"""" انا اسمي #سحر ما #سمر 🙂لأنه الموضوع بقى مزعج بالنسبه لي """"""
و للمرة التالته : بعتذر اذا في اخطاء املائيه .
مدثر : مرتاحه ؟
سلوان : جداً
مدثر : منو فيهم ، و عرفتيهو كيف ؟
سلوان : انقر طيب !
مدثر : م داير اتصدم
سلوان : ما حتكون اقوى من صدمتي !
مدثر : ما حابي اتوقع و ما عارف لانه ما شايف ان البتعمليهو دا ممكن يضر زول و#قاطعنا
" صوت من ورانا "
" انا و مدثر اتلفتنا لانه كنا متحركين "
مدثر : خير ؟
سلوان : نعم !
مدثر : سلوان !! اسكتي انتي لو في كلام يتكلم معاي انا المرة دي !! خير ؟
حسن : انتي كنتي بتلمحي على زول و عديل قلتي انك عرفتيهو و استثنيتيني انا ! ليه ؟
مدثر : الموضوع دا كان حدو هناك " اشر على زنوبيا " و حالياً الموضوع انتهى ، و على فكرة من اود ما شفتك و انت من حلقي دا ما نازل لي ، لا اسلوب زي الناس لا اخلاق لا احتراام ، و امبارح فوته اسلوبك معاها عشان خاطر زمايلي ما اكتر ، فا اتفضل زح من قدامي !
حسن :
" بلع ريقو و مشتت نظرو "
طيب ، حا امشي من قدامك بس خليها تسمعني !
سلوان :
مدثر ! ممكن ارد ؟
مدثر : سلوان ، قلتي الكتير قبل اللحظة دي و انا ما شايف ان في داعي لي كلام اضافي ، و بعدين يا استاذ ، انت عارف سلوان دي عمرها كم ؟ ياخي انت اكبر مني انا اللي هو اخوها الكبير ، ما خجلان من روحك ، كبير كدا و خاتي راسك مع راسها ؟ ليه ياخي اذتك في شنو ؟
حسن :
ما عندي اسباب !
يمكن انتي غلطي لمن استثنيتيني ، انا كنت مهدد اسماعيل ، انو لازم يجيب لي طريقة كل مقترح قدمتيهو بالتفصيل
" وقتها اريج جات جاريه محصلانا و وقفت تعاين و تأشر لي بي عيونها ، يعني في شنو ، م رديت عليها اكتفيت بي ابتسامه باهته "
" كمل كلامو " لانه قبلها بي مده جاني عرض من
" شادنAirline" بس على مقترحاتك ، بحكم انها مبتكرة فا كانت ممكن تتقدم للناس من مختلف الجنسيات و كلنا عارفين يعني شنو شركة شادن ! اعتبرتها فرصه ، و اغريت عم اسماعيل اني حا اطرح ليهم المقترحات دي بي اسمك ، بالواضح زغللت ليهو عيونو و اني ممكن اشيلو برا مطبخ زنوبيا ..
"اريج مقاطعه كلامو بي استغراب "
انت يا استاذ حسن ؟
طيب ليه ؟ ما كان ممكن تطرح الموضوع دا للكل يعني سلوان اكيد ما حترفض فكرة زي دي !!
سلون : بس انتي ما بتعرفيني عشان تقدري تجزمي اذا كنت حا اوافق ولا لا ! "
" اريج استغربت في رد سلوان و سكتت "
مدثر " مركز مع حسن و مذهول " :
احساس الشفقه دا اسوأ احساس ممكن يحسو زول تجاهك " ضربو في صدرو " ! اختشي ، اختشي على دمك ياخي ، والله العظيم عيب ، يعني هي استثنتك و قالت ما انت اللعبت اللعبه دي و طلعت انت ؟
سلوان :
لا يا مدثر ، ما حسن اللعب اللعبه دي !
مدثر :
بس هو اعترف اهو قدامك قال !
سلوان :
هو قال موضوع انا مسبقاً عارفاهو بس ما كنت عارفه الاهداف منه شنو و ما اهتميت اعرف لاني بعمل و بجدع البحر ، و انا قد اكون ساكته بس ابداً ما غبيه ، و عارفه انه مهدد عم اسماعيل ، لان ما عندو حل غير يلوي يد المسكين داك ، و دي عاده اغلبيه البشر ، القوي بياكل الضعيف و الكل بيستخدم نفوذو !
مدثر :
و انا شايف ان مافي غيرو عمل العمله دي !
سلوان :
هه لا في يا مدثر !!
مدثر :
انتي رغم الحاصل دا قاعد تضحكي يا سلوان ؟
سلوان :
عشان استاهل اضحك !
لا بجد والله يا مدثر ، مافي احلا من انك تضحك لمن تكون فاهم كل حاجة حاصله حوليك بس قاعد تستغبى و تخليهم على فهمم !
حسن :
انا ما ضريتك ، الضرر الوحيد هو اني كنت عايزك تفارقي زنوبيا و انا انسب اسمك لي عم اسماعيل !
سلوان :
هه يلا يا مدثر خلينا نمشي !! حتعرف كل حاجة لمن نمشي البيت ، انا جعاانة ياخي .. اااح يا ربي امي عامله لينا شنووو !
" وقتها اتحركنا و خلينا حسن و اريج ورانا "
اريج : دقيقه ! ممكن اتقدم معاكم لحد الشارع ؟
سلوان : كان دايرة نشيلك و نجري بيك زاتو ما عندنا مشكله يا صحبتي " ابتسامة " !
مدثر :
" نفض يدي و وقف في الشارع "
انتي كدا قاعده تكبري لي شكوكي ! عايني انا ما متحرك من هنا غير لمن اعرف يا سلوان ، يا برجع زنوبيا و اطربقا فوق راسهم كلهم !!
سلوان :
" مسكت يدو راجعه "
" و اخدت تنهيدة طويله " وليد !
اريج :
" بي انفعال اقرب للصدمة "
لاااااا مستحيل !
سلوان :
" وقفنا "
ليه مستحيل !؟ عشان عندك علاقه بيهو مثلاً ؟؟
اريج :
" بي تمتمه "
ابداً ! انا ما عندي علاقه بيهو ، اي نعم متواصله معاهو بس ما عندي علاقه بيهو ! هو الكان بيحاول يتودد لي بس انا ظروفي ما بتسمح و سبب تاني انا ما حابه اتكلم عنه لاني بعتبرو شخصي " عاينت لي مدثر " !
سلوان :
ولا انا دايرة اعرف اسباب !
لاني عارفه المفروض اعرفو ، و دي براها من ربنا بتجي !
مدثر :
" بي عدم تصديق "
طيب قاليك اذا البتكلم مجنون اذن المستمع عاقل و كلامك البتقولي فيهو دا يا سلوان ما منطقي و بالنسبه لي كلام مجانين ! انتي بتتكلمي عن ولد صاحب المحل ! واعيه للنقطه دي ؟
سلوان :
" بضحك "
و انا ما بقول اي كلام و خلاص ! من مبدأ العقل البتتكلم عنه انت زاتك ، انا حالياً قاعده اتكلم بيهو ! فا م تخليني ارجع لي ورا و امشي اعمل الما عملتو قبيل !
مدثر :
يبقى نرجع ! " مسكني من يدي و رجع بي "
" اريج جاريه ورانا "
#KSA
الساعه 12:17-
مكملة لي احداث [ الطيب و عزالدين و مالك ]
" في ممر بُني طويل ، داخل شركة معروفه في المملكة ، كان على بعد كل متر تلاته اشخاص ، و من ضمنهم الطيب اللي كان واقف على مسافة من عزالدين ، و مالك اللي كان بيتردد في نصهم رايح جاي !
مالك :
" كل شوية يرفع يده يعاين للساعه "
عزو ! الحاصل شنو ؟
عزو :
" متوتر يا مالك ، الامور ما مشت زي ما عايز "
مالك :
انا ما بتكلم عن الحصل جوه في اللجنة لانه حصل و انتهى ، انا حالياً بتكلم عنك انت و الطيب ! ياتو يوم الطيب بيكون ساكت كدا ، في شنو عليكم الله انا من جوطتكم الامس دي م متطمن ! يعني اسألو هو يقول ماف شي و انت نفس الشي !
عزو :
يمكن متضايق من الحصل جوا في اللجنه !
مالك :
هه عزو ! انا معاكم من الصباح ، و الطيب دا على حالو دا من قبل م نخش اللجنة ! " بيعاين في الساعه "! " طبطب على كتفو " كل شي حيبقى بخير ، و من امبارح عايز اتكلم معاكم في موضوع ما لاقي طريقه ! بس انا لازم امشي من قبيل و م كنت قادر امشي و اخليكم وراي بالحاله دي و #قاطعو صوت ..
" ول ول ول حبيبي يا ابو الملك مبرووووووك ياخ خش فيهو حضن "
مالك :
" بي توتر " معاذ .. " حبيبي يا معاذ ، على شنو يا وجيه ان شاءالله جايب لي عروس بس ههههه "همس ليهو وهو حاضنو .. اشششش اسكت "
معاذ :
" احم احم " والله العرس دا دايرنو بالحيل ههههه ، ابو العز ، شنو يا حنيني الاخبار ، طبعاً واثق فيك ثقه كداااا عمياااء ! فا بالتوفيق لي كل الشباب والله سواء ادارتنا و لا ادارتنا و لا ادارتنا الكسبت كلنا واحد هاهاهاهههههههه
مالك :
يا جبروتك ياخي هههههههه
عزو : ههه ، انا طالع على شركتنا مفروض امر على ابو عمر دا .. يلا !
مالك :
طيب .. " بيعاين لي الطيب المسك الممر و فات "
معاذ :
" هز راسو " في شوو ؟ ليه سكتني ؟
مالك :
انا لسه ما شرحت ليهم الحاصل يا معاذ ، حرفياً ما لاقي طريقه من امبارح لليوم و براك شايف الضغط ، و غير كدا هما م عندهم خلفيه عن الموضوع و كنت شايف انهم يسمعو مني احسن !
معاذ :
ما عارف لكن ما شايف انها حاجة تندسه !
و ما حاسيك فرحان ليه ؟
مالك :
اكذب عليك لو قلت ليك اتوقعتها يا معاذ ، و شايل هم مشروع الادارة حقتنا كمان الامور م مشت بخير ، و بعدين الفرح دا بالناس الحوليك !
انك لمن تفرح تلقى زول تجري عليهو و تحكي ليهو ، لكن الحمدالله ! دا غير انه لسه ياداب تم ترشيحي و زي ما عارف مفروض اسافر اسي و اناقش بكرة !
معاذ :
" اتأثر "
كونك وصلت للمرحلة دي ، دا في حد زاتو نجاح ، بس المستغرب ليهو انك ليه ما قدمت مشروعك دا في شركتنا ؟ اي عارف ان ماف مقارنه بين المشاريع الداخليه و الخارجيه ، بس طالما عندك الامكانيات دي بالنسبه ليك مشاريعنا دي قزقزة ساي !
مالك :
بالغته انت كمان .. المهم في اسباب منعتني و بالمناسبه انا ما قدمته مشروعي ! قدمو لي صديق قديم و كان مجرد ونسه فا سبحان الله ..
يلااا انا بمشي الزمن فات والله نتلاقى ... " جرى "
#مستشفى !
محمود:
" بيلبس في جزمتو"
كلمتك تعملي لي اجراءت الخروج ، انا ما طايق المكان هنا و اتخنقته و لو فيني حاجة عمري ما اتعالج و انا في الغرفه الكئيبه دي !
امه :
بس انت ما بقيت كويس ، و الغرفه دي لو ما بتساعد في علاجك ما كان جابوك فيها !
محمود :
" بي تنبيه حاد "
امي ! انا ما عيان ! انا ما عيان انتو ما دايرين تفهمو ليه ؟ ووووين الغريب في اني بشوف رقيه ؟ هاااه ؟
اسوي ليها شنو طيب ؟ بس انا ما عاين و عقلي تمام و قاعد اتكلم معاكي واعي م مسطول !
امه :
انت عارف بسببك انحنا حصل فينا شنو ؟
طيب م حا اتكلم في الحصل ، بس انا ما عايزة اخسرك ، عايزاك تبقى كويس عشان تقدر تشتغل و تشيلنا انا و اختك ! محمود ،، حتى خالتك امنة ما مستحمله قعادنا معاها في البيت و اسي مسمعاني فارغ في اني ما كملته عدة طلاقي من ابوك و بمرق عشان اجي اتطمن عليك ! يا محمود و ابوك رفع يده مننا !
محمود :
طيب ! اعملي اجراءت الخروج ! ارجوكي ، ما هو اذا مرضي رقيه فا رقيه ما حتفارقني لا هنا لا برا !
#زنوبيا !
" وصلنا زنوبيا ، و مدثر فك يدي قدامهم ، و كانو قاعدين كل واحد قالب وشو و ساكت ، و محمد كان واقف على مسافه من المحل من لمحنا جا علينا و امجد و حسن و وليد قاعدين ، و طافين جزء من الانوار ، فا من شافوني قامو وقفو على حييلهم "
مدثر : اتكلمي !
سلوان
" باخد في نفسي لانو كنا متحركين بسرعه "
وليد ، تتذكر يوم جيت المحل هنا و كلمتنا بي حالة عم محجوب و عن اني لازم امسك الادارة عنك مؤقتاً و في نفس الفترة ، حسن كان سافر مدني ؟
وليد :
" بلع ريقو " ايوا !
حسن " مترقب و بيسمع "
سلوان : انا اليوم دا قلت ليك انا عايزاك في موضوع و كان طرحت عليك موضوعين من ضمنهم ، خدمة توصيل الاوردرات ، و قلت ليك انا حددت الاماكن القريبه لي زنوبيا هنا في المذكرة حقتي " بي حجم كف اليد " و فتحتها ليك و وريتك ! وقتها قلت لي انا برضو عندي نفس الفكرة دي ، و كنت حا اطرحا عليكم برضو ، فا كنت عامل فيها مستعجل وقتها و اخدتني في انك عايزني في موضوع و شلت النوته حقتي قلت لي ممكن اشيلها معاي ادرسها بي راحتي ؟ وقتها انا ما اترددت و قلت ليك جداااً !!
النوته دي انا كنت كاتبه عليها وصفات المقترحات حقتي بطريقة تفصيليه ، و كنت ياداب في بدايه الفكرة و النوته دي نوته فرعيه ما نوته اصليه ياهو بخربش فيها ... الخلاني اربط الحاجات دي بعضها ، اني م كنت معدله على الوصفات دي !
و الدليل اني لمن قلت للشف حق محلات شوقر ان الصوص لمن يكون هلامي بنديهو معلقة نشا ! ما قلتها من فراغ ! لانك انت سلمتو اللقيتو مكتوب مني زي م هو لان كان هدفك تضرب عصفورين بحجر واحد ، اللي هو تكون ضمنت حلوياتي ، و في نفس الوقت تطلعني برا زنوبيا ، تفادياً لاسباب انت براك عارفها ...
اريج :
" بي ضيق نفس "
يعني انا ما قادرة اتخيل !! يعني انت كنت متعمد تتواصل معاي في الفترة دي تحديداً !! و بتسألني من سلوان و مؤخراً الصوص و انا زي الهبله كنت بجاريك و ماخده الموضوع عادي !
مدثر :
طيب وليد مصلحتو شنو من كدا ؟
دا محلو و عايز ليهو الافضل اكيد ، م منطق !
سلوان :
لمن تحب حاجة حتدمن تفاصيلها ، بمعنى ، اني حبيت مجال الحلويات دا و بقدر اتعامل مع كل مكون بي دقة شديده ، الفطيرة كانت كلها سوا واحد و دي انا كاتباها لان وقتها م كنت ملمة شديد ! و هو عملها بنفس الشي و قلت ليهو بتدخل على مرتين الفرن ، و الصوص حق كل حلى كان سايل و م متماسك م فيهو سماكة الصوص و دي انا عن نفسي تعبته لمن انوصلت لي حل احل بيهو المشكله دي ! عرفتو المغذى من كلامي !!
وليد :
هاهاهاها " بيصفق " قصه سمحه والله !
شوفي كنتي ماشه وين " اادانا ضهرو و داخل على المحل " ..
سلوان : لأنك وااااحد جبان ! من البقدر يدفع للمحل حق الدقيق و يخليهم يجيبو دقيق فاسد هااا ؟؟؟
بس كان تنبه عليهم انه يشطبو اسمك من بيانات الطلبيه ههه حقت يوم 6 !!
انا شفت كل حاجة في الدنيا دي ، الا ان واحد يشيل صباعو و يطبز عينو !!
" وقتها وقف و اظن رجولو ما كانت شايلاهو "
"الصدمة الكانت في وشوشهم وقتها ما بتتوصف "
سلوان : مدثر ! الحفله انتهت ، ممكن نمشي ؟
مدثر :
" بي عدم تصديق " يلا !! شي غريب بالجد !
( مسكنا دربنا عديل ، اغلب الوقت ساكتين )
#في_جانب_ما ...
** انا ما بقدر اقنعا ، كفاية مشاكل لحد هنا يا ولدي ، كل مرة تجي تقعد قدامي و تحلف و تقسم و بصدقك و بتكلم معاها و مجرد ما تضمنا في يدك ، بترجع لي نفس الشي !
__ المرة دي غير و الله العظيم ! اوعدك !
** معليش ، اعفيني المرة دي ، كفاية ذنبها الشايلاهو في رقبتي بي سببك ! كفايه ياخ حرام عليك ، راعي لي بتك المسكينه دي ! راعي ليها و ارحم ربنا بيرحم انت ما فيك ذرة رحمة !
" صوت اتدخل "
اظن سمعت كلامها ، اتفضل اطلع برا قبل تجي البيت و تتلاقى معاك انحنا ما ناقصين ! اتفضل لو سمحته اطلع ... و شيل كرورك الجايبو دا معاك !
#المطار !
#جانب_مالك
( على السادة المسافرين على رحله رقم815، التوجه الى الطائرة ) ...
يتبع ...
#استككانة🥜...
#فاطمة_قسم_الله
#سحر_سمير ..