حكمة الذئب

بارت31

ﺍﺳﻌﺪ ﺍﻟﻠﻪ ﺍﻭﻗﺎﺗﻜﻢ ﺑﻜﻞ ﺧﻴﺮ ﺍﺣﺒﺘﻲ ❤
‏( 32 ‏)
#ﺣﻜﻤـﺔ_ﺫﺋﺐ
# ﺑﻘﻠﻢ _ ﺷﻤﺲ _ ﺍﻟﺴﻌﺪﻱ
ﺷﺌﻨﺎ ﺍﻡ ﺃﺑﻴﻨﺎ .. ﻓﻨﺤﻦ ﻣﻨﺬ ﺍﻥ ﺧﻠﻘﻨﺎ ﻛﺘﺒﺖ ﺣﻴﺎﺗﻨﺎ .. ﺑﺤﻠﻮﻫﺎ .. ﻭﻣﺮﻫﺎ .. ﻭﻣﺎﻋﻠﻴﻨﺎ ﺍﻻ ﺃﻥ ﻧﺘﻌﻠﻢ ..
ﻛﻴﻒ ﻧُﺸﺮﻕ ﻣﻊ ﺍﻟﺸﻤﺲ .. ﺗﺎﺭﻛﻴﻦ ﺍﻟﻠَّﻴﻞ ﺍﻟﺬﻱ ﺑﺪﺍﺧﻠﻨﺎ ﻟﻸﻣﺲ ..
________________________________
ﺍﻟﺤﻴﺎﺓ …
ﻟﻜﻞ ﺷﺨﺺ ﻓﻲ ﻫﺬﻩ ﺍﻟﺤﻴﺎﺓ ﻧﻈﺮﺗﻪ ﺍﻟﺨﺎﺻﺔ ﺑﻬﺎ
ﻓﻬﻮ ﻳﺼﻔﻬﺎ ﺑﺤﺴﺐ ﻣﺎﻋﺎﺷﻪ ﻭﻣﺎﻳﺸﻌﺮ ﺑﻪ ..
ﻓﻤﻨﺎ ﻣﻦ ﻳﺸﺒﻪ ﺍﻟﺤﻴﺎﺓ ﺑﻌﻘﺎﺭﺏ ﺍﻟﺴﺎﻋﺔ ..
ﻧﻌﺠﺰ ﻋﻦ ﺇﻳﻘﺎﻓﻬﺎ ﺃﻭ ﺇﻋﺎﺩﺗﻬﺎ ﺇﻟﻰ ﺍﻟﻮﺭﺍﺀ
ﻭﻣﻨﺎ ﻣﻦ ﻳﺸﺒﻬﻬﺎ ﺑﻮﺭﺩﺓ ﺗﺰﻫﺮ ﺑﻔﺮﺡ ﻓﻲ ﺃﺭﺽ ﺧﻀﺮﺍﺀ
ﻣﺴﺘﻤﺘﻌﻴﻦ ﺑﻨﻌﻴﻤﻬﺎ ﻭﻻﻳﻌﺘﻘﺪﻭﻥ ﺑﺄﻧﻬﺎ ﺳﺘﺬﺑﻞ ﻭﺳﺘﺼﺒﺢ ﺗﻠﻚ ﺍﻻﺭﺽ ﺟﺮﺩﺍﺀ ..
ﻫﺬﺍ ﺣﺎﻝ ﺍﻟﻔﺮﻭﻗﺎﺕ ﺍﻟﻄﺒﻘﻴﺔ ﻓﻲ ﺗﻠﻚ ﺍﻟﻔﺘﺮﺓ ﻭﺍﻟﺘﻲ ﺍﻣﺘﺪﺕ ﺍﻟﻰ ﻳﻮﻣﻨﺎ ﻫﺬﺍ ..
ﺣﻜﻤﺖ ﺑﻜﻞ ﻣﺮﺓ ﻳﺨﺮﺝ ﻣﻦ ﻋﺘﻤﺔ ﻫﺬﻩ ﺍﻟﺤﻴﺎﺓ ..
ﻳﺪﺧﻞ ﺑﻌﺘﻤﺔ ﺍﻗﻮﻯ ﻭﺍﺷﺪ ﻇﻠﻤﺔ ..
ﻟﻜﻨﻪ ﻻﻳﻌﺮﻑ ﺍﻻﺳﺘﺴﻼﻡ ﻭﺍﻟﻀﻌﻒ ..
ﻓﻠﺴﺠﻦ ﻭﺍﻟﻤﻌﺘﻘﻞ ﻭﺍﻟﺘﻌﺬﻳﺐ ﺧﻠﻘﻮﺍ ﻣﻨﻪ ﺭﺟﻼ ﻗﻮﻳﺎ ﻣﻦ ﺟﺴﺪ ﺷﺎﺑﺎ ﻫﺰﻳﻼ ..
ﻣﻦ ﺍﻧﺪﮔﺖ ﺍﻟﺒﺎﺏ ﻭﻓﺘﺤﺘﻬﺎ ﺟﺘﻔﻮﻧﻲ ﺑﺴﺮﻋﻪ ﻭﺿﺮﺑﻮﻧﻲ ﺑﺮﻛﺒﺘﻲ ﺑﻌﻮﺩﺓ ﺍﻭ ﺣﺪﻳﺪﺓ ﺗﻜﻬﺮﺏ ﻭﮔﻌﻮﻧﻲ ﺑﺎﻟﮕﺎﻉ ﻋﻠﻰ ﺭﻛﺒﻲ ..
ﺩﺧﻠﻮﺍ ﻟﻠﺒﻴﺖ ﻭﺍﻧﻲ ﺑﺎﻟﻲ ﻳﻢ ﺍﻫﻠﻲ .. ﺟﻨﺖ ﺍﻗﺎﻭﻡ ﻭﺍﺻﻴﺢ
" ﻋﻮﻓﻬﻦ ﻣﺎﻟﻬﻦ ﻋﻼﻗﻪ ﺍﻧﻲ ﻳﻤﻜﻢ ﺍﺧﺬﻭﻧﻲ ؟؟ "
ﺩﺧﻞ ﺑﻌﺪﻳﻦ ﺭﺟﺎﻝ ﺿﺨﻢ ﻭﺷﻮﺍﺭﺑﺔ ﺛﺨﺎﻥ .. ﻋﺎﻳﻦ ﻋﻠﻴﻪ ﺑﻐﻀﺐ ..
" ﺍﻧﺖ ﻣﻨﻮ ﻭﻟﻚ .. ﻭﺷﻌﻨﺪﻙ ﻫﻨﺎ ؟ "
ﺑﻌﺪﻧﻲ ﻣﺎﺭﺩﻳﺖ ﻃﻠﻌﺖ ﻧﺒﺮﺍﺱ ﺑﻜﺮﺳﻴﻬﺎ ﺍﻟﻤﺘﺤﺮﻙ ..
ﻭﺻﺎﺣﺖ " ﻋﻤﺎﺭ ﻋﻮﻓﻪ ﻻﺗﻠﻤﺴﻪ "
ﺗﻘﺪﻡ ﺍﻟﻬﺎ " ﻫﺴﺎ ﻋﺮﻓﺖ ﻭﻳﻦ ﺗﻄﻠﻌﻴﻦ ﻭﻣﺮﺍﺕ ﺍﺭﺟﻊ ﻣﺎﺍﻟﮕﺎﺝ ﺑﺎﻟﺒﻴﺖ .. ﻣﻨﻮ ﺫﻭﻟﻲ ﻭﺷﻌﻨﺪﻫﻢ ﻫﻨﺎ ﺑﺒﻴﺖ ﺍﻫﻠﺞ "
ﺭﺩﺕ " ﺫﻭﻟﻲ ﮔﺮﺍﻳﺒﻨﺎ ﻣﻦ ﻣﺤﺎﻓﻈﺘﻨﺎ ﻭﻣﺎﻋﻨﺪﻫﻢ ﻣﻜﺎﻥ ﻭﺧﻠﻴﺘﻬﻢ ﻫﻨﺎ ﺍﻧﺖ ﺷﺪﺧﻠﻚ ﻭﻟﻴﺶ ﺗﺮﺍﻗﺒﻨﻲ ؟ "
ﺳﻜﺖ
ﺳﺄﻟﺘﻪ " ﺗﺸﻚ ﺑﻴﻪ ﻋﻤﺎﺭ ﻣﻮﻭﻭ ؟ ﮔﻠﺘﻠﻲ ﻣﺴﺎﻓﺮ ﺣﺘﻰ ﺗﺮﺍﻗﺒﻨﻲ ؟ .. ﻣﻊ ﺍﻻﺳﻒ ﻛﻠﺸﻲ ﺗﻮﻗﻌﺖ ﻣﻨﻚ ﺍﻻ ﻫﻴﺞ ..
ﻭﻫﺴﺎ ﺍﺧﺬ ﺍﺯﻻﻣﻚ ﻭﺍﻃﻠﻊ ﻣﻦ ﺑﻴﺖ ﺍﻫﻠﻲ .. ﻫﻨﺎﻙ ﻧﺘﻔﺎﻫﻢ ﺑﺒﻴﺘﻨﺎ "
ﺍﺷﺮﻟﻬﻢ ﻋﺎﻓﻮﻧﻲ .. ﺑﺲ ﺑﻘﻰ ﻣﺨﻨﺰﺭ ﻋﻠﻴﻪ ..
ﺍﺗﻘﺮﺏ ﻣﻨﻲ " ﺷﺴﻤﻚ ﻭﺷﺘﺸﺘﻐﻞ ؟ "
ﺑﻌﺪﻧﻲ ﻣﺎﺭﺩﻳﺖ ﻗﺎﻃﻌﺘﻨـﻲ ﻧﺒﺮﺍﺱ :
" ﺷﺘﺴﻮﻱ ﺑﺄﺳﻤﺔ ﻣﺎﺗﺒﻄﻞ ﺷﻚ ﻭﺗﺤﻘﻴﻖ ﺑﻌﺪﻳﻦ ﻫﻮ ﻃﻔﻞ ﻭﺑﺮﮔﺒﺘﻪ ﺍﺭﺑﻌﺔ ﺍﺗﺮﻛﻪ ﻭﺧﻠﻴﻨﺎ ﻧﺮﻭﺡ "
ﺭﺩ ﻋﻠﻴﻬﺎ " ﺍﻃﻠﻌﻲ ﮔﺪﺍﻣﻲ ..
ﻃﻠﻌﻮﺍ ﻛﻠﻬﻢ ﻭﻫﻮ ﺑﻘﻰ ﻭﺍﮔﻒ ﺷﻮﻱ ﻭﻃﻠﻊ ﻭﺭﺍﻫﺎ ..
ﮔﻤﺖ ﺑﺴﺮﻋﻪ ﺳﺪﻳﺖ ﺍﻟﺒﺎﺏ ..
ﺷﻔﺘﻪ ﻳﺤﺠﻲ ﻭﻱ ﻭﺍﺣﺪ ﻣﻨﻬﻢ ﻭﻫﻮ ﻧﻔﺴﻪ ﺍﻟﻲ ﺟﺎﻥ ﻳﺮﺍﻗﺐ ﺍﻟﺒﻴﺖ ..
ﻃﻠﻌﻦ ﺍﻣﻲ ﻭﻋﻤﺘﻲ ﺣﻀﻨﻨﻲ ﻭﻳﺒﺠﻦ ..
" ﻳﻤﺔ ﻋﺒﺎﻟﻨﻪ ﺭﺍﺡ ﻳﺎﺧﺬﻭﻙ ﻣﻨﺎ "
ﻫﺪﻳﺖ ﺍﻣﻲ " ﻻﺗﺨﺎﻓﻴﻦ ﻳﻤﺔ ﺍﻟﻲ ﺍﻟﻠﻪ ﻛﺎﺗﺒﺔ ﻳﺼﻴﺮ "
ﺭﺩﺕ ﻋﻤﺘﻲ " ﺷﻮﻛﺖ ﻧﺮﺗﺎﺡ ﻳﺮﺑﻲ ﺩﻭﺭ ﻫﺬﺍ ﺭﺟﻠﻬﺎ ﻳﺨﻮﻑ ﺷﻠﻮﻥ ﻋﺎﻳﺸﺔ ﻭﻳﺎﻩ بيج قصص عراقيه حقيقيه من واقعنا.روعه الطائي
ﻗﻔﻠﺖ ﺍﻻﺑﻮﺍﺏ ﻭﺩﺧﻠﻨﺎ ..
ﻧﻈﺮﺍﺗﻪ ﻭﺧﺰﺭﺗﻪ ﺑﺒﺎﻟﻲ ﻛﻠﻤﺎ ﺍﻧﺴﻰ ﺍﺭﺟﻊ ﺍﺗﺬﻛﺮ ..
ﻣﺒﻴﻦ ﻣﻮ ﻫﻴﻦ ﻭﻣﺴﺘﺤﻴﻞ ﻳﻌﻮﻓﻨﻲ ﺑﺤﺎﻟﻲ ..
ﺭﺣﺖ ﻟﻠﻐﺮﻓﻪ ﺗﻤﺪﺩﺕ .. ﻻﺯﻡ ﺍﻟﮕﻲ ﺷﻐﻞ ﺑﺴﺮﻋﻪ ﻭﺍﺷﻮﻓﻠﻲ ﺑﻴﺖ ﻟﻮ ﻏﺮﻓﻪ ﻭﺣﺪﺓ ﻭﺍﺭﻭﺡ ﻣﻨﺎ ..
ﺛﺎﻧﻲ ﻳﻮﻡ ﺍﻧﺪﮔﺖ ﺍﻟﺒﺎﺏ ﻣﻦ ﺍﻟﺼﺒﺢ ﻓﺰﻳﺖ ﻣﺮﻋﻮﺏ ..
ﺻﺎﺭﺕ ﺍﻟﻬﺒﻄﺎﺕ ﺟﺰﺀ ﻣﻦ ﺣﻴﺎﺗﻲ .. ﺭﺍﺩﺕ ﺗﻄﻠﻊ ﺍﻣﻲ ﺻﺤﺖ ﻭﺭﺍﻫﺎ
" ﺍﻭﻛﻔﻲ ﻳﻤﺔ ﻻﺗﻄﻠﻌﻴﻦ "
ﺭﺩﺕ " ﻳﻤﺔ ﻻﺗﻄﻠﻊ ﺧﺎﻑ ﺭﺟﻌﻮﺍ "
ﺍﺗﻨﻬﺪﺕ " ﻳﻌﻨﻲ ﺍﺫﺍ ﻣﺎﻃﻠﻌﺖ ﺭﺍﺡ ﻳﻌﻮﻓﻮﻧﻲ ﻭﻳﻤﺸﻮﻥ ﺍﺻﻼ ﻳﻜﺴﺮﻭﻥ ﺍﻟﺒﺎﺏ ﻭﻳﻄﺒﻮﻥ "
ﺟﻨﺖ ﺍﺣﺠﻲ ﻭﺍﺩﮔﻢ ﺑﻘﻤﻴﺼﻲ .. ﻃﻠﻌﺖ ﻭﺻﺤﺖ ﻗﺒﻞ ﻣﺎﺍﻓﺘﺢ " ﻣﻨﻮﻭ؟ "
ﺭﺩ " ﺍﻧﻲ ﺟﺒﺮ "
ﻓﺘﺤﺖ ﺍﻟﺒﺎﺏ ﻭﻣﺴﺘﻐﺮﺏ ﺟﻴﺘﻪ ﻣﻦ ﺍﻟﺼﺒﺢ ..
ﺳﻠﻢ ﻋﻠﻴﻪ ﻭﺭﺩﻳﺖ ﺍﻟﺴﻼﻡ ..
" ﺍﻋﺘﺬﺭ ﺍﺟﻴﺘﻚ ﻣﻦ ﺍﻟﺼﺒﺢ ﺑﺲ ﻋﻨﺪﻱ ﺷﻐﻞ ﻭﮔﻠﺖ ﺍﮔﻠﻚ ﻗﺒﻞ ﻻﺍﺭﻭﺡ "
ﺍﺭﺗﺎﺣﻴﺖ ﺗﻮﻗﻌﺖ ﻋﺮﻓﻮﺍ ﺑﻠﻲ ﺻﺎﺭ ﺍﻟﺒﺎﺭﺣﺔ ﻭﻟﻮ ﻫﻨﺎ ﻟﻮ ﺗﺤﺘﺮﮒ ﺍﻟﺪﻧﻴﺎ ﻣﺤﺪ ﻳﻄﻠﻊ ﻣﻮ ﻣﺜﻞ ﻣﻨﻄﻘﺘﻨﺎ ﺑﺎﻟﻨﺎﺣﻴﺔ ﻣﻦ ﺻﻮﺕ ﺻﻐﻴﺮ ﺗﻠﺘﻢ ﺍﻟﻌﺎﻟﻢ ﻋﻠﻴﻨﺎ ..
ﻛﻤﻞ ﻛﻼﻣﺔ " ﺣﺠﻴﺖ ﻭﻱ ﺑﺎﺑﺎ ﻋﻠﻤﻮﺩ ﺍﻟﺸﻐﻞ ﻭﻃﻠﺐ ﻳﺸﻮﻓﻚ ﺍﻟﻌﺼﺮ .. ﻓﺄﻧﺖ ﺟﻬﺰ ﻧﻔﺴﻚ ﻭﻋﻠﻰ ﺳﺎﻋﺔ ﺛﻼﺛﺔ ﺍﻣﺮ ﺑﻴﻚ ﺍﺧﺬﻙ ﻭﻧﺮﻭﺡ "
ﺭﺩﻳﺖ ﻋﻠﻴﻪ " ﺭﺣﻢ ﺍﻟﻠﻪ ﻭﺍﻟﺪﻳﻚ ﻣﺎﺍﻧﺴﻰ ﻓﻀﻠﻚ "
ﻃﺒﻄﺐ ﻋﻠﻰ ﻇﻬﺮﻱ " ﻳﻤﻌﻮﺩ ﺍﺣﻨﺔ ﺟﻴﺮﺍﻥ ﻭﺍﺣﺪ ﻳﻌﺘﺎﺯ ﺍﻟﺜﺎﻧﻲ .. ﻳﻠﺔ ﺍﻧﻲ ﺍﺗﺮﺧﺺ "
ﺳﻠﻢ ﻭﺗﺸﻜﺮﺕ ﻣﻨﻪ ﻣﺮﺓ ﺛﺎﻧﻴﺔ ﻭﺭﺍﺡ ..
ﺩﺧﻠﺖ ﻭﻣﺎﺍﺩﺭﻱ ﺍﻓﺮﺡ ﻟﻮ ﻻ .. ﻻﻥ ﻛﻠﻤﺎ ﺍﮔﻮﻝ ﺍﻧﺤﻠﺖ ﺗﺘﻌﻘﺪ ﺍﻛﺜﺮ ..
ﺍﻣﻲ ﻭﻋﻤﺘﻲ ﻭﺍﻛﻔﺎﺗﻠﻲ ﺑﺒﺎﺏ ﺍﻟﻤﻄﺒﺦ ..
" ﻫﺎﺍﺍ ﻳﻤﺔ ﻣﻨﻮ ﻫﺬﺍ ﻭﺷﻴﺮﻳﺪ ﻣﻨﻚ "
ﺍﺷﺮﺗﻠﻬﻦ " ﺧﻠﻲ ﻧﺪﺧﻞ ﻭﻧﺘﺮﻳﮓ ﻭﺟﺎﻱ ﻣﻬﻴﻞ ﻣﻦ ﺍﻳﺪﺟﻦ ﺍﻟﺤﻠﻮﺓ ﻭﺑﻌﺪﻳﻦ ﺍﺳﻮﻟﻔﻠﺠﻦ "
ﺍﺑﺘﺴﻤﺖ ﺍﻣﻲ " ﻳﺒﻌﺪ ﺍﻣﻚ ﺻﺎﺭ ﺷﮕﺪ ﻣﺎﺷﺎﻳﻔﻪ ﻫﺎﻟﻀﺤﻜﺔ ﺑﻮﺟﻬﻚ "
ﻭﺍﺣﻨﺔ ﻧﺘﺮﻳﮓ ﻓﺘﺤﺖ ﺍﻟﻤﻮﺿﻮﻉ .
" ﺍﻧﻲ ﻟﮕﻴﺖ ﺷﻐﻞ ﻭﻱ ﺩﻛﺘﻮﺭ ﺑﻌﻴﺎﺩﺓ ﻭﻫﺬﺍ ﺟﻴﺮﺍﻧﺔ ﺟﺒﺮ ﻣﺤﺎﻣﻲ ﻫﻮ ﺍﻟﻲ ﺟﺎﺑﻠﻲ ﺍﻟﺸﻐﻞ ﻳﻢ ﺍﺑﻮﻩ "
ﺣﻀﻨﻨﻲ ﺍﺛﻨﻴﻨﻬﻦ ﻭﺣﺪﺓ ﻣﻨﺎ ﻭﻭﺣﺪﺓ ﻣﻨﺎ ﻭﺿﺤﻜﺘﻬﻦ ﻣﻤﺰﻭﺟﺔ ﺑﺪﻣﻮﻋﻬﻦ ..
ﻋﻤﺘﻲ ﮔﺎﻟﺖ " ﻭﺍﺧﻴﺮﺍ ﺍﻟﻠﻪ ﻓﺘﺤﻬﺎ ﺑﻮﺟﻬﻚ ﻭﺍﺣﻨﺔ ﻫﻤﻴﻦ ﻧﺨﻴﻂ ﻭﺗﺒﻴﻌﻬﻦ ﺍﻟﺼﺒﺢ ﻭﺍﻟﻌﺼﺮ ﻭﻱ ﺍﻟﺪﻛﺘﻮﺭ ..
ﻭﻫﻴﺞ ﻧﺮﺗﺎﺡ ﺷﻮﻳﺔ ..
ﺳﻜﺘﺖ ﺍﻣﻲ ﻭﺑﻌﺪﻫﺎ ﺣﺠﺖ " ﺍﻟﻠﻪ ﻻﻳﻨﻄﻲ ﺍﻟﺤﺮﻣﻚ ﻣﻦ ﺟﺎﻣﻌﺘﻚ ﺟﺎﻥ ﻫﺴﺎ ﺍﻧﺖ ﺣﺎﻟﻚ ﺣﺎﻝ ﺍﻟﺪﻛﺘﻮﺭ ﺍﻟﻲ ﺗﺸﺘﻐﻞ ﻋﻨﺪﺓ "
ﺻﺢ ﺿﺠﺖ ﻭﺗﺬﻛﺮﺕ ﺍﻧﻪ ﺑﻘﺎﻟﻲ ﺳﻨﺘﻴﻦ ﻭﺍﺗﺨﺮﺝ ..
ﺑﺲ ﻣﺎﺍﺭﻳﺪ ﺍﺿﻮﺟﻬﻦ ﻭﻳﺎﻱ " ﻛﻠﺸﻲ ﺑﻴﺪ ﺍﻟﻠﻪ ﻳﻤﺔ ﻳﺠﻲ ﻳﻮﻡ ﻳﺠﺒﺮ ﺧﺎﻃﺮﻱ ﻭﻳﻔﺘﺤﻬﺎ ﺑﻮﺟﻬﻲ "
ﺭﺩﻥ ﺍﺛﻨﻴﻨﻬﻦ " ﺍﻥ ﺷﺎﺀ ﺍﻟﻠﻪ "
ﻛﻤﻠﻨﺎ ﺭﻳﻮﮒ ﮔﻌﺪﺕ ﻓﺮﺣﺔ ﻭﺑﺴﻤﺔ ﺍﻟﺘﻬﺖ ﺍﻣﻲ ﺑﻴﻬﻦ ﻭﺑﺴﻤﺔ ﮔﺎﻣﺖ ﺗﻐﺴﻞ ﻣﺎﻋﻴﻦ ﺻﺎﻳﺮﺓ ﺗﺸﺘﻐﻞ ﻭﺗﻨﻈﻒ ﻭﻳﺎﻫﻦ ..
ﺟﻨﺖ ﮔﺎﻋﺪ ﺑﺎﻟﻤﻄﺒﺦ ﻭﺍﺭﺍﻗﺒﻬﻦ ..
ﻓﺮﺣﺔ ﻭﻫﻲ ﺗﺨﻠﻲ ﺍﻟﺨﺒﺰ ﺑﺎﻟﺠﺎﻱ ﻣﺜﻞ ﺍﻟﺜﺮﻳﺪﺓ ﺑﺼﻐﺮﻱ ﺟﻨﺖ ﺍﺣﺐ ﺍﺛﺮﺩ ﺑﺎﻟﺠﺎﻱ ..
ﻭﺗﻌﺎﻳﻦ ﻋﻠﻴﻪ ﻭﺗﺒﺘﺴﻢ .. ﻟﻮ ﺑﺴﻤﺔ ﺍﻟﻲ ﺗﺘﻨﺎﮔﺮ ﻭﻳﺎﻫﺎ ﻋﻠﻰ ﺍﻟﺨﺎﺷﻮﮔﺔ ﻣﺎﻝ ﺟﺎﻱ ..
ﻭﺍﻣﻲ ﻭﻫﻲ ﻭﺍﮔﻔﻪ ﺗﻄﺒﺦ ﻭﺭﻳﺤﺔ ﻃﺒﺨﻬﺎ ﺗﻄﻠﻊ ﻟﻠﺸﺎﺭﻉ ﻟﻮ ﻋﻤﺘﻲ ﺑﺮﻛﺔ ﺍﻟﺒﻴﺖ ﻭﺧﻴﺮﻩ ..
ﺫﻧﻲ ﺍﻏﻠﻰ ﺍﻟﻨﺴﺎﺀ ﺑﺤﻴﺎﺗﻲ .. ﻋﺎﺋﻠﺘﻲ ﻭﻋﺰﻭﺗﻲ ﻭﺍﻫﻠﻲ ﺍﻟﻲ ﻃﻠﻌﺖ ﺑﻴﻬﻦ ﻣﻦ ﺍﻟﺪﻧﻴﺎ ..
ﺍﺩﻋﻲ ﺑﺪﺍﺧﻠﻲ ﻳﺤﻔﻈﻬﻦ ﺍﻟﻲ ﻭﻳﺤﻔﻈﻨﻲ ﺍﻟﻬﻦ ﺣﺘﻰ ﻣﺎﻳﺘﺸﺘﺘﻦ ﺑﻌﺪﻱ ﻭﻟﻮ ﻫﻦ ﻳﻌﺎﺩﻟﻦ ﻋﺸﺮ ﺯﻟﻢ ﺑﺘﺪﺑﻴﺮﻫﻦ ﻭﺣﻜﻤﺘﻬﻦ ..
ﺍﺟﺖ ﻋﻤﺘﻲ ﻭﻋﺒﺎﺗﻬﺎ ﻋﻠﻰ ﺭﺍﺳﻬﺎ :
" ﺣﻜﻤﺖ ﻋﻤﺔ ﻣﺎﺗﺨﻠﻴﻨﺎ ﻧﺮﻭﺡ ﻧﺠﻴﺐ ﻗﻤﺎﺵ ﺣﺘﻰ ﻧﺒﺪﻱ ﻧﺨﻴﻂ "
ﮔﻤﺖ ﺑﺪﻟﺖ ﻭﺭﺣﻨﺎ ﺍﻧﻲ ﻭﻳﺎﻫﺎ ..
ﻃﻠﻌﺖ ﺑﺎﻟﺒﺎﺏ ﺷﻔﺖ ﻧﻔﺴﻪ ﺍﻟﻮﺍﮔﻒ ﺑﻌﺪﻩ ﻳﺮﺍﻗﺐ ..
ﻣﻦ ﺑﻘﻴﺖ ﺍﻋﺎﻳﻦ ﻋﻠﻴﻪ ﺻﺎﺭ ﻳﺘﻤﺸﻰ ﺍﻟﺮﺍﺱ ﺍﻟﺸﺎﺭﻉ ..
ﺍﺣﻨﺔ ﻣﺎﻧﻨﺪﻝ ﻛﻠﺶ ..
ﺑﺲ ﮔﻤﻨﺎ ﻧﺴﺄﻝ ﻭﺩﻟﻮﻧﺎ ﻋﻠﻰ ﻣﺤﻼﺕ ﺟﻤﻠﺔ .. ﺭﺣﻨﺎ ﺍﺧﺬﻧﺎ ﻣﻨﻬﺎ ﻣﻦ ﻛﻞ ﻟﻮﻥ ﻭﺷﻜﻞ ﻛﻢ ﻗﻄﻌﻪ ..
ﻭﺍﺧﺬﺕ ﺧﻴﻮﻁ ﻭﺩﺍﻧﺘﻴﻼﺕ ﻭﺩﮔﻢ ﻭﺍﺑﺮ ..
ﻟﻠﻈﻬﺮ ﻳﻠﺔ ﺭﺟﻌﻨﺎ ﻳﺎﺩﻭﺏ ﺻﻠﻴﺖ ﻭﺗﻐﺪﻳﺖ .. ﺩﺧﻠﺖ ﺳﺒﺤﺖ ﻭﺭﺗﺒﺖ ﻧﻔﺴﻲ ﻭﺍﻧﺘﻈﺮﺕ ﺟﺒﺮ ﻳﺠﻲ ..
ﺑﻘﻴﺖ ﮔﺎﻋﺪ ﺷﻮﻳﺔ ﺑﺎﻟﺤﺪﻳﻘﻪ ﺳﻤﻌﺖ ﺍﻟﺒﺎﺏ ﺍﻧﺪﮔﺖ ﻃﻠﻌﺖ
ﺳﻠﻤﺖ ﻋﻠﻰ ﺟﺒﺮ ﻭﺭﺣﻨﺎ ..
ﺳﺄﻟﻨﻲ " ﺍﺫﺍ ﻣﺎﺗﻌﺮﻑ ﺍﺣﺪ ﻫﻨﺎ ﺷﻠﻮﻥ ﺍﺟﻴﺖ ﻭﻟﻴﺶ ؟ "
ﺭﺩﻳﺖ " ﺍﻧﻲ ﺍﺟﻴﺖ ﻣﻬﺰﻭﻡ "!!
ﺻﻔﻦ ﺑﻮﺟﻬﻲ " ﺷﺘﻘﺼﺪ ؟ "
ﺍﺑﺘﺴﻤﺖ " ﻫﺎﻱ ﺳﺎﻟﻔﻪ ﻃﻮﻳﻠﺔ ﺑﺲ ﺑﻌﺪ ﻭﻓﺎﺓ ﺟﺪﻱ ﻋﻤﺎﻣﻲ ﻣﺎﺭﺣﻤﻮﻧﺎ ﻭﺍﺟﻴﺖ ﻟﻬﻨﺎ ﻻﻥ ﻋﺪﻧﺎ ﻣﻌﺎﺭﻑ .. ﻭﻫﺬﺍ ﺍﻟﺒﻴﺖ ﺍﻟﻬﻢ ﺍﺻﻼ ﻳﻌﻨﻲ ﻣﻮ ﺍﻟﻨﺎ .. ﺑﻴﻦ ﻣﺎﺍﺛﺒﺖ ﻧﻔﺴﻲ ﻭﺍﻟﮕﻲ ﺷﻐﻞ "
ﺳﺄﻝ " ﻭﻟﻴﺶ ﻣﺎﺗﺮﺟﻊ ﺗﻜﻤﻞ ﺩﺭﺍﺳﺔ ؟ "
ﻫﻨﺎ ﺳﻜﺘﺖ ﻭﻣﺎﻋﺮﻓﺖ ﺷﺄﺭﺩ ..
ﺑﻌﺪﻫﺎ ﺭﺩﻳﺖ " ﺻﺎﺭﻟﻲ ﺍﺭﺑﻊ ﺳﻨﻮﺍﺕ ﺗﺎﺭﻙ ﺻﻌﺒﻪ ﺍﺭﺟﻊ "
ﺭﺍﺩ ﻳﺤﺠﻲ ﺣﺴﻴﺘﻪ ﻣﺎﺍﻗﺘﻨﻊ .. ﻏﻴﺮﺕ ﺍﻟﺤﺪﻳﺚ ﺑﺴﺮﻋﻪ
" ﺍﻟﻌﻴﺎﺩﺓ ﺑﻌﻴﺪﺓ ؟ "
ﺭﺩ " ﻻ ﻫﺴﺎ ﻧﺮﻛﺐ ﻣﻨﺎ ﺍﻟﺒﺎﺏ ﺍﻟﻤﻌﻈﻢ ﻫﻲ ﻫﻨﺎﻙ ﺍﻟﻌﻴﺎﺩﺓ "
ﻫﺰﻳﺖ ﺭﺍﺳﻲ ﻭﻋﺒﺎﻟﻚ ﺍﻧﻲ ﺍﻧﺪﻝ ﺑﺎﺏ ﺍﻟﻤﻌﻈﻢ ؟؟
ﻭﺻﻠﻨﺎ ﻟﻠﻌﻴﺎﺩﺓ ﺟﺎﻧﺖ ﺑﺎﻟﻄﺎﺑﻖ ﺍﻟﺜﺎﻧﻲ ..
ﺩﺧﻠﻨﺎ ﺍﻟﺴﻜﺮﺗﻴﺮ ﺑﺴﺮﻋﺔ ..
ﺭﺣﺐ ﺑﻴﻪ ﺍﺑﻮ ﺟﺒﺮ .. ﺩﻛﺘﻮﺭ ﻣﺘﻮﺳﻂ ﺑﺎﻟﻌﻤﺮ ﻭﻣﺒﻴﻦ ﻋﻠﻴﻪ ﺍﻟﻮﻗﺎﺭ ﺍﺳﻤﺔ ﺧﻠﻴﻞ ..
ﮔﻌﺪﻧﺎ ﻭﺑﺪﺍ ﻳﺴﺎﻟﻨﻲ ﻭﻳﻦ ﻭﺍﺻﻞ ﻭﺷﻤﺎﺧﺬ ﺭﻏﻢ ﺍﺷﻬﺮ ﺑﻘﻴﺖ ﺑﺎﻟﻜﻠﻴﺔ ﺑﺲ ﻋﻨﺪﻱ ﻣﻌﻠﻮﻣﺎﺕ ﺳﺎﺑﻘﻪ ..
ﺻﻔﻦ ﻭﺑﻌﺪﻫﺎ ﺭﺩ " ﺷﻮﻑ ﺍﺑﻮﻳﺔ ﺍﺫﺍ ﺗﺘﻌﻠﻢ ﺑﺴﺮﻋﻪ ﺭﺍﺡ ﺗﻔﻴﺪﻧﻲ ﻫﻮﺍﻱ . ﻫﺎﻟﻔﺘﺮﺓ ﺭﺍﺡ ﺍﺧﻠﻴﻚ ﺍﺧﺘﺒﺎﺭ ﻭﺍﻋﻠﻤﻚ ﻋﻠﻰ ﺍﻟﻌﻼﺟﺎﺕ ﻭﺗﺮﻛﻴﺒﻬﺎ ﻭﺍﺳﺘﺨﺪﺍﻣﻬﺎ .. ﻭﺑﻤﺮﻭﺭ ﺍﻟﻮﻗﺖ ﺍﺫﺍ ﺷﻔﺘﻚ ﺗﻌﻠﻤﺖ ﺭﺍﺡ ﺗﻜﻮﻥ ﺳﺎﻋﺪﻱ ﺍﻻﻳﻤﻦ .. ﻻﻥ ﺍﻧﻲ ﻣﺤﺘﺎﺝ ﻫﻴﺞ ﺷﺎﺏ ﻣﺜﻠﻚ ﻭﺫﻛﻲ ﻭﺍﻧﺖ ﻣﺒﻴﻦ ﻣﺎﺷﺎﺀ ﻧﺒﻪ ..
ﻭﻫﺎ ﻓﺘﺮﺓ ﺍﻟﺘﺪﺭﻳﺐ ﻣﻦ ﺿﻤﻦ ﺍﻟﺮﺍﺗﺐ ﻻﺗﺨﺎﻑ ﻳﻌﻨﻲ ﻣﻦ ﺍﻟﻴﻮﻡ ﺭﺍﺗﺒﻚ ﺟﺎﺭﻱ ..
ﺗﺠﻲ ﻗﺒﻠﻲ ﻟﻠﻌﻴﺎﺩﺓ ﻭﻣﻦ ﻧﺮﺟﻊ ﺳﻮﻳﺔ ﺍﻧﻲ ﺍﻭﺻﻠﻚ ﻻﻥ ﻧﺘﺄﺧﺮ ﻟﻠﻴﻞ ﻛﻠﺶ ..
ﺍﻭﻗﺎﺕ ﺍﻟﺪﻭﺍﻡ ﺑﺎﻟﻌﻄﻞ ﻣﻦ ﺍﻟﺼﺒﺢ ﻟﻠﺴﺎﻋﻪ 11 ﻭﻣﻦ ﺍﻻﺭﺑﻌﺔ ﺍﻟﻌﺼﺮ ﻟﺜﻤﺎﻧﻴﺔ ﺑﺎﻟﻠﻴﻞ ..
ﺑﺲ ﺑﻴﻮﻡ ﺍﻟﺪﻭﺍﻡ ﻻ ﻣﻦ ﺛﻼﺛﺔ ﻟﻠﺴﺒﻌﻪ ..
ﺟﺒﺮ ﻋﺎﻓﻨﺎ ﻭﺭﺍﺡ ﺑﻘﻴﺖ ﮔﺎﻋﺪ ﻳﻤﺔ ﻭﺍﺗﺎﺑﻊ ﺷﻴﺴﻮﻱ ﻭﺍﻟﺤﺎﻻﺕ ﺍﻟﻲ ﺗﺠﻴﻪ ..
ﺗﻌﻠﻤﺖ ﻫﻮﺍﻱ ﺍﺷﻴﺎﺀ ﺑﻴﻮﻡ ﻭﺍﺣﺪ ﻭﻋﻴﺎﺩﺗﺔ ﻣﺎﺷﺎﺀ ﺍﻟﻠﻪ ﻣﺎﺗﻔﺮﻍ ..
ﻛﻤﻠﻨﺎ ﺭﺟﻌﺖ ﻭﻳﺎﻩ ﻟﻠﺒﻴﺖ ﺑﺎﻟﻄﺮﻳﻖ ﺳﺄﻟﻨﻲ ..
ﺍﻟﺒﺎﺭﺣﺔ ﺷﻔﺖ ﺳﻴﺎﺭﺍﺕ ﻳﻤﻜﻢ ﻭﺍﻋﺘﻘﺪ ﺗﺎﺑﻌﻪ ﻟﻼﻣﻦ ﻣﻨﻮ ﺫﻭﻟﻲ ﻭﺷﻴﺮﺩﻭﻥ ؟؟
ﺗﻠﻌﺜﻤﺖ ﻭﻣﺎﻋﺮﻓﺖ ﺷﺤﺠﻲ .. ﺭﺩﻳﺖ ﻋﻠﻴﻪ ..
ﻋﻨﺪﺓ ﮔﺮﺍﻳﺒﻨﺎ ﺯﻭﺟﻬﺎ ﺑﺎﻻﻣﻦ ﻭﻫﻲ ﻣﻘﻌﺪﺓ ﺍﺟﺔ ﺍﺧﺬﻫﺎ ﻭﺭﺍﺡ ..
ﻫﺰ ﺭﺍﺳﻪ " ﺍﻧﺖ ﻣﺒﻴﻦ ﻭﻟﺪ ﺣﺒﺎﺏ ﻭﻣﻮ ﻣﺎﻝ ﻣﺸﺎﻛﻞ ﻭﺗﺮﻛﺾ ﻋﻠﻰ ﻟﮕﻤﺔ ﻋﻴﺸﺘﻚ .. ﻟﻬﺬﺍ ﮔﻠﺒﻲ ﻣﺮﺗﺎﺣﻠﻚ "
ﻣﺎﺍﻋﺮﻑ ﻟﻴﺶ ﺣﺴﻴﺖ ﺑﻜﻼﻣﺔ ﻟﻐﺰ ﺍﻭ ﺗﻨﺒﻴﻪ ﻣﺎﻓﻬﻤﺖ ﺷﻴﻘﺼﺪ ..
ﺭﺟﻌﺖ ﻟﻠﺒﻴﺖ ﻭﻋﻤﺘﻲ ﻭﺍﻣﻲ ﺗﻠﮕﻨﻲ ﻣﺜﻞ ﻋﺎﺩﺗﻬﻦ ﻭﻭﺣﺪﺓ ﺗﺴﺤﺒﻨﻲ ﻣﻨﺎ ﻭﻭﺣﺪﺓ ﻣﻨﺎ ..
ﻣﻦ ﻏﻴﺮ ﺍﺳﺄﻟﺘﻬﻦ .. " ﺷﺴﻮﻳﺖ ؟ ﻭﻗﺒﻠﻮﻙ ؟ ﻭﺭﺍﺡ ﺗﺪﺍﻭﻡ؟ "
ﺍﺑﺘﺴﻤﺖ " ﺧﻠﻨﻲ ﺍﺭﺗﺎﺡ ﻭﺍﺳﻮﻟﻔﻠﺠﻦ "
ﻟﺰﻣﺖ ﻋﻤﺘﻲ ﻇﻬﺮﻫﺎ ﻭﮔﻌﺪﺕ ..
ﻋﺎﻳﻨﺖ ﻋﻠﻰ ﺍﻟﻘﻨﻔﺔ ﺑﻴﻬﺎ ﻋﻼﻟﻴﮓ ﻫﻮﺍﻱ ..
ﺳﺄﻟﺖ " ﺷﻨﻮ ﻫﺎﻱ ؟ "
ﺭﺩﺕ ﻋﻤﺘﻲ " ﺫﻧﻲ ﺩﺷﺎﺩﻳﺶ ﮔﻌﺪﻧﺎ ﻋﻠﻴﻬﻦ ﻭﻛﻤﻠﻨﺎ ﻧﺼﻬﻦ ﻭﺑﻘﻦ ﻧﺺ "
ﺭﺩﻳﺖ " ﮔﻮﺍﺟﻦ ﺍﻟﻠﻪ ﺑﺲ ﻣﻮ ﻫﻴﺞ ﺗﻌﺒﻦ ﻧﻔﺴﺠﻦ "
ﺭﺩﺕ ﺍﻣﻲ " ﺑﺎﻟﻌﻜﺲ ﺍﻟﺘﻬﻴﻨﺎ ﻋﻤﺘﻚ ﺗﻔﺼﻞ ﻭﺍﻧﻲ ﺍﺧﻴﻂ .. ﺧﻴﻄﻨﺎ ﺑﺎﻟﻌﺸﺮ ﺩﺷﺎﺩﻳﺶ ﺍﺣﺠﺎﻡ ﻣﺨﺘﻠﻔﺔ ﻭﺍﻟﻮﺍﻥ ﻫﻢ "
ﺍﺗﻨﻬﺪﺕ " ﺧﻮﺵ ﺑﺎﺟﺮ ﺍﻥ ﺷﺎﺀ ﺍﻟﻠﻪ ﻣﻦ ﺍﻟﺼﺒﺢ ﺍﻃﻠﻊ ﺑﻴﻬﻦ ﻟﻠﻜﺎﻇﻤﻴﺔ ﺍﺑﻴﻌﻬﻦ ﺑﺲ ﺍﻧﻄﻨﻲ ﻟﮕﻤﺔ ﻭﺧﻠﻲ ﺍﻧﺎﻡ "
ﺧﻠﻦ ﺍﻟﻌﺸﺎ ﺗﻌﺸﻴﻨﺎ ﺩﻭﺭ ﻓﺮﺣﺔ ﺗﺒﺠﻲ ﺗﺮﻳﺪ ﺣﺎﺟﺔ ﺍﺧﺬﺗﻬﺎ ﺍﺷﺘﺮﻳﻨﺎ ﻭﺟﺒﺖ ﺍﻟﺒﺴﻤﺔ ﻭﺍﻻﻣﻲ ﻭﻋﻤﺘﻲ ﺣﺐ ﻋﻴﻦ ﺍﻟﺸﻤﺲ ﻳﺤﺒﻨﻪ ﻭﺭﺟﻌﺖ ﻟﻠﺒﻴﺖ ﻋﺎﻳﻨﺖ ﻭﺍﺣﺪ ﻏﻴﺮﺓ ﻳﺮﺍﻗﺐ ﻣﺎﺍﻫﺘﻤﻴﺖ ﺩﺧﻠﺖ ﻭﻗﻔﻠﺖ ﺍﻟﺒﺎﺏ "
ﺭﺣﺖ ﺗﻤﺪﺩﺕ ﻋﻠﻰ ﺍﻟﺠﺮﺑﺎﻳﺔ ﻭﻧﻤﺖ ﺑﺴﺮﻋﺔ ﻣﻦ ﺍﻟﺘﻌﺐ
ﺛﺎﻧﻲ ﻳﻮﻡ ﻣﻦ ﺍﻟﺼﺒﺢ ﮔﻌﺪﺕ ﺗﺮﻳﮕﺖ ﻭﺣﻀﺮﺕ ﻋﻤﺘﻲ ﺍﻟﺪﺷﺎﺩﻳﺶ ﺟﺎﻧﺖ ﻗﺪﻳﻔﺔ ﻭﻣﺜﻞ ﺍﻟﮕﻠﺒﻴﺎﺕ ﻣﺨﻴﻄﺘﻬﻦ ﻻﻥ ﺍﻟﺠﻮ ﺑﺎﺭﺩ ﻭﻧﻬﺎﻳﺔ ﺷﻬﺮ 12
ﻭﺻﻠﺖ ﺯﺭﺕ ﺍﻻﻣﺎﻡ ﻣﻦ ﺑﺮﺓ ﻭﺩﻋﻴﺖ ﻳﻔﺘﺤﻬﺎ ﺑﻮﺟﻬﻲ ..
ﻓﺮﺷﺖ ﮔﻮﻧﻴﺔ ﺑﺎﻟﮕﺎﻉ ﻻﻥ ﻣﺎﻋﻨﺪﻱ ﺑﺴﻴﻄﺔ ﺍﻟﻜﻞ ﻳﻌﺎﻳﻦ ﻋﻠﻴﻪ ﺑﺄﻋﺘﺒﺎﺭ ﻏﺮﻳﺐ ﻭﺍﻭﻝ ﻣﺮﺓ ﺍﻓﺘﺢ ﻫﻨﺎ ..
ﻃﻠﻌﺖ ﺍﻟﺪﺷﺎﺩﻳﺶ ﻋﻠﻰ ﺻﻔﻄﺘﻬﻦ ﺭﺗﺒﺘﻬﻦ .. ﻭﺍﺣﺪ ﮔﺒﺎﻟﻲ ﻳﺒﻴﻊ ﺟﺎﻱ ﻭﺟﺎﻥ ﺍﻟﺠﻮ ﺑﺎﺭﺩ ﻛﻠﺶ ..
ﻃﻠﺒﺖ ﺟﺎﻱ ﻭﺑﻘﻴﺖ ﺍﺗﺤﺴﺲ ﺑﺪﻓﻮ ﺍﻻﺳﺘﻜﺎﻥ ..
ﻛﻤﻠﺖ ﺭﺟﻌﺘﺔ ﺍﻟﻪ ..
ﺳﻤﻌﺖ ﻣﺮﺓ ﺗﺼﻴﺢ ﻭﻳﻦ ﺻﺎﺣﺐ ﻫﺎﻟﺒﺴﻄﻴﺔ ..
ﺍﺟﻴﺖ ﺍﺭﻛﺾ ﺟﺎﻧﺖ ﺗﮕﻠﺐ ﺑﻴﻬﻦ ..
ﻭﺗﺤﺠﻲ ﻭﻱ ﻭﺣﺪﺓ ﺑﺼﻔﻬﺎ ﻭﺟﻦ ﻋﺠﺒﻨﻬﺎ ..
ﺍﺧﺬﺕ ﺛﻼﺙ ﻗﻄﻊ ﺑﻌﺪﻳﻦ ﺳﺎﻟﺖ :
" ﻫﺬﺍ ﺧﻴﺎﻁ ﺑﻴﺖ ؟ "
ﺭﺩﻳﺖ " ﺍﻱ ﺍﻣﻲ ﻭﻋﻤﺘﻲ ﻳﺨﻴﻄﻨﻬﻦ "
ﺍﺑﺘﺴﻤﺖ " ﻣﺎﺷﺎﺀ ﺍﻟﻠﻪ ﻋﺒﺎﻟﻚ ﺣﺎﺿﺮ ﺑﺲ ﻟﻮ ﺗﮕﻠﻬﻦ ﻳﺨﻴﻄﻦ ﺍﻟﻮﺍﻥ ﺑﻨﺎﺗﻴﺔ ﻭﻓﻮﺍﺗﺢ ﻳﻌﻨﻲ ﻏﻴﺮ ﺍﻟﻤﺎﺭﻭﻧﻲ ﻭﺍﻻﺯﺭﻕ ﺍﺭﻳﺪ ﻭﺭﺩﻱ ﺳﻤﺎﺋﻲ ﻓﺎﺗﺢ ﺍﻟﻮﺍﻥ ﺯﺍﻫﻴﺔ ..
ﻫﺰﻳﺖ ﺭﺍﺳﻲ " ﺍﻥ ﺷﺎﺀ ﺍﻟﻠﻪ ﻣﻦ ﺍﻃﻠﻊ ﺍﺧﺬﻟﻬﻦ ﻫﻴﺞ ﺍﻟﻮﺍﻥ ﻭﺍﮔﻠﻬﻦ ﻳﺨﻴﻄﻦ "
ﺭﺩﺕ " ﺧﻮﺵ ﻟﻌﺪ ﻋﮕﺐ ﺑﺎﺟﺮ ﺍﻣﺮ ﺍﺧﺬ ﺍﺛﻨﻴﻦ ﻧﻔﺲ ﻫﺬﺍ ﺍﻟﻘﻴﺎﺱ ﻭﻛﻮﻥ ﻣﺨﺼﺮﺓ .. ﻭﺍﺫﺍ ﻳﮕﺪﺭﻥ ﺭﻭﺏ ﻣﺎﻝ ﺑﻴﺖ ﻓﻮﮒ ﺍﻟﻤﻼﺑﺲ ﻋﻠﻰ ﻗﻴﺎﺱ ..
ﻭﺻﺎﺭﺕ ﺗﻔﺘﺮ ﮔﺪﺍﻣﻲ ﺣﺘﻰ ﺗﺒﻴﻦ ﻗﻴﺎﺳﻬﺎ ..
ﺩﻧﮕﺖ " ﺍﻥ ﺷﺎﺀ ﺍﻟﻠﻪ ﺍﻟﻲ ﺗﺮﺩﻳﻪ ﻳﺼﻴﺮ "
ﺧﻠﺘﻴﻠﻬﺎ ﺍﻟﻘﻄﻊ ﺑﺎﻟﻌﻼﮔﺔ ﺍﻧﻄﺘﻨﻲ ﺍﻟﻔﻠﻮﺱ ﻭﺳﺄﻟﺖ " ﺑﻴﺘﻜﻢ ﻫﻨﺎ ﻗﺮﻳﺐ ؟؟ "
ﺭﺩﻳﺖ " ﻻﺑﻌﻴﺪ "
ﺭﺩﺕ " ﺍﻣﻤﻤﻢ ﻋﺒﺎﻟﻲ ﻗﺮﻳﺐ ﮔﻠﺖ ﺍﺭﻭﺣﻠﻬﻦ ﺑﻨﻔﺴﻲ ﻋﺠﺒﻨﻲ ﺧﻴﺎﻃﻬﻦ "
ﺳﻠﻤﺖ ﻭﺭﺍﺣﺖ ..
ﺑﺴﺖ ﺍﻟﻔﻠﻮﺱ ﻭﺧﻠﻴﺘﻬﻦ ﻋﻠﻰ ﮔﺼﺘﻲ .. ﺷﮕﺪ ﺻﻌﺒﻪ ﻭﺍﺣﺪ ﻳﺘﻌﺎﻣﻞ ﻭﻱ ﺍﻟﻨﺴﻮﺍﻥ ..
" ﻳﻠﺔ ﺣﻜﻤﺖ ﺍﺗﺤﻤﻞ ﻫﺎﻱ ﻋﻴﺸﺘﻚ .. ﻻﺯﻡ ﺗﺠﺎﻣﻞ ﻭﺗﻜﺴﺐ "
ﻭﺍﺣﺪ ﻳﻤﻲ ﻳﺒﻴﻊ ﺟﻮﺍﺭﻳﺐ ﺳﺎﻟﻨﻲ " ﺍﻟﻠﻪ ﻳﺮﺯﻗﻚ ﻫﺴﺘﻮﻙ ﮔﻌﺪﺕ ﺑﻌﺖ ﺛﻼﺙ ﻗﻄﻊ "
ﺑﻘﻴﺖ ﻟﻠﻌﺸﺮﺓ ﻣﺎﺑﺎﻳﻊ ﻭﻻﻗﻄﻌﻪ ..
ﺍﺟﻦ ﻣﻦ ﺑﻌﻴﺪ ﺑﻨﺎﺕ ﺟﺎﻣﻌﻪ ﻭﺷﺎﻳﻼﺕ ﺻﺪﺍﺭﻱ ﺑﻴﺪﻫﻦ
ﺩﻧﮕﺖ ..
" ﺣﺰﺕ ﺑﺮﻭﺣﻲ ﺣﻴﻞ ﺗﺬﻛﺮﺕ ﺣﺎﻟﻲ ﻭﻛﻠﻴﺘﻲ .. ﺑﺲ ﺷﻌﺠﺐ ﻃﺎﻟﻌﺎﺕ ﻫﻴﺞ ﻭﻛﺖ .. ﺍﻏﻠﺐ ﺑﻨﺎﺕ ﺍﻟﺠﺎﻣﻌﻪ ﻳﺠﻦ ﻟﻠﻜﺎﻇﻤﻴﺔ ﻳﺎﺧﺬﻥ ﻣﻼﺑﺲ ﻻﻥ ﻣﻨﺎﺳﺒﺔ "
ﺭﻓﻌﺖ ﺭﺍﺳﻲ ﺗﻮﻗﻌﺖ ﺭﺍﺣﻦ .. ﺑﺲ ﻃﻠﻌﻦ ﻭﺍﮔﻔﺎﺕ ﻳﻢ ﻣﺤﻞ ﮔﺒﺎﻟﻲ ..
ﺍﺗﻘﺮﺑﺖ ﻭﺣﺪﺓ ﻣﻨﻬﻦ ﺑﻘﺖ ﺗﮕﻠﺐ ﻭﻋﻴﻨﻬﺎ ﻋﻠﻴﻪ ..
ﺳﺄﻟﺘﻨﻲ " ﺍﻧﺖ ﺣﻜﻤﺖ ﻣﻮﻭﻭ؟؟ "
ﺭﻓﻌﺖ ﺭﺍﺳﻲ ﻣﺼﺪﻭﻡ ﺗﺬﻛﺮﺗﻬﺎ " ﻣﻬﺎ ؟؟ "
ﺍﻧﻘﻬﺮﺕ ﻣﻦ ﺷﺎﻓﺘﻨﻲ ﻭﺣﺴﻴﺖ ﺑﺤﺰﻧﻬﺎ ﻭﺩﻫﺸﺘﻬﺎ " ﺍﻧﺖ ﻭﻳﻦ ﻭﺍﻟﻲ ﺳﻤﻌﻨﺎﻩ ﺻﺪﻭﮒ ﺍﻟﻘﺴﻢ ﻛﻠﻪ ﺿﺎﺝ ﻭﺍﺻﻼ ﻛﻠﻬﺎ ﻛﺬﺑﺖ ﺍﻟﺨﺒﺮ ﺷﻜﻠﻚ ﻣﺘﻐﻴﺮ "
ﺑﻘﺖ ﺗﻌﺎﻳﻦ ﻋﻠﻴﻪ ﻭﺻﺪﻳﻘﺎﺗﻬﺎ ﺗﻘﺮﺑﻮﺍ ﺍﻛﻮ ﻣﻦ ﻗﺴﻤﻨﺎ ﻭﺍﻛﻮ ﻻ .. ﺩﻫﺸﺘﻬﻦ ﻭﺍﺿﺤﺔ ..
ﺭﻓﻌﺖ ﺭﺍﺳﻲ ﻭﻣﺎﺭﺩﺕ ﺷﻲ ﻳﻜﺴﺮﻧﻲ " ﻛﻠﺸﻲ ﻣﻘﺪﺭ ﻭﻣﻜﺘﻮﺏ ﺧﻴﺘﻲ ﺷﻜﺮﺍ ﺍﻟﺴﺆﺍﻟﺞ ﺭﺑﻲ ﻳﻮﻓﻘﺠﻦ "
ﺣﺴﺖ ﺑﺄﺣﺮﺍﺟﻲ ﺳﻠﻤﺖ ﻭﺭﺍﺣﺖ ﺑﺲ ﺑﻘﺖ ﺗﺘﻠﻔﺖ ﻛﻞ ﺷﻮﻳﺔ ..
ﺳﺄﻟﻨﻲ ﺍﻟﻲ ﺑﺼﻔﻲ " ﺟﻨﺖ ﻃﺒﻴﻪ ﺍﻧﺖ ؟؟ ﻭﺷﺠﺎﺑﻚ ﻟﻬﻨﺎ ﻟﻴﺶ ﻣﺎﻛﻤﻠﺖ "
ﺭﺩ ﻋﻠﻴﻪ ﺭﺟﺎﻝ ﺟﺒﻴﺮ ﻳﺒﻴﻊ ﺳﺒﺢ ﮔﺒﺎﻟﻨﺎ " ﺍﻟﻌﻮﺯ ﻳﻜﺘﻞ ﻭﺍﻟﻌﻴﺸﺔ ﺗﺨﻠﻲ ﺍﻟﻮﺍﺣﺪ ﻳﺘﻨﺎﺯﻝ ﻋﻦ ﺣﻠﻤﺔ .. ﻫﺎﻱ ﺍﻧﻲ ﮔﺒﺎﻟﻚ ﻣﻌﻠﻢ ﻭﺩﺭﺳﺖ ﺍﺟﻴﺎﻝ ﺷﻜﺜﺮ ﻭﻃﻠﻌﺖ ﺗﻘﺎﻋﺪ ﻭﻳﺎﺩﻭﺏ ﺭﺍﺗﺒﻲ ﺳﺘﻤﻴﺔ ﺩﻳﻨﺎﺭ ﺷﺘﻜﻔﻲ ﻭﺑﺮﮔﺒﺘﻲ ﺛﻼﺙ ﻋﻮﺍﺋﻞ "
ﺧﻠﻴﺘﻬﻢ ﻳﺤﺠﻮﻥ ﻭﺍﻛﺘﻔﻴﺖ ﺑﺎﻟﺴﻜﻮﺕ .. ﺻﺢ ﺍﻟﻌﻮﺯ ﻳﻜﺘﻞ ﺑﺲ ﺟﻨﺖ ﻣﺴﺘﻌﺪ ﺍﺣﻔﺮ ﺍﻟﮕﺎﻉ ﻓﻲ ﺳﺒﻴﻞ ﺍﺣﻘﻖ ﺣﻠﻤﻲ ﻭﺣﻠﻢ ﺍﻣﻲ .. ﻭﻫﺴﺎ ﻛﺮﻫﺖ ﺣﺘﻰ ﺍﺣﻼﻣﻲ ﺣﺘﻰ ﺍﮔﺪﺭ ﺍﻧﺴﺎﻫﻦ ..
ﻟﻠﻈﻬﺮ ﺑﻌﺖ ﺛﻤﺎﻥ ﻗﻄﻊ ﺍﻟﺤﻤﺪ ﻟﻠﻪ ﺭﺟﻌﺖ ﺑﺲ ﻗﻄﻌﺘﻴﻦ ﻭﻳﺎﻱ .. ﻣﺮﻳﺖ ﺍﺧﺬﺕ ﻗﻤﺎﺵ ﺍﻟﻮﺍﻥ ﻓﺎﺗﺢ ﺍﻟﻌﻤﺘﻲ ﻭﺭﺣﺖ ﻟﻠﺒﻴﺖ ..
ﺟﺎﻧﻦ ﻣﺤﻀﺮﺍﺕ ﺍﻟﻐﺪﺍ ﻭﺍﻣﻲ ﻏﺎﺳﻠﺔ ﻫﺪﻭﻣﻲ ﻭﻛﺎﻭﻳﺘﻬﻦ ﻻﻥ ﻳﺎﺩﻭﺏ ﺍﺗﻐﺪﺍ ﻭﺍﺑﺪﻝ ﻭﺍﺭﻭﺡ ﻟﻠﻌﻴﺎﺩﺓ ..
ﺍﻧﻄﻴﺘﻬﻦ ﻓﻠﻮﺱ ﺍﻟﺒﻌﺘﻬﻦ ﻭﮔﻠﺘﻠﻬﻦ ﻋﻠﻰ ﻃﻠﺐ ﺍﻟﻤﺮﺓ ﻓﺮﺣﻦ ﻭﮔﺎﻟﻦ ﻧﺨﻠﺺ ﺍﻟﻐﺪﺍ ﻭﻧﮕﻌﺪ ﻋﻠﻴﻬﻦ ..
ﻭﻫﻢ ﺭﺍﺡ ﻧﺨﻴﻄﻠﻚ ﺭﻭﺏ ﻛﻢ ﻗﻄﻌﻪ ﻋﻠﮕﻬﻦ ﻋﻠﻰ ﺣﺎﻳﻂ ﺷﻮ ﺷﻨﻮ ﻭﺍﺫﺍ ﺷﻔﺖ ﻃﻠﺐ ﻋﻠﻴﻬﻦ ﻧﺨﻴﻄﻠﻚ ﺑﻌﺪ ..
ﺗﻐﺪﻳﺖ ﻭﻛﻤﻠﺖ ﻋﺎﻳﻨﺖ ﻟﻠﺴﺎﻋﻪ ﺑﺎﻟﻮﺣﺪﺓ ﮔﻠﺖ ﺍﻧﺎﻡ ﻧﺺ ﺳﺎﻋﻪ ﻭﻭﺻﻴﺘﻬﻢ ﻳﮕﻌﺪﻭﻧﻲ ..
ﺑﺲ ﺑﺴﻤﺔ ﻣﺎﺧﻠﺘﻨﻲ ﺍﻧﺎﻡ .. ﺟﺎﻧﺖ ﻣﺸﺘﺎﻗﺘﻠﻲ ﻭﺻﺎﺭ ﻛﻢ ﻳﻮﻡ ﻫﺎﻣﻠﻬﺎ ..
ﺍﺧﺬﺗﻬﺎ ﺍﻟﺤﻀﻨﻲ ﻭﻋﻠﻰ ﻣﺎ ﺳﻮﻟﻔﻨﺎ ﻭﺍﺗﺸﺎﻗﻴﻨﺎ ﻭﺩﻭﺭ ﺍﺟﺖ ﻓﺮﺣﺔ ﻫﻢ ﺗﺮﻳﺪ ﺗﻠﻌﺐ .. ﺧﻠﺼﺖ ﺍﻟﻨﺺ ﺳﺎﻋﻪ ..
ﺑﺪﻟﺖ ﻭﻃﻠﻌﺖ ..
ﻭﮔﻔﺖ ﺳﻴﺎﺭﺓ ﻧﺒﺮﺍﺱ ﺑﺎﻟﺒﺎﺏ .. ﺍﺗﻔﺎﺟﺄﺕ .. ﺗﻮﻗﻌﺖ ﺑﻌﺪ ﻣﺎﺗﺠﻲ .. ﺑﺲ ﺍﻟﻲ ﺍﺟﺔ ﺳﺎﻳﻘﻬﺎ ﺑﺲ ..
ﻧﺰﻝ ﻋﻼﻟﻴﮓ ﻭﻏﺮﺍﺽ ..
ﺳﺎﻟﺘﻪ " ﺷﻨﻮ ﺫﻧﻲ ؟ "
ﺭﺩ " ﻣﺪﺍﻡ ﻧﺒﺮﺍﺱ ﺩﺯﺗﻬﻦ ﻟﻠﻬﻮﺍﻧﻢ ﻭﻫﻲ ﺗﺨﺎﺑﺮﻫﻢ ﺗﻔﻬﻤﻬﻢ "
ﺍﺧﺬﺗﻬﻦ ﺩﺧﻠﺘﻬﻦ ﺍﻻﻣﻲ ﻭﮔﻠﺘﻠﻬﺎ ﺗﺨﺎﺑﺮ ﻧﺒﺮﺍﺱ ﺗﺸﻮﻓﻬﺎ ﻳﻤﻜﻦ ﺧﻴﺎﻁ ﺗﺮﻳﺪ ..
ﺭﺟﻌﺖ ﺍﺭﻳﺪ ﺍﻃﻠﻊ ﻟﮕﻴﺘﺔ ﻣﻨﺰﻝ ﺑﺎﻟﺤﺪﻳﻘﻪ ﺻﻨﺎﺩﻳﮓ ﻣﻦ ﻛﻠﺸﻲ ﻣﺨﻀﺮ ﻭﻓﻮﺍﻛﻪ ﻭﻣﻮﺍﺩ ﻏﺬﺍﺋﻴﺔ ..
ﺍﺗﻨﻬﺪﺕ .. ﺻﺤﺖ ﺍﻣﻲ " ﻳﻤﺔ ﺧﺎﺑﺮﻳﻬﺎ ﻭﺍﺣﺠﻲ ﻭﻳﺎﻫﺎ ﻳﺠﻲ ﻳﺎﺧﺬﻫﻦ .. ﻧﺪﺭﻱ ﺗﺮﻳﺪ ﺗﺴﺎﻋﺪﻧﺎ ﻭﻛﺜﺮ ﺧﻴﺮﻫﺎ ﻣﺎﻗﺼﺮﺕ ﺑﺲ ﻣﻮ ﻫﻴﺞ ﻣﺎﺍﻗﺒﻞ ﻫﺎﻟﺸﻲ "
ﺳﺪﻳﺖ ﺍﻟﺒﺎﺏ ﻭﻃﻠﻌﺖ ﺿﺎﻳﺞ " .. ﺍﻋﺮﻑ ﻧﻴﺘﻬﺎ ﻃﻴﺒﺔ ﺑﺲ ﻣﺎﺍﺭﻳﺪ ﺍﺣﺪ ﻳﺘﺼﺪﻕ ﻋﻠﻴﻨﺎ ﺍﻟﻠﻪ ﻓﺎﺗﺤﻬﺎ ﺑﻮﺟﻬﻨﺎ ﻭﺍﻟﺤﻤﺪ ﺍﻟﻪ "
ﻭﺻﻠﺖ ﻟﻠﻌﻴﺎﺩﺓ ﻟﮕﻴﺖ ﺍﻟﺴﻜﺮﺗﻴﺮ ﻳﻤﺴﺢ ﺑﺎﻟﻄﺎﻭﻟﺔ ..
ﺳﻠﻤﺖ ﻋﻠﻴﻪ ﻭﺩﺧﻠﺖ ﻛﻤﻠﺖ ﺗﺮﺗﻴﺐ ﻭﮔﻌﺪﺕ ..
ﺍﺟﻮ ﺍﻟﻤﺮﺍﺟﻌﻴﻦ ﺑﺪﻳﻨﺎ ﻧﺴﺠﻞ ﺍﺳﻤﺎﺀ ﻭﺍﻻﻭﻟﻴﺔ ﻟﻠﻲ ﺣﺎﻟﺘﺔ ﻣﺴﺘﻌﺠﻠﺔ ﺍﻭ ﻣﻦ ﺍﻟﻤﺤﺎﻓﻈﺎﺕ ..
ﺍﺟﺔ ﺍﻟﺪﻛﺘﻮﺭ ﺳﻠﻢ ﻭﺩﺧﻠﻨﺎ ..
ﺍﺷﺮﻟﻲ ﺍﺩﺧﻞ ﺍﻭ ﻭﺍﺣﺪ .. ﺩﺧﻠﺘﻪ
ﺑﻌﺪﻫﺎ ﺳﺤﺐ ﺍﻟﻜﺮﺳﻲ ﻭﮔﺎﻝ ﺍﮔﻌﺪ ﻳﻤﻲ ..
ﺷﺮﺡ ﺍﻟﻤﺮﻳﺾ ﺣﺎﻟﺘﻪ ﻭﺍﻧﻲ ﺟﻨﺖ ﺍﺗﺼﻨﺖ .. ﻭﺍﻟﺪﻛﺘﻮﺭ ﺑﺪﺍ ﻳﺸﺮﺣﻠﺔ ..
ﻛﺘﺐ ﺍﻟﻌﻼﺝ ﻭﺑﻌﺪﻫﺎ ﻋﻠﻤﻨﻲ ﻋﻠﻰ ﻃﺮﻳﻘﻪ ﻛﻞ ﺗﺮﻛﻴﺒﺔ ﺍﻭ ﺩﻭﺍ ..
ﺍﻓﺘﻬﻤﺖ ﻛﻢ ﻭﺍﺣﺪ ﻭﺑﻌﺪﻫﺎ ﺑﺪﻳﺖ ﺍﻛﺘﺒﻠﻬﻢ ﺍﻻﻭﻗﺎﺕ ﺍﻧﻲ ..
ﻟﻠﻴﻞ ﻛﻤﻠﻨﺎ ..
ﺑﻘﻴﻨﺎ ﺷﻮﻳﺔ ﺑﺎﻟﻌﻴﺎﺩﺓ ﻓﻬﻤﻨﻲ ﻋﻠﻰ ﺍﻟﻌﻼﺟﺎﺕ ﻫﻮ ﻳﺤﺠﻲ ﻭﺍﻧﻲ ﺍﺩﻭﻥ ﻣﻼﺣﻈﺎﺕ ..
ﺭﺟﻌﻨﺎ ﻣﺘﺄﺧﺮﻳﻦ ﻟﻠﺒﻴﺖ ..
ﺳﻠﻤﺖ ﻋﻠﻴﻪ ﻭﻧﺰﻟﺖ ..
ﺷﻔﺖ ﺍﻣﻲ ﺗﺤﻮﻡ ﺑﺎﻟﺤﺪﻳﻘﺔ ﺑﺎﻟﻬﺎ ﻳﻤﻲ .. ﺷﺎﻓﺘﻨﻲ ﺭﻓﻌﺖ ﺭﺍﺳﻬﺎ ﻟﻠﺴﻤﺎ " ﺍﻟﺤﻤﺪ ﻟﻠﻪ ﻭﺍﻟﺸﻜﺮ .. ﻟﻴﺶ ﻫﻴﺞ ﻳﻤﺔ ﺗﺨﻠﻴﻨﻲ ﻣﺪﻭﻟﺒﺔ ﻻﺍﻋﺮﻑ ﺍﺣﺪ ﻫﻨﺎ ﺍﺳﺎﻟﻪ ﻭﻻﺍﻋﺮﻑ ﻭﻳﻦ ﺍﺭﻭﺡ ""
ﺣﻀﻨﺘﻬﺎ ﻭﺑﺴﺖ ﺭﺍﺳﻬﺎ " ﻻﺗﺨﺎﻓﻴﻦ ﻳﺎﺍﻡ ﺣﻜﻤﺖ ﺍﻟﻠﻪ ﺍﻟﺤﺎﺭﺱ .. ﺑﻌﺪﻳﻦ ﺍﻟﺪﻛﺘﻮﺭ ﺍﺧﺮﻧﻲ ﻭﻳﻤﻜﻦ ﻫﺎﻟﻔﺘﺮﺓ ﻧﺘﺄﺧﺮ ﻛﻞ ﻳﻮﻡ ﻻﻥ ﻳﻌﻠﻤﻨﻲ ﺷﻐﻼﺕ ﻭﺍﻻﺩﻭﻳﺔ ﻭﺍﻭﻗﺎﺗﻬﻦ "
ﺍﺗﻨﻬﺪﺕ " ﺍﻟﺤﻤﺪ ﻟﻠﻪ ﺭﺑﻲ ﻳﻔﺘﺤﻬﺎ ﺑﻮﺟﻬﻚ ﺑﻌﺪ ﻭﺑﻌﺪ ﺍﻥ ﺷﺎﺀ ﺍﻟﻠﻪ "
ﺍﺑﺘﺴﻤﺖ " ﻫﺎﻱ ﺩﻋﻮﺍﺗﺞ ﻳﻤﺔ ﻫﻲ ﺍﻟﻲ ﻭﺍﻛﻔﺘﻠﻲ ﺩﻭﻡ ﻭﺗﻨﺠﻴﻨﻲ "
ﺩﺧﻠﺖ ﺑﺪﻟﺖ ﻭﻏﺴﻠﺖ ﺑﻴﻦ ﻣﺎﺍﺻﻠﻲ ﺟﺎﺑﺘﻠﻲ ﺍﻣﻲ ﺍﻟﻌﺸﺎ ﺍﺟﺖ ﻓﺮﺣﺔ ﺗﺘﺮﻧﺢ ﺑﻤﺸﻴﺘﻬﺎ ﻣﻦ ﺍﻟﺴﻤﻦ ..
" ﺑﺎﺑﺎ ﺩﻭﻋﺎﻧﺔ "
ﺷﻬﮕﺖ ﻭﺣﻀﻨﺘﻬﺎ " ﻳﺒﻌﺪ ﺍﺑﻮﺝ ﺍﻧﺘﻲ "
ﮔﻌﺪﺗﻬﺎ ﺑﺤﻀﻨﻲ ﻭﺍﺳﻮﻳﻠﻬﺎ ﻟﻔﺎﺕ ﻭﺗﺎﻛﻞ ﺑﺲ ﻫﻲ ﺟﺎﻧﺖ ﺗﺬﺏ ﺍﻟﺨﺒﺰﺓ ﻭﺗﺎﻛﻞ ﺑﺲ ﺍﻟﺒﺘﻴﺘﺔ ﻭﺍﻟﺰﻻﻃﺔ ﻓﺎﺭﻏﺎﺕ ..
ﻛﻤﻠﺖ ﻭﺭﺣﺖ ﻟﻠﻐﺮﻓﺔ ﺍﺟﺖ ﻓﺮﺣﺔ ﻭﻳﺎﻱ ..
ﺟﺎﻧﺖ ﺑﺴﻤﺔ ﻧﺎﻳﻤﺔ ﺗﻤﺪﺩﺕ ﻭﺧﻠﻴﺖ ﻓﺮﺣﺔ ﺑﺤﻀﻨﻲ ﻏﻔﻴﺖ ﺑﺴﺮﻋﻪ ..
ﻭﻣﺜﻞ ﺍﻟﻌﺎﺩﺓ ﮔﻌﺪﺕ ﺍﻟﺼﺒﺢ ﺗﺮﻳﮕﺖ ﻭﻟﺒﺴﺖ ﻗﻤﺼﻠﺘﻲ ﺍﺧﺬﺕ ﺍﻟﻌﻼﻟﻴﮓ ﺍﻟﻲ ﺑﻴﻬﻦ ﺍﻟﻤﻼﺑﺲ ﺍﻟﻤﺨﻴﻄﺎﺗﻬﻦ ﻋﻤﺘﻲ ﻭﺍﻣﻲ ..
ﻟﮕﻴﺖ ﺟﺒﺮ ﮔﺒﺎﻟﻲ .. ﺳﻠﻤﺖ ﻋﻠﻴﻪ ﻭﺍﺻﺮ ﻳﺎﺧﺬﻧﻲ ﻭﻳﺎﻩ ..
ﻫﻮ ﻳﺮﻭﺡ ﺑﺘﻜﺴﻲ ﻭﺍﻧﻲ ﻻ ..
ﺍﺳﺘﺤﻴﺖ ﺍﺣﺠﻲ .. ﺭﻛﺒﺖ ﺳﺄﻟﻨﻲ " ﻭﻳﻦ ﺗﻮﺻﻞ ؟ "
ﺭﺩﻳﺖ " ﻟﻠﻜﺎﻇﻤﻴﺔ "
ﺣﺠﻰ ﻭﻱ ﺍﻟﺴﺎﻳﻖ ﻭﺍﻧﻄﺎﻩ ﺍﻟﻜﺮﻭﺓ ﺭﺩﺕ ﺍﺩﻓﻊ ﻣﺎﻗﺒﻞ ..
ﻧﺰﻝ ﻫﻮ ﻭﮔﺎﻝ ﻟﻠﺴﺎﻳﻖ ﻳﻮﺻﻠﻨﻲ ﻟﻠﻤﻜﺎﻥ ﺍﻟﻲ ﺍﺭﻳﺪﺓ ..
ﻭﺻﺪﮒ ﻭﺻﻠﻨﻲ ﺍﻟﺴﺎﻳﻖ ﻭﺭﺣﺖ ..
ﻓﺮﺷﺖ ﺍﻟﮕﻮﻧﻴﺔ ﻭﺧﻠﻴﺖ ﺍﻟﺪﺷﺎﺩﻳﺶ .. ﺷﻔﺖ ﻋﻤﺘﻲ ﻣﺨﻠﻴﻪ ﺍﻟﺮﻭﺍﺑﺔ ﺑﺘﻌﻼﮔﺎﺕ ..
ﻃﻠﺒﺖ ﺑﺴﺎﻣﻴﺮ ﻭﺟﺎﻛﻮﺝ ﻭﺩﮔﻴﺘﻬﻦ ﻋﻠﻰ ﺍﻟﺤﺎﻳﻂ ..
ﻋﻠﮕﺘﻬﻦ .. ﺟﺎﻧﺖ ﻋﻤﺘﻲ ﻣﺘﻔﻨﻨﻪ ﺑﻴﻬﻦ ﺍﻟﺼﺪﺭ ﻛﻠﺔ ﺗﻄﺮﻳﺰ ﻭﻣﺮﺗﺐ ..
ﺳﻠﻤﺖ ﻋﻠﻰ ﻋﻤﻲ ﻣﺤﻤﺪ ﺍﻟﻤﻌﻠﻢ ﺍﻟﻤﺘﻘﺎﻋﺪ .. ﻭﺑﺼﻔﻲ ﻋﻠﻲ ﺍﺑﻮ ﺍﻟﺠﻮﺍﺭﻳﺐ ..
ﺟﺎﺑﻮﻟﻲ ﺟﺎﻱ ﻭﻛﻌﻚ ﺗﺸﻜﺮﺕ ﻣﻨﻬﻢ ﻭﺷﺮﺑﺖ ﺑﺲ ﺍﻟﺠﺎﻱ ..
ﺍﺟﺖ ﻧﻔﺲ ﺍﻟﻤﺮﺓ ﺍﻟﻲ ﺍﺟﺖ ﺍﻟﺒﺎﺭﺣﺔ ﻭﻭﻳﺎﻫﺎ ﻧﺴﻮﺍﻥ ﻣﺒﻴﻨﺔ ﻣﻦ ﺍﻟﻜﺎﻇﻤﻴﺔ .. ﺷﺎﻓﺖ ﺍﻟﺮﻭﺏ ﺗﺨﺒﻠﺖ ﻋﻠﻴﻬﻦ ﺍﺧﺬﺗﻬﻦ ﻛﻠﻬﻦ ﻭﺍﻟﻨﺴﻮﺍﻥ ﺍﻟﻮﻳﺎﻫﺎ ﺑﻘﻦ ﻳﺤﺠﻦ :
" ﻳﺎ ﻳﺪﺍﺩﺓ ﺍﺧﺬﺗﻴﻬﻦ ﺛﻼﺛﺘﻬﻦ ﻋﺎﺩ ﺍﺧﺬﻱ ﻭﺣﺪﺓ "
ﺭﺩﺕ " ﺍﻧﻲ ﻭﺻﻴﺘﺔ "
ﺑﻌﺪﻫﺎ ﺳﺄﻟﺘﻨﻲ ﺍﻟﻤﺮﺓ ﺍﻟﻴﻤﻬﺎ " ﻫﻢ ﺗﺠﻴﺐ ﺑﻌﺪ ﻣﻨﻬﻦ "
ﺭﺩﻳﺖ " ﻉ ﺍﻟﻄﻠﺐ ﺍﺫﺍ ﺗﺮﺩﻭﻥ ﻭﺍﻱ ﻟﻮﻥ ﮔﻮﻟﻮﺍ "
ﺍﻟﻤﺮﺓ ﺍﻟﻲ ﺍﺟﺘﻨﻲ ﺍﻟﺒﺎﺭﺣﺔ ﺳﺄﻟﺘﻨﻲ ﻋﻦ ﺍﻟﺪﺷﺎﺩﻳﺶ ﺍﻟﻲ ﺭﺍﺩﺗﻬﻦ
ﺟﺎﻭﺑﺘﻬﺎ " ﻣﻮ ﺍﻧﺘﻲ ﮔﻠﺘﻲ ﻋﮕﺒﻪ ﺍﺟﻴﻚ ﻣﺎﻋﺒﺎﻟﻲ ﺗﺠﻴﻦ ﺍﻟﻴﻮﻡ ﻭﺍﻟﺒﺎﺭﺣﺔ ﺍﻧﺸﻐﻠﻦ ﺑﺎﻟﺮﻭﺍﺑﺔ ﻣﺎﻟﺤﮕﻦ "
ﻫﺰﺕ ﺭﺍﺳﻬﺎ " ﻟﻌﺪ ﺑﺎﺟﺮ ﻫﻢ ﺍﻣﺮﻟﻚ "
ﺻﺎﺭﺕ ﻛﻞ ﻳﻮﻡ ﺗﻤﺮ ﻭﺗﺠﻴﺐ ﻧﺴﻮﺍﻥ ﺑﺤﻴﺚ ﺍﻟﺒﻀﺎﻋﻪ ﺍﺟﻴﺒﻬﺎ ﺗﺨﻠﺺ .. ﻭﻋﻤﺘﻲ ﻭﺍﻣﻲ ﻣﺎﻳﻠﺤﮕﻦ ﺧﻄﻴﺔ ﻳﺨﻴﻄﻦ ﻟﻴﻞ ﻭﻧﻬﺎﺭ ..
ﺍﻟﻤﻬﻢ ﺍﻟﺮﺯﻕ ﺧﻴﺮ ﻣﻦ ﺍﻟﻠﻪ ..
ﻭﺣﺘﻰ ﺍﻛﻮ ﺍﻫﻞ ﻣﺤﻼﺕ ﻳﻄﻠﺒﻮﻥ ﻣﻨﻲ ﻳﺎﺧﺬﻭﻫﻦ ﻣﻨﻲ ﻭﻳﺒﻴﻌﻮﻫﻦ ﺑﺄﻏﻠﻰ ﺑﺲ ﺟﻨﺖ ﻣﺎﺍﺯﻭﺩ ﻣﺠﺮﺩ ﺭﺑﺢ ﻗﻠﻴﻞ ﻓﻮﮒ ﺳﻌﺮ ﺍﻟﻘﻤﺎﺵ ﻭﺗﻌﺐ ﺍﻣﻲ ﻭﻋﻤﺘﻲ ..
ﺟﻨﺖ ﺍﻋﺎﻳﻦ ﻋﻠﻰ ﺍﻟﻤﺤﻼﺕ ﻭﺍﺗﻤﻨﻰ ﻳﺼﻴﺮ ﻋﻨﺪﻱ ﻣﺤﻞ ﻭﺍﻛﺒﺮ ﺍﻟﻤﺸﺮﻭﻉ ﺻﺎﺭﻟﻲ ﻭﺍﻫﺲ ﺑﻌﺪ ﻣﺎﺷﻔﺖ ﺭﺑﻲ ﺍﻟﻌﺎﻟﻤﻴﻦ ﺷﻠﻮﻥ ﻭﺍﮔﻔﻠﻲ ..
ﺑﺲ ﺍﻟﻲ ﻣﺎﺭﻳﺤﻨﻲ ﺍﻟﻤﺮﺓ ﺍﻟﻲ ﺗﺠﻴﻨﻲ ﺍﺳﻤﻬﺎ ﻧﺴﻤﺔ ﺻﺢ ﺗﺠﻴﺒﻠﻲ ﻣﻌﺎﻣﻴﻞ .. ﺑﺲ ﻋﻴﻨﻬﺎ ﻣﺎﺗﺸﻴﻠﻬﺎ ﻋﻨﻲ ..
ﻭﻣﺮﺓ ﻃﻠﺒﺖ ﻣﻨﻲ ﺍﺟﻴﺐ ﺍﻟﺒﻀﺎﻋﻪ ﻭﺍﺟﻴﻬﺎ ﻟﻠﺒﻴﺖ ﻭﻫﻲ ﺗﺠﻴﺐ ﻧﺴﻮﺍﻥ ﺍﻟﻤﻨﻄﻘﺔ ﻳﺸﺘﺮﻥ ﺍﺣﺴﻦ ﻣﻦ ﮔﻌﺪﺕ ﺍﻟﺒﺮﺩ
ﻫﺬﺍ ﺟﺎﻥ ﻋﺬﺭﻫﺎ ..
ﺭﺩﻳﺘﻬﺎ " ﻻ ﺧﺎﻟﺔ ﻫﻨﺎ ﺍﺣﺴﻦ ﻳﻢ ﺍﻻﻣﺎﻡ ﻭﺍﺳﺘﻔﺘﺢ ﺭﺯﻗﻲ ﻳﻤﺔ "
ﻣﺎﻋﺠﺒﻬﺎ ﺍﻟﺤﺠﻲ ﻭﺧﺎﺻﻪ ﻣﻦ ﮔﻠﺘﻠﻬﺎ ﺧﺎﻟﺔ ..
ﺭﺩﺕ " ﺷﻨﻮ ﺧﺎﻟﺔ ﻗﺎﺑﻞ ﻫﺎﺯ ﻛﺎﺭﻭﻛﻲ "
ﺭﺩﻳﺖ " ﺍﻟﻌﻔﻮ ﻣﺎﻗﺼﺪﻱ ﺑﺲ ﺍﻧﺘﻲ ﺑﮕﺪ ﺍﻣﻲ ﺷﺄﮔﻠﺞ ﻳﻌﻨﻲ "
ﻭﺑﺪﺍﺧﻠﻲ ﺟﻨﺖ ﺍﻗﺎﺭﻥ ﺑﻴﻬﺎ ﻭﺑﻴﻦ ﺍﻣﻲ .. ﺍﻣﻲ ﺍﺻﻐﺮ ﻣﻨﻬﺎ ﻭﺍﺣﻠﻰ ﺑﺲ ﺍﻟﻮﻛﺖ ﻭﺍﻟﺪﻧﻴﺎ ﻭﻗﻬﺮﻫﺎ ﻛﺒﺮﻭﻫﺎ ..
ﺟﺎﻧﺖ ﺑﺪﺍﻳﺔ ﺳﻨﺔ ﺟﺪﻳﺪﺓ ﻟﺴﻨﺔ 2003 .. ﺩﻛﺘﻮﺭ ﺧﻠﻴﻞ ﺍﻧﻄﺎﻧﻲ ﺍﻛﺮﺍﻣﻴﺔ ﻭﻋﻄﻠﺔ " ﻫﺎﻙ ﻭﻟﻴﺪﻱ ﺍﺧﺬﻫﻦ ﻭﺭﻭﺡ ﻃﻠﻊ ﺍﻫﻠﻚ ﻭﻭﻧﺴﻬﻢ "
ﺗﺸﻜﺮﺕ ﻣﻨﻪ ﻭﻃﻠﻌﺖ ﻣﻦ ﻭﻛﺖ ﻣﺎﺍﻋﺮﻑ ﻭﻳﻦ ﺍﺧﺬﻫﻢ ﺑﺲ ﺑﺴﻤﺔ ﻭﻓﺮﺣﺔ ﺍﺑﺪ ﻣﺎﻃﺎﻟﻌﻴﻦ ..
ﺭﺟﻌﺘﻠﻬﻢ ﻣﻦ ﻭﻛﺖ ﺗﻔﺎﺟﺄﻭﺍ ..
ﺳﺄﻟﺖ ﺍﻣﻲ " ﺧﻴﺮ ﻳﻤﺔ ﺷﻜﻮ ﺷﻮ ﺭﺍﺟﻊ ﻣﻦ ﻭﻛﺖ "
ﺭﺩﻳﺖ " ﻳﻤﺔ ﺍﻟﺪﻛﺘﻮﺭ ﻃﻠﻊ ﻭﺍﻧﻄﺎﻧﺔ ﺍﺟﺎﺯﺓ ﻭﺍﻛﺮﺍﻣﻴﺔ ﻋﻠﻤﻮﺩ ﺭﺃﺱ ﺍﻟﺴﻨﺔ ﻭﻳﻦ ﺗﺮﺩﻭﻥ ﻧﻄﻠﻊ "
ﺿﺤﻜﺖ ﻋﻤﺘﻲ " ﺍﻟﻠﻪ ﻳﻜﺜﺮ ﺧﻴﺮﻩ .. ﺿﻤﻬﻦ ﺍﻟﻚ ﻳﻤﺔ ﻣﺼﺮﻑ ﺷﻨﺴﻮﻱ ﺑﺎﻟﻄﻠﻌﻪ ﺷﻮ ﺍﻧﺖ ﻛﻞ ﺧﻤﻴﺲ ﺗﺎﺧﺬﻧﺎ ﻧﺰﻭﺭ ﺍﻻﻣﺎﻡ ..
ﺭﺩﻳﺖ " ﻣﻴﺨﺎﻟﻒ ﻋﻤﺔ ﺍﻟﺮﺯﻕ ﺧﻴﺮ ﻣﻦ ﺍﻟﻠﻪ ﺑﺲ ﻓﺮﺣﺔ ﺑﺴﻤﺔ ﻭﻓﺮﺣﺔ ﺗﺴﻮﺓ ﺍﻟﺪﻧﻴﺎ ﻋﻨﺪﻱ .. ﺍﻧﻲ ﺍﮔﻮﻝ ﺍﺧﺬﻫﻦ ﻟﻤﺪﻳﻨﺔ ﺍﻻﻟﻌﺎﺏ ﻭﻧﺘﻌﺸﺎ ﻫﻨﺎﻙ ﻭﻧﻐﻴﺮ ﺟﻮ ﻭﻧﺮﺟﻊ "
ﺍﺗﻘﺮﺑﺖ ﺍﻣﻲ ﻭﺣﻀﻨﺘﻨﻲ " ﺍﻟﻠﻪ ﻳﻨﻄﻴﻚ ﺍﻟﻌﺎﻓﻴﺔ ﻭﺍﻟﺼﺤﺔ ﻭﻳﺮﺯﻗﻚ ﻋﻠﻰ ﻋﻴﻦ ﻫﺎﻟﻔﻘﻴﺮﺓ ﺍﻟﻲ ﺟﺎﺑﺮ ﺧﺎﻃﺮﻫﺎ ﺩﻭﻡ "
ﺑﺴﺖ ﺭﺍﺳﻬﺎ " ﻳﻤﺔ ﺷﻌﻨﺪﻱ ﻏﻴﺮﻛﻢ ﺗﺤﺠﻴﻦ ﺻﺪﮒ ؟ ﻭﺑﺴﻤﺔ ﻣﺮﻳﺘﻲ ﻭﺍﻡ ﺑﻨﺘﻲ ﻭﻳﻜﻔﻲ ﻫﻲ ﺗﺤﺒﻨﻲ ﺑﮕﻠﺐ ﺻﺎﻓﻲ ﻭﻣﻦ ﻏﻴﺮ ﻣﻘﺎﺑﻞ ..
ﻳﻠﺔ ﺑﺪﻟﻦ ﺑﺴﺮﻋﻪ ﻻﻧﺘﺄﺧﺮ ..
ﺑﺪﻟﻦ ﻭﻗﻔﻠﻨﺎ ﺍﻟﺒﺎﺏ ﻭﻃﻠﻌﻨﺎ .. ﻧﺒﺮﺍﺱ ﺑﻌﺪ ﻣﺎﺷﻔﻨﺎﻫﺎ ﻭﻻﺍﺟﺖ ﺑﺲ ﺟﺎﻧﺖ ﺗﺨﺎﺑﺮ ﺩﻭﻡ ﻭﺗﺴﺄﻝ ..
ﻭﻣﺮﺍﺕ ﺗﺪﺯ ﺳﺎﻳﻘﻬﺎ ﻭﻭﻳﺎﻩ ﻧﺴﻮﺍﻥ ﺿﺒﺎﻁ ﻭﺩﻛﺎﺗﺮﺓ ﻳﺨﻴﻄﻦ ﻋﻨﺪ ﺍﻣﻲ ﻭﻋﻤﺘﻲ ﻭﻫﻴﺞ ﮔﺪﺭﻧﺎ ﻧﻮﮔﻒ ﻋﻠﻰ ﺭﺟﻠﻨﺎ ﻭﻧﺴﺘﻘﺮ ﺟﻨﺖ ﻣﻘﺮﺭ ﺑﺲ ﺍﺟﻤﻊ ﻣﺒﻠﻎ ﻣﺤﺘﺮﻡ ﺍﺟﺮ ﺑﻴﺖ ﺻﻐﻴﺮ ﻭﺍﻃﻠﻊ ﻣﻨﺎ ..
ﻻﻥ ﻻ ﺍﻟﻤﻨﻄﻘﻪ ﺗﻼﺋﻤﻨﺎ ﻭﻻ ﺍﻟﻲ ﻳﺮﺍﻗﺒﻮﻥ ﻟﻴﻞ ﻭﻧﻬﺎﺭ ﻭﻣﻨﺘﻈﺮﻳﻦ ﺍﻟﺰﻟﺔ ﻣﻨﺎ ..
ﺭﺣﻨﺎ ﻟﻼﻟﻌﺎﺏ ﻭﺟﺎﻧﺖ ﻓﺮﺣﺔ ﻣﻜﻴﻔﻪ ﻭﺑﺴﻤﺔ ﺍﻛﺜﺮ .. ﻟﻌﺒﺘﻬﻦ ﻭﺻﻌﺪﻧﺎ ﻛﻠﻤﺎ ﺑﺪﻭﻻﺏ ﺍﻟﻬﻮﻯ .. ﻭﻋﻤﺘﻲ ﺧﺒﺼﺘﻨﺎ ﺑﺎﻟﺼﻴﺎﺡ ﺗﺨﺎﻑ ﺗﮕﻮﻝ " ﺟﻦ ﺍﻟﺪﻧﻴﺎ ﺗﻔﺘﺮ ﺑﻴﻪ "
ﻭﻫﻲ ﻓﻌﻼ ﺗﻔﺘﺮ ﺑﻴﻨﺎ .. ﻣﻦ ﺍﺻﻌﺪ ﺍﻻﺧﺮ ﻗﻤﺔ ﺑﺎﻟﺪﻭﻻﺏ ﻭﺍﺷﻮﻑ ﺑﻐﺪﺍﺩ ﺍﺣﺲ ﺍﻟﺪﻧﻴﺎ ﺷﮕﺪ ﺻﻐﻴﺮﺓ ﻭﺷﮕﺪ ﻇﺎﻟﻤﺔ ﺑﻨﻔﺲ ﺍﻟﻮﻛﺖ ..
ﺍﺧﺬﻧﺎ ﻟﻔﺎﺕ ﻭﮔﻌﺪﻧﺎ ﺍﻛﻠﻨﺎ ﻭﺍﺧﺬﺕ ﺷﺎﻣﻴﺔ ﻭﺭﺟﻌﻨﺎ ﻟﻠﺒﻴﺖ ﺭﻏﻢ ﺍﻟﻨﺎﺱ ﻫﻮﺳﺔ ﻭﻛﻠﻬﺎ ﻃﺎﻟﻌﻪ ﺑﺲ ﺍﻣﻲ ﻭﻋﻤﺘﻲ ﻳﺘﻌﺒﻦ ﻻﻥ ﻳﺴﻬﺮﻥ ﻳﺨﻴﻄﻦ ﻭﺷﻐﻞ ..
ﺑﻘﻴﻨﺎ ﮔﺎﻋﺪﻳﻦ ﻋﻠﻰ ﺍﻟﺘﻠﻔﺰﻳﻮﻥ ﺍﻟﻰ ﺍﻥ ﺩﺧﻠﻨﺎ ﺑﺎﻟﺴﻨﺔ ﺍﻟﺠﺪﻳﺪﺓ .. ﺍﺛﻨﻴﻨﻬﻦ ﺣﻀﻨﻨﻲ :
" ﻋﺴﺎ ﺗﻜﻮﻥ ﻫﺎﻟﺴﻨﺔ ﺧﻴﺮ ﻭﺗﻌﻮﺿﻚ ﻋﻦ ﻛﻞ ﺍﻟﺴﻨﻴﻦ "
ﺭﺟﻌﺖ ﺣﻀﻨﺘﻬﻦ ﻭﺑﺴﺖ ﺭﺍﺳﻬﻦ .. ﻣﻦ ﻳﻮﻣﻲ ﻭﺍﻧﻲ ﻋﻨﺪﻱ ﺍﺛﻨﻴﻦ ﺍﻣﻬﺎﺕ ﻣﻮ ﻭﺣﺪﺓ .. ﺍﻟﻠﻪ ﻋﻮﺿﻨﻲ ﺑﻴﻬﻦ ..
ﺍﻟﮕﻌﺪﺓ ﻫﺎﻱ ﺟﺎﻧﺖ ﻧﺎﻗﺼﺔ ﺟﺪﻱ .. ﺍﻟﻠﻪ ﻳﺮﺣﻤﺔ ﻭﻳﺠﻌﻞ ﻣﺜﻮﺍﻩ ﺍﻟﺠﻨﺔ .. ﺻﺎﺭ ﺷﮕﺪ ﻧﺎﺳﻴﻪ ﻭﻣﺎﻣﺴﻮﻳﻠﺔ ﺛﻮﺍﺏ
ﻟﻬﺘﻨﻲ ﺍﻟﺪﻧﻴﺎ ﻋﻨﻪ ﻫﻮﺍﻱ ..
ﺭﺣﺖ ﻃﻠﻌﺖ ﻏﺮﺍﺿﺔ ﻭﺍﮔﻠﺐ ﺑﻴﻬﻦ ﻭﺍﺷﻢ ﺑﻴﻬﻦ ﻭﺟﻦ ﺭﻳﺤﺘﻪ ﻟﺴﺎ ﻣﺎﻓﺎﺭﮔﺘﻬﻦ ..
ﻧﻤﺖ ﻭﺍﻧﻲ ﻣﺘﺄﻣﻞ ﺳﻨﺔ ﺗﺨﺘﻠﻒ ﻋﻦ ﺳﺎﺑﻘﺎﺗﻬﺎ ..
ﻭﻓﻌﻼ ﻫﻲ ﻫﻴﺞ ﺗﻐﻴﺮ ﻛﻠﺸﻲ ﺑﻠﻤﺢ ﺍﻟﺒﺼﺮ ﻭﺍﻻﻣﻮﺭ ﺗﺪﻫﻮﺭﺕ ﺑﺎﻟﻌﺮﺍﻕ ..
ﺍﻣﺮﻳﻜﺎ ﺑﺄﻱ ﻟﺤﻈﺔ ﺗﻨﻔﺬ ﺗﻬﺪﻳﺪﻫﺎ ﻋﻠﻰ ﺍﻟﻌﺮﺍﻕ .. ﻭﺍﻟﻤﺨﺎﻭﻑ ﺍﻟﻌﺮﺍﻗﻴﺔ ﻭﺍﺿﺤﺔ ..
ﺷﮕﺪ ﺟﻨﺖ ﺍﺗﻤﻨﻰ ﻳﻨﺰﺍﻝ ﻫﺎﻟﺤﻜﻢ ﻭﺧﺎﺻﻪ ﺑﻌﺪ ﺍﻟﻈﻠﻢ ﺍﻟﻲ ﺻﺎﺭﻟﻲ ﺑﺲ ﻣﺎﺭﺩﺕ ﻳﻨﺘﻬﻲ ﺑﺤﺮﺏ ﺟﺪﻳﺪﺓ ﻭﻳﻤﻜﻦ ﻣﺨﺘﻠﻔﺔ
ﺑﻌﺪ ﺳﺎﻋﺔ ﻭﻧﺼﻒ ﺍﻟﺴﺎﻋﺔ ﻣﻦ ﺍﻧﺘﻬﺎﺀ ﻣﻬﻠﺔ ﺍﻟـ 48 ﺳﺎﻋﺔ ﺍﻟﺘﻲ ﺣﺪﺩﻫﺎ ﺍﻟﺮﺋﻴﺲ ﺍﻷﻣﻴﺮﻛﻲ ﺟﻮﺭﺝ ﺑﻮﺵ ﻟﻠﺮﺋﻴﺲ ﺍﻟﻌﺮﺍﻗﻲ ﺻﺪﺍﻡ ﺣﺴﻴﻦ ﻟﻠﺘﻨﺤﻲ ﻋﻦ ﺍﻟﺴﻠﻄﺔ ﻭﺗﺮﻙ ﺍﻟﺒﻼﺩ ﻣﻊ ﻭﻟﺪﻳﻪ
19 ﺁﺫﺍﺭ ﺳﻨﺔ 2003 ..
ﺷﻨﺖ ﺣﺮﺏ ﻣﻦ ﻗﺒﻞ ﺍﻟﻮﻻﻳﺎﺕ ﺍﻟﻤﺘﺤﺪﺓ ﺍﻻﻣﺮﻳﻜﻴﺔ ﻋﻠﻰ ﺍﻟﻌﺮﺍﻕ ﻭﺑﻤﺴﺎﻋﺪﺓ ﻛﻞ ﻣﻦ ﺑﺮﻳﻄﺎﻧﻴﺎ ﻭﺍﺳﺘﺮﺍﻟﻴﺎ ﻭﺑﻌﺾ ﺍﻟﺪﻭﻝ ﺍﻟﻤﺘﺤﺎﻟﻔﺔ ..
ﺑﺤﺠﺔ ﻭﺟﻮﺩ ﺍﺳﻠﺤﺔ ﺩﻣﺎﺭ ﺷﺎﻣﻞ ﻋﻠﻰ ﺍﻟﺮﻏﻢ ﻣﻦ ﺍﻥ ﺍﻻﻣﻢ ﺍﻟﻤﺘﺤﺪﺓ ﺍﺭﺳﻠﺖ ﻗﺒﻞ ﺷﻬﺮ ﻣﻦ ﺍﻟﻐﺰﻭ ﻟﺠﻨﺔ ﺗﻔﺘﻴﺶ ﻭﻛﺸﻒ ﻋﻦ ﻋﺪﻡ ﻭﺟﻮﺩ ﺍﺳﻠﺤﺔ ﺩﻣﺎﺭ ﺷﺎﻣﻞ ..
ﺍﻭﻝ ﻏﺎﺭﺓ ﻛﺎﻧﺖ ﻳﻮﻡ 20 ﺁﺫﺍﺭ .. ﺍﻫﺘﺰﺕ ﺑﻬﺎ ﺍﻟﻌﺎﺻﻤﺔ ﺑﻐﺪﺍﺩ .. ﻭﻇﻬﺮ ﺑﻴﺎﻥ ﺍﻋﻼﻥ ﺍﻟﺤﺮﺏ ..
ﺍﻟﻲ ﺍﺳﺘﻤﺮ ﺷﻬﺮﻳﻦ ﺍﺳﺘﻄﺎﻋﺖ ﺑﻪ ﺍﻟﻘﻮﺍﺕ ﺍﻟﻤﺤﺘﻠﺔ ﺍﺣﺘﻼﻝ ﺍﻛﺜﺮ ﺍﻟﻤﺤﺎﻓﻈﺎﺕ ﺑﺴﺮﻋﺔ ﻭﺟﻴﺰﺓ ..
ﻭﺧﺎﺻﺔ ﺑﻐﺪﺍﺩ ﺍﻟﺘﻲ ﺳﻘﻄﺖ ﺑﺄﻳﺪﻳﻬﻢ ﻳﻮﻡ 9 ﻧﻴﺴﺎﻥ ..
ﻭﺑﻨﻔﺲ ﺍﻟﻴﻮﻡ ﺍﻃﺎﺣﻮﺍ ﺑﺘﻤﺜﺎﻝ ﺍﻟﺮﺋﻴﺲ ﻭﺳﻂ ﺑﻐﺪﺍﺩ ﺑﻴﻨﻤﺎ ﻛﺎﻥ ﻫﻮ ﻳﺘﺠﻮﻝ ﺑﻤﻨﺎﻃﻖ ﺍﺧﺮﻯ ﻣﻦ ﺑﻐﺪﺍﺩ ..
ﻫﺬﺍ ﺍﻻﻣﺮ ﺳﺒﺐ ﺍﻟﺨﻮﻑ ﻟﺪﻯ ﺍﻟﺒﻌﺾ ﻭﻣﻨﻬﻢ ﻣﻦ ﺍﻧﻜﺮ ﺫﻟﻚ
ﺑﺎﺕ ﺍﻟﺸﻌﺐ ﻻﻳﻌﺮﻑ ﻣﺎﺫﺍ ﻳﻔﻌﻞ ﻣﻨﻬﻢ ﻣﻦ ﻳﺼﻔﻖ ﻭﻳﺮﻗﺺ ﻷﺳﻘﺎﻁ ﺍﻟﻨﻈﺎﻡ ﻭﻣﻨﻬﻢ ﻣﻦ ﻳﺒﻜﻲ ﻭﻳﺘﺄﻟﻢ ﻟﺴﻘﻮﻁ ﺍﻟﻌﺮﺍﻕ ﺑﻴﺪ ﺍﻻﻣﺮﻳﻜﺎﻥ ..
ﻟﻜﻦ ﺍﻟﺨﻮﻑ ﻛﺎﻥ ﻣﻮﺟﻮﺩﺍ ﻭﻣﺴﺘﻤﺮﺍ .. ﻓﺎﻏﻠﺐ ﺍﻟﻨﺎﺱ ﺑﻼﻭﻋﻲ ﻣﻤﺎ ﻳﺤﺼﻞ ..
ﻭﺍﻟﺘﺴﺎﺅﻻﺕ ﻛﺜﻴﺮﺓ " ﻣﻌﻘﻮﻟﺔ ﺧﻠﺼﻨﺎ؟؟ .. ﻳﻌﻨﻲ ﺑﻌﺪ ﻣﺎﻳﺮﺟﻊ ؟؟ ﻻ ﺧﺎﻑ ﻳﺮﺟﻊ ﻭﺧﺎﺻﻪ ﺑﻌﺪ ﻣﺎﻟﻜﻮﻟﺔ ﺍﺛﺮ ﻟﺴﺎ ؟؟ "
ﻛﺜﻴﺮﺓ ﻫﻲ ﺍﻟﺘﺴﺎﺅﻻﺕ ﻭﻣﻨﻬﻢ ﺣﻤﺪﻳﺔ ﺍﻟﻲ ﺑﻌﺪﻫﺎ ﺗﻬﻤﺲ ﻭﺗﺨﺎﻑ " ﺍﺷﺸﺶ ﺧﺎﻳﺐ ﻻﺗﺤﺠﻲ ﻻﻳﺴﻤﻌﻨﺎ "
ﺿﺤﻚ ﺣﻜﻤﺖ " ﻭﺷﻠﻮﻥ ﻳﺴﻤﻌﻨﺎ ﻋﻤﺔ "
ﺭﺩﺕ " ﺷﻤﺪﺭﻳﻚ ﻣﺎﺧﺎﺗﻞ ﺑﻮﺣﺪﺓ ﻣﻦ ﻫﺎﻱ ﺍﻟﺒﻴﻮﺕ .. ﺍﻟﻨﺎﺱ ﺗﺤﺒﻪ ﻭﺍﻛﻮ ﻧﺎﺱ ﺑﻌﺪﻫﺎ ﺗﺮﻳﺪﺓ ﻭﻣﺎﺷﺎﻓﺖ ﺍﻟﻮﻳﻞ ﻣﻨﻪ "
ﺭﺩ ﻭﻫﻮ ﻳﺘﻨﻬﺪ " ﻭﺍﻟﻠﻪ ﻋﻤﺔ ﻣﺎﺍﻋﺮﻑ ﺷﮕﻠﺞ ﺑﺲ ﺍﻟﺠﺎﻱ ﻳﻤﻜﻦ ﺍﺳﻮﺀ ﻣﻦ ﺍﻟﺮﺍﺡ .. ﺑﺪﺧﻮﻝ ﺍﻻﻣﺮﻳﻜﺎﻥ ﻭﺍﺣﺘﻼﻝ ﮔﺎﻋﻨﺎ ﻣﺎﺍﻋﺘﻘﺪ ﺍﻛﻮ ﺧﻴﺮ ﺑﻌﺪ "
ﺭﺩﺕ ﻋﻠﻴﻪ " ﺧﺎﻳﺐ ﺷﻮ ﺩﺳﻜﺖ .. ﺍﻟﻠﻪ ﺧﻠﺼﻨﺎ ﻭﻫﻮ ﻳﮕﻠﻲ ﺍﻣﺮﻳﻜﺎﻥ .. ﺍﻻﻣﺮﻳﻜﺎﻥ ﺷﻴﺴﻮﻟﻨﺎ ﻳﺬﺑﺤﻮﻧﺎ .. ﻧﺴﻴﺖ ﺷﺴﻮﻭ ﺑﻴﻚ ﺍﺯﻻﻣﺔ .. ﻭﻭﺍﺣﺪ ﻣﻨﻬﻢ ﻫﻴﺜﻢ ﻭﻫﺬﺍ ﺭﺟﻞ ﻧﺒﺮﺍﺱ ﺷﮕﺪ ﻛﺮﻫﺘﻬﻢ "
ﺿﺤﻜﺖ " ﺻﺪﮒ ﻫﺴﺎ ﻭﻳﻦ ﻳﻮﻟﻮﻥ ﺗﻠﮕﻴﻬﻢ ﻣﺜﻞ ﺍﻟﻔﻴﺮﺍﻥ ﺧﺎﺗﻠﻴﻦ .. ﺧﻠﻲ ﺍﺧﺎﺑﺮ ﻧﺒﺮﺍﺱ ﺍﺳﺄﻟﻬﺎ ﻭﺍﻓﻬﻢ ﺍﻟﺴﺎﻟﻔﻪ "
ﺭﺩﺕ ﺭﺿﺎﺀ " ﻻﻋﻤﺔ ﻻﺗﺤﺠﻴﻦ ﺷﻲ ﺑﺲ ﺍﺳﺄﻟﻲ ﻋﻨﻬﺎ ﻭﻋﻦ ﺍﺧﺒﺎﺭﻫﺎ ﻭﻫﺎﻫﻲ "
ﺑﺲ ﻟﻼﺳﻒ ﻛﺎﻧﺖ ﺍﻟﺨﻄﻮﻁ ﻛﻠﻬﺎ ﻣﻘﻄﻮﻋﺔ ﺣﺘﻰ ﺍﻏﻠﺐ ﺍﻟﻨﺎﺱ ﺗﺮﻛﺖ ﺑﻐﺪﺍﺩ ﺑﺴﺒﺐ ﺍﻟﺼﻮﺍﺭﻳﺦ ﻭﺍﻟﻐﺎﺭﺍﺕ ..
ﻛﺎﻥ ﺍﻟﻜﻞ ﻳﺤﺲ ﺑﺨﻄﺮ ﺣﺘﻰ ﺑﻴﺖ ﺍﻟﺪﻛﺘﻮﺭ ﺧﻠﻴﻞ ﻃﻠﻌﻮﺍ ﺍﻻ ﺣﻜﻤﺖ ﻭﺍﻫﻠﺔ ﺟﺎﻥ ﻳﻜﻮﻝ " ﻫﻲ ﻣﻮﺗﺔ ﻭﺣﺪﺓ ﻭﻳﻦ ﻣﻨﺮﻭﺡ ﺭﺍﺡ ﻧﻤﻮﺕ ﺧﻠﻮﻧﺎ ﺑﺎﻟﺒﻴﺖ ﺍﺣﺴﻦ ﺑﺲ ﺟﺎﻧﺖ ﺩﻋﺎﺋﻬﻢ ﻭﺻﻼﺗﻬﻢ ﻣﺮﺍﻓﻘﺘﻬﻢ ﺩﺍﺋﻤﺎ "
ﺍﻧﺪﮔﺖ ﺍﻟﺒﺎﺏ ﺭﻛﺾ ﺣﻜﻤﺖ ﻟﻠﺒﺎﺏ ﺻﺎﺡ ﻣﻨﻮ ..
ﺭﺩﺕ ﻧﺒﺮﺍﺱ " ﻫﺎﻱ ﺍﻧﻲ "
ﻓﺘﺤﻠﻬﺎ .. ﺟﺎﻧﺖ ﺧﺎﻳﻔﻪ ﻭﻣﺮﺗﺒﻜﺔ ..
ﺩﺧﻞ ﺍﻟﺴﺎﻳﻖ ﺍﻟﺴﻴﺎﺭﺓ ﻟﻠﺒﻴﺖ ﻭﻭﺩﻋﻬﺎ ﻭﺭﺍﺡ ..
ﻓﺘﺤﺖ ﺍﻟﺴﻴﺎﺭﺓ ﻣﻠﻴﺎﻧﺔ ﻏﺮﺍﺽ ﻭﻣﻨﻬﺎ ﺍﻛﻞ ﻭﻟﺤﻮﻡ ﻭﻣﻼﺑﺴﻬﺎ ﻭﻛﻞ ﺷﻐﻼﺗﻬﺎ ﺍﻟﺜﻤﻴﻨﺔ ..
ﺗﻠﮕﻨﻬﺎ ﺍﻣﻲ ﻭﻋﻤﺘﻲ ﺳﻠﻤﻦ ﻋﻠﻴﻬﺎ ﺭﺩﺕ
" ﺍﺳﻔﻪ ﺍﺫﺍ ﺭﺍﺡ ﺍﻗﻠﻖ ﺭﺍﺣﺘﻜﻢ ﺑﺲ ﻣﺎﻋﻨﺪﻱ ﻣﻜﺎﻥ ﺍﺭﻭﺣﻠﺔ ﻋﻤﺎﺭ ﻣﻦ ﻳﻮﻡ ﺍﻟﺤﺮﺏ ﻭﻣﺎﺷﻔﺘﻪ ﻭﺍﻏﻠﺐ ﺍﻟﻌﻮﺍﺋﻞ ﺑﻤﻨﻄﻘﺘﻨﺎ ﻫﺎﺟﺮﻭﺍ ﻭﺗﺮﻛﻮﻫﺎ ﻻﻥ ﻫﻲ ﺍﻭﻝ ﻣﻨﻄﻘﺔ ﻳﺘﺮﺻﺪﻫﺎ ﺍﻻﻣﺮﻳﻜﺎﻥ ﻻﻥ ﺑﻴﻬﺎ ﺷﺨﺼﻴﺎﺕ ﻣﻬﻤﺔ ..
ﺍﻟﻬﻴﺞ ﻣﺎﻟﮕﻴﺖ ﺍﻻﻣﺎﻥ ﺑﺲ ﻳﻤﻜﻢ .
ﺭﺩ ﺣﻜﻤﺖ " ﺍﻻﻣﺎﻥ ﺑﻮﺟﻮﺩ ﺍﻟﻠﻪ ﺧﺎﻟﻪ .. ﻫﻮ ﺍﺻﻼ ﺍﻟﺒﻴﺖ ﺑﻴﺘﺞ ﻭﺍﺣﻨﺔ ﺿﻴﻮﻓﺞ "
ﺭﺩﺕ " ﺗﺴﻠﻢ ﺣﺒﻴﺒﻲ ﺍﻟﺒﻴﺖ ﺑﻴﺘﻜﻢ ﺍﻧﺘﻮ ﻻﺗﮕﻮﻝ ﻫﻴﺞ "
ﺣﻀﺮﺕ ﺍﻣﻲ ﻏﺮﻓﺘﻲ ﺍﻧﻲ ﻭﺑﺴﻤﺔ ﺍﻟﻬﺎ ﻭﺩﺧﻠﺖ ﻏﺮﺍﺿﻬﺎ ﺭﺗﺒﺘﻬﻦ ﺍﻣﻲ ..
ﻭﺻﻴﺖ ﺍﻣﻲ ﺗﻔﺮﺷﻠﻲ ﺑﺎﻻﺳﺘﻘﺒﺎﻝ ﻟﻮ ﺍﻟﻬﻮﻝ ﻣﺎﻛﻮ ﻓﺮﻕ ..
ﺟﺎﻧﺖ ﻧﺒﺮﺍﺱ ﻣﻦ ﺟﺎﻳﺔ ﺣﺎﺳﺒﺔ ﺣﺴﺎﺏ ﺍﻟﻜﻠﺸﻲ ﺣﺘﻰ ﻧﻔﻂ ﺟﺎﻳﺒﺔ ﻭﻳﺎﻫﺎ ..
ﻭﻣﺎﺍﺩﺭﻱ ﺷﻠﻮﻥ ﺭﺍﺣﺖ ﻣﻦ ﺑﺎﻟﻲ ﻣﺎﻧﻌﺮﻑ ﺷﻨﻮ ﻣﺼﻴﺮﻧﺎ ﺑﻌﺪ ﻭﺟﺎﻥ ﻻﺯﻡ ﺍﺭﺗﺐ ﺍﻣﻮﺭﻱ ﻭﻟﻮ ﻣﺎﺟﻨﺖ ﻣﺘﻮﻗﻊ ﻫﻴﺞ ﻳﺼﻴﺮ
ﻣﻦ ﻧﺘﺎﺋﺞ ﻫﺎﻟﺤﺮﺏ ﺑﺎﻻﺿﺎﻓﺔ ﻟﻠﺨﺴﺎﺋﺮ ﺍﻟﺒﺸﺮﻳﺔ ﺍﻟﻔﺎﺩﺣﺔ ﻟﻠﻤﺪﻧﻴﻴﻦ ﻭﺍﻟﺠﻴﺶ ..
ﺍﻧﺘﺸﺮﺕ ﺑﻌﺪﻫﺎ ﻋﻤﻠﻴﺎﺕ ﺳﻠﺐ ﻭﻧﻬﺐ ﻓﻲ ﺑﻐﺪﺍﺩ ﻭﺑﺎﻗﻲ ﺍﻟﻤﺤﺎﻓﻈﺎﺕ .. ﻭﻧﻘﻠﺖ ﻫﺬﻩ ﺍﻟﻌﻤﻠﻴﺎﺕ ﻟﻠﻌﺎﻟﻢ ﺍﺟﻤﻊ ﻋﺒﺮ ﺷﺎﺷﺎﺕ ﺍﻟﺘﻠﻔﺎﺯ .. ﺣﺘﻰ ﺳﻤﻮ ﺑﺎﻟﺤﻮﺍﺳﻢ ..
ﻭﻣﻦ ﺍﻷﻣﺎﻛﻦ ﺍﻟﺘﻲ ﺗﻌﺮﺿﺖ ﺇﻟﻰ ﺍﻟﻨﻬﺐ ﻭﺍﻟﺴﻠﺐ ﻭﺗﺮﻛﺖ ﺟﺮﻭﺡ ﻋﻤﻴﻘﺔ ﻓﻲ ﺫﺍﻛﺮﺓ ﺍﻟﻌﺮﺍﻗﻴﻴﻦ ﻭﺟﻤﻴﻊ ﺍﻟﻌﺎﻟﻢ ﻫﻮ ﺳﺮﻗﻪ ﺍﻟﻤﺘﺤﻒ ﺍﻟﻮﻃﻨﻲ ﺍﻟﻌﺮﺍﻗﻲ ﺣﻴﺚ ﺳﺮﻕ ﻣﻦ ﺍﻟﻤﺘﺤﻒ 170 ، 000 ﻗﻄﻌﺔ ﺍﺛﺮﻳﺔ ﻭﻛﺎﻧﺖ ﺑﻌﺾ ﻫﺬﻩ ﺍﻟﻘﻄﻊ ﻣﻦ ﺍﻟﻀﺨﺎﻣﺔ ﻓﻲ ﺍﻟﺤﺠﻢ ﻣﺎ ﻳﺴﺘﺤﻴﻞ ﺳﺮﻗﺘﻪ ﻣﻦ ﻗﺒﻞ ﺃﻓﺮﺍﺩ ﻋﺎﺩﻳﻴﻦ ﻭﺑﺮﺯﺕ ﺷﻜﻮﻙ ﻋﻠﻰ ﺃﻥ ﺗﻜﻮﻥ ﻫﺬﻩ ﺍﻟﺴﺮﻗﺔ ﺑﺎﻟﺬﺍﺕ ﻣﻨﻈﻤﺔ ..
ﻛﺎﻧﺖ ﺣﺎﻟﺔ ﺍﻟﻌﺮﺍﻕ ﻳﺮﺛﻰ ﻟﻬﺎ ﺑﺘﻠﻚ ﺍﻟﻔﺘﺮﺓ .. ﺍﻟﺒﻠﺪ ﻻﺣﻤﺎﻳﺔ ﻭﻻﺭﻗﻴﺐ ﺑﻬﺎ .. ﻭﺍﻟﻨﺎﺱ ﻣﻦ ﺍﻟﺠﻮﻉ ﻭﺍﻟﺤﺼﺎﺭ ﺻﺎﺭﺕ ﺷﻨﻮ ﺗﻠﮕﻲ ﮔﺪﺍﻣﻬﺎ ﺗﺎﺧﺬﺓ ﻭﻭﺣﺪﺓ ﻣﻨﻬﻦ ﺍﻣﺮﺍﺓ ﺍﺧﺬﺕ ﺟﻬﺎﺯ ﺳﻮﻧﺎﺭ ﻭﺟﺎﻥ ﻋﺒﺎﻟﻬﺎ ﺗﻠﻔﺰﻳﻮﻥ ﺍﻟﻰ ﺍﻥ ﻧﺒﻬﻬﺎ ﺍﺣﺪ ﺍﻟﺸﺒﺎﺏ
" ﺣﺠﻴﺔ ﺷﺘﺴﻮﻳﻦ ﺑﻲ ﻫﺬﺍ .. ﻫﺬﺍ ﺳﻮﻧﺎﺭ "
ﺭﺩﺕ " ﻳﺎﻉ ﻳﻌﻨﻲ ﻣﻮ ﺗﻠﻔﺰﻳﻮﻥ "
ﻭﺿﺮﺑﺘﺔ ﺑﺎﻟﮕﺎﻉ ﻭﺗﺮﻛﺘﻪ ﻭﺭﺍﺣﺖ .. ﺍﻟﻜﻞ ﺟﺎﻥ ﻳﺘﺴﺎﺑﻖ ﺣﺘﻰ ﻳﺤﺼﻞ ﺍﻛﺜﺮ .. ﻣﻦ ﻏﻴﺮ ﺍﻟﻨﻈﺮ ﻟﻠﻨﺘﺎﺋﺞ ﺍﻭ ﺍﻟﺘﻔﻜﻴﺮ ﻟﻠﺒﻠﺪ ﻭﺍﻟﻜﺜﻴﺮ ﻣﻨﻬﻢ ﺻﺎﺭ ﻣﻦ ﺍﻻﻏﻨﻴﺎﺀ ﺑﻔﺘﺮﺓ ﺍﻟﺤﻮﺍﺳﻢ ..
ﺍﻣﺎ ﺍﻟﺸﺨﺼﻴﺎﺕ ﺍﻟﻜﺒﻴﺮﺓ ﺑﺎﻻﻣﻦ ﻭﺍﻻﺳﺘﺨﺒﺎﺭﺍﺕ ﻭﻏﻴﺮﻫﺎ ﻓﺄﺧﺘﻔﺖ ﻛـ ﺃﺧﺘﻔﺎﺀ ﻗﻄﻊ ﺍﻟﺴﻜﺮ ﻓﻲ ﻛﻮﺏ ﺷﺎﻱ ﺳﺎﺧﻦ
ﻣﻊ ﺍﻧﻬﻢ ﻗﺒﻞ ﺍﺷﻬﺮ ﻛﺎﻧﻮﺍ ﻳﻠﻮﺣﻮﻥ ﺑﺮﺗﺒﻬﻢ ﺑﻤﻜﺎﻧﺘﻬﻢ ﺑﺎﻟﺪﻭﻟﺔ .. ﻓﺎﻟﻜﻞ ﻫﺮﺏ ﻣﻦ ﻣﺤﺎﻓﻈﺘﻪ ﺍﻟﻰ ﻣﺤﺎﻓﻈﺎﺕ ﺍﺧﺮﻯ ﺍﻭ ﺍﻟﻰ ﺧﺎﺭﺝ ﺍﻟﺒﻠﺪ ..
ﺑﻴﻮﻡ ﺣﻜﻤﺖ ﻭﻋﺎﺋﻠﺘﺔ ﮔﺎﻋﺪﻳﻦ ﻛـ ﺍﻟﻌﺎﺩﺓ ﻭﻣﺎﻳﻌﺮﻓﻮﻥ ﺷﻴﺼﻴﺮ ﺑﺮﺓ ..
ﻻﻥ ﻣﺎﻳﻄﻠﻌﻮﻥ ﻭﺣﻜﻤﺖ ﻳﻄﻠﻊ ﺷﻮﻳﺔ ﻭﺍﻣﻪ ﺗﺒﻘﻰ ﺗﺤﺠﻲ ﻳﺮﺟﻊ ﻭﺟﺎﻥ ﺭﺩﻩ ﺩﺍﺋﻤﺎ " ﻳﻤﺔ ﺷﻠﻮﻥ ﺍﻧﺤﺒﺲ ﻫﻨﺎ ﻭﺍﻟﺒﻠﺪ ﻣﮕﻠﻮﺏ ﻉ ﺍﻻﻗﻞ ﺧﻠﻴﻨﺎ ﻧﻔﻬﻢ ﺷﻴﺼﻴﺮ "
ﺑﺲ ﮔﻠﺐ ﺍﻻﻡ ﻭﺧﻮﻓﻬﺎ ﻣﺎﻳﻌﺮﻑ ﻫﺎﻟﻜﻼﻡ ..
ﺑﻌﺪ ﻣﺎﺍﻧﺪﮔﺖ ﺍﻟﺒﺎﺏ ﺟﺎﻧﺖ ﺍﻟﺼﺪﻣﺔ ﻛﺒﻴﺮﺓ ﺍﻟﺤﻜﻤﺖ ﻭﺍﻟﻲ ﻭﺍﮔﻔﻴﻦ ﻭﺭﻯ ﺍﻟﺒﺎﺏ ..
ﺍﺳﺘﻐﺮﺏ ﺑﻮﺟﻮﺩﻫﻢ ﻭﻛﺎﻥ ﺍﺧﺮ ﺗﻮﻗﻌﺎﺗﻪ ﻳﺸﻮﻓﻬﻢ ﺑﻌﺪ ﻛﻞ ﺫﻳﺞ ﺍﻟﺴﻨﻴﻦ ﺍﻟﻤﺮﺕ ..
ﻭﺧﺎﺻﺔ ﻫﻴﺜﻢ ﺍﻟﻲ ﺳﺄﻟﻪ ﺑﺄﺳﺘﻐﺮﺍﺏ " ﺷﺘﺴﻮﻱ ﺍﻧﺖ ﻫﻨﺎ ؟؟ "
ﺭﺩ ﻋﻠﻴﻪ ﺑﺜﻘﻞ " ﺍﻫﻞ ﺍﻟﺮﺣﻢ ﻫﻮﺍﻱ "
ﺟﺎﻧﺖ ﻧﻈﺮﺍﺗﻪ ﻟﺴﺎ ﻧﻔﺴﻬﺎ ﺭﻏﻢ ﺯﻣﻦ ﺍﻟﺴﻠﻄﺔ ﻭﺍﻟﺠﺒﺮﻭﺕ ﺭﺍﺡ ..
ﺳﻠﻤﺖ ﻋﻠﻴﻪ ﺍﻡ ﻫﻴﺜﻢ ﻭﻳﻤﻜﻦ ﺟﺎﻥ ﻋﻨﺪﻫﺎ ﻋﻠﻢ ﺑﻮﺟﻮﺩﻫﻢ ﻫﻨﺎ ﻭﻣﺎﺍﺳﺘﻐﺮﺑﺖ ..
ﻭﺭﺭﺍﻫﻢ ﺩﺧﻠﺖ ﺍﻡ ﻣﺴﻚ ﻭﺍﻭﻻﺩﻫﺎ ..
ﻭﺍﺧﺮ ﺷﻲ ﻣﺴﻚ ﺍﻟﻲ ﺑﻘﺖ ﺗﻨﺰﻝ ﺍﻟﺠﻨﻂ ﻭﻱ ﺍﺑﻮﻫﺎ ..
ﺍﺑﺘﺴﻤﺖ ﺍﻟﻪ ﺍﺑﺘﺴﺎﻣﺔ ﺩﺍﻓﻴﺔ ﻭﻫﻤﺴﺖ " ﺷﻠﻮﻧﻚ ﺣﻜﻤﺖ ﻣﺸﺘﺎﻗﺘﻠﻚ "
# ﺑﻘﻠﻤﻲ _ ﺍﻟﻜﺎﺗﺒﺔ _ ﺷﻤﺲ
ﻳﺘﺒﻊ ….
ﻭﺍﻟﺘﻘﻴﻨﺎ ﺑﻤﻮﻋﺪ ﺍﺧﺮ ﻣﻦ ﺟﺪﻳﺪ 💔 ﻛﺎﻇﻢ ﺍﻟﺴﺎﻫﺮ
ﺣﺒﺎﻳﺒﻲ ﺍﻭﻻ ﺷﻲ ﺍﻧﻲ ﺩﺍﺍﻣﺸﻲ ﺑﺎﻻﺣﺪﺍﺙ ﻋﻠﻰ ﻣﻬﻞ ﻣﺎﺍﺭﻳﺪ ﺍﺳﺘﻌﺠﻞ ﻭﺍﺧﺘﺼﺮ .. ﻭﺍﻟﻲ ﺗﮕﻠﻲ ﺗﺘﺄﺧﺮﻳﻦ
ﺍﺣﻨﺔ ﻣﻨﺰﻟﻴﻦ ﺟﺪﻭﻝ ﻳﻮﻣﻴﻦ ﺑﻴﻮﻡ ﺍﺳﺘﺮﺍﺣﺔ ﻭﺗﻌﺮﻓﻮﻩ
ﺑﻌﺪ ﻟﻴﺶ ﻛﻞ ﻣﺮﺓ ﺍﺷﻮﻑ ﺍﻟﺘﻬﺠﻢ ﻭﺍﻟﺘﺠﺎﻭﺯ ..
ﻭﺍﺫﺍ ﺗﻘﺎﺭﻧﻮﻧﻲ ﺑﻐﻴﺮ ﻛﺎﺗﺒﺎﺕ ﻓﻜﻞ ﻛﺎﺗﺒﺔ ﻭﺍﻟﻬﺎ ﻇﺮﻭﻓﻬﺎ ﻭﺍﻧﻲ ﻣﻤﻘﺼﺮﺓ ﻋﻨﻜﻢ ..
ﻓﻴﺎﻟﻴﺖ ﻳﺎﺣﺒﺎﻳﺐ ﺍﻟﻲ ﻣﺘﺘﺤﻤﻞ ﺍﻧﺘﻈﺎﺭ ﺗﻨﺘﻈﺮ ﺗﻜﻤﻞ ﻭﻗﺮﺃﻫﺎ ﻭﻻﺗﺠﺮﺣﻮﻥ ﺍﻟﻤﻘﺎﺑﻞ .. ﺍﻟﻜﻠﻤﺔ ﺍﻟﻄﻴﺒﺔ ﺻﺪﻗﺔ
ﺍﺣﺒﻜﻢ