زهرة التوليب

( 17 )

اتجه "طارق" للفندق يغير ملابسه كلموه من المستشفي علشان نتيجه التقارير الطبيه الخاصه ب "غدير" ظهرت ,, غير ملابسه ورجع "طارق" مستشفي دكتور "عزت" قبل ما يتجه ل بيت "غدير" وقابل "هدير":
_ انت لسه هنا ؟
_ لا انا روحت الفندق ورجعت علشان التقارير الطبيه ل "غدير" نتيجتها ظهرت وكلموني فى وانا فى الطريق فقلت امر اخدها واروحلها
_ تمام .. فاضي تشرب نسكافيه معايا ولا ؟
_ افضالك يا دكتور ,, هجيب التقارير واجيلك فى الكافيتريا
_ هستناك ..
بعد 10 دقائق وصل "طارق":
_ ها ايه الاخبار ؟
_ لا تمام الحمد الله كل حاجه تمام واحسن من الاول ..
_ الحمد الله ..
_ قولي مشكله "ماجد" اتحلت خلاص كده ؟
_ نصها اتحل وهو عرفنا مين اللى كان بيبعت الهدايا وودلواقتي هى هتتعالج هنا فى القسم النفسي
_ والنص التاني ؟
_ "اميره" ,, اعتقد ان "ماجد" هياخد وقت علشان يصالحها الموضوع كبير وسوابق "ماجد" منيله
_ بس لما تعرف انه مش غلطان هتعديها يعني ؟
|_ الثقه .. هى فى الاساس كانت الثقه مهزوزه بينهم ,,ولما اتعدل اطمنت شويا والموقف اللى حصل دمر كل حاجه ,, الله يعينه بقي ..
_ بس بجد صعب اوى ان حد يتهوس بحب حد كده لدرجه انه يضره رغم انه ميعرفوش ..؟
_ الاصعب ان حد يتهوس بحب شخص معاه فى العلاقه وبيعذب نفسه وبيعذب اللى معاه تجريح واهمال وحاجات كتير وكل دا علشان بيحبه وكتير بيشك فيه لكن بيحبه ,,فى حالات بتوصل للقتل نتيجه هوس الحب دا ,,
_ ربنا يبعد عننا الهوس ومشتقاته
_ يارب ,, يلا استأذن انا ,,اهو شربت معاكي النسكافيه كله ومجرتش علشان انتي ظلماني
_ شاطر يا دكتور ,,
_ انت تؤمر يا دكتور ,,
_ متنساش يوم اجازتي ..؟
_ انتي اللى متنسيش خطوبه "ياسر"
_ لا مش هنسي ,,هتلاقيني مستنياك نروح سوا مع الدكتور "عثمان" زى ما اتفقنا ..
_ تمام
_ هى "غدير" هتحضر الخطوبه ..؟
_اكيد .. انا اتفقت معاها هى كانت متردده و"رامي" قال هيجي معاها ..
_ خطيبها ..؟
_ ايوه "رامي" خطيبها ..يلا انا همشي دلواقتي
_ سلام

اتجه "طارق" لبيت "غدير" وكان موجود "رامي" ووالدتها :
_ حمد الله ع السلامه
_ الله يسلمك يا دكتور
_ ايه اخبار التقارير ..؟
_ لا كله تمام الحمد الله ,, شويا وقت صغير ونعتبر كورس العلاج خلص
_ طيب تمام ,, ممكن كلمه ..؟
_ اتفضلي
اتحرك "طارق" و ووالده "غدير" خطوتين بعيد :
_ "غدير" ليه مبتتكلمش ,, مش انت قولت انها كويسه وبخير ؟
_ ايوه الحمد الله,, لكن طبيعه "غدير" اصلا مبتتكلمش كتير دى ملهاش علاقه بتعبها
_ اصل "رامي" قاعد وردها ع قد السؤال ..؟
_ واحده واحده ,, اديها وقتها تتأقلم مع كل حاجه و"رامي" انا متكلم معاه وهو مقدر متقلقيش حضرتك هو المهم عنده انها تتحسن وهو لاحظ الاستجابه السريعه ليها ,, وكمان يومين خطوبه "ياسر" و"غدير" هتحضر وتعتبر اول مناسبه اجتماعيه هتحضرها وسط الناس وناس اغراب ودا هيساعدها و"رامي" هيكون معاها
_ انا كنت عاوزه اطلب منك طلب ؟
_ اتفضلي ..؟
_ يعني .. "غدير" لا ارتبطت ولا دخلت علاقه مع شخص قبل كده زى ماانت عارف حالتها ,, كنت اسمع عن جلسات نفسية عن العلاقات وكده ف انا عاوزاك بطريقتك السحرية دى تخليها تقرب ل "رامي" ,,انت عارف 6 سنين مستنيها وحبيبي قاعد مستني كلمه منها عاوزاها تستوعب ان فى انسان فى حياتها وكده ,,
_ اهااا .. حاضر
_ شكرا يا دكتور ع تعبك معانا
_ متقوليش كده حضرتك ,,
رجع "طارق" قعد مع "رامي" و"غدير" واتكلم هو و"رامي" وكان بيحاول يدخل "غدير" فى الحوار معاهم وكانت نوعا ما بتستجاب معاهم ودا فرح "رامي" ..!

"صبا" كانت موجوده فى القاهره قابلت "منه" واتجهوا لبيت اهل "اميره" وطلبو يقابلوها محاوله منهم يفهموها موقف "ماجد" ,, بعد السلام والتحيه :
اتكلمت "صبا" :ايه يا "ميرو" كفايه تقل ع الواد بقي ..!
نظرت اليها نظره استعجاب : تقل ..؟
ردت "منة": ايوه تقل .. الحوار الاخير دا مكنش له ذنب فيه خالص واحنا حكينالك ع كل حاجه وطلعت واحده سايكو بتطارده والحمد الله الموضوع اتلم ,, وانتي سايبه البيت بقالك مده كفاية كده بقي ..!
ضحكت "اميره " نص ضحكه : انتوا مش حاسين باللى حساه لو مكاني هتعملوا اكتر من كده ,, لو كل يوم جوزك يرجع وانتي عارفه انه كان مع حاله من حالاته الانسانيه وبرفانها ع هدومه هتحسي باللى حساه ..
بنبره هزار اتكلمت "صبا" : فى ايه يا "ميرو" مش بيقولك لازم تدوقي كل الفاكهه علشان تحددى اى نوع اللى تحبيه ,, اهو "ميجو" كان بيعرف كل دول لدراسه مش للهو علشان يكتسب خبرة ويعرف يسعدك ازاى ب افضل الطرق ..!
نظرت اليها "اميره" ب استعجاب وضحكت "منه": لا يا شيخه ..!
_ طبعا كل اللى عمله دا فى صالحك ,, استني,, مش هو صالحك لوحده وظبط اموره معاكي قبل الحوار دا ما يحصل لوحده ودا من غير ماحد يقوله كلمه احنا اتفاجئنا اصلا انه قطع علاقاته حتى جربت اغريه فيديو كول من الشرم قفل فى وشي ,, تخيلي قفل فى وشي ,, ودا ليه لانه زهق خلاص حضر ماجستير ودكتوراه وعرف الخلاصه ايه واخد البهاريز وركز معاكي ,, متنكريش بقي ,,اوعي ..
حاولت "منه" تتمالك ضحكها و"اميره" بتنظر ل "صبا" ب استعجاب من كلامها واستكملت "صبا" كلامها : "فونا" كلنا معترفين حتي هى انها معرفتش تربيه لكن نقول ايه ربنا كبير ف بعتك علشان تربيه و انتي كده ربتيه وهو اتربي اسألي "فونا" ,, "ميجو" يا حرام اكلته بقت ضعيفه تخيلي اقوله تعالي نضرب حواوشي ميكملش نص الرغيف وبقي مبيعرفش ينام ودايما مبرشط ع "فونا" و"ياسر" وعمال يولول ع فراقك انتي والعيال ,, هو اتعود عليكي اتعود على نكدك خلاص صعب يتعود ع نكد غيرك ,, جسمه تشبع بنكدك ورافض يخرج ,, مفتقد الجرعه ,,ارحمي وارجعي نكدي عليه ارجوكي .. "ماجد" يستغيث ..!
_ انا محتاجه وقت اكون لوحدي
اتكلمت "منه" بعد ما اتملكت نفسها من الضحك : طيب اتكلمي معاه اسمعيه ويسمعك ,,
سكتت لحظات : ماشي ..
ردت "صبا": هنستناكو بقي يوم خطوبه "ياسر" تدخلو ..
_ لا انا مش هحضر وبلغت "ياسر" واعتذرتله
ردت "صبا": والله انا خايفه ل "ياسر" ذات نفسه ممكن ميحضرش ,, ماعلينا ,, سيبك من "ياسر" ,, اكلم "ماجد" يجي يتكلم معاكي وتديله فى جنابه براحتك ,,فرصتك ,,"اميره" عادت لتنتقم "
ابتسمت "اميره": ايوه كده اضحكي صدقيني كل حاجه بتمر وتعدي لو احنا عاوزينها تعدي ,, فى حاجات بيبقي خلاص اتقفلت وفى حاجات بيبقي فى فرصه صغيره كده تصلحها ,, نقفش فى الفرصه بقي ,,!
_ تمام يا "صبا"
_ اشطاه ,, يلا يا "منه"
_ يلا ..
خرجت "صبا" وماسكه موبيل وهتتصل ب "ماجد" :
اتكلمت "منه": ايه المراجيح اللى قلبتيها جوه دى ,,
بتقولك جوزي كان عارف عليا بنات تقوليلها علشان يكتسب خبره ..!
_ اومال اقولها علشان طفشان من نكدك ,, قولتلها نكدك بيطفشه عملت ايه نكدت اكتروهو زود حالاته الانسانيه اكتر ,, وبعدين انا مغلطتش تعدد العلاقات دا لسبب سامي وهو ل اكتساب الخبرات علشان ناخد الخلاصه ونلبس ب امر الله
_ اللى يسمعك يقول مقطعه السمكه وديلها يااختي ..
_ هو انا لزم ارتبط علشان يبقي عندي خبره ..
_ اومال نصحتك دى منين..؟
العلاقات مفهومها اكبر من علاقه واحد بواحده ,, فى علاقات زماله وصداقه وجيران ومعارف كده يعني ..!
_ اللى يسمع بتنصحي بين اتنين مرتبطين تقولى مريتي بنفس التجربه ..
_يا "نونو" التجارب الغير مباشرة فى الكتب والافلام وتجارب اللى حواليا كفيلة تعلمني انا بركز فى الاحداث حواليا لان كل حاجه بتحصل لسبب ,, وبعدين كفايه معرفتكم ومعرفه اللى فى الشغل كسبتوني خبرات خلاصتها اقطع علاقتي بالناس كلها واعيش لوحدي فى جزيزه الواك واك ..
ضحكت "منه": وربنا انتى فقر معرفش اتكلم معاكي جاد ابدا ..
_ لاني بحب الشبراوى اكتر هاهاهاها
خبطتها ع كتفها : امشي يابت قدامي امشي ..

اتصلت "صبا" ب "ماجد" وبليل اتجه لبيت "اميره" وقابلها .:
_ "صبا" و"منه" حكولك اللى حصل وانا برئ من الموضوع كله وكان المقصود يخربو علاقتنا وبيتنا
_ بيتنا اصلا مخروب يا "ماجد" انت متوهم ولا ايه ؟
_ ليه كده يا "اميره" احنا كنا كويسين وكل حاجه كويسه
_كانت فرصه اديتهالك علشان تثبتلي انك فعلا اتغيرت لكن للاسف
_ للاسف ايه ..انا من وقت ما اتفقت معاكي وانا بطلت اعمل اللى كنت بعمله ..
_ قصدك حالاتك الانسانيه ..؟
_ مهما كان ايه لكن انا اتعهدت قدام ربنا ان تركيزي يكون انتي والولاد وشغلي بس واصحابي ,, انا بحبك يا "اميره" ومفتقد وجودك اوى ..
_ ايه الفايده من انك بتحبني لكن مش فاهمني وانك مفتقدني لكن مبتدورش عليا ,,ايه الفايدة لما اكون من حاجاتك لكن مش اهمهم ,, اهو دا اللى حسيت به وعشته معاك ..!
_ اوعدك مش هيحصل حاجه تاني ..؟
_ وانا مش مصدقاك .
_ طيب اعملك ايه اكتر من كده ..
_ مش عارفه تعمل ايه لانى مفكرتش انت تعمل ايه ,, لان كل اللى عملته وصل الحال ان الحاجات اللى كنت بتعملها بره جت لغايه البيت ,, قدام ولادي اللى فاكرين ابوهم اعظم اب فى الدنيا .. انت فاهم الموقف ولا شايفه عادي ,,
_ ماقولتلك انا مليش ذنب ..
_ والبنت دى عمرها 15 سنه اكيد كلمتها بطريقتك المسهوكه ولا عاملتها بطريقه كده خليتها تحس باللى حسته وصدقته ,,
_ انتي هتشيليني ذنب واحده مليش علاقه بها ..؟!
_ "ماجد" انت مش زعلان عليها ؟
_ اكيد زعلان .. علشان كده بساعدها تتعالج ..
_ "جاسمين" لما تكبر وتقابل شخص يضحك عليها ويتسلي بيها شويا وتتجرح وتتوجع هتعمل ايه ..؟!
_ لا طبعا بنتي مش هيحصلها كده ..!
_ ايه اليقين دا .. ليه هتروح معاها كل خطوه بره البيت ,,هتراقبها ,, ؟
_ لا انا عارف بنتي ..؟
_ واهالى البنات دى عارفين بناتهم ومربينهم لكن مكنوش عارفين ان فى اشخاص نيمو ضميرهم علشان يتسلو ..
_ انا مغصبتش حد ع حاجه ,,اى واحده كلمتها كان برضاها ..
_ مادا اللى بيحصل .. بالرضا لكن النتيجه الله اعلم ..
_ "اميره" تعالى نقفل ع كل اللى فات دا انا بجد محتاجلك انتي والعيال ..انا مش عارف ارجع البيت وهو فاضي كده ... ارجعي ونكدي عليا براحتك .. اعملي كل يوم سبانخ وكوسه ..مستعد انا بنفسي اشتريلك مخزون السبانخ والكوسه .. بس ترجعي تحسسيني بحس فى البيت .. رجعيلي روحي ..
_ "ماجد" الكسر بيحصل بسهوله لكن ل اصلاح الكسر محتاج وقت ..!
_ يعني ايه ؟
_ يعني انا محتاجه وقت ..!
سكت "ماجد": ماشي يا "اميره" اللى يريحك وعاوزك تعرفي انا مستنيكي مهما طالت المده .. خدى وقتك .. اعرفي بس انا فعلا بحبك وبحب وجودك فى حياتي ومش مستوعب فكره انك مش فى يومي ,,

مشي "ماجد" وقعدت "اميره" اتنهدت ...!

قبل يوم من خطوبه "ياسر " قابلت "منه" "حاتم":
_ حمد الله ع السلامه
_ الله يسلمك .. بس كل مره تسافر فيها تجيبلي هديه
_ يعني مينفعش اهادي صديقتي .. قوليلى ايه الاخبار ..؟
_ الحمد الله تمام وانت
_ الحمد الله بس سفري كتر ومبقتش عارف اشوفك زى الاول ..
_ النت مخلاش طريقه دايما بنتكلم مع بعض
_ بس المقابله لايف كده بتكون افضل ..
_اهو تصبيره
ضحك"حاتم": بكره الخطوبه صح ..؟
_ خطوبه مين ؟
_ "ياسر" .. طليقك ..
_ قصدك صديقي ..
_ لدرجه دى عاوزه تنسي انه طليقك ..
_ مش انسي بس هو حاليا صديقي ..
_ بس ..؟
_ ها ..؟
_ "منه" انا مش هدخل فى خصوصياتك ,,لكن عاوز اقولك اللى بتعمليه دا غلط ,, انتي بتعاقبي نفسك مش بتعاقبي "ياسر" ..
_ مكانه "ياسر" عندي ..
قاطعها : مكانه "ياسر" عندك فى قلبك زى ماهي متغيرتش ممكن يكون جه عليها شويا تراب لكن لما التراب دا هيتشال هيبقي زى ماهو ,, انا لما جربت اخد مكانه معرفتش لانك مانعه اى حد ياخده حتى من غير ما تتكلمي ,, دايما اللى جوانا مبنقدرش نصارح به ..
_ انا ..
قاطعها: انتي لسه بتحبيه ,, انتي بتحبي "ياسر" ,, وتصرفاتك معاه ورفضك الدائم له دا كان عقاب ,, كنتى عاوزه توجعيه زى ماانتي موجوعه ,, عاوزه تحسسيه ان الموضوع مش سهل سابك ولما حب يرجعلك بسهوله يرجع ,,كنتي عاوزه تحسسيه بالخساره اللى ملهاش رجوع ,,وانتي نجحتي فى كده لكن زودتيها ..
_ انا بجد مش قادره اسامح نفسي ع اجهاضي وهو السبب فى كده ..!
_ "منه" افرضي مثلا وانتي فى نفس مشاكلك دى الطفل اجهض لوحده ,, او كنتي شيلتي حاجه تقيله من غضبك واجهض ..او مثلا مشيتي كتير او اى مجهود وحصل اجهاض .. كنتي هتحمليه السبب ,, عاوز اقولك اننا لما بنتوجع اوى مبنعرفش نعترف بغلطتنا او بالجزء الخاص بينا من الغلط فبنرمي الغلط كله ع الطرف التاني ,, انتي تيقنتي ان الحياه هتفضل كده وتخيلتي مستقبل لسه مش مضمون مجهول انه حصل ودا غلط لان المفروض وقتها كنتي تفكري فى الحاضر فى اللحظه اللى عيشاها وتصلحي ل اخر نفس ,, قرارك بالاجهاض دا مسؤليتك زى ماهو مسؤليته بالظبط ,,لانك انتي اللى قررتي من نفسك هو مطلبش منك ,, انتي بنفسك حطيتي نهايه العلاقه حتى لو الاجهاض حصل لوحده ,, وعاوز اقولك لو الجنين له نصيب يجي ع الدنيا مهما عملتي كان هيجي .. دا رزق من ربنا مش احنا اللى بنتحكم فيه ,,
سكتت "منة" واستكمل "حاتم": انتى تماديتي فى العقاب واتوجعتي معاه وموجوعه دلواقتي وهتتوجعي اكتر بعدين ..
دموع نزلت من عينيها : خلاص اللى حصل حصل ,,مفيش حاجه اقدر اعملها د لواقتي ..
_القدر هو اللى هيتصرف وتقبلي النتيجه مهما كانت واتعلمي من غلطتك
_ ممكن اطلب طلب ؟
_ اتفضلي ..
_ ممكن تحضر بكره معايا الخطوبه .. وجودك هيقويني ..!
_ اكيد .. صداقتنا تحبذ عليا اكون معاكي فى اوقاتك الصعبه
_ شكرا ..
_ اهلا بيكي فى اى وقت ..

خلصت "منه" مقابلتها مع "حاتم" .. وبليل فى مدينه نصر اتقابلت "صبا" صدفه مع "حاتم":
_ مستر "حاتم"
_ صبا .. ازيك ..؟
_ انا بخير الحمد الله وحضرتك ..؟
_ الحمد الله .. ع فين مستعجله كده ؟
_ رايحه اتيليه قريب من هنا اجيب فستانى ما بكره خطوبه "ياسر"
_ اها ..
_ يلا عقبالك كده انت و"منه" هنفرح امتي بيكو ..
ضحك"حاتم": هتفرحي بينا لكن منفردين مش مع بعض ..
اتفاجئت "صبا": تقصد ايه ؟
_ انا و"منة" مجرد اصدقاء فقط ,,زى انتي و"ماجد" و"ياسر" كده
_ نعم ..؟!
_ هى "منه" مقالتش ليكي .. احنا بقالنا مده ع كده ..!
_ يمكن قالت ونسيت ..انت عارف بقي الافراح لما فرح بيحصل بتبقي عاوز الكل مفرد وزوجي يتجوزو
ضحكك "حاتم" : اسيبك علشان معطلكيش .. واشوفك بكره
_ انت جى الخطوبه ..
_ ولا بلاش ..
ضحكت "صبا": لا ازاى انا مجيش وحضرتك تحضر ..
ضحكك"حاتم" واستاذن ومشي ووقف "صبا" مستغربه ان "منه" خبت عليها ,,, بعد ما استلمت فستانها اتجهت ع المطعم وكان "ياسر" فى المكتب و"ماجد" قاعد وقدامه اكل وازازه بيبسى وكوبايه فيها بيبسي قليل :
_ يا حرام يا "ميجو" انت بتشرب علشان تنسي .. بس الصودا كده راحت البيبسي بقي مايه بسكر
_ يا سكر .. اقعدي وانتي ساكته او غوري ولا اقولك اقعدي كولي معايا مش عارف اكل لوحدي
_ عز الطلب بس اطلبلي اتنين برجر كومبو وكتر التاتس والبيبسي دايت علشان مش عاوزه اتقل علشان الدايت و الفستان ميفرقعش ..
_ تصدقي انا بحترم فيكي المبادي ..
_ طبعا الانسان من غير مبدا ميسواش
_ اينشاتين ..
طلب ليها الطلب ووصل ومسك كوبايه فيها بيبسي :
_ بصحتك يا "ميجو"
_ بصحتك "يا صبار "
بصت "صبا" ع "ياسر فى المكتب :
_ هو العريس مشغول فى ايه ؟
_ تجهيزات بقي بكره المكان مقفول وكان نسي وقبل حجوزات فسيبته يصلح غلطته بنفسه .. كل انسان مسؤؤل عن غلطاته ..
_ بالظبط زيك كده عايش عيشه العازب وبتتعذب
_ بت قومي من هنا قومي ..
_ استني انا كنت عاوزاك فى حوار كده ..
_ فلوس مفيش لسه الشهريه بدري عليها ؟
_ لا مش فلوس ..( قامت وقعدت جنبه ) الموضوع يخص "منه" ..!
_ خير ..
_ مش طلع موضوع "حاتم" بلح خالص ..!
_ ازاى ..؟
_ الاتنين اصدقاء ولا يربطهم رابط اخر حاليا ولا مستقبلا ..
اتفاجي "ماجد": بتتكلمي بجد ,, وعرفتي منين منها ؟
_ لا من "حاتم" ذات نفسه .. الصدف دى ياابني بتعرفك حاجات لو بتخطط عمرك ما هتعرفها ,,
_ وهى خبت ليه علينا ..؟
_ مش عارفه ,, يمكن لما عرفت حوار الخطوبه محبتش تبان ضعيفه وكدهوز ..!
_ اممم .. تصدقي ممكن .. انتم يابنات حوا الواحد مبيبقاش عارف فى دماغكم ايه ..!
_ والحل طيب ..
نظر اليها بحده : لا اوعي تعملي اللى قريته من نظرتك عليه ,, هو متصلم خلقه و"داليا" ملهاش ذنب ,,الخطوبة بكره .. ومعني ان "منه" مقالتش حاجه يبقي هى عاوزاه يكمل .. فسبيه يكمل ..!
_ "ماجد" انت عارف ان الاتنين ..
قاطعها: عارف ومتاكد وواثق كمان ,, لكن الاتنين غبائهم وصلهم لهنا خليهم بقي يشيلو نتيجه غبائهم ,, لا حد ضرب "ياسر" ع ايده يخطب ولا "منه" انها تخبي .. خليهم بقي يشيلو نتيجه افعالهم ..
_ يعني هنسيب الخطوبه تتم ..؟!
_ هنسيبها ولو حد هيفركشها يبقي حد فيهم ومن نفسه .. احنا هنعمل ايه بقي ..؟
_ هنعمل ايه ..؟
_ هجيب تورته الايس كريم لسه معموله من شويا ونغتالها انا وانتي ايه رايك ..؟;
_ ايوه كده .. بس مع حته تشيز كيك شوكلت نفسي فيها
_ والدايت والفستان ..؟
_ هشرب شاي اخضر بعدها
_ احبك وانتي راضيه ومتسامحه مع كعورتك ..
_ اللى ملوش خير فى كعورته ملوش خير في ..
_ في ايه ؟
_ فيفي عبده هاهاهاهاها
_ خمسه امووواه اى سوير انهم هيتنفخو
_ اسكويوز مي بقي ع البركه
ضحكوا "صبا" و"ماجد" ونسوا موضوع "منه" وياسر" واميره" وقضوا السهره اكل وضحكك ع خلق الله وع نفسهم ...!


يوم الخطوبه كان "ماجد" مع "ياسر" فى شقته :
_ مشفتش شرابي الكحلي المنقط دا يا عريس
دخل الغرفه وكان "ياسر" واقف امام المرايا ومجهزش :
_ "ياسر" .. "ياسر" .. "يااااااااسر"
_ فى ايه يا "ماجد"؟
_ انت اللى فى ايه ..؟
_ هو انا صح ..؟
_ نعم ..؟
_ انا صح ؟
_ فى ايه يعني ؟
_ خطوبه و "داليا " ..
_ اهااا ... لا بصلي كده وركز .. انت اختارت وقررت وقريت فاتحه محدش زقك .. وفى واحده بنت ناس محترمه وجميله ومليون غيرك يتمناها وافقت ومستنياك تمر عليها تاخدها وتروحوا حفله الخطوبه .. حفله الخطوبه اللى فيها ناس اهلك واهلها .. فاهم يعني ايه ؟
_ فاهم ..بس مش عارف حاسس ان فى حاجه غلط ..؟
_ الغلط اللى بتعمله دلواقتي .. ادخل خدلك دش ساقع .. ايوه ساقع يفوقك ويرجعك للواقع ويبعد عنك التهيؤات دى .. واجهز علشان ننزل تمام .. دلواقتي فكر فى "داليا" .. "داليا" وحفله خطوبتك
_ هى "منه" هتيجي ..؟
_ قالت لكن معرفش ..
_ اكيد مش هتقدر تيجي ..
_ وان جت ..
_ مش عارف ..
| مسكه وزقه اتجاه الحمام : الله يباركلك اطرد الافكار المعقده دى وركز فى "داليا" فى خلال ساعه الا ربع تكون جاهز ووننزل تمام ..
دخله الحمام وقفل الباب : هتاخد دش لوحدك ولا ادخل احميك انا ..
_ لا خلاص ..
_متخافش مش هبص اعتبرني امك يا حبيب ماما ..
_ امشي يا "ماجد" دور ع الشراب المنقط
_فكرتني .. الشراب المنقط ..

جهز "ياسر" ونزل مع "ماجد" واتجهوا لمنزل "داليا" وكانت جاهزه وكانت فى منتهي الجمال ميل "ماجد" ع ودن "ياسر":
_ حد يسيب القمر دا جتك نيله ..
بصوت عالي : مبروك يا "داليا" ..ايه الجمال دا ؟
_ ميرسي يا "ماجد" ..بس دا راي صاحبك كمان ؟
_ ماشاء الله زى القمر
_ ميرسي يا "ياسر" ..
واتحركوا لقاعه الخطوبه وكانت هناك "صبا" فى انتظارهم ومعاها "منه" و "حاتم" .. نظرت "صبا" ل "منه" نظرات خبث وميلت عليها :
_ عقبالك يا "نونو"
_ وانتي كمان ..
_ لا انتي فى حكم المخطوبه مش ناويه بقي تفرحينا رسمي ..؟
_ كل شئ ب اوانه ووقته
_ يعني مفيش خبر قريب كده ولا كده ..؟
_ فى ايه يا "صبا" ما قولتلك لسه شويا ..
_ لا مفيش بس بحب اطمن عليكي اصل بصراحه شكلك انتي ومستر "حاتم" لايقيين ع بعض اوى
_ شكرا يااختي .. هو "طارق" فين و"غدير" اتاخرو ..
_ اللى اعرفوا ان "غدير" هتيجي مع خطيبها و "طارق" هيجي مع "هدير" ودكتور "عثمان" ف اكيد هياخد وقت ..
_ طيب ..
_ بس انتي قمر مع مستر "حاتم" بجد فستانك الكحلي مع كرافتته الكحلي عاملين مكس رائع والله ..
_ انا هسيبلك المكان خالص ..
قامت "منه" و ضحكت "صبا" : بتحوري عليا ماشي تخلص الليله دي بس ...

كان "طارق" بيجهز فى غرفته فى الفندق ووقف سرحان للحظات ولاحظه دكتور "عثمان" :
_ اتصل اطمن واتاكد ..
_ اطمن واتاكد من ايه واتصل ب مين ؟
_ ب "غدير" .. اطمن عليها و اتاكد انها جايه مع "رامي " ..
_ ماانا كلمتها العصر و..
_ العصر دا من 4 ساعات ..دا الحال بيتغير فى لحظه ..تخيل ..!
_ انت بتقلقني ليه ..؟
_ لا انا مش بقلقك انت قلقان لوحدك .. كلمها وانا هنزل اشرب قهوتي قبل ما نتحرك "هدير" مستنيانا ..
خرج "دكتور عثمان" ومسك موبيله "طارق" واتصل ب "غدير" وردت "نادين":
_ ازيك يا "نادين" ..فين "غدير" ؟
_ فى اوضتها اعتقد ..
_ طيب ايه جهزت ولا ايه ؟
_ مش عارفه اصل "رامي" لسه مجاش ؟
_ مجاش ..؟
_ هو امبارح سافر وقال ع العصر هيكون موجود ولغايه دلواقتي مجاش
_ طيب ايه اللى هيحصل ..؟
_ مش عارفه صدقني .. شويا و"غدير" تكلمك ماشي ؟
_ تمام ..
بعد ربع ساعه اتصل "طارق" وردت "غدير":
_ ايه يا "غدير"؟
_ مش هقدر احضر الخطوبه اعتذر نيابه عني ل "ياسر " ..
_ ليه ..؟
_ "رامي" اتصل وقالي انه مقدرش يجي كان فى شغل وهيجي الصبح ..
_ لا بس انتي لازم تحضري ..
_ انا مش هعرف اروح لوحدي ..
_ مش هتروحي لوحدك .. اجهزي انا همر عليكي ..
_ لكن ..؟!
_ مفيش لكن .. يلا بسرعه مسافه الطريق ..
قفل معاها ونزل لدكتور "عثمان" :
_ يلا .. لسه قافل مع "هدير" مستنيانا
_ لا حضرتك اللى هتروحلها وانا هروح ل "غدير" لان "رامي" مرجعش من السفر ولازم "غدير" تحضر معانا ف انا هروح امر عليها وهحصلكم ع القاعه ..
ابتسم"عثمان": مش قولتلك الحال بيتغير فى لحظه .. تمام روح انت ..!
_ متتاخروش ..
_ انت اللى متتاخرش ..
بسرعه خرج "طارق" وطلب عربيه ووصل لبيت "غدير" وكان مستنيها وهى نازله من ع السلم ومعاها "نادين" وقف "طارق" وبيبص ع "غدير" حس للحظه انه اتفصل عن العالم من جمال "غدير" بالفستان الاسود وشعرها المسدول وقربت منه وهى مبتسمه :
_ اسفه لو اتاخرت ..
انتبهه "طارق": احم .. لا لا براحتك .. يلا بينا
_ استني حلو كده انا حاسه ..
_ حاسه ايه هو فى اصلا احلى من كده
_ نادين اللى ساعدتني واختارت كل حاجه ؟
_ ذوقك جميل يا "نادين"
_ ميرسي يا دكتور ..
_ يلا ..
ضحكت "نادين": امسك ايديها يا دكتور الكعب هيوقعها خلى بالك ..
مد ايد ومسكت ايده وابتسم "طارق" واتجهوا للعربيه واتحركو للقاعه ..!

"هدير" كانت كل لحظه بتنظر الى المرايا لتاكيد ع فستانها والميكب وشكلها وتبص ع الساعه ,, لاحظتها والدتها :
_ كفايه بص فى المرايا .. انتي زى القمر
_ علشان بنتك بس ..
_ اسألي اى حد .. ابقي اسألي "طارق" هيقولك انك زى القمر انتي هتغطي ع العروسة
_ مش مهم العروسة
_ ايه ..؟
_ ولا حاجه .. بس اتاخر ليه كده ..قالي الساعه 8 اكون جاهزة الساعه 8 :30 دلوواقتي ..
_ كل تاخيره وفيها خيره ..
سمعت صوت كلاكس العربيه بصت من الشباك :
_ العربيه اهى وصلوا يلا سلام يا سوسو
_ باي يا حبيبتي ..خلي بالك ع نفسك ..
_ متقلقيش انا معايا "طارق" ..
نزلت من الفرحه خرجت من باب العماره وشافت دكتور "عثمان" واقف وبتبص ع "طارق" مش موجود .. بتبص فى العربيه مش موجود :
_ ايه الجمال دا ..
_ ميرسي يا دكتور .. فين "طارق" ..؟! هو مش هيجي الخطوبة ؟! حصلت حاجه ولا ايه ؟!
ضحكك دكتور "عثمان": براحة ..براحة "طارق" عقبال ما نوصل هيكون هناك مع "غدير" لان "رامي" مش موجود ..ف "طارق" تبرع يمر عليها ..
_ ماكان مر عليها واحنا معاه ..
_ حب ينجز وقت علشان نلحق الحفله من اولها وبعدين كده احسن ..!
_ ليه ؟
ميل عليها : علشان الجمال دا كله اشوفه لوحدي ..!
ابتسمت "هدير": بتعاكسني يا دكتور .. هقول لصاحبك
_ انا هكتب قبل ما يقول مش اتفقنا ولا ايه ..؟
_ هفكر ..
_ عندك لغايه ما نوصل القاعه
ضحكت "هدير": اتفقنا ..
اتحركوا ووصلوا القاعه وكان لسه "طارق" موصلش .. وصل "ياسر" و"داليا" وزفه قربت "صبا" ومسكت "ماجد" ورقصت فى الزفه ومسكو ايد "ياسر" و"داليا" و"منه" واقفه بتصقف وبص عليها "ياسر" وحاولت تبتسم وتبعد نظرها وتتكلم مع "حاتم" وبتضحك معاه ودا كان بيضايق "ياسر " .. شويا ودخلوا قعدوا فى الكوشه ووصل "طارق" وكانت "غدير" متررده تنزل من العربيه :
_ مالك ..؟
_ مش عارفه .. خايفه ..حاسه ان فى حاجه غلط ..
_ فى ايه بالظبط ؟
_ مش عارفه .. شكلي او لبسي او مش عارفه ..مش عارفه ,,
_ طيب عاوزه ايه دلواقتي ..؟
_ مش عارفه .. عاوزه ارجع البيت ..رجعني البيت
_ "غدير" اهدي كده ,, غمضي عينك وخدي نفسك 5 مرات ورا بعض شهيق وزفير يلا ..
ابتدت "غدير" تعمل اللى بيقول عليه "طارق":
_ فتحي عينك ..
فتحت عينيها :
_ دلواقتي قولي لنفسك انتي فى منتهي الجمال والشياكه ,, وهتحضري خطوبه "ياسر" صديق طفولتك وهناك فى ناس كتير اغراب لكن فى منهم اصحابنا "ماجد" و"منه" و"صبا" .. ودكتور "عثمان" و"هدير" ,, وانا معاكي ومش هسيبك ولا لحظه ,, هندخل بكل ثقه ونحضر ونفرح معاهم وننبسط تمام ,,مفيش خوف مفيش توتر .
_ انا بقالى مده محضرتش مناسبات وحاسه انا مش واثقه فى نفسي وهعك الدنيا ..
_ لا انتي قويه واقوي من هاجس الخوف دا ,, حد من اللى شافك قالك حاجه كلهم قالولك انك فى منتهي الجمال ,, القمر نزل من السما وبيتحرك ع الارض بين البشر ,,
ابتسمت "غدير" واستكمل "طارق" كلامه:
_ مهما كانت حالتك خليكي واثقه فى نفسك ,, حبي نفسك مهما كانت متخبيهاش ,, احساس جميل لما اللى حواليكي بيحبوكي بيدوكي ثقه فى نفسك لكن الثقه بالنفس بتتقوي وبتيجي اصلا لما تحبي انتي نفسك ,, وصلت ..؟
_ تمام .. ممكن متسبنيش لوحدى ..
_ انا وعدتك مش هسيبك مهما حصل ,, يلا ننزل وكلنا ثقه وان مفيش حد فى الحفله احلى مننا .يلا ..
_ يلا ..

نزلت "غدير" وكانت لسه متوتره ومسك ايديها "طارق" علشان الكعب ودخلوا .. "هدير" كانت عينيها ع باب القاعه ,,شافت دخول "طارق" و"غدير" ,, المشهد ضايقها مسكت ايد "طارق" ل "غدير" لكن تجاهلت الفكره وابتسمت ,,قرب منهم "طارق" وسلم عليهم واللى ضايق "هدير" ان "طارق" معلقش على فستانها لكن فى المقابل دكتور "عثمان" علق ع فستان "غدير" ,, دكتور "عثمان" حب يلفت انتباهه ل "هدير" :
_ ايه يا "طارق" مقولتش رايك فى عروستي ؟
بص "طارق" "هدير" والتفت ع ملاحظه "دكتور عثمان":
_ ايه الجمال دا .. لا لا يا دكتور انا مسمحش عروستك تكون بالجمال دا مش هنلاحق ع المعاكسات
ابتسمت "هدير": مش لدرجه يعني ..
_ لالا انتي مش شايفه نفسك ولا ايه ؟
_ بس "غدير" زى القمر ..
ابتسمت "غدير" : انتي احلى يا "هدير"
قربت "صبا" منهم ومسكت ايد "غدير":
_ لا احنا مش جايين نقعد دا مش ميتنج رئاسي دا فرح حتى لو الفرح مش ع هوانا بس لازم نستغل اللحظه قومي معايا ..
_ ع فين ..؟
_ قومي بس .."منه" تنحه اوى انهارده لازقه جنب "حاتم" و"ميجو" لازق فى "ياسر" وانا مش لاقيه حد الزق فيه يلا نهيص ..
شدتها واتخض "طارق": براحه يا "صبا" لتقع
استغربت "هدير ": تقع ..؟
_ ايوه مش متعوده ع الكعب فطول الطريق ماسكه ايدي
_ وايه جابرها ع كده ..
ضحكك"طارق": بيقولوا اننا فى حفله خطوبه ..
مناسبه يعني وهى ك اى بنت لبست فستان وكعب
_ بتتريق ..
_ انا مقدرش اتريق ع الجمال دا .. كنتي مخبياه فين كل دا ؟
_ رخم ..
طول ما "طارق" قاعد عينه ع "غدير" وهى واقفه و"صبا" بتحاول تدمجها معاها وهى واقفه بتصقف بسيط وكانت هتتكعبل تصرف تلقائي اتجهه ليها "طارق" ومسكها ,,:
_ خلى بالك ..
_ ماشي ..
_ تعالي اقعدي ..
_ ياريت ..
_ مش قادره تقفي ,,تعالى اقعدي سهله
_ "صبا" تزعل انى سبتها ..
قعدوا ووجهه "طارق" الكلام ليها : "غدير" ..اولا "صبا" مبتزعلش من حد .. ثانيا انتي حره تقفي او تقعدي فاهمه عاوزه تقفي اقفي عاوزه تقعدي اقعدي ..انتي اللى تقرري .. متستنيش غيرك هو اللى يحركك ,,فاهمه
_ حاضر ..
_ ها عاوزه بيبسي ولا سفن
سكتت : اى حاجه ..
_ لا اختاري انتي تحبي ايه ..؟
بعد لحظات : بيبسي ..
_ لا هتشربي سفن ..
سكتت "غدير" ولاحظت ملامح "طارق" بيطلب منها تتكلم فردت :
_ لا انا هشرب البيبسي
ابتسم "طارق" : كده صح ..
ابتسم "عثمان" لطريقه تعامل "طارق" ل "غدير" واستجابتها ,, قربت "هدير" منه:
_ هو لازم كده ؟
_ الحاجات البسيطه من وجهه نظر البعض بتكون صعبه للبعض الاخر ,, اختيارها عاوزه ايه انتي فاكراه سهل لكن لحالتها انها بتكتشف نفسها ورغباتها بتكون صعبه ,, علشان كده "طارق" مركز فى التفاصيل اكتر غيره يشوفها عاديه جداا ,,,
_ اهاا ..
_ ايه يا دكتور ,, المفروض انك قاريه فى علم النفس وعارفه ..؟
_ عادي يا دكتور ممكن يكون تاهت مني وكده ..

خرجت "صبا" من القاعه وخلعت الجزمه ومسكتها فى ايديها وقعدت ع السلم وبتدلك رجلها :
_ شوره سوده الكعب واللى بيلبسوه واللى فكر فيه ,, دا كساح ,,اه يا رجلي
مر من امامها شاب بيتكلم فى الموبيل وبيبص وقف امامها وهى بتمسك فى رجلها بتدلكها وجنبها الجزمه ..
_ لا مش معقول .. "صبا" ..!
بصت للصوت واتفاجئت : لا .. لا .. "ياسين " .. اقصد المهندس "ياسين "
ب ابتسامه : معقول اشوفك هنا .. بتعملي ايه ؟
_ اكيد مش جايه اغسلهم الاطباق بفستان سواريه ,, انا فى خطوبه هنا معزومه وانت ..؟
شاور ع قاعه فى الدور التاني : وانا معزوم ع فرح اخت صديق ليا هنا ..
_ يا محاسن الصدف ..
_انتي عارفه ان دى تاني مره اشوفك صدفه
_ فاضلك مره وتاخد 75 قرش صح هاهاها
ضحكك"ياسين": انتي عارفه فى مقوله بتقولك لو قابلت حد مره يبقي صدفه لكن لو اتكررت مرتين يبقي قدر
_ يا قدري ..
ضحكك"ياسين": شكلك مبتصدقيش فى نقطه القدر
_ ازاى وانا حياتي كلها قدر اللى بيحركها
بص عليها وهى حافيه وانتبهت "صبا":
_ لمؤاخذه يا هندسه انا مليش فى الكعب ولبسته بس علشان الضروره فكنت بااخد رست هنا لكن انا بلبس الكعب عادي زى باقي البنات والله مش جايه الخطوبه حافيه ..
ضحكك "ياسين": لا عادي براحتك .. اصلا الكعب دا ارهاق
_ وانت الصادق عذاب لكن عند البعض مزاج .. اعرف بنات بيجرو به تقولي ازاى اقولك معرفش .. ماله الكوتشي مريح كده ياااه ..
_ وملبستيش كوتشي ليه ؟
_ كانوا مش هيدخلوني هنا ,, انا اتعملي كشف هيئه قبل ما اجي انت متعرفهمش ..!
_ مين ..اهلك ؟
_ يعنى ممكن تقول اهلي .. اصحابي من طفولتي المشرده ما دا خطوبه واحد منهم ..
_ اهاا ..
_ لو حابب تتفرج ع اصحابي تعالي
_ اتفرج ..؟
_ اه ماهما فرجه بصراحه,, ما خفي كان اعظم حواديت وحكايات وحوارات وافلام صندوق باندورا
ضحكك"ياسين": تمام ..مفيش مشاكل
_ثواني كده البس الجزمه علشان لو دخلت حافيه هيتبرو مني ..
لبست الجزمه ووقفت عدلت فستانها وشعرها :
_ كده تمام .. ايه رايك ؟
_ زى القمر
_ بالستر .. يلا بينا
دخل "ياسين" معاها القاعه وعرفته ع اصحابها كلهم وقعد معاها شويا واتصلوا اصحابه وخرج ورجعت "صبا" لوحدها تناقر فى "ماجد" ,, اشتغلت اغنيه سلو وطلب من الكابلز يقوموا يرقصوا مع العرايس ,, مسك "ماجد" فى "صبا" .. و"ياسر" و"داليا" و"منه" و"حاتم" وكانت "هدير" فى الحمام فسال "طارق" "غدير" تقوم معاه اترددت وشجعها وقامت ,, اشتغلت الاغنيه وابتدوا يرقصوا رجعت "هدير" وشافت "طارق" بيرقص مع "غدير" ... نظرات "طارق" ل "غدير" كانت بتوحي ب اهتمام مختلف ودا ضايق "هدير" ,, وكان "ياسر" بينظر ل "منه" و"منه" كانت بتتجنب النظر اتجاه "ياسر" وكان بيساعدها ع كده "حاتم ".. و"ماجد" و"صبا" عيونهم مراقبين الباقيين :
_ انت حاسس باللى انا حساه ؟
_ انتي حاسه باللى انا حاسس به ؟
_ تحس ان فى حاجه غلط صح ..؟
_ فعلا حاسس بكده ..
_ يمكن الحاجه الوحيده الصح "طارق" و"غدير" ..مش ملاحظ حاجه ؟
_ انتي ملاحظه اللى انا ملاحظه ؟
خبطته فى رجله : مترددش ورايا زى الاهبل كده ,, بص ع "ياسر" بيبص ع "منه" اكتر ما بيبص ع "داليا" و"داليا" رغم انها ملاحظه لكن عامله مش واخده بالها ,, و"منه" بتتجنب تبص ل "ياسر" وواقف بضهرها له و"حاتم" تحس انه مركز ان دا يحصل ,, و"طارق" و"غدير" تحس انهم فى عالم لوحده .. و"هدير" بتطلع ليزر من عينيها ل "طارق" هيقسمه نصين ..
_ ايه دا يا بنتي .. جهاز استشعار واقف معايا ,,لقطتى كل دا ازاى ؟
_ علشان انت من اول ما جيت تركيزك انك تتجنب البنات علشان "اميره" ..لكن انا فاضيه والفاضي ممكن يراقب نمله وهى ماشيه ويقعد يتكلم معاها ..
_ كرومبو ..
_يارب يعدى الليله ع خير ..
_ يارب ..
_ "ميجو" البوفيه هيفتح امتي ..؟
وقف "ماجد": وهو احنا بنستني بوفيهات ..يلا
_ صح .. يلا
مشي "ماجد" و"صبا" اتجاه البوفيه والباقيين مستمرين فى رقصهم ,, "طارق" و"غدير" بين ذراعيه فقد الاحساس بالمكان والناس الموجودين ونظراته منزلتش عن "غدير" .. حس بسعاده وفرحه غريبه وهى معاه ,, احساس مش فاهمه غير انه سعيد والاكتر لما بيشوف ابتسامتها فعلا فقد احساسه بالوقت والمكان ,, وهما بيرقصوا شعره جت ع عينها ضايقتها مد ايده وحركها وبصتله وللحظه حس انه غرق فى عينيها منتبهش غير لما الرقصه خلصت والتصفيق كان عالي ,, رجعوا قعدوا شويا وطلبت "غدير" انها تمشي,, واتحرك معاها "طارق" واستأذن "هدير" ودكتور "عثمان" ,, ورجعت ع البيت ورجع "طارق" ع الفندق ودخل الغرفه وقعد ع كرسي وبص فى المرايا ومش فاهم فى ايه ,,غمض عينه للحظات استحضر مشهد الرقصه وهى بين احضانه وابتسم وفجاه فتح عينه وحاول يفوق ودخل اخد دش ونام ع السرير ومسك السلسله وباصص عليها ونام ودخل دكتور "عثمان" بص عليه كان نايم والسلسله فى ايده عدل الغطا ومسك السلسله لاقاه ضاغط عليها ف ابتسم وقعد ع السرير التاني وباصص ل "طارق" وملامح الحيره سيطره عليه ...!

تاني يوم اتجهه "طارق" ل "غدير" وكانت قاعده مع "نادين" وابتدا يتكلم معاها وكان فى تدريب يعودها ع الاختيار استجابتها كانت افضل ,, اتجهه "ماجد" لبيت اهل "اميره" ومعاه جاتوه وحلويات وقابل "اميره ":
_ انا قولت انتى مجتيش ف عملت حسابك من اللى كان موجود امبارح ,, كيكه الجزر اللى بتحبيها وتارت الخوخ ,, والتشيز كيك ل الاولاد ..
_ شكرا ..
_ ع فكره امبارح طول الخطوبه كنت مع "ياسر" والبت "صبا" مسبتنيش فى حالي كان لزقالي ومعايا ع طول حتى الرقصه السلو رقصتها معاها وروحنا البوفيه دوقنا الاكل كله قبل العرايس والمعازيم ,,"صبا" قالتلهم انها من الصحه ولازم تتاكد من صحه الاكل وانا قولت انا من اهل العريس ولو الاكل مش عجبنا هنفركش .. وصدقوا وسابولنا البوفيه بحاله ,,الواد "ياسر" مكنش مبسوط لكن عدت الليله ,, و"منه" كانت عايشه الدور ,, المفاجاءه "طارق" و"غدير" مقولكيش بقي ..
_ "ماجد" انت بتعمل ايه ؟
_ بحكيلك اللى حصل امبارح ..
_ ليه ..؟
_ لاني كنت عاوزك تكوني معايا امبارح وافتقدت وجودك وتخيلتك معايا فبحكيلك علشان الخيال يكون واقع ,,
سكتت "اميره" وكمل "ماجد": ع العموم انا,, انا .. انا همشي سلام ..
مشي "ماجد" وملامحه حزينه و"اميره" راقبت خروجه من باب العماره من ورا شيش البلكونه ..؟

كان فى المطعم "ياسر" و"داليا" ولاحظت انشغاله :
_ اسف جداا يا "داليا" ..امبارح قفلنا وكان فيه حجوزات وحصلت لغبطه
_ لا ولا يهمك خلص شغلك انا قاعده ,, بحب اشوفك اوى وانت بتشتغل
_ ثواني وهكون معاكي ..؟
_ خد وقتك ..
مر نص ساعه وقعد "ياسر": اسف تاني
_ متتأسفش ..انت بتشتغل و"ماجد" مش موجود ,, يعني مش بتلعب
_ فكره انك متفاهمه دى مريحاني جداا
_ ماهو انا لازم اتفهمك علشان اعيش معاك ,,من غير تفاهم مش هنعيش مع بعض وهتفشل لتاني مره ,, وانا مبحبش الفشل
_ ان شاء الله مفيش فشل ..
_الحفله امبارح كانت جميله ,,
_ ايوه جدا ..
_واصحابك كان فى منتهي الجمال ,, "ماجد" و"طارق" و"غدير" و"منه"
_ اه ..
_ ياسر ..؟
_ ايوه ..
_ انا هتكلم معاك بصراحه ..
_ فى حاجه ولا ايه ؟
_ انا وافقت ع الخطوبه وانا عارفه كل ظروفك وعلاقتك مع "منه" شكلها ايه ,, انت وافقت وقررت تخطبني ودا قرار من عقلك ,, انا هطمع فى الايام الجايه مش هقولك اكون مكانها لانه مستحيل اللى بيدخل القلب مبيخرجش حتى لو هو خرج من حياتنا ,, طمعي اكون فى جزء من قلبك مع عقلك ,, هتساعدني ..؟
_ صدقينيى
_ انا مش عاوزاك تقول كلام تطمني به وهو لا مر ع عقلك ولا خرج من قلبك ,, طلبي انك تحاول تساعدني لاني فعلا عاوزه ابدء حياتي معاك ..
_ تمام ,, وانا هساعدك لان انا عاوز كده ..!
_ تمام .. انا هسيبك دلواقتي وهستناك ع العشا عندنا
_ تمام ...
مشيت "داليا" واتنهد "ياسر" : حاول يا "ياسر" مش هتخسر ..!