حكمة الذئب

بارت30

ﺍﺳﻌﺪ ﺍﻟﻠﻪ ﺍﻭﻗﺎﺗﻜﻢ ﺑﻜﻞ ﺧﻴﺮ ﺍﺣﺒﺘﻲ ❤
‏( 31 ‏)
#ﺣﻜﻤـﺔ_ﺫﺋﺐ
# ﺑﻘﻠﻢ _ ﺷﻤﺲ _ ﺍﻟﺴﻌﺪﻱ
ﺗﺤﺪﺙ ﻟﻨﺎ ﺃﺣﻴﺎﻧﺎ ﺃﺷﻴﺎﺀ ﻧﻈﻦ ﺃﻥ ﻣﻦ ﺑﻌﺪﻫﺎ ﺗﻨﺘﻬﻲ ﺍﻟﺤﻴﺎﺓ ..
ﻧﺸﻌﺮ ﻭﻛﺄﻧﻨﺎ ﻧﺴﻴﺮ ﻭﺣﺪﻧﺎ ﻓﻲ ﻃﺮﻳﻖ ﺷﺠﺮﻱ ﻣﻈﻠﻢ ..
ﻭﺭﻳﺎﺡ ﺑﺎﺭﺩﺓ ﺗﻼﻣﺲ ﻭﺟﻬﻨﺎ ﺑﻘﻮﺓ .. ﺗﺪﻓﻌﻨﺎ ﻟﻠﺨﻠﻒ ﺑﻴﻨﻤﺎ ﻧﺤﺎﻭﻝ ﺍﻟﺘﻘﺪﻡ ﻟﻼﻣﺎﻡ .. ﻛﻠﻤﺎ ﺗﻘﺪﻣﻨﺎ ﺧﻄﻮﺓ ﻧﻌﻮﺩ ﺧﻄﻮﺗﻴﻦ ﻟﻠﺨﻠﻒ .. ﻳﻤﺸﻲ ﺍﻟﻌﻤﺮ ﻭﻧﺤﻦ ﻭﺍﻗﻔﻴﻦ ﺑﻤﻜﺎﻧﻨﺎ ﻧﻨﺘﻈﺮ ﻫﺪﻭﺀ ﺗﻠﻚ ﺍﻟﻌﺎﺻﻔﺔ .. ﻟﻴﺤﻞ ﺍﻻﻣﻞ ﻭﺍﻟﺼﺒﺎﺡ ﺍﻟﻤﺸﺮﻕ ﻣﻦ ﺟﺪﻳﺪ ..
__________________________________
ﺟﻨﺖ ﻣﺘﺮﺩﺩ ﺑﻬﺬﻱ ﺍﻟﺨﻄﻮﺓ ﺭﻏﻢ ﺍﻧﻲ ﺍﺛﻖ ﺑﺎﻻﺳﺘﺨﺎﺭﺓ ﻭﺍﻋﺘﻤﺪ ﻋﻠﻴﻬﺎ ﺑﺤﻴﺎﺗﻲ ﻣﺜﻞ ﻣﺎﻋﻠﻤﻨﻲ ﺟﺪﻱ ..
ﺑﺲ ﺟﺎﻥ ﺷﻲ ﺑﺪﺍﺧﻠﻲ ﻣﺎﻣﺮﺗﺎﺣﻠﺔ .. ﺭﻏﻢ ﻭﺟﻪ ﺍﻟﻤﺮﺓ ﺍﻟﺒﺸﻮﺵ ﺍﻟﻲ ﻭﺭﺍﻩ ﺣﺰﻥ ﻭﻫﻢ ﻛﺒﻴﺮ ..
ﺩﺧﻠﻮﺍ ﺍﻣﻲ ﻭﻋﻤﺘﻲ ﻟﺠﻮﺓ ﻭﻫﻲ ﺣﺮﻛﺖ ﻛﺮﺳﻴﻬﺎ ﻭﺭﺍﻫﻢ
ﺗﻮﻗﻔﺖ ﻭﺍﻟﺘﻔﺘﺖ :
" ﻳﻠﺔ ﻣﺎﻣﺎ ﺍﺩﺧﻞ ﻟﻴﺶ ﻭﺍﮔﻒ ﻫﺬﺍ ﺑﻴﺘﻚ "
ﺍﺳﺘﻐﺮﺑﺖ ﺍﻛﺜﺮ ﻣﺎﺗﻌﺮﻓﻨﺎ ﻭﻻﻧﻌﺮﻓﻬﺎ ﻭﻫﻴﺞ ﺗﻌﺎﻣﻠﻨﺎ ..
ﻓﺮﻛﺖ ﻭﺟﻬﻲ ﻭﺍﺳﺘﻐﻔﺮﺕ ﺭﺑﻲ ﻭﺩﺧﻠﺖ ..
ﻓﺘﺤﺖ ﺑﺎﺏ ﺍﻟﺪﻳﻮﺍﻧﻴﺔ ﺍﻭ ﻫﻤﺔ ﻳﺴﻤﻮﻫﺎ ﺍﻻﺳﺘﻘﺒﺎﻝ ..
ﺟﺎﻧﺖ ﺿﺨﻤﺔ ﻛﻠﺶ ﻭﺍﻻﺛﺎﺙ ﺭﺍﻗﻲ ..
ﻣﺎﺟﻨﺔ ﻧﺸﻮﻑ ﻣﺜﻠﺔ ﺑﺲ ﻣﻦ ﻳﻄﻠﻊ ﺍﻟﺮﻳﺲ ﻟﻘﺎﺀ ﻟﻮ ﺑﻌﻴﺪ ﻣﻴﻼﺩﻩ ﻣﻦ ﻧﺸﻮﻑ ﻧﻔﺲ ﻫﺬﺍ ﺍﻟﺘﺨﻢ ﻳﺴﻤﻮﻩ ﻣﻠﻜﻲ ..
ﻛﻠﺸﻲ ﺟﺎﻥ ﻣﺨﺘﻠﻒ ﺑﺤﻴﺚ ﺍﻣﻲ ﻭﻋﻤﺘﻲ ﻭﺣﺘﻰ ﻓﺮﺣﺔ ﺍﺻﻐﺮﻫﻦ ﺑﻘﻦ ﻳﻌﺎﻳﻨﻦ ﻋﻠﻰ ﺍﻟﻤﻜﺎﻥ ﻭﺍﻻﺛﺎﺙ ﻟﻮ ﺍﻟﺜﺮﻳﺎﺕ ﺍﻟﻲ ﻧﺎﺯﻻﺕ ﻣﺘﺮ ﻣﻦ ﺍﻟﺴﮕﻒ ..
ﺍﺧﺘﻨﮕﺖ ﻃﻮﻝ ﻣﺎﺍﻧﻲ ﮔﺎﻋﺪ .. ﺳﺎﻟﺘﻬﺎ
" ﺳﻤﻌﺖ ﻣﻦ ﺍﻣﻲ ﺍﻧﺘﻲ ﻃﺎﻟﺒﺔ ﻣﻨﻬﺎ ﻧﺠﻲ ﻟﻬﻨﺎ . ﻭﺍﻧﻲ ﻭﺍﻓﻘﺖ ﻟﻤﻦ ﺍﻣﻲ ﻟﺤﺖ ﻋﻠﻴﻪ .. ﺑﺲ ﻫﻨﺎ ﻣﺎﺍﮔﺪﺭ ﺍﻋﻴﺶ ﺍﻋﺬﺭﻳﻨﺎ .. ﺍﺫﺍ ﺗﺮﺩﻳﻦ ﺗﺠﻤﻠﻴﻨﺎ ﺷﻮﻓﻴﻠﻲ ﺷﻐﻞ ﺍﻱ ﺷﻐﻞ ﻭﺑﻴﺖ ﻧﺄﺟﺮﻩ ﻭﻧﮕﻌﺪ ﺑﻲ ..
ﺍﺑﺘﺴﻤﺖ ﻭﺍﻟﺘﻔﺘﺖ ﺍﻻﻣﻲ : " ﺭﺿﺎﺀ ﮔﻠﺘﻴﻠﻲ ﻋﻨﻮﺩﻱ ﺑﺲ ﻣﺎﺍﺗﻮﻗﻌﺖ ﻫﻴﺞ "
ﻋﺎﻳﻨﺖ ﻋﻠﻰ ﺍﻣﻲ ﺧﺰﺭﺗﻨﻲ .. ﻛﻤﻠﺖ ﻛﻼﻣﻬﺎ :
" ﺗﻌﺮﻑ ﻫﻨﺎ ﺍﻻﻳﺠﺎﺭﺍﺕ ﻏﺎﻟﻴﻪ ؟؟ "
ﺭﺩﻳﺖ " ﺍﺷﺘﻐﻞ ﻭﺍﺩﻓﻊ ﻣﻮ ﻣﺸﻜﻠﺔ "
ﺳﺄﻟﺘﻨﻲ :
" ﺗﻌﺮﻑ ﺗﺴﻮﻕ ؟ "
ﺭﺩﻳﺖ " ﻻ "
ﻫﺰﺕ ﺭﺍﺳﻬﺎ : ﻋﺒﺎﻟﻲ ﺗﻌﺮﻑ ﺣﺘﻰ ﺍﺧﻠﻴﻚ ﺳﺎﻳﻖ ﺧﺎﺹ ﺑﻴﻪ ﻭﻃﺒﻌﺎ ﺑﺮﺍﺗﺒﻚ "
ﺳﺄﻟﺘﻬﺎ " ﺍﻋﺘﺬﺭ ﻋﻠﻰ ﺳﺆﺍﻟﻲ ﺑﺲ ﺍﻧﺘﻮ ﺷﻨﻮ ﺷﻐﻠﻜﻢ ؟ "
ﺍﺑﺘﺴﻤﺖ " ﺍﻧﻲ ﻣﺘﻘﺎﻋﺪﺓ ﺑﺲ ﺯﻭﺟﻲ ﺷﻐﻠﻪ ﺑﺎﻟﺪﻭﻟﺔ "
ﻣﻦ ﺳﻤﻌﺖ ﺯﻭﺟﻬﺎ ﺑﺎﻟﺪﻭﻟﺔ ﺣﺴﻴﺖ ﻭﺟﻬﻲ ﻭﺟﺴﻤﻲ ﻛﻠﻪ ﻋﺮﮒ ﻭﺍﺣﺘﺮﻳﺖ ..
ﺭﺩﻳﺖ " ﻭﺯﻭﺟﺞ ﻳﺪﺭﻱ ﺍﻧﻲ ﺟﻨﺖ ﻣﺴﺠﻮﻥ ﺑﺘﻬﻤﺔ … .
ﻗﺎﻃﻌﺘﻨﻲ " ﻻ ﻃﺒﻌﺎ ﻣﺎﻳﺪﺭﻱ ﻻﻥ ﻫﻮ ﺣﺴﺎﺱ ﺑﻬﻴﺞ ﺷﻐﻼﺕ ﺣﺘﻰ ﻣﻦ ﺟﻨﺖ ﺍﻭﺻﻠﻚ ﻏﺮﺍﺽ ﺑﺎﻟﺴﺠﻦ ﻋﺒﺮ ﻣﻌﺎﺭﻑ ﻭﻣﺎﻳﺪﺭﻱ "
ﮔﻤﺖ ﻣﻦ ﻣﻜﺎﻧﻲ " ﻳﻠﺔ ﻳﻤﺔ ﮔﻮﻣﻲ ﻣﻦ ﺍﻟﺒﺪﺍﻳﺔ ﻣﻦ ﺍﺟﻴﺖ ﻣﺎﻣﺮﺗﺎﺡ "
ﮔﺎﻣﺖ ﺍﻣﻲ ﻭﻋﻤﺘﻲ .. ﺍﺷﺮﺗﻠﻨﺎ " ﺍﮔﻌﺪﻭﺍ ﺍﻓﻬﻤﻜﻢ ﺷﺒﻴﻜﻢ ﻻﺗﺨﺎﻓﻮﻥ ﻫﻮ ﻣﺴﺎﻓﺮ ﻫﺎﻟﻔﺘﺮﺓ ﻣﺘﺸﻮﻓﻮﻥ ﺣﺘﻰ ﺍﻟﺤﻤﺎﻳﺔ ﺍﻧﻄﻴﺘﻬﻢ ﺍﺟﺎﺯﺓ ﻋﻠﻤﻮﺩﻛﻢ .. ﺧﻠﻮﻧﺎ ﻧﺎﻛﻞ ﻭﺑﻌﺪﻫﺎ ﺍﺣﺠﻴﻠﻜﻢ ﻗﺮﺍﺭﻱ ﻭﺍﻧﺘﻮ ﺑﻜﻴﻔﻜﻢ ﺑﻌﺪ بيج قصص عراقيه حقيقيه من واقعنا.روعه الطائي
ﺍﺷﺮﺗﻠﻲ ﺍﻣﻲ ﺑﺎﻟﺼﺒﺮ .. ﺑﺲ ﻫﻲ ﻣﺎﺗﺪﺭﻱ ﺍﻟﻲ ﺷﻔﺘﻪ ﻋﻠﻤﻨﻲ ﻛﻠﺸﻲ ﺑﻬﺎﻟﺪﻧﻴﺎ ﻭﺍﻻﻫﻢ ﻣﺎﺍﺛﻖ ﻭﻻﺍﮔﺪﺭ ﺍﺛﻖ ﺭﻏﻢ ﻭﺟﻬﻬﺎ ﻃﻴﺒﺔ ﺑﺲ ﻣﺎﺍﻋﺮﻑ ﺑﺪﻭﺍﺧﻠﻬﻢ ﻭﻟﻴﺶ ﺟﺎﺑﻮﻧﺎ ﻟﻬﻨﺎ ..
ﻣﻦ ﺩﺧﻠﺖ ﻭﺷﻔﺖ ﺍﻟﺤﻤﺎﻳﺎﺕ ﻳﻢ ﺍﻟﺒﻴﻮﺕ ﺍﻛﻠﻨﻲ ﮔﻠﺒﻲ ﻭﻧﻐﺰﻧﻲ ..
ﺭﺍﺣﺖ ﻋﻤﺘﻲ ﺗﺴﺎﻋﺪ ﺍﻟﻌﺎﻣﻠﺔ ﻃﺒﻌﻬﺎ ﻣﺎﺗﻌﺮﻑ ﺗﮕﻌﺪ ..
ﻭﺍﻣﻲ ﻭﺭﺍﻫﺎ .. ﺑﻌﺪﻫﺎ ﻓﺮﺣﺔ ﻭﺑﺴﻤﺔ ﻭﺑﻘﻴﺖ ﺑﺲ ﺍﻧﻲ ﻳﻤﻬﺎ
ﺷﻐﻠﺖ ﻛﺮﺳﻴﻬﺎ ﻭﺗﻘﺮﺑﺖ ﻳﻤﻲ .. ﺻﺎﺭﺕ ﮔﺒﺎﻟﻲ ..
ﺑﻌﺪ ﺷﺒﺮ ﺑﻴﻨﻲ ﻭﺑﻴﻨﻬﺎ ..
ﺍﺗﻘﺮﺑﺖ ﻭﻻﻣﺴﺖ ﻭﺟﻬﻲ . ﺑﺴﺮﻋﻪ ﻭﺧﺮﺕ ﻋﻨﻬﺎ
ﻧﺰﻟﺖ ﺩﻣﻌﺘﻬﺎ ..
" ﺍﺳﻔﺔ ﺑﺲ ﺗﺬﻛﺮﺕ ﻫﻤﺎﻡ ﺍﺑﻨﻲ ﺍﻟﺼﻐﻴﺮ "
ﻟﻮ ﺑﺎﻗﻲ ﻳﻤﻜﻦ ﻫﺴﺎ ﺑﮕﺪﻙ .. ﺗﻌﺮﻑ ﻟﻴﺶ ﻫﺴﺎ ﺗﻌﺎﻃﻔﺖ ﻭﻳﺎﻙ ..
ﻣﻦ ﺷﻔﺖ ﻟﻬﻔﺔ ﺍﻣﻚ ﻭﺑﺠﻴﻬﺎ ﻭﻣﻦ ﺳﺄﻟﺘﻬﺎ ﻋﻦ ﻋﻤﺮﻙ ﺣﺴﻴﺘﻚ ﺍﺑﻨﻲ ..
ﻋﻨﺪﻱ ﺍﺛﻨﻴﻦ ﻭﻟﺪ ﻭﺑﻨﻴﺔ .. ﺫﻭﻟﺔ ﺟﺎﻧﻮﺍ ﻛﻞ ﺣﻴﺎﺗﻲ ..
ﺍﺧﺎﻑ ﻋﻠﻴﻬﻢ ﻣﻦ ﺍﻟﻬﻮﻯ ..
ﺑﺎﻟﺤﺮﺏ ﺳﻨﺔ 1991 ﻣﻦ ﺧﻮﻓﻲ ﻋﻠﻴﻬﻢ ﺩﺯﻳﺘﻬﻢ ﻭﻱ ﺑﻴﺖ ﺍﺧﻮﻱ ﺍﻟﻤﻠﺠﺄ ﺍﻟﻌﺎﻣﺮﻳﺔ .. ﺧﻔﺖ ﻋﻠﻴﻬﻢ ﻳﺒﻘﻮﻥ ﻫﻨﺎ ..
ﮔﻠﺖ ﺍﻛﻴﺪ ﺍﻭﻝ ﻣﻴﺼﻴﺮ ﻗﺼﻒ ﻓﻴﻜﻮﻥ ﻋﻠﻰ ﻫﺬﻱ ﺍﻟﻤﻨﺎﻃﻖ
ﺭﺩﺕ ﺍﺣﻤﻴﻬﻢ ﻣﻦ ﺍﻟﻤﻮﺕ ﺑﺲ … .
ﻣﺎﺍﺗﺤﻤﻠﺖ ﻭﺑﻘﺖ ﺗﺒﺠﻲ .. ﺣﺎﻭﻟﺖ ﺍﻫﺪﻳﻬﺎ ﻣﺎﺍﻋﺮﻑ ﺷﺄﮔﻠﻬﺎ
ﺷﻬﮕﺖ ﻭﺍﺷﺮﺗﻠﻲ ﻣﺎﺑﻴﺔ ﺷﻲ ..
ﻛﻤﻠﺖ " ﺧﺴﺮﺕ ﺛﻼﺙ ﺍﻭﻻﺩ ﺑﻴﻮﻡ ﻭﺍﺣﺪ ﻭﺍﺧﻮﻱ ﻭﻋﺎﺋﻠﺘﻪ ﻫﻢ .. ﺑﻌﺪﻫﺎ ﺧﺴﺮﺕ ﻛﻠﺸﻲ ﻋﺎﻓﻴﺘﻲ ﻭﺭﺟﻠﻲ ﻭﺯﻭﺟﻲ ﺍﻟﻲ ﺍﻋﺘﺒﺮﻧﻲ ﺍﻟﻤﺴﺆﻭﻟﺔ ﻋﻦ ﻣﻮﺗﻬﻢ "
ﺍﺗﻨﻬﺪﺕ ﻭﻛﻤﻠﺖ " ﻣﺎﺍﺭﻳﺪ ﺍﺩﻭﺧﻚ ﺑﻘﺼﺘﻲ ﺑﺲ ﺍﻧﻲ ﻣﺤﺘﺎﺟﺔ ﺍﻫﻞ ﻭﻧﺎﺱ ﻳﻨﻮﺭﻭﻥ ﺣﻴﺎﺗﻲ ﻭﺑﻴﺘﻲ ﻻﺗﺤﺮﻣﻨﻲ ﻣﻦ ﻫﺬﺍ ﺍﻟﺸﻲ ﻭﺍﺫﺍ ﻉ ﺍﻟﺸﻐﻞ ﺍﻧﻲ ﺍﺷﻮﻓﻠﻚ ﺍﻱ ﺷﻐﻞ ﻳﻨﺎﺳﺒﻚ ﻭﺍﺷﺘﻐﻠﻪ ﺑﺲ ﺍﺑﻘﻮﺍ ﻋﻨﺪﻱ "
ﻣﺎﻋﺮﻓﺖ ﺷﺄﺭﺩ ﻭﺷﺤﺠﻲ ﺍﻛﺘﻔﻴﺖ ﺑﺎﻟﺴﻜﻮﺕ ﺭﻏﻢ ﻣﺎﻣﻘﺘﻨﻊ ﺍﺑﺪﺍ ﺍﻧﻪ ﻧﺒﻘﻰ ﻫﻨﺎ ..
ﻃﺒﻄﺒﺖ ﻋﻠﻰ ﺭﺟﻠﻲ .. ﻭﺣﺮﻛﺖ ﻛﺮﺳﻴﻬﺎ ﻭﺭﺍﺣﺖ ﻟﻠﻤﻄﺒﺦ ﻳﻤﻬﻦ ..
ﻭﺍﻧﻲ ﺑﻘﻴﺖ ﺑﺤﻴﺮﺓ ﻣﻦ ﺍﻣﺮﻱ ..
‏[ ﻧﺒﺮﺍﺱ ﻛﺎﻧﺖ ﻣﻦ ﺟﻤﻴﻼﺕ ﺑﻐﺪﺍﺩ ﻭﺣﺴﻨﺎﻭﺍﺗﻬﺎ .. ﻣﻦ ﻋﺎﺋﻠﺔ ﻻﺑﺄﺱ ﺑﻬﺎ ﻟﻜﻨﻬﺎ ﻣﺮﻣﻮﻗﺔ ﺍﻳﻀﺎ .. ﺍﻫﻠﻬﺎ ﻛﺎﻧﻮﺍ ﺑﻮﺣﺪﺓ ﻣﻦ ﺍﻟﻤﺤﺎﻓﻈﺎﺕ ﺍﻟﺠﻨﻮﺑﻴﺔ ﻟﻜﻦ ﺍﺻﻮﻟﻬﻢ ﺑﻐﺪﺍﺩ .. ﻛﺒﺮﺕ ﻭﺗﺮﺑﺖ ﺑﺬﻳﺞ ﺍﻟﻤﺤﺎﻓﻈﺔ .. ﺍﻻ ﺍﻥ ﺍﺑﻮﻫﺎ ﻗﺮﺭ ﺑﻌﺪ ﺫﻟﻚ ﺍﻻﻧﺘﻘﺎﻝ ﺍﻟﺒﻐﺪﺍﺩ .. ﺍﺧﺘﻬﺎ ﺍﻡ ﻫﻴﺜﻢ ﺑﻌﺪ ﻣﺘﺰﻭﺟﺖ ﺑﻘﺖ ﺑﺎﻟﻤﺤﺎﻓﻈﺔ ﻭﻣﺎﺍﻧﺘﻘﻠﺖ .. ﻧﺒﺮﺍﺱ ﺭﻏﻢ ﺧﺴﺮﺕ ﺻﺪﻳﻘﺎﺗﻬﺎ ﻭﻣﺪﺭﺳﺘﻬﺎ ﻭﻣﻨﻬﻦ ﻣﺎﻫﻴﻦ ﺻﺪﻳﻘﺔ ﺍﻟﻄﻔﻮﻟﺔ ﻭﺍﻟﻤﺪﺭﺳﺔ ﺍﻻ ﺍﻧﻬﺎ ﻛﺎﻧﺖ ﻭﻓﻴﻪ ﻭﺩﺍﺋﻤﺎ ﺗﺠﻲ ﻭﺗﺘﻮﺍﺻﻞ ﻭﻳﺎﻫﻦ ﻭﺧﺎﺻﺔ ﺑﺰﻭﺍﺝ ﻣﺎﻫﻴﻦ ﺟﺎﻧﺖ ﻫﻢ ﺣﺎﺿﺮﺓ ..
ﺟﺎﻧﺖ ﺑﻐﺪﺍﺩ ﺍﻟﻬﺎ ﺑﻤﺜﺎﺑﺔ ﺑﻠﺪ ﺛﺎﻧﻲ ﻣﻮ ﻣﺤﺎﻓﻈﺔ ﺛﺎﻧﻴﺔ .. ﺑﺪﺕ ﺗﺘﻄﺒﻊ ﺑﻄﺒﻌﻬﻦ ﻭﺗﻠﺒﺲ ﻣﺜﻠﻬﻦ .. ﺷﻌﺮﻫﺎ ﻃﻮﻳﻞ ﻟﻠﺮﻛﺒﺔ ﺑﻄﻮﻝ ﺗﻨﻮﺭﺗﻬﺎ ﺍﻟﻘﺼﻴﺮﺓ ﻭﺳﻴﻘﺎﻧﻬﺎ ﺍﻟﺮﻓﻴﻌﺔ ﺍﻟﺒﻴﻀﺔ
ﻭﺟﻤﺎﻝ ﻭﺟﻬﻬﺎ ﺍﻟﺒﺮﻳﺊ ﺍﻟﻨﺎﺻﻊ ﺍﻟﺒﻴﺎﺽ ﻭﺍﻟﺼﻔﺎﺀ .. ﺍﻧﻌﺠﺐ ﺑﻴﻬﺎ ﺍﺣﺪ ﻭﺟﻬﺎﺀ ﺍﻟﺪﻭﻟﺔ .. ﻭﺍﻟﻲ ﻳﻘﺮﺏ ﺍﻻﺑﻮﻫﺎ .. ﺍﺑﻦ ﻋﻢ ﺍﺑﻮﻫﺎ ﻭﺍﻛﺒﺮ ﻣﻨﻬﺎ ﺑﺎﻟﻌﻤﺮ .. ﻟﻜﻦ ﺣﻴﺎﺓ ﺍﻟﺮﻓﺎﻫﻴﺔ ﻭﺍﻟﺴﻔﺮ ﻭﻛﻞ ﺳﺒﻞ ﺳﻌﺎﺩﺗﻬﺎ ﻣﺘﻮﻓﺮﺓ ﺑﻲ .. ﻭﺍﻓﻘﺖ ﻭﻫﻮ ﻫﻢ ﻛﺎﻥ ﻳﺤﺒﻬﺎ ﻭﻣﺎﻗﺼﺮ ﻭﻳﺎﻫﺎ ﺑﻜﻠﺸﻲ ﻛﻤﻠﺖ ﺩﺭﺍﺳﺘﻬﺎ ﻭﻋﻴﻨﻬﺎ ﺑﻤﻜﺎﻥ ﻳﻠﻴﻖ ﺑﻴﻬﺎ ..
ﻭﻟﺪﺕ ﺍﻟﻪ ﻭﻟﺪ ﻭﺑﻌﺪﻫﺎ ﺑﻨﺖ ﻭﺍﻻﺧﻴﺮ ﻫﻤﺎﻡ ﺍﻟﻲ ﻛﺎﻥ ﻋﻤﺮﺓ ﻋﺸﺮﺓ ﺳﻨﻮﺍﺕ ﺗﻘﺮﻳﺒﺎ ﺑﻌﺪ ﻣﺎﺩﺯﺗﻬﻢ ﻭﻣﻦ ﺩﻭﻥ ﻋﻠﻤﻪ ﻭﻱ ﺍﺧﻮﻫﺎ ﻭﻋﺎﺋﻠﺘﻪ ﻭﺟﺎﻧﺖ ﻏﺎﻳﺘﻬﺎ ﺣﻤﺎﻳﺘﻬﻢ ﻟﻜﻦ ﻟﻼﺳﻒ ..
ﻗﺎﻝ ﺗﻌﺎﻟﻰ : ‏( ﺃﻳﻨﻤﺎ ﺗﻜﻮﻧﻮﺍ ﻳﺪﺭﻛﻜﻢ ﺍﻟﻤﻮﺕ ﻭﻟﻮ ﻛﻨﺘﻢ ﻓﻲ ﺑﺮﻭﺝ ﻣﺸﻴﺪﺓ ... ‏)
ﺍﻭﻝ ﻣﺎﺳﻤﻌﺖ ﺍﻟﺨﺒﺮ ﺭﻛﻀﺖ ﻣﺜﻞ ﺍﻟﻤﺠﻨﻮﻧﺔ ﻭﺑﻤﻼﺑﺲ ﺍﻟﺒﻴﺖ ﺍﻟﻤﻠﺠﺄ ﺍﻟﻌﺎﻣﺮﻳﺔ ..
ﻛﺎﻧﺖ ﺍﺯﺩﺣﺎﻣﺎﺕ ﻭﻫﻮﺳﺔ ﻭﺍﻟﻤﻄﺎﻓﻲ ﻭﺍﻻﺳﻌﺎﻑ ﻭﺍﻟﻨﺎﺱ ﻛﻠﻬﺎ ﺗﺒﺠﻲ ﻭﺗﺼﺮﺥ ..
ﺗﺪﻓﻊ ﺑﻴﻬﻢ ﻭﺗﺮﻳﺪ ﺗﻮﺻﻞ ﻣﺎﺗﮕﺪﺭ .. ﺷﺎﻓﺖ ﺷﻠﻮﻥ ﻳﻨﻘﻠﻮﻥ ﺍﻟﺠﺜﺚ ﺑﺎﻟﺒﻄﺎﻧﻴﺎﺕ ﻭﺟﺎﻧﺖ ﻣﻔﺤﻤﺔ ..
ﻣﺎﺍﺗﺤﻤﻠﺖ ﺍﻟﻤﻨﻈﺮ ﻭﻭﮔﻌﺖ ..
ﮔﻌﺪﺕ ﻭﺷﺎﻓﺖ ﻧﻔﺴﻬﺎ ﺑﻮﺳﻂ ﺍﻻﺟﻬﺰﺓ .. ﮔﻠﺒﻬﺎ ﺣﺲ ﺍﻧﻬﺎ ﺑﻌﺪ ﻣﺎﺗﺸﻮﻓﻬﻢ ﺻﺎﺑﺘﻬﺎ ﺟﻠﻄﺔ ﺩﻣﺎﻏﻴﺔ ﺳﺒﺒﺖ ﺑﺸﻠﻠﻬﺎ ..
ﺍﻳﺎﻡ ﻭﺯﻭﺟﻬﺎ ﻣﻮ ﻳﻤﻬﺎ ﺑﺲ ﺍﻡ ﻫﻴﺜﻢ ﺍﺧﺘﻬﺎ ﺟﺎﻧﺖ ﻣﮕﺎﺑﻠﺘﻬﺎ ﻭﻣﺎﺗﺮﻛﺘﻬﺎ ..
ﺍﻡ ﻫﻴﺜﻢ ﻻﺑﺴﺔ ﺍﺳﻮﺩ ﻭﻻﺯﻣﺔ ﻗﺮﺁﻧﻬﺎ ﺗﺒﺠﻲ ﻭﺗﻘﺮﺃ .. ﻧﺒﺮﺍﺱ ﺧﺎﻓﺖ ﺗﺴﺄﻟﻬﺎ .. ﺍﻭ ﻋﻦ ﻣﻨﻮ ﺗﺴﺄﻟﻬﺎ ﻋﻦ ﻭﻟﺪﻫﺎ ﻟﻮ ﺍﺧﻮﻫﺎ ﻭﻋﺎﺋﻠﺘﻪ ..
ﺟﺎﻥ ﺍﻟﺨﺒﺮ ﻣﺜﻞ ﺍﻟﺼﺎﻋﻘﺔ ﻟﻤﺎ ﻋﺮﻓﺖ ﺍﻭﻻﺩﻫﺎ ﺍﻟﺜﻼﺛﺔ ﺻﺎﺭﻭﺍ ﺭﻓﺎﺕ ﻭﺯﻭﺟﻬﺎ ﺣﻤﻠﻬﺎ ﻣﺴﺆﻭﻟﻴﺔ ﻣﻮﺗﻬﻢ ..
ﻟﺪﺭﺟﺔ ﻛﻞ ﻳﻮﻡ ﻳﺬﻛﺮﻫﺎ ﺑﻴﻬﻢ ﻭﺑﺼﻮﺭﻫﻢ ﺍﻟﻲ ﻣﻠﺖ ﺍﻟﺒﻴﺖ
ﺑﺪﻭﻥ ﻣﺮﺍﻋﺎﺓ ﺍﻟﻤﺸﺎﻋﺮﻫﺎ ﻭﺍﻧﻪ ﺍﻟﻲ ﺻﺎﺭ ﻗﻀﺎﺀ ﻭﻗﺪﺭ ﻭﻣﻦ ﺧﻮﻓﻬﺎ ﻋﻠﻴﻬﻢ ﻫﻴﺞ ﺳﻮﺕ ..
ﺑﺲ ﻫﻮ ﻭﺑﻌﺪ ﻣﺎﺻﺎﺭﺕ ﻣﻘﻌﺪﺓ ﺍﺧﺘﻔﻰ ﺫﺍﻙ ﺍﻟﺤﺐ ﻭﺍﻟﺪﻻﻝ ﺍﻟﻬﺎ .. ﺻﺎﺭ ﻳﻐﻴﺐ ﻫﻮﺍﻱ ﻋﻦ ﺍﻟﺒﻴﺖ ﻭﻣﺎﻳﺤﺠﻲ ﺍﻻ ﺑﺎﻻﺳﺒﻮﻉ ﻣﺮﺓ ﻳﻨﻄﻴﻬﺎ ﻓﻠﻮﺱ ﻭﻳﻮﺻﻲ ﺍﻟﺤﻤﺎﻳﺔ ﻭﻳﺎﺧﺬ ﺍﺧﺒﺎﺭ ﺍﻟﺒﻴﺖ ﺧﻼﻝ ﺍﻻﺳﺒﻮﻉ ﻣﻨﻬﻢ ﻭﻳﺮﻭﺡ ..
ﺳﻔﺮﺍﺗﻪ ﻛﺜﺮﺕ ﻭﻃﻠﻌﺎﺗﺔ ﻭﺭﻏﻢ ﻫﻲ ﺷﺎﻛﺔ ﻋﻨﺪﺓ ﻋﻼﻗﺎﺕ
ﺑﻘﺖ ﻻﺑﺴﺔ ﺍﻻﺳﻮﺩ ﻋﻠﻴﻬﻢ ﻟﻼﻥ ﻭﻣﺎﻧﺰﻋﺘﻪ ..
ﺑﺲ ﻋﺎﺷﺖ ﻭﺣﻴﺪﺓ ﺍﻟﻲ ﻣﻬﻮﻥ ﻋﻠﻴﻬﺎ ﻭﺟﻮﺩ ﺻﺪﻳﻘﺎﺗﻬﺎ ﻭﻋﺰﻭﻣﺎﺗﻬﻦ ﺍﻭ ﻣﺮﺍﺕ ﺗﺮﻭﺡ ﻳﻢ ﺍﺧﺘﻬﺎ ﺑﻤﺤﺎﻓﻈﺘﻬﻢ ﻭﺗﺴﺘﺮﺟﻊ ﺫﻛﺮﻳﺎﺗﻬﺎ ﻭﻃﻔﻮﻟﺘﻬﺎ ﻫﻨﺎﻙ ..
ﻟﻬﺬﺍ ﺍﻟﺴﺒﺐ ﻛﺎﻧﺖ ﻣﺼﺮﺓ ﻟﺒﻘﺎﺀ ﺭﺿﺎﺀ ﻭﻋﺎﺋﻠﺘﻬﺎ ﻭﻳﺎﻫﺎ ﺣﺘﻰ ﺗﺤﺲ ﺑﻠﻤﺔ ﺍﻟﻌﺎﺋﻠﺔ ﻭﻣﺎﺗﺒﻘﻰ ﻭﺣﻴﺪﺓ ﻃﻮﻝ ﻋﻤﺮﻫﺎ ..
ﻟﻤﺎ ﺷﺎﻓﺖ ﺣﻜﻤﺖ ﺍﺳﺘﺮﺟﻌﺖ ﺫﻛﺮﻳﺎﺗﻬﺎ ﻭﺍﻭﺟﺎﻋﻬﺎ ﻭﺣﺴﺖ ﺍﻧﻪ ﺣﻜﻤﺖ ﺍﺑﻨﻬﺎ ﻫﻤﺎﻡ ﺍﻟﻲ ﻓﻘﺪﺗﻪ ..
ﻭﺑﻘﺖ ﺗﺒﺎﻭﻉ ﻋﻠﻴﻪ ﺑﻨﻈﺮﺗﻬﺎ ﺍﻻﺑﻨﻬﺎ .. ﺍﻻﺑﺘﺴﺎﻣﺔ ﻣﺎﻓﺎﺭﻗﺘﻬﺎ
ﺣﻜﻤﺖ :
ﻧﻈﺮﺍﺗﻬﺎ ﺍﻟﻲ ﻏﺮﻳﺒﺔ ﻭﻣﻘﻠﻘﻪ .. ﻣﻦ ﻟﻤﺴﺘﻨﻲ ﺣﺴﻴﺖ ﺑﺸﻲ ﻏﺮﻳﺐ ﻭﻟﻤﺎ ﺫﻛﺮﺕ ﺍﺑﻨﻬﺎ ﻋﺮﻓﺖ ﺟﺎﻧﺖ ﺗﺸﻮﻓﻪ ﺑﻴﻪ ..
ﻗﻬﺮﺗﻨﻲ ﺣﺎﻟﺘﻬﺎ .. ﺍﻧﺴﺎﻧﺔ ﺭﻏﻢ ﻛﺒﺮﻫﺎ ﺑﺲ ﺑﻌﺪﻫﺎ ﻣﺤﺘﻔﻈﺔ ﺑﺠﻤﺎﻟﻬﺎ .. ﺷﻠﻮﻥ ﮔﺪﺭ ﺯﻭﺟﻬﺎ ﻳﺘﺮﻛﻬﺎ ﻭﻳﻌﺎﻗﺒﻬﺎ ﻋﻠﻰ ﻗﺪﺭ ﺍﻟﻠﻪ ﻭﺣﻜﻤﺘﻪ .. ﻫﺬﺍ ﺍﻟﺸﻲ ﻳﻌﺘﺒﺮ ﻛﻔﺮ ..
ﻋﺎﻳﻨﺖ ﻋﻠﻰ ﺑﺴﻤﺔ ﺍﻟﻲ ﻭﺟﻮﺩﻫﺎ ﺑﺤﻴﺎﺗﻲ ﺻﺎﺭ ﺻﺪﻓﻪ ﺑﺲ ﻣﺎﺍﮔﺪﺭ ﺍﺗﺨﻴﻞ ﺍﻧﻪ ﺑﻴﻮﻡ ﺍﺟﺮﺣﻬﺎ ﺍﻭ ﺍﺫﻳﻬﺎ ..
ﺍﻧﻲ ﻣﺎﺍﻗﺮﺏ ﻓﺮﺣﺔ ﮔﺪﺍﻣﻬﺎ ﺧﺎﻑ ﺗﻀﻮﺝ ﻣﻮ ﺩﻭﺭ ﺍﻋﺬﺑﻬﺎ ﻣﺜﻞ ﻣﺎﻳﺴﻮﻱ ﺭﺟﻞ ﻧﺒﺮﺍﺱ ..
ﻛﻤﻞ ﺍﻻﻛﻞ ﻭﺧﻠﻮﻩ ﻋﻠﻰ ﻃﺎﻭﻟﺔ ﺟﺒﻴﺮﺓ .. ﻭﻫﺎﻱ ﺟﺎﻧﺖ ﺍﻭﻝ ﻣﺮﺓ ﻧﮕﻌﺪ ﺑﻴﻬﺎ ﻫﻴﺞ .. ﻣﺘﻌﻮﺩﻳﻦ ﻋﻠﻰ ﮔﻌﺪﺕ ﺍﻟﻜﺎﻉ ﺍﺭﻳﺢ
ﺑﺲ ﻻﻥ ﻫﻲ ﻃﻠﺒﺖ ﻭﻣﺎﺗﮕﺪﺭ ﺗﮕﻌﺪ ﺑﺎﻟﮕﺎﻉ ..
ﺍﻣﻲ ﻣﺨﻠﻴﻪ ﻓﺮﺣﺔ ﺑﺤﻀﻬﺎ ﻭﺗﻮﻛﻠﻬﺎ ﻭﻋﻤﺘﻲ ﻣﻠﺘﻬﻴﺔ ﺗﺎﻛﻞ ﻭﺑﺴﻤﺔ ﻫﻢ ﺟﻮﻋﺎﻧﺔ ﻛﻠﺶ .. ﺑﺲ ﺍﻧﻲ ﺍﺣﺲ ﻧﻔﺴﻲ ﻣﺴﺪﻭﺩﺓ ﻭﺟﻨﺖ ﺍﻛﻞ ﺷﻮﻳﺔ ﻣﺠﺎﻣﻠﺔ ﺑﺲ ..
ﻭﻛﻠﻤﺎ ﺍﺭﻓﻊ ﺭﺍﺳﻲ ﺍﺷﻮﻓﻬﺎ ﺗﻌﺎﻳﻦ ﻋﻠﻴﻨﺎ ﺑﻔﺮﺡ . ﻣﻌﻘﻮﻟﺔ ﺍﻛﻮ ﻫﻴﺞ ﻧﺎﺱ ﺗﻔﺮﺡ ﺑﻮﺟﻮﺩ ﻧﺎﺱ ﻏﺮﺏ ﺑﺤﻴﺎﺗﻬﻢ ﺑﺲ ﺣﺘﻰ ﻣﺎﻳﺤﺴﻮﻥ ﺑﺎﻟﻮﺣﺪﺓ ..
ﺟﻨﺖ ﺩﻭﻡ ﺍﻗﺮﺃ ﻛﺘﺐ ﻧﻔﺴﻴﺔ ﻭﻣﺮﺓ ﻗﺮﻳﺖ ﻋﻦ ﺣﺎﻟﺘﻬﺎ ﻭﺗﻌﻮﻳﺾ ﺍﻟﻨﻘﺺ ﺑﺪﺍﺧﻠﻬﺎ .. ﺍﻟﺼﺮﺍﺣﺔ ﺑﺪﻳﺖ ﺍﺗﻌﺎﻃﻒ ﻭﻳﺎﻫﺎ ﺑﺲ ﺧﻮﻓﻲ ﻣﻦ ﺯﻭﺟﻬﺎ ﻭﺷﻠﻮﻥ ﺭﺍﺡ ﻳﺘﻘﺒﻞ ﻭﺟﻮﺩﻧﺎ ﺑﺒﻴﺘﺔ ..
ﺑﻌﺪ ﻣﺎﻛﻤﻠﻨﺎ ﻭﺻﺖ ﺍﻟﻤﺴﺎﻋﺪﺓ ﺍﻭ ﺍﻟﻌﺎﻣﻠﺔ ﺗﺼﻌﺪﻧﺎ ﻟﻠﻐﺮﻑ ﺻﻌﺪﺕ ﺍﻟﻐﺮﺍﺽ ﺍﻣﻲ ﻭﻋﻤﺘﻲ ﺭﺍﺩﻥ ﺑﻐﺮﻓﻪ ﻭﺣﺪﺓ ﻭﺑﺴﻤﺔ ﻭﺍﻧﻲ ﺑﻐﺮﻓﻪ ..
ﺩﺧﻠﺖ ﻟﻠﻐﺮﻓﻪ ﻭﻛﺄﻧﻬﺎ ﻓﻨﺪﻕ ﺧﻤﺲ ﻧﺠﻮﻡ ..
ﺑﺴﻤﺔ ﻓﺮﺣﺖ ﻭﺗﮕﻤﺰ ﻋﻠﻰ ﺍﻟﺠﺮﺑﺎﻳﺔ ﻣﺜﻞ ﺍﻟﻄﻔﻞ
" ﺗﺨﺒﻞ ﺗﺨﺒﻞ ﺍﻟﻐﺮﻓﺔ ﺍﻟﻐﺮﻓﺔ "
ﺍﺑﺘﺴﻤﺖ " ﻳﻠﺔ ﺧﻠﻲ ﻧﻨﺎﻡ ﺍﻧﻲ ﺗﻌﺒﺎﻥ ﻛﻠﺶ "
ﺑﺲ ﻫﻲ ﺑﻘﺖ ﺗﻔﺘﺮ ﺑﺎﻟﻐﺮﻓﻪ ﻭﻣﺘﻌﺠﺒﻪ .. ﻓﺘﺤﺖ ﺑﺎﺏ ﺑﺪﺍﺧﻞ ﺍﻟﻐﺮﻓﻪ ﺷﺎﻓﺘﻪ ﺣﻤﺎﻡ ﺷﻬﮕﺖ
" ﻫﺬﺍ ﺣﻤﺎﻡ ﺣﻤﺎﻡ ﻳﺨﺒﻞ ﻳﺨﺒﻞ "
ﺑﺪﻟﺖ ﻭﺧﻠﻴﺖ ﺭﺍﺳﻲ ﻋﻠﻰ ﺍﻟﻤﺨﺪﺓ ﺗﻌﺒﺎﻥ ﻣﺎﺣﺴﻴﺖ ﺑﺮﻭﺣﻲ .. ﻟﻠﻌﺼﺮ ﻳﻠﺔ ﮔﻌﺪﺕ ﻭﻳﻤﻲ ﺑﺴﻤﺔ ﻧﺎﻳﻤﺔ ..
ﻏﻄﻴﺘﻬﺎ ﻭﮔﻤﺖ ..
ﺭﺣﺖ ﺍﻟﻐﺮﻓﺘﻬﻦ ﺩﮔﻴﺘﻬﺎ ﻣﺎﻛﻮ ﺍﺣﺪ ﻓﺘﺤﺖ ﺍﻟﺒﺎﺏ ﺟﺎﻧﺖ ﺑﺲ ﻓﺮﺣﺔ ﻧﺎﻳﻤﺔ .. ﺩﺧﻠﺖ ﻭﺳﺪﻳﺖ ﺍﻟﺒﺎﺏ ..
ﺍﺗﻘﺮﺑﺖ ﻣﻨﻬﺎ ﻧﻤﺖ ﺑﺼﻔﻬﺎ ﻭﺍﺷﻢ ﺑﻴﻬﺎ .. ﻭﻻﻳﻨﺸﺒﻊ ﻣﻨﻬﺎ
ﺍﺧﺬﺗﻬﺎ ﺍﻟﺤﻀﻨﻲ ﻭﻫﻲ ﻧﺎﻳﻤﺔ ..
ﻓﺮﺣﺎﻥ ﻋﻠﻰ ﻧﻮﻣﺘﻬﺎ ﺑﺤﻀﻨﻲ .. ﺍﻧﻔﺘﺤﺖ ﻟﻨﻬﺎ ﺑﺴﻤﺔ
" ﺩﻭﺭﺕ ﻋﻠﻴﻚ ﺩﻭﺭﺕ ﻋﻠﻴﻚ .. ﻋﻔﺘﻨﻲ ﻋﻔﺘﻨﻲ ﻭﻧﻤﺖ ﻳﻢ ﻓﺮﺣﺔ ﻓﺮﺣﺔ "
ﺍﺑﺘﺴﻤﺖ " ﻓﺮﺣﺔ ﺑﻨﺘﺞ ﻭﺑﻨﺘﻲ ﻳﻌﻨﻲ ﺑﻨﺘﻨﺎ .. ﺩﻭﺭ ﺧﻠﻴﻬﺎ ﺗﻨﺎﻡ ﻳﻤﻨﺎ "
ﻫﺰﺕ ﺟﺘﻔﻬﺎ " ﻣﺎ ﻣﺎ "
ﺍﺷﺮﺗﻠﻬﺎ ﺗﺠﻲ ﺑﺤﻀﻨﻲ ﺍﺟﺖ ﺗﺮﻛﺾ ..
" ﺍﻧﺘﻲ ﺣﺒﻴﺒﺘﻲ ﻭﻫﻲ ﺑﻨﺘﻲ .. ﺍﺛﻨﻴﻨﻜﻢ ﺍﺣﺒﻜﻢ ﻭﻣﺎﺍﻓﺮﻗﻜﻢ ﺍﻧﺘﻲ ﻣﻮ ﺗﺤﺒﻴﻬﺎ ﺍﻟﻔﺮﺣﺔ ﻭﺍﻣﻲ ﺗﮕﻮﻝ ﺟﻨﺘﻲ ﺗﺒﺪﻟﻴﻠﻬﺎ ﻭﺗﺴﻮﻳﻠﻬﺎ ﻣﻤﺔ ﻭﺗﻮﻛﻠﻴﻬﺎ ﻟﻴﺶ ﻫﺴﺎ ﻣﺎﺗﺮﺩﻳﻬﺎ ؟
ﺳﻜﺘﺖ ﻭﺑﻌﺪﻫﺎ ﺭﺩﺕ " ﺍﻱ ﺍﺣﺒﻬﺎ ﺍﺣﺒﻬﺎ ﺑﺲ ﺍﻧﺖ ﺍﻟﻲ ﺍﻟﻲ ﻣﻮ ﺍﻟﻬﺎ ﺍﻟﻬﺎ "
ﻫﻤﺴﺘﻠﻬﺎ " ﺍﻧﻲ ﺍﻟﻜﻢ ﺍﺛﻨﻴﻨﻜﻢ ﻭﺑﺴﺘﻬﺎ ﺑﺨﺪﻫﺎ ﺿﺤﻜﺖ "
ﮔﻌﺪﺕ ﻓﺮﺣﺔ ﻋﺎﻳﻨﺖ ﻋﻠﻴﻨﺎ ﺻﺎﺣﺖ " ﻣﺎﻣﺎ ﻣﺎﻣﺎ "
ﻋﺮﻓﺘﻬﺎ ﺗﻘﺼﺪ ﺍﻣﻲ .. ﺷﻠﺘﻬﺎ ﻭﻧﺰﻟﻨﺎ ..
ﻟﮕﻴﻨﺎﻫﻦ ﮔﺎﻋﺪﺍﺕ ﺑﺎﻟﺤﺪﻳﻘﺔ ..
ﻧﺰﻟﺖ ﻓﺮﺣﺔ ﻭﺭﻛﻀﺖ ﺍﻻﻣﻲ ..
ﺭﺣﺖ ﻳﻤﻬﻦ ﮔﻌﺪﺕ .. ﺟﺎﺑﺖ ﺍﻟﻌﺎﻣﻠﺔ ﮔﻬﻮﺓ ﻭﻛﺎﻛﻮ ﺑﺼﻔﻬﺎ ﻭﻗﻄﻊ ﻛﻴﻚ ﻃﻌﻤﻬﻦ ﺑﺤﻴﺎﺗﻲ ﻣﺎﺿﺎﻳﮕﺔ ..
ﺍﻣﻲ ﻭﻋﻤﺘﻲ ﺭﺍﺩﻥ ﺟﺎﻱ ﻭﺑﺴﻤﺔ ﻫﻢ ..
ﺍﻧﻲ ﺷﺮﺑﺖ ﮔﻬﻮﺓ ﻭﺍﻟﻜﺎﻛﻮ ﻓﺮﻧﺴﻲ ﺟﺎﻥ ..
ﺑﻘﻴﺖ ﺑﺪﺍﺧﻠﻲ ﺍﺗﺴﺎﺋﻞ ؟؟
" ﺍﺣﻨﺔ ﻛﻠﻨﺎ ﺑﺒﻠﺪ ﻭﺍﺣﺪ ﻋﺎﻳﺸﻴﻦ .. ﻭﺍﻟﺤﺼﺎﺭ ﻣﻔﺮﻭﺽ ﻋﻠﻴﻨﺎ ﻛﻠﻨﺎ .. ﻟﻴﺶ ﻫﻢ ﻋﻴﺸﺘﻬﻢ ﺍﺣﺴﻦ ﻣﻨﺎ .. ﻭﻟﻴﺶ ﺍﻛﻠﻬﻢ ﻣﺨﺘﻠﻒ ﻭﺍﺷﻴﺎﺀ ﺟﺎﻳﺒﻴﻬﺎ ﻣﻦ ﻓﺮﻧﺴﺎ ﻭﻏﻴﺮﻫﺎ ﻭﺍﺣﻨﺔ ﺣﺴﺮﺓ ﻋﻠﻴﻨﺎ ﺍﻟﻨﺴﺘﻠﺔ ﻧﺸﺘﺮﻳﻬﺎ ..
ﺍﺗﻨﻬﺪﺕ ﻭﺟﺮﻳﺖ ﺣﺴﺮﺓ ﻃﻮﻳﻠﻪ .. ﺧﺎﻟﻪ ﻧﺒﺮﺍﺱ ﺟﺎﻥ ﺑﺎﻟﻬﺎ ﻳﻤﻲ ﻭﺟﻨﻬﺎ ﻋﺮﻓﺖ ﺍﻟﻲ ﺑﻴﻪ ..
" ﺣﻜﻤﺖ ؟؟ ﺷﺒﻴﻚ ﻳﺎﺍﻣﻲ ﺍﺣﺴﻚ ﻣﺎﻣﺮﺗﺎﺡ "
ﺭﺩﻳﺖ " ﻻ ﻣﻮ ﻫﻴﺞ ﺑﺲ ﺍﺭﻳﺪ ﺍﻋﺮﻑ ﺍﺣﻨﺔ ﻟﺸﻮﻛﺖ ﻧﺒﻘﻰ ﻫﻨﺎ .. ﺍﺫﺍ ﻣﻮ ﺍﻟﻴﻮﻡ ﺑﺎﺟﺮ ﻳﺠﻲ ﺭﺟﻠﺞ ﻭﻳﺴﺄﻝ ﻭﺍﻟﻲ ﺑﺎﻟﺪﻭﻟﺔ ﻣﺎﺗﺨﻔﻰ ﻋﻠﻴﻬﻢ ﺧﺎﻓﻴﻪ .. ﺍﻧﻲ ﻣﺎﺧﺎﻳﻒ ﻣﻦ ﺍﺣﺪ ﺑﺲ ﻣﺎﺍﺭﻳﺪ ﺍﻣﻲ ﻭﻋﻤﺘﻲ ﻭﻋﺎﺋﻠﺘﻲ ﺗﺘﺸﺘﺖ ﺑﻌﺪﻱ ﻣﺎﺑﻘﻴﺖ ﺑﺲ ﺍﻧﻲ ﺍﻟﻬﻢ "
ﺭﺩﺕ " ﻻﺗﺨﺎﻑ ﺣﺴﺒﺖ ﺣﺴﺎﺏ ﻛﻠﺸﻲ .. ﺍﻋﺮﻑ ﻭﺟﻮﺩﻛﻢ ﻫﻨﺎ ﻣﻮ ﺑﺼﺎﻟﺤﻜﻢ ﻭﺣﺠﻴﻨﺎ ﺍﻧﻲ ﻭﺍﻣﻚ ﺑﺎﻟﻤﻮﺿﻮﻉ .. ﻋﻨﺪﻱ ﺑﻴﺖ ﺍﻫﻠﻲ ﺑﺸﺎﺭﻉ ﻓﻠﺴﻄﻴﻦ ﻭﻫﻢ ﻣﻮ ﺑﻌﻴﺪ ﺑﺲ ﻫﻮ ﻣﺘﺮﻭﻙ ﺻﺎﺭ ﻫﻮﺍﻱ ..
ﻛﻢ ﻳﻮﻡ ﺍﺧﻠﻲ ﺍﺣﺪ ﻳﻨﻈﻔﻪ ﺍﻟﻜﻢ ﻭﺗﻜﻌﺪﻭﻥ ﺑﻲ ﻭﺍﻧﻲ ﻫﻢ ﻣﺎﺍﻋﻮﻓﻜﻢ ﻭﻫﻴﺞ ﻳﺼﻴﺮ ﻋﻨﺪﻱ ﺍﺣﺪ ﻳﻤﻲ ..
ﺭﺩﺕ ﺍﺣﺠﻲ ﺍﻡ ﺧﺰﺭﺗﻨﻲ ..
ﺑﺲ ﺧﺎﻟﻪ ﻧﺒﺮﺍﺱ ﺍﺑﺘﺴﻤﺖ " ﺍﺣﺠﻲ ﻳﺤﻜﻤﺖ ﻟﺘﺴﻜﺖ ﺍﺭﻳﺪ ﺍﺳﻤﻊ ﺷﻨﻮ ﺍﻟﻲ ﻗﺎﻟﻘﻚ ؟ "
ﺭﺩﻳﺖ " ﺍﻟﺒﻴﺖ ﻧﮕﻌﺪ ﺑﻲ ﻣﺆﻗﺖ ﻭﺑﻴﻦ ﻣﺎﺍﻟﮕﻲ ﺷﻐﻞ ﺍﺩﻓﻌﻠﺞ ﺍﻳﺠﺎﺭﻩ "
ﺍﺑﺘﺴﻤﺖ " ﺍﻟﻲ ﺗﺮﻳﺪﺓ .. ﻭﺍﺫﺍ ﻋﻠﻰ ﺍﻟﺸﻐﻞ ﺍﻧﻲ ﺍﺷﻮﻓﻠﻚ ﺷﻐﻠﺔ ﻣﻨﺎﺳﺒﺔ "
ﻫﺰﻳﺖ ﺭﺍﺳﻲ " ﺍﻟﻠﻪ ﻳﻜﺜﺮ ﺧﻴﺮﺝ .. ﻣﺎﺗﻌﺮﻓﻴﻨﺎ ﻭﺳﺎﻋﺪﺗﻴﻨﺎ ﻭﻓﺘﺤﺘﻲ ﺑﻴﺘﺞ ﺑﺲ ﻣﺎﺍﺭﻳﺪ ﻧﺜﮕﻞ ﻋﻠﻴﺞ .. ﺑﺎﺟﺮ ﻧﺮﻭﺡ ﻟﻠﺒﻴﺖ ﻭﻧﻨﻈﻔﻪ ﺍﺣﻨﺔ ﻭﺗﮕﻌﺪ ﺑﻲ ﺍﻧﻲ ﻫﻨﺎ ﻣﺎﻣﺮﺗﺎﺡ ﺍﻟﺼﺮﺍﺣﺔ "
ﺭﺩﺕ " ﺍﻟﻲ ﺗﺮﺩﻭﻩ ﻳﺼﻴﺮ ﺑﺎﺟﺮ ﺍﺧﺬ ﺟﻤﻴﻠﺔ ﻭﻳﺎﻧﺎ ﻭﻫﻢ ﺗﺴﺎﻋﺪﻛﻢ ﻫﻨﺎﻙ "
ﺛﺎﻧﻲ ﻳﻮﻡ ﺗﺮﻳﮕﻨﺎ ﻭﺍﺧﺬﻧﺎ ﻏﺮﺍﺿﻨﺎ ﻭﻃﻠﻌﻨﺎ ﺍﺧﺬﺗﻨﺎ ﺑﺴﻴﺎﺭﺗﻬﺎ ﺍﻟﺨﺎﺻﻪ ﺟﺎﻥ ﺑﻴﻬﺎ ﺳﺎﻳﻖ ..
ﻭﺻﻠﻨﺎ ﺍﻟﺒﻴﺖ ﺣﻠﻮ ﻭﺟﺒﻴﺮ ﻭﺑﻲ ﺣﺪﻳﻘﻪ ﻭﻣﺎﺍﻗﺼﺮ ﻋﻦ ﺑﻴﺘﻬﺎ ﺑﺲ ﺫﺍﻙ ﺍﻓﺨﻢ ..
ﻣﻦ ﺩﺧﻠﺖ ﻟﻬﺬﺍ ﺍﻟﺒﻴﺖ ﺣﺴﻴﺖ ﺑﻲ ﺑﺪﻓﻮ ﻭﺭﺍﺣﺔ ﻣﻮ ﻣﺜﻞ ﺫﺍﻙ ﺍﺑﺪ ﻣﺎﺍﺭﺗﺎﺣﻴﺖ ﺑﻲ ..
ﺟﺎﻥ ﻣﺄﺛﺚ ﻭﻛﻠﺸﻲ ﺑﻲ ﺣﺘﻰ ﺗﻠﻔﻮﻥ .. ﻓﺮﻥ ﻭﻃﺒﺎﺥ ﺣﺪﻳﺚ ..
ﺟﺎﻧﺖ ﺗﻌﺎﻳﻦ ﻋﻠﻰ ﺍﻟﻐﺮﺍﺽ ﻭﺗﺘﻠﻤﺲ ﺑﻴﻬﻦ ﻭﻛﻠﻬﻦ ﺗﺮﺍﺏ .
ﺍﺧﻮﻱ ﺍﺛﺜﺔ ﻛﻠﻪ ﻣﻦ ﺍﻟﻜﻮﻳﺖ ﺑﺲ ﻣﺎﺍﺗﻬﻨﻰ ﺑﻲ ..
ﺑﻌﺪ ﻣﺎﺭﺍﺣﻮﺍ ﺍﻫﻠﻲ ﺑﻘﺖ ﺑﻲ ﺭﻳﺤﺔ ﺍﺧﻮﺍﻧﻲ ﻭﻋﺎﺋﻠﺘﺔ ﺟﻨﺎ ﻧﻠﺘﻢ ﻛﻠﻨﺎ ﻫﻨﺎ ﻭﻧﺴﻬﺮ ﻭﺑﺎﻟﺤﺪﻳﻘﻪ ﻳﺴﻮﻳﻠﻨﺎ ﻣﺸﺎﻭﻱ ..
ﻫﺎﻱ ﺍﻟﺤﺪﻳﻘﻪ ﺗﻌﺐ ﻋﻠﻴﻬﺎ ﻫﻮ ﻭﻫﺴﺎ ﻛﻠﻬﺎ ﻳﺎﺑﺴﺔ ﻭﺫﺍﺑﻠﺔ
ﻣﻦ ﻳﻮﻡ ﺍﻟﺮﺍﺣﻮﺍ ﻭﺍﻧﻲ ﻣﺎﺩﺧﻠﺖ ﺍﻟﺒﻴﺖ ﺑﻌﺪ ﺍﺑﺪ ..
ﻫﺎﻱ ﺍﻭﻝ ﻣﺮﺓ ﺍﺩﺧﻠﻪ .
ﺑﺠﺖ ﺍﻣﻲ ﻣﺎﺍﺗﺤﻤﻠﺖ ﺩﻣﻮﻋﻬﺎ ﺣﻀﻨﺘﻬﺎ .. ﻻﺗﺒﺠﻴﻦ ﺧﺎﻟﺔ ﺍﻋﺘﺒﺮﻳﻨﺎ ﺍﺣﻨﺔ ﺍﻫﻠﺞ ﻭﻫﺬﺍ ﺑﻴﺘﺞ ﺍﺻﻼ ..
ﺗﻌﺎﻱ ﻛﻞ ﻳﻮﻡ ﻭﺧﻠﺼﻲ ﺍﻟﻨﻬﺎﺭ ﻳﻤﻨﺎ ﻭﺑﻨﺎﺗﻲ ﺑﻌﺪ ..
ﺭﺩﺕ ﻋﻤﺘﻲ " ﺍﻱ ﻭﺍﻟﻠﻪ ﺍﺣﻨﺔ ﻫﻢ ﻣﺎﻧﻌﺮﻑ ﺍﺣﺪ ﺑﺲ ﺍﻧﺘﻲ ﺗﻌﺎﻱ ﺧﻴﺔ ﻫﻨﺎ ﻭﻧﻀﻮﮔﺞ ﺍﻛﻠﻨﺎ ﻣﺎﻝ ﺍﻟﺠﻨﻮﺏ ﻣﻮ ﺗﺤﺒﻴﻪ ﺍﻧﺘﻲ "
ﺍﺑﺘﺴﻤﺖ ﻭﺭﺩﺕ " ﺍﻥ ﺷﺎﺀ ﺍﻟﻠﻪ ﻟﻴﺶ ﻫﻮ ﺍﻧﻲ ﺍﮔﺪﺭ ﺑﻌﺪ ﺍﻋﻮﻓﻜﻢ "
ﻋﺎﻳﻨﺖ ﻋﻠﻰ ﺍﻣﻲ :
" ﺭﺟﻌﺘﻴﻨﻲ ﺍﻟﺬﻛﺮﻳﺎﺗﻲ ﻭﻱ ﻣﺎﻫﻴﻦ .. ﺻﺢ ﻣﺎﺗﺤﺒﻴﻦ ﺍﺫﻛﺮﻫﺎ ﺑﺲ ﻣﻮ ﺑﻴﺪﻱ ﻣﻦ ﺍﺷﻮﻓﺞ ﺍﺗﺬﻛﺮﻫﺎ .. ﺟﺎﻧﺖ ﻭﻓﻴﺔ ﻛﻠﺶ ﺣﺘﻰ ﻣﻦ ﺍﻧﺘﻘﻠﻨﺎ ﻟﻬﻨﺎ ﺟﺎﻧﺖ ﺗﺘﺼﻞ ﻭﺗﺴﺄﻝ ﻋﻠﻴﻪ ﻣﻦ ﺍﺑﺪ ﻣﺎﻧﺴﺘﻨﻲ ﺣﺘﻰ ﻣﻦ ﺗﺰﻭﺟﺖ "
ﺍﺗﻨﻬﺪﺕ ﺍﻣﻲ " ﻫﻲ ﺟﺎﻧﺖ ﻭﻓﻴﺔ ﻭﻳﺎﺝ ﺑﺲ ﻏﺪﺭﺕ ﺑﻴﻪ ﻭﺑﺄﺑﻮﻱ "
ﺭﺍﺩﺕ ﺗﺤﺠﻲ ﺧﺎﻟﻪ ﻧﺒﺮﺍﺱ ﺍﺷﺮﺗﻠﻬﺎ ﺍﻣﻲ ﻣﺎﺗﺤﺠﻲ ﻭﺍﺧﺘﻨﮕﺖ ﺑﻌﺒﺮﺗﻬﺎ ..
ﺭﺣﺖ ﻭﺣﻀﻨﺖ ﺍﻣﻲ " ﻻﺗﺒﺠﻴﻦ ﺑﻌﺪ ﻋﻴﻮﻧﻲ ﺟﻨﺖ ﻭﺍﺣﺪ ﻣﻦ ﺍﻟﻨﺎﺱ ﻇﺎﻟﻤﻬﺎ ﺍﻟﺒﻴﺒﻴﺘﻲ ﺑﺲ ﺑﻌﺪ ﻣﺎﺷﻔﺖ ﺍﻟﻈﻠﻢ ﻭﺍﻟﺘﻌﺬﻳﺐ ﺑﺎﻟﺴﺠﻮﻥ .. ﻋﺮﻓﺖ ﻧﻮﻉ ﺍﻟﻈﻠﻢ ﺑﻬﺬﺍ ﺍﻟﺒﻠﺪ ﻭﻣﺎﻻﺯﻡ ﻧﺤﻜﻢ ﻋﻠﻰ ﺍﺣﺪ .. ﺻﺢ ﻫﻲ ﻏﻠﻄﺖ ﺑﺤﻘﺞ ﺑﺲ ﺗﻠﮕﻴﻬﺎ ﻣﺘﻨﺪﻣﺔ ﻭﺗﺘﻤﻨﻰ ﺗﺼﻠﺢ ﻏﻠﻄﻬﺎ "
ﺑﻘﻴﺖ ﺍﻭﺍﺳﻲ ﺑﺄﻣﻲ ﺍﻟﻰ ﺍﻥ ﻫﺪﺃﺕ ..
ﺑﻠﺸﻨﺎ ﺑﺎﻟﺒﻴﺖ ﺗﻨﻈﻴﻒ ﻭﻏﺴﻞ ﻭﺍﻧﻲ ﺑﺪﻳﺖ ﺑﺎﻟﺤﺪﻳﻘﻪ ﺷﻐﻼﺕ ﺷﻜﻮ ﺍﺷﺠﺎﺭ ﻳﺎﺑﺴﺔ ﻭﺍﻟﮕﺼﺐ ﺍﻟﻄﺎﻟﻊ ..
ﻃﻠﻌﺖ ﺧﺎﻟﺔ ﻧﺒﺮﺍﺱ ﻣﻦ ﺍﻟﺒﻴﺖ
" ﺍﺗﺮﻛﻬﻦ ﺣﻜﻤﺖ ﺑﺎﺟﺮ ﺍﺩﺯﻟﻜﻢ ﺍﻟﻔﻼﺡ ﺍﻟﻲ ﻳﺴﻮﻱ ﺣﺪﻳﻘﺘﻨﺎ ﻫﻮ ﻳﺮﺗﺒﻬﺎ "
ﺑﺲ ﺑﻄﺒﻌﻲ ﻋﻨﻴﺪ ﻣﺎﻗﺒﻠﺖ ﺍﻻ ﺍﺷﺘﻐﻠﻬﺎ ﺑﻴﺪﻱ ﻣﻦ ﺻﻐﺮﻱ ﻭﺟﻨﺖ ﺍﻃﻠﻊ ﻭﻱ ﺟﺪﻱ ﻟﻠﮕﻴﻌﺎﻥ ﻭﺍﻋﺮﻑ ﻛﻠﺸﻲ ..
ﻛﻤﻠﺖ ﺍﻟﻲ ﺍﮔﺪﺭﻟﻪ ..
ﺗﺬﻛﺮﺕ ﻣﺎﻋﺪﻧﺎ ﻣﺴﻮﺍﮒ ﻭﺧﺎﺻﻪ ﺍﻟﻐﺪﺍ ﻭﺻﺖ ﺧﺎﻟﺔ ﻧﺒﺮﺍﺱ ﺍﻟﺴﺎﻳﻖ ﺟﺎﺏ ﻣﻦ ﺍﻟﻤﻄﻌﻢ ..
ﻃﻠﻌﺖ ﻣﻦ ﺍﻟﺒﻴﺖ ﻭﻛﻠﺸﻲ ﻣﺎﺍﻧﺪﻝ .. ﻣﺎﺍﻋﺮﻑ ﻣﻨﻴﻦ ﺍﺭﻭﺡ ﻭﻣﻨﻴﻦ ﺍﺟﻲ ..
ﺳﺄﻟﺖ ﻭﺍﺣﺪ ﺑﺎﻟﺸﺎﺭﻉ ﺑﻌﺪ ﻣﺎﺑﺪﺍ ﻫﻮ ﺑﺴﺆﺍﻟﻲ ﻻﻥ ﻧﺘﻌﺒﺮ ﺟﻴﺮﺍﻥ ﻭﺭﺣﺐ ﺑﻴﻪ ﺟﺎﻥ ﺍﻧﺴﺎﻥ ﻃﻴﺐ ﻣﺒﻴﻦ ﻭﻣﺜﻘﻒ ﺍﺳﻤﺔ ﺟﺒﺮ ..
ﺩﻻﻧﻲ ﻣﻨﻴﻦ ﺍﺭﻛﺐ ﻭﺷﻠﻮﻥ ﺍﺭﻭﺡ ﻭﻛﺘﺒﻠﻲ ﻋﻨﻮﺍﻥ ﺍﻟﺒﻴﺖ ﺑﺎﻟﻀﺒﻂ ﻓﻲ ﺣﺎﻝ ﺗﻴﻬﺖ .. ﻻﻥ ﮔﻠﺘﻠﺔ ﺍﻧﻲ ﻣﻮ ﻣﻨﺎ ..
ﺍﺗﺴﻮﮔﺖ ﺍﻟﻲ ﻧﺤﺘﺎﺟﺔ ﻭﺭﺟﻌﺖ .
ﺷﻔﺖ ﺍﻣﻲ ﻣﺘﺨﺒﻠﺔ ﻭﺩﻭﺭ ﻋﻠﻴﻪ .. ﺍﺭﺗﺎﺣﺖ ﻣﻦ ﺷﺎﻓﺘﻨﻲ ﮔﺒﺎﻟﻬﺎ ﻭﺗﺒﺠﻲ " ﻳﻤﺔ ﻏﻴﺮ ﺗﺤﺠﻲ ﺗﮕﻮﻝ ﻋﺒﺎﻟﻲ ﺍﺧﺬﻭﻙ ﻟﻮ ﺷﻮ ﻭﻳﻦ ﺭﺣﺖ "
ﺍﺑﺘﺴﻤﺖ " ﻳﻤﺔ ﺷﻨﻲ ﺍﻟﻘﻀﻴﺔ ﻗﺎﺑﻞ ﺻﻐﻴﺮ ﺭﺩﺕ ﺍﺗﺴﻮﮒ ﻭﻣﺎﺍﺗﻮﻗﻌﺖ ﻫﻴﺞ ﺑﻌﻴﺪ ﻭﻛﻞ ﺷﻮﻳﺔ ﺍﺳﺄﻝ "
ﻋﺎﺗﺒﺘﻨﻲ ﺧﺎﻟﺔ ﻧﺒﺮﺍﺱ " ﻟﻴﺶ ﻫﻴﺞ ﺣﻜﻤﺖ ﺟﺎﻥ ﮔﻠﺖ ﻭﺍﺧﻠﻲ ﺍﻟﺴﺎﻳﻖ ﻳﺎﺧﺬﻙ ﻟﻴﺶ ﺗﻌﺎﻧﺪ "
ﺭﺩﻳﺖ " ﺍﻟﻰ ﻣﺘﻰ ﻻﺯﻡ ﺍﻧﺪﻝ ﺍﺭﻭﺡ ﻭﺍﺟﻲ ﺣﺘﻰ ﺍﺗﻌﻮﺩ ﻭﺍﺩﻭﺭ ﻋﻠﻰ ﺷﻐﻞ "
ﺳﺄﻟﺖ " ﺷﻐﻠﻴﺶ ؟؟ ﻭﻫﻨﺎ ﺷﺘﻌﺮﻑ ﺍﻧﻲ ﺍﺷﻮﻓﻠﻚ "
ﺭﺩﻳﺖ " ﻣﺎﺍﺭﻳﺪ ﻻﺳﺎﻳﻖ ﻭﻻﺷﻲ ﺍﺭﻳﺪ ﺷﻐﻠﺔ ﺗﻨﺎﺳﺒﻨﻲ ﺍﺑﻌﺪﻳﻨﻲ ﻋﻦ ﺍﻣﻮﺭ ﺍﻟﺪﻭﻟﺔ ﻭﺍﻟﺴﻴﻦ ﻭﺍﻟﺠﻴﻢ "
ﺍﺗﻨﻬﺪﺕ " ﺍﻧﺖ ﺗﺨﺎﻑ ﻣﻦ ﺯﻭﺟﻲ ﻣﻮﻭﻭ ؟ "
ﺗﻌﺼﺒﺖ " ﻣﺎﺍﺧﺎﻑ ﺑﺲ ﻣﻦ ﺍﻟﻲ ﺧﻠﻘﻨﻲ .. ﺧﻮﻓﻲ ﻋﻠﻰ ﺍﻫﻠﻲ ﻛﻮﻡ ﻧﺴﻮﺍﻥ ﺑﺮﮔﺒﺘﻲ ﻣﺎﺍﮔﺪﺭ ﺍﺧﺎﻃﺮ ﺑﻴﻬﻢ "
ﺍﺷﺮﺕ ﺍﻻﻣﻲ ﺗﺎﺧﺬ ﺍﻟﻤﺴﻮﺍﻙ .. ﻋﻠﻴﻤﻦ ﻋﻠﻰ ﺍﻟﺒﻴﺖ ﺻﺎﺭ ﺣﻠﻮ ﻭﻟﻮ ﻫﻮ ﻣﺎﻗﺎﺻﺮ ..
ﻓﺮﺣﺔ ﺟﺎﻧﺖ ﻃﺎﻳﺮﺓ ﻣﻦ ﺍﻟﻔﺮﺡ ﻭﺗﮕﻤﺰ ﻋﻠﻰ ﺍﻟﻘﻨﻔﺎﺕ ..
ﻋﻤﺘﻲ ﻣﺘﻌﻮﺩﺓ ﺗﻄﺒﺦ ﺑﺎﻟﺠﻮﻟﺔ ﻭﻫﺴﺎ ﻃﺒﺎﺥ ﺍﺑﻮ ﺍﻟﻔﺮﻥ ﻭﺟﺒﻴﺮ .
ﺟﻨﺖ ﺍﺭﺍﻗﺐ ﺗﺼﺮﻓﺎﺗﻬﻦ ﻭﺭﺍﺣﺘﻬﻦ .. ﻣﺎﺍﻧﻜﺮ ﺍﻟﻤﺴﺆﻭﻟﻴﺔ ﺻﺎﺭﺕ ﺍﻛﺒﺮ ﻫﻨﺎ ﻭﺗﻔﻜﻴﺮﻱ ﺯﺍﺩ ﺑﺲ ﺍﻟﻤﻬﻢ ﻫﻨﺔ ﻣﺮﺗﺎﺣﺎﺕ
ﺳﺎﻟﺖ ﻧﺒﺮﺍﺱ " ﺍﻧﺖ ﺷﻨﻮ ﺗﺤﺐ ﺗﺸﺘﻐﻞ ﺷﺘﻌﺮﻑ ﻳﻌﻨﻲ ؟ "
ﺭﺩﺕ ﺍﻣﻲ " ﺟﺎﻥ ﻻﺯﻡ ﻣﺤﻼﺕ ﺟﺪﻩ ﻣﻮﺍﺩ ﻏﺬﺍﺋﻴﺔ ﻭﻣﺨﻀﺮ "
ﺍﺑﺘﺴﻤﺖ " ﺧﻠﺺ ﺍﻓﺘﺤﻠﻚ ﺳﻮﺑﺮ ﻣﺎﺭﻛﺖ ﻫﻨﺎ ﻭﺍﺷﺘﻐﻞ ﺑﻲ "
ﻋﻜﻔﺖ ﺣﺎﺟﺒﻲ " ﺳﻮﺑﺮ ﻣﺎﺭﻛﺖ ﺷﻨﻮ ؟؟ "
ﺭﺩﺕ " ﻳﻌﻨﻲ ﻣﺤﻞ ﺟﺒﻴﺮ ﺗﺒﻴﻊ ﺑﻲ ﻣﺨﻀﺮ ﻭﺍﻟﺒﺎﻥ ﻭﺍﺟﺒﺎﻥ ﻭﻛﻠﺸﻲ ﺗﺤﺘﺎﺟﺔ ﺍﻟﻌﺎﺋﻠﺔ ﺍﻛﻮ ﻧﺎﺱ ﻣﺎﺗﮕﺪﺭ ﺗﺮﻭﺡ ﻟﻠﺴﻮﮒ ﻭﺗﺸﺘﺮﻱ ﻉ ﺍﻻﻗﻞ ﺍﻧﺖ ﺗﻮﻓﺮﻟﻬﻢ ﺍﻟﻲ ﻳﺮﺩﻭﻩ "
ﺿﺤﻜﺖ " ﻭﻣﻨﻴﻦ ﺍﺟﻴﺐ ﺍﻟﻔﻠﻮﺱ ﻫﺎﻟﻤﺤﻞ ﻳﺮﺍﺩﻟﺔ ﻫﻮﺍﻱ "
ﺭﺩﺕ " ﺍﻧﻲ ﺍﻧﻄﻴﻚ "
ﻋﻜﻔﺖ ﻭﺟﻬﻲ .. ﺑﺴﺮﻋﻪ ﻛﻤﻠﺖ " ﻗﺼﺪﻱ ﻧﻜﻮﻥ ﺷﺮﺍﻛﺔ ﺍﻧﺖ ﺑﺸﻐﻠﻚ ﻭﺍﻧﻲ ﺑﺮﺍﺱ ﺍﻟﻤﺎﻝ ..
ﻛﺒﺮﻳﺎﺋﻲ ﺟﺎﻥ ﻣﺎﻧﻌﻨﻲ ﺍﻧﻪ ﺍﮔﻠﻬﺎ ﺍﻱ ﻭﻣﺎﺍﻋﺮﻑ ﻟﻴﺶ ﺩﻭﻡ ﺍﺭﺩ ﺑﺎﻟﺮﻓﺾ ..
" ﻛﺜﺮ ﺧﻴﺮﺝ ﻣﺎﺍﺭﻳﺪ ﺑﺲ ﺍﺫﺍ ﺗﻌﺮﻓﻴﻦ ﻭﺍﺣﺪ ﺍﺷﺘﻐﻞ ﻭﻳﺎﻩ ﺍﻱ ﻗﺎﺑﻞ ﺑﺲ ﻣﺎﻝ ﻫﻴﺞ ﻣﺎﺍﮔﺪﺭ "
ﺍﺗﻨﻬﺪﺕ " ﺍﺩﺭﻱ ﺑﻴﻚ ﻋﻨﻮﺩﻱ .. ﺍﻧﻲ ﺍﺷﻮﻓﻠﻚ ﻭﺍﺭﺟﻌﻠﻚ ﺧﺒﺮ ﺑﺲ ﺍﻧﺖ ﻫﻢ ﻓﻜﺮ ﺯﻳﻦ ﺗﺮﻯ ﺻﻌﺐ ﺗﻠﮕﻲ ﺷﻐﻞ ﺑﺴﺮﻋﺔ ﻭﺣﺘﻰ ﻟﻮ ﻟﮕﻴﺖ ﻣﺎﻳﻜﻔﻲ ﻣﺼﺮﻑ ﻳﻮﻡ ﻭﺍﻧﺖ ﻋﻨﺪﻙ ﻃﻔﻠﻪ "
ﺳﻜﺘﺖ ﻭﻣﺎﺭﺩﻳﺖ ﻣﺎﺍﺭﻳﺪ ﺍﻛﻮﻥ ﺿﻌﻴﻒ ﻭﺍﺳﺘﺴﻠﻢ ﻣﻦ ﺍﻭﻝ ﺗﺠﺮﺑﺔ ﻻﺯﻡ ﺍﺣﺎﻭﻝ ﻭﺍﺟﺮﺏ ﻣﺮﺓ ﻣﺮﺗﻴﻦ ﺍﻟﻰ ﺍﻥ ﺍﻧﺠﺢ ..
ﺍﻟﻲ ﻋﺪﻧﺎ ﺑﻘﻴﻨﺎ ﻧﺼﺮﻑ ﻣﻨﻬﻢ ﺑﺲ ﺍﺫﺍ ﺧﻠﺼﻦ ﺷﻠﻮﻥ ..
ﺟﻨﺖ ﺍﻟﺼﺒﺢ ﺍﻃﻠﻊ ﺍﺩﻭﺭ ﻋﻠﻰ ﺷﻐﻞ ﻭﺍﻟﻌﺼﺮ ﺍﺷﺘﻐﻞ ﺑﺎﻟﺤﺪﻳﻘﻪ ﻣﺎﺍﺭﻳﺪ ﺍﮔﻌﺪ ﺑﺎﻟﺒﻴﺖ ﺑﻼ ﺷﻐﻞ ..
ﺍﻣﻲ ﻭﻋﻤﺘﻲ ﺟﺎﻧﻦ ﻣﺮﺗﺎﺣﺎﺕ ﻭﻭﺍﻫﺴﻦ ﺑﺎﻟﺒﻴﺖ ﺷﻐﻞ ﻭﺗﻨﻈﻴﻒ ﺣﺘﻰ ﻋﻠﻤﻦ ﺑﺴﻤﺔ ..
ﻣﺮﺗﺎﺣﺎﺕ ﮔﻴﺰﺭ ﻣﺘﻮﻓﺮ ﻭﻏﺴﺎﻟﻪ ﻭﺍﻟﺒﻴﺖ ﻣﻜﻴﻔﺎﺕ ﺣﺘﻰ ﺍﺫﺍ ﺍﻧﻄﻔﺖ ﺗﺒﻘﻰ ﺑﺎﺭﺩﺓ . .
ﺑﻴﻮﻡ ﻃﻠﻌﺖ ﺷﻔﺖ ﺟﺒﺮ .. ﻫﻮ ﺍﻛﺒﺮ ﻣﻨﻲ ﺑﺲ ﻣﺘﻮﺍﺿﻊ
ﺍﺑﺘﺴﻢ ..
ﺳﻠﻤﺖ ﻋﻠﻴﻪ ﺭﺩ ﺍﻟﺴﻼﻡ ..
ﺳﺎﻟﻨﻲ " ﺍﺷﻮﻓﻜﻢ ﺩﻭﻡ ﺗﻄﻠﻊ ﻣﻦ ﺍﻟﺼﺒﺢ ﺷﻨﻮ ﺗﺸﺘﻐﻞ
ﺗﻨﻬﺪﺕ " ﻻ ﻭﺍﻟﻠﻪ ﻣﺎ ﺍﺷﺘﻐﻞ ﺍﻃﻠﻊ ﺍﺩﻭﺭ ﻋﻠﻰ ﺷﻐﻞ ﻣﺎﻛﻮ "
ﺳﺄﻟﻨﻲ " ﺷﻨﻮ ﻣﺨﻠﺺ "
ﺭﺩﻳﺖ ﺑﻼ ﺗﻔﻜﻴﺮ " ﻛﻠﻴﺔ ﻃﺐ ﻭﺑﻄﻠﺖ "
ﺍﺳﺘﻐﺮﺏ " ﻟﻴﺶ ؟؟ "
ﻣﺎﻋﺮﻓﺖ ﺷﻨﻮ ﺍﺟﺎﻭﺏ " ﻣﺮﻳﺾ ﻭﺻﺎﺭﺕ ﻇﺮﻭﻑ ﻣﻨﻌﺘﻨﻲ ﺍﻛﻤﻞ "
ﻫﺰ ﺭﺍﺳﻪ ﺑﺪﻭﻥ ﻣﺎﻳﻀﻐﻂ ﻋﻠﻴﻪ " ﺍﺫﺍ ﺗﺮﻳﺪ ﺍﺣﺠﻲ ﻭﻱ ﻭﺍﻟﺪﻱ ﺩﻛﺘﻮﺭ ﺗﺸﺘﻐﻞ ﻭﻳﺎﻩ ﺑﺎﻟﻌﻴﺎﺩﺓ ﻫﻮ ﻣﺤﺘﺎﺝ ﺍﺣﺪ ﻭﻳﺎﻩ "
ﻣﺎﻋﺮﻓﺖ ﺷﺮﺩ " ﺷﻮﻓﻪ ﺷﻴﮕﻮﻝ ﻭﻛﺜﺮ ﺧﻴﺮﻙ "
ﻃﺒﻄﺐ ﻋﻠﻰ ﻇﻬﺮﻱ " ﺟﻨﺖ ﻋﺎﺭﻑ ﺍﻧﺖ ﺍﻧﺴﺎﻥ ﻣﺜﻘﻒ ﺑﺲ ﻻﺗﻬﺘﻢ ﻳﺠﻲ ﻳﻮﻡ ﻭﺗﻜﻤﻞ ﻃﻤﻮﺣﻚ ﺍﻟﻈﺮﻭﻑ ﻣﻮ ﻋﺎﺋﻖ ﺿﺪ ﺍﺣﻼﻣﻨﺎ ﺍﻧﻲ ﺭﻏﻢ ﻭﺍﻟﺪﻱ ﺭﺍﺩﻧﻲ ﻃﺒﻴﺔ ﺑﺲ ﻋﺎﻧﺪﺕ ﻭﺣﻘﻘﺖ ﺣﻠﻤﻲ ﻭﻫﺴﺎ ﺍﻧﻲ ﻣﺤﺎﻣﻲ "
ﺍﺑﺘﺴﻤﺖ " ﻣﺎﺷﺎﺀ ﺍﻟﻠﻪ "
ﺳﻠﻢ ﻋﻠﻴﻪ ﻭﺭﺍﺡ . ﻭﺑﻘﻴﺖ ﻣﺘﺄﻣﻞ ﺑﺠﺒﺮ ﻳﺤﺠﻲ ﻭﻱ ﺍﺑﻮﻩ
ﺗﺨﻴﻠﺖ ﺍﻧﻲ ﻫﺴﺎ ﺑﺂﺧﺮ ﺳﻨﺘﻴﻦ ﺑﺎﻟﺠﺎﻣﻌﻪ ﻭﺍﺻﻴﺮ ﻃﺒﻴﺐ
ﺣﻠﻢ ﻭﺭﺍﺡ ﻭﻣﺎ ﺍﻋﺘﻘﺪ ﻳﻮﻡ ﻳﺮﺟﻊ ..
ﺑﻘﻴﺖ ﻛﻢ ﻳﻮﻡ ﻣﺘﺎﻣﻞ ﺑﺠﺒﺮ ﻭﻣﺎﻛﻮ ﺧﺒﺮ .. ﺭﻏﻢ ﻣﺴﺘﻤﺮ ﺍﺩﻭﺭ .. ﺣﺘﻰ ﻗﺮﺭﺕ ﺍﺭﻭﺡ ﺍﻟﺘﺠﺎﺭ ﺟﻤﻴﻠﺔ ﻭﺍﺷﺘﻐﻞ ﻫﻨﺎﻙ
ﺣﺴﻴﺖ ﺍﻟﺪﻧﻴﺎ ﺍﻧﺴﺪﺕ ﺑﻮﺟﻬﻲ .. ﻋﻤﺘﻲ ﺟﺎﻧﺖ ﻣﺸﺘﻬﻴﺔ ﺗﺰﻭﺭ ﻣﻦ ﺍﺟﻴﻨﺎ ﻟﺴﺎ ﻭﻫﻦ ﻳﻄﻠﺒﻦ ﻳﺮﻭﺣﻦ ﻭﺍﺟﻞ ﺍﻟﺮﻭﺣﺔ ﻻﻥ ﺍﺩﻭﺭ ﻋﻠﻰ ﺷﻐﻞ ..
ﺑﻴﻮﻡ ﻛﺴﺮﻥ ﺧﺎﻃﺮﻱ ﺻﺎﺭﻟﻨﺎ ﺷﻬﺮ ﻭﺍﻛﺜﺮ ﻭﻫﻦ ﻣﺎﻃﺎﻟﻌﺎﺕ ﻟﻼﻣﺎﻡ ﻭﻣﺎﺯﺍﻳﺮﺍﺕ ..
ﺍﺧﺬﺗﻬﻦ ﻭﺭﺣﻨﺎ ﻭﻋﻤﺘﻲ ﺍﺧﺬﺕ ﺍﻟﻤﻘﺴﻮﻡ ﮔﺎﻟﺖ ﻧﺘﻐﺪﺍ ﻫﻨﺎﻙ
ﺍﺳﺘﻐﻠﻴﺖ ﺍﻟﻔﺮﺻﺔ ﻭﺭﺣﺖ ﺍﻟﻤﺤﻼﺕ ﺍﻟﻜﺎﻇﻤﻴﺔ ﺍﺳﺄﻝ ﻋﻦ ﺷﻐﻞ .. ﺍﻭ ﺍﺫﺍ ﻳﺤﺘﺎﺟﻮﻥ ﻋﺎﻣﻞ ..
ﺷﻔﺖ ﻧﺴﻮﺍﻥ ﮔﺎﻋﺪﺓ ﺗﺒﻴﻊ ﻣﻼﺑﺲ ﻭﺩﺷﺎﺩﻳﺶ ﻭﺷﻐﻼﺕ ﺑﻴﺖ ﻫﻦ ﻣﺨﻴﻄﺎﺗﻬﻦ ..
ﻓﻜﺮﺕ ﺍﺧﻠﻲ ﻋﻤﺘﻲ ﻭﺍﻣﻲ ﻳﺨﻴﻄﻦ ﻭﺍﻧﻲ ﺍﺑﻴﻌﻬﻦ ﺑﺒﺴﻄﻴﺔ ﻫﻨﺎ ..
ﺑﻌﺪ ﻣﺎﻃﻠﻌﻨﺎ ﻣﻦ ﺍﻻﻣﺎﻡ ﻭﺗﻐﺪﻳﻨﺎ ..
ﻃﻠﺒﺖ ﺍﻣﻲ ﻧﺮﻭﺡ ﻟﻠﺒﺎﻻﺕ ﺍﺧﺬﺕ ﻣﻼﺑﺲ ﺍﻟﻔﺮﺣﺔ ﺍﻟﺸﺘﺎ ﺍﺟﺔ ﻭﻫﻲ ﻣﺎﻋﻨﺪﻫﺎ ﻭﺟﺎﻱ ﺗﻜﺒﺮ ﺑﺴﺮﻋﻪ ..
ﺣﺰﺕ ﺑﺮﻭﺣﻲ ﻭﻧﺰﻟﺖ ﺩﻣﻌﺘﻲ ﮔﺒﺎﻝ ﺍﻻﻣﺎﻡ .. ﺗﻤﻨﻴﺖ ﺍﺷﺘﺮﻳﻠﻬﺎ ﻣﻦ ﺍﻟﻤﺤﻼﺕ ﻭﻣﻦ ﺍﻟﻐﺎﻟﻲ ﺑﺲ ﻣﺎﻋﻨﺪﻱ ..
ﺍﺿﻄﺮﻳﺖ ﺍﻣﺸﻲ ﺍﺧﺬﻧﺎ ﻛﻢ ﻗﻄﻌﻪ ﺷﻔﺖ ﻗﻤﺎﺻﻞ ﻋﻠﻰ ﮔﺪﻱ ﺣﺴﺒﺖ ﻓﻠﻮﺳﻲ ﻣﺎﺗﻜﻔﻲ ﻭﺍﻣﻲ ﺍﺧﺬﺕ ﺍﻟﺒﺴﻤﺔ ﻫﻢ ﺑﻠﻮﺯﺍﺕ ..
ﻭﻋﻤﺘﻲ ﺭﺍﺩ ﺗﺮﻭﺡ ﻟﻼﺳﻮﺍﻕ ﺍﻟﻤﺮﻛﺰﻳﺔ ﺗﺠﻴﺐ ﻣﻮﺍﺩ ﻏﺬﺍﺋﻴﺔ
ﻃﻠﻌﺖ ﺣﺠﺔ ﺍﻟﻮﻛﺖ ﻭﺗﺄﺧﺮﻧﺎ ..
ﺣﺘﻰ ﻣﺎﺍﻧﺤﺮﺝ ﮔﺪﺍﻣﻬﻦ ..
ﻭﺻﻠﻨﺎ ﻟﻠﺒﻴﺖ ﺷﻔﺖ ﻭﺍﺣﺪ ﻳﻌﺎﻳﻦ ﻋﻠﻰ ﺍﻟﺒﻴﺖ ﻭﻳﻔﺘﺮ ..
ﺗﻮﻗﻌﺘﻪ ﺣﺮﺍﻣﻲ ﺷﺎﻓﻨﻪ ﺍﺑﺘﻌﺪ ..
ﻣﺎﺭﺩﺕ ﺍﺛﻴﺮ ﺍﻧﺘﺒﺎﻩ ﺍﻣﻲ ﻭﻋﻤﺘﻲ ﺩﺧﻠﻨﺎ ﻟﻠﺒﻴﺖ ..
ﻭﻗﻔﻠﺖ ﺍﻻﺑﻮﺍﺏ ﻛﻠﻬﺎ ..
ﻓﺘﺤﺖ ﻓﺮﺣﺔ ﺍﻟﺘﻠﻔﺰﻳﻮﻥ ﻭﻋﻤﺘﻲ ﻃﻠﻌﺖ ﺑﺘﻴﺘﺔ ﺳﻠﻜﺘﻬﺎ
ﺍﺟﺖ ﺑﺒﺎﻟﻲ ﻓﻜﺮﺓ ﺍﻟﻤﻼﺑﺲ ..
ﻓﺎﺗﺤﺘﻬﻦ ﺑﺎﻟﻤﻮﺿﻮﻉ ﻓﺮﺣﻦ ﺑﺲ ﺍﻣﻲ ﺭﺩﺕ
" ﻳﻤﺔ ﻣﻨﻴﻦ ﺍﻟﻨﺎ ﻣﻜﻴﻨﺔ ﺷﻠﻮﻥ ﻧﺨﻴﻂ "
ﻏﻤﻀﺖ ﻋﻴﻨﻲ " ﻫﺎﻱ ﺷﻠﻮﻥ ﺭﺍﺣﺖ ﻣﻦ ﺑﺎﻟﻲ "
ﺳﻜﺘﺖ ﻭﮔﻤﺖ ..
ﺭﺣﺖ ﻟﻠﻐﺮﻓﻪ ﺗﻤﺪﺩﺕ ﺍﺫﻥ ﺍﻻﺫﺍﻥ ﮔﻤﺖ ﺻﻠﻴﺖ ﻭﺗﻌﺸﻴﻨﺎ
ﺑﻘﻴﻨﺎ ﺷﻮﻳﺔ ﻋﻠﻰ ﺍﻟﺘﻠﻔﺰﻳﻮﻥ ﻭﺑﻌﺪﻳﻦ ﺭﺍﺣﻦ ﻟﻠﻐﺮﻓﻪ
ﻫﻲ ﺑﺎﻻﺻﻞ ﻏﺮﻓﺘﻴﻦ ﺟﻮﺓ ﻛﻠﺶ ﻣﺎﻳﻨﺴﻤﻊ ﺍﻟﺼﻮﺕ ﺑﻴﻬﻦ ..
ﺗﺬﻛﺮﺕ ﺍﻟﺮﺟﺎﻝ ﺍﻟﻲ ﺷﻔﺘﻪ ﻃﻠﻌﺖ ﻣﻦ ﺍﻟﻐﺮﻓﻪ ﺑﻘﻴﺖ ﺍﻓﺘﺮ ﺑﺎﻟﺒﻴﺖ ﻭﺑﺎﻟﻲ ﺑﺮﺓ ..
ﺑﻌﺪﻫﺎ ﻧﻤﺖ ﺑﺎﻻﺳﺘﻘﺒﺎﻝ ﻣﺜﻞ ﻣﺎﻳﺴﻤﻮﻩ ..
ﺧﺎﻑ ﻳﺼﻴﺮ ﺷﻲ ﻭﻣﺎﺍﺳﻤﻊ ..
ﺛﺎﻧﻲ ﻳﻮﻡ ﻫﻢ ﻃﻠﻌﺖ ﺷﻔﺖ ﻭﺍﺣﺪ ﻭﺍﮔﻒ ﻏﻴﺮﺓ
ﺍﺗﺴﺎﺋﻠﺖ ﺑﺪﺍﺧﻠﻲ " ﺷﻨﻲ ﻣﺴﻮﻳﻦ ﻣﻨﺎﻭﺑﺔ "
ﺑﺴﺮﻋﺔ ﻃﺨﺖ ﺑﺮﺍﺳﻲ ﻫﺎﻱ ﺳﻮﺍﻟﻒ ﺍﻻﻣﻦ ﺍﻟﺒﻴﺖ ﺍﻟﻲ ﻳﺸﻜﻮﻥ ﺑﻲ ﻳﺒﻘﻮﻥ ﻳﺮﺍﻗﺒﻮﻩ ﺑﺲ ﻟﻴﺶ ﻣﻌﻘﻮﻟﺔ ﻋﺮﻓﻮﺍ ﺟﻨﺖ ﻣﺴﺠﻮﻥ ..
ﺑﻘﺖ ﺣﺴﺒﺔ ﺗﺎﺧﺬﻧﻲ ﻭﺗﺠﻴﺒﻨﻲ ﻋﻮﺩ ﻋﻨﺪﻱ ﻧﻴﺔ ﺍﻃﻠﻊ ﺍﺩﻭﺭ ﺷﻐﻞ ﺭﺟﻌﺖ ﻟﻠﺒﻴﺖ ﻭﺳﺪﻳﺖ ﺍﻟﺒﺎﺏ ..
ﺷﺎﻓﺘﻨﻲ ﺍﻣﻲ ﺍﺳﺘﻐﺮﺑﺖ " ﺷﻮ ﺭﺟﻌﺖ ﻳﻤﺔ ﺧﻴﺮ ؟ "
ﺭﺩﻳﺖ " ﻻ ﺑﺲ ﺷﻮ ﺭﺍﺳﻲ ﻣﺄﺫﻳﻨﻲ ﻣﺎﺍﺩﺭﻱ ﺷﺒﻲ "
ﺭﺩﺕ " ﻣﻮ ﺍﻟﻠﻪ ﻳﺴﺎﻋﺪﻙ ﺗﻔﺘﺮ ﻟﻴﻞ ﻭﻧﻬﺎﺭ .. ﻫﺴﺎ ﺍﺳﻮﻳﻠﻚ ﻧﻮﻣﻲ ﺑﺼﺮﺓ "
ﺑﻘﻴﺖ ﮔﺎﻋﺪ ﺑﺎﻟﻤﻄﺒﺦ ﻭﻋﻴﻨﻲ ﻋﻠﻰ ﺍﻟﺒﺎﺏ ..
ﻋﻤﺘﻲ ﺳﺄﻟﺘﻨﻲ " ﺟﺎ ﻣﺎﺗﻄﻠﻊ ﺍﻟﻴﻮﻡ "
ﺭﺩﻳﺖ " ﻻ ﻋﻤﺔ ﻣﺎﻟﻲ ﺧﻠﻚ ﺭﺍﺡ "
ﺣﺴﻴﺘﻬﺎ ﺿﺎﺟﺖ " ﺟﺎ ﺍﻧﻲ ﺍﺭﻭﺡ ﻣﺤﺘﺎﺟﺔ ﻛﻢ ﺷﻐﻠﻪ ﺍﺟﻴﺒﻬﺎ ﻭﺍﺟﻲ "
ﺭﺩﻳﺖ " ﻻﻋﻤﺔ ﻻﺗﻄﻠﻌﻴﻦ ﺍﺟﻠﻴﻬﺎ "
ﺑﺲ ﻫﻲ ﻣﺎﺳﻤﻌﺘﻨﻲ ﻭﺍﺻﺮﺕ ﺗﻄﻠﻊ ..
ﺍﺳﺘﺴﻠﻤﺖ ﺍﻟﻬﺎ " ﺍﻭﮔﻔﻲ ﺟﺎ ﺍﺭﻭﺡ ﻭﻳﺎﺝ ﺍﻧﻲ "
ﺭﺩﺕ " ﻻﺑﻄﻠﺖ ﻣﺎﺍﺭﻭﺡ ﺍﮔﻌﺪ ﺍﻧﺖ ﻟﻌﺒﺘﻬﺎ ﺍﻟﺮﻭﺣﻲ "
ﺣﺴﻴﺘﻬﺎ ﻣﻮ ﻃﺒﻴﻌﻴﺔ ﺑﺲ ﺗﻔﻜﻴﺮﻱ ﺑﺎﻟﻲ ﻳﺮﺍﻗﺒﻮﻥ ﻣﺎﺧﻠﺘﻨﻲ ﺍﻫﺘﻢ ﺍﻟﻬﺎ ..بيج قصص عراقيه حقيقيه من واقعنا.روعه الطائي
ﻣﺮ ﻳﻮﻣﻴﻦ ﻧﻔﺲ ﺍﻟﺸﻲ .. ﺗﺎﻟﻲ ﮔﻠﺖ ﻟﻮ ﻋﻨﺪﻫﻢ ﺷﻲ ﺍﻭ ﺷﺎﻛﻴﻦ ﺟﺎﻥ ﻫﺠﻤﻮﺍ ﻋﻠﻰ ﺍﻟﺒﻴﺖ ﻣﺎﻧﺘﻈﺮﻭﺍ ..
ﺍﺟﺖ ﺧﺎﻟﺔ ﻧﺒﺮﺍﺱ ﻭﻋﻤﺘﻲ ﻭﺍﻣﻲ ﻓﺮﺣﻦ ..
ﺷﻮﻳﺔ ﻭﻃﻠﻌﻦ ﻫﻲ ﻭﻋﻤﺘﻲ ﺑﺴﻴﺎﺭﺗﻬﻢ .. ﺻﺤﺖ ﻭﺭﺍﻫﻦ
" ﻋﻤﺔ ﻭﻳﻦ ﺭﺍﻳﺤﺔ ؟ "
ﺭﺩﺕ " ﻳﻤﺔ ﺳﻮﺍﻟﻒ ﻧﺴﻮﺍﻥ ﻭﺍﺩﺭﻱ ﺑﻴﻚ ﺗﺨﺎﻑ ﻋﻠﻴﻪ ﺍﺧﺬﺕ ﻧﺒﺮﺍﺱ ﻭﻳﺎﻱ ﻣﺎﻧﺘﺄﺧﺮ ﻻﺗﺨﺎﻑ "
ﺭﺟﻌﺖ ﻭﻗﻔﻠﺖ ﺍﻟﺒﺎﺏ ..
ﺳﺎﻋﺔ ﻭﺭﺟﻌﻦ " ﻧﺰﻝ ﺍﻟﺴﺎﻳﻖ ﻣﻜﻴﻨﺔ ﺧﻴﺎﻃﺔ "
ﺍﺳﺘﻐﺮﺑﺖ " ﺷﻨﻮ ﻫﺎﻱ ﻋﻤﺔ ﻭﻣﻨﻴﻦ ؟ "
ﺍﺷﺮﺗﻠﻲ " ﺑﻌﺪﻳﻦ ﺍﮔﻠﻚ "
ﺿﺠﺖ ﺣﻴﻞ ﺗﻮﻗﻌﺖ ﻣﻦ ﺧﺎﻟﺔ ﻧﺒﺮﺍﺱ .. ﺍﻟﻲ ﺍﻋﺮﻓﻪ ﻋﻤﺘﻲ ﻧﻔﺴﻬﺎ ﺍﺑﻴﺔ ﻣﺎﺗﻄﻠﺐ ﻣﻦ ﻭﺍﺣﺪ ﺷﻠﻮﻥ ﻃﻠﺒﺖ ..
ﺑﻘﻴﺖ ﺍﻛﻞ ﺑﺮﻭﺣﻲ ..
ﺑﻴﻮﻣﻬﺎ ﻗﺮﺭﺕ ﺧﺎﻟﺔ ﻧﺒﺮﺍﺱ ﺗﺒﺎﺕ ﻋﻨﺪﻧﺎ ﺿﺎﻳﺠﺔ ﻭﺯﻭﺟﻬﺎ ﻣﺴﺎﻓﺮ ..
ﻣﺎﺍﺗﺤﻤﻠﺖ ﻭﺻﺤﺖ ﻋﻤﺘﻲ ﻟﻠﻐﺮﻓﻪ ..
ﺍﺟﺖ ﻭﺭﺍﻱ " ﺷﺒﻴﻚ ﻳﺤﺠﻲ ﺧﻀﻴﺮ ﺗﺤﻮﺱ ﺍﻻ ﺗﻔﻬﻢ ﺍﻟﺴﺎﻟﻔﻪ "
ﺭﺩﻳﺖ ﺑﺤﺪﻳﺔ " ﻫﺎﻱ ﺍﻧﻲ ﻋﻤﺔ ﻭﺗﻌﺮﻓﻴﻦ ﻃﺒﻌﻲ ﻃﻠﺒﺘﻲ ﻣﻨﻬﺎ ﻣﻜﻴﻨﺔ ﻣﻮﻭﻭ؟؟ "
ﺭﺩﺕ ﻭﻫﻲ ﺗﻀﺮﺑﻨﻲ ﻋﻠﻰ ﺟﺘﻔﻲ " ﻋﻠﻰ ﺍﺳﺎﺱ ﻣﺎﺗﻌﺮﻑ ﻋﻤﺘﻚ ﺷﻤﺎﻟﻲ ﻭﺍﻃﻠﺐ ﻣﻦ ﻭﺍﺣﺪ ﻭﻟﻮ ﻫﻲ ﺍﻟﻤﺮﺓ ﻣﺎﻛﻮ ﻣﻨﻬﺎ ﻭﻭﮔﻔﺖ ﻭﻳﺎﻧﺎ ﺍﻛﺜﺮ ﻣﻦ ﺍﻫﻠﻨﺎ ﺑﺲ ﻣﻮ ﻣﻌﻨﺎﻫﺎ ﺍﺳﺘﻐﻠﻬﺎ "
ﺳﺄﻟﺘﻬﺎ " ﺟﺎ ﻣﻨﻴﻦ ﺍﻟﻔﻠﻮﺱ ﻭﺍﺣﻨﺔ ﺣﺘﻰ ﺍﻟﻌﺪﻧﺎ ﺧﻠﺼﻨﺎﻫﻦ "
ﺭﺩﺕ ﻭﻫﻲ ﺗﺘﻨﻬﺪ " ﺭﺍﺡ ﺍﮔﻠﻚ ﺑﺲ ﻣﻮﺵ ﺗﻌﺼﺐ ﻋﻠﻴﻪ "
ﻓﺮﻛﺖ ﻭﺟﻬﻲ " ﺍﺣﺠﻲ ﻋﻤﺔ ﻭﻟﻮ ﺍﻋﺮﻑ ﺍﻟﺸﻐﻠﻪ ﺑﻴﻬﺎ ﺍﻥ "
ﺭﺩﺕ " ﻣﻮ ﺟﺪﻙ ﺻﺎﻟﺢ ﺍﻧﻄﺎﻙ ﺍﻟﻔﻠﻮﺱ ﻭﻣﺎﺍﺧﺬﺗﻬﻦ .. ﺍﻟﺼﺪﮒ ﺣﺰﺕ ﺑﺮﻭﺣﻲ ﺍﻋﻮﻓﻠﻬﻢ ﺣﻼﻝ ﺍﺑﻮﻱ ﻭﻛﻠﺸﻲ ﻣﺎﺍﺣﺼﻞ .. ﮔﻤﺖ ﺍﺧﺬﺗﻬﻦ ﺍﻧﻲ ﻣﻨﻪ ﻭﮔﻠﺘﻠﻪ ﻋﻮﺩ ﺍﺧﺼﻤﻬﺎ ﻣﻦ ﺣﺼﺘﻲ "
ﺗﺴﻮﺩﻧﺖ ﻣﻦ ﺳﻤﻌﺖ " ﺗﺤﺠﻴﻦ ﺻﺪﮒ ﻋﻤﺔ ﻗﺎﺑﻞ ﻧﺠﺪﻱ ﻣﻨﻪ ﻭﻳﺘﺼﺪﻕ ﻋﻠﻴﻨﺎ .. ﺍﺍﺍﺥ ﻋﻤﺔ ﺍﺍﺍﺥ ﻟﻴﺶ ﻫﻴﺞ ﺗﺼﻐﺮﻳﻨﻲ ﻟﻴﺶ ؟؟ "
ﻟﺰﻣﺖ ﺍﻳﺪﻱ " ﻣﺎﻋﺎﺵ ﺍﻟﻲ ﻳﺼﻐﺮﻙ ﻳﺒﻌﺪ ﻋﻤﺘﻚ .. ﺑﺲ ﻫﺬﺍ ﺭﺑﻊ ﺣﮕﻨﺎ ﻋﻨﺪﻫﻢ .. ﺟﺎ ﺗﺮﻳﺪﻧﺎ ﻧﻄﻠﻊ ﺍﻟﻄﺮﻳﻖ ﻣﺎ ﻧﻌﺮﻓﻪ ﺷﻨﻲ ﻭﺑﻄﺮﮒ ﻛﻢ ﻗﻄﻌﻪ ﺫﻫﺐ ﻭﻛﻢ ﻓﻠﺲ ﻋﺪﻧﺎ "
ﺳﻜﺘﺖ ﻭﺍﻧﻲ ﺍﻋﺎﻳﻦ ﻋﻠﻴﻬﺎ ﺑﻐﻀﺐ .. ﻟﺰﻣﺖ ﻭﺟﻬﻲ ﻭﺑﺎﺳﺘﻨﻲ " ﻻﺗﺎﺧﺬ ﺑﺨﺎﻃﺮﻙ ﻋﻠﻴﻪ ﺑﺲ ﺣﺰﺕ ﺑﺮﻭﺣﻲ ﺍﻋﻮﻑ ﺑﻴﺖ ﺍﺑﻮﻱ ﺍﻟﻬﻢ ﻭﻓﻮﮔﺎﻫﺎ ﻣﺎﺍﺧﺬ ﻣﻦ ﺣﻼﻟﺔ ﺷﻲ ﻭﻫﺎﻟﻔﺎﺩﻧﺎ ﻭﺍﺷﺘﺮﻳﺖ ﻣﻜﻴﻨﺔ ﻭﺭﺍﺡ ﻧﺨﻴﻂ ﻭﺷﻮﻳﺔ ﺷﻮﻳﺔ ﺍﻟﻨﺎﺱ ﺗﻌﺮﻓﻨﺎ ﺑﻴﻦ ﻣﺎﺗﻠﮕﻰ ﺷﻐﻞ "
ﻫﻲ ﺗﺤﺠﻲ ﻭﺍﻧﻲ ﺳﺎﻛﺖ .. ﺷﺤﺠﻲ ﻭﺍﻧﻲ ﻣﻘﺼﺮ ﻋﻨﻬﻦ ﻟﺴﺎ ﻣﺎﻟﮕﻴﺖ ﺷﻐﻞ ﻭﻻﺍﮔﺪﺭ ﺍﻃﻠﺐ ﻣﻦ ﻭﺍﺣﺪ ﻭﻣﺎﺍﺗﺤﻤﻞ ﺍﺷﺘﻐﻞ ﺑﻔﻠﻮﺱ ﻧﺒﺮﺍﺱ ﻭﺭﺟﻠﻬﺎ ﻣﺎﺍﻋﺮﻓﻪ ﺷﻨﻮ "
ﻃﻠﻌﺖ ﻋﻤﺘﻲ ﺭﻓﻌﺖ ﺭﺍﺳﻲ ﻟﻔﻮﮒ " ﺭﺑﻲ ﺍﻧﺖ ﻫﻮﻧﻬﺎ ﻋﻠﻴﻪ ﻣﺎﻋﻨﺪﻱ ﻏﻴﺮﻙ .. ﺍﺫﺍ ﻋﻠﻴﻪ ﺭﺍﺿﻲ ﺑﺤﻜﻤﻚ ﻭﺍﺧﺘﺒﺎﺭﻙ ﺑﺲ ﻻﺗﺤﺴﺴﻨﻲ ﺑﻀﻌﻔﻲ ﮔﺪﺍﻣﻬﻦ ﻭﻗﻠﺔ ﺣﻴﻠﺘﻲ "
ﺍﺟﺖ ﺑﺴﻤﺔ ﺻﺎﺣﺘﻨﻲ ﻋﻠﻰ ﺍﻟﻌﺸﺎ ﺟﺎﻧﺖ ﺗﺘﺪﻟﻊ ﻭﺗﺒﻮﺱ ﺑﻴﺔ ﻣﺜﻞ ﺍﻟﻄﻔﻠﺔ ﻻﻥ ﮔﻠﺘﻠﻬﺎ ﻣﺎﺍﺭﻳﺪ ..
ﺍﻋﺮﻓﻬﺎ ﺗﻀﻮﺝ ﺍﺫﺍ ﺷﺎﻓﺘﻨﻲ ﺿﺎﻳﺞ .. ﺟﺬﺑﺘﻨﻲ ﺍﻟﻬﺎ ﻭﺧﻠﺘﻨﻲ ﺍﻧﺴﻰ ﻧﻔﺴﻲ .. ﺑﺴﺮﻋﻪ ﻭﻋﻴﺖ ﻋﻠﻰ ﺣﺎﻟﻲ ﻭﮔﻠﺘﻠﻬﺎ ﻳﻠﺔ ﺧﻠﻴﻨﺎ ﻧﺘﻌﺸﺎ ..
ﻋﺎﻳﻨﺖ ﻋﻠﻴﻬﺎ ﺫﺍﻳﺒﻪ ﺑﻴﻦ ﺍﺩﻳﺔ .. ﻋﻀﻴﺘﻬﺎ ﻣﻦ ﺷﻔﺘﻬﺎ ﺻﺎﺣﺖ " ﺍﺥ ﺍﺥ ﻭﺟﻌﺘﻨﻲ ﻭﺟﻌﺘﻨﻲ "
ﺻﻤﻴﺖ ﺣﻠﮕﻬﺎ ﻭﺿﺤﻜﺖ " ﻭﻟﺞ ﻓﻀﺤﺘﻴﻨﺎ ﻫﺴﺎ ﺍﻟﻴﺴﻤﻌﺞ ﺷﻴﮕﻮﻝ .. ﺩﮔﻮﻣﻲ ﻳﻠﺔ ﻧﺎﻛﻞ "
ﺍﺧﺬﺗﻬﺎ ﻭﻃﻠﻌﻨﺎ ﺟﺎﻧﺖ ﻋﻤﺘﻲ ﺣﺎﻳﺮﺓ ﺷﻤﺴﻮﻳﻪ ﻻﻥ ﺧﺎﻟﺔ ﻧﺒﺮﺍﺱ ﻋﻨﺪﻧﺎ ..
ﺻﺒﺘﻠﻲ ﺟﺎﻱ ﻻﻥ ﻣﺘﻌﻮﺩﻳﻦ ﻭﻱ ﻛﺒﺎﺏ ﺍﻟﻌﺮﻭﮒ ﻧﺸﺮﺏ ﺟﺎﻱ
ﺑﻴﻮﻣﻬﺎ ﺳﻬﺮﻧﺎ ﻛﻠﻨﺎ ﻭﺟﺎﻳﺒﺔ ﺧﺎﻟﺔ ﻧﺒﺮﺍﺱ ﺣﺐ ﻭﺣﻠﻮﻳﺎﺕ ..
ﺍﺗﺮﺧﺼﺖ ﻭﺧﻠﻴﺘﻬﻦ ﻳﺎﺧﺬﻥ ﺭﺍﺣﺘﻬﻦ ..
ﺑﻘﻦ ﺳﻮﺍﻟﻒ ﻭﺿﺤﻚ ﻭﺍﺳﻤﻊ ﻋﻤﺘﻲ ﺗﺴﻮﻟﻔﻠﻬﺎ ﻋﻦ ﺫﻛﺮﻳﺎﺗﻨﺎ
ﻭﺍﻣﻲ ﻋﻦ ﻃﻔﻮﻟﺘﻬﺎ ﻭﻋﺬﺍﺑﻬﺎ ..
ﮔﻤﺖ ﺍﺗﺨﻴﻞ ﻛﻠﺸﻲ ﻭﻛﺄﻧﻪ ﻣﺮ ﺍﻟﻴﻮﻡ ﻋﻠﻴﻪ ..بيج قصص عراقيه حقيقيه من واقعنا.روعه الطائي
ﺟﻨﺖ ﻣﻜﺒﻮﺕ ﺑﺪﺍﺧﻠﻲ ﻭﻣﺨﺘﻨﮓ .. ﻛﻤﺖ ﺗﻮﺿﻴﺖ ﻭﺻﻠﻴﺖ
ﻓﺮﻏﺖ ﻫﻤﻲ ﺍﻟﺮﺏ ﺍﻟﻌﺎﻟﻤﻴﻦ ..
ﺻﺎﺭ ﺍﻟﺒﻴﺖ ﻫﺪﻭﺀ ﻃﻠﻌﺖ ﺍﺗﺄﻛﺪ ﻣﻦ ﺍﻟﺒﻴﺖ ﻭﺍﻟﺤﺪﻳﻘﺔ ﺗﺎﻟﻲ ﻗﻔﻠﺖ ﻭﺩﺧﻠﺖ ..
ﺷﻔﺖ ﺻﻮﺕ ﻭﺭﺍﻱ ﻓﺰﻳﺖ ..
ﺍﻟﺘﻔﺘﺖ ﺷﻔﺖ ﺧﺎﻟﺔ ﻧﺒﺮﺍﺱ ﻭﺭﺍﻱ ﺑﻜﺮﺳﻴﻬﺎ ..
ﺍﺑﺘﺴﻤﺖ " ﻣﺎﻳﺠﻴﻚ ﻧﻮﻡ ﻣﺜﻠﻲ ؟ "
ﺍﺗﻨﻬﺪﺕ ﺍﺷﺮﺗﻠﻲ ﺍﻛﻌﺪ ﻋﻠﻰ ﺍﻟﻘﻨﻔﻪ ﺑﺎﻟﻤﻄﺒﺦ ..
ﺷﻌﻠﺖ ﺍﻟﻨﺎﺭ ﻭﺳﻮﻳﺖ ﺟﺎﻱ ..
ﺳﺄﻟﺘﻬﺎ " ﺍﺳﻮﻳﻠﺞ ؟ "
ﻫﺰﺕ ﺭﺍﺳﻬﺎ .. ﺣﻀﺮﺕ ﻛﻮﺑﻴﻦ
ﻭﺭﺟﻌﺖ ﮔﻌﺪﺕ ..
ﺳﺄﻟﺖ " ﻟﻴﺶ ﺍﺣﺴﻚ ﺩﻭﻡ ﻣﻬﻤﻮﻡ "
ﺭﺩﻳﺖ " ﻟﻴﺶ ﺍﻟﻲ ﻣﺮﻳﺖ ﺑﻲ ﺷﻮﻳﺔ ؟؟ "
ﺟﺎﻭﺑﺖ " ﻭﺍﻟﻲ ﻣﺮﻳﺖ ﺑﻲ ﺍﻧﻲ ﺷﻮﻳﺔ ؟؟ ﺍﻟﻲ ﻣﺜﻠﻲ ﻣﻴﺘﺔ ﻫﺴﺎ ﻭﻟﻮ ﺍﻧﻲ ﺟﻨﺖ ﻣﻴﺘﺔ ﻗﺒﻞ ﻟﺘﺠﻮﻥ .. ﺛﻼﺙ ﺍﻭﻻﺩ ﺭﺍﺣﻮﺍ ﻣﻨﻲ ﺑﻠﻴﻠﺔ ﻭﺣﺪﺓ ﻭﺣﺐ ﻭﺩﻻﻝ ﺯﻭﺟﻲ ﺭﺍﺡ ﻭﻳﺎﻫﻢ ﺑﻌﺪ ﺷﻨﻮ ﺣﻴﺎﺗﻲ ﺍﻧﻲ ؟؟
ﺍﻧﺖ ﻉ ﺍﻻﻗﻞ ﻋﻨﺪﻙ ﺍﻟﻲ ﻳﺤﺒﻮﻙ ﻭﺭﺑﻲ ﻳﺤﻔﻈﻬﻢ ﺍﻟﻚ .. ﺻﺢ ﺍﻧﻈﻠﻤﺖ ﺑﺲ ﺍﻟﻠﻪ ﻓﺮﺟﻬﺎ ﻋﻠﻴﻚ ..
ﻓﺎﺭ ﺍﻟﺠﺎﻱ ﮔﻤﺖ ﻃﻔﻴﺖ ﺍﻟﻨﺎﺭ ﻭﺻﺒﻴﺖ ..
ﺍﻧﻄﻴﺘﻬﺎ ﻛﻮﺏ ﺍﻟﻬﺎ ﻭﻛﻮﺏ ﺍﻟﻲ .. ﺳﻜﺘﻨﺎ ﺷﻮﻳﺔ ﻭﻣﺎﻛﻮ ﺻﻮﺕ ﻳﻨﺴﻤﻊ ﺑﺲ ﺻﻮﺕ ﺍﻟﺨﺎﺷﻮﮔﺔ ﺑﻮﺳﻂ ﺍﻟﻜﻮﺏ ﻭﺍﺣﻨﺔ ﻧﺨﻮﻁ ..
ﺳﺄﻟﺖ " ﺍﻧﺖ ﺷﺘﺤﺲ ﺍﺗﺠﺎﻩ ﺑﺴﻤﺔ ؟ "
ﺟﺎﻭﺑﺖ " ﻭﻟﻴﺶ ﻫﺎﻟﺴﺆﺍﻝ "
ﺭﺩﺕ " ﻻ ﺍﺑﺪ ﺑﺲ ﺍﺷﻮﻑ ﺑﻴﻨﻜﻢ ﻓﻮﺍﺭﻕ ﻛﺒﻴﺮﺓ ﺷﻨﻮ ﺍﻟﻲ ﺧﻼﻙ ﺗﺘﺰﻭﺟﻬﺎ ﻭﺗﺠﻴﺐ ﻣﻨﻬﺎ ﺑﻨﻴﺔ ﺭﻏﻢ ﺍﻧﺖ ﻣﺜﻘﻒ ﻭﻭﺍﻋﻲ ﻭﺍﻟﻒ ﺑﻨﻴﺔ ﺗﺘﻤﻨﺎﻙ "
ﺭﺩﻳﺖ " ﺑﺴﻤﺔ ﺍﻣﺎﻧﺔ ﺟﺪﻱ ﻋﻨﺪﻱ .. ﺑﺎﻟﻌﻜﺲ ﺭﻏﻢ ﺍﻟﻔﻮﺍﺭﻕ ﺍﻟﻲ ﺗﺸﻮﻓﻴﻬﺎ ﺑﻴﻨﺎ ﺑﺲ ﻣﻦ ﺍﻛﻮﻥ ﻭﻳﺎﻫﺎ ﺍﺭﺗﺎﺡ ﺑﺒﺮﺍﺋﺘﻬﺎ ﻭﻃﻴﺒﺘﻬﺎ ﻭﺳﻮﺍﻟﻔﻬﺎ ﺗﮕﺪﺭ ﺗﻨﺴﻴﻨﻲ ﻛﻞ ﻫﻤﻮﻣﻲ .. ﺻﺢ ﻏﻠﻄﺖ ﻭﺗﻘﺮﺑﺘﻠﻬﺎ ﺭﻏﻢ ﺟﻨﺖ ﻣﻌﺎﻫﺪ ﻧﻔﺴﻲ ﺗﻜﻮﻥ ﺍﻣﺎﻧﺔ ﻋﻨﺪﻱ ﺑﺲ .. ﻟﻜﻦ ﻫﺴﺎ ﻫﻲ ﻓﻌﻼ ﺍﻣﺎﻧﺔ ﻭﻣﺴﺘﺤﻴﻞ ﺍﺧﻮﻧﻬﺎ "
ﺳﺄﻟﺖ " ﺍﻟﻲ ﺍﻋﺮﻓﻪ ﺍﻧﺖ ﺧﻄﺒﺖ ﻣﺴﻚ ﻭﺟﻨﺖ ﺗﺤﺒﻬﺎ ﺑﻌﺪﻙ ﺗﺤﺒﻬﺎ ﻟﻮ ﻻ ؟ "
ﻫﺴﺘﻮﻧﻲ ﺧﻠﻴﺖ ﺍﻟﻜﻮﺏ ﺑﺤﻠﮕﻲ ﻣﻦ ﺳﺄﻟﺖ ﻏﺼﻴﺖ ﻭﺍﻧﺠﻮﻳﺖ ..
ﺭﺩﻳﺖ ﺑﺤﺰﻡ ﺍﻭ ﻣﻦ ﻭﺟﻊ ﺍﻟﺠﻮﻱ " ﻣﺴﻚ ﺟﺎﻧﺖ ﻓﺘﺮﺓ ﻣﺮﺍﻫﻘﺔ ﺑﺎﻟﻨﺴﺒﺔ ﺍﻟﻲ .. ﺟﻨﺖ ﺻﻐﻴﺮ ﻭﻓﺘﺤﺖ ﻋﻴﻨﻲ ﻋﻠﻴﻬﺎ ﻳﻤﻜﻦ ﻧﺰﻭﺓ ﻣﻮ ﺣﺐ .. ﺑﺲ ﺣﺎﻟﻴﺎ ﻣﺎﻋﻨﺪﻱ ﻣﺸﺎﻋﺮ ﺍﺗﺠﺎﻫﻬﺎ ﺍﻟﻲ ﺑﺒﺎﻟﻲ ﻋﺎﺋﻠﺘﻲ ﻭﺑﺲ "
ﺳﻜﺘﺖ ﻭﻫﻲ ﺗﻌﺎﻳﻦ ﻋﻠﻴﻪ ﺗﺮﻓﻊ ﺑﺎﻟﻜﻮﺏ ﺗﺸﺮﺏ ﻭﺗﻨﺰﻟﺔ ﻭﺑﻌﺪﻫﺎ ﺣﺠﺖ " ﺍﻟﺤﺐ ﺷﻲ ﺣﻠﻮ ﻭﻣﻮ ﻋﻴﺐ .. ﻭﺍﺫﺍ ﺣﺒﻴﺖ ﻣﺮﺓ ﻣﺴﺘﺤﻴﻞ ﺗﻨﺴﻰ ﻫﺎﻟﺤﺐ ﻟﻮ ﻣﻬﻤﺎ ﻧﻜﺮﺕ ﺭﺍﺡ ﺗﺒﻴﻦ ﻋﻠﻴﻚ ﻋﻼﻣﺎﺗﻪ "
ﺣﺮﻛﺖ ﻛﺮﺳﻴﻬﺎ ﻭﺭﺍﺣﺖ ﻟﻠﻤﻐﺴﻠﺔ ﻏﺴﻠﺘﻪ ﻭﺭﺟﻌﺘﻪ ﺍﻟﻤﻜﺎﻧﺔ
ﻭﺍﻧﻲ ﺑﻘﻴﺖ ﺍﻓﻜﺮ ﺑﻜﻼﻣﻬﺎ " ﺷﻨﻮ ﻫﺎﻻﻧﺴﺎﻧﺔ ﺍﻟﻲ ﻛﻞ ﻣﺮﺓ ﺍﺣﺲ ﺑﻴﻬﺎ ﺷﻲ ﻏﺮﻳﺐ "
ﺗﺬﻛﺮﺕ ﻣﺴﻚ ﻭﺿﺤﻜﺘﻬﺎ ﻣﻦ ﺍﺩﺭﺳﻬﺎ ﻭﺗﺤﻞ ﺧﻄﺄ ﺍﻭ ﻣﻦ ﺗﺘﻼﻣﺲ ﺍﺩﻳﻨﺎ ..
ﺍﺗﻌﻮﺫﺕ ﻣﻦ ﺍﻟﺸﻴﻄﺎﻥ ﻭﮔﻤﺖ ..
ﺭﺣﺖ ﻟﻠﻐﺮﻓﺔ ﺷﻔﺖ ﺑﺴﻤﺔ ﻧﺎﻳﻤﺔ ﻣﺜﻞ ﺍﻟﻤﻼﻙ ﻏﻄﻴﺘﻬﺎ ﻭﻧﻤﺖ ﺑﺼﻔﻬﺎ ..
ﻟﻠﺼﺒﺢ ﮔﻌﺪﺕ ﺷﻔﺘﻬﻦ ﻣﻠﺘﻤﺎﺕ ﺑﺎﻟﻤﻄﺒﺦ ﻭﻳﺤﻀﺮﻥ ﺍﻟﺮﻳﻮﮒ
" ﺻﺒﺎﺡ ﺍﻟﺨﻴﺮ " ﺭﺩﻥ ﻋﻠﻴﻪ ﺑﺴﺖ ﺭﺍﺳﻬﻦ ﻭﺭﺣﺖ ﺍﻟﻔﺮﺣﺔ ﺍﻟﻲ ﺑﺪﺍﺕ ﺗﺘﻘﺮﺑﻠﻲ ﻭﺗﻌﻮﺩﺕ ﻋﻠﻴﻪ ..
ﺗﺄﺷﺮ ﻟﻠﺤﺪﻳﻘﺔ ﻭﺗﺼﻴﺢ ﻋﻮﻋﻮ . ﻗﺼﺪﻫﺎ ﻋﻠﻰ ﺍﻟﺒﺰﻭﻧﺔ
ﺍﺧﺬﺗﻬﺎ ﻭﻃﻠﻌﺖ ﻟﻠﺤﺪﻳﻘﻪ .. ﺷﻔﺖ ﺧﺎﻟﺔ ﻧﺒﺮﺍﺱ ..
ﮔﻠﺘﻠﻬﺎ " ﺻﺒﺎﺡ ﺍﻟﺨﻴﺮ "
ﺍﻟﺘﻔﺘﺖ " ﺻﺒﺎﺡ ﺍﻟﻨﻮﺭ .. ﻋﺎﺷﺖ ﺍﻳﺪﻙ ﺍﻟﺤﺪﻳﻘﺔ ﺻﺎﻳﺮﺓ ﺣﻠﻮﺓ ﺑﺲ ﻧﺎﻗﺼﻬﺎ ﺷﺘﻼﺕ ﻭﺭﺩ ﺩﺍﻳﺮ ﻣﺪﺍﻳﺮﻫﺎ ﺍﻟﻤﺮﺓ ﺍﻟﺜﺎﻧﻴﺔ ﻣﻦ ﺍﺟﻲ ﺍﺟﻴﺒﻬﻦ "
ﻓﺮﺣﺔ ﺧﺒﺼﺘﻨﻲ ﺗﺮﻳﺪ ﺗﻄﻠﻊ ﺑﺮﺓ ..
ﻃﻠﻌﺘﻬﺎ ﺑﺎﻟﺒﺎﺏ . ﺷﻔﺖ ﺟﺒﺮ .. ﺟﻨﺖ ﻣﺎﺧﺬ ﻋﻠﻰ ﺧﺎﻃﺮﻱ ﻣﻨﻪ .
ﺷﺎﻓﻨﻲ ﺍﺟﺔ " ﺻﺒﺎﺡ ﺍﻟﺨﻴﺮ ﺷﻠﻮﻧﻚ ﺷﻮ ﻣﺎﻛﻮ ﻣﺎﺍﺷﻮﻓﻚ "
ﺭﺩﻳﺖ " ﺻﺒﺎﺡ ﺍﻟﻨﻮﺭ ﻭﺍﻟﻠﻪ ﻣﻠﺘﻬﻲ ﺍﺩﻭﺭ ﻋﻠﻰ ﺷﻐﻞ ﻣﺎﻛﻮ "
ﺑﺴﺮﻋﺔ ﺿﺮﺏ ﻋﻠﻰ ﮔﺼﺘﻪ " ﺍﻭﻭﻭﻭﻩ ﻭﺭﺑﻲ ﻧﺴﻴﺖ ﺍﻋﺬﺭﻧﻲ ﻭﺍﻟﻔﺘﺮﺓ ﻣﺸﻐﻮﻝ ﺑﻘﻀﻴﺔ ﻣﺪﻭﺧﺘﻨﻲ ﺍﻋﺘﺬﺭ ﺟﺪﺍ "
ﺭﺩﻳﺖ " ﻻﻳﻤﻌﻮﺩ ﻋﻠﻴﻤﻦ ﺗﻌﺘﺬﺭ ﻣﻮ ﺑﻼﺯﻡ ﻻ ﺗﺘﻌﺬﺭ "
ﺟﺎﻭﺑﻨﻲ " ﻻ ﺣﻜﻤﺖ ﻣﻤﻘﺒﻮﻟﺔ ﻣﻨﻚ ﻻ ﻋﺒﺎﻟﻚ ﻣﺘﻌﻤﺪ ﻭﺭﺑﻲ ﻧﺴﻴﺖ ﺍﻭﻋﺪﻙ ﺍﻟﻴﻮﻡ ﺍﺭﺩﻟﻚ ﺍﻟﺠﻮﺍﺏ ﻭﻳﺎﺑﺔ ﺍﺫﺍ ﻧﺴﻴﺖ ﻋﻮﺩ ﻻﺗﺮﺩ ﺣﺘﻰ ﺍﻟﺴﻼﻡ ﻋﻠﻴﻪ "
ﺳﻠﻢ ﻭﺭﺍﺡ ﻻﻥ ﻣﺴﺘﻌﺠﻞ .. ﻭﺭﺟﻌﻠﻲ ﺍﻻﻣﻞ ﻣﻦ ﺟﺪﻳﺪ ..
ﻟﻴﺶ ﺍﻇﻠﻢ ﺍﻟﻮﻟﺪ ﻳﻤﻜﻦ ﺻﺪﮒ ﻧﺴﻰ ﺍﻭ ﻣﺸﻐﻮﻝ ..
" ﺍﺍﺍﺍﻩ ﻳﺎﺣﻜﻤﺖ ﺑﺤﻴﺎﺗﻚ ﻣﺎﺟﻨﺖ ﺗﺴﻴﺊ ﺍﻟﻈﻦ ﺑﺄﺣﺪ ﺷﻐﻴﺮﻙ " ﺍﺣﺠﻲ ﻭﻱ ﻧﻔﺴﻲ ..
ﺭﺟﻌﺖ ﻟﻠﺒﻴﺖ ﻃﻮﻝ ﺍﻟﻴﻮﻡ ﺑﻘﻴﺖ ﻭﺧﺎﻟﻪ ﻧﺒﺮﺍﺱ ﻫﻢ ﻣﺎﺭﺍﺣﺖ ﻭﺍﻣﻲ ﻭﻋﻤﺘﻲ ﺟﺎﺑﻦ ﻗﻤﺎﺵ ﻭﺑﺪﺃﻥ ﻳﺨﻴﻄﻦ
ﺗﻌﺠﺒﺖ ﺑﺨﻴﺎﻃﻬﻦ ﺣﺎﻟﺔ ﻧﺒﺮﺍﺱ ﻭﮔﺎﻟﺘﻠﻬﻦ ﺍﺟﻴﺒﻠﺠﻦ ﻣﻌﺎﺭﻓﻨﺎ ﻭﺍﺻﺪﻗﺎﺋﻨﺎ ﻛﺒﺎﺭﻳﺔ ﺩﺍﻳﻤﺎ ﻳﺪﻭﺭﻥ ﻋﻠﻰ ﺧﻴﺎﻃﺔ ﺭﺍﻗﻴﺔ ﻭﺍﻧﺘﻦ ﺷﻐﻠﺠﻦ ﺗﺤﻔﺔ ..
ﺭﺩﺕ ﺍﻣﻲ " ﺟﺎ ﻟﻮ ﺷﺎﻳﻔﻪ ﺧﻴﺎﻁ ﻋﻤﺘﻲ ﺣﺘﻰ ﺑﺪﻻﺕ ﺍﻋﺮﺍﺱ ﻭﻓﺮﺷﺎﺕ ﺟﺎﻧﺖ ﺗﺨﻴﻂ ﻳﺨﺒﻞ ﺧﻴﺎﻃﻬﺎ "
ﻣﺮ ﺍﻟﻴﻮﻡ ﻋﺎﺩﻱ ﻣﺜﻞ ﻛﻢ ﻣﻦ ﺍﺟﻴﻨﺎ ﺍﻟﺒﻐﺪﺍﺩ ﻟﺴﺎ .. ﺟﻨﺖ ﺍﺳﻤﻊ ﺍﻟﺴﻮﮒ ﺍﻟﻮﺿﻊ ﻣﻮ ﺯﻳﻦ ﻭﺍﻣﺮﻳﻜﺎ ﻧﺎﻭﻳﺔ ﻧﻴﺔ ﮔﺸﺮﺓ ﻋﻠﻰ ﺍﻟﻌﺮﺍﻕ ..
ﺟﻨﺖ ﺑﻌﻴﺪ ﻛﻞ ﺍﻟﺒﻌﺪ ﻋﻦ ﻫﻴﺞ ﺍﺣﺎﺩﻳﺚ ﻻﻥ ﻣﺎﺍﺭﻳﺪ ﺷﻲ ﻳﺮﺟﻌﻨﻲ ﻟﻠﻲ ﺷﻔﺘﻪ ﺑﺎﻟﻤﻌﺘﻘﻞ ..
ﺑﺎﻟﻠﻴﻞ ﻭﺍﺣﻨﺔ ﮔﺎﻋﺪﻳﻦ ﻭﺧﺎﻟﻪ ﻧﺒﺮﺍﺱ ﺍﻟﻴﻮﻡ ﺍﻟﺜﺎﻧﻲ ﻫﻨﺎ ﻋﺪﻧﺎ .. ﺗﻜﺴﺮﺕ ﺍﻟﺒﺎﺏ ﺗﻜﺴﺮ ..
ﻃﻔﺮﺕ ﻣﻦ ﻣﻜﺎﻧﻲ ﻭﺍﻧﻲ ﻭﻋﻤﺘﻲ ﻳﻘﺮﺍﻥ ﺍﻳﺎﺕ ﻭﻳﺪﻋﻦ
ﻭﻓﺮﺣﺔ ﻭﺑﺴﻤﺔ ﺧﺎﻓﻦ ..
ﺣﺴﻴﺖ ﺍﻟﺒﺎﺏ ﺗﻔﻠﺶ .. ﻃﻠﻌﺖ ﺻﺤﺖ ﻣﻨﻮﻭ؟؟
ﺳﻤﻌﺖ ﺻﺮﺕ ﺍﻓﺘﺢ ﺍﻻﺳﺘﺨﺒﺎﺭﺍﺕ ..
ﺍﻧﺼﺪﻣﺖ ﻭﻣﺎﺍﻧﻜﺮ ﺧﻔﺖ " ﺍﻻﺳﺘﺨﺒﺎﺭﺍﺕ ؟؟ ﻭﺑﺎﻟﻠﻴﻞ ﺷﻌﻨﺪﻫﻢ ؟؟ ﺗﺬﻛﺮﺕ ﺍﻟﺰﻟﻢ ﺍﻟﻲ ﺗﻔﺘﺮ ﺑﺎﻟﺸﺎﺭﻉ ﻭﻳﻢ ﺍﻟﺒﻴﺖ
ﺍﻭﻝ ﻣﺎﻓﺘﺤﺖ ﺍﻟﺒﺎﺏ ﺟﺘﻔﻮﻧﻲ ﺑﺴﺮﻋﻪ ﻭﺿﺮﺑﻮﺍ ﺭﻛﺒﻲ ﻭﻭﮔﻌﻮﻧﻲ ﺑﺎﻟﮕﺎﻉ ﻋﻠﻰ ﺭﻛﺒﻲ ..
ﺩﺧﻠﻮﺍ ﻟﻠﺒﻴﺖ ﻭﺍﻧﻲ ﺑﺎﻟﻲ ﻳﻢ ﺍﻫﻠﻲ .. ﺟﻨﺖ ﺍﻗﺎﻭﻡ ﻭﺍﺻﻴﺢ
" ﻋﻮﻓﻬﻦ ﻣﺎﻟﻬﻦ ﻋﻼﻗﻪ ﺍﻧﻲ ﻳﻤﻜﻢ ﺍﺧﺬﻭﻧﻲ ؟؟ "
# ﺑﻘﻠﻤﻲ _ ﺍﻟﻜﺎﺗﺒﺔ _ ﺷﻤﺲ
ﻳﺘﺒﻊ ……… .
3780 ﻛﻠﻤﺔ .
ﺟﺎﻥ ﺑﻮﺩﻱ ﺍﻛﺘﺐ ﺍﻛﺜﺮ ﺑﺲ ﺑﺎﻟﻌﺸﺮﺓ ﻳﻨﺘﻬﻲ ﺍﻻﺷﺘﺮﺍﻙ ﻭﻻﺯﻡ ﺍﻧﺰﻝ ﺑﺴﺮﻋﻪ ﺍﺣﺒﻜﻢ ﻣﻠﺘﻘﺎﻧﺎ ﻏﺪﺍ ﺑﺄﺫﻥ ﺍﻟﻠﻪ ❤
ﻭﻳ ﺍﻟﺮﺍﺣﻪ ﻳﺎﻳﻮﻡ )򛐽😢