانت عندج علاقه قبل وي ثائر او غيره ،.
-زهراء : شجاي تحجي انت انمار لا عبالك اهلي انطوني فصليه يعني ما يردوني او تخلى عني اني اجيت برضاتي علمود عمي ابو ثائر واني جنت مدلله عند اهلي انطوني احسن تربيه ووفرولي كلشي وما خلوني احتاج لأحد واني ابد ما فكرت اخون ثقتهم بيه ولا راح اسويه .
-ابتسم وكال :خوش كافي شكد تحجين ، روحي نامي باجر وراج يوم طويل .
-زهراء :اوك ، بس احم شسمه اريد تلفوني .
-انمار : اولاً هاي الاوك ما اريده تكولين صار لو تمام ، ثانياً تلفونج تنسي ما الج تلفون .
-زهراء :ليش هو اني شمسويه بي لو احجي وي اهلي وصديقاتي لو اشوف مسلسلات وقصص ، عفيه حباب رجعلي ياه .
-انمار :الله كريم انطيج يا بس مو هسه .
-زهراء : اوك تصبح على خير .
-انمار :احنه شكلنه على الاوكي .
-زهراء: شدعوه هيه كلمه بيمن مضوجتك.
-عكد حاجبه وكال : ما الج دخل اني هاي الكلمه ما احبه يله روحي نامي موعتي اذاني شكد تحجين الله يساعدني
-زهراء : انشالله افكر ما اكولها ، بس عليمن الله يساعدك اني اصلاً ماراح اوافق بالعقد اكول للشيخ جبروني واشرد .
-لزم ايدي وتقرب علي يباوع بعيوني وكال :شحدج سويه وشوفي شنو راح يصير بيج وين تشردين اني ضابط لو جوه الكاع الكاج.
-توترت من قربه الي حاولت ادفعه بس ماكدرت هو اقوى واضخم مني ، ضحك وكال :ها شو سكتي ما تحجين .
-زهراء : خزرته وكلت وخر مني لا اصيح لعمو الشيخ عليك .
-ابتعد مني وكال :عيونج لا تخزرين ،وخرت منه ورحت صعدت لغرفتي ،بدلت ملابسي ونمت .
.
.
.
-كعدت ثاني يوم صوت حنين وهيه تكعد بيه جرت الغطه من عندي وكالت ..
-حنين:كعدي ولج فهميني يمتى صار الحجي وليش راح يعقدولج على انمار ،كعدي زهراء الساعه ٨ يله .
-زهراء : بعد وكت عوفيني انام وروحي لأبوج يفهمج.
-حنين:كومي زهراء حبابه كتلني الفضول .
-زفرت بتعب وكعدت ،رفعت شعري الي صاير كله على وجهي وكلت :تذكرين اخوج انمار من امس اجه صاحالي وكال الشيخ يريدج .
-حنين: ايي
-حجيتلهه كل الصار وهيه بس تصفن بوجهي نوب كالت :واخوي انمار شلون وافق امي كتلت روحهه علمود تزوجه وهو ما يرضى .
-رفعت كتفي بمعنى ما ادري وكمت من الجربايه توجهت للحمام غسلت وفرشت وطلعت فتحت الكنتور اختار زي البسه ،
حنين جانت بعدهه كاعده وتصفن بعدهه طفرت من الجربايه وكالت بفرح :عاا زهراء يعني اليوم راح يعقدولكم انتي وانمار .
-زهراء :اي ليش هلكد فرحانه المفروض تضوجين لان اخوج راح ياخذ فصليه .
-حنين:انجبي ليش اضوج بالعكس شفايتله اخوي ياخذج شو انتي حلوه وبعدج صغيره ومعدله شيريد بعد .
-زهراء : حنين راح اكولج شي بس لا تضوجين .
-حنين :كولي عمري
-زهراء : شوفي ابوج كال انو بقانون عشيرتكم الفصليه ما ترجع واني اهلي كالولي الفصليه تضلين فتره ويرجعوج شلون هسه اهلج لو اهلي كذبوا علي ؟
-حنين : والله اني ما ادري بس على ما اعتقد انو الفصليه لازم الي عاقد عليهه ياخذهه وانتي اخوي الله يرحمه ما جان يكدر اعتقد لهذا السبب ما يصير ترجعين .
-باوعتلهه بتساؤل وكلت :شلون يعني ياخذني مو عقد علي لعد شيسويلي بعد .
-حنين :ضحكت وكالت بعدين اخوي يفهمج اني ما الي دخل .،يله بدلي ونزلي حتى نتريك .
-زهراء : اوك حبي ثواني وجايه وراج .
نزلت حنين واني بدلت ورتبت نفسي لبست دشداشه بيت نازكه مخصره على جسمي جلد نمر وكلت بما انو الصبح محد بالبيت ما لبست حجاب بس انزله وياي خاف احد يجي عفت شعري مفتوح وخليت فيونكه حمره من وره ، ما خليت مكياج بس مرطب شفايف وكبست رموشي وعطرت ونزلت .
-صبحت عليهم ودخلت للمطبخ حضرت الريوك اكلت شوي وكمت نضفت البيت ورتبته ورجعت للمطبخ بديت احضر الغده اجتي الحجيه وضلت تحجي بابنهه انمار وتوصي بيه هيه تحجي واني بس اهز راسي بمعنى نعم واكولهه صار حجيه وتمام ،
طلعت الحجيه من المطبخ واني ضليت اطبخ وحدي سويت مقلوبة دجاج كملتهه عفتهه على الطباخ وكعدت اسوي مقبلات .، جنت ملتهيه وراسي مشغول . رفعت راسي وشفت انمار واكف بالباب مال مطبخ ،نزيت من مكاني وكمت اخذت الشال وخليته على راسي . كال احم ودخل جايب فواكه خلاهم على الميز وكال..
-انمار : شنو مسوين غده استعجلي شوي وياي صديقي .
-زهراء : سويت مقلوبه دجاج وهاي مقبلات هم .
-انمار : خوش حجي يله صيحي حنين وصبو الغده بس غيري ملابسج ولبسي شالج عدل لان صاحبي يكعد ويانه على الغده .
-زهراء :تمام بس ليش اغير ملابسي ما بيهم شي
-انمار : غيريهم وبدون حجي زايد .
-زهراء :تمام .
-اجتي حنين تركض وكالت ..
-حنين :زهراء تدرين منو جاي ؟
-زهراء : اي ادري صديق انمار ليش شبي .
-حنين : ولج هذا الحب مالتي اسمه ياسر مالتي لو شوفينه صاك ويشتغل وي انمار هم ضابط اني معجبه بي واشك هو هم معجب بس ثكيل ما يبين .
-زهراء : عزه بعيني ولج سكتي لا يسمعونج وبعدين شلون فهمتي بي معجب وهو ثكيل شلون رهمتيه .
-حنين : لا اني مرات اشوفه يباوعلي ويبتسم وكم مره شفته كبال مدرستي يجي يسلم علي ويروح .
-زهراء : هههه ولج شوفي وجهج صار احمر هلكد تحبي.
-حنين : هههه اي والله احبه .
-زهراء : يله كافي خلي نصب الغده لا يجينه اخوج.
-حنين : اي خلي نكمل حتى نجهزج للعقد وغمزت .
-بطني مغصتني ابتسمتله وبدينه نصب رتبنه الاكل على ميز الطعام ونسيت ما غيرت لبسي بس عدلت شالي ..
-اجو كعدو تغدو كعدت يم حنين وانمار بس يباوعلي ويخزر غلست ، خلصنه الغده بس سوالف وضحك وانتبهت على ياسر صديق انمار يباوع على حنين وهيه من الخجل صارت حمره ضحكت على حالتهه وطكيتهه خفيف على ايدهه وكلت بصوت ناصي :ثكلي لا ينتبهولج .
-حنين : مو بيدي دشوفي راح اكوم اعترفله كدام اهلي واخليهم يذبحوني اليوم .
-زهراء: ههههه والله كلشي اتوقع .
كملنه الغده وراحو كعدو بالصاله عزلنه اني وحنين المطبخ بديت احضر الجاي وانطيته لحنين تودي الهم خلصت وكعدت ارتاح ،
اجه انمار باوعلي بعصبيه وكال..
-انمار : اني موكلت تغيرين لبسج ليش ما غيرتي .
-زهراء : التهيت بالشغل ونسيت ، وبعدين لبسي ما بي شي هيه دشداشه وعريضه شنو البس عبايه .
-انمار : اني كلت غيريهه تغيريهه وبدون هالحجي الزايد وهاي الي لابستهه اخر مره اشوفهه عليج راسمه جسمج رسم وتكولين عريضه ، وباجر انشالله اخلي الحجيه تجيبلج لبس بي خير احسن من هذا اللبس.
-زهراء : تمام بس صوتك لايجي احد ، وعندي ملابس هواي لا تخلي الحجيه تجيب ما محتاجه .
-انمار : انشالله ، خلي عندج علم العصر يجي السيد يعقدلنه .
-زهراء : اوك بس ليش مستعجلين اجلو شوي .
-انمار : لا ماكو تأجيل لأن باجر نازل واجب .
-زهراء: تمام على راحتك .
رحت كعدت يم حنين نسولف سوه وهيه سوالفهه بس ياسر مبينه معجبه بي كلش ، كلتله تجي وياي للغرفه حتى اغير لبسي للعقد ،طلعت فستان وردي نازك وما عجبهه طلعت هواي ملابس ما عجبوهه واخيراً عجبهه قفطان ابيض ومطعم وردي وبنفسجي فاتح اختاريته وكعدت خليت مكياج بسيط وجبرتني اخلي حمره ماروني وسرحتلي شعري طلعت حلوه ،
وره شوي اجت الحجيه طردت حنين وبدت تحجي وياي وتوصيني انو شنو يكول اني اوافق وما اكول لا وما اعاند ومن هالحجي وصاحت لحنين حتى تنقل ملابسي واغراضي ردت اساعدهه ما قبلت الحجيه وكالت مايصير ،
تعطرت ونزلت جوه يم الحجيه وره نص ساعه تقريباً ًاجه انمار بس شافني ابتسم وكال يله كومي اجه السيد ،.
اجت الحجيه وجابت شال غطت راسي ووكفت وره الباب اسمع السيد وشنو يكول اني ارد وراه وطلب الموافقه ووافقت ،
وضليت اسمع يحجي وي انمار وهو كذالك وافق ، اجتي الحجيه باستني وباركتلي وحنين هم كالت حنين تعاي صعدي لغرفتج الجديده ضليت ارجف ورفضت وكالت الحجيه : لا يمه صعدي هسه يجي انمار يحجي وياج .
-كلت تمام وصعدت ،. دخلت لغرفة انمار جانت اكبر من غرفة فهد هم جانت عباره عن سويت ،غرفه وصاله وحمام داخلي جانت الغرفه كلش حلوه رحت كعدت على الجربايه اجو علبالي اهلي واخواني شكد مشتاقتلهم ، نزلت دمعه مني وماتحملت نزلت راسي لحضني وجنت نازعه الشال وشعري مفتوح خليت ايدي على وجهي وابجي ،
لحد ما حسيت الباب انفتح رفعت راسي وشفت انمار واكف كال احم ،اني رأساً كمت من الجربايه ولبست شالي مسحت دموعي وضليت واكفه .
دخل انمار للغرفه وسد الباب وكال : نزعي حجابج اني مو غريب صرت زوجج وتحلين علي .
-كلت : لا عادي اني مرتاحه هيج .
-تقرب علي وجر شالي وكال : من احجي وياج نفذي ولا تتعبيني ، وتعاي كعدي خلي احجي وياج .
-هزيت راسي وكلت : تمام ، كعدت على الجربايه وكعد قريب مني وكال ...
.
.
.
انتضروني في بارت جديد ..♡
هذا حسابي على الإنستقرام الي يحب يتابعني ..♡