زهرة التوليب

( 6 )

يوم العزومه مر "ماجد" ع "طارق" فى الفندق وكان فى انتظاره وتوجهوا لمطعم حجز فيه "طارق" ووصلوا وكان "ياسر و"منه"و"جهاد" و"صبا" فى انتظاره :
دخل "ماجد" وكانت "منة" و"جهاد" موجودين بس :
_ ايه دا فين الباقيين ؟
ردت "منة": "ياسر" خرج يدخن سيجاره و "صبا" انت عارف يعني هتكون فين يا بتتكلم فى الموبيل يا ..
رد "ماجد" هبت ع المطبخ ..
لسه بيكمل كلامه رجعت "صبا" ومعاها طبق فيه سناكس :
_ والله انا قولت انك هتفضحينا هنا ,, يابت احنا هنتغدي كلنا مع بعض
_ فى ايه وهو انا بتغدي ,, انا مفطرتش كويس وبعدين حبيت اسلي نفسي بشويا سناكس كده لغاية ما تيجو ..
_ وهو الطبق دا شويا سناكس ..
_ يمكن لما البسه فى وشك تعرف ..
_ لا شكرا ع وضعك كملي كملي .. نطلب الاكل بقي ..
_ تمام ..
_ كنت فين يا "ياسر " ؟
_ كنت بدخن سيجاره بره لغايه ما تيجو ..
سأل "طارق": ليه مبتدخش هنا مافي ناس كتير بتدخن عادي المكان سامح بكده ..؟
_ مينفعش علشان البنات "منة" الدخان بيتعبها و"جهاد" بتتخنق و"صبا" كفاية عليا لسانها مش عاوز اسمع كلمتين منها ..
_ جميل انك بتحترم رغبات غيرك قبل رغبتك وتفكر ينفع كده ولا لا ,,
طلبوا الاكل وقعدوا كلهم يتكلموا :
ابتسم "طارق": مش قادر اوصفلكم قد ايه كنت محتاج القعده دى مفتقدها سنين ..!
"صبا" بنبره ضحكك: طبعا لانى موجوده ,,لما تكون عاوز تنزل اجازه ابقى عرفنى بس اخد اجازتى فى الوقت دا لان من غيري مش هتحس ب اى متعة ..
تدخل "ياسر": اوعي يابت تكوني بتعلقيه ؟
ضحكك "ماجد"ع كلام "ياسر": مين "صبار" استحاله ؟
ضحك "طارق" : ليه يعني وايه "صبار" دى ؟
رد "ماجد": دا دلعها اللى يقربها تشوكه رغم انها ملبن من جوه لكن لو طمع اكتر بتشله وهتعرف ليه احكيله احكيله اخر مقابله ليكى عملتى ايه يا فضحانا ..!
_ والله يا "طارق" ماعملت حاجه انا هحكيلك واحكم انت بالعدل لانهم متهميني انا بص ,, زميل اتنقل جديد معانا فى الشغل بعد فترة طلب يشوفني يتعرف عليا وكده واتوسط ناس يعرفوني ,,انا مليش فى جو نتعرف دا لكن علشان زنهم عليا هنا واللى هناك وافقت وقولت اقابلة بعد الشغل مع اصحابي يعني كلنا مع بعض لكن هو طلب يقابلني لوحدي من غير اصحابي اللى هناك وعلشان اصراره وافقت ,, روحت قابلته قعدنا وفضل ساكت وفضلت ساكته انا كمان ؟
_ مفتحتيش كلام انتي ليه ؟
_ وافتح انا كلام ليه هو اللى عاوز يتعرف مش انا ؟
ضحكك"طارق": لا ردك مقنع ..وعمل ايه ؟
_ اممم قعد يقولى ان الكل بيشكر فيا وفى اخلاقي وانى نشيطه ومجتهده فى شغلي وسألني سؤال عادي جداا وكان لازم ارد بصراحة عليه دا مستقبل بيرسمه ولازم يكون واضح ...
_ سؤال ايه ؟
فلاش باك للمقابله :
_إنتي شخصية إجتماعية ولا لا ؟
_بص أنا بتبسط لما أقرر أتصل بحد أسأل عليه بس لما بيرن بقول يارب ميردش لكن لو رد بفرح بالمكالمة جداا فاهمني ؟
_لا وضحي أكتر ممكن ..؟
_بص أنا بنبسط لما اظبط خروجة مع أصحابي لكن لو اتلغت بفرح جداا بصراحة واقعد لوحدى كده مأنتخه مع نفسي لكن بزعل بقول مش لو كنت خرجت كنت قعدت مع أصحابي شويا ..
..! تمام .. انا هستأذن دلواقتي وفرصة سعيدة _
_ انت لحقت استني هنا متمشيش هزعل بجد أو مش هزعل مش عارفه ..خلاص امشي دلواقتي وانا هبقى أشوف انا حسيت ب ايه ولو افتكرت هبقى ابعتلك .. فرصة سعيدة يمكن هشوف واقولك..
..
دا اللى حصل لما قابلته لوحدنا لما صمم وبعدها مشى ومكلمنيش تاني وبقى يتجنبني لما بيشوفني معرفش ليه هى الصراحة تزعل كده ؟
رد "ماجد": شفت بقي "صبار" ..
_ اعمل ايه هو اللى سأل وانا جاوبته بصراحة يعنى كنت اكدب واتنحنح وبعدين انا كنت طبيعيه هو اللى مكنش طبيعي بيقولى اصحابك بيشكرو فيكي طبيعي هيشكرو يعني وشايفني اغلب وقتي معاهم انا طول الوقت وسط الناس وبيسالني اجتماعيه ولا لا ,,اه اجتماعيه الصبح وبليل تاريخ وجغرافيا هاهاهاهاهاها
ضحكوا كل اللى موجودين واتكلم "ياسر": الحمد الله انه مطولش ل احسن كانت قومته مش عارف نفسه
_ يلا اخد نصيبه هو اللى طلب ونال بقي ..
_انتى فظيعه بجد .
اتكلمت "جهاد":هى فى الطراوة اصلا ,, قولى يا "طارق" بتكسب شغله الدكتور النفسى دى زى البطني والقلب كده ؟
ضحكك "طارق"ورد "ماجد": انتي من كتر ما بتحسبي الفلوس كل حاجه عندك ارقام ارحمي نفسك ..!
_ حياتنا كلها بقت ارقام اعمل ايه؟! .. يعنى كل حاجه عاوزها بفلوس والاسعار بتعلى فلازم نحسبها علشان نعرف نشتريها وطلبات الاولاد والبيت والمعيشه ,, مينفعش نعيشها ع البركه ..!
_ بس بس ..انتى مكانك مش هنا انتى مكانك مع "حزينه" هناك اسكتي بقي ..
رد "طارق" احتراما انها سألته : بالنسبالى شغل طبيب امراض نفسية مبيكسبنيش من الناحيه الماديه لكن بكسب حاجات تانى احسن وبكون محتاجها اكتر من الفلوس ..!
_ زى ايه هدايا ؟
_ هدايا معنويه .. لما اساعد انسان دا مكسب .. لما الحق انسان من طريق بيدمر نفسه فيها دا مكسب ليا .. مساعده الناس دا اكبر مكسب ليا لما يتعالجوا ويعيشوا حياتهم طبيعى ..
_ وعايش ازاى بقى ؟
_ بمرتبى ..
_ يعنى لو صادفت حاله مش معاها فلوس للعلاج بتعمل ايه ؟
_ بتكفل انا بعلاجها..
_ انت كده بتصرف فلوسك ع غيرك ؟
_ غيرى لو محتاجاها اكيد هيكون احسن من ركنتها معايا مبعملش حاجه ... وبعدين الطب هدفه الاساسى مش الربح بمعنى لو فى مقدرتك تصرف هتصرف لكن لو مش فى مقدرتك تصرف ع مرضك هنا التدخل والتكفل بالحاله دا الصح انسانيا واخلاقيا ودينيا ..
_ علشان كده متجوزتش لغايه دلواقتى لو اتجوزت كنت هتعرف انك محتاج كل قرش ..
تدخل "ماجد" : متتجوزش ياابنى اسمع منى بص قدامك 4 حالات اهو انا "حزينه" منكده عليا حياتى و"ياسر" مش طايق نفسه بعد الطلاق و"منة"عاملالي استرونج انتبيدت وومن من برا وهى اصلا مولتن كيك من جوه وجهاد الراسماليه واكللها دماغها.. خليك زى "صبا" علاقتها بالاكل والسفر اكبر من علاقه تربطها بشخص ,, اللى قدامك دول كلنا مرينا بالجواز فبلاش انت كده فى نعمه ...
موبيل "ياسر" رن وخرج و"جهاد" بتناقر فى "ماجد وصبا ",,موبيل "طارق"رن وخرج يرد :
_ هدير ..
_ مقضيها انت مع اصحابك ونسيتنى ماشى يا دكتور
_ لا والله ابدا ع بالى .. لو فاضيه تعالى انا قولتلك ..!
_ الشغل فى المستشفى كتير مش هينفع وبعدين انا عاوزاك تشبع منهم ع قد ما تقدر واكيد هخرج معاكم مره تانيه متقلقش مش هعديها ..
_ تمام ..
اتكلم شويا وقفل وبيدخل لاحظ "منه" واقفه بره لوحدها قرب منها :
_ ايه سرحانه فى ايه ؟
_ لا مفيش بس كنت بتكلم فى الموبيل والجو حلو قولت اقف شويا
_فعلا الجو جميل جداا ..
سكتوا لحظات :
_ "منة" ينفع اسالك سؤال شخصى ؟
_ اكيد
_ انتى ندمانه ع الطلاق ؟
سكتت لحظات: الانفصال كان افضل حل لوضعنا مكنتش هقدر اكمل بالوضع اللى كنا فيه ..!
_ وانفصلتوا ليه عن بعض ..؟
_ في حاجات نهايتها احسن بكتير من وجودها فى حياتنا بشكل باهت ..!
_ هو ايه اللى حصل ..؟ ..!
_ "ياسر" مقالش لك ؟
_ عاوز اسمع منك لو مش يضايقك ,, بس واضح انه سبب غلطه كبيره عملها وندم عليها وبيعتذر وانتى رافضه اعتذاره ..
_ مش كل الاعتذارات نقدر نقبلها ,, فى غلطات بتحصل بتجرحنا مبنقدرش نتعالج منها حتى كلمه اسف ملهاش تاثير ..!
_ زى الخيانه ؟
_ زيها
_ ايه هى ..؟
_ خيانه الوعد والعهد ,, الاهمال .. لما تعيش مع انسان بتحبه وبعد فتره يبتدى يتغير عليك ويبعد والمسافات بتطول بينكم مفيش تواصل ولا كلام ولا حتى احساس .. وجودكم مع بعض حجريين فاقدين الاحساس ومطلوب تعيش كده وتكمل ...
_ المسافات لما تطول طرف بيحاول يقرب ..!
_ حصل لكن المسافات بتبعد اكتر ...لان فى طرف تمادي فى بعده واعتمد ان الطرف التانى هيستحمل وهيستناه.. انا مقدرتش اعيش مع "ياسر" وهو شايفنى اباجوره او كرسى فى البيت طول اليوم بره شغل واصحابه والبيت ساكت كلمتين ومبيسمعش .. قبل الجواز كنا ااقل التفاصيل بنتكلم فيها مع بعض ونقرر مع بعض ,,اغلب الحاجات بعملها لوحدى راميلى مسئؤليه كل حاجه انا اعملها وهو حياته ركزت ع شغل بس .. سحب وجوده فى حياتى واحده واحده لدرجه ان حسيت انا مش محتاجاه فى حياتى لاني بقيت اقرر من غير ما أسئله لانى عايشه لوحدى ... "ياسر" اتغير بعد الجواز .. فى الاول كنا مع بعض فى كل خطوه وقرار .. يوميا نتكلم ونحكي ..بعد الجواز مع الوقت قل كلامه وقل وجوده وقتها قررت الانفصال ليا وله لانى مش عاوزه اكره ..
_ اى حد بينشغل بشغله علشان يحسن وضعه المادي ويعيش احسن ..؟
_ تمام مفيش خلاف .لكن الانسانه اللى فى البيت ليها حقوق وليها حدودو للصبر والتحمل ومش سكوتها انها راضية ..انا اتعرضت لمواقف كان ممكن اضعف فيها زى ستات كتير من بعد اجوازهم عنهم بيضعفوا ويلومو اجوازهم انهم السبب ,, انا كنت بتلاشي يا "طارق" .. الانفصال كان هو الحل ...
_ يعنى انفصلتى رغم حبك له ..؟
_ انفصلت لان قرار ارتباطنا ك ازواج كان غلط ,,انا طمعت فى صديقي انه يكون زوجي لكن اكتشفت مش كل الاصدقاء ينفع يكونو ازواج لان الزواج معناه اكبر واعمق هو تكمله الصداقه مش الفصل عنه ..! ...
_ كنتو تتكلموا ونتبهييه ع غلطاته ؟
_ حصل كتير وكان بيقول اخر مره يومين ويرجع تانى يبعد ..فى افعال لو متعملتش طبيعي بيبقى ملهاش لازمه وبالكلام مكنش هيفوق .. عشت معاه مش فاهمه بيحبنى ولا كان بيحبنى انا مكنتش طالبه كلام رومانسي وحب وهدايا وخروج ,, انا اللى كنت طلباه وجود ,,يحسسني بوجوده وبوجودي فى حياته ودا محصلش .. ,, انا رفضت حياه الروتين اللى الكل عايشها لانى لما قررت اتجوز "ياسر" كنت عاوزه اعيش حياه مشاركه مش حياه فرداني,, رفضت اكون شئ ثانوي باكل وبشرب بس مش الحياة دى اللى كنت بتمناها مع انسان بحبه ,, الافضل انفصل عنه وله عندى شويا مشاعر عن انى اكره ...
_ انتي لسه بتحبيه صح ....؟
ابتسمت "منة": "طارق" .. لما تحب حد بجد عمرك ما هتنساه لما يبعد مهما كانت الظروف والموقف كان ايه قلبك مش هيبطل يدق لما تسمع إسمه أو تمر ذكرى جمعتكم مع بعض هتفتكره طول ما انت عايش ، يمكن تتعود ع غيابه ومتبقاش متوقع منه حاجه ويختفي من حياتك وحياتك هتستمر وتقابل ناس تانيه لكن بتفضل حته جوه قلبك له انت بس الل عارفاها وحاسس بيها حتى لو انكرت ومبينتش ..احنا بنتناسي مش بننسى لأن الإحساس الحقيقي عمره ما بيتنسي بيتخزن فى ذكرياتنا ببساطة الحياة مبتقفش ع حد بتستمر لكن الذكرى بتفضل عايشه لآخر نفس عندنا
سكت "طارق" للحظات واستكملت "منة" :
_ اللى عشته مع "ياسر" مش بسيط ولا سهل دا عمر وابقي كدابة لو قولت نسيت ..
_ طيب ما تسمحو لعلاقتكم بفرصة تانية و .
_مش هينفع ..فى حاجات حصلت صعب ترجعنا تاني لبعض ك اتنين متجوزيين ,,احنا كنا كويس ..
_ الواضح انك قررتي ومش هترجعي فى قرارك ..؟
_ احنا 3 سنين عايشين منفصليين وحياتنا مستمرة كل واحد فينا عرف هو عاوز ايه وعرف غلطته ومتحمل نتيجتها ,,
_ ومرتاحه دلواقتى ؟
_ الحمد الله .. بشتغل وشاغله نفسى نوعا ما .. وقررت مبصش ع ورا واكمل حياتي
_ المهم انك تكوني مرتاحه فى قرارك ..
_ الحمد الله وعايشه اهو وكله تمام ..
_ يلا بينا ندخل
_ يلا ..
_ "منة " ؟؟؟
_ايوه
_ "ماجد" قالى انك كنتي فى فتره ع تواصل مع "غدير " ؟
_ ايوه
ابتسم "طارق": واخبارها ايه ؟
_ بصراحه من 6 سنين معرفش حاجه عنها اختفت فجاءه بعد وفاه والدها ومعرفتش اوصلها وعرفت انها سافرت مع اخوها ومامتها بره وسمعت مره انها اتخطبت او اتجوزت مش فاكره بالظبط ومعرفش حاجه تانى ...
_ مفيش اى وسيله تعرفى توصليلها ؟
_ هحاول ولو لقيت هبلغك
_ متشكر جداا ..
رن الموبيل وكان دكتور "عثمان": انا هدخل بقي وانت رد ع موبيلك ومتتاخرش ..
_ تمام ..
وانهى مكالمته ووقف للحظات وطلع السلسله من جيبه ( بص ع الترابيزه وهما بيتكلموا ) : مكانك فاضى ..!
اتنهد ورجع السلسله فى "جيبه" ودخل كمل كلامه معاهم ,,كملوا قعدتهم وذكرياتهم واتحرك "ياسر" يوصل "منة" و"جهاد" و"صبا" واتجه "ماجد" مع "طارق" للمطعمهم .. ينتظرو "ياسر " :
_ اليوم كان جميل .. انتم دايما كده ولا علشان انا موجود ؟
_ لا احنا من زمان ع كده ..بنتقابل ونتجمع مع بعض لما "صبا" تكون هنا فى اجازتها وغير كده ع حسب ظروف" جهاد ومنة" ولازم يوم فى الشهر نتجمع كلنا مع بعض وزى ماانت شايف كده هى دى قعدتنا ..
_يا بختكم بجد ..
_ ابقى انزل مصر ع طول وهتشبع لغايه ما تزهق ..؟
_ ان شاء الله
موبيل "ماجد" رن وكانت "اميره" ولاحظ اسم "حزينه "ومردش :
_ مش هترد ؟
_ لا .. مش طالباها انا مبسوط ..هبقى اكلمها بعدين ؟
_ وكاتبها "حزينه" فى حد بيكتب مراته "حزينه" مش خايف تتقفش وتعرف ..؟!
_ لا ما هى عارفه انى بدلعها ب "حزينه"
ضحك "طارق" : انا لاحظت انكم ع طول فى مشدات مع بعض ودا من ايه ؟
_ يعني تتوقع يكون مني ..هى ..ام النكد اللى فى الكوكب كله اتجمع واتحط فيها علشان تكرهني فى حياتي
_ معقوله دا كلامك وانت كنت بتحب "اميره"وكلامك عنها ..!
_ بقولك كنت مغفل .. ضحكت عليا بهدوئها وابتسامتها وتمنعها لبستنى بدرى بدرى ..
_احكيلى صح اتجوزتوا ازاى ؟
_ انت عارف اول الحكايه من 19 سنه اول ما شوفتها واعجبت بيها ,, كنت معجب بيها وكانت رافضه حتى اسلم عليها ..فى الكنيسه كانت رافضه خالص اكلمها خوفها لحد يشوفها .. دخلنا الجامعه وهى الوحيده اللى شغلت دماغي ,,عرفت بنات اشكال كتير وهى اللى فى دماغي اول ما كانت بتنزل اجازه كنت بقعد قدام العماره مبتحركش انا كنت بستغرب من تصرفاتي لكن بكون سعيد بيها .. خلصت اخر سنه فى الكلية فجاءه قولت ل "فونا" عاوزه اتجوز .. هى اتخضت لكن هي فكرت ان الجواز بدرى هيلمني وكده ..استغلت عفويتي وهبلى وراحت اتقدمت ووافقوا اهلها ع طول وطلعت هى كمان كانت معجبه بيا لكن كانت مكسوفه .. اتخطبنا واتجوزنا فى ااقل من سنه ,,متعرفش انا الرجل الخارق ولا ايه حصل حمل ع طول ودا كان غير اللى كان فى التخطيط خالص ومن وقتها ابتدا التغيير .. حمل ووحم وولاده ,, و "اميره" اتغيرت خالص بعد ولادة "جاسمين" ..اهتمامها كله ويومها كله ل "جاسمين" ..كل ما اقربلها تبعد وتقولى تعبانه وعاوزه انام وعصبية ع ااقل الحاجات .. الاكل بأكل لوحدي او تقولي اروح ل "فونا"
_ طبيعي الحامل بعد الولاده اهتمامها بيكون ل طفلها اول مره ..
_ تمام ..قالولى كده وصبرت 4 شهور من بعد الولاده لكن هى زودتها وتحس انها اكتفت ب "جاسمين" بس .. انا مبقتش احس بلزمتي فى البيت ولا حياتها ..اهتمام ورعايه لجاسمين وانا ساعد نفسك بنفسك اللى كانت عاوزاه مني اخدته خلاص ,,حتى بقت تنام فى الاوضه تانيه علشان ايه متزعجنيش وانها بتخلع بالطريقه .. انا مش طالب اكتر من ساعه نقعد مع بعض ونتكلم .. نتعشي سوا ..نخرج سوا .. كده يعني ,,لكن هى بعد الولادة اتحولت كله لا لا لا .. مش هينفع .. مش قادره .. مش عاوزه .. دا انا روحت قعدت يومين عند "فونا" كلمتني فى تاني يوم لما لاحظت انا مرجعتش .. يوم بحال ملحظتش وجودي ب انشغالها ...
_ متكلمتش معاها ليه ..؟
_ اتكلمت يوووووه كتير .. اتظبطنا شويا لكن رجعت تانى.. البيت والبنت وكلامنا بقى محوره "جاسمين" لسه مكملتش سنه وبتفكر مدرسه ايه هتدخلها .. عاوزه تغير اوضه "جاسمين" ,,اقولها تعالى نخرج تقولى والبنت ,,اقولها نخرج بالبنت عادى زى بقيت الناس ,,نخرج الخروجه متكملش نص ساعه يلا نروح علشان البنت ... امها تشكر عرضت البنت تنام عندها يوم على اساس تسيبنا مع بعض يعنى و"جاسمين" 11 شهر .. اليوم كان عباره عن عياط وتفكير ياترى نمتى او كلتي .. تخيل مراتك فى حضنك وبدل ما تقولك بحبك او كلمه حلوه تقولك انا قلقانه ع البنت .. خلتنى الفجر روحت جبتها ...
..دا غير انها بتاخد قرارات فى حاجات من غير ما ترجعلي وتقولي ماهو انا هوافق لانها شايف دا صح .. طيب تقولي وانا اقول ..لا القي نفسي لبست كده .. العيال يسالوني ع حاجه عادي واقولهم موافق تطلع هى تقول لا وكان لازم يسالوها الاول .. ماانا موجود وانا وهى واحد لا الطلب لازم يمر من عندها الاول وانا امضي بس .. انا فى البيت اسم ,, خناق لانها مش عاجبها طريقتى مع العيال انا بدلع ..ماهو الطبيعي حد يشد تانى يرخي مينفعش الاتنين .. حاولت حياتي لنكد وهم ودايما بتشكي .. حزينه ولا مش حزينه ..
_ عرفها غلطها بهدوء..
_بص هى عمرها ما بتغلط نفسها دايما شايفه انا الغلط وهى الصح
_ وانت بقى عملت ايه ؟
_ ولا حاجه استسلمت لدماغها وخليتها تعمل اللى يريحها وانا اعمل اللى يريحني .. المهم طلباتها هى والاولاد مجابة بس كده اللى بره البيت ميخصهاش ..انا عباره عن بنك هات فلوس لكذا اهو .. عاوزين فلوس لكذا اهو .. فى البيت مع العيال خناق لانها مش عاجبها طريقتى معاهم انا بدلع ..ماهو الطبيعي حد يشد تانى يرخي مينفعش الاتنين .. حاولت حياتي لنكد وهم ودايما بتشكي .. حزينه ولا مش حزينه ..
اتفاجئ "طارق" من كلام "ماجد" :
_ معقول الحب اللى بينكم اختفي ..ولا مكنتوش بتحبوا بعض ..؟!
_ انا متاكد من نفسي انا اتجوزتها علشان بحبها ودا كان غلط ,,الحب مش كل حاجه فى الجواز ,,
وصل "ياسر": ها بتنمو ع مين ؟
_ طبعا وصلت "جهاد" و "صبا" نزلت فى الطريق وكملت مع "منة" للبيت صح ؟
اتفاجئ "طارق ": ايه دا ايه عرفك ؟
ضحك "ماجد" : ماهو دا اللى بيحصل "ياسر" يتفق مع "صبا" بما ان "صبا" بتقضي اجازتها عند "منة" فيقولها انزلى فى نص الطريق علشان يقعد مع "منة" بمعنى اصح يسرق وقت يكونوا مع بعض ..
_انت عيل رخم اسكت ..
_ وياريت بفايده هى مصممه ع رايها وهو قافش فى فكره انها بتعاند بس ..
_اه هى بتعاند وانا متاكد ..
وجهله"طارق" الكلام: انا اتكلمت مع "منة" لكن محستش بمعانده هى اخدت قرار وبتنفذه ..جبت منين انها بتعاند ايه الاشاره .. يمكن علشان متجوزتش تانى يعنى ؟
ادخل "ماجد" : احكيلك انا .. فى يوم طلعنا كلنا يومين اجازه "صبا" حجزت لينا فى الفندق عندها زى العاده .. وقتها كانوا اطلقوا ومر مده واتفقوا خلاص كل واحد يشوف حياته وهو قرر انه هيفضلو اصحاب بس ..هناك حصلت حادثه بسيطه وهما مع بعض ..هى فاقت من البينج متاخر عنه وهو كان مستنيها تفوق ..اول ما فاقت وفتحت عينها رددت اسمه ولما شافته اترمت فى حضنه بتطمن عليه عادى هو بقي اوفر قال ايه بتحبه ...
_ لا مش عادى ..قامت من ع السرير واترمت فى حضنى ونبره قلقها وخوفها وانا سمعتها بودنى قالتلى لو كان حصلك حاجه انا مكنتش اقدر اعيش بعدك ..سمعتها .. يبقى لسه بتحبنى ولا لا ؟
_ يابنى دا بنج .. بينننج وهى مكنتش فايقه ,,هى نفسها نسيت قالت ايه .. قولتله كده وهو قفش فى الجمله ومن وقتها رجع فى كلامه وبيستغل اى لحظه يفاتحها بيضغط عليها وهى بتصده .. الاهبل بسببها ساب شغله فى شركه ملابس ايطاليه كبيره مكانه كويسه جداا بمرتب عالى قال ايه علشان الشغل دا واخد كل وقته وسبب انفصاله عنها وراح شارك اخوه وانا فى المطعم دا واهو 3 سنين اغلب الوقت فاضى ولوحده برده .. غباء ..
_ انت مش فاهم حاجه اسكت احسن ..!
لاحظ "طارق" مشدتهم للكلام : باااااااااس باااااس اهدو كده .. انت مقتنع باللى بتعمله يا "ياسر"..؟
_ جدااا وهى بتصد دلواقتى لكن هتوافق بعدين ..!
ادخل "ماجد": انت مش فاهم ليه .. يابنى هى خلاص صعب ترجع تانى .. القرار اللى وصلتلها له وعملته قطع كل صله .. انت مش قادر تفهم ليه انك وصلتلها لقرار انها تجهضت نفسها علشان متخلفش منك ولا يبقى فى حاجه ربطاكم ببعض ..
اتفاجئ "طارق": ايه ؟ هى اجهضت نفسها ؟
_ ايوه .. وبعد الاجهاض طلبت الطلاق ع طول .. وقالتهاله علشان مش عاوزه صله تربطنى بك ازاى بقي ترجعله مش فاهم انا ...!
تذكر "طارق" كلام "منة" ان فى حاجات حصلت صعب يرجعوا لبعض بسببها..
|_ واضح ان الحكايه اكبر منها اتنين انفصلوا ,, "ياسر" حاول تعيد تفكير تاني لان الحكايه مطلعتش سهل زى ماانا افتكرت ..!
غيرو الموضوع وابتدوا يتكلموا ع اى حاجه تانيه ..!

رجع "طارق" الفندق وغير ملابسه ونام واتكرر الحلم وصوت "غدير" فتح عينه مخضوض وقام وفى التراس قعد وحط السلسلة ع الترابيزه امامه وباصصلها وشافه "عثمان" وقرب منه :
_ اممم باين انك مقابلتهاش لسه ؟
_مين دى ..؟
_ صاحبه السلسه اللى معاك من 17 سنه ..!
ابتسم"طارق": لا للاسف مشفوتهاش لسه ولا حد في المجموعه يعرف عنها حاجه ..الوحيد اللى كانت ع صله معاه "منة" اخر حاجه عرفتها انها اتخطبت او اتجوزت وسافرت ..
_ يعنى خلاص كده هتحتفظ بيها للابد
_ امممم مش عارفه بس حاسس انى هقابلها حتى لو صدفه ازاى وامتى وفين مش عارف ( مسك السلسله وباصصلها ) طول السنين دى السلسله عاوزه ترجعلها مش قادر احتفظ بيها ليا مش ملكى عاوزه ترجع لصاحبتها ,,
_ ياعالم فى الدنيا معجزات ممكن تتحقق المعجزه دى وتقابلها وترجع لصاحبتها
_ ياريت ...
_ طول ماانت مصدق وواثق انك هتقابلها الظروف هتساعدك تقابلها متيأسش
_ ان شاء الله

مر يومين واستمرت مقابلات طارق و "ياسر و ماجد .. وفى يوم قابل "هدير" فى المستشفي :
_ صباح الخير
_ يا صباح المواعيد المظبوطه ..
_ انا قولت افطر معاكي تعويض ع اليومين اللى فاتو
_ لا انسي انا مصالحتي مش بالشكل دا لا ..
_ طيب عاوزه ايه واعملهولك حالا بالا
_ حيو ابو الفصاااد هييييييييييه
ضحك"طارق" : لا بجد انا عارف ان انا مشغول مع "ماجد" و"ياسر" و..
_ لالالا متعتذرش دول اصحابك ومش اى اصحاب انتم اتجمعتوا بعد فراق 17 سنه دا انا بكون مبسوطة لما بشوفك مبسوط وانت بتكون مبسوط وانت معاهم ..
_ ومعاكي كمان .. انتم الحاجات الحلوة اللى فى حياتي تعويض عن حاجات كتير خسرتها ..
_ بس دا ميمنعش انك تخرج وتتفسح من غيري .. الجدول اللى كنت عاملاه معاك اتلغبط ينفع كده ,, والوقت اللى مبتكنش فيه مع اصحابك اتفاجئ بوجودك عندنا فى البيت مع "هاله" اسمه ايه دا ؟
_ انتى عارفه الظروف النفسية اللى بتمر بيها "هاله" ومقدرش اعمل نفسي مش شايف ,, اختي
_ والله لو مش اختك دا انت لما بتتعرف ع حاله مبتسبهاش ..
_ اصل انا بحب الناس اوى اعمل ايه ..؟!
_ وهما كمان بيحبوك اوووى والله بس لازم شويا عدل ..
_ ماهو ..انا سبت دكتور "عثمان" يفطر لوحده قولتله لا هفطر مع "هدير" ..!
_ ماشي .. يلا بينا .. وهنتغدي مع بعض ..
_ ونتغدي مع بعض ..
_ وبعد الغدا ندخل سينما مع بعض ..
_ وبعد الغدا ندخل سينما مع بعض ..
_ وبعد السينما ..
_ لا بعد السينما ايه انت لازم ترتاحي ..ايه مزهقتيش اليوم كله اهو معاكي ..
_ امممممم .. لا طبعا تيجى فرصه قدامي انتهزك واستغلك واضيعها لالالا ولا انت جى تضحك عليا بالفطار وكلمتين بس ..
_ ولا تزعلى اليوم كله باكدج ليكى بكل مافيه وانا معاكي لغايه ما تقولي خلاص كفاية عاوزه اروح البيت ...
_ وانا موافقه 5 دقائق ورجعالك ننطلق
_ تمام ...

خرج "طارق" مع "هدير" وقضوا اليوم مع بعض ووصل "طارق" هدير للبيت بيبص للساعه :
_ الساعه 2 بعد منتصف الليل مامتك وباباكي هيزعقولك ويزعقولي ع رجعوك المتاخر دا ..!
_ لا خالص انت الوحيد اللى لو كنت معاك فين عمرهم ما بيقلقو بيطمنوا جداااا وبيفرحوا
_ طيب تمام ... بس اليوم كان جميل .. كده اتصالحنا تمام ..؟!
ب ابتسامه : انا مقدرش لا مينفعش ازعل منك يا "طارق"
_ وانا مقدرش ازعلك من الاساس يا "هدير" بجد ..بس انتي عارفة اجازتي سببها الرئيسي ايه وفكره انى اتجمعت معاهم تاني كلهم دى كانت مفاجاءه حلوه جداا
_ وان شاء الله هتكمل فرحتك وتطمن ع "غدير" وترجع امانتها ..
_ اتمني كده مر من اجازتي شهريين ونص ومش عارف ..
_ بتحصل المعجزات من ابسط حاجه .. تفائل انت بس هو انا اللى هقولك ولا ايه ؟
ضحك "طارق": تمام يا دكتور ,, يلا ادخلى وارتاحي وزى ما وعدتك اليوم دا هيتكرر كتيررر
_ تمام وانا مستنيه .. طمني عليك لما توصل ..!
_ تمام .. تصبحي ع خير .
_ وانت اهل الخير ..
دخلت "هدير" وركب العربيه لما اتاكد انها دخلت الاسانسير ,, دخلت "هدير" الشقه وهى مبسوطة جدااا ورمت بجسمها ع السرير باب غرفتها خبط وكانت والدتها :
_ كل دا تأخير يا "هدير"؟
_ ماما .. بجد محسناش بالوقت
_ باين انك مبسوطة ..!
_ جدااا .. عارفه يا ماما كل انسان محتاج يوم اجازه كل فتره علشان يفرغ كل الضغوط اللى عنده ويصفي ذهنيا علشان يرجع لشغله وحياته بنشاط ...
_ ايوه ..
_ اهو دا اللى حصلي .. ضغط الشغل الفتره اللى عدي راح وحاسه بنشاط انا مستعده اروح المستشفي دلواقتي ..
ضحكت": لدرجه دى .. بس مش غريبه انك مبتحسيش بالسعاده ولا الراحه دى غير مع "طارق" ..؟
_ بجد الوقت معاه مختلف وبيمر بسرعه ..
_هو "طارق" ملمحش ب اى حاجه كده ولا كده ؟
_ يلمح ل ايه يعنى ..؟
_ يعني ..
_ يا ماما ..
_ بجد انا بتمني انه يكون من نصيبك لانى شايفه سعادتك معاه مش انا بس دا كمان باباكي بيتمني اللحظه دى تيجي وانتم الاتنين مع بعض ...
سكتت "هدير": ماما بلاش الكلام دا ارجوكي ..
_ ليه انتى مش بتحبي "طارق"..؟
_ ماما .. قومي روحى اوضتك انا عاوزه ارتاح شويا قبل ميعاد المستشفي ..
وقفت مامتها : بتغيرى الكلام ,,متكدبيش احساسك انتي بتحبيه كلنا ملاحظين كده ..
_ اصل مهما كان كلامي وكلامك مش هيغير حاجه ..
_ لا هيغير ..
_ لا مش هيغير حاجه لان "طارق" نفسه هو المهم وهو عاوز ايه المهم,, والتخيل والاحلام ساعات بتتعس صاحبها لما يكون مش متاكد او مفيش اى اشارات ياماما ..
_ ماشي يا "هدير" بس صدقيني مش هتلاقي زى "طارق" وهو مش هيلاقي زيك ..وانا هفضل ادعي لغايه ما يجي اليوم دا ,,,
خرجت مامتها وقعدت "هدير" قدام المرايا وطلعت صورتها مع "طارق" فى لندن نظرت فيها لحظات واتنهدت ورجعتها مكانها ....!


تاني يوم بليل قابل "طارق" "ياسر" فى مطعمه :
_ هو "ماجد" لسه مجاش ..دا كلمني وقالى انه هنا اساسا ..
_ لا ماهو جه وجاله اتصال حاله انسانيه فخرج مش هيتاخر جى .. تشرب ايه ولا ناكل انا ورايا كام حاجه كده هعملها وراجعلك تمام ..
_ياسر..
_ ايوه
_كان "ماجد"قالى ان فى صور لكم فى تجمعاتكم يعنى مع بعض موجوده معاك هنا
_ ايوه ع اللاب هجبهولك ثواني ...
رجع "ياسر" ب اللاب : اتفرج براحتك وانا هخلص اللى ورايا وراجعلك تمام
_ تمام ..
ابتدا "طارق" يفتح الصور كانت كل مجموعه صور تحت سنه حدوثها وابتدا بتاريح سفره "لندن" وابتدا يفتح فى الصور وكانت "غدير" موجوده فى صور منها ولاحظ تغيير فى ملامحها وعزلتها وهى معاهم مقارنه بالصور اللى هو فيها معاها ..وظهرت صوره فيها "غدير" والسلسله حول رقبتها طلع السلسله مع جيبه واتمني امنيه واحده انه يقابلها ويرجعلها .. وهو بيقلب فى الصور ظهر "ماجد":
_ ابو الطوارق ..جيت امتي ..؟
_ انت كنت فين ..
_ حاله انسانيه ملحه مقدرتش اقول لا بس انا متاخرتش ,,اكلت ..؟
_ ايوه وبشرب الشاى كمان اهو ...
_ بتعمل ايه بتتفرج ع صورنا ...؟
_ ايوه ..بشوفكم كنتم بتعملوا ايه السنين اللى فاتت ...
_ هتلاقى عاهات ...
ضحك"طارق": بس فى صور مضحكه جداا احسن حاجه عملتوها انكم سجلتو اللحظات دى فى صور ..
_ كتير لما بنتخنق بنحب نرجع ل ايام كنا مرتاحيين واقصي طموحاتنا منحضرش درس ولا مدرسه ونقعد ع ناصيه الشارع نضرب عصير مانجه او كشرى ..لا كان فى هم زوجه نكديه ولا طلاق ولا مرار طافح
_ يااااه لدرجه دى ...
_ واكتر واكتر اسكت ..
رجع "ياسر": "ماجد" فى حاله انسانيه بتسال عليك هناك ..
_ اه شوفتها .. نصايه وراجع يا "طارق" قلب انت فى الصور واسترجع ذكرياتنا
قام "ماجد" وقعد "ياسر" وبص "طارق" ع الحاله الانسانيه وكانت فتاه فى عمر 22 سنه تقريبا
_ مين دى ؟
_ حاله انسانيه زى ماقالك ؟
_ هو "ماجد" فاتح رعايه اجتماعية وانا معرفش ايه كل الحالات دى ....؟
_ لما يرجع اسأله ..قولى ايه رايك فى الصور شوفتها كلها ..
_ اها شوفت بعضها واسترجعت معاها ذكريات جميله .. ولاحظت صورك انت و "منه" فى الجامعه " كنتم مقربين اووى ..
ابتسم "ياسر": جدااا .. يوميا كنا ع تواصل منعملش حاجه غير لما نقول لبعض كانت ايام جميله ..
_ واضح ذكرياتكم جميله ..
_ جدااا ..موبيل "طارق" رن وكان "دكتور عثمان " : ثوانى وراجع ..
خرج "طارق" يرد ع المكالمه ولاحظ تعامل "ماجد" وضحكه مع البنت ,, خلص المكالمه ورجع وكان رجع "ماجد :
_ ايه كميه الحالات الانسانيه دى ايه كميه البنات دى ؟
_ بزيد من نجاحي ..
_ نعم ..؟
_ مش بيقولك وراء نجاح كل رجل امراه ..صح ؟
_ ايوه ..
_ ف اذا اردت المزيد من النجاح عليك بالمزيد من النساء يا صديقي
_ ومين اللى قال الكلام دا ..
_ "ماجد وليم اينشتاين "
_ انت فظيع ..
ضحك "ياسر" و "ماجد" و"طارق " واتكلموا وكملو كلامهم واتصلت "هدير" ب طارق" وخرج كلمها ورجع :
غمز "ماجد" ل "طارق": ايه بقى نظام "هدير" يا دكتور "طارق"؟
_ مالها "هدير"..؟
_ فى العيد الميلاد والمرتين اللى قلبناها فيهم وخرجت معانا كان باين اوى انها معجبه ولهانه ..
_ ايه اللى بتقوله دا ..؟
_ البنت عينيها هتطلع عليك بصراحه انتم الاتنين لايقيين ع بعض يلا علشان تيجى تقعد جنبنا ونبقى الموكوسين الثلاثه زى الاغبياء الثلاثه كده
ضحكك"طارق": علاقتى ب "هدير" صداقه,, ابوها صديق طفوله دكتور "عثمان" وبالتالى اتقربنا لبعض اخوات يعنى زى علاقتي بكم كده ...
_ اممم يعنى مفيش هكا ولا هكا ..
_ انت فاكرني زيك مقضيها حالات انسانيه .؟!
_ مالها الحالات الانسانيه .. تغيير ومركز راحة من نكد اللى فى البيت بشحن علشان اقدر اواجهه الوحش لما اوصل البيت ..!
_ يا سلام ...
_ . بس تصدق احسن انك مش ناوى انا كنت بجرك علشان غيران منك فاضى ولوحدك كده ..
_ انت عارف مشكلتك انت و"ياسر" ايه ؟
_ ايه ؟
_ انكم برغم ارتبطتوا باللى بتحبوهم عشتوا التجربه بطريقه غلط ؟
_ ودا ازاى بقى ؟
_ اولا "ياسر" انا لما سالتك سبب انفصالك بملامح حزينه وندم انك مقدرتش تحافظ عليها ,,فوقت متاخر و"منة" قالتلى "ان الانفصال كان الحل عن انها تكرهك .. انتم الاتنين حبيتوا بعض والاصح انت حبيتها لكن معرفتش تحافظ عليها ..
لاحظ انتباه "ماجد" و"ياسر" واستكمل كلامه :
_ مشكله الرجل او المراه فى العلاقه انهم لما بيدخلوا العلاقه بالزواج بيكونوا فاكرين ان دى اخر حاجه ممكن يعملوها او دى اخر مرحلة فى العلاقة يعنى خلاص ضمنوا بعض لكن للاسف اللى بيحصل عكس ..لان الزواج بيكون البداية ..فالاغلب فاهمين غلط فبيتعاملو بالامبالااه واهمال اللى بيدمر العلاقه ,,
لاحظ تركيزهم واستكمل "طارق" كلامه :
_ تخيلوا 30 ثانية كده انكم بتتمشوا ووقفتوا قدام محل فيه تيشيرت عجبك جدا هتعملو ايه ..؟
رد "ياسر": بروح اشتريه ؟
_ حتى لو غالى ..
اتدخل "ماجد": اتصرف مدام عجبني..؟!
_ احساسك اتجاه التيشيرت بيقل بيبدء ب الحماس والرغبة انك عاوزه قبل غيرك ما ياخده بيدفعك تشترية وبتلبسه فرحان به طول اليوم ترجع البيت ترميه ع الكرسي وتاني يوم تلبس تيشيرت تاني لان خلاص اكتفيت منه لانك امتلكته ,, بتفتكره لما بتشوفه لما ترجع البيت تبص عليه وبترمي عليه بنطلون ع قميص ع جاكت وبيختفي من قدام عينك .. اعجابك وانبهارك به اختفي لانه خلاص بقي موجود واثق وعارف انه موجود فى مكانه لما تحتاجه تانى بتدور عليه فى المكان اللى رميته فيه وبتلاقيه فعلا متحركش .. فدا زى علاقه الرجل .. اللى بتحبها بالظبط زى التيشيرت بتشوفها وتحبها وتتلهف عليها وتعمل المستحيل علشان تتجوزو وتكون معاك وبتمروا بمراحل التعارف والخطوبه والجواز وشهر العسل ,,, وبعد ما تتجوزوا بيدء الرجل احساسه بيتغير اتجاهها لانه ضمن وجودها زى كرسى السفره والتيشيرت اللى لبسه ورماه ع الكرسى بيرجع يلاقيه زى ماهو .. بينسى مراته ويهملها وبيقضي ع احلامها انها تعيش حياة مع شريك بيحبها ودايما هى من اولوياتة ف تجاهله بيحصل خلافات بينهم ل اعتراضها وبيزيد الخلاف وبيوصل ل الطلاق لانها حست انها ملهاش لزمه فى حياتك اتحولت من انسانه ل خيال .. لكن لما تتاكد انها عاوزه تنفصل بتحس فجاءه بحبك ليها وقلبك يوجعك ع فراقها وتحاول تصلح لكن خلاص فات الوقت ,,, ودا لان حصل فتور فى العلاقه فى الاول واستمر ...
_ ودا بقي له سبب ؟
_ كيمياء الاعصاب ..
_ يعني ايه ..؟
_ بمعنى ان اعصابنا لدقتها بتحس بلحظات الانتقال لكن مبتحسش بالاستمرار ... يعنى مثلا تكون ساكن فى مكان هادي وفجاءه تفتح الشباك تسمع صوت دوشة فى الشارع فى الاول بتتفاجئ لكن مع الوقت بتتعود والدوشة بتكون شئ عادي ... الروتين يا جماعه بيقتل المشاعر لكن الاحداث المفاجئه هى اللى بتنبهنا الاحداث المتغيرة اللى بتحسسنا بالحياة اننا موجودين ,, علشان كده مبنحسش بقيمه الحاجات غير وهى فى اخر لحظات ضياعها مننا لما الوضع بيتغير .. مبنحسش بحبنا للى بنحبهم غير لما نفقدهم بنتوجع ونتعذب ونندم اننا سبناهم او قصرنا فى حقهم ..
_ وايه بقى الحل لتغلب ع الروتين دا ؟
_ التغيير ... الزوجه مينفعش تكون زوجه بس لزوجها ,,تكون صديقه ورفيقه وكل حاجه ف تتحول كل يوم ل واحده تانيه تحسسه بالتنوع بعيد عن الروتين والزوج كمان يكون صديق قبل ما يكون زوج ليها لان ارتباطهم ببعض يعنى الاتنين هيكونوا كل حاجه فى يجددوا حبهم بين وقت والتانى يتكلموا .. يتكلموا مع بعض زى ما بدؤ علاقتهم ,, قله الكلام والحوار بين الاتنين بيعمل فتور وبعد ,, اويعملو حاجه بيعملوها ع فترات تحسسهم بوجود بعض او معنى اصح انا فاكرك مش ناسيكى ..لكن يركنوا بعض ع اساس ان الجواز كده اخر مطاف وهى مركونه فى البيت لا غلط هى انسانه ليها مشاعر وبتفرح وبتتوجع ووقت ما بتاخد قرارها بتنفذه بلا راجعه ...
رد "ماجد" : لكن فى ستات نكدية هى اللى بتبدء ب الاهمال ..
_ ايوه في لكن الاغلب بيكون من الرجاله ..
_ نعم ..؟
_ فى احصائيه بتقول ان الرجل بيكون المسؤؤل الاول فى قضيه الاهمال ....؟
_ ازاى ..؟
_ لان المراه لما بتحب بتحب بكل حاجه وتركيزها بيكون لشخص واحد لكن الرجل بيحب نفسه معاها ولما بيرتبط بيها ويضمنها بعقد الجواز حبه لنفسه بيزيد ,,ا بيخرج ويسافر مع اصحابة وهى بتتحمل مسؤليه البيت والاطفال ومسؤليته فى غيابة ولو سكتت ورضيت وقدمت اعذار بيتمادي فى تجاهلها ع انها هتستحمل .. طبعا فى رجاله غير كده بس الاغلب كده للاسف ... و "ياسر" كان منهم حبه ل "منة" محافظش عليه لانه فكر فى مستحيل ينفصلوا وتعامل من المنطلق دا اهمال وصل لفتور وصل ل انفصال .. فى العلاقات مفيش مستحيل فيها لان كل شئ ممكن وانفصلوا ...سكتوا وكمل "طارق " كلامه :
- _ صعب اوى ع الواحدة تعيش مع راجل يوصلها انه مجرد ضل فى حياتها ،لما تحتاجة و تسند عليه تقع بينسي انها إنسانة وليها طاقة إحتمال وصبر محددين لما بيخلصوا بتتخلص من كل حاجه فى حياتها وأولها حبها لراجل دا ..!
_ ياااه يا"ياسر" دا انت كنت مغمقها اوى
نظر "طارق" ل " ماجد ": وانت كمان متختلفش عنه كتير ؟
_ لا مفيش زى احنا كل يوم انا واميره بنتكلم وبنتخانق مفيش اهمال اهو ..
_ لكن فى حب السيطره ؟
_ مش فاهم ..
_ المتداول ان اقوى علاقه بين الرجل والمراه هى الحب .. لكن بيعادلها الحرب علاقتهم بتكون حب وحرب وهما اللى بيختارو يعيشوا ايه ,, والاغلب بعد الجواز بيختارو الحرب ..حرب مستمره بين الاتنين .. بيتعاونوا ع المعيشه لكن بيحاربوا مين يكون القائد ...ولان المراه بطبيعتها العاطفيه مش بيكفيها تكون سيده على بيت الرجل وقلبه لكن بتحارب علشان تكون سيده على عقله وافكاره عاوزه تكون كل حاجه فى حياته واول اهتماماته وكلامها يسمعه ويكون له تأثير فى حياته ..والرجل كمان نفس التفكير لما بيحب وبيرتبط بيكون عاوز حياه وتفكير اللى بيحبها تكون له لوحده .. مش كفايه انها تحضرله الاكل وتراعى الاولاد لكن عاوز اى خطوه بتعملها وبتخطط ليها تكون تحت اشارته ورايه واردته .. بيكون عاوز يمتلك جسم مراته وعقلها وعواطفها ... فدايما فى اغلب العلاقات الحرب دى بتكون موجوده والشاطر والامهر يغلب ويكون هو القائد فى العلاقه والمسيطر اللى التانى من غيره يتوه ...
_ ودا من ايه وليه ؟
_ لان المراه لما بتدخل علاقة بتحب ولما بتحب بترمى نفسها من غير تفكير فى دوامه القلق والخوف ياترى بيحبنى ياترى هيفضل معايا ياترى..؟! ياترى..؟! ودا بيضعفها وبيضيعها ,, لدرجه انها بتكره احساس الحب دا لانه بيضعفها ..وعلشان الخوف دا والضعف اللى حساه بيكون همها انها تسيطر ع اللى بتحبه علشان تتاكد ان حبها مش هيضيع زى بالظبط احساسها بتحط فلوسها فى خزنه هى بس اللى معاها المفتاح فتبتدي تضغط عليه وتحاصرهوبتبدء الخلافات بينهم انت مش فاهمني وانتي مش فهماني ... والرجل كمان بيحس بكده لكن مشكلته اكبر هو بيشوف ضعفه فى الحب بيعادل خسارته لقوه شخصيته ومكانته وانه هيكون من غير شخصيه لو وافق وتنازل .. يعنى مش راجل ..علشان كده بيحارب انه يكون المسيطر فى العلاقه ويسيطر ع حبيببته او مراته ويمتلكها ... وفى وسط صراع الاتنين فى العلاقه بيتولد الخوف والكراهيه والقسوه وبتتحول العلاقه الى علاقه معقده كلها مشاكل وخلافات ع ابسط الحاجات ومعنى الحب البسيط والمشاعر الجميله اللى ربطتهم ببعض فى الاول بخ اتبخرت ,,, فهى شايفاه ملاك وشيطان وهو كمان شايفها كده ع حسب مين المسيطر فى العلاقه ... ف انت يا "ماجد" كده بالظبط مع "اميره" اللى شوفت اكدلى كده مفيش تفاهم ونقاش فى هدوء مبتدوش بعض فرصه تسمعوا بعض دايما كل واحد بيحاول يثبت لتانى انا الاقوى وانا الصح وبالتالى انتم الاتنين خسرانين .. خسرانين العلاقه مفيش مكسب ...
ملامح "ماجد" و"ياسر " اتغيرت ومذهولين من كلام "طارق":
_ لدرجه دى احنا السبب ...؟
_ وهما ,, انتم الاربعه سبب فشل علاقتكم ,, الطرفين بيكونوا السبب ,,فى حاله "ياسر" هو السبب ودا من ندمه ع الانفصال ومحاولاته لرجوع وخوفها انها ترجع لانها سمحتلوا بكذا محاوله وفشل ... وانت يا ماجد واميره السبب لانكم مبتسمعوش بعض وصوتكم عالى ولما بتزهق بتهرب ودا غلط ... العلاقه بين اى اتنين محتاجه تفاهم واحتواء سهل انك تحب الصعب ان العلاقه دى تستمر ولما يحصل مطبات تلحقوها مع بعض مش طرف يحاول والتانى لا او الاتنين يعاندوا لا بيعترفوا بغلطتهم ولا بيحاولوا يصلحوا علاقتهم ... فبالتالى النتيجه .. انفصال وندم والتانى حياه مليانه بمشاكل وصراعات لا نهائيه والاسوء لما يكون فى اطفال هما اللى بيتحملوا النتيجة .. علشان كده "منة" لما حست انها اختفت من حياه"ياسر" قررت تجهض الجنين علشان مكنتش عاوزه ابنها او بنتها يعيش اللى عاشته ولا تكمل فى علاقه بسببهم لانها فقدت الامان ... !
انهى "طارق" كلامه وسط صمت من كلا من "ماجد" و"ياسر " ...!
رجع "ياسر" و"ماجد" كل واحد لبيته و كلام "طارق" بيتردد ع مسامعهم ,, دخل " ماجد" الشقه والكل كان نايم ,,فتح غرفه اولاده واطمن عليهم وخرج دخل البلكونه يدخن سيجاره واعاد تفكير فى كلام "طارق " واحاطته مشاكله مع "اميره" وهو فى البلكونه خرجت "اميره" وقفت ربعت ايديها ولاحظها "ماجد" واتخض :
_ قولى احم ولا اتنحنحي خضتيني ..
_ حضرتك شرفت امتي ؟
_ من شويا ليه فى حاجه ..كنتى نايمه وصحيتك ولا ايه ؟
_ انهارده ايه يا "ماجد"؟
_ ايه يعنى .. الاحد ,, ولا الاتنين
_ انهارده كنا معزومين عند طنط "مارى" وقولتلك تيجي واستنناك وانت مجتش
_ ايوه قولتيلى وانا قولتلك مش جاى
_ وانا قولتلك هتيجي وقولتلهم انك جي علشان مينفعش اكون هناك لوحدى
_ هياكلوكي ولا ايه وبعدين انا مبحبش خالتك "مارى" و جوزها عم "جرجس "ولا ابنها ومراته اروح اعمل ايه واستحمل سخافاتهم دى ليه ,,اديني سبب مقنع واحد ؟
_ مش هقولك علشاني لانى اصلا مليش لازمه عندك بس علشان شكلك قدامهم ..
_ طز .. ميهمنيش بيفكرو ازاى .. وبعدين تعالى هنا انتى صاحيه لنص الليل علشان نتخانق مقدرتيش تستنسي للصبح ..
_ انا عارفه مهما اقول كلامي ولا له لازمه هوا عندك .. وانا ابقي ايه يعنى الخدامه اللى جايبها فى البيت لكن تضحك وتهزر وتتكلم وتخرج مع غيرى حلو اوى ..
_ "اميره" مش طلباكي خالص ..تصبحي ع خير ولا متصبحيش
مشى "ماجد" وهو متعصب ودخل الغرفه ومسك البجامه ودخل الحمام وبيردد : قال ايه انا فاهمها غلط وهى اساسا الغلط نفسه وكنت براجع نفسي علشانها دى تستاهل ومش هروح عند خالتها "ماري" 

يتبع ...