انتي سحر ماحرمه دين الإسلام

بارت 3

ام سالم عصبت : تخسين اسحرك من زينك يعني
كريمه : اي والله كلي زين وحلا ، حريم الحاره انهبلوا يوم ملكت على سالم ، كلهم خطبوني لعيالهم مير ابوي مايبي غير سالم لإنه عطاني مهر مية الف.
ام سالم : مو مشكله يطلقك ويعطيك مؤخر مية الف تبن
كريمه : ماله غنى عني وعن عياله ، الا اذا انفك سحري عنه هذا شيء ثاني ، وفكيه كان تقدرين هههههه
قطع كلامهم ثامر لما طلع واخذ صحن الحلا وجلس ياكل وعدلت كريمه حجابها وهي كاتمه الضحكه على ام سالم.
ثامر : يعطيك العافيه ام انس
كريمه : الله يعافيك
اتصل جوالها وردت : هلا يمه ، شفيك ليش صوتك كذا ، اييششش !! حليمه ؟ ومتى هالكلام ؟ متأكده ، لاحول ولاقوة الا بالله ، الحين ازورها ، مع السلامه
ديما : بسم الله شفيها حليمه
كريمه بضيق : طاحت عليهم واخذوها للمستشفى.
ديما : ماتشوف شر يارب
كريمه اتصلت على سالم عشان يوديها وجاها بسرعه ، ثامر تذكر الموعد وطلع ركب سيّارته واتصل رقم سُميه مره ومرتين وثلاث ماردت وتقفل رقمها كله ، عصب وارسل لها رسالـه.
➖
وصلوا ابو سعد وبناته للبيت ودخلت سميه بسرعه لإنها حاسه جوالها يتصل طلعته وقفلته ورجعت خبته دخلوا خواتها ودخل ابوها وراها وتعداهم لين وصل لسُميه وسحب شعرها بقوه ولفها له وعطاها كـف من قوته طاحت ع الأرض وشهقوا خواتها وامها برعب ، نزل عقاله وفتحه ولفه على بعض وضربها على ظهرها بكل مايملك من قوه ، جلس يضربها بكل قسوه وعنف وسميه حابسه اهاتها والمهـا وعيونها تدمع بصمت وهو ساكت من قوة صوت الضرب.
ام سعد دفته وهي تبكي : ابعد عنها ، اتركها حرام عليك
تعب وابعد عنها وقال بصوت مقهور : هالمره اكتفي بالضرب لكن مره ثانيه تعلين صوتك بوجهي اذبحك وادفنك بمكانك ، ماباقي الا بزر امس تطول لسانها علي
ام سعد : خلاص ارحمنا الله يرحم والديـ،
سكتها لما دفها عنه بقوه وطاحت على ظهرها جنب سميه وصرخوا بناتها وجلسوا عندها وهي ميته من الألم.
قال بعصبيه : من بكره تعرضين بناتك للحريم ، خليهم ينخطبون وارتاح منهم ، مابي ولا وحده تجلس عندي ، اذا مر شهر وماتزوجن بناتك والله لأعرضهن بطريقتي الخاصه واخليهن بيزه ماتسوى
نجلاء وسندس انهاروا من الصدمه والخوف وسميه مابكت ابد ، وامهم تحس بالموت من القهر اللي داخلها على بناتها.
سميه وقفت وقالت بحده : اصير رخيصه بالشارع اهون من اني اكون غاليه في بيتك ، انت ظالــم ، الله لايسامحك
هجم عليها من جديد لكن انمسك بسرعه من عبدالله وقال بقهر : اتركني خلني اموتها
عبدالله دفه عنها بقوه وصار قبالها : مو من حقك تضربها !

ابو سعد : توقف بوجهي ياعبدالله !
عبدالله بنبره حاده : مسألة انك حاشرهم ومضيق عيشتهم هذي عديناها لك لكن تمد ايدك وتضربهم هذي اسمح لي مانعديها لك !
ام سعد : وش عقبه ، عقب ماشبعت بنتي ضرب
سميه تخفي صوتها الباكي قالت بقهر : مافيني شي يمه ، هالمهزله لازم تنتهي بأي شكـل
ابوها بعيون تلمع شر : مابدت للحين ، الحين بتبدأ
سحبها من شعرها بقوه رغم تدخل عبدالله لكن ماقدر يمنعه طلعها من غرفتها ودخلها للحمام " تكرمون " ودفها بقوه ونزع القفل عشان يقفل الباب عليها.
ام سعد بتوسل وبين دموعها مسكت ايد عبدالله : تكفى تكفى تصرف ، مالنا غيرك
نجلاء تشاهق : هو يسمع كلامك ، طلعه من هنا تكفى لايذبح سميه
سندس : مايكفي حليمه بين الحيـاه والمـوت
عبدالله سحب القفل منه وقال بعصبيه : انت ماتخاف الله تسوي ببنتك كذا !
تعداه ودخل سحب سميه وطلع فيها كانت تناظر نظرات غريبه قال لنجلاء تجيب عبايتها وفعلاً لبسها وطلعها معاه من البيت كله ، ابو سعد ماقدر يتكلم من التعب وجلس بسرعه.
عبدالله ركبها سيارته بصعوبه وركب ، طلع ابوهم لكن مالحق عليهم لإنهم راحوا ، دخل بيته الثاني وحصل ام عبدالله وبناتها رهف ورؤى جالسين وخايفين من الصراخ اللي سمعوه.
قال بصرامه : اسمعي انتي ، بناتك اذا خلص هالشهر وهم في بيتي اعرف كيف اطلعهم منه
ام عبدالله : حلوه هذي ، وين اوديهم ؟
ابو سعد : تصرفي ، رزيهم بالمناسبات وبكل مكان
رهف : وش ذي الإهانه مالنا كرامه احنا ولا كيف
ابوها طير عيونه عليها وانخرشت وقامت بسرعه دخلت غرفتها ولحقتها رؤى مستانسه : سمعتي ؟ اخيراً بنتزوج
رهف بصدمه : امبيه لا مااصدق ! ودك بالزواج
رؤى : ليش ماودي ؟ انا وش لاقيه بهالبيت والعيشه ، كلنا نبي نتزوج ونطلع من هالجحيم لاتنكرين
رهف : بس مو بهالطريقه ! يعرضونا للرايح والجاي
رؤى : حبيبتي اذا ماتزوجنا بهالطريقه ماراح نتزوج بغيرها ، تعرفين ابوك وتفكيره ، اقرب مثال كريمه ، ماتزوجت الا بعد ماطقت ال27 وعشرين ، وبالغصب بعد
رهف : انا عن نفسي مابي اتزوج ، صحيح اتمنى اطلع من هالبيت اليوم قبل بكرا ، لكن مابي اتزوج واروح عند رجال ويحشرني مثل مايسوي ابوي ، الرجال كلهم مثل بعض يارؤى ، كلهم حقيرين
رؤى : مااتفق معاك ، في الصالح وفي الطالح ، قولي امين
رهف : امين ؟
رؤى رفعت ايدينها : يارب يارب ترزقني انا وخواتي بأزواج صالحين يحبوننا ويراعونا ويعوضونا عن كل اللي عشناه يارب
رهف : امين يارب ، يارب اهم شي تكون فلوسه كثير يارب
رؤى : الفلوس ماتجيب السعاده
رهف : خليهم يعطوني فلوس وانا اجرب واشوف تجيب السعاده ولا لا ؟
رؤى ضحكت وطقت كفها : الله يرزقنا.