#جانب_مالك
" قاعد و ماسك لابتبو "
ندى : مالك انت طوالي في حالتك دي ؟
** " نزل الشاشه و طلع نضارة الشاشة " احكي لي !
ندى : طوالي كدا ؟ ههه
** عندي زيك كم انا ؟ م وريتني ذوقي عجبك ؟
ندى : يا زول من بكرة حقشر بيهم للشغل هههه !
** شغل ! شغل شنو ؟
ندى : " بتشرب نسكافيه " اتعرفت بي وحدة صحبتي عسل شديد شديد يا مالك ، اسمها لبنى " متحمسه و بتحكي "
** انا اعمل بي سماحتا شنو ، خلينا ف الشغل !
ندى : اجي كيف يعني ! ا اكيد طبعاً لاني حجزتها ليك و حعرفك بيها منتهي من اسي !
** ياخي ؟
ندى : والله جد
** اللقاها منك و لا من خالتك ؟
ندى : مني طبعاً .. المهم لازم اعرفكم بي بعض حاساك حتحبها هه المهم ، زولة رهيبه شديد بتحب البزنس ... " صوت جرس الباب " ..
" صوت خالتي "
خليكم انا جمب الباب حفتح ... ( اهلا اهلا اتفضل )
" عزو جا داخل "
عزو : مساء الخيييير ، كيف امسيتو ؟ " بيعاين لي ندى القاعده جمب مالك في الكنبه "
مالك : حمدالله بخير يا حبيبي !
عزو : حمدالله !
خالتي : عايزة اعمل نسكافيه حعمل ليك معاي ، ديل بشربو لسه !
عزو : ياريت يا خالتي والله !
مالك : اها كملي كلامك ، و بعد رهيبه و سمحه عشان ما تعيديهك لي تاني و انا حافظك !
ندى : هاهاههههههههههه " ضحكت من قلبهاا " طيب طيب ههه
عزو : " انجذب شديد لي ضحكتها و كان بعاين ليها كأنها ما ندى .. "
ندى : " بتخت الكبايه " عندها اتاليه عبايات خليجيه و كدا و عايزاني اعرض ليها !
عزو : " ردة فعل " : تعرضي شنووو ؟
ندى : عبايات !
عزو : تعرضيهم وين ؟
ندى : كل شهر بينزل كولكشن جديد فا بيعملو زي عرض كدا على ناس معينه اللي هما بيشترو و يصدرو برا ، و مرات العكس !
عزو : فيهو تصوير ؟
ندى : ايوا
عزو : معليش ، انا ما موافق بدعمك في اي حاجة م عندي مشكله ، بس حاجة زي دي ما بقدر !
مالك : اممممم انا شايف انك م محتاجة للشغل دا او لي غيرو ، اطلبي و كان م جاك الدايراهو وقتها م حمنعك تشتغلي ، ما حا اعدد ليكي سلبيات الشغل دا يا ندى ، يعني تصوير و اجواء زي دي ، تتذكري الموقف الحصل وقت عرسك ؟ مجرد م شفت صورك انا غبت عن الوعي حرفياً !
قد يكون ما مرّ زمن على الحصل دا لكن انا اتغيرته ، و شايف ان مفروض اسمعك قبل ما افرض عليكي رأي او امد يدي زي م عملتا لاني لي يوم الليله ندمان عليها و بعض على يدي من الضيق البحس بيهو في لحظتا !
ندى : " مسكت يدو و باستها " و انا عافيه لي يدك و ليك ، انسى لان ندى القدامك دي رمت اي شي ورا ضهرها ، ما تضايق مني لان ما لي غيرك في الدنيا دي !
عزالدين قال : حسيت وقتها اني فعلاً ما بعرف اتعامل مع ندى ! " تلفوني رن رسايل من سلوان ، فا استأذنت منهم و طلعت الشارع اتصلت عليها "
مالك : " خت يدو على خدها " ما يحرمني منك يا رب .. اكمل ليكي كلامي ! اقري اسي ! و ملاحظ ليكي ي ندى و حاولت اتقاضى ما قدرته ، مهمشه راجلك ! و حتى ما بتعايني في وشو ، للدرجة دي !
مرات بحس بطنك طامة منو عديل ، و لا بتكرهيهو زاتو !
ندى : ما بكرهو و ما بحبو ، صدقني م حاسه بي حاجة تجاهو اصلاً ، قبل كنت بعصب ههه و بزعل و بتحمق و احنس و اعالج الغلط بي غلط اكبر هههه والله كل م اتذكر البعملو بحس اني كنت مراهقه في ثانويه !
مالك : بس الكلام دا كان قريب م بعيد !
ندى : وين المشكلة اسي قبل شويه بي لسانك انت قلت انك اتغيرته من الوقت داك لحد اسي ما بالمدة على فكرة بالرغبه بالتجربه !
#جانب_سلوان ..
لمن جيت فتحت واتسابي و شفت رسالة عزو ، قلت ليهو اتصل علي لو فاضي .. بعد 4 دقايق اتصل علي :
__ مشتاق ليكي !
** طوالي كدا ؟ دقيقه دقيقه ! دا رقمك السوداني !
__ هههه كان نفسي اشوف ردة الفعل دي في ملامحك البحبها دي ! سلوان انا ليه م عندي صورة ليكي ؟
** لا كدي دقيقه ! جيت متين ؟
__ الليله الظهر كدا !
** ههه مفاجاه حلوة شديد بالجد !
__ نفسي اجي واشوفك اسي دي ! حا اموت واشوفك يا سلوان بالجد !
** وانا كمان شديد شديد ..
__ بكرة لازم اشوفك !
** هههه ان شاءالله ، ضروري نتلاقى لسه بفكر في موضوعك القلته عايزني فيهو و في نفس الوقت حابه احكي ليك حاجات كتيرة حصلت معاي و #فجأة اتذكرته ! عزووووو !! انت صحي متين اتكلمت مع امي و ما وريتني ليه و الله اتحرجته كيف !
__ والله داير اكلمك بس راح من بالي ، قالت بيك شنو ؟
** طعنتني بيك بس ! جاتني رسايلك و صوت التلفون عالي ، قلت ليها بتكون اريج ، قالت لي و جايز يكون عزالدين برضو !
___ اههههههعهه امك دي عسسل ؟
** عسل ساي ! اااه عسل شديد بس لو تعرف عملت عشاني شنو الليله ، دايرة اطير بيها من شدة ما مبسوطة منها ! بس نتلاقى بحكي ليك !
— شوقتيني ، يا يوم بكرة م تسرع هه .. بحبك يا سُكرتي ، و نجمتي و بتي و حبيبتي !
** كلهم انا ؟
__ و اكتر منهم " سكت " دي شنو الصفارة العندك دي !
** شكلها رسالة من الشركة لانه دي م نغمة الواتساب ! لسه سامع صوتها ؟
__ لالا ، تلفونك دا امورو جايطه هههه
** هههه حمدلله ، خليك معاي " نزلت التلفون من اضاني وقت لمحته رساله من رقم دولي و بالتحديد 00966 " لمن نزلت الستارة لقيتا رساله نصية ، و الرساله طويله ! لمحت اسم عزالدين اتوترتا ! " ختيت التلفون في اضاني " الوو !
__ مشيتي وين يا روحي ؟
** انا مضطرة اقفل اسي سلام #قفلته !
__ ليه مالك فجأة كدا !!#الووو .. سلوان .. قفلت !
غريبه حاصل معاها شنو يا ربي فجاة كدا .. وقفت برا انتظرتها شويه قلت احتمال بعد تخلص ترجع لي ، لمن م رجعت خليت ليها رساله ، و #دخلته "بيت خالة ندى "
" في الصاله ندى و مالك مكملين كلامهم "
مالك " كان مستغرب فيها " :
صراحه مستغرب ! عارفه حالياً ما خايف عليكي لمن اخليكي بي ورااي ، ما بينخاف عليكي ! طيب و نتكلم جد شويه .. النيولوك و شعرك واللون والحلقان و الاكسسوارات ، بغض النظر عن الدبله الما لابساها ، ليه عملتي كدا ؟
ندى : عشان دي رغبتي يعني زي حلاقة شعرك ، دي دقنك المربيهو ، يعني ميول بس ، مجرد حاجة حبيت اعملها و عملتها و عاجباني جداً ، لاني اتعلمت اعيش لي نفسي و اسوي الفيهو راحتي و بس !
مالك : طيب بخصوص علاقتك بي عزو ! قررتي ؟ لسه على كلامك داك ؟ ما شايفه ان في حل تاني ؟
" وقتها عزو جا داخل "
ندى : طيب قبل اقوليك قراري ، نكون واضحين مع بعض تمام ؟ قرار طلاقي دا ممكن يأثر عليك ؟ من ناحية خططك الجايه دي ؟ هل حا ابقى عليك هم ؟
مالك : عمرك ما حتبقي هم علي فاهمه ولالا ! انتي قرري و الدايراهو انا حعملو ليكي م داير اكتر من راحتك ! و تكملة لي سؤالي القبل دا ، ما حسألك اذا بتطلعي بطرحتك ولالا ، لانه الاجابه حاسي بيها ،و ن تتوقعي اكورك واشاكلك و ادخل ليكي في الحلال والحرام عشان انتي م صغيرة و اثبتي لي كدا من شويه من خلال كلامك ! والله لو منتظرة مني امنعك م حمنعك عارفه ليه ؟ لان الممنوع مرغوب ، و عارف تماماً ان لو البت ختت حاجة في راسها بتسويها بتسويها بغض النظر عن الطريقه فا انا شايف انك تعمليها قدام عيني و اكون عارف احسن من امنعك و تعمليها من ورااي ، فا جربي و براكي حتعرفي و الطريق الحترتاحي فيهو حتكملي فيهو براكي ..
ندى : " ختت راسها في كتفو ، و بتمسح في دموعا " على فكرة مفروض نمشي لي ناس تسنيم و تقوى كمان كنا ماشين ليهم انا و خالتي و حصلت ظروف ، فا لازم نواجبهم لانو جونا هنا و فرحونا شديد والله !
عزو : خلصتو ونستكم " بي ابتسامة " !
مالك : رجعته متين انت من مكالمتك ؟
عزو : من اول كلام ندى عن قراراها ، هي شايفاني !
ندى : شوفتك ما حتأثر بي حاجة !
مالك : ندى" كتنبيه "
عزو : رغم ذلك ، انا بقولها ليكي قدام مالك اخوكي ، طلاق ما حا اطلقك دا بالنسبه لي قرارك .. و لو ممكن تقومي تخلينا نمشي !
ندى : بالله !!! هاهاههه سبحانك يا رب
مالك : ندى ، انا شايف انك تقومي تمشي معاهو و تتكلمو في بيتكم بي راحتكم ، اتعودي تسمعي القدامك زي م هو حيسمعك و لو بعدها لقيتي نفسك لسه على قرارك اتأكدي انه حا #يتم و بي افضل صورة زيو زي عرسك بالضبط ! اسمعي الكلام !
ندى : حااضر
#ندى_قالت:
م قمته عشان قراي مهزوز ااو مترددة ، او عشان عزو في حد زاتو ، لا انا قمت عشان خاطر مالك و م حبيت اكسر كلمتو قدام عزالدين ! و لبست عبايه على بجامتي و مشيت مع عزالدين !!
#تاني_يوم ..
#زنوبيا
محجوب : المحل عامل كدا ليه يا حسن ؟ معقوله ! مافي اي انتاج ولا في زول موجود من الاولاد ! حتى دخل مافي !
حسن : احم للاسف مافي ! و حتى عم اسماعيل قدم استقالتو و الباقين انت عارفهم ، مافي غير امجد البجي و اتصلت عليهم هو واريج وقفتهم لان المحل واقف و محمد طلع من يوم سلوان !
محجوب : اول مرة انتبه لي انك فاشل في الادارة .. عم اسماعيل البعرفو انا مستحيل يقدم استقالتو لانو عارفو كويس ، م بمنعو الا الشديد القوي !!
حسن : فاشل ؟؟؟. مقبوله منك ، بس اكيد ما حا اجبر الناس تشتغل بالقوة ! لحد ما القى بدائل ، و اكيد الشغل ما حيقيف عليهم !
محجوب : فعلاً الشغل ما حيقيف عليهم لانك واحد ما عندك عشرة و شايف الشغل عبارة عن مصدر دخل يجيك و خلاص ... " قعد في الكاشير و بفتش في الاداراج على الارقام "
حسن : داير شنو اطلعو ليك ؟
محجوب : داير رقم سلوان و لقيتو !
حسن : ليه الرقم انا شلته عنوانها من اريج ، بوديك لحد بابهم و بعدين هي رفضت الشغل تاني شنو !؟
محجوب : توديني لحد باب بيتهم ! ماشين لي واحد صحبك احنا ؟؟؟ دي شنو الاخلاق البقت عندك دي يا حسن ، دي بت ناس و في مقام بتي دي اللويه واحد ، عيب نمشي ليهم كدا من غير استئذان ... الله !!
حسن : " سكت "
#جانب_سلوان ..
" طق طق طق - الباب بيخبط "
يا نااااس ..افتحووو " ننويه دقي الباب دقي قولي ياااا خالتو سلوان افتحي الباب هاهاها " مع كلامها دا الباب فتح و رافعه يدها ف الهواا " !
اريج " بي احراج " : احمم مدثر كيفك ؟
مدثر : الحمدالله بخير - اتفضلي ، امي جوااا .. " زح ليها "
اريج : " هي بتدخل " يا خالتي ، وينك ؟
" جيت جيت جيت "
__ كنت في الزقاق بشر غيارات رقيه في الحبل!
اريج : " و هي بتسلم عليها " اجي و تغسليهم انتي لشنو سلوى وينا ؟
__ لي هسي ما صحت " واحلاتي دي بت منو "
اريج : اجي يا النوم ! والله الا كان م نصيحه .. ننويه سلمي على حبوبه قوليها تماااام انتي كويسه ، سلمي ما تبقي كعبه يا ماما .. شوفي الببويه !
__ ماشاءالله ربنا يحفظ ، فطرتي ؟
اريج : لالا جايه افطر مع النايمة جواا دي ! " بتعاين لي رقيه " ( شالته ) رقيه رقيه " بتهز فيها " مشتاقين يا حلوة ، حيي انا من ريحتك السمحه دي ، قولي لي . يا حالتو اريج قولي ماشاءالله ما تسحريني . ههههه
__ ريحة ابوها ، يتريح و يريحها معاهو ، قدر م اقول اخت ليها الصندليه ، يابا لي ههههههه " شافتوو واقف في الخزان " مالك انت الليله م مشيت لي هسي ؟
اريج " خجلت و غيرت الموضوع " نمشي نصحي عمتو يا روقا .. هااا
مدثر : الليله بطلع الظهر ! فطوركم لسه ؟
__ جاهز بس اختك تقوم ترمي القراصه !
اريج " ختت رقيه " : بي جاي المطبخ صح ؟
__ يا بت هاا اقعدي ! اسي بتقوم ما عوايدو تنوم لحد الساعه دي !
اريج : كلها قراصه حتكلفني شنو يعني ، ننوية اقعد جمب حبوبه ما تباريني كدا يا بتي !
__ بتك !!!
اريج " بي توتر اممم ا" : اي يا خالتي هه " دخلت المطبخ !
مدثر " جا " : " بسبسبسس " ننويه ؟ تعالي هههه " جاتو جاريه " شالها باسها ، ازيك ؟
__ مزاجها معاك انا سلام ساي ما سلمتو لي ههه " بي صوت هامس " دي بتها صحي صحي ؟
مدثر ". بي لوم " : وانا العرفني شنو يا امي ؟
*بعد30دقيقه *
اريج : شايله الصينيه ! " شافت ننويه بتلعب جمب مدثر البحضر التلفزيون "
__ تعبناك يا بتي !
اريج : م سويت شي والله .. حدخل اصحي البت دي !
" مشت الغرفه "
" ايييك نايمة نوم ولا مفكرة تصحى "
__ سلوااان .. سلوااان " بتهز في يدها "
** " زحت المخدة من وشها " اريج !!! كيفك ؟
__ كويسه لكن انتي مالك ؟
** م نايمة الليل كلو
__ ليه ؟
** " قامت قعدت " صداع بس !
__ متاكدة ؟
** " و هي بتنزل من السرير " ايوااا متاكدة !
__ تلفونك بيهز !
** " اتناولتو و رديت "
( ملخص المكالمة عم محجوب - و عايز يجي )
__ قومي عشان الفطور حيبرد ، عاد عملته قراصه رهيبه هههه
** اوووه ماشاءالله هههه طيب قايمة ! كويس انك جيتيني الليله ! شغل مافي ؟
__ ركود حاصل بعد عم اسماعيل استقال ، حسن اتصل لي و قال م نجي لانه في تحسينات ف المحل !
** عم اسماعيل !!! صح صح كلمني حسن ! بس غريبه ليه ! انا خا اقوم !
__ " في سرها " حاسه في حاجة حاصله معاكي و ما عايزة تحكي لي ، قلقتي بي ووالله ، ان شاءالله خير !
#سلوان_بتحكي :
طلعت من الحمام .. فطرنا و عملت ليهم الشاي ، و قلت لي مدثر .. ان عم محجوب دا قال داير يجي اسي ، قالي اهلا و سهلاً .. فعلاً قبل نخلص الشاي كانو وصلو .. مدثر ضايفهم في الصالون .. و لبست لي توب ومشينا عليهم انا و اريج ..
سلوان : حمدالله الشفناك طيب يا عم محجوب !
اريج : اي والله حمدالله على السلامة !
محجوب : الله يسلمكم يارب ..
مدثر : اتفضلو " ناولهم الشاي من الطرييزة "
محجوب : الله يبارك فيك يا رب .." اخد جغمة كدا " اممممم بالقرنفل يا سلااام ..
مدثر : بالعافيه هه
محجوب : " خت الكبايه من يده " سلوان ..
** اتفضل سامعاك !
محجوب : ازيك ؟
** حمدالله
محجوب : دايرك معانا من تاني في زنوبيا من غير مقدمات ، والحصل كلو عارفو من وليد و من حسن و .. الخ !
** ما حينفع والله يا عم محجوب مسؤلية الشف كبيرة علي ، انا على قدري .. و غير كدت حابه اقعد مع نفسي شويه !
محجوب : انا م قلت تمسكي شيف لكن !
** دا كلام حسن لي امبارح !
محجوب : " عاين لي حسن " اسماعيل م مشى بي ارادتو ولا شنو يا حسن ؟
** نفس الشي !
اريج : يا حليلو عم اسماعيل !
حسن : انا ما#قاطعو
محجوب : م حنتكلم هنا .. بعدين نتناقش فيهو ! سلوان حترجعي في حتتك زاتا و م داير اسمع اعذر و مرتبك حيترفع و غير الفوائد حقت المقترحات !
** على راسي كلامك بس مارة بي ظروف اسي و محتاجة وقت ! دا غير اني لو رجعته ، شرطي يرجع عم اسماعيل و محمد !
محجوب : متفقين ودا الكنت حعملو ،، شوفي حتكوني جاهزة متين ! و رقمي عندك .." قام "
مدثر : شنو يا استاذ اقغد بسم الله !
محجوب : الزمن الزمن والله مرة تانيه ، شكرا شكرا
مدثر : يديك العافيه ي رب !
" مجرد م طلعو انا جريت على الغرفه و اريج وراي "
اريج : في شنو يا سلوان خلعتيني ؟
سلوان : انا لازم اطلع اسي و ديل قعدو و الزمن فات ، عشان كدا قلت ليك جيتي في وقتك !
اريج : اخدي نفسك و براحه في شنو ؟؟؟
سلوان : حا اقابل عزو !
#فلاش_باك
#ليلة_امس ..
عزو : معاكي مفتاح ؟ عشان حجيب عشا و اطلع !
ندى : لالا تعال افتح لي !
عزو : " فتح ليها " اذا اتذكرتي حاجة كلميني
ندى : اوكي !!
#عزو_قال :
وقتها اتحججت بالعشا ، م حبيت اظهر اني م طبيعي قدام ندى و اصلاً كدا كداً الوضع بينا م تمام !
طول السكة و انا بحاول اتصل عليها ، و مانت بترد ، و حتى اخر اتصال في الواتساب من وقت اتكلمنا !!
م خليت رساله م كتبتها ليها تعبر عن قلقي ، لدرجة حاسي اني لو شفتها حشاكلها من شده ما قلقان ...
لمن لقيت الوقت بقى ماشي ، فا رجعت زي م مشيت ، شلت الحاجات و شلت وردة لي ندى ، و رجعت البيت .." فتحت الباب "
دخلت الغرفه لقيت ندى متكية و تتبسم في التلفون م عارف ليه انزعجته !
قلت ليها :
** العشا جبتو برا
__ تمام " م عاينت فيني حتى "
** احم هاكي " مديت ليها الوردة " !
__ شنو ! " مسكتها كدا بعد ختت التلفون من يدها هزتا كدا بي استغراب " دي شنو هه ؟
** شايفه شنو انتي يا ندى ؟
__ عشان م شايفه حاجة عشان كدا بسألك " مدتا لي " خليها ليك استنشق رحيقا الصباح " و رجعت مسكت التلفون "
** " شلتو من يدها و كفيتو على وشو في المرتبه " انا لسه بتكلم معاكي م خلصته كلامي عشان تمسكي تلفونك !
__ " قعدت ربعت في السرير " امم سامعاك " بي ابتسامة "
** " كنت متوقع تكورك و تعصب زي م بتعمل ، اتوترت لاني م مجهز كلام " شوفي ، انا عارف اني اتغابيت الفترة الفاتت بس لانه في مواقف حصلت منك م كانت كويسه و ما اتوقعتها منك و #قاطعتني !
__ الفات دا فات م عندي ليهو حاجة ، او يمكن في حاجة فعلاً ، مع اني م حابة اتكلم في الفات بس حا اقولو ، اي كذبته عليك بدل المرة كم مرة و في اخواتك وقتها انت كان معاك حق ، وانا كنت معميه بحماقه كدا ، فا انا اسفه ما عشان اصلح الحاصل لانه ما حيتصلح بالنسبه لي ، لا انا اسفه لي نفسي قبل ما اكون اسفه ليك ، اسفه ليك عشان كذبته في مواقف انحنا الاتنين عارفنها و انا بعترف بيها اسي عشان اقفل صفحتها نهائي لاني ما حابه اعاين وراي ، انا حالياً ما بشوف غير قدامي و بس ، و اسفه لي نفسي لاني اتبالدتا معاك و اتلايقتا فيك و عملت امور كتيرة ما ندمانه عليها لانو الندم ما حيغير حاجة بس اسفه لنفسي عليها ، و في النهايه علاقتي معاك كانت تجربه فاشله و دا ما عيب بالمناسبه ، بالعكس استفدت و وعيت و عاينت لي امور كميه انا كنت غافله عنها ، ممتنه لي علاقتنا دا اكتر احساس انا حاساهو حالياً ..
** " بقيت بعاين فيها مصدوم " انتي منو يا زوله ؟
__ هئ ممكن امسك تلفوني لو سمحته ؟
** لا ، طيب مش قلتي ما بتعايني غير قدامك ، اهو انا قدامك شوفيني ..
__ ما شايفاك للاسف يا عزالدين ، لاني كنت قدامك و م كنت شايفني ولحد اللحظه دي م شايفني !
** طيب ليه ما كنتي كدا من الاول ، ليه تخليني اااا .....** سكت !!
__ تمها .. " اتنهدت شديد " م مهمه .. حا اقوم اخت الاكل .. " جات نازله بي جمبي "
** " مسكتها جريتها علي " اقيفي !! ما حسيت الا بي انفاسها في وشي ! " م كنت قاصد كدا كان قصدي اوقفها " !
__ " دفرتني لي ورا منها " انت بتحاول تعمل شنو بالضبط ؟؟
** ما قصدت ! انتي ليه بقيتي كدا ؟؟
__ هه بقيت كيف هاااه " وهي بتقرب علي ، لمن بقيت قريبه شديد " بقيت كيف ؟ داير ندى دي انت صح ؟
** ندى !!!
__ يلا ندى دي ماااافي " و زحت مني " ، فاا يدك م تمدها علي تاني سواء بقصد او من غير قصد ، و على فكرة ، انا م جيت معاك عشانك ولا عشان متأمله في حاجة بينا " تؤ " ابداً وحاتك اخر همي ، جيت عشان مالك طلب كدا ، و م حبيت اكسر كلمتو قدام اياً كاااان .. فا الحيحصل كالاتي :
( اتناقشنا انا و ندى و وصلنا لي طريق مقفول )
ما تتأخر على العشا " و طلعت " ....
( مسكت راسي وقعدتا )
فعلاااااً الطلاق هو الحل .. يا ندى ..
#عزو_بيحكي
تاني يوم من الحصل - اللي هو الليله ..
صحيت ما لقيتا جمبي ، مسكت تلفوني لقيت رساله وحدة بس من سلوان مكتوب فيها :
[ حنتلاقى الساعه 5 ، ( العنوان ) ]
حسيت بي قلق ما عادي .. طلعته من الاوضه و سامع صوت ضحك ندى .. مشيت عليها لقيتا في المطبخ فاتحه الاسبيكر بتتونس مع وحدة و بتعمل في شاي ... شافتني قالت ليها دقيقه و عملت ميوت و قالت لي :
حتاكل اول ولا اكب ليك معاي عشان انا طالعه ..
** كبي معاكي .. انا كمان طالع ! م تطلبي ترحال ، انا بوصلك محل حتمشي ..
__ اوكي .. " فتحت الميوت " اها يا لبنى و بعدين الحصل شنو ما عرفها قلتي لي " هههههه "
" مشيت استحميت ، و شلت الشاي شربتو في الاوضه و بلبسس ، فتحت شنطة السفر ، طلعت كيسين ، وقتها جات لابسه من الغرفه التانيه و جات ترش في الريحه "
** الكيس دا حقك ، جبتو معاي من السعوديه !
__ بجد ! شكراً يا عزالدين
** " عاينت ليها من اسلوبها البارد، شلت الكيس التاني " طلعنا ؟
__ اي يلا انا جاهزة !
** ماشة كدا ! " اشر على شعرها "
__ حلو صح ؟
** عشان هو حلو غطيهو من فضلك !
__ سمعت كلام مالك امبارح صح ؟؟
** ايواا
__ يلا دا الفرق بينك وبينه " ابتسمت " حسبقك شكلو عندك تأخير !
** " حصلتها من سكات "
#اتحركنا
** العنوان ..
__ حرسل ليك اللوكيشن واتساب !
** عامله لي بلوك
__ ااا صح نسيت .. طيب حا اوصف ليك كمل عديل اصلا مسافه م بعيده .. " فتحت شنطتا ، طلعت محفظه الشنطة هبشت فيها و اف افت و بتقول مشى وين ، و دخلتو راجع " دا كيس منو البشبه كيسي دا ؟
** امانة ناس ماشي اوصلها !
__ اها تمام .. نزلني هنا بس .. " شالت حاجاتها و نزلت " شكراً عزوز ، انا برجع مع مالك بعدين ..
** " هزيت ليها راسي و اتحركته "
( مشيت محل اتفقنا نتلاقى انا و سلوان ، كان كافيه بسيط كدا في حديقه ، و الغريبه مجرد م دخلته لقيتها قاعده منتظراني ، مشيت عليها سرعه )
__سلوان !! مالك ما استعجلتيني وقت وصلتي ولا اتصلتي علي ؟ قاعده هنا من متين ؟
_**مالك ي روحي ، عادي يعني في النهايه مصيرك تجي " ابتسامة حلوة شديد "
__فصلتني ضحكتك دي والله ، ازيك " مد لي يده "
** يعني بقيت تصافح " طعن بالبارد لي يوم زنوبيا وقتاحرجني داااك "
__ ههه م حتنسيها لي شكلك ، كان ما العيبه كان بست يدك دي و اتأسفته ليكي ، بس والله كنت بهرب من حبي ليكي !
** اتفضل اقعد طيب !
__ " متررو تعال يا حبيبي ياخ دايرين نبل ريقنا ، عندكم شنو ، طيب شوف نجمتي دي عايزة شنو " اتمني يا ست الحسان ...
** اي حاجة ، ولا اقوليك انناس عشان نكسب زمن المماطلة دا بس !
__ جيب ليها احلا انناس عندكم و انا قهوة تقيله .. شكرااا حبيبي !! " بيعاين لي في عيوني و مبتسم " الله يقطع الغربه الحارماني من شوفتك دي ياخي ..
** ههه مبروك كمان على المشروع .
__ يباركوك لي يا نجمتي و ضو ايامي دي كلها ، يا حظي الحلو !
** مالك الليله ؟
__ مبسوط بيك بس .. ااه يا سلوان
** احكي ! م عارفه لكن ناس كميه ف الحته دي !
__ اممم " اتلفت " مالك و مال الناس انتي ، ركزي معاي هنا " خبط التربيزة " عامله عيونك السمحه دي !
** عزو ياخ بطل بتخجلني والله ! بجد متوترة !من الناس دي !
_" قام " تعالي ..
** على وين ؟
__ نقعد في العربيه ..
** طيب !
" فتح لي ، ركبنا "
** امممم يا سلاااام " بشم ، بي جرة نفس " ريحة عربيتك مبالغه ههه !
__ اممممم .. شكرااً
** كأنها ريحه حريمي ؟
__ لا ابداً ، م عارف صراحه م شامي كويس !
** طيب احكي
__ احكي شنو ؟
** م عارفه بس عايزاك تحكي ، حاسه عندك كلام مفروض اسمعو و لو قلت لي الموضوع كمان تكون م قصرته !
__ سلوان !!!!
** " هزيت راسي " نعم !
__ عيونك سمحه !
** يعني انا بقوليك احكي تقول تقول لي عيونك ! طيب م تعاين لي شديد كدا ياخي بتوترني !
__ لا بجد ، بتتكحلي بي سكر انتي ولا خلقة الله سمحين كدا !؟ و جادي في سؤالي على فكرة !
** مجنون ههه
__ مجنون بيك !
** عزو ، خليك جادي ، محتاجة اسمع موضوعك محتاجاك تكون جادي في اللحظه دي !
__ حاضر .. انا جادي حالياً ! بكرة عندك شنو ؟
** دخلت لي في موضوع تاني ، طيب بكرة معزومين حنة صاحب مدثر اخوي !
__ حننننة ! افف كرهتي و كرهت الراجل البتحنن في عرسو انا عرسي ما اتحننــتـ.....#قطعا !
** هههههههه الله يعرس ليك ياخ ..
__ قصدي عرس اسامه اخوي م اتحننته مع اصحابو " ضحكة مسيخه "
** حلوة بصراحه و بيها رونقا كدا ..المهم حرجع و اقوليك خلينا من الحنك و انا حابه اسمعك ..
__دايرة تسمعي شنو ؟ انا الداير اسمعك ، بالنسبه لقفلتك الغريبه ديك و م رجعتي لي و هسي رغم ابتساماتك دي لكن حاسي في حاجة ما تمام !
** امبارح مشيت القريه على فكرة والله ستر كانو حيعقدو لي على ولد عمي الا امي وقفت ليهم هه الله يديها العافيه !
__ نعم !!!!!!
** ما عارفه قدر م اقوليك احكي حابه اسمعك الموضوع بياخد منحنى تاني ! عزو احكي " ابتديت اتوتر و بضغط على اصابع يدي "
__ مالك انتي طيب ؟
** مافي بس احكي حابه اسمعك و قول موضوعك القلتو لي !
__ طيب طيب " بلع ريقو و عاين لي" عيونك مرقرقات ! في شنو ؟ طيب طيب عايزة تسمعي شنو ؟
** " عاينت ليهو في عيونو " حا اعيد ليك كم مرة يا عزالدين ؟؟؟ مالك اتخلعته كدا ؟
__ اول مرة تعايني لي جوا عيوني كدا !
** و هسي بعاين ليك و سمعني ! حتسألني اسمعك شنو ؟ حا اقوليك سمعني الدايرني اسمعو او الما بعرفو انا !!؟
__ " اعصابي باظت حسيت عندها شي معين في راسها دايرة تصل ليهو " سلوان ! انا بحبك واثقه من كدا صح ؟
** هههه مقدمات مقدمات ههه ، طيب سالتني قبل شويه و قلت سبب قفلتي المفاجاة امس شنو ؟ لسه داير تعرف ؟؟؟
__ ايوا " بي توتر"
** " وجهت عليهو التلفون " سببها الرساله دي !!
__ رساله !! " شال التلفون قراها و يدو بترجف " و انتي ممكن تصدقي كلام دي دا ؟ دا شنو الهبل دااا ؟؟ انتي كيف ممكن تصدقي كلام دي دااا عني ؟ لا و كمان تهديد !!!" بقى يخبط ف الدريكسون "
** انا لو صدقتها ما كان جيتك وقلت ليك احكي لي !
__ سلوان ، داير رقم مدثر !
** شنو ؟؟
__ رقم مدثر ، او رقم ابوكي الدايراني اصلو اديني رقمو ، عشان انا اقسم بالله اللحظه من غيرك تقيله على قلبي ! انا دايرك والله دايرك وجيت من السعوديه عشانك '
** مخنوقه خلينا ننزل محتاجة اشم هواا " و انا يدي في الباب " دقيقه !! " كان في حاجة جهرتني في عيوني ، مديت يدي عليها و رفعتها و هو كان بيتكلم ..
__ انا ما حا اخلي الزول الرسل الرساله دي يا سلوان والله ما اخليهوووو " بينقل الرقم في تلفونو ، و انا بناديهو بي صوتي الرايح م سامعاني "
** عزززو ...عزووو .. " بي صوت عالي " عزوووووووووو
__ " عاين لي مخلوع و عاين للفي يدي " دي شنو ؟
** انا البسألك دي شنو ؟
__" بلع ريقو " لقيتيها وين ؟
** " اشرت ليهو بي يدي عى محل رجولي قدام ف العربيه " ... ؟؟
__ مم .. مم " بقى يتمتم " !
** مالك اتوترته ! عايزة اقوليك انها سمحه
واضح جداً انه ستها ذوقها رفيع شديد .. اممم دا حرفك حرف الـ #A.. و داا حرف الـ #N ...
يتبع ...
سلوان : -"الفكرة التي تستحق أن تؤمن بها قطعًا دون تشكيك، هي فكرة أنك من سلالة بني آدم الخطّاءة وأنك على قيد التعلُّم، مادمتَ حيًا."
عزالدين : لقد هلكتُ تماماً ولكنّي لا أعرف طريقاً آخر سوى الصبر لعلّ كُل شئ يتحسّن ..
ندى : - كنتُ دائماً إمرأه مُطيعه أقول نعم ثم أفعل ما برأسي .
#استككانه🌚....
#سحر_سمير
#فاطمة_قسم_الله...