العاصفة

الاهلي والزمالك

السلام عليكم جروب شيمووو ..
كل حبايبي طبعا الزمالكوية والاهلاوية ..
انا بحلقة النهاردة كتبت مشهد وندمت عليه جدا بعد ما شفت كومنتاتكم ..
لان هو فعلا طلع معايا بهدف عكس ما كنت بكتبه عشانه ..
كتبت المشهد عشان اقول او اوصل فكرة ان الرياضة وتحديدا التعصب للرياضة والاندية حاجة وحشة ونتايجها كلها زعل او كره او حقد بين اخين او زوجين او صديقين او جارين وللاسف دا حقيقي .. و كان في مشهد تكميلي بالحلقة الجاية بيوضح اثار التعصب دا وبيقول ازاي التعصب عمل خلاف وجفا بين حبيبين .. وان احنا لازم نكون وسط بكل امورنا ولازم نبعد عن التعصب لكن للاسف كومنتات كتير زعلت علشانها لان كل الفانز هنا حبايبي واخواتي ومش بحب انهم يزعلو مني او يزعلوا من بعض زي ما حصل .. وللاسف برضه في بين الفانز متعصبين زي مؤمن ونور وواضح ان المشكلة اكبر من اني اناقشها برواية لان انتو حتى مصبروتش تشوفو تكملة المشهد بحلقة بكرة ..
حزينة جدا للمستوى الموجود بين الناس من تعصب لفريق وكره لفريق تاني مع ان كل اللي بالفريقين اهلنا واولاد بلدنا ويمكن اخواتنا وجيراننا .. كلنا بلد واحد واللي بفريق الاهلي مصري وابن بلد وجدع واللي بفريق الزمالك مصري وابن بلد وجدع .. ليه بنفرق بين الفريقين ..
بعتذر كتير لاني حاولت اطرح المشكلة والاقي معاكم حل ليها او طريقة ممكن نبعد فيها عن التعصب المنفر دا ..
وبعتذر لاي حد من الاهلي فهم اني بهينه ..
وبعتذر لاي حد من الزمالك برضه فهم اني بهينه ..
انا مش بهين ولا بجرّح ابدا حاولت بس انقل صورة موجودة بالشارع المصري وكلنا معترفين بيها وحاولت اشوف طريقة نتفق مع بعض انها ممكن تكون حلوة واحاول أألف بين قلوب الطرفين ..
وبالاخر ..
انا مسحت المشهد من الحلقة ومسحت المشهد المكمل بحلقة بكرة .. وانسوا انكم شفتو المشهد اصلا واعتبروا اني مكتبتوش ..
وأنا مش اهلاوية ولا زمالكوية والله .. بس بزعل من اللي بشوفه بالشارع وعلى شاشات التلفزيون وحبيت اطرح القضية وندمت فعلا لان التعصب واصل لدرجة مكنتش متخيلاها ..

وأخيرا..
انتو اخواتي و بحبكم كلكم اهلاوية وزملكاوية ..
ودلوقتي انا كمان زعلت مش انتو بس ..

دمتم بخير
وتصبحو على جنة مافيهاش تعصّب