الجــــــزء 27 ..
-----------------
الأجـواء بممرات المستشفى هادية ،..
خصوصا قُرب غرفة الكشف..
مر حول الساعة من حضور ابو خالد ومعه تركي ..
اللي كانوا جالسين عالمقاعد وكلن له هواجسه وخصوصا ابو خالد
اللي كل شوي يشوف ساعته بقلق ..وبندر ساند راسه عـ الجدار
وراه وسادل رموشه بشكل أثيري وانفاسه سااكنه وكأنه غافي...
أما تركي فـ ماله أفكار ولا شعور محدد لأن الوضع
ما كان هامّه بصراحة ولاهو حاس بأدنى التوتر اللي يعيشونه من حوله !
بالنسبة لـ خالد فكان جوّا مع الدكتور المسؤول عن الكشف
عن حالة سحر ..يتابع المستجدّات !
بعد دقيقة.. انسمع صوت باب الكشف ينفتح ..
وطلّ خالد بهدوء .. وهو ماسك طرف الباب لا يتسكّر : ..يبه !
قام أبوه بلهفه : ها يا خالد بشر !
ابتسم خالد ..ابتسامة متوتّـرة : ..خير ان شاء الله..
توّ الدكتور ما انتهى بس جيت اقولك كان تبي تشوفها..
استأذنْت لك من الدكتور ..
مباشرة تحرّك أبوه.. ودخل من الباب اللي فتحه خالد بشكل أكبر
حتى يفسح له المجال.. ثم تبعه لـ داخل وارتّد الباب من وراه بشكل طبيعي !
واستمرّ السكون والجو الهااادي بالمكان..
تركي ارتدّ نظره ناحية بندر الغافي .. ووضعه اللي مش مضبوط
وسكوونه المستمرّ من لحظة وصولهم !
كان جالس بالكرسي المقابل له في الممر.. وسنحت الفرصة لـ تركي
انه يتفحص كل شي فيه بدقّة !
وجه بندر المسترخي يشيل كثير معاني ، وشكّ في الموضوع !
قال بهدوووء النسييم : ..بندر !
وعى بندر وهو يفرك عيونه.. غفى هالساعة وكنّها دقايق ..
ثم قال وهو يناظر الباب المسكّر : قالوا شي؟
تركي وهو يتأمله : ..لسّا
سكت وهو يقوم واقف وتركي يناظره : وين بتروح ؟
بندر : بروح لدورة المياه ..
مشى من قدامه .. وبقى تركي لحاله جالس .. ومن انتظاره دخّل يده ببنطلونه الجينز وهو قاعد ..وسحب جواله يفتّش فيه عشان يلهى ،
بعد خمس دقايق رجع بندر .. وكان واضح إنه غسل وجهه بعنف
لأن بدايات شعره كانت مبلله جدا والقطرات للحين متكوّنه
في أعلى جبينه وقريب من أذنه..
مشى من قدام تركي المنشغل .. وجلس بمكانه الأول
يعني مقابله وحط رجل على رجل..وهو يتكتّف بانتظار ..
قال أخيرا بعد دقيقة من الهدوء : وين عمي ؟؟
قال تركي من غير لا يرفع راسه : ..دخل مع الدكتور خالد قبل شوي !
تنهّد بندر وهو خايف من النتيجة ..خايف كثيير ووقلبه مليان عتب على نفسه..لأن يدري ان ذيك اللحظات كانت مؤلمة وسحر كانت مريضة بعنف واضح عليها وعلى هيئتها..
رفع تركي راسه من الجوال وشاف بندر من جهة يطلّع جواله
ويحوس فيه وشكله يكتب رسالة ..
راقبه من جديد بسكووت ..
وبندر مو حاس بنظراته ومراقبته له..
وتركي يراقب حركات بندر المتوترة بشدّة.. ما ينكر هو قاعد الحين يشوف بندر وش قد قلقان ..واضح عليه القلق والخوف عليها ..واضح كثثير أكثر من وضوح الشمس !
ما منع نفسه من السؤال : عسى ما شرّ ؟
رفع بندر عينه :... هلا؟
تركي بابتسامة ناعمة : شفيك متوتّر بزيادة ؟
بندر ابتسم على خفيف .. ابتسامة محبطة : بنت عمي مدري وش بلاها.. ووضعها ما كان زين يوم نجيبها..
تركي : روّق روّق ما فيها الا العافية .. تعرف دلع البنات..
الحين بيطلعون علينا ويبشّرونا
بندر رسم ابتسامة كـ رد وما كانت ابتسامة متشجّعة.. وكلام تركي ما قدر يطمّنه لأنه ما عرف وش اللي صار واللي ما عاش اللي عاشه مارح يعرف ليش هو يحسّ كذا !
تركي كمّل : جد بندر منت طبيعي ! ،
حتى خالد وعمي مساعد مب زيّك ..
بندر تنهّد : .. كافي يا وليد مابي احكي في الموضوع..
سكت تركي بعد ما عرف من جواب بندر هذا..ان فيه شي صار..
وما أصرّ عالسؤال ..
بعد دقايق.. انفتح باب غرفة الكشف من جديد..
وطلع من وراه ابو خالد وجنبه الدكتور المسؤول عن حالة سحر..
وخالد آخرهم ..
والنقاش داير ما توقّف حتى وهم يطلعون..
بندر رفع راسه وهو يسمع..ومعه تركي اللي كان ملتفت يمين
وهو قاعد يطالعهم ..
الدكتور وائل اللي كان بآخر الثلاثينات : بنشوف نتايج الأشعة لأن مافيه شي مبيّن حاليا وفقدان الوعي التام اللي هي فيه مو مريح..
بالإضافة إلى إنها مثل ما قلت لـ الدكتور خالد ، عندها مشكلة عضوية وتحديداً بدايات التهاب رئوي.. ان شاء الله نقدر نسيطر عليه..
ابو خالد بنبرة قلقة : وش تتوقع معاها غير ذا يا دكتور..
تدري هالبنت مب عادتها تطيح بمستشفيات وبهذلة ..
ابتسم الدكتور يواسيه.. ثم التفت لـ خالد اللي كان ساكت وتارك ابوه يسأل ويتطمّن ..وقال : الحين بروح مع الدكتور خالد
حتى نشوف نتايج الاشعة وان شاء الله كل خير..
هز خالد راسه.. وطمّن أبوه..ثم دخل معه من جديد لداخل الغرفة ..
جلس ابو خالد مكانه.. وبندر ساكت وتركي الآخر ساكت..
واحد ضايق ومهتم.. والثاني رجع لجواله يحوس فيها بلا أدنى شعور ،
::::::::::::::::::::::::::
قدام جهاز تصوير الدماغ المقطعي ..
الدكتور وائل جالس على كرسي ويراقب الشاشة.. وخالد واقف جنبه وهو متخصّر بيد وحدة ..ومتسنّد بيده الثانية على الطاولة اللي تشيل شاشة الجهاز ، وكل واحد يراقب الاشارات والحركات الصادرة منه باندماج !
قال الدكتور وائل بصوت جدّي وهو يتحكّم بالجهاز بيد وحدة :
أعتقد يا دكتور خالد .. تقدر تفهم هالاشارات اللي انت تشوفها !
خالد وهو مركّز غصب عنه بالشاشة ..ووجهه جدّي ومتوتّر :.!!!!!!!!
الدكتور وائل وعينه عالشاشة : ... ما حكيت قدام الوالد
لأنك طلبت مني ما أحكي شي قبل ما تدري عنه إنت...
سكت خالد وهو يتابع الصورة الدماغية اللي يشوفها .. وقلبه موووجعه ،
رفع الدكتور وائل عينه لـ خالد السااكت : دكتور خالد ؟..
بلع خالد ريقه.. وقال بهدوء يبي يستوعب الصدمة : اشرح
ماني مستوعب الصورة !
ارتد نظر الدكتور وائل للشاشة.. وأشار بإصبعه لـ نقطة معيّنة !
وقال بهدوء وبأسلوب شرح : تدري ان دماغ الانسان ينقسم
لثلاث اجزاء وتعرف أنت أي واحد فيهم هذا !
خالد وهو يتابع..وقلبه مضغوط وبصووت واطي : ..نظام ليمبك..
مركز الدماغ أعرفه...!
ابتسم الدكتور بمواساة وهو يتابع :..صحيح... واكيد انت فاهم ذا
وحرّك اصبعه لـ نقطة معينة ..
وكمّل : فيه تغيّر واضح هنا بتركيبة الدماغ ووظايفه يا خالد..
تغيّر كبير في هالنقطة
سكت خالد..
وكمّل الدكتور وهو يدور بكرسيّه ليواجه خالد المنحني جنبه
عشان يواجه الشاشة : .. مستوعب هالشي ولا تبيني احكي زود ؟
رفع خالد يده لـ وجهه وهو يفرك عيونه بحركة لا إرادية ..
ثم قال يبي يستوعب الوضع اللي مو لاقي له سبب : ..اختي كانت
طبيعية يا دكتور ! ، تدري انت إن هالشي لا يمكن يحدث بسهولة
من غير مؤثر خارجي قوي ! صح ولا انا غلطان !؟
ابتسم د.وائل بتعاطف : مدري وش اقولك لكن انا اصدق اللي قدامي
يا د. خالد... ومثل ما انت شايف.. مركز الدماغ اللي تدري انت إنه مسؤول عن الوظايف العاطفية البحتة..يعاني من اضطرابات هيكلية
ووظيفية كبيرة غيّرت من تركيبة الدماغ العامّة... الموضوع مو سهل !..
(ناظره وهدى من صوته ) باختصار اختك تعاني من صدمة نفسية ..
أول خل أكون واضح... صدمة عاطفية شديدة رح يكون لها أبعاد مستقبلية..من الحين بكون صريح معك يا د. خالد !..
تدري انت وش تأثير مثل هالنوع من الصدمات على حياة الانسان العادي !
خالد وقلببه يختتنق زود داخل ضلوعه.. مووو مستوعب لأن اللي صاير لها وهالنتيجة مو منطقيّة بـ نظره..اخته طبيعية ما تعاني مشاكل من أي نوع !!!
كمّل د. وائل وهو يلفّ بكرسيّه الدوار من جديد للشاشة : ما يحتاج أزيد بالكلام مع دكتور مثلك عارف بتفاصيل مثل هالحالات .. اختك رح تحتاج لـ علاج ومساندة نفسية كبيرة ..ما رح أحبطك لكن زي ما شفت طبيعة مقاومة جسدها ضعيفة.. رح ننوّمها لفترة بالمستشفى لما نسيطر ونعالج الالتهاب الرئوي.. كان خطر لو أهملته أكثر من كذا..
بنحوّلها لغرفة حاليا تحت المراقبة واذا اهلك يبون يزورونها مافيه مشكلة ..
نادى د. وائل عالممرضة الموجودة وطلب منها
تبدا استعدادات نقلها لغرفة تحت المراقبة ،
وخالد تقدم لـ سحر ..اللي كانت منوّمه على السرير الخاص بجهاز الأشعة.. مسدله رموشها على وجهها المريض المصفرّ اللي ما كان يشبه وجهها العذب أبداً.. ما كانت ملامحها الشقيّة البريئة ابداً ،!
منصدم من النتيجة.. ومو متخيّل أي سبب خلّاها كذا !
مد يده لشعرها اللي كان مفكوك ومنسدل بعض منه على كتفها وبعضه عالسرير.. ومسح عليه بعطف وحب أخوي..
وتركها للممرضات حتى يشوفون شغلهم ،
//////////////////////////////
في بيت أبو محمد ..
مرّ على وصولهم للرياض حوالي الساعة ..
جت مشاعل وهي ماسكه جوالها لـ شادن اللي كانت شايله ملابسها المتّسخة عقب البر..بتوديها لـ غرفة الغسيل..
وقالت بخننقة : أبببي أروح أشوفها !! ،
قالت شادن وهي حاضنه كومة الملابس
..بقلق: وش قالك بندر .. علّمك وش فيها ؟؟؟
مشاعل : أرسلت له رسالة ورد يقول ما بعد طلعوا .. !
أبي أعرف وش اللي فيها !!
شادن : وش اسوي والله لو معي سيارة ودّيتك
ورحت معك عشان اشوفها ..
مشاعل : يااااررربي.. بكلم بندر يرجع مالي دخل
مارح انام الا لما أعرف وش فيها !!!
ودخلت غرفتها وضربت بالباب بعصبييية كبيييرة .. حمقانه وخايفه عليها..
هي أكثر وحدة خايفه لأنها آخر انسانة شافت وجه سحر ذاك وشافت ذيك الملامح اللي لا يمكن وصفها عقب صدمة خطوبة محمد !!
محمد اللي حاليا حااانقه عليه وضااايقه منّه..
وبسمة اللي كارهتها الحين !!
بسمة اللي سرقت حلم سحر..
واللي اختارها أخوها بشكل مفاجئ ،!
ضايقه لأنها حتى ما تقدر تتخيّل شعور سحر بذاك الألم !
رغم إنها متأكدة إنه موووجع ويذبببح ولا حتى تقدر تستشعره !
ومتعاااطفه معها كثير ،!!
رمت نفسها عالسرير وهي تطقطق عالأزرار ، تكتب مسج لـ بندر ،
"تعال خذني ألحين والا والله لأركب تكسي وأجي"
