ماذا لو.. الحلقة ٢١
- نامجون رئيس الدولة -
___
× بعد أول سنه في الحكم ×
نامجون بيطلع على المنبر العالي حمحم، شاعر ببعض التوتر ولكنه تمام فـ فتح الميكروفون أمامه وبدأ متحدثاً
" مع السلامة عليكم يا بني آدمين، و عيد سعيد على اخواتنا المواطنين، الحرانين و السقعانين، الجعانين و العطشانين، المزنوقين و المفرهضين ، و إن شاء الله هنوزع عليكوا كحك و فطير بمناسبة العيد، بس بلاش فتتفته كتير علشان أنا مش هنزل ألم وراكوا الفتافيت، والسلام عليكم ورحمة الله وبركاته.. انزل بالتيتر يا إبني"
اغنية في الخلفية قاطعه الخطاب..
~ يااا ليييللههه العيييييددد اااا.... ~
🎬📺🎬📺
× بعد أول سنتين في الحكم ×
< امشي من هنا يا ابن الـ #$&#&# >
< مش همشي يا بنت الـ #$$&# >
و تتعالى أصوات الصياح و الخناق مخترقه ازاز بلكونة نامجون الي كان نايم و اتقلق منامه من أصواتهم فـ فضل يتقلب في السرير مش عارف ينام من الأصوات لي تحت
حلول يطنش ولكن الأصوات أعلى من أنه يطنشها فـ استقام مبعد الغطه عنه بغصب
"ييوه على اليوم ده بقى!! "
بملامح منزعجه متعكره راح ناحيه البلكونه فتحها اندفع في وشه أصوات خناقه من جبهتين من الشعب قصاد بعض فـ اخد لحظات علشان يستوعب الي بيحصل ثم حاول يهديهم بأدب
" اهدوا اهدوا، لو سمحتوا اهدوا اهدوا براحه اهدوا.. "
منفعش معاهم الأدب لسه بيتخانقوا فـ صاح فيهم
" اسكوتوا شويه اسكتوا الله!!! "
سكتوا فـ هو اتنهد بيحاول، يفوق وسألهم
"على ايه بقى الصداع ده كله علشان بس نبقى فاهمين يعني انا رايح فين ها قولوا؟؟ "
أشار أحدهم ناحيه واحده ست بيشهدها
"مش عاوزه تحرك عربيتها من الركنة وانا مش عارف اخرج عربيتي!! "
صاحت فيه الست
"قولتلك انت الي راكن غلط مش انا!!"
واذ قام الصياح بين طرفين الي في صف الست و الي في صف الراجل فـ سكتهم تاني بصياح ثم قال
" هو أنا جراش يعني، هو انا جراش علشان تتخانقوا تحته بالمنظر ده ولا ايه مش فاهم!! "
اردفت الست
" خلاص افصل ما بينا و الحكم حكمك "
تنهد و حط ايده على سور البلكونة نقرر الخطاب فيهم كأنه على المنبر بتاعه ونظرا لأنه مش فايق فـ كان بيخرف
" أيها الأخوة المواطنون.. نظراً أن الآنسة سندريلا مش عاوزه تحرك ركنه عربيتها و الاستاذ خرم الأوزون مش عاوز يتكرم و يحرك عربيه فـ ااا لازم كل واحد يتنازل علشان تعدي التاني حسب النظرية الفسيولوجيه البتنجانيه الاوزونية في المنظومة الصحية الحاكمة اااا.. سلام عليكو "
رمى جملته الغير متزنه و دخل جوه سابهم مكانهم مصدومين وعلى وشهم علامه الـ WTF؟!! بيبصوا لبعض مش فاهمين حاجة و رجعوا مسكوا في بعض تاني و أصواتهم تعالت في المكان كله..
🎬📺🎬📺📢
× بعد أول أربع سنين في الحكم ×
< يلا يا عيله مجابتش رااجججلل يا ##$&&#&# >
< ##&##&&#$$&&##
< $&#&#&&#$$& >
< #&#&#&$ شت!!!!! >
أصوات صياح و خناق مخترقة ازاز بلكونة اوضته، معكره نومه كالعادة فـ تقلب في نومه منزعجاً بشده
" ففففف، على الي عاوز ينام، على إلى عاوز يرتاح، كان يوم اسود يوم ما مسكت الحكم كان يوم اااعععع"
صاح بقهر و راح ناحيه البلكونة بإندفاع فتحها و طلع منها صاح فيهم بدون مقدمات
" في اييييه في ايه تاني في ايييه!! انتوا فاكرين نفسكم في الشارع علشان كل يوم تعملوا كده قصاد بلكونتي!!"
أحدهم
" مهو يا باشا، ده عاوز يشيل غطا البلاعة و أنا عاوز اعدي عربيتي علشان اروح شغلي يرضيك! "
أحدهم الاخر الي بيشتكيه
" وأنت يرضيك يا باشا معرفش اشوف شغلي يعني علشان هو عاوز يعدي عربيته، ما يعديها من الناحيه التانيه "
نامجون مسك اعصابه انه يصيح فيهم
" هي دي أقصى مشاكلكوا يعني صح! هو في حد مفهمكوا ان انا سباك!! انتوا عاوزين تجننوني!!! مش كده يعني مش أكده، مش كل يوم اقوم من نومي على صوتكم!! حاجة زباله اوف! "
رمى جملته و دخل سابهم فـ مسكوا في بعض تاني وماهي إلا لحظات و رجع تاني بعدها للبلكونة متنهداً فـ صمتوا مره اخرى منتظرين يسمعوا كلامه الي هيهديهم الي هو ذات نفسه مش عارف إيه هو اصلاً
" اااا انتوا عارفين ان كل واحد ليه واجبات و خزعبلات.. حقوق المواطن فوق الجميع و المفروض انه يتعامل معاها، و لازم بردو كل واحد يحترم راس الي جنبه علشان نعيش كلنا في سلام و هناء و.. سلام عليكو "
دخل تاني و سابهم يولعوا في بعض وهو قفل البلكونة و ولع التكيف و طفا النور حط سماعات كبيره في ودنه دخل سريره ينام بهدوء مالوش دعوه بالولعه الي بتحصل تحت..
📢📢📢📢
× بعد ست سنين من الحكم ×
" والآن مع السبق الصحفي المباشر على قناتنا فقط، نحن الآن أمام بلكونة الرئيس حيث خناقة جديدة من الشعب، وكان معكم المذيع ناشر السعادة و الأمل في الحياه، ابقوا معنا "
أنهى هوسوك المذيع حديثه الرزين بإبتسامه تشعّ بالبهجه والأمل المُفرط عكس الي بيحصل وراه تماماً من صياح وصراخ و ناس بتضرب بعض
التفت عن سماعه لصوت فتح البلكونة و خروج نامجون منها بملامح تحمل اقصى درجه من الازعاج فيها، تقدم بسرعه ساحب سلك المايك معاه
" وها هنا الأن قد استيقظ الرئيس مع صيحات الشعب المنتظرين لسماع نصيحه تفرّق من جبهاتهم، والآن مع كلمة من الرئيس.. "
أنهى جملته و وجه المايك ناحيه نامجون الي بييصله بفراغ و هو بيرمش ببراءة ثم قال
" إلهي يفرّقوا جبهاتك انت يا بعيد ، وبعدين عاوز افهم ايه التجمع ده كله ايه ده هو موقع تصوير فيلم تايتانك!! "
" لا حضرتك احنا عاملين سبق صحفي مباشر و حصري على قناتنا فقط للخناقة الجديدة الي تحت بلكونة حضرتك و منتظرين تصرفك الحكيم الباهر الي هيبهر الجميع في الي بيحصل أمامنا الآن "
" هو انا هفأ في البلد دي يا جماعه ولا ايه حد يرد عليا يعني فهموني ؟؟ ما تروح يا جدع انت و قناتك دي من وشي بقى! "
هوسوك اقترب بيمسح على بدلته مبسوط منها ولا كأنه لسه متهزق منه
" بس ايه رايك في البدلة شيك صح ، مأجرها من عند عبده كوخه و واخد شبشبي رهن لحد ما ارجعها ، قولي بقى احب اسمع أراء الآخرون و خصوصاً من رئيس الدوله "
بصله غير مصدق لأمره ثم مسكه من قفاه و اردف
" هو حد قالك ان انت منجّد يلا هاا؟؟ لا بجد قولي حد قالك ان انا منجّد يالي ينجّدوا وشك مع فرش العروسه! روح مشّي الناس دي كلها من هنا و امشي انت معاهم شخصياً!! "
همهم غير معطي اهتمام لآخر حديثه
" نصيحه كويسه لازم تاخد بيها، اكتب يا إبني - قرب منه متحدثاً بأمل - طب إيه رأيك في الجزمة شيك ها؟؟ سالفها من ابن جارتنا ولو شافني هينفخني"
مسح على وشه بقوه هيموت منه
" ياا ربننناااا - مسكته من هدومه مهدده بهسهسه - ولااااا غور يلا من وشي بدل ما اخلي وشك شبه مقطوره الجرار "
ابتلع ريقه بخوف من نظراته المخيفه اتجاهه فـ التفت الي الكاميرا متحدثاً ولا كأنه تحت تهديد السلاح
" والي هنا تنتهي نشرتنا لهذا اليوم، وكان معكم نادر سيف الدين من قناه الحقيقه للأخبار، شكراً "
🎬📺📢📢📺🎬
× بعد ثمان سنوات من الحكم ×
بيحمحم مستعد يخرج للحديث وشكله لسه صاحي من النوم
" احم احم، بسم الله الرحمن الرحيم، بصوا يا بني آدمين، من غير لف و دوران كتير، أحب ابشّركم بسنه سوداء، طين على دماغكوا كلكوا ، أن شاء الله السنادي هتكون متميزه بحاجات كتير ، من غلاء الأسعار و الضرايب الكتير، لو فاكرين نفسكوا هتصيّفوا السنادي فده هناك عند أم سامي الي بتشوي ذرة على أول الشارع مع بنتها هنادي
ولو حبيت هنادي و روحت اتقدملتها، مش هتلاحق! علشان هتلاقي العربية داستك انت وهنادي، الكهرباء غليت؟؟ معلش مهو مش انا الي ماسكلهم الوصله في الشركة و فاتح عندهم التكيف على طول
وإذا كنتوا فاكرين انكوا هتعرفوا تلموا المصاريف فده كان زمان دلوقتي زمن التخصيص، روحوا بقى اعملوا جمعيات و بردو مش هتعرفوا تلموا المصاريف الكتير، لأن ده كان زمان يا أعزائي المواطنين
وبالنسبه للرواتب فهي هتزيد؛ بس الضرايب هتاخد منها كتير ، و ميبتقاش غير البقشيش، هتقولي ليه ومش ليه، هقولك عذراً فهذا زمن التخصيص، والي عنده شامعه يروح يقيدها عند أم شمعة
وآخر حاجة أحب اختم بيها خطابي العريق الجميل ، هختمه بحكمه جميله راقيه رائعة بتقول : داري على شمعتك تأيد لتولع بيك، و السلام عليكم ورحمة الله وبركاته.. اقفل يا ابني "
🎬🕯️💡🕯️💡🕯️🎬
" لا لا لا، ثانيه ثانيه أنت هتطلع تقول كده بجد! "
سأله جيمين بصدمه القائم على التصوير لما نزل من على منبر الخطاب بتاعه فـ جاوبه بالنفي مباشرة
" لا طبعا أنت عبيط! أنت عاوز الدنيا تتقلب عليا ولا ايه؟! "
بصله بصمت و تمتم بخفوت
" مهي كده كده هتتقلب.. "
اتنهد واضعاً ايده على كتفه الاخر قائلاً بشيء من الحكمة
" بص يا إبني في حكمة بتقول : خد منها الي انت عاوزه من غير ما تقولها لأن يوم ما تعرف مش هتيجي تقولك اصلاً، قولي ليه؟ "
" ليه؟؟ "
" علشان هو فعلاً فات كتير والي جاي كتير فـ ليه نشغل نفسنا بالي فات خلينا نركز في الجديد الي لما هييجي هيشغلنا اكتر عن إلى فات و هنفضل قاعدين مستنيين الجديد إلى بردو هيتعبنا ويتعب أيامنا كتير "
_____
معلش انا عارفه ان آخر حته ممكن تكون قلبت جد شويه بس لقيت نفسي بكتب كده فـ سبته..
عموماً يارب يكون عجبكم و ضحكّم الي حد ما و استنوا الفصل الجديد قريباً بأحداث مشعلعله نار 🔥❤️