الليله حلقة وحدة طويلة عشان دي 100
يعني الحلقتين في حلقة وحدة و يكون في توازن في العدد للحلقات الجايه ان شاءالله ♥️
#ندى_بتحكي :
لمن شفته ردة فعل مالك اخوي ، و عدم اكتراثو لي حشود الناس الحوليهو من مختلف الجنسيات و الشركات ، يعني شخصيات مهمة شديد بالنسبه لي واحد في مكانة مالك اخوي ، خصوصاً انه مُستجد في نصهم و كان مُلهم للاغلبيه منهم ، فا فكرة وجودو كانت مهمة من كل النواحي ، فا لمن شفت ردت فعلو ، وقتها لُمت نفسي و عرفت اني غلطت شديد بي حركتي المافيها ذرة مسؤلية ..
فا ما كان عندي اكتر من حل واحد وهو اني لازم انقذ الموقف بي اي طريقه !
لمن شفتو ساب كل حاجة و بقى ماشي ، و قتها ناديتو مرتينو بس ما وقف ..
لقيت نفسي طلعت المنصه و شلت المايك ، و انا ما عارفه حعمل شنو ، يعني بـرغم طبيعة شغلي في الايام الفاتو ديل الا اني لسه بعاني من رهبه الناس و اني اقيف في مكان كدا و الانظار علي ، فا خبطت خبطتين على المايك و قلت " احم "
عشان يقيف .. فا ضحكته " ردت فعل الناس كانت مخيفه بي انه كلهم شخصيات جادة كدا و اتجاها واحد ، حسيت اني زدت الطين بله ، بس ما سكته "
فا وقتها مالك وقف و حتى الطيب بعد قعد وقف و نوريان كانت قاعده !
مالك " اتلفت عاين لي بي حركة بي استغراب "
قلت ليهو : زعلته يعني ؟؟ مقلبتك ههههه عشان اشيل المايك ، و انت حكيت للناس دي كلها عن تجاربك و عن صحبك و نسيت اختك !!؟
" اظن وقتها شبه انه بدأ يتدارك حجم الموقف و رجع للمنصه "
مالك" طلع النضارة و دعك عيونو و رجع لبسها ، و رسم ابتسامة و حاوط ندى بي يدو ،و قرب على المايك الكان في يدها قال " ما اظن اختي خلت لي مجال لي اني اعرفكم بيها ، بس انا ما شايفه مجرد اخت وخلاص ، لا هي دنيتي و وحيدتي و رفيقتي ، ما عندي غيرها !
بس بالتصرف العملتو لي دا تاني ما بجيبها معاي يا جماعه فا المعذرة " ضحكو "
" مسك المايك و رجع لي تلقائيتو و حضورو المُلفت " طيب بما اننا كنا بنتكلم عن ادارة المشاريع ، فا اتوقع ندى اختي جزء من لقاء اليوم ! فا هي م مختلفه عني بي حاجة و حققت نجاح حلو شديد ، و جايز الاخوات الموجودات معانا اليوم يستفيدو من تجربتها ، بس اكيد في وقت اوسع ان شاءالله ، و نترك الفرصه للحضور ، سعيد جداً بي وجودي معاكم ..
{ برا الصالة }
" الطيب مربع يديهو و رايح جاي في الممر ، نور جات محصلاهو "
الطيب " بي ضيق و عتاب " : ليه عملتي كدا يا نور ؟
نور : عملت شنو انا ؟
الطيب : كيف يعني عملتي شنو ؟ ليه ما كلمتيني انه جاي المؤتمر ؟
نور : البعرفو انه ما كان جاي او الفهمتو انا لانه سلم شغلو كلو و قدم على اجازة ! و بعدين كفايه لحد هنا يا الطيب ، وين المشكلة لو اتلاقيت معاهو ؟؟
في النهاية دي حاجة حتحصل حتحصل اذا ما الليله بكرة و اذا ما بكرة بعده !!
الطيب : حنعيدو تاني ؟
نور : لا .. انا كنت بس بحاول انصح ما اكتر من كدا ، في النهايه دي حياتك و انت حر فيها و في قراراتك !
الطيب : نوريان !
نور : ما نوريان يا الطيب انا داخله !!
" مع لفتته كدا على بوابة الصالة كان مالك في وشها و بي وراهو ندى "
" نوريان اتلفتت على الطيب . و رجعت عاينت لي مالك "
" الطيب قبل منهم و مسح راسو بي يدينه "
نور : ندى كيفك حبيبي " مطبطبع عليها بي ابتسامه عاديه ، مالك .. كيفك .."
مالك " بيعاين لي الطيب " : انا بخير شكراً .. يلا يا ندى " متحركين ، لمن جا ماشي بي جمب الطيب ، وقف من غير ما يعاين ليهو ، و قاليهو "
كل الفكرة المهمة انك تكون بخير م تقلق لاني ما عايز اكتر من كدا .." و مشى "
نور : حصلهم اتكلم معاهم منتظر شنو انت ؟؟
الطيب : و ما حابي اتكلم مع زول انا !
نور : اوكيه ! خليك كدا اذن ...
#جانب_مالك_ندى
" مالك في العربيه و بيعاين لي ندى الواقفه ليهو برا ، مربعه يدينها و بتعاين ليهو ، فا قرر ينزل ليها "
** في شنو ؟؟
ندى : حتمشي كداا ؟
** اعمل شنو يا ندى ؟
ندى : يعني ليك شهور بتهاتي بيهو و شايل همو و محمل نفسك زنبو ، عشان في النهاية تسكت منو و تمشي ؟
** يعني انتي م شايفه انه كان بيحاول يتفاداني ؟؟؟
ندى : طبيعي لانك غلطت في حقو يا مالك ! هسي قبل دقايق كنت بتتكلم عنه قدام الناس و بتمدح فيهو ! و لااااا ..... " بي تركيز بتعاين ليهو " ولات عشان لقيتو مع نور ؟؟؟
مالك : ندى ! جملتك دي ضايقتني شديد ! عشان لا نور و لا عشرة منها ..." سكت " م تخليني اغلط في بت الناس من ورا كلامك !!!
** تلفونو رن في جيبو **
مالك " طلعو و رد "
#ملخص المكالمة :
( طلعت يعني ؟؟ فعلاً ما اخدت وقت ما عارف اشكرك كيف والله .. اي مافي حاجة تأخرني تاني ، اقطع لينا بكرة و ححول ليك انا بعد شويه و لو في حاجة ناقصة رسل لي التفاصيل على الواتساب او الايميل ..... اوكي شكراً ..."نزل التلفون مع صوت الطيب و هو بيقول ) :
الطيب : السلام عليكم !
" ندى متلفته عليهو " : و عليكم السلام الطيب كيفك ؟
مالك : و عليكم السلام حبيبي كيفك !
الطيب : الحمدلله بخير .. " ماسك يديهو و متردد " معليش اتلاقينا بطريقه ما ظريفه و ... "سكت"
ندى : مالك .. انا عندي ايميلات مفروض ارسلها و ارد عليها اسي ، فا حا اقعد في العربيه ، و ممكن تمشو تكملو كلامكم في الكافيه اللطيف دا ، و بالمرة شوف لينا لو عندهم. عشا ظريف كدا جعانه والله ... يلااا .. عن ازنك يا الطيب !
#جانب_سلوان :
{ مكملة مكالمتها }
سلوان : المهم ، ما حابة ادخل جواك طاقه سلبيه بس بختم ليك كلامي بي انه البمر بيهو دا جايز يكون فترة و حتعدي ههههه رغم ان الفترة طالت بس زي ما بيقول لي مدثر اخوي ، جايز تكون استراحة محارب !
حسن : طيب ما قصدي اتدخل في خصوصيات بس سوالي دا بصورة عامة و ردي لي بي صورة عامة برضو ! عندك ظروف في البيت مؤثرة عليكي ؟؟؟؟
سلوان : لالالا ابداً الحمدلله ، بس يمكن يكون غياب اخوي شوية مؤثر علي لأنه دايماً اليد البتشد علي !
بس هانت كلها ايام و يرجع لينا ان شاءالله !
حسن : ان شاءالله .. قبل اقفل حابي اقول ليكي انك انسانه عظيمة شديد رغم التوافق الكان بينا و مازال بعني بصراحه لاني لسه ما هاضمك " احم " و انه شايف ليكي مستقبل نير ، بس يمكن انتي ناقصاكي الاهداف ، م محددة هدفك رغم انك بتملكي القدرة بس م عندك دافع !
مكانتك دي و موهبتك دي كتار جداً بيتمنوها ، بس انتي لسه ما حاسه بي قيمة موهبتك دي ، حتى لمن كنتي بتتمدحي من الناس م كانت بتظهر عليكي ملامح الفرح ، طبع الانسان لو عمل حاجة بسيطه شديد و اتمدح فيها بيفرح !!
فااا ارجوكي كوني انانية شديد انانيه جداً في هدفك و في موهبتك و طوري نفسك و استغلي الفُرص ، شوفي الليله زنوبيا وصل وين من وراكي بعد رب العالمين ..
سلوان : انا لسه واقفه في حتة انك لسه ما هاضمني دي ! اسي المتناقض منو فينا ؟ طيب بتنصحني ليه ؟
حسن : انا بحب اشوف الناس ناجحه ! و بنصحك بي حق الزمالة و الخوة ! اي نعم بقيتي مسكينه كدا لكن م ليكي امان ! صراحه يعني !
سلوان : " نص ضحكة " طيب حعمل بي كلامك ان شاءالله !
حسن : اها شفتي اسي لو كنتي سلوان الشريرة كان سمعتيني كلام لمن راسي يسخن ههه بس كان جينا للجد انا ما بتقبلك عشان عندي عقدة من اسمك في حد زاتو !
سلوان : اسمي انا ؟
حسن : اااي ، اسمك زي اسم مرتي او طليقتي ! الله يصلح حالها !
سلوان : بالله انت متزوج يا استاذ حسن ؟
حسن : ليه و انا صغير يا انسة ؟ 38 سنة الفي عمري دا متزوجين اربعه عديل !
سلوان : م ظاهر عليك العمر كله يارب .. يلا انت وصلت البيت فا حا استاذنك وشكراً ليك !
حسن : اوكي حافظك الله #قفل !
سلوان : " داخله البيت و قافله الباب وراها .. "
النخيل : جيتي ؟
سلوان : ايوة .. كيفك و كيف قيلتي ؟
النخيل : حمدلله
** رقية بقت كيف اسي ؟
__ لا الحمدلله كنا وين وبقينا وين حمدلله .. غايتو مدثر وكت يسألني منها بقوليهو كويسه !
** عادي هو عارف مرحلة التسنين و اسي اتجاوزتها خلاص حمدلله ..
__ حمدلله .. اسمعيني ! اضربي لي سهام !
** اصلاً كنت دايرة اكلمها بس مالك في شنو ؟
__ بتونسني وحاة الله و تفرق علي ! كان تجي تقعد معاي !
** كنت حقوليها كدا والله قطعت راسنا من الوقت داك بس مفكرة اخلي الشغل و اقعد معاك انا !
__ شغلك ؟ ليه ؟
** ما عارفه ! بس تعبتي انتي مع رقية يا يمة ارتاحي شويه !
__ لالالا شغلك ما تخليهو الناس ديل بقدروك يا بتي ما تخسريهم ! و بعدين ارجعي كدا زي زمان يا بتي ساعديهم و ادعميهم شان ما يقولو راسها كبر عشان ساعدتنا ! طول ما في يدك خير اوعي تبخلي بيهو سامعه كلامي دا ؟؟
** ادعي لي ... ادعي لي كتيرررر " ضمت نفسها عليها "
__ " بتبوس في راسها " بدعي ليك اتي واخوك ، عندي منو انا غيركم يا بتي !
** " بتبوس في يدها " الله يعجل حياتنا عامرة بيك يارب و م نفقد حسك ولا قولة اسمك يا رب ...
#ندى
" مكالمة "
ندى : ايوة يا زوبا لقيت منك مكالمات ! حاصل شنو ؟
__ انا اتواصلت مع ادارة المول و قالو دايرين تاريج للتسليم ، هما عندهم تسليم فوري ، لانهم متأخرين على طابقين فا كل شي جاهز بالنشأة الحرارية !
ندى: واو حبيت الفكرة ! طيب طيب اممممم خليهم يبدو على طول حناخد الطابقين العندهم بس لازم يكونو فوق بعض مباشرتاً ! و في خلال الاسبوع دا نستلم لانه بي كلامك دا م حياخدو زمن و جاهزين فل ..
__ اي اول و تاني !
خلاص تمام .. و قالو ندفع 60% قسط اول !
ندى : حولت ليكي انا ، ادفعي طوالي و 40% عند الاستلام ..
__ كدا يبقى تمام .. في انتظارك توصلي بالسلامة استاذة ندى !
ندى : الله يسلمك يا عمري و م يحرمني منك يا زوبا لو عايزة حاجة من هنا كلميني !
__ عايزة سلامتك ..
" ندى قفلت و نزلت الكافيه ، على الطيب و مالك "
" كانو قاعدين على الطاوله و كل واحد ساكت "
ندى : بسم الله ! " جرت الكرسي و قعدت " مالكم ساكتين ؟ عندهم اكل ؟
الطيب : شايف عندهم حلويات خفايف فطاير و حاجات !
ندى : وااي اشتهيت حلويات زنوبيا الفي شارع الستين .. الله يرجعني السودان .
الطيب " اتعدل و كح كح كح ، ابتسم و قبل وشو "
ندى " مدت ليهو مويه " : مالك !! شنو سا كت كدا انتو كدا حتجيروني انا اتكلم !
الحاصل بينك دا مش ياهو بي سببي انا و لا حاجة تانيه ؟؟؟
الطيب " اتوتر و نطط عيونو "
ندى : لو دا سببكم اظن اسي بقى م ليهو وجود " بتأشر على يد الطيب محل الدبله " الطيب اتزوج نور في الفترة دي !! يعني انتو حاليا ماسكين في موضوع قديم ! و البتعملو فيهو دا م صح و الطيب في مكانتك يا مالك !
"الطيب بي عدم استيعاب منعدل في قعدتو " : لالالالا انا ما اتزوجتة ! و لا حتى خطبته ! و دي ما دبلة فضه دا خاتم رخام منحوت جاني هديه من صديقي في المكتب .. و نور اختي و صديقتي ومجرد زوله دعمتني في فترة صعبه !
ندى : اهااا " بي توتر صلحت طرحتا "
المهم دا ما سبب للحاصل !
مالك :عارف حجم غلطي تماماً .. بس الخوة ما هانت علي ، و لو حتهون علي كانت هانت على عزالدين قبلك ، حتى في اسوء الاوقات كنت و م زلت محتفظ بي خوتنا و #مقاطعو !
الطيب : الحصل حصل و انتهى ، مافي داعي نتكلم فيهو .. و الخلاك ما تسمعني في وقتها ، اكيد ما حيخليني اتكلم الليله بعد تلاته و لا اربعه شهور و ابرر موقفي و اقول اانا و انا و انا زي الشافع الصغير !!
خوتنا زي م هي بس تقدر تقول ختيت حد لي حاجات كتيرة و الطيب القدامك دا م ياهو زاتو الطيب البتعرفو !!
اديتكم كتير كان انت و لا عزو و حاولت كتير اني اكون صديق و اخ كويس رغم تصرفات كتيرة غلط حصلت مني وانا عارف انها غلط و رغم ذلك عملتها .. كل العملتو ما من باب الزعل ، ابداً من باب اني عرفت حدودي و حبيت اقعد مع نفسي ..
و قدامك انا هسي بقول لي ندى اختك، اني اسف ، اسف ما عشان انا غلطته لا .. اسف عشان انت زعلته لان الحب ما غلط ، و ما حصل اتماديت عليها ولا حتى لمحت ليها و لا حسستها بي حاجة من قبل وفاة والدتكم ، احتفظت بالحاجة دي لي نفسي ، ما عارف وين الغلط الخلاك تتعامل معاي كدا ، في حين ان قدامك التواريخ !
اول مذكرة كتبتها كان في اجازتي الرسلت ليهم معاي فيها حاجات ، ولمن رجعت عطبرة كلمت امي عن اني لقيت البت الدايراها بس للاسف الوقت كان ضاغط و انتظرت للاجازة الجايه و حصل الحصل !!
كدا كل حاجة واضحة قدامك .. و ندى اختي زي م هي اختك بالضبطططط ...
" قام من الكرسي " انا مضطر امشي لاني قاعد في ابوظبي و لسه وراي مشوار و بكرة دوام ...
" ندى كانت في حالة جمود و عدم استيعاب ، لمن رجعت بي زاكرتها لي يوم جاهم الطيب و عرفت مصداقية كلاموو "
مالك " قام معاهو ": اديني رقمك !
الطيب : رقمك موجود عندي حا اكلمك ... اشوفكم على خير .. #طلع_فات ..
مالك : قومي خلينا نمشي .. بكرة ورانا سفر .، اطلبي في البيت اكلك العايزاهو ..
" مشت معاهو من سكات "
#تاني_يوم !
#الدخينات !
سهام : يمه هاااا " انا مااااشه ..
التايه : اصُبري انلبس توبي دا نقدمك اابت هاه !
"جارة توبا من العقريب ولاحقه سهام "
سهام :سمح امُرقي حارساك تحت الشدرة دي !
التايه : عاد انا اليطراني منو يا يمة ، ضربو ليك مخصوص ااسهام ! كويس يا النخيل ، اعتي سهام دي ما عندها ام يضربو ليها !
سهام : يمة امرقي ، ضاحة فوق شنو اتي تكلمي في رويحتك !
التايه : جيت جيت ... امشاكي !
سهام : سمح .. " فجاة وقفت و رجعت ورا التايه بتتاوق " يمه ! دا مش ياهو عمي جبارة الله و لا انا عيوني ديل مطششات ؟؟
التايه : ها بت هااا .. امشي ساي ، و يعني شنو اكان عمك جبارة الله ، خلي اليفتح خشمو دا الليله الله قال بي قولو !هي اكان النخيل وقفتليو ، انااااا " خبطت صدرها بي كف يدها " انااا التايه بت ألو سقرة قالوك بغلبني !! هيييييكااااا ... انجري قدامي ..
#جانب_اريج :
" طالعه من باب بيتهم "
امها : اريج !!
اريج : ايوا ... انتي حجة فاطنة دي ما قاعده مالها بي صبارتا ، كنت دايرة لي اسكريم ياخ !
امها : ياهو دا الدايره اقولو ليك !
اريج : " بتدخل قروشا في الشنطة " قولي لي ؟
امها : شفتي الداندرما حقتا العاملة ضجة في الحلة بالشهور دي !
اريج : امي كملي كلامك كلو حتأخر كدا !
امها : دايرة اقوليكي لمن مشيت سألتها من الوصفات البتعملهم في الداندرما ، طلعت صحبتك سلوان الورتهم ليها !!
اريج : بي خلللعه !! سلواااان !!!!!
امها : اي والله تشيل و تدعي ليها ، هسي ماشاءالله ربنا وسعا عليها بقت تقعد في السوق بي خمسه صبارات ماشاءالله .. المهم سلوان لشنو قطعت رجلها مننا يا اريج ؟؟
اريج : امي ، انا اتاخرته ... بعدين نتكلم .... سلااااام ..
#ندى :
#مكالمة :
__ايوا يا مالك ...
** قطعنا الليله الساعه 6
__ طيب معناتو حا انزل اجيب حاجات من تخت و اجهز شنطتي !
** طيب .. سلام !
#جانب_عزالدين :
" ماسك تلفونو بيتونس مع تسنيم في قروب الاخوان ، بس تسنيم بقت م بترد ، طلع من دردشة القروب ، لمح هاجر خاته صورة بروفايل سوداء مكتوب فيها انا لله و انا اليه راجعون .. طوالي رسل ليها " :
[ هاجر البركة فيكم و عظم الله اجركم .. المات ليكم منو ؟؟؟ ]
" بعد 12 دقيقه ، ردت "
[ اللهم امين ، خالتي ]
رد :
[ ربنا يصبركم ]
ردت :
[ امين ]
رد :
[ كويسه انتي ؟ ]
ردت :
[ اي الحمدلله ]
رد :
[ فارشين صح ؟ ]
ردت :
[ في البيت الكبير فارشين ، جيت البيت قبل شويه ]
رد :
[ طيب اخدي راحتك يلا ]
ردت :
[ خليك ، لو م عندك حاجة ]
رد :
[ما عندي حاجة كنت بشرف على تنفيذ تصميم لي عميل طالب مخطط معين فا واقف عليهم كنته و اسي سايبهم يشتغلو ]
ردت :
[ ربنا يوفقك يا رب يعني ما محتاج تقيف معاهم ]
رد :
[ لالالا كل شي قدامهم م محتاج ]
ردت :
[ طيب حمدلله ...طبعا امبارح امور طلاقي اتيسرت حمدلله ، ربنا يكتب لي خيرو ]
رد :
[ معليش .. اعتبريها بدايتك و زي ما قلت ليكي قبل كدا .. اشتغلي و ابني نفسك ، الحب دا ما الا للاشخاص ، حبي حياتك زاتا ]
ردت :
[ م ظنيت انك م مقتنع بي حب الاشخاص لان واضح انك حبيت سلوان شديد .. فا بتقول كدا على ياتو اساس ]
رد :
[ حبيتا ما اختلفنا بس كمان حبيت حياتي اكتر ]
ردت :
[ ليه كرهتك كدا هي ؟ اوو معليش والله رجعت اسأل تاني بس معليش انجرفت في الكلام ]
رد :
[ لا حا اجاوبك ]
[ هي حُرة في النهايه العلاقات اخلاق ، انا كمان على قدر ما حبيتا على قدر ما اني ما قادر احس بي حاجة تجاها حالياً ولا حتى الكراهيه ، رغم انا الغلطت في حقها و اذيتها بس كمان هي اذتني ،، و حسستني اني ما اسوى حاجة و حكت علي و ما ادتني فرصه اتكلم عن نفسي و اقول اسبابي .. ما كرهتها بس ندمت اني حبيتا ، و جايز لو شفتها قدامي حاجات جواي ممكن تتحرك بس بطلت احبها ، و زي ما قلت ليكي بتكرهني و لا بتحبني بالجد ما بيفرق معاي .. و البيقسى يا هاجر بيعلمك تقسى .. ] !
ردت :
[ م عارفه اقوليك شنو بس شنو الغلط حقك ؟ ]
رد :
[ م وريتا اني متزوج ]
[ هاجر انا مضطر اقفل شايف العمال ديل جايطين في حاجة .. حا اشوفهم ]
#المطار :
ندى : ماشاءالله ما اتاخرنا !
مالك : اي .. اطلعي
ندى : سلم الطيارة دا عالي و لا بتخيل انا ؟
مالك : لا عالي فعلاً ..
ندى : تعال بتعاين وين انت .. محلنا هناا !
مالك : والله ولا شايف ! " بيرفع في شنطة في الرف "
انتي جاهزة حاجاتك ؟ زوزوا ولا اسمها شنو دي مجهزة ليك كل شي ؟؟
ندى : اي زوبا قصدك هه .. " ماسكة الايباد " عاين دا الكولكشن الجديد ، حينطلق من السعوديه !
مالك : ماشاءالله ، لكن عبايات ملونه ؟
ندى : اي الموضه ، حبيت اغير في المجموعة التانيه دي و مقلقه بس نقول يا رب ، رغم اني ما حابه ارتبط بالسعودية كتير و حتى مترددة في العقودات في حال اتقدم لي !
مالك : بتتسهل م تشيلي هم ! سألتك عشان انا مفروض من بكرة طوالي امشي على جدة بالاسح كان مفروض اقطع على جده بس قطعت على الرياض عشانك !
ندى : على فكرة ما براي انا يا مالك معاي تيم كامل ، ما كلمتني ليه من بدري ؟؟ وااصلا انا مجرد ما اصل م حكون فاضيه تاني ! يعني جيتك دي م ليها اي فايده !
مالك : مامشكلة محتاج اراجع الموقع ما بحب اي تصميم لي يتعمل بي صورة ما سليمة ! فا بتتسهل م تشيلي هم !
ندى : ان شاءالله ... الطيب اتصل عليك ؟
مالك : لا
ندى : " متأثرة " اممممم
#جانب_الطيب !
#كافيه :
الطيب : يا استاذة !! اتاخرته عليكي صح ؟؟
نور : لالا قاعده متونسه م اتاخرت و اصلا عارفاك م بتخلص بدري !
الطيب : طيب كيفك ؟؟ و جيتي المشوار دا كلو ليه ؟
نور : كويسه حمدلله ، عادي م مشوار شديد !
الطيب : طيب !
نور : الخصل شنو مع مالك و حبيبة القلب ؟
الطيب : حبيبة القلب طلعت عارفه ! هه
نور : انا ما عارفه لكن الحاصل دا تخلف ، وحدة مطلقه وين المشكله في انك تحبها ؟؟
الطيب : انحنا الرجال الموضوع دا عندنا حار كلمتك قبل كدا و بعدين دا صحبي ما اي زول !
نور : قلتها ليك قبل كدا ! انحنا ضحايا الحب من طرف واااحد .. و دا الجمع بينا و كون صداقتنا !! فا حاول طالما بتحبها لليوم و لي بكرة حا اقوليك ضيعتها مرة !! ما تضيعا مرة تانيه !! كفايه حرقة قلب ..
الطيب : ايييييك يا نوريان لسه انتي ؟
نور : ايوا لسه ! لا عيب لا حرام .. تخلف و بس م ليها فهم تاني ، و مالك زاتو اكتر واحد متخلف و همجي و م عندو اي فهم بدايتاً من العملو معاك !!!
بتعاين لي مالك اسي ؟؟
الطيب : ههههه بتضحكيني لمن بتكوني متعصبه كدا ، و بعدين انت زاتك بتعايني لي وين المشكله .. ارح ارح خلينا نطلب لينا حاجة !
#زنوبيا :
" سلوان قاعده في الجهاز "
" فتحت شنطتا عشان تطلع الشاحن و فجاة هبشت الكيس ... طلعتو و كملت الما قدرت تكملو امبارح .. "
اريج مقاطعاها : ازيك يا فنانه ؟
سلوان " ماسكة لسه بتفتح ف الكيس و ما مهتمه لي وجودها ، لمن طلعت قُرص "
اريج : CD
سلوان : اهلا اريج .. حمدلله وانتي ؟
اريج : حمدلله " تاكيه و خاته يديها في حنكها " بتعرفي حجة فاطنه من وين انتي ؟
سلوان : " بتقلب في السي دي محتارة ، لمن ركبتو على الجهاز ". م عرفتها !
اريج : ست الاسكريم الجمبنا !!
سلوان : " م سمعتها بسبب تركيزي ... و بقيت مركزة في الشاشه الشغاله قدامي بسبب محتوى السي دي ،، و شهقته لمن وقفته على حيلي و خاته يديني الاتنين على خشمي "
لا لا لا لا ....... ما معقول !!!
تاني يوم في KSA
#مكالمة :
ندى " بتفطر " : لالالا دي شريحة مالك يا زوبا انا لسه ما جبته !
__ طيب شريحتك معاي !
ندى : م انحرم يارب ، عايني تعالي لي اتونسي معاي !
__ اتونس !! و الشغل ؟ والمواعيد ؟
ندى : انتي حددتيها الليله طوالي !! عامله حسابي بكرة عشان المساء حا امشي الاتاليه اراجع التصاميم !
__ لالا بعد ساعه من اسي ! خليت ليكي رساله في الواتساب انا !
ندى : اي م عندي نت لسه .. اوففف مرهقه والله ما في طريقه تتأجل ؟
" مالك جا لابس قال " : انا حنزل الشركة محل كنت بشتغل .. بجي بعد الظهر ان شاءالله !
ندى : طيب ي زوبا خلاص تعالي سوقيني ، البقعدني براي شنو مالك طالع !
مالك : خليها ترسل الموقع حق المول عشان حا اجي عليكم بهناك !
ندى : سمعتيهو ؟
__ اي تمام بس نصل هناك برسلو ... يلا شويه و ا اوصلك ..
مالك : حا اتصل ليكي عند زوبا بعدين تمام .. يلااا !
ندى : اوكيه .. حا اقوم اجهز انا زاتي !
" بعد ساعه و نص "
" ندى و زوبا برا في الشارع تحت المبني "
ندى" مطلعه نضارة الشمس و رافعه راسها بتعاين " : في الصور احلا ، لكن موقعو ما بطال !
زوبا : اي فعلاً .. لكن شكلو رهيب شديد ..
ندى : طيب خلينا ندخل !!
" في زول استقبلهم "
{ دخلهم الطابق الاول }
ندى : داا شنووو ؟؟؟ دا اكيد لسه ما انتهى صح ؟؟
الموظف : لا انتهى الما انتهى الطابق العلوي !
زوبا " بتتلفت " : م زي ما اتوقعته بس كويس م بطال !
ندى : ما بطال !! انا مصدومة ؟؟؟؟ اسي الله بسالك دااا شبه الرسلتو ليكم ؟؟
الموظف : انا مرافق بس ما اكتر يا استاذه !
زوبا : ندى روقي !
ندى : لا ما بروق !! دي مهزله !! انتي ما شايفه ياخي حتى المساحة ما مزبوطه ؟ اسي دي تشيل شنو ؟؟؟ عاين انا الكلام دا م حينفع معاي ،، انحنا حنلغي الاتفاق دا ،، زوبا اتفاهمي معاهم الموضوع دا ينتهي ... #طلعت قعدت في العربيه !
زوبا محصلاها هي و الموظف : ندى ما حينفع !! الاتفاق اتفاق و انحنا دافعين نسبه ! من المبلغ م تنسي !!
ندى : يرجعو لي قروشي !!
زوبا : هما اشتغلو الشغل دا مخصوص لينا كدا خسارة ليهم ، انتظري لمن ينتهو !
ندى : لا ما لعب هو عشان العمل الشغل دا واضح جداً انه ما عنده اي خبرة و مستجد و شغلو كعب يا زوبا مستحيل انا اتم شغلي في المكان دا !! اتكلمي مع المسؤل و انهي القصه دي من فضلك !!
زوبا : طيب
" رجعت للموظف اتكلمت معاهو و جات راجعه "
زوبا : المسؤل حيجي بعد شويه !
ندى : منتظرة !! و لعلمك انا ما حا ادفع ال40% في شغل اصلا م بيتقال عليهو شغل !!! حييه انا كان مالك يجي يشوف المهزله الحاصله دي !!
زوبا : الموضوع صعب يا ندى !!
ندى : يبقى يشتغلو شغل كويس و حترم عشان ما يصعبوها علينا و عليهم !!
" صوت الموظف "
— لو سمحتي .. المسؤلين هنا اتفضلي !!
زوبا "مشت عليهم ":
الاستاذه ما حبت التصميم و في اغلاط ما اتقبلتها ما بيشبه التصميم الرسلواهو ليكم و حابه تلغي الاتفاق !
معاذ : الاستاذه اول مرة تتعامل في معاملات زي دي ؟ الخرطة حقت التصميم دي مخصوص اتنفذت ليكم ! خسارة لينا و خسارة ضخمة !
زوبا : بس هي مصممة يتلقي و ناخد نسبتنا !
معاذ : اسف والله الاتفاق اتفاق ! و حالياً مفروض نستلم القسط التاني !!
" ندى فتحت باب العربيه و جات نازله عليهم "
ندى " بي انفعال " : انا ما من حقي انتقد شغلكم لانه يمكن بالنسبه لي غيري كويس بس بالنسبه لي غير مقبول و انا ما اول مرة اتعامل معاملات زي دي و دا الموقع التالت اشتغل فيهو في دبي و عمان و اسي موقعكم دا .. و للاسف مافي مجال للنقاش في الموضوت و انا ما حا ادفع ال40%
مع احترامي ليك انا كدا بي اعتباري برمي قروشي في الواطة ...
معاذ : يا استاذة انتي كدا بتخسرينا !
انتي عارفه انك ماخدة اغلا طابقين في المبنى ؟؟؟
ندى : انتو المخسرين نفسكم بي شغلكم دا ، انا كلامي لحد هنا انتهى بلغ المسؤل عن المهزلة دي !! و هي بتقبل منو راجعه على العربيه لقت في وشها زول بيقول ليها :
{{: انا المسؤل عن المهزلة دي ! }}
" صدمة نظرات و عدم تصديق دخلت فيهم الاتنين "
ندى " بي تحدى " : و اظن كلامي وصلك يا .. مسؤل !! #اتخطتو ومشت !!!
.... يتبع ...
#استككانة ....
#سحر_سمير
#فاطمة_قسم_الله ...