الفصل التاسع **شهد الصعيد **
ناهد: تعالي اتفضلي يا مراه عمي أنى خابرة إنك مستغربة مني ومن حديتى بس أنى عاوزة اتاسف منشان إلي عملته ويا أم إبراهيم وأنى معدتش أعمل أكده تانى إلا لما ارجعلك واشورك انى رايده اكون تحت طوعك واسمع كلمتك كيف امى
فاطمة: وضيقت بين عينها وابتسمت لحالها أكده عين العجل يا بتي أنى عوزاكي مليحه والكل يحبك ومش عاوزه أسمع شكوة من يمتك فاهمه وكمانى انى خلاص ريداكى تكونى مراه ولدى وتسعديه وتخلفي منيه عيال كتير وتملي السرايا دى كليتها ولد ..... ده ليكى ولعيالك بعدين انى مخبراشى كنت غفيانه عنيكى ليه محدش ينفع لولدي غيرك اتى تعالي اهنه في حضنى وايتها حاجه تعوزيها تاجى طوالي وأنى اشيع اجيبهالك ......
ناهد:بفرحة وااااا واخيرا ي مراه عمى عتحبينى ورايده انى اكون مراه ولدك جاسر انى الفرحه مش سيعانى واصل وكمانى انى فهمت ومش هعمل أيتها حاجة غير إلا لما ارجعلك وأسألك أكده مليح وكمانى عاوزة من حضرتك تعلمينى كل حاجة الطبيخ والتنضيف كل حاجة معوزاشي جاسر يجول عني خايبا ولا معرفشي اعملو أيتها حاجة وعاوزه اكون اجرب واحده ليكى
فاطمة: فعلا ي بتى اتى عتكونى مراه الغالي والكبير ولازمن تكونى اهنه الكل في الكل ونظرت إليها بس جولي اتى رايده حاجه غير اكده جولي يا بتي عاوزة إيه تاني غير أكده وانى عنفذ الي ريداه طوالي
ناهد: وهي تمثل الخجل كنت عاوزة اتدلي للبندر واجيب لبس الفرح اديكي خابرة مفيش وجت والأيام بتعدي بلمح العين وأنى مجبتش أيتها حاجة واصل وكنت عاوزة إيناس تاجي معايا هى بتعرف تختار حجات مليحه واها نبجي نعاود انى وياها للبلد
فاطمة:بفزع وااااا كيف ده عاوزة تدلي وتروحي تجولي لبتى همي امعايا أنى عتجوز خوكي أكده وهي متعرفش حاجه من الي حوصلت اهنه بجولك إيه اتدلي المركز فيه كل حاجة وبلاش تشغلي إيناس بالحديت ده فاهمه وانى معوزاشي حدا يبلغها بايتها حاجه هى كانت جريبه من شهد بت عيد ومش عاوزة بتى تحزن واصل ولا تتكدر .......
ناهد: بخبث فاهمه ومش عتحدت وياها طب أنى عتدلي ميتا للمركز منشان اجهز حالي واجيب اللبس بتاعى كلياته
فاطمه: بكرة هشيع معاكى العربية وتدلي للمركز وتجيبي كل الي عوزاه بس متعوجيش لليل ي بتى لحسن جاسر يتكدر منيكى
ناهد : لع مش هعوج واصل وانى مش رايداه يتكدر منى انى ريداه راضي عنى ومبسوط كمانى
فاطمه : بضيق منها وابتسمت ربنا يكملك بعجلك فعلا انتى زينه البنته ربنا يسعدك ي بتى ويهدى حالك
جاسر: وهو نازل من علي السلم وتعجب لأسلوب امه مع ناهد عاوزة تدلي للمركز لية خير يا بت عمي عاوزة حاجة اياااااك
ناهد: وهي تنظر إليه أنى عاوزة اتدلي منشان اجيب حجات ليا وكنت عتحدت ويا مراه عمي منشان اكده وانى اخدت منيها الاذن
جاسر: وماله أنى هشيع امعاكي العربية وواحد من الغفر وهاتى الي عوزاه وأنى عفوت ليكي فلوس ابجي خديها وهاتى الي ناجصك كلياته مبسوطه
ناهد: وكأن العالم كله بين يديها أكيد مبسوطه يا واد عمي أنى محدش زيي النهاردة ربنا يخليك ليا ولا يحرمنيش منيك واصل
فاطمه: واااااا استحي يا بت عيب إيه عتخلعي برجع الحيا ايااااك لما تتجوزي ابجي جولي الي أتى عوزاه يلا همي زمنات الدكتور علي وصول منشان خيتك
أم إبراهيم: يا ست فاطمة الدكتور اجي وعيستنى برة ادخله لوين
جاسر: استنى ي ام ابراهيم خدي امى امعاكي ......ودخلو الدكتور منشان يكشف عليها بس ادخلي الأول وطولي عليها منشان تستر حالها وأنى جاعد اهنه لما يخرج واعرفو هي مالها وليه جاطعه الوكل اكده
أم إبراهيم: حاضر يا ولدي وذهبت لإحضار الطبيب من الخارج
جاسر: وهو ينظر لناهد مالك عتطلعي فينى أكده ليه عاوزة حاجة تانى اياااك
ناهد: كنت عاوزة أسألك عن حاجة أكده إنت عتسويلي فرح ولا عنتجوز من غير حس ومحدش يعرف انى اتجوزتك في البلد اهنه
جاسر : ورفع عينه إليها إنتى عاوزة إيه منشان أنى اعملهولك واماتعوزي حاجة بلاها لف ودوران في الحديت اطلبي طوالي سامعه انى معحبش اكده
ناهد: سامعه بس أنى عاوزه فرح كبير وكبير جوي ده اليوم إلي كنت عحلم بيه من وانى صغيرة واخيرا ربنا نولنى الي عتمناه وكل ده بدعوة امى ليا ورضاها عليا
جاسر: ونظر اليها وماله اعملك فرح كل البلد تحكى عنيه يلا بطلي رط كتير وروحي طولي على خيتك وشوفي إيه علتها عااااد وأنى جاعد اهاااا عستني لما اعرفو مالها
ناهد: بفرحه وكأنها امتلكت العالم كله حاضر أنى عروح واجي اطمنك أنى خبراها زين تلاجيها جوزها اتوحشته ما هو طول الغيبه جوي المرة دي وهى ديما جاعده لحالها
جاسر: انى جولت بطلي رط يلا همي وطمنينى عليها يلا ونادى على أحد الخدم وامره بنفجان قهوة وسرح جاسر مع حاله وفي حديثه مع محمد وظل يفتكر مواقف لشهد معه في أول لقاء لهم وهي تدافع عن ذكي واللقاء الثاني في المخزن وظل يفتكر اشياء كثيرة حدثت بينهم ولكن تعابير وجهه لا تنم علي أي شئ غير الهدوء
عاصم: ودخل السرايا ووجد جاسر علي هيئته هذة فتحدث إليه مالك جاعد أكده ومسهم خير في حاجة اياااك
جاسر: وانتبه لأبيه عيكون في إيه ما أنى جدامك اهااا بس كنت عفكر في حديتك عن خوي ولجيت إنك امعاك حج في كل كلمة بس كيف عنجدر نوصله ونخليه يهمل البلد ويسافر دي كمانى مشكله كبيرة جوي ومحدش يعرف طريج الجبل غير الهجامه وده طريج واعر ومحدش خابرة واصل
عاصم: وتمعن النظر لولده جاسر وتعجب من تغير أحواله ورد عليه أنى كمانى مخبرشي كيف نوصله أنى عشوف صرفة منشان أجدر اخلي حدا يوصله في الجبل ويمكن اروح حدا الحج جابر يمكن يعرف يدلنى ولا يعرف يوصلني لحدا من الهجامه دولي
جاسر: ونظر لأبيه واااا يعني أنت خابر إنه فوج في الجبل طيب والله زين جوي انى كمانى كنت عاوز اتوكد انه فوج في الجبل واهااااا ادينى اتوكدت
عاصم: وبدأ يتلعثم في الحديث بجول إيه همل الحديت ده ليه وجته أنى مش فايج لايتها حديت وكمانى أنى عسافر تانى بالليل وعرد كمانى يومين ومش عاوزك تهمل حالك للغضب ولا تهمل ارضك وانى لما اعاود عنشوف طريجه وياك منشان خوك واوعاك تتصرف من غير ما انى اعرف
جاسر: وماله عاوزأيتها حاجة مني اصلي أنى عتدلي للغيط وهنعس اهناك بس عشوف منى مالها لما الدكتور يطلع من عنديها
عاصم: مالها منى كفالله الشر فيها ايه
جاسر: مخبرشي مالها لما الدكتور يطلع من عنديها هنعرفو علتها ايه
عاصم : وانت عتبات ليه في الغيط لا وجت ري ولا وجت حصاد عتبات ليه في الخلا ي ولدى وليه عتفوت السرايا عااااد
جاسر: أنى ضيجان وعاوز افكر مليح لحالي ومعوزشي أشوف أيتها حدا بس عطمن الأول علي خيتى وعمشي طوالي وكمانى مخيمر مش اهناك وانى مش عتطمن علي الارض الا وهو اهناك
عاصم: واطمئن لحديث ابنه عن مخيمر خلاصي يا ولدى الي رايد تعمله اعمله بس خلي بالك من حالك وبلاش تتكدر مفيش حاجه تستاهل حزنك ده
أحد الغفرا: وخبط علي باب السرايا ونادى عاصم بيه أحمد واد عيد الزياد اجي وكان عاوزك وأنى اتدليت اهنه والهانم الكبيرة جالت إنها وعيتلك وأنت عتخرج برة السرايا وأنى جولتله يبجي يرجعلك تانى
عاصم: لو أجي تانى متهملوش واصل أنى مش فاضي للهم ده واوعاك تهمله يدخل السرايا فاهم احنا مش ناجصين هم بكفيانا علينا خيته دى ساااامع
الغفير: سامع جنابك وخرج الغفير تحت أنظار جاسر والمتعجب لمجيئ أحمد للسرايا حتى لم يسال عليه .......؟؟؟
فاطمة: وخرجت مع الطبيب ووجهها سعيد ونظرت لكل من جاسر وعاصم ألف ألف مبروك مني حبله عتبجي خال يا جاسر مبروك يا أبو جاسر عتبجى جد وسألت فينه عزت أنى مش وعياله من بكير منشان افرحه هو كمانى يمكن الولد ده يغير حجات في الجلوب غطت عليها مع الزمن الغبرا والتراب
عاصم: وتعجب لحديث زوجته جلوب ايه الي عليها غبر وتراب مالك عتتحدتى اكده بحديت مالوش معنى وبعدين عزت عاود بيته منشان يطول علي العمال إذا خلصو ولا لع منشان يروح جبل فرح ناهد على ولدك
فاطمة: ربنا يعينه وأنت يا ولدي تعالي بارك لخيتك ونظرت إليه مرة أخرى بعد أن خطت خطوة للأمام إنت خارج اياااك ورايح لوين
جاسر: أنى عبات في الأرض عاوز اجعد ويا حالي بس اني عطول علي مني وعتدلي طوالي للأرض حضرتك عاوزة مني ايتها حاجه
فاطمة: لع يا ولدي بس خلي بالك من حالك ومتعبش مخك في التفكير ارمي حمولك علي الله وفوض امركله له مفيش أحن منيه عليك يا ولدي هو خابر الي في الجلوب والضماير ربنا يحميك انت وخوك
جاسر : وتعجب لحديث امه وكانها تريد ان تخبرة بشئ وتقدم وقبل يد أمه ونعمه بالله أنى عاجي الصبح افطور وياكي جهزيلي فطير وجبنه نفسي فيهم وكمانى عاوز اجعدو وياكى لحالنا
فاطمة: من عنيا حاضر عجهزلك احلاها فطير بس متتاخرش عليا واوعاك تنام في الخلا يا ولدي انى مبعرفش انام وانت مش اهنه اوعاك تهمل في حالك ي ضنايا
جاسر: بكفياكي يا أمي إنتى عتعملينى كانى اصغير جدامك أنى كبرت وعارف أنى بعمل إيه عاااااد وبلاها حديتك ده كانى رايح ومش معاود
فاطمة: واااااااا بعيد الشر عنيك ان شاالله عدوينك ي ضنايا مهما كبرت أنى عشوف ولدي وبس والي عخاف علية من أيتها حاجة متعوجشي يا ضنايا روح ربنا ينور طريجك ويجعلك في كل خطوة سلامه
جاسر: وأبتسم لأمه وقبل رأسها وايدى أمه اللهم آمين ودخل علي منى وابتسم لها كيفك ي خيتى عامله ايه والف مبروك الخير الجديد
مني : الله يبارك فيك ونظرت اليه انت لساتك حمجان منى انى ومراه عمي منشان روحتنا عند عم عيد
جاسر : ونفخ بصوت وبعدهالك بطلي حديت كتير انى عسامحك المرة دى منشان ولدك لكن لو كررتيها تانى وتطلعي من غير اذن عتكون بينى وبينك العمر كلياته
منى : لع لع انى يستحيل اطلع من غير اذنك ومش عكررها واصل بس وغلاوتى عنديك سامح مراه عمى هى عتتجن منشانك ومش رايده انك تتكدر منيها
جاسر: وربت علي راسها وابتسم حاضر بس انتى خلي بالك من نفسك وولدك واجعدى اكده وريحي حالك...... انى ماشي رايده منى ايتها حاجه
منى : لع مريداشي ربنا يخليك لينا ويباركلنا فيك
ناهد: وابتسمت لجاسر انت عتخرج وهترجع ميتا منشان استناك واجهزلك الوكل
جاسر: لع انعسي انتى انى هبات في الغيط وخلي بالك من خيتك وامى واوعاكى تهمليها لحالها
ناهد: متخافش منى جوات عينى وكمانى مراه عمى متخافش عليهم
جاسر : ونظر لها وابتسم وخرج من الغرفه ونظر لابيه وخرج من السرايا وامسك بلجام حصانه وركبه وذهب للارض
عاصم: وهو ينظر من نافذة مكتبه فرأي جاسر وهو يغادر وحدث نفسه أنت يا ولدي فكرك فيه إيه ويا تري عتدور علي خيك منشان تسلمه ولا ناوي على إيه عاااااد بس أنى لازمن اعرفو كل خطوه هو عيعملها وأمسك هاتفه واتصل الووو
مخيمر: نعم جنابك في ايتها حاجه
عاصم: جاسر خرج علي حصانه دلجيت وبيجول إنه عيتدلي للغيط وهيبات أنى عاوز عينك عليه واوعاك تغفي عنيه عاوز أعرف كل خطوه بيعملها سامع
مخيمر: حاضر جنابك وأنى في الأرض من بكير بس ربنا يسترها عااااد أنى عخاف من ولدك ده حديته جليل ومخبرشي عيفكر في إيه
عاصم: بلاش تتعب حالك وتفكر وهمله ومتتكلمش كتير ساااامع هو زمناته جاي عنديك المهم عينك عليه ومتهملوش واصل وأنى ماشي بالليل وهعاود كمان يومين ولما أعاود تجولي جاسر كان عيسوي إيه ومين اجى احداه للغيط سااامع
مخيمر: حاضر جنابك مع السلامه وما أن اغلق الهاتف وحدث نفسه ربنا كبير ويسترها عااااد انى مخبرشي بوه ده صنعته ايه وكيف مش خايف من ولده .....؟؟؟
أحمد: ودخل منزلهم ولم يلقي السلام علي أحد ووجهه متجهم وانفاسه عاليه وكأنه كان في سباق للركد وذهب لغرفته وظل يجوب فيها ذهابا وايابا الي ان جلس على الارض
وفيه: بخضه علي ابنها وذهبت من خلفه إلي غرفته فوجدته جالس أرضا وفي حاله لا يرثي لها وجلست بجوارة وامسكت بيده مالك يا ولدي فيك إيه ومالك امسهم أكده إنت متوجع اشيع اجيب الدكتور ومال حالك اكده مش علي بعضيه
احمد: وبدأت دموعه تنهمر لع معوزشي دكتور دسينى في حضنك يا اماااا أنى تعباااان جوي والخوف اتملكني من كل حاجة أنى مبجيتش اعرف مين زين ومين عفش هو في إيه الدنيا دي مالها أكده الناس مسروعه ليه ومعتفكرشي إن في ربنا كبير جادر على كل شئ ابااااااي ليه الناس غفيانه اكده ومهمهاش غير حالها وبس لييييه ولييبه عيظلمو الخلج وضميرهم مش عيئنبهم علي افعالهم
وفية: بقلق علي حالة أبنها مالك حدتني يا ضنايا إيه علتك فيك ايه وضمير مين ومين عيتظلم وانت موجوع منشانه اكده ....؟
أحمد:وابتعد عن حضن امه مفيش أنى مليح ممكن تهملينى لحالي عاوز انعس هبابا ولما ياجي الدكتور شيعيلي وأنى عتدلي طوالي منشان اكون ويا بوي
وفية: بخوف وقلق على حالة أبنها حاضر يا ولدي بس انعس وبلاش تحط علي راسك الهم ده كلياته وأنى عستني تاجي وتحدتنى منشان الحديت بيهون علي الجلب ويخفف من عليه حمل كبير
أحمد: وصعد علي الكنبه وبدأ يدثر حاله ويدعي النوم حتى غادرت أمه فاعتدل وجلس مرة أخرى وبدأ يفكر كيف سينقظ اخته من هؤلاء المجرمين وبدا يتسال هل جاسر ايضا معهم ولما لا ويحدث نفسه بلا...... جاسر لع مش ممكن يلطخ اسمه وشرفه وانى اتسمعت مليح بس لازمن جاسر يعرف بكل حاجه انى سمعتها ولا بلاش لابوة يعرف انى عرفت بحديته انى لازمن اتصرف لحالي واجيب خيتى لاهنه من غير ما يصيبها شئ بس كيييف .......؟؟
رؤوف: وامسك هاتفه واتصل علي ابيه ازيك ي بابا عامل ايه والله واحشنى كتير
الأنصاري: وانت عامل ايه وهتنزل امتى من الجبل ده انا مش عايزك تتاخر عندك وخلي بالك من الفون الاسلكي ده لحسن الشرطه تترصده وتبقي مشكله
رؤوف: ههههههههه ايه مالك خايف كده ليه زى ما اكون اول مرة اطلع الجبل انا متعود على المكان هنا وبصراحه انا برتاح فيه كتير
الانصاري : ترتاح ايه بس اليومين دول الشرطه مفتحه عنيها على الاخر والواضح كده في حد عندك بيبلغهم بكل خطوة انتم بتعملوها علشان كده مفيش بضاعه اتسلمت اليومين الي فاتو
رؤوف : متقلقش انا هعرف مين الشخص ده وهيكون موته علي ايدى انا وهدفنه صاحى وخصوصا ان البيج بوص قالي اتحري واعرف مين ده
الانصاري : معقول يكون عاصم هو الي بيبلغ هو الوحيد الي بينزل من الجبل بس هيبلغ ليه دى مصلحته معانا وروحه في ادينا
رؤوف: لااااا ميقدرش يلعب اللعبه دى ابدا معانا وخصوصا انه بيجتهد علشان عايز يعرف الراجل الكبير الشخص ده هنا وسطينا عايش مع الهجامه بس انا أكيد لازم اعرفه
الأنصاري: طيب وانت هتنزل امتى وعيزك تخلص كل حاجه عندك وتمم عليها وكمان عروستك الي جننتك دى هاتها معاك عايز اشوف الي سرقت منى ابنى
رؤوف: ههههههههههههههههه ههههههههههههههههه سرقتني وبس دى خطفتنى من نفسي ومن زمان اوى بس خلاص بقت ليا ومستحيل اسيبها وعموما كلها كام يوم ونكون عندك يلا مع السلامه .......
فاطمه : واعدت الطعام ووضعته علي صينيه حتى تقدمه لمنى فرائتها ناهد وهى حامله الاكل
ناهد: وااااا عتشيلي الوكل ده لمين وليه مخلتيش حدا يحمله عنيكى
فاطمه : الوكل ده لمني يا بتى والكل مشغول واهااا ده خطوة اصغيرة مش هتعمل فينى حاجه
ناهد: ناولينى يا مراه عمى الوكل ده وارتاحي وانى هوكل منى لحالي بذ متعبيش حالك اتى
فاطمه: ونظرت لها خدى الوكل اهاااا وكلى خيتك وبعدها تعالى اطلعى هاتى العلاج بتاعى اصلى معحبش حدا يطلع اوضتى غير الجريب منى واتى خلاص بجيتى خطيبه ولدى وهتكونى مرته اجريب
ناهد: بفرحه واااا حديتك ده عيخلينى افط من الفرحه والله انى عحبك جوى ي مراه عمى ربنا يخليكى ليا
منى :وكانت خارجه من غرفتها واستمعت لحديثهم وتعجبت وااااا كيف يا مراه عمى حضرتك موافجه اياااك على الجوازه دى كيف ده
فاطمه: وبدات ملامحها تتغير وااااا اتى هتعدلي عليا ايااااك انى فرحانه بناهد وبصراحه اكده محدش ينفع ولدى غيرها
ناهد : وبعد ان استمعت لفاطمه فابتسمت ووضعت الصينية جانبا لاختها الوكل اها عندك وانى غلطانه منشان اعبرك تانى وجلست بجوار الحجه فاطمه والتى وضعت يدها علي ناهد وتحدثت دى مراه ولدى الغالي ودى الي عتصونه وتحفظ اسمه وغير حديتى ده معوزاشي اسمع حديت تانى واصل
مني: وسهمت لما سمعته من كلام زوجه عمها وجلست وكان هموما تثاقلت عليها انى عحلم صوح هو خبر ايه وكيف حالك اتبدل اكده ونسيتى شهد
فاطمه: بكفياكى ومعوزاشي اسمع اسمها اهنه واصل مفيش حدا ينفع لولدى غير ناهد وده كان لازمن يوحصل من الاول مكنش ده كلياته حوصل ويا بت عيد دى
ناهد: وابتسمت للحجه فاطمه ومالت علي يدها وقبلتها ربنا يخليكى ليا وميحرمنيش منيكى واصل انى طالعه اجيب الدوا منشانك وتركتهم ولكنها توارت خلف العمود حتى تستمع اليهم
منى : خبر ايه ي مراه عمى حضرتك عتتحدتى ويا ناهد اكده ليه اتى تعرفي حاجه اياااك منشان اكده هتغيري حديتك وياها
فاطمه : وهى متاكده بان ناهدلم تصعد وانها واقفه تتصنت عليهم بصي ي بتى خيتك مليحه ومفيش حاجه تعيبها واصل ودى بس الي تنفع لولدى وبس وانى غيرت حديتى امعاها ولجيتها مليحه وياجى منيها وهى دى الي عتكون مراه الكبير ويجيب منيها الولد الي يملو علينا السرايا دى ويريتك ي بتى متجبيش سيرة بت عيد دى انى خلاص مبجيتش اطيجها هى سبب خراب البيت والتكدرة دى ربنا يصلح حالها بعيد عنينا وعن ولدى واتى كمانى ي بتى عدلي حالك ويا خيتك هى اهنه هتكون ست البيت من بعدى وبصراحه اكده محدش غيرها ينفع ولدى واصل
منى: وتعجبت اكثر وااااا هو انى سامعه مليح ولا اكونشي بحلم حضرتك الي عتتحدتى اكده كيف ده وهبت واقفه وغادرت الي غرفتها وهى تحدث نفسها
فاطمه :وحدثت نفسها سامحينى ي بتى لازمن اعمل اكده منشان اعرف كل حاجة عن شهد وهى وينها وخيتك هى بس الي تعرف بس لازمن جبل ما اخبر ولدى اكون عرفت كل حاجه منشان يلحج مرته ويعرف كيف يخلصها بس النصيبه الكبيرة في ابوة ده والي مخبراشي ليه ومنشان ايه وكيف عيجتل وكانه عيتحدت علي فروجه اااااااه ي ويلي من المخبي اااااااه
ناهد: واااااا بينه الحديت صوح ومراه عمى غيرت فكرها منشانى والله بينها اكده بجت مليح وانى لازمن اكون كيف ضلها ومهملهاش واصل وصعدت للاعلي لتحضر لها الدواء ........!!!!
حسان : وبداء ينفخ بصوت عااالي وهو واقف وواضع يده خلف ظهرة
عتريس: واااااا مالك عتنفخ ليه وكأنك عتحرج الدنيا كلياتها خير فيك ايه تعالي جعمز اهنه وجولي مالك
حسان: انى مطيجشى حالى واصل ومش عحب الجعده اكده عاوز اتدلي للبلد واطول على بوي اتوحشته جوي
عتريس : وبعدهالك انى ٠جولت كمان يومين اكده وكمانى ليك شغله مليحه عتسويها بس كام يوم اكده منشان اخبرك
حسان: طب بجول ايه انى واعي ان اهناك زرع كتير انى رايد اتدلي اهناك ازرع واوسع الارض دى ويا الرجاله دى وكله مكسب لينا واها الزرع هيزيد اكتر ايه جولك
عتريس : وامعن النظر لحسان والله فكرة والراجل الكبير عيفرح جوي منشان الارض الجديده دى بس لازمن اخبرهم واخد منيهم الإذن الاول
حسان: وماله وانى اهاااا عستنى تاجي تخبرنى منشان اجهز واجهز الرجاله كمانى وإن شاءالله نزرع ارض كتير جوي
عتريس : متفرحش جوي اكده ممكن الراجل ميوفجشي واصل بس انى عحدته واحاول وياااه
حسان: بخبث حاول وياه الرجاله اهنه ملت من الجعده وبداو ينفخو كلياتهم مفيش شغل ومشغله غير الجعده اكده وخلينا نعوض الخسارة الي واجعه علي راسنا بسبب الحكومه وعلمها بروحتنا للتسليم ونظر من حوله بجولك ايه هى الحكومه دست حدا اهنه وسطينا
عتريس : والله مخبرشي واصل بس الاكيد الراجل الكبير هيعرف كل حاجه وهنعرف مين الي بيدل الحكومه علي كل خطوة توحصل اهنه متخافش كل حاجه بيدنا
حسان : وتحدث لنفسه وابتسم والله بينها اكده جربت جوى وعكون ويا حبيبتى وانى بس الي هجدر اتدلي بيها من الجبل من غير ما حدا يوعالي واصل اما هى لازمن ازلها الاول منشان متعرفش ترفع راسها واصل جدام الخلج وخصوصي جوزها ده انى عكسرله راسه واحنيله ضهرة ده الي شده عليا انى هعمل فيها الي كان لازمن اعمله من زمانى ومنعني عنيه يس الكلب كان زمناتها مرتى وجاعده جوات بيتى بدل جعدتى اكده ويا الهجامه ......
عتريس: وااااا مالك سكت اكده وعتشرد منى وعتتبسم وكانك عتتحدت ويا حالك وتضحكها
حسان: ماااالك عتستكتر عليا ضحكتى اياااااك هملنى ي ريس لحالي انى عفكر في حاجه مليحه وهبابا اكده عجولك عليها منشان التسليم وكمانى عنتحدت كيف كل مرة بس الخطه الي بفكر فيها هى الي عنفذها منشان نعرف مين الي عيوز علينا اهنه
عتريس : وانتبه اليه معجول ده عتسوى خطه منشان التسليم طب خبرنى بيها
حسان: ههههههههههههههههه وااااا هملنى انى عخبر الكبير ولا انت مش واثج فينى انى خلاص بجيت واحد منيكم ومن زمان جوي وميصوحش تخبو عنى ايتها حاجه وخصوصي وانى الي في وش المدفع ولا ليك جول تانى
عتريس: ورجع للخلف ونظر لحسان وااااا انت ناوى علي ايه شكلك اكده عتحرب علي موتك ي جدع انت
حسان: وااااا اكده ميت واكده ميت مبجيتش تفرج امعاي الي عاوزة اعمله عن اذنك الي احدى انى جولته وبلغ بيه كبيركم وغادر حسان لداخل المغارة تحت انظار عتريس له
