زهرة التوليب

( 5 )

ومر يومين واتصل "ماجد " ب "طارق" واتفق معاه يقابلو "ياسر" وكان "طارق" فى انتظار "ماجد" فى الفندق .. وصل "ماجد" وخرج "طارق" واتحركوا بالعربيه :
_ مش عاوز اقوللك يا ابو الطوارق لما قولت ل "ياسر" انك فى مصر مصدقش رجع من البلد ع طول
_ هو اهله اتنقالو امتي البلد ؟
_ من وقت ما اتجوز سابوله الشقه يتجوز فيها ورجعوا قعدوا فى بيتهم اللى فى البلد ..!
_ و"ياسر" قاعد فين هنا ولا فى البلد ؟
_ هنا .. ماهو شغله وحياته هنا وبعدين يقدر يبعد عن عذابه ميقدرش ..
_ عذابه ..
_ لا اسمع الحكايه منه بقى لانى زهجقت منهم .. المهم هو عايش هنا وبيسافر البلد زيارات كل فين وفين واوقات بنسافر معاه نغير جو ونرجع يعنى ..
_ هو احنا هنقابله فين ؟
_يعني عندنا مطعم اد الدنيا والغرب بيجو يقابلو اصحابهم فيه واحنا هنقابلك بره ,, هنروح المطعم هو هناك ومنها تشوف المطعم وياسر مع بعض شوفت الانجاز ..
ضحكك"طارق " :والبنات فين ؟
_" جهاد" مقدرتش تنزل علشان حماتها تعبانه شويا راحت بيها لدكتور و"منة" معاها ,,و"صبا" مسافره بس قربت اجازتها هتنزل وهتزهقك اسبوع ,,
_ تمام ..
_ والله نورت يا طروق ,,
وصلوا المطعم وكان فى المعادي ع النيل فى مكان رائع وديكورات هادية وميوزك شرقي شغاله ,, قعدوا ع ترابيزه وطلب "ماجد" شاي بنعناع له ول "طارق" وشيشه ,,
_ فين "ياسر" مش انت قولت هيكون هنا ..؟
_ ماهو فعلا هنا .. دور عليه انت بقى ؟
ضحكك "طارق" انت بتتكلم بجد ,,انت عاوزنى اقوم الف علي "ياسر" وسط الناس..؟
_ طبعااا ,, دا اختبار صداقة ونشوف ذكرياتك لسه نشطه ولا اتمسحت ..! ..
_ انت بتهزر صح ..
ولسه بيتكلم قرب منهم شاب :
_ عصير مانجه مخصوص للعادئين من الخارج
كان "ياسر" ابتسم "طارق" وقام رحب به واحتتضنه بشده :
_ حمد الله ع السلامه ياطروقه
_ الله يسلمك يا "ياسر"
قعدوا وبعد سلامات وترحيب :
_ متغيرتش خالص يا "طارق "
_ لكن انت اتغيرت يا "ياسر" بقيت مدخن شرهه .. ايه كمية السجاير دى ؟
رد "ماجد" بسخريه: الحوووب يا دكتور الحوووب ولع فيه ..
_ هاهاهاها لذيذ
_ ليه التدخين دا كله بجد صحتك بتضيعها فى هوا ..!
_ والله يا "طارق" اهو بنفخ فيها بخرج اللى جوايا ..
بص "طارق" ل "ماجد" وهو بيدخن شيشة :
_ وانت كمان علشان تخرج اللى جواك ..
هز راسة "ماجد"
_ ودا مش صح عليكم ..!
بيغمز "ماجد " ل "طارق" : وانت مبتشربش سجاير ؟
_ لا
_ يا سلام .. ليه بقي مجربتهاش ولا مرة ؟
_ لا جربتها من باب الفضول وحسيت انها مش هتفيدنى فى حاجه ولا حتى مسليه مجرد نفخ وضرر ليا ,, اغلب المدخنين بيعتبروها تخريج كبت او خنقه وبيتمادوا من غير ما يحسوا ودا وهم مش حقيقه لانهم عاوزين يهربوا من ضغوطاتهم وللاسف دا بيأذيهم جسديا ع المدى البعيد ..
رد "ماجد" بسخرية: يعنى اللى عاوز يخرج كبته وخنقته ياكل لبان ..؟
_ انت بتتريق .. فعلا اللبان بيكون وسيله تفريغ كبت وضغط لكن فى حاجه احسن من كده ..!
_ ايه بقى يا دكتور ؟
_ الرياضه .. ساعه رياضه هتفرق كتير نفسيا وجسديا .. لو مش فمقدرتك تتابع فى جيم اتمشى ..اتمشى ساعه هتفرق معاك هتخرج الطاقه السلبية وهتستقبل طاقة ايجابية هتحس بالاختلاف .. لكن احنا البشر بنستسهل وبنقول هو دا الحل ودايما الحاجات اللى بتضر بتكون سهله ومتاحه قدامنا ...
بيضحك "ماجد": ايه يا واد الحلاوة دى دكتور حقيقي داانا قربت اقتنع ...!
_ واقتنعت ..
_ هتصدقني اقتنعت دقيقة وافتكرت "اميره" وقولت دى مينفعش معاها غير ديناميت علشان انسي
ضحكوا .. استكمل "ياسر":
_ بس تعرف مكناش نتوقع انك تكون دكتور نفسي لانك كنت عاوز تكون مهندس زى باباك ..؟
_ كلنا واحنا اطفال كل واحد كان بيتمني حاجه ولما كبرنا امنياتنا اتغيرت دا طبيعي ..انا حبيت الهندسة وكنت محدد حلمي هندسة لكن لما الظروف وجهتني للطب النفسي و عرفت الطب النفسي حبيته وقررت اتخصص فيه ..
رد "ياسر" بسخرية: زى بالظبط "ماجد" كان عاوز يبقي ظابط ومعرفش ازاى ودخل تجارة البلد خسرت كتير ..
رد "ماجد" : حوش حوش سفير مصر فى موزنبيق "ياسر جمال " ,, ماانت كمان المجموع قصفك بعد ما كنت عاوز تدرس اقتصاد وعلوم سياسية ,,دخلت تجارة ..
_ انا دخلت تجارة علشان ابقي معاك يا ميجو خفت عليك البنات الحلوة تخطفك ,,
ضحك "طارق" ع مناقرتهم واستكمل "ياسر": عارف يا "طارق" من غير حسد كده انا و"ياسر" و"منة" كنا بنحلم بكليات معينه ومجموع الثانوية قصفنا ودخلنا تجاره و"صبا" معهد سنتين و"جهاد" حقوق وانتساب ,, فين السفير والظابط والمضيفة والدكتوره والمدرسة . كله بح ..
_ دا طبيعي اننا نحلم ومش شرط الالزامي اللى اتمنناه يتحقق ,, الثانوية مرحلة عادية فى بيحقق حلمه وبيدرس التخصص اللى حلم به وفى مقدرش لكن ظروفه وجهته انه يدرس تخصص تاني ونجح فيه ,, احنا منعرفش الخير والاحسن لينا ايه لان دايما اختياراتنا مش كلها صح لاننا منعرفش الاحسن لينا ايه ...!
_ تشوف انت الثانوية اليومين دول العيال بيتكهربو والاغرب بينتحرو !
_ ايوه فعلا ..
_ دا غلط .. الدراسة دى مرحلة وكل انسان بيحقق فيها المقدار اللى يقدرعليه فيها لاننا كلنا غير متساويين لا فى الفكر ولا الذكاء ,, ومش معني فلان دخل جامعه معينه يبقي ابني ولا بنتي تدخل زيها علشان يتقال بنتي دكتوره ولا ام المهندس ,, واصلا ولادهم غير مهيئيين فكريا ل الطب ولا الهندسة لان ممكن ولادهم مستقبلهم فى اتجاه تاني القدر هيوجههم ليها ,, علشان كده المطلوب انهم يبذلو اقصي استطاعتهم بالقدر اللى قادريين عليه مع تفاهم الاهل ان النتيجة هى القدر المحدد ليا ومقدرتش اكمل الطريق اللى حلمت به,, اخطط بقي فى الطريق اللى ظهر قدامي لغايه ما استقر واعرف انا عاوز ايه .. هى دى الحياة مش كل اختيارات بتتحقق المهم تنجح فى المجال اللى تختاره بحب وشغف ..!
_ ياريت فعلا الاهل يسمعوا كده ويفهموا ان ولادهم ليهم حريه الاختيار مستقبلهم ب استشارتهم ..
_ عن نفسي "جاسمين" و"شريف" لا هتدخل ولا هقول حاجه اللى عاوزين يعملوه يعملوه فى حياتهم ..
رد "طارق": ما دا غلط ماهو متمسكش الحبل اوى ولا تسيبه اوى ,, اى اختيار فى حياتهم بيحتاجو اراء اللى حواليهم واولهم الاهل علشان يساعدوهم مش يضغطو عليهم ..!
رد "ياسر" :يعنى انت درست الطب النفسي مش بسبب دكتور "عثمان" ..؟
_ لا خالص هو ممكن ادانى تلميح لكن انا اللى اهتميت والمجال شدني بس
_ ربنا يوفقك
محاوله ل استرجاع الذكريات تحدث "ياسر ":فاكر يا "طارق" استاذ يحيى مدرس العربى ؟
_ ايوه فاكره كان بيدخل ومعاه كوبايه الشاى ومبيرداش يبدء غير لما يخلصها
تدخل "ماجد": فاكرين لما حطيناله فيها ملح
_وبطنه وجعته ولما عرف اننا عملنا كده طردنا من حصته لمده شهر
_ واحنا مقضينها لعب فى الملعب مع البنات ..
_ ولا استدعاء ولى الامر
_ فاكر استاذه عفاف ...
استكملوا حوارهم وحديث عن ذكرياتهم وسط ضحكاتهم استأذن "ماجد" لمكالمه هاتفيه ورجع :
_ قولى اخبارك ايه يا ياسر ؟
_ يعنى مركز اخبار الشرق الاوسط مقالش ليك ..؟
ضحكك "ماجد":لا مقولتش حاجه بصراحه الافضل كل واحد يحكى عن خيبته بنفسه لانى زهقت منكم
_عارف يا "طارق" اتنين كان لازم يشتغلو فى اذاعه الشرق الاويط "ماجد" و "صبا" الاتنين الفضول بيقتلهم بطريقه بشعه مبيسكتوش غير لما يعرفوا الحاجه ويقرروك ويفضحوك ..
ضحك "طارق واتكلم "ماجد": شوفت بقى تنازلت المرادى ومعاك المايك اتفضل ؟
وقتها الموبيل رن : اسيبكم انا فى مشوار نص ساعه كده وراجعلكم ..!
_ رايح فين ؟
_ مشوار انساني كده .!
بيغمزله "ياسر": انساني ..؟
_ ايوه حاله ملحة محتاجه تدخل فى الحال ولا هيحصل انهيار ..
"طارق" مش فاهم حاجه : فى حد تعبان انا ممكن اساعدك ..؟
مسكه "ياسر" من ايده : لا يا دكتور دا كله الا حالات "ميجو" هو الوحيد اللى بيقدر يلحقها .. يلا متتاخرش وربنا يقدرك ع فعل الخير ..
_ حبيبى يا معذب يافهمني .. مش هتاخر ومنها فضيتلكم الساحه يلا مش هتاخر عليك يا "طارق"
مشى "ماجد":
_ هو ايه اللى بيحصل مش فاهم حاجه ؟
_ لالا متركزش هتفهم مش انت اجازتك طويله هتفهم وهتتفرج لغايه ما تزهق ..
اتكلموا شويا واتكلم "طارق ": ايه اللى سمعته دا يا "ياسر" اخر حاجه اتوقعها انك ترتبط ب "منة" لا وتتجوزو كمان .. دا انت كنت بتتهرب منها وع طول بتتريق عليها واحنا صغيرين ..
ابتسم "ياسر": ماهى الدنيا كده بتغير الحال يا تخليه ل الاحسن يا ل الاسوء ...
لاحظ "طارق" نبره حزن فى صوت "ياسر : ايه الحزن دا ؟
_ لا مفيش ..
_ طيب اححكيلي كده اتطورت علاقتك ب "منة" ازاى كده ..؟
ابتدا "ياسر" يحكي ل "طارق" حكايته مع "منة " :
_ انا مش عارف الحكايه بدأت من أمتي بالظبط ,,لكن زى ماانت عارف قبل ما تسافر كنا كلنا مع بعض ,, وحتى بعد ما سافرت كنا مع بعض فى كل مكان ومناسبه ,,دخلت الجامعه وكانت معايا "منة" فكان يعتبر مع بعض 24 ساعه ب اعتبار انها قريبتى من ناحيه بابا زى ماانت عارف ف النهار فى الجامعه وبليل عندهم او عندنا او مع باقى المجموعه ..فى الجامعه اتعرفت ع بنت وحبيتها وارتبطنا مع بعض وكانت "منة" موجوده وكانت علاقتنا صحاب وكانت بتشجعني اكمل فى علاقتي مع البنت كانت السند والملجا وقت الضيق والامان ودايما بتطمني .. استمريت فى علاقتي مع البنت اللى حبتها 4 سنين وفى اخر سنه فى الجامعه البنت اللى بحبها اتقدملها شخص جاهز وهيسافر بيها بره مصر اهلها وافقوا وهى كمان ,, مريت بفتره نفسية صعبه جدااا كانت "منة" معايا وجنبى طول الوقت ساندتني ومسكت ايدي و مريت بالتجربة دى .. بعدها زادت علاقتنا اكتر حسيت انى محتاجها طول الوقت والوحيده اللى بفكر فيها طول الوقت فعرضت عليها نرتبط اتفاجئت بموافقتها ودا شجعني وارتبطنا واتخطبنا واهلى سابولى الشقه وضبتها واتجوزنا ,,,
_ طيب كويس فين المشكله ..؟
_ المشكله بعد الجواز ,, انا مقدرتش احافظ عليها ولا ع الوعد اللى وعدتها به ولا ع ارتباطنا ونسيت انها انسانة وعندها قدر من التحمل وانا كنت بضغط بضغط لغايه ما انفجرت ..!
لاحظ "طارق" ملامح "ياسر": انت لسه بتحبها ؟
_ انا اكتشفت انا مش عاوز غيرها فى الدنيا لكن بعد ما سبتها ..
_ وهى ..؟
_ هى بتحبني لكن رافضة نرجع تاني الوجع اللى عيشتهولها مكنش سهل
_ لدرجه دى ..دا انت بتتعذب ..!
_ استاهل العذاب دا ..
_ طيب ما فكرتش ترجعوا تاني بما انك حاسس بالندم اكيد فى فرصه ..
_ هى رافضة اى فرصه لان فرصي ضيعتها ..
_ وعلاقتكم ايه دلواقتي ؟
_ اصحاب ,, محبتش اخسرها كصديقه ع الاقل اقدر اشوفها واتكلم معاها ..
فى شخص نده ع "ياسر" استجمع شتاته : راجعلك ..
_ ايه اللى حصلهم دا والتغييرات دى فى حياتهم ..؟
رجع "ماجد" وقعد: اخبار الحاله الانسانية ايه ؟
_ متقلقش يا دكتور اتراضت وكل حاجه زالفل
_ هى ايه بقى الحاله الانسانيه ؟
قعد "ياسر": انت طيب اوى يا دكتور ..
غمز "ماجد" ل "طارق": لما تكبر هبقي اقولك يا دكتور ..
_ واضح ان حاجات كتير اتغيرت فى 17 سنه اللى كنت غايب فيهم ..؟
ضحك "ماجد": يا فندم ياما لسه هتشوف انبهارات مش قولتلك متتفاجئش ..!
_ واضح ان المفاجاءات بدءت ..!
_ المهم اعمل حسابك اخر الاسبوع عيد ميلاد " جاسمين" وياريت دكتور "عثمان" يجى معاك و "هدير" خلينا نتعرف عليها ..
_ اكيد ... هيكونوا الباقيين موجودين "منة و جهاد وصبا " ؟
_ طبعااا .. هو ينفع ميحضروش داانا اعملهم بلونات وافرقع فيهم
تذكر "طارق" ذكرى : فاكر لما كنا بنروح اعياد الميلاد وبنفضل نفرقع البلاليين وبنستخبي
_ ويفضلوا يدورو ع مين اللى بيفرقعهم ميعرفوش
_وينفخوا تانى واحنا نفرقعهم
استكملوا استرجاع ذكرياتهم وضحكهم واتفقوا يتقابلو يوم عيد الميلاد بعد اسبوع وفى خلال الاسبوع استمرت لقاءات "ماجد" و"ياسر" و"طارق" ...ويوميا كان "طارق" بيتكلم مع "هدير" بيحكلها يومه كان ازاى وعمل ايه وبيحكيلها عن "ماجد وياسر وحكايتهم ...!

يوم عيد ميلاد "جاسمين" ابنه "ماجد"اتجه "طارق" للمستشفى وقابل "هدير" :
_ ها جاهزه ؟
_ جدااا .. بس مش عارفة ليه قلقانه هو انا لازم اروح ..؟
_ اولا انتى معايا ,,ثانيا انتي معايا ..ثالثا مش انتى قولتى عاوزه تشوفى اصحابى وهما قالولى هات اللى انت عاوزه وانا عاوزك معايا .. فى بعد كده ..
ابتسمت "هدير": وانا مش عاوزة غير كدة اكون معاك ..
مد ايده : يلا علشان نلحق نشترى هدايا ..
_ يلا بينا ...
وصل "طارق" و "هدير" لمكان العيد الميلاد واستقبلهم "ماجد" :
_ ع مواعيدك دايما ..
_ طبعا ..
نظر "ماجد" ل "هدير": اكيد انتى "هدير" اقصد الدكتوره "هدير " صح ؟
ابتسمت "هدير": ايوه وانت "ماجد" الدنجوان ..!
ضحك "ماجد": لدرجه دى صيتى مسمع للزمالك ..
ضحكت"هدير":"طارق" دايما كان بيتكلم عنك وعن "ياسر ومنه وجهاد وصبا وغدير وطنط فونا واونكل وليم و.
_ يااااااه كل دا ..
_ "طارق" مهما قابل اصحاب دايما يحكى ع ذكرياته معاكم ومواقفكم مع بعض وانا حفظتهم لدرجة انا حاسة انى اعرفكم من زمان ..
_ الله .. دا كده انتى عارفه كل فضايحنا ..؟
_ كلها ...
_ مشكريين يا دكتور ع التسييح
ضحكت "هدير" وبصوت واطي : متقلقش مفيش غيرى يعرف ..
وطي"ماجد" صوته: يعنى امان ..
_ امان
ضحكك "طارق ": ع اساس انك ساتر نفسك دلواقتى ..؟
_ احم احم .. اعمل ايه جاذبيتى لا تقاوم
_ بطل فشر بقى ..انت واقف فى حفله عيد ميلاد بنتك
ضحك"ماجد":اعمل ايه مبقدرش اقاوم البنات الحلويين
ضحكت "هدير" وكمل "ماجد" كلامه: بجد فرصه سعيده يا "دكتور هدير" ولا نمشيها "هدير"
_ هدير .. دا لو ينفع تعتبرنى زى "طارق"
شاف "طارق" ماسك ايد "هدير" وغمز ل "طارق": طبعااا .. حبايب اصحابنا حبايبنا واصحابنا
قربت منهم "اميره" وملامحها غاضبه : "ماجد" انت هنا وسايبنى لوحدى مع الناس و ..
_ اميره .. اهدى "طارق" و "هدير" بنت صديق "دكتور عثمان" وصديقه "طارق" ..
_ "طارق" سورى مااخدتش بالى .. صاحبك سايبنى وسط الناس وواقف هنا بره مقضيها رغي ..
_ اقف اعمل ايه مش قرايبك ومعارفك اقف اعمل ايه ماانا سلمت عليهم خلاص هى شغلانه
_ اقف معاهم ورحب بيهم دا عيد ميلاد بنتك مش بنتي لوحدى ..!
_ خلاص يا "اميره" ارجوكى بلاش نبدء بدرى ونعدى اليوم ع خير ,,اجليه لما نرجع البيت .. تعالى يا "طارق" اتفضلى يا "هدير" .. "ياسر" جوه و "صبا" و "منة و جهاد" فى الطريق .. ..
وهما داخلين قرب "ماجد" من "هدير ": اسمعي نصيحه مجرب لو بتفكرى فى الجواز متتجوزيش
ضحكت "هدير" ودخلوا .. "ياسر" كان قاعد ع ترابيزه قرب منه "طارق" و "هدير":
_ ياسر ..
_ "طارق.. اكيد "هدير"
_ ايوه .. وانت ياسر ..
_ اهلا بيكي نورتي المكان ..
_ ميرسي ,,
_ فين "صبا" "ماجد" قالى انها هنا ..
بيبص حواليه .. كانت معايا من شويا تلاقيها راحت البوفية ..شوف المكان اللى فيه الاكل هتلاقيها فيه ..
_ اها ..
شويا وقربت "صبا" منهم ومعاها طبق فيه سناكس وبيتزا وباصه للطبق :
_ "ياسر" جرب البيتزا دى خراااااافة (شافت "طارق" باصصلها ومبتسم ) وب ابتسامه :
_ طارق .. انت طارق ,, يا هلاااا
ابتسم "طارق": "صبا" ..ازيك ..
_ حمد الله ع السلامة يا دكتور .. ازيك يا "طارق" اخيرا افتكرتنا ..؟
_ دايما ع بالي يا "صبا" بس ظروف الدنيا ..
_ انت هتقولي الظروف بتفروم ولا اللحمه المفرومه
ضحك"ياسر": انتي شيلتي كل البيتزا اللى فى البوفية وجيتي ..؟
_ كنت بدوق .. بشوف "ميجو" جاب زى ماقولتله ولا لا .. دوقوا يا جماعه طعمها خراااافه ..
_ ضحك"طارق" والموجودين " اتغيرتي يا "صبا" ..؟
_ قصدك كعبرت لا دا كيرفي ..
ضحكوا الكل : والله كان لك وحشه دايما فى سيرتك
_ وانتم دايما ع بالى .. عامله ايه انتي ؟
_ الحمد الله زالفل .. (بصت ع "هدير")
_ اه .. "هدير" بنت صديق دكتور "عثمان" ومن اقرب اصدقائي اللى كانت دايما معايا بعد ما سافرت
_ اهااا .. البديل يعنى ماشى علشان كده غبت 17 سنه .. اوكيه اوكيه
تدخلت "هدير " لالا خالص .. "طارق" عمره ما نسيكم ودايما ع باله ..!
_ انتي اتخضيتي كده ليه انا بهزر .. لا اتعودى ع كده مبحبش انا القمص والزعل واصحح كلامي
ضحك"طارق" : زى ما انتى كلامك طوب بيترمي ..!
اتكلم "ياسر": لا بقى فى تطور بقى دبش ومسلح
اتكلمت "صبا": احنا قلبنا القاعده مونه كده ليه .. ايه رايك فى مصر بعد الغيبه دى يا "طارق"..؟
_ اتغيرت كتير زحمه جدااا بس ونس
_ انا مبنزلش القاهره غير اسبوع وبتخنق من الزحمه
_ "ماجد" قالى انك قاعده فى شرم الشيخ ..؟
_ يعنى شويا هناك وشويا فى الغردقه ودهب وشويا بره مصر يعنى ع حسب شغلى بس الاغلب فى الغردقة فى الفندق هناك ,, اكيد هتيجي فى يوم معاهم ونقضي يومين مع بعض هناك نتسرمح ...
_ اكيد .. وانتى شغلك ايه ؟
_ اممم .. علاقات عامه واوقات مرشده سياحيه يعنى ع حسب المطلوب مني
_ انتى خلصتى جامعه ايه سياحه ؟
_ لا خالص انا مخلصه معهد سكرتاريه هو سنتين لكن انا اخدتها فى 4 بمجهودي ..
ضحكوا : وايه وصلك ل الغردقه ..؟
_ لا ماهو انا ابتديت السلم من الاول هاوس كلين وشويا فى الريسبشن وشويا فى المطاعم وكورس ارشاد سياحي مع لغه واشتغلت فى شركة سياحة وشويا فى الفندق وهكذا يعني ..
_ المهم تكون بتشتغلى حاجه حبها ..
_ مستريحة ومبسوطه الحمد الله ..
لاحظ "طارق" سكوت "ياسر" ومراقبته لباب :
_ مالك يا "ياسر " بتدور ع حد ولا ايه ؟
اتكلمت "صبا": "قيس" فى انتظار "ليلي"
_ ليلي ..؟
_ ايه دا انت متعرفش ولا ايه ؟! ايه دا "ميجو" مش قايم بالوظيفة صح فى غيابي كده مينفعش خالص ..
رد "ياسر": بس يا "صبار " ..
_ تخيل كده انها مجتش ياااااه ..
_ لا جاية واطلعي منها ,,
ادخل "طارق": بتتكلمو ع مين ؟
_ .. "منة" ؟
_ اها ..
_ بطلى رخامه وقومي شوفي حاجه تاكلى فيها الطبق خلص ..!
_ تصدق صح .. حد عاوز حاجه معايا .. تعالى معايا يا "هدير" البوفية هنا تحفه ومنها نتعرف اثناء تذوق الاصناف المختلفه ومنها هقرر هينفع نبقي اصحاب ولا هطردك بره النادي ..
_ لا شكرا ..
شدتها من ايديها : لا مبحبش شكرا وميرسي قولتلك يلا ..
قامت "صبا" و "هدير":
_ انت مستني "منة" بجد ؟
_ لا عادى يعنى ..
_ عينك كل شويا ع الباب والساعه زى مستنى حد ,,؟
بعد تفكير ثواني رد "ياسر" : "جهاد" .. مستنى "جهاد" كلمتنى وقالت انها جايه فرحت اوى بقالي فترة مشفتهاش و بماانك نزلت اجازه ومتجمعين فكانت متلهفه اوى ومعاها البنتين فبتكون مدربكه وكده
_ اها ... بس" جهاد" اتصلت ب "ماجد" وقالتله هتيجى كمان نص ساعه و "منة" معاها هيجوا مع بعض ,,,
_ طيب كويس

استمرت عين "ياسر " ع الباب لوقت ظهور دخول "منة" وفجاءه : جت .. "منة" جت
لاحظ "طارق" تغيير ملامح "ياسر" وابتسامته وقربت منهم "منة" ومعاها "ماجد":
_ بما انك شوفت "صبا" وهى حاليا بتفترس البوفية ااقدملك "منة" باللوك الجديد بعد الطلاق .. اعرفك يا "منه" دكتور "طارق" (بص ل "ياسر") طبعا مش هعرفك دا طليقك سابقا والمعذب حاليا ..
_ رخم ..
ابتسمت "منة " وسلمت ع "طارق" وقعدت وبعد سلامات :
_ متغيرتيش يا "منة" ..؟
ابتسمت "منه": لا ازاى اتغيرت كتير ولا انت لسه شايفنى البنت ام نضاره كعب كوبايه ؟
_ يااااه ... عارفه يا "هدير" كانت كل ما تمشى ...
كملت"هدير": كانت تتكعبل وتقعى وكتير كنتى بتتعورى
ضحكت "منة": ايه دا انتى عارفه الحكايه ؟
_ "طارق" ع طول معندوش سيره غيركم ..!
_يارب دايما بخير ولا بالفضايح ..؟
_ بكل حاجه ..!
ضحكك"ماجد": بسلاطتنا ببابا غنوجنا
ضحكوا :لكن يا "طارق" اتغيرت كتير نضاره وطول ووسامه اكتر
ادخل "ماجد": لا كده انتى داخله ع تقيل يا "منة"
_ وفيها ايه ماانا سينجل ,,"طارق" انت مرتبط ؟؟
رد "ماجد" : لا لا دا انتي جايه ع السخان ,, راعي ان فى ناس هنا بتغيير (غمز اتجاة ياسر )
ضحك "ياسر": وماله.. دا يا بخته وانا مستعد اكون شاهد اول ...
_ لا لا يا "طارق"اوعي اياك ياابنى دى معذبه الواد اللى جنبك دا شايف عامل ازاى من وقت ما جت
اتوتر "ياسر": ايه اللى بتقوله دا ..؟
ادخلت "صبا": بيقول ايه بيقول الحقيقه .. من بعد طلاقكم وانت متشحطط وراها وهى مطنشاك وانت مش عاوز تستسلم ,, بيقولوا انهم اصحاب وهما قال ايه اصحاب .. لو عاوز يا "طارق" تكون "ياسر" نمبر 2 يلا مبروك عليكم
ضحك "ماجد": الله ع لسانك يا"صبار" دبش
_ هو انا عكيت ولا ايه ؟
لاحظت تغيير ملامح "ياسر" و"منه": لا باين انى خربتها انا قايمه اجيب حاجه اشربها
_ "ياسر" فك كده انت عارف "صبا" بتهزر
_ لا ياعم عادى .. ماهى مكدبتش فى حاجه
_ لا انتم فى عيد ميلاد "جاسمين " متقبلهوش نكد لطردكم
ندهت "اميره" ع "ماجد": مش قولتلكم النكد جى جى .. جايلك يا قدرى
لاحظ "طارق" نظرات "ياسر" و"منه" وكلامهم مع بعض الطبيعي وحضرت "جهاد" واجتمعوا يتكلموا مع بعض ,, خلصوا العيد الميلاد و "ياسر" اتحرك مع "منه وجهاد وبناتها واتحركت "هدير" و "طارق" :
_ اليوم كان جميل اوى بجد ,,
_ انبسطتي
_ جداااا .. طلعوا زى ما كنت بتحكيلى بالظبط انا قاعده معاهم وحاسة انى اعرفهم من زمان
_ انا مبسوط لانك انبسطتى ..
_ و "صبا" عليها خفه دم فظيعه مبطلتش تتريق ع كل الناس ..انا بطني وجعتني من الضحك والاكل معاها مسبتش حاجة فى البوفيه غير انها تدوقه وتدوقني معاها و "ماجد" بجد دمه زى العسل ..
_ هما الاتنين من زمان اصلا كانو زى التؤام بيعملوا مقالب ويتريقوا ويضحكوا طول الوقت ..
_ بس فى حاجه غريبة "منة" و"ياسر" بيتعاملوا عادي ضحك وهزار اتنين صحاب مش مطلقيين خالص غير اللى انت قولتلي عليه ان "ياسر" لسه بيحبها وهى
_ اها انا لاحظت كده زيك
_ هو ممكن فعلا اتقبلوا فكره الاصحاب ونسوا حبهم وفترة زواجهم ..دول مكنوش اتنين مطلقيين ...؟
_ ما دا اللى استغربته كلامي مع "ياسر" حسيت انه بيحب "منة" لسه لكن مش هينفع يرجعوا .. وتعاملهم مع بعض انهاردة كان طبيعي اتنين اصحاب ..
_ انت قولتلي ان "ياسر" حب "منة" الاول صح ..؟
_ ايوة ماجد وياسر قالولي كدة هى لا حبت ولا ارتبطت غير ب "ياسر" ..!
_ انا ملاحظتش عليها اى حاجه كانت عادية جداا .. هى ممكن تكون نسيت فعلا ..
_ انا مسمعتش منها زى ما سمعت منه علشان احكم ..
_ بس هما مع بعض ليقيين اوى مع بعض ,,حتى الاكل عجبني اوى تصرفه معاها هو عارف انها مبتحبش البصل وشاله من طبقها والحاجه الساقعه بدلولها لبعض علشان هو بيحب البيبسي ..
_ هشوف ...
سكت "طارق" واتنهد : اكيد كنت تتمنى "غدير" تكون موجوده معاكم ..
_ ابقى كداب لو قولتلك لا .. فعلا واحنا مع بعض اتمنيت تكون موجوده وسطينا ..
_ ان شاء الله توصلها قريب
_ ان شاء الله ...
وصلوا الفندق وكان دكتور "عزت" مع دكتور "عثمان" فى انتظارهم :
_ حمد الله ع سلامتكم .. كان حلو عيد الميلاد ..؟
_ جدااا يا بابا اصحاب "طارق" طلعوا احلى عن حكاياته هو فاشل فى الحكايات اصلا
ضحك "عثمان": لانه بيحب يعيش الواقع ..احكولنا ايه حصل هناك ..
قعدت "هدير" تحكي بحماس ع كل اللى حصل وع "ماجد وياسر ومنة وصبا والاكل والضحك وكل حاجة ..
_ كويس واضح انكم انبسطتوا ..
_ جداا يا دكتور "عثمان" .. بس استغربت من حاجة انا و "طارق"
_ ايه هي ..؟
_ علاقة "ياسر" و"منة" الكلام اللى سمعه "طارق" انهم عاشوا قصه حب كبيرة وكان "ياسر" اول حب فى حياة "منة" والانفصال كان بصعوبه ومرو بفترة سيئه كلها وجع .. و "طارق" قالي ان "ياسر" لسه بيحبها ..
_ فين المشكله؟
_ المشكله يا دكتور عثمان" انهم اتعاملو عادي لا اتجنبوا بعض ولا عاملو بعض بقسوة كانوا عاديين اتنين اصحاب قاعدين .. هو ممكن تكون "منة" نسيت "ياسر" ع رغم انه حبها الاول والحب الاول مبيتنسيش ..؟
ابتسم "دكتور عثمان" : الحب الاول .. عارفين يعني ايه الحب الاول ؟
ردت "هدير" : الحب الاول هو اللى مبيتنساش ولا بيتكرر ,, هو مشاعر الحب الصادقه هو اول حب بيحصل فى حياتنا ..!
_ أسطوره الحب الاول الحب اللى لا ينسي ولا يتكرر فى العمر,, مشاعر الحب الصادقه ايوه هو كده فعلا دا اكيد لكن هل الحب الاول يعني الاول فى عدده ؟! الاول فى حدوثه ؟ معتقدش ..
_ ليه ..؟
_ لان الحب الاول هو الحب اللى بينسيك الالم ويزرع جواك الامل ,, اللى يخليك تغني وترقص زى اللى فى الافلام تحت المطر وميهمكش وجود البشر ,, يخليك تطير فى السما زى فى الاحلام ,, هو اللى الازمات فى
وجوده بتهون وليها حلول ,, هو الامان ,, هو العوض من الالم هو الحب اللى بيدفعك للجنون والشقاوة والمغامرة ,, هو الحب اللى متكتملش انت غير بوجوده ,,هو الحب اللى متستغناش عنه ولا يستغني عنك حتي بعد الموت مبيتنساش ,, اللى خانك مش حبك الاول ,, اللى جرحك مش حبك الاول ,,اللى خلااك حزين وغير سعيد وقتلك وانت عايش مش حبك الاول .. لان الاول هو اللى بيصونك فى عز وجعك وشافك لما كنت ولا حاجة .. هو دا الحب الاول اللى مبيتنساش ولا بيتكرر فى العمر ..!
ابتسم دكتور "عزت": سألتي السؤال الصح ل الشخص الصح يا "هدير" ,, "عثمان" حكي عن تجربه شخصية عن حبه ل "صفاء" لوقتنا هذا لما بيتكلم عنها بشوف لمعة عينه بشغف الحب نفسها من اكتر من 30 سنه ...
ابتسم "طارق" وابتسمت "هدير" وخرجوا يتمشوا :
_ انا بحسدك يا "طارق" ع دكتور "عثمان"
_ انا اللى بحسد نفسي عليه,,
اتكلموا شويا ومشيت "هدير" ...!

استمرت لقاء "طارق" مع "ماجد" "وياسر واتفقوا ع يوم يتجمعوا كلهم مع بعض قبل ما تسافر "صبا " ع الغدا عزمهم "طارق" ,,قبل مقابلتهم ب 4 ايام اتصل "ماجد"ب "طارق" وكان فى انتظاره فى الفندق :

_ مالك يا "ماجد" فى حاجه ولا ايه قولت عاوزنى فى حاجه مهمه ..خير ؟
_ بصراحه هى خدمه عاوزها منك .. بنت صديق ليا فى الشغل بتعمل تصرفات غريبه وامها رافضه توديها لدكتور نفسى ففكرت فيك تشوفها ولو فعلا محتاجه علاج تقولها وتقنع والدتها ...
_ اكيد .. امتى ؟
_ دلواقتى حالا هو فى البيت مستنينا ؟
يلا بينا ...
اتجه "طارق" و"ماجد" لبيت زميل "ماجد" ,, :
_ "كامل "| اعرفك ب "طارق" صديق عمرى ودكتور فى الطب النفسى هيشوف "منى " وهيقولنا ايه الحكايه ونساعدها ازاى ..
بملامح قلق وزعر : شكرا جدا يا "ماجد"هتعبكم معايا ..
_ مفيش تعب ممكن اشوفها ...
دخل "طارق" الغرفه وكانت فتاه عمرها 25 سنه قاعده ع الارض ووشها متجرح وماسكه فى خصلات شعرها بتشدها وحواليها شعر كتير حواليها دخل "طارق" لوحده فى هدوء وجلس بجوارها ع الارض ,, اولا تجنبته وظهرت عليها ملامح الهلع والخوف بهدؤء اداها حقنه مهدئه وبعد مرور ساعتين حاول يتكلم معاها "طارق " ليشعرها بالاطمئناينه وتتكلم معاها مطولش كتير ونامت وطلب يزورها تانى يوم وفعلا اتجه للبيت مع "ماجد",, و اتكلمت مع "خالد" واتكلم معاها لغايه ما فتح الموضوع معاها :
_ ممكن توصفيلى احساسك قبل وبعد ما بتجرحى وشك وتشدى خصلات شعرك كده ؟
_ من الصعب اوصفلك بحس ب ايه قبل ما ايدى بتتمد ع راسى وامسك شعرى ,, بحس بحاله من القهر مبقدرش اسيطر عليها ,, بحس بحاجه بترفع ايدى ع راسى وامسك شعرى بتردد وفى لحظه بتمسك بالخصله اكتر ..بحس بخصله شعرى بستنجد بيا بتطلب منى اشدها انقذها وقتها مبحسش ب اى حاجه وبدون احساس اشد شعرى شعره شعره من غير ما اتوقف وامسك الشعره افردها قدامى بحس براحه بحس اني انقذتها من معاناتها ..
_ بتوقفى امتى ..؟
_ لما بحس براحه بعد ما بشد كميه من شعرى او لما احس بوجع فى المنطقه اللى شديت فيها شعرى مره واحده ,,,
_ مبتخافيش انك كده هتخسرى شعرك بالطريقه دى ؟
_ لا ..
_ ولا ان حد يلاحظ ويقولك تعليق ع شعرك ؟
_ انا مبخرجش من البيت ولما بخرج انا بخرج من البيت بلبس طرحه وفى البيت ع طول ع راسي طرحه ..
_ مجربتيش تقاوميها تمنعى نفسك يعنى ؟
_ لو قاومتها بحس بقلق وغيظ وببدء فى تجريح وشى بضوافرى ومبهداش غير لما احس بوجع فى راسى بعد ما بشد اكبر كميه من شعرى ... انا مبعرفش اقرا ولا اكتب غير وصوابعى ماسكه فى خصلات شعرى ..حتى قبل ما انام ولما بكون لوحدى ولما بسرح ولما بضايق من حد ولما حاجه تزعلنى مبسكتش غير لما بابا ينبهني ...
_ انا سمعت انك كنتي متجوزه ؟
_ ايوه .
_ احكيلى عن تجربتك فى الجواز ؟
_ انا اتجوزت واحد وانا معرفهوش رغم انه عارفنى ,, حبيته واتعلقت به لكن بعد فتره اتغير بقيت احس بالرعب لما بيضايق منى ,,دايما كان بيهددني انه هيسيبنى,, هيسيبنى لوحدى ومش هيرجع ,,كان دايما مشغول بعيد عنى ولما بنكون مع بعض بيكون بعيد عنى متحفظ فى كلامه وتصرفاته معايا .. بكون فرحانه لمقابلته لكن كان بيقابلني ببرود كنت عايشه فى خوف انه مبقاش بيحبنى زى الاول ,,عشت فى قلق مستمر فى كل مره اكون معاه ولما بيسيبنى ويمشى.. بيمتلكني خوف ورعب انه مش هيرجع وهينفذ تهديده فعلا ويسيبني وقتها بكره كل حاجه حواليا وبكون عصبيه جدااا لدرجه ان مفيش حد بيقرب منى وبيبعدوا.. من غير ما احس امتلككتنى رغبه شديده ب ضوافري احركها فى وشى ومع الوقت زاد وابص لصوابعى اشوف دم فتزيد رغبتى اخربش وشى اكتر,,

_ ولما بيرجع بتحسي ب ايه ..؟
_ لما بيرجع واشوفه قدامي كنت بحاول امنع نفسى علشان يشوفنى جميله لكن مقابلته البارده كانت بتوصلنى ل اكتئاب وابدء فى خربشه وشى من غير ما بحس ودا كان بيحصل كل ما بيسيبنى ويمشى لغايه ما يرجع وابدء من جديد ... لغايه ما فعلا نفذ تهديده وسابني طلقنى وجيت هنا ...
_ تفتكرى طفولتك .. احكيلى عنها اللى فاكراه ..؟
_ انا ليا اخت اصغر منى ب 3 سنين مش فاكره من طفولتنا غير انه من صغرنا واحنا شايفين بابا وماما بيتخانقوا كتير واوقات كان بابا بيضرب ماما قدامنا وبيهددها انه هيسيبها ومش هيرجع ولما بيسيبها وتمشى كانت بتضربنا احنا وتقولنا احنا السبب فى استمرارها معاه ,,اوقات كنا بنحس اننا السبب فى ضربه ليها وكانت بتدعى علينا نموت علشان ترتاح واوقات لما واحده فينا تغلط غلطه بسيطه كسرت كوبايه كان بابا بيزعقلنا وكان بيضربنا وبيتخانق مع ماما ,, انفصلوا فتره وعشنا فى بيت جددتى انا واختى لكن عمى وعمتى كانوا بيزعقولنا ع اى حاجه ,,غير مسموح نخرج من الاوضه .. غير مسموح نطلب ,,مطلوب مننا نعم وحاضر حتى لو مش عاوزين,, بعد فتره بابا وماما رجعوا لبعض وكنت فى الثانويه العامه لكن متغيروش وكانوا زى ماهما خناقات خناقات واول ما يتخانقوا اخد اختى وندخل الاوضه ونحاول منسمعش خناقتهم كنت بحاول معيطش اطمن اختي علشان متخفش رغم بكون فى رعب من صوتهم ,,, فى الجامعه اتقدملى خال زميلتي وافقت ع طول واتجوزت وحصل الل حكيته لغايه ما اطلقت ورجعت هنا واختى كمان اتجوزت ومسافره وهى متفرقش عنى فى حاجه غير ان جوزها لسه مسبهاش وانا حاليا عايشه مع بابا وماما ,,,
_ هما لسه بيتخانقوا وبيضربوكى ؟
_ الخناق دا بقى الطبيعى لكن ضربى مش عارفه لانه لو حصل مش فاكراه ...
استمر مرور "طارق" وحديثه مع "منى" لمده 3 ايام متتاليه وكان طلب فحوصات ليها بدانيا وفى اليوم ال 4 خرج من غرفتها بعد ما نامت من المهدي ,,مسك التقارير الطبيه ل "منى " ووالدها فى حاله قلق :
_ طمنى يا دكتور ..؟
_ الفحوصات تؤكد انها بدانيا مفيش اى مشاكل غير بسيطة سهل معالجتها وتتعالج فى فتره قصيره ان شاء الله لكن مشاكلتها النفسية هتاخد وقت اكبر لانها عندها مشكله نفسيه وانتم اتاخرتو جداا فى عرضها لطبيب نفسي يساعدها ...
_ مش فاهم .
_ حاله "منى" تعتبر صوره من صور ايذاء الذات .. الانسان بيوجه عداء لنفسه .. بيكره نفسه فبيحصل عدوان على جسمه بتشويها ب استعمال ايده بتجريحها بضوافره لغايه ما يجيب دم وبتعمل علامات مبتختفيش ... ولما ايده بتمتد ع شعره ويشده من جذوره مسبب فراغات فى الراس ,, او يقضم ضوافر ايده لغايه ما تنزل دم وهو مش حاسس لسرحانة وع قد عنفه ضد نفسة ل اعتراضة وتهجمه ع اللى حواليه ع قد تعامله مع جسمة وتشويهها ,, "منى" 25 سنه البنات اللى فى عمرها بيهتموا بشكلهم وبشرتهم وشعرهم بيحبوا يكونوا فى اجمل شكل ..فى بنات لو ظهرت حبايه فى وشها بتعيش فى اكتئاب لغايه ما تختفى ,,, لكن "منى" بتتعمد تشوه نفسها شعرها ووشها ,,, بعض المرضى بيشيلو شعر الحاجب او الرموش او الشنب متعمديين ,, الحاله دى بتصيب الاغلب الاطفال وفى الطب النفسى بيشوف ان دا عدوان الطفل تجاه نفسه بيكون عدوان موجه الى الام والاب لاهمالهم له وممكن يشد شعر طفل تانى وبيكون عنده بدايه الساديه متعه فى اذيه الغير ,,, بعض اللى بيشيلو شعرهم ويشدوه شايفين ان دا بيحققلهم لذه نتيجه الالم اللى بيكون نتيجه صراعات بيعانوا منها من الطفوله لما اتعرضت مشاعره ل الاذية واهمال اللى حواليه واقرب الناس له وقسوتهم وعدم حبهم له ,, هو بيكون محتاج انه يلاقى حب,, حب غير مشروط ودا بيكون فى صوره اهتمام وترحيب بوجوده فى الدنيا وضرورى ان دا يحصل ب استمرار علشان يتاكد ان امه او ابوه بيحبوه فعلا ,, وقتها بيحس بالامان والطمانينه فبيبادلهم الحب ومشاعره وبتكون العلاقه عباره عن تبادل مشاعر وحب بين الام والاب وطفلهم وهنا بيحس بوجوده واستقراره النفسي لان الحب اللى استقبله منه معناه انه مش هيتعرض ل الاذيه ولا هتنجرح مشاعره وبكده مش هياخد موقف دفاعى ل احساسه بالتهديد المستمر ,,
_ كل دا من اهمال ؟
_ اذا تعرض الطفل ل الاهمال العاطفى وجرحت مشاعره بيحس بالتهديد طول حياته من كل الناس وبكده تلقائى بيدافع ب استمرار عن نفسه بتتولد مشاعر الكره ورغبه فى تحطيم اللى حواليه ولانه مبيقدرش بيوجه الكره دا لمعنيين فبيوجهه لنفسه واذيتها بتشويه جسمه ووشه وشد شعره زى "منى" كانه بيقولهم ,, انا تعبت منكم وبعانى بسببكم بسبب اهمالكم وقسوتكم ,,بعاني من جحودكم وجمود عواطفكم اتجاهي ,, سبتونى لوحدى فى البرد اتجمدت خطواتى ومش قادر اتحرك بسببكم ,, ف انجبرت اقعد لوحدى وبقدر كرهى لكم كرهت نفسى وانا اهو بحطم نفسى قدامكم علشان تعرفوا الفظاعه اللى عملتوها فيا .. انا بقسى وبشوه نفسى لكن دا رغبتى المكبوته ع تشويهكم واذيتكم انتم .. بصولى وشوفوا معاناتى بسببكم بصوا ل ايدى ووشى وجسمى والجروح اللى فيها وشعرى اللى بشده وبيقع بسببكم ...هما هنا بيأذو نفسهم لكن دا عباره عن نداء علشان اهتمامكم وعلشان تعاطفكم علشان تحسوا به وتحبوهم ويحبوكم ويعيشوا طبيعى ,,,
_ وعلاجها ازاى ؟
_ هى حاسه ب افتقاد الحب والاهتمام والتهديد الدايم بفقد الحب ,, العلاج هنا يبدا من جذور العميقه لاحتياجات المريض اللى اندفنت .. ندور ع اسباب اللى اختفت واسباب الصراعات اللى عاشها وكبتها .. العلاج بيكون فى اننا نكشف الغطا ونبص جوه جوه اوى ولو هو ساعدنا نبص جواها فدا هيكون بدايه الطريق ... البدايه بتكون فى ان المريض عنده وعى بالاسباب اللى وصلته لكده وانه يكون عارف انه بيعتدى ع نفسه وانه عاش صراعات سببت له انهيار ...ف ندور ع اسباب اللى وصلت حالته توصل لكده والنواقص ونكملها ونحسسه بيها حب ورعايه واهتمام نحسسه بالوجوده والاهمية ,, العلاج بيهدف لتقويه دفاعته ضد القلق والخوف يعنى يكون عنده سيطره ,, سيطره ع خوفه وقلقه ويصفى صراعاته المكبوته ويعيش فى تكيف يشبع احتياجاته وعواطفه ,, ودا بمساعده اقرب الناس له ,,
_ يعنى فى امل ..؟
_ طول مافى محاوله اكيد فى امل ,, "منى" واللى زيها محتاجين اقرب الناس ليهم يحسوا بيهم ويحتوهم بحبهم واهتمامهم ودا مش هيحصل بسرعه لكن مع الوقت لما تتاكد ان قربكم ومشاعركم دا حقيقى لان احساس التخلى والهجر هو اللى مستحوذ عليها والمطلوب اثبات عكس ما اترسخ فى عقلها الباطن ... هى لازم تتابع مع دكتور نفسى هيحددلها جلسات وعلاج ونص الشفا منكم انتم مساعدتكم ليها تحاولو تنسوها الماضى بالحاضر ورغم المستقبل مجهول لكن تطمنوها وتقووها تواجهه وانتو معاها مش لوحدها ...
انهى "طارق" كلامه وخرج مع "ماجد" وماجد فى حاله ذهول :
_ معقول كل دا يعيشه طفل مبيفهمش حاجه ؟
|_ الطفل دا بيكون اول طبقه بيتكون فيها شخصيه وتكوين الانسان ,, اى حاجه بتاثر فيه بيكبر اثارها وبتظهر فى المستقبل لما يكبر ,, علشان كده المهم نهتم ونساعد فى تكوين نفسيه طفل سليمه تقدر تقاوم وتحارب الصراعات اللى هتحصله ودا بيكون باللى احنا دخلناه فيه وقوناه به اهتمامنا وحبنا ,, يعنى مينفعش خناقات قدام اطفال ولا ضربهم التربيه والحياه الكبار بيتعاملوا معاها غلط ,,, الاحتواء والاهتمام والحب دول اهم اساسات تكوين الطفل اهتزت حاجه منهم يبقى البناء مهزوز من اى خبطه بينهار .. والانهيار النفسى صعب تلاحظه غير الجسدى ,, والاثر بيبان لما بيكبر اكتر وبيكون واضح لانه بيكون تراكمات سنين وبيبتدي الانفجار ,, انانية الاهل وتفكيرهم فى نفسهم اللى بيسبق تفكيرهم فى اطفالهم دا اكبر كارثه ,, وقت النقاشات مينفعش تحصل قدام اطفالهم لان اكيد غصب عنهم هينفعلوا ولما الطفل يشوف الحياه اللى بتتكون من ام واب غير مستقره ومهزوزه بتهزه وبتنشأءه طفل كاره الحياه وعدواني ع نفسه وع اللى حواليه ,, لكن اغلب الاهالي تفكريهم ان حد فيهم يكسب الموقف وميهمش اى حاجه ,, رغم انه ممكن يولد احساس بكره اتجاه حد فيهم لعنفه المتكرر الواضح اللى موت الامان والحب وولد خوف وكره والاسوء لما يكون الاتنين ضد الطفل نفسه دا يعني انهياره التام ,,"مني" من تعاملات اهلها وزعقيهم وضربهم والتهديد الدائم ع عدم الاستقرار وانها هتكون لوحدها تراكم معاها سنين حست انها مش عاوزه تكون موجوده ولول ما اتقدملها شخص وافقت من غير ما تتاكد من اختيارها هي افتكرت ان دا طوق نجاة لكن معاملتة مختلفتش من معاملة اهلها وعانت لوحدها وصل لمرحلة الانفجار وظهر عليها الاعتداء ع نفسها بتجريحها وشد شعرها ,,, اللى معاه طفل دا اهم واكبر مشروع انساني بيقدمه للدنيا واللى مبيحافظش عليه اثارة بتكون سيئه وندم ...!
_ "طارق" مش عارف اقولك ايه..شكرا بجد لمساعدتك ؟
_ متقولش<< لكن اتمني ان لو اى اب او ام بيتصرفوا تصرفات غلط قدام اطفالهم ومقصريين فى حقهم معنويا يصلحو الخطا دا ويلحقو نفسهم ويلحقوه.. لان الاثر النفسي بيأثر فى الطفل وبيعيش يعاني عمره كله وبيدمره غير الاكل والشرب والهدوم يقربو منهم ويدمجوا مشاعرهم مع بعض لان اساسا الطفل بيكون تكمل لفراغات فى حياه والدته ووالده والعكس كمان مينفعش نسيب الفراغات فاضية من غير ادماج علشان الصورة تكتمل من غير اندماج الصورة هتكون ناقصة غير مكتملة مشوه .. !
_ معاك حق .. ع ميعادنا بكره
_ اكيد ..
_ همر عليك الساعه 5 تمام
_ وانا هستناك
رجع "ماجد" ع شقته وقبل ما يدخل غرفته اتجهه لغرفه اولاده وبص عليهم و قرب منهم وطبطب عليهم وباسهم ولمده قصيرة نظر اليهم واتنهد تنهيده وخرج ...!

يتبع ....