ماذا لو.. الحلقة العشرون
- السباعي في ليلة الامتحان -
---
× جونغكوك - في كليه آداب ×
بيخرج من تحت السفرة و في ايده الكتاب و على رأسه كتاب تاني وكأنه كان في معركة
"انا كده حفظت الإجابة، فاضل كده السؤال.. هو كان السؤال ايه بقى؟!!"
بعد نص ساعه..
بيخرج من تحت السفره تاني بأنتصار
" أخيراً حفظت كل الإجابات مش مصدق ياس ياس، اسمعهم بقى.. - بهتت ملامحه بصدمه - يانهار اسوح!! طب انا كده حفظت الاجوبة و أنا مش عارف اسئلتها! اعمل ايه؟! احفظ الاسئله طيب؟ لا ما انا كده هنسى الاجوبة بردو - بدأ يلطم على وشه و على رجله - انا كده هسقط يختاي يختاي يختاي يختاي "
~~
× تاي - في كلية تجارة ×
قاعد على السفرة و قدامه ورقة و في ايده قلم و معاه آله حاسبة و رابط دماغه بفوطة و جنبه كوبايه شاي ولا كأنه بيحضر دكتوراه فخرية..
" الامتحان من ٥٠ ، درجات الرأفة ٨.. يعني انا كده لو سبت السؤال الأول وده مؤكد، و سبت السؤال الثاني وده مؤكد بردو، وسبت السؤال الثالثه لانه اكيد هييجي صعب فـ هسييه.. طب انا كده هيتبقالي ايه؟؟ لا احنا نحسب من الاول احسن "
قطع الورقة الي قصاده و طلع ورقه جديده..
" طب نفترض اني جبت في السؤال الأول نص الدرجه و السؤال الثاني ربع الدرجه، والسؤال الثالث نص الدرجه ميضرش.. يبقى كده الرأفه هتتضاف على الثلاثه يبقى انا كده هعمل ايه.. هسقط "
" لا نعيد الحسبه تاني.."
قطع الورقة و سحب ورقه جديده..
" السؤال الأول هحل ثلاث اربعه و عليهم درجات الرأفة وعليهم درجتين على الخط و التسطير و هاخد خمس درجات على الخريطة أكيد.. همم يبقى المجموع كده يبقاااليي مممم.. "
ضرب على الآله الحاسبة بأيده بقوه على الأرقام ورا بعض و بعدها أشرقت ملامحه من النتيجه
" يبقالي ٣٧ درجه، ياااس انا كده هنجح وش.. بس لحظة انا في تجارة مش جغرافيا يعني مفيش خريطة.. انا كده هشيل بردو - صفع جبهته - شت! "
~~~
× جين - في كلية تربية ×
ماسك الكتاب و مأنتخ على السرير ولا كأن في مستقبل بيضيع
" ايه ده هو الكلام ده عندنا في المنهج هيهيهيهي.. اه و الله هو صحيح.. امال شكله غريب كده هيهيهيهيهيهي"
موبايله رن فـ رد على المتصل وهو على ذات وضعه و آثار الضحكه مش بتفارق وشه ما شاء الله
" ايوه يا عماد، ايه يا حبيبي، لا متقلقش خالص، الدنيا سهله و بسيطة و هنخرج من الامتحان رافعين راسنا يلاا، وعد اه، يلا روح كمل بقى، سلام "
قفل التليفون و حطه جمبه تاني و بدأ يضحك
" هيهيهي عبيط اوي الولا عماد ده و الله ، قال سهله قال اااه.. هو انا هذاكر ايه بقاااه.. هي المادة دي اسمها ايه اصلاً ؟؟ "
~~~
× جيمين - في كلية طب ×
شايل عشر كتب على قلبه راح ناحيه السفرة و رماهم عليها و هو اترمى فوقيهم بتعب وبدأ يعيط على حاله
" ايه كمية الكتب الي قصادي دي كلها؟؟ انا كان مالي ومال طب اصلاً ما كان زماني دخلت تجارة وعايش حياتي عادي، كان لازم اعمل فيها مجدي يعقوب المستقبل يعني!"
قعد يعد على صوابع ايده بقهر
" ست سنين طب، و سنه امتياز و سنتين تكليف، ده غير الخمس سنين الماجستير - بيلطم - يختاي يختاي يختاي يختاي يختاي.. آآآه ياا رباااي"
بدأ يصيح بصوت عالي مع البكاء
"ابنك هيسقط يااممااااا، عمّال اقول من اول السنه انا هعوض في الفاينل انا هعوض في الفاينل لحد ما الفاينل هو الي هيعوض عليا، يختااااااي.. آآآآه خبيني و صوتي يااامماااا اهيء اهيء اهيء اهيء "
~~~
× نامجون - في كليه حقوق ×
ماسك الورق و لازق في وشه بيقرأ فيها..
" عِلم الانستغرام.. قصدي عِلم الإجرام اااععع لامؤخذه.. يعني ايه بقى علم الاجرام ده؟؟.. آآآه ده علينا في المنهج و حفظ كمان.. امممم.. كام سطر بقى على كده؟؟ واحد اثنين ثلاث.. ٨ سطور؟!! لاا ده حفظ كتير عليا.. انا هشتغل عملي "
رمى الورق بعيد عنه و لف حوالين كنافه ملايه أمه و رفع ايده زي هتلر
" يا سيادة القاضي، نحن نتحدث الآن في قضية مهمه للغاية ، لا أم توفيق ، ولا ابو توفيق ولا ابو اخت عم أم توفيق، ولا البنت الي مصاحبها توفيق في الفصل و فاتح دماغها، سرق كيس الشيبسي بالخل و الملح من الدكه بتاعتها علشان كان جعان، فقال المدرس لذلك الموقف واقفاً : إلى عنده معزه يربطها..، فما دخل هذه المعزه بكيس الشيبسي؟؟! "
~~~
× يونغي - في كلية صيدلة ×
ماسك الكتاب في وشه بجمود بقاله اكتر من ثلاث ساعات فاتح نفس الصفحه..
" أنا مش فاهم حاجة.. ندخل في العملي احسن "
قفل الكتاب و ركنه، شمّر كمامه و لبس نظارة و طلع قلم و ورقه من تحت حطها قصاده بدأ يقرأ منها
" كيس الچيل بجنية، البامبرز ب ٩٠ جنية، انتوسيد ب ٢٠ جنية، كتافلان ب ٤٠ جنية.. طب لو واحد معووش فكه؟؟ لو واحد معووش فكه نديله أسبرين بدالها "
حط ايده على الورقة بيخبيها كأنه بيسمع
" يبقى تاني نعيد من اول، كيس الچيل بجنية، انتيبايوتيك ب ٥٤ جنية ، و عند افتتاح الصيدلية هيبقى في خصومات تصل الي ٩٠ جنية شهرياً، طب والله عرض حلو.. خلينا نكمل.. كيس چيل بجنية "
~~~
× هوسوك - في كلية علوم ×
ماسك الكتاب بيقلب في صفحاته وكل صفحه يقف عندها يقعد يضحك بقوه كأنه شاف نكته السنه و يقلب الي بعدها، مسك ورقة كانت في الكتاب و بصها وقعد يضحك بردو
" هه ه هه ه هه هه.. ايه ده دي بالشقلوب ههه هه ، امال ليه شكلها واقعي ، ههه ههه هه هه، الدرس ده بقى مسخرة هههه هيهي هو هو هاها ههه ههه هه "
بدأ يضحك تاني بشكل متواصل وفجأه بدأ بعيط بنفس قوه الضحك الي كانت عنده، و راح رامي الكتاب بعيد عنه وبدأ يصيح و ينوح
" عاااااا انا فاشل انا مش نافع، خرجيني من التعليم ياما و هاتيلي مكروباص، مهو مش معقول عمال اذاكر كل السنين دي وفي الاخر انا عارف آخرتي اني هشتغل على ميكروباص اه و الله ميكروباص و هبقى تبّاع ياما، مهو مش بعد كل المذاكره دي و بردو مش فاهم حاجة!! انا مش فاهم اي حاجة!! خرجيني من التعليم يامااا ارجوكي خرجيني منه قبل ما هو يخرجني منه على قبري على طول هتجلط و الله هتجلط انتي ترضي ابنك بتجلط؟!! "
رمى نفسه على الكتاب بنواح
" عاااااا اهيء اهيء مكروباااص ياامااا اااععع "
________
- ماذا لو.. السباعي في ليلة الإمتحان -
اتمنى يكون عجبكم، انا عارفه اني اتأخرت جامد في تنزيل الفصل الجديد بس دي تصبيره صغيره عبال ما ينزل الفصل الجديد ان شاء الله معلش أنا ظروفي متغيره بطريقه مش ماشيه على هوايا خالص ربنا يثبتني و يقدرني اني أعوض في القصص الي متأخره فيها بشده، شكراً لإنتظاركم ليا 🖤