زهرة التوليب

( 3 )

نزل ع درجات السلالم وقبل ما يخرج من الباب سمع صوت امراه عمرها 58 سنه معاها شنط كتير ودخل ولد ومعاه الشنط تانيه وهى بتزعقله :
_ امسك الشنط كويس واوعى توقع منك حاجه القوطه لو لقيتها اتفعصت هفعصلك دماغك فاهم يلا قدامى ,, شبه عليها "طارق" وقرب منها :
_ تحبى اساعدك واطلعلك باقى الشنط ؟
_ شكرا يا ابنى شكرا مش عاوزه اتعبك
_ تعبك راحه يا "فونا"
اتفاجئت انه عارف اسمها وهى مش عارفه هو مين وقبل ما يطلع السلم مسكته من دراعه وبتركز فى ملامحه:
_ انت تعرفنى..؟
ابتسم "طارق": تعالى اطلعك الاول واعرفك انا مين ...!
وصلوا وفتحت باب الشقة وكانت خايفه ومتوترة من "طارق" فرجعت قفلته تانى ووقفت :
_ شكرا يا ابنى تعبتك ..
شعر "طارق" انها بتمشيه وبان عليها ملامح القلق منه : هو حضرتك مش فاكرانى ؟
ضيقت عينيها وقربت لملامح وجهه : مش فاكره انت مين ؟
اشار ليها للدور التانى : "طارق" .. انا "طارق" يا طنط ايفون ابن "صفاء" والمهندس "وفيق"
بتحاول تستجمع ذكرياتها واترسمت ملامح المفاجئه : "طارق" ابن " صفاء" و "وفيق"
ابتسم "طارق" :" ايوه بالظبط ابن "صفاء"
شدته لحضنها وحضنته بشده : يااااه يا "طارق" يااااه يا "صفاء" كل السنين الفرقه دى ..
ضمها "طارق" لحضنه واتأثر جدااا بحضنها : والله ولا غبتوا ع بالى ..
بصتله ودموعها بتنزل قرب ايده وازالها "طارق" : تعالى ..تعالى ادخل مش هنتكلم ع السلم ولا انت وحشتك وقفه السلم وقعاد السلالم زى زمان ...
ضحكك"طارق": جداااا ..
دخلو الشقه وقعد "طارق" و"ايفون" دخلت المطبخ بتحضر العصير والكيك و"طارق" عيونه بتلف فى الشقه بعضها اتغيرت ولكن فى اساسيات متغيرتش ... رجعت |ايفون" :
_ معلش يا "طارق" معرفتكش فى الاول حكم السن بقي ,, وبصراحة كنت قلقانه منك من اسبوعين الشارع اللى ورانا ست كبيرة كانت قاعدة لوحدها فشاب كده لابس نضيف ومستحمي ساعدها تطلع حاجات شقتها واول ما فتحت الشقه ودخل موتها وسرقها ,,,
ضحك"طارق" : يااااه لدرجة دي انا شكلي شبهه ..؟
ضحكت"ايفون" : لا طبعا انت قمر ..بس هو كان يعنى مش باين عليه وعمل اللى عمله فخفت وقولت فره بقي وعليا الدور ...
_ زى ماانتي يا "فونا" الحوادث اللى بتحصل بتأثر معاكي مده طويله ..
_ اتغيرنا وكبرنا يا "طارق" ..
ابتسم "طارق": زى القمر ...
ابتسمت واترسمت ملامح حزينه : متعرفش يا "طارق" لما عرفنا خبر وفاه "صفاء" كنت هتجنن عليك وطول الوقت كنت مستنيه تنزل مصر واخدك فى حضني ومكنتش هسيبك ابدا ..
_ الخبر كان صدمة للكل عارف ,,الله يرحمها ..
_ جوز امك كويس معاك وانت عايش ازاى هناك احكيلى ل احسن اخبارك انقطعت ..؟
_ دكتور "عثمان" مش جوز امى دا ابويا اللى الايام عوضتنى به عن فراق بابا وبعده ماما
_ بس "وفيق" عمره ما يعوضه اى حد ,,
_ اكيد مفيش حد بياخد مكان الام والاب الاصليين لكن من رحمه ربنا علينا انه بيعوضنا ب اللى يطبطب علينا ويساندنا,, وهو مقصرش ولا عمره فكرنى ولا عاملنى انى ابن مراته ورفض انه يسيبني لوحدى وطول السنين اللى مرت دايما كان بيساندنى فى قراراتى ...
_ وحياتك عامله ايه ؟1. وايه النضاره دى يا واد انت نظرك ضعف زى "فونا " ..؟
ضحك"طارق": شويا بس دى حفظ نظر متقلقيش لسه ,, انا الحمد الله حياتى تمام
_ وشغال ايه ع كده بقيت مهندس زى ما كنت بتحلم فاكر طول الوقت كنا بنقولك يا بشمهندس يا بشمهندس لدرجة خلاص صدقت انك فى هندسة
ضحك"طارق": انتى فاكره ..؟
_ ايوه كان حلمك تكون زى "وفيق" انت كنت بتحب ابوك اوى يا "طارق"
_ ومازالت بحبه ولا عمره ما هيتنسي
_ يعنى بقيت مهندس ,,؟
_ لا دكتور ..
_ ايه ؟.. دكتور ؟!.. ودكتور ايه قلب ولا باطنه لو عظام انا ركبي ومفاصلى مش قادره اوصفلك بيقومو عليا بليل ولا عمك "وليم" ضهره بقاله فتره بيشتكي منه بيقفش و .. ..
قاطعها : "فونا".." فونا" انا دكتور امراض نفسيه وعصبيه ..!
_ نعم .. دكتور امراض نفسيه وعصبيه ,, زى اللى بيشتغلو فى العباسيه ؟
ضحك"طارق": ايوه ..
_ يا حبيبى ياابنى ليه عملت فى نفسك كده ,,انت غاوى فقر ,, سايب الباطنه والقلب والعظام التخصصات اللى تكسبك دهب ورايح لتخصص الناس اللمهوية ..,,
_ قصدك الناس اللى تعبانه نفسيا مش مهويه..؟
_ المجانين يعنى ؟
_ لا فى فرق بين الجنون والمرض النفسي ,, الجنون مرض من امراض الطب النفسي
_لا بجد ... ايه برده اللى رماك ع التخصص دا ؟
_ حبيته وحسيت نفسي فيه ..
_ حبيته ولا جوز امك اللى غصبك ماهو كمان كده ...؟
_لا خالص انا اللى اخترت وقررت .. الطب النفسي مهم جدا ميفرقش كتير عن التخصصات التانيه
_ وبتكسب ع كده ..؟
_ الحمد الله ..
_ المهم تكون مرتاح ومبسوط
_ جداا ..الحمد الله ..
_ انت مبتاكلش ليه موحشكش اكل "فونا" ولا ايه ,, دانت كنت بتهرب من "صفاء" علشان الكيكه بتاعتى ونصيبك تاكل منها انهارده ..انا صحيت الصبح ونفسي راحت لحاجه حلوة وبقالى كتير معملتهاش وجت ع بالي اعملها وانت اول حد ياكل منها .. وحشتك ؟
_ طبعا وحشنى جدااااا ..
_ حبيبى يا "طارق" صدقنى لك وحشه كبيره دا "ماجد" مش هيصدق لما اقوله ..!
_"ميجو" هو عامل ايه دلواقتى واخباره اتجوز اكيد ولا مقضيها سرمحه ..؟
_ ياريته ما اتجوز .. ايوه ادبس وب اسرع طريقه تتخيلها رغم انا كنت متاكده مش هيفكر فى الجواز وهيقضيها سرمحه لكن عملها ومعاه بنت وولد جاسمين 9 سنين و شريف 5 سنين
_ ماشاء الله ..اكيد صورتهم دى ( اشار ع صوره ع ترابيزه )
_ ايوه واللى معاهم دا"ماجد"ومراته "اميره"
مسك "طارق" البرواز: اتجوز "اميره" ؟
_ انت مش عارفها ولا ايه ؟
" أميره" اللى كانت بتيجى فى الاجازات عند عمتها "مارى" اللى فى العماره اللى قدامنا
_ ياااااه اتجوز "أميره" فى الاخر,, متعرفيش يا "فونا" كان بيعمل ايه لما يعرف انها جت فى الاجازه ..كان مبيتحركش من قدام العماره علشانها ..!
ضحكت "فونا" : عارفه يا حبيبى ولهفته دى خلاها خلص الجامعه من هنا واتقدملها ع طول واتجوزو
بص لصوره "ماجد" : اتغير "ماجد" عن زمان ؟
_ لازم يتغير اتجوز وعيال ومسؤليه وخناقات ونكد لازم يتغيير
_ ماشاء الله ولادهم قمرات ..
مسكت "ايفون" البرواز وباست الصوره : اهم دول احلى حاجه والحاجه الوحيده العدله اللى عملها "ماجد" فى حياته لغايه دلواقتى .. مفلحش فى اى حاجه غير دى ..!
ضحك"طارق": هو لسه بيعمل مشاكل ..؟
_ وهو يعرف يعيش من غيرها بس بيحب ينوع فى الشغل شويا و معانا شويا ومع مراته وهكذا ..
_ والله وحشنى ..
_ دا هيفرح جداااا لما يعرف ويشوفك,, من يومين كنا لسه فى سيرتك صدقنى ..!
_ والله وانتم ع بالى دايما لكن الظروف والانشغالات اخدتنى ..
_قولى بقى اتجوزت او خطبت ومعاك عيال وهما فين ..؟
ضحك "طارق": "فونا" انا لا اتجوزت ولا خطبت وطبيعى مش معايا عيال ..
_ يعنى الخواجات مفيش واحده وقعتك وانت حليوه كده ..؟
_ كان فى محاولات لكن انا كان تركيزى دراستي وشغلي ,,
_ جدع,, دا الباقيين اول ما خلصوا جامعتهم كلهم اتجوزو وكلهم اتخابو فى جوازاتهم مفيش غير "صبا" خلعت ...|
_ وهما عاملين ايه كلهم و ...
رن جرس الباب : ثوانى .. هشوف مين واعمل حسابك هتتغدى معانا ..!
_ لالالا غدا ايه (افتكر موعده مع "هدير" وفى نفس اللحظه رن موبيله وكانت "هدير")
رجعت "ايفون": لا انا قولت هتتغدا يعنى هتتغدا ..!
_ بجد مش هينفع انهارده عندى ميعاد مع ناس وهما مستنينى دلواقتى .. وعد هرجع وهزهقك منى انا نازل اجازه طويله ونازلها علشانكم مخصوص ..
_ خلاص احنا فيها ..الخميس اللى جى "ماجد" بيجى وعياله يتغدوا معانا هنستناك نتغدا سوا ..!
_ تمام اتفقنا ..
قام وقف "طارق" وحضنته"ايفون": يااااه فيك روح "صفاء" الغاليه الله يرحمها
_ الله يرحمها ..( باس راسها ) استاذن انا وع موعدنا الخميس ..!
_ ماشى يا حبيبى هستناك ..
خرج "طارق" من شقه "ايفون" وهو متملكه احساس غريب لكن جميل ومبهجه ان الماضى ما انتهاش والاشخاص موجودين دا كان مصدر فرحه له ... واتجه للمستشفى وفى الطريق امسك السلسه مردد : ياترى هتحصل الصدفه واشوفك وارجعلك امانتك اللى معايا 17 سنه ..؟
اتنهد ورجعها فى جيبه تانى ,,,

وصل المستشفى دخل غرفه "هدير" وكانت بتتكلم فى الموبيل وملامح وجهها متغيره ,, انتهت من المكالمه وخرجت مع "طارق" فى المطعم ,, "طارق" لاحظ تغييرها :
_ انا اسف ع التأخير لو عرفتي ...
لاحظ ملامحها المتغيره :مالك يا "هدير" فى حاجه ولا ايه ؟
_ "طارق" ...!
_ فى ايه ..؟
_ هو ينفع اطلب منك طلب ؟
_ اتفضلى طبعا ..
_ عاوزاك تقابل بنت تكشف عليها ..
_ ليه مالها وهى مين دى اوعي تكوني انتي ؟
ضحكت"هدير": لا خالص .. دى اخت صاحبتي دكتور التجميل حولها لدكتور امراض نفسيه علشان عاوز تقرير عن حالتها لانه شك انها مش طبيعيه ,,
_ ايه مشكلتها ..؟
_ شايفه ان مناخيرها كبيره ولازم تصغرها للعلم انها طبيعيه مش كبيره كبر الضخم الملفت وعملت العملية ومفيش مشاكل لكن هي مصممه تعملها ل تالت مرة ,, واغلب الدكاتره رافضين والدكتور وافق ع العمليه لكن بشرط طلب منها استشاره طبيب نفسي يكتب تقرير وبعدها يعملها العمليه ..!
_ امممم .. تمام هتيجى امتي المستشفى ؟
_ لا ماهى رافضه تروح المستشفيات ولا للدكتور احنا هنودى دكتور عندها اللى هو انت ..موافق ؟
_ مفيش مشاكل ... دى طبيعه شغلى .. تحبى امتى اقابلها ؟
_ ثوانى وهكلمهم ...
خرجت "هدير" واتكلمت فى الموبيل ورجعت ...
_ بكره الساعه 11 الصبح هما هيكونوا فى النادى وهى معاهم وهنقابلهم صدفه يعنى وتتكلم معاها وتحاول تفهملنا فى ايه عادي اللى هى فيه دا ولا فعلا فى مشكلة ..؟
_ مفيش مشاكل ...
_ بجد مش عارفه اقولك ايه ؟؟
_ متقوليش حاجه انا جبت السندوتشات هناكل ولا ايه لاني جعان ...
_ايوة طبعا يلا ..
وهما بياكلوا : "طارق" ليه فى اشخاص بيرفضوا يروحو لدكتور نفسي رغم ان دا ممكن يريحهم ..؟
_ ببساطة لانهم مبيبصوش ع مبدء الراحه هما رافضين فكره ان احتمال يكونو مرضى ,, رغم ان زياره الطبيب النفسى دا شئ صحى بعيد عن علاج ,, لكن أغلب المجتمعات وبالاخص فى المجتمعات العربيه بيبصلها ان دا مريض نفسى يعنى مجنون او سايكو يبقى نتجنبه وغير معترف بوجوده انسان وفاقد حقوقه الانسانية ودا بيولد خوف عند اى مريض انه يتقال عليه مريض نفسي فبيرفض انه مريض وفبالتالى رافض زياره عيادات الطبيب النفسى ,, لان اول خطوة فى العلاج النفسي ان المريض يعترف لنفسه انه مريض ومحتاج مساعده لان لو هو مساعدش نفسه مفيش حد هيقدر يساعده ....
_ علشان كده انت بتروحلهم مش هما اللى بيجولك ؟
_ يعنى دا سبب من اسباب منها اثناء كلامنا اوصله انه يعترف بنفسة انه محتاج مساعده طبيب نفسي فى جو بعيد عن اللى متخيله ومصدقه عن الدكاترة النفسيين الشزلونج والحبوب المهدئه والتسجيلات يعنى ..انا اوقات بعمل مقابلات اونلاين لمرضي بسبب الهلع اللى بيكون عندهم ..
_ وبتقنع المريض ازاى ؟
_ انا عمري ما فكرت نفسي دكتور مع اي شخص مريض ,,انا بتعامل انا انسان عندي كم قليل من المعرفة نتيجة دراسة وابحاث و فى استطاعتي اساعد انسان تاني طلب مساعدتي او انا شوفت انه محتاجها ومش قادر يطلب خايف متررد ولما بتكلم مش بحسسه انا دكتور بالعكس احنا اصحاب ومن هنا بيبدء يتكلم واسمع وبعدين انا اتكلم فى الوقت اللى يكون هو مستعد يسمع او عاوز يسمع,, ممكن اخلص المقابلة من غير ما اقول ولا كلمة عادي المهم عندي انه يخرج كل اللى جواه علشان اقدر اساعده لان مينفعش التنجيم ...
_ حوار كبير المرض النفسى ...؟
_ كبير جداااا واصعب وافظع من المرض العضوى لانه مخفي مش ظاهر وتوابعه ضخمه وعلاجه اطول وللاسف كتير مهملينه لانه مخفى غير واضح ...
_ نسيب بقي الكلام عن الطب ونركز ع الانسان عن واحد رجع بعد 17 سنه لمكان عاش فيه اول حياته وذكرياته كانت فيها ,, احكيلي ع احساسك لما روحت شقتكم بعد 17 سنه ؟
ابتسم "طارق": حسيت ان الماضى استقبلني وهو فاتح دراعته واخدنى بالحضن ,, رغم اختلاف حاجات كتير لكن الروح موجوده والاحساس حسيت ان ال 17 سنه كانو لحظات ,, اه شوفت "فونا" مامت "ماجد" اللى حكتلك عليها ..!
_ ايوه ..
بملامحه سعاده : وقعدت واتكلمت معاها ودا سبب تاخيري ,,
_ مشفتش حد تانى ..يعنى ...؟
_ قصدك "غدير" لا ... لكن فى معلومة اتقالت من "فونا" ان كلهم اتجوزو ماعدا "صبا" عموما بس اكيد هعرف اخبارها قريب ولما هقابل "ماجد" الخميس هعرف تفاصيل اكتر عنهم ..
_ يعني خلاص أمانه 17 سنه هترجعها لصاحبتها ؟
ابتسم: اخيرا ..
ابتسمت "هدير": انا مبسوطه لانك مبسوط اوى كده يا "طارق" ,,
_ فرحه وسعاده ملهاش وصف ..
_ ولما هتشوفهم كلهم هتفرح اكتر وتطمن اكتر والامانه ترجع لصاحبتها ..
_ ان شاء الله ...

تانى يوم فى تمام الساعه 11 صباحا دخلت "هدير" و"طارق " النادى لمقابله صديقتها واختها ووالدتها و قربوا ليهم لاحظ "طارق" البنت وهى حاطه ماسك ع وشها تخفى بيها مناخيرها قربوا منهم وسلموا عليهم ومثلو انها صدفه ..وقعدوا واتكلمو كلهم و"طارق" بيراقب تصرفاتها الصامته ,,قاعده ماسكه التاب وساكته حتى مشروبها الساخن برد ... قاموا و تركو "طارق" معاها وهى لاحظت ووجهتله الكلام :
_ اعتقد كفايه كده ساعه ونص باصصلى .. تقدر تكتب تقريرك اني سليمه زى ماانت شفت لا بشد فى شعري ولا باكل فى ضوافري ولا بصرخ ولا بصوت,, علشان اعرضه لدكتور ويعمل العمليه ..!
ابتسم "طارق": انتي عرفتي ان انا دكتور ؟
_ عارفه انى هقابل دكتور فى النادى هيجى مع "هدير" ..!
_ طيب واكتب تقرير ايه هو انا شوفت حاجه علشان اكتبها ؟
نظرت الفتاه بحده ل "طارق":هو دا اللى اقصده ان مفيش حاجه هتتكتب غير انى طبيعيه ,, كلهم شايفين انا غير طبيعيه ..انت شفت حاجه غير طبيعيه فيا ؟
_ بصراحة لا ..
_ بس كده اكتبها بقى فى تقريرك ..
_ طيب ممكن أسألك سؤال ؟
_ أتفضل..!
_ انتي كام سنه ..؟
_ 22 سنه ..
_ انتي ليه مكنتيش عاوزه تروحى لدكتور نفسى ؟
بنبره جديه :لان مفيش سبب اروح من الاساس ,, انا مش عارفه ليه دكتور التجميل طلب منى اروح لدكتور امراض نفسيه قبل ما يوافق ع العمليه ولما رفضت قالى انه مش هيعملها ومش هيسمح ل اى دكتور تانى يعملها ,,, هروح لدكتور وانا مش مقتنعه اصلا ب الزياره مشكلتى ملهاش علاقه بتخصصك يا دكتور ..الطب النفسى بيعالج مشاكل الناس النفسية وانا مشكلتى مشكله عضوية مش نفسية .. معرفش انا ايه علاقه الطب النفسى بمشكله انا عاوزه اعمل عمليه تجميل لمناخيري بجد ..؟
_ طيب تمام انتي مقتنعة ان مفيش مشكلة عندك غير مناخيرك صح ..؟
_ ايوه..!
_ايه هى مشكله مناخيرك طيب ؟
شالت المسك وشاورت ع مناخيرها : مشكلتى زى ماانت شايف ,, مناخيرى كبيره ومفيش تناسق بينها وبين حجم وشى ,, ببساطة انا عاوزه اعمل عمليه لتصغيرها لان العمليه الاولى والتانيه مضبطتهاش ,, دكتور التجميل فى الاول مكنش مقنع ولولا اصراري عملها ودلواقتي مش مقتنع وبيقولى ان مناخيرى طبيعيه ومتناسق مع وشى ومفيش داعى للجراحه ولما صممت طلب منى اروح لدكتور امراض نفسيه ,, احنا اهو باامانه وبعدل بصيلى كويس وبص للى حواليا بص مناخيرى مسيطره من ضخامه حجمها ع وشى ومخليانى قبيحه المنظر ..
ابتسم "طارق" : مفيش حاجه من اللى بتقوليها دى مناخيرك طبيعيه ؟
_ انت بتجاملنى ميرسى لكن اول ما شوفتها نظرتك الاولى اتخضيت لكن ابتسمت بعدها بتدارى اشمئزازك من قبح وشى ب ابتسامه ..
_ ليه بتقولى كده ؟
_ لان دا اللى بشوفه فى وشوش ونظرات الناس ليا فى كل مكان اكون فيه .ببعد عنهم لكن نظراتهم مطاردانى فى كل مكان ,, احط ايدى ع مناخيرى نظراتهم بتتحول لسخريه عليا اسيب المكان واروح اقعد فى مكان لوحدى فى رعب ان حد يشوفني وبيبصلي تانى كده ويسخر مني... مبقتش اقدر اتحمل حياتى بقت جحيم لا يطاق حسيت ب اكتئاب سيطر عليا فتره مبقتش اروح جامعتى ومش قادره اركز قررت ان مش هعمل اى حاجه الا بعد العمليه وعملتها لكن مكنتش مظبوطة لسه كبيرة وعاوزة اعملها تاني ...
_ والدكتور رفض ؟
_ رفض وبشده ..
_امممم
بنبره جد : انا حاليا مفيش قدامى غير اختيارين يا انتحر يا العمليه لانى مش هستحمل نظرات الناس واعيش وسط سخريتهم ونظراتهم ومعاناتى اللى ملهاش اخر ,, هتتفاجئ لما قولتلك انتحر؟! ..ايوه حياتي ملهاش طعم وع طول خايفه ااقابل ناس بشكلي ده بتجنب نظراتهم مفيش استمتاع ب اى حاجه ,, يعنى ايه تعيش وانت وشك قبيح ومحاصر طول الوقت بعيون الناس ,, انا مبقتش اشوف وشوش انا اللى بشوفه عيون محاصراني قدامي وجنبي وورايا فى كل مكان عيون عيون ,,, حتى انا ,,, لما بقرر اعتزل الناس واقعد مع نفسى عيوني تحاصرني وتطاردني .. المرايا ع طول معايا او قدامها مببعدش عنها ولا لحظه,,فى كل مكان فيه مرايا فى الاوضه ومعايا فى شنطتى وع مكتبي,, وانا نايمه فى الضلمه المس مناخيري ب ايدى ,,(رفعت ايديها وحركت صوابعها ) صوابعي حفظت حجم مناخيري .. شكل مناخيري اتحفر فى دماغي منتفخه غليظه فى وسط وشى حولتنى لمسخ ,,,
_ وراي اللى حواليكي ايه قالولك ايه ؟
بعصبيه: اكتر حاجه مضايقانى هما اهلى ماما واختى كل ما يشوفوني يقولولى ان مناخيري صغيره مش محتاجه عمليه اكتر من كده ,,, ماما كل مره اسئلها ترد نفس الرد واصحابى بيرددو نفس كلام ماما وانا عارفه هى اللى قالتلهم يقولوا كده ..كذابين كلهم .. انا روحت ل اكتر من دكتور جراح تجميل وكلهم رفضوا الجراحه واخر واحد طلب منى اروح لدكتور نفسي يكتب تقرير عن حالتى ..(بنبرة تهديديه) انا دلواقتى بعد اللى قولتهولك واللى انت شايفه بطلب منك تكتب تقرير بالموافقه ع اجراء الجراحه الا هعملها لنفسى او هموت نفسى .!
سكت "طارق" لحظات وبنبرة حزينه : اذا انت فعلا دكتور نفسى ارحمنى من معاناتى دى وعذاب اللى عايشه فيه ,,انا مش طالبه غير اعيش طبيعى زى باقى الناس ,,كل ما اكون مع اصحابي او قرايبي يتريقوا عليا ف انا مش عاوزه اسمع حد بيتكلم عن مناخيرى انها كبيرة ويتريق حتى لو بهزار او يتكلم مع ورايا عليا ,,محتاجه لما ابص فى المرايا احس برضا عن وشى وملامحى من غير عيوب ..عاوزه احب وشى (شاورت ع وشها ) انا بكره الوش دا وبقيت اكره نفسى ..عارف يعنى ايه تكره جزء من جسمك وتكره نفسك ؟!,,عارف يعنى ايه كل مره ببكي وببص للسما واسئل ربنا ليه خلقتنى كده ليه خلقتني بالوش دا ليه انا بالذات ايه ذنبى علشان اعيش العذاب د؟! ...انت تقدر تعيش مع انسان بتكره ..تخيل انك تكون كاره نفسك ..ازاى مطلوب منى اعيش مع نفسى وانا كارهها ..ازاى اعيش وانا رافضه جزء من جسمى ..؟ علشان الانسان يعيش حياته ويستمر لازم يكون راضى عن جسمه اللى عايش به وبيتحرك به فى كل مكان
_ عاوز اقولك ان ... ..!
_ هتقولى زى ماقالولى كتير ان الروح اهم من الشكل صح ..؟
_ ايوه ...
_ لا انا اختلف معاكم الشكل مهم فى البداية .. بشكلك بتتعرف ع الناس وبتقربو لبعض والناس بيرفضوا او بيقبلو شكلك اولا واذا رفضوا شكلك هيرفضوا اى حاجه مهما كانت ايه ودا رد ليه ربنا خلق لينا عيون علشان نشوف الاشياء والوجوه الجميله ..نشوف الشكل والجسم وخلق الودان علشان نسمع الاصوات ونقول دا صوت حلو ودا صوت وحش ولما بتسمع صوت وحش بتسده ب ايدك ..اهو دا اللى بيحصل لما بتشوف وش قبيح بتبعد وشك ...
_ امممم ..
_ اخر حاجه عاوزه اقولهالك .. انت وهما هتتحملوا مسئوليه موتى لو مكتبتش التقرير بالموافقه ..
_ اممممم .. عاوزه تقولى حاجه تانى ..؟
_ لا خلاص ...
_ انا هكتب التقرير زى ما انتي عاوزه ..!
_ كويس
_ لكن زى ماانا سمعتك حاولى ..حاولى تسمعينى قبل ما اكتب التقرير وحاولى متقاطعنيش فى الكلام حتى لو متفقتيش معايا لان قبل ما اتكلم عارف انك مش هتقتنعى بكلامى ..تمام ..
_ حاضر ..
_ فى ناس كتير حوالينا بيتولدو بملامح مختلفه بمقاييس مختلفة ودا بيسبب ليهم مشكلة وبيسعوا دايما لعمليات علشان تكون كل حاجه مظبوطه لكن اغلبهم مش عارفين ان عندهم مشكلة وهى مشكلة "استبصار" يعنى هما غير واعيين بطبيعه حالتهم واصلها ,,لان لو عندهم وعي كانوا ع الاقل فكروا وراجعوا نفسهم واقتنعوا بكلام اهلهم واصحابهم ودكتور المختص ,, هما بيكونوا شايفين ان كلهم كذابين لانهم شايفين المنطقه اللى عاوز يعمل فيها عمليه طبيعية لكن هما شايفينها بشكل مختلف قبيحة ,,كلهم متفقين انه طبيعي الا هما .. لانهم شايفين بمخهم مش بعنيهم ,,
_ انت عاوز تقول ايه بالظبط ..؟
_ عاوز اقولك كلنا وانا معاهم متفقين ع حاجه واحده ان مناخيرك طبيعيه ومش محتاجه عمليات تانى واساسا فى الاول مكنتش محتاجة وهنا مشكلتك .. انك شايفه مناخيرك بمخك مش بعينيك .. مخك حصله اضطراب لانه لو شافها بعينيه زى اللى حواليه كان هيشوفها طبيعيه ومفيش حاجه لعمليات ..!
_ انت عاوز تقول انا مريضه نفسية عندى اضطراب ؟
_ اللى عندك حاله نفسيه اسمها (اختلال الشكل) والعرض الاساسى فيها هو فكره غلط بتسيطر عليكى وبتقتنعى بيها جدااا ,,فكره تتعلق بجسمك او شكلك..ف انتي بتشوفى جزء منه شكله مختلف وشكله وحش بسبب تعليق بسيط كان مجرد هزار من بعض الاشخاص قابلتيهم ,, تكرار كلامهم وتلميحاتهم ليكي رسخت فى عقلك ان فى مشكله فعلا ف انتى بس اللى شايفه دا ودا بيتاكد لما تسألى اللى حواليكي ومفيش حد بيشاركك رايك بالعكس شايفها طبيعيه وشكلها مش وحش .. فى حاله "اختلال الشكل" مهما حاولو يقنعوكى انك غلط ومش صح رويتك وقرارك انتى مش هتصدقيهم لانك مصدقه الفكره ,, فكرة انك مش جميلة ومحدش هيحب يبص عليكي ولما بتبصي فى المرايا بتركزي ع فكرتك وبتصدقيها وبتفتكري تريقتهم منك وكلامهم وبعدها بيسيطر عليكى احساس الكأبه والعزله لان الناس بتلحقك بنظراتهم وتعليقاتهم ف انتي بتتجهي لعمليات او الانتحار لانك كرهتي شكلك وكاره الجزء اللى علقوا عليه وقالو انه مش جميل ..
استكمل "طارق" : فى كتير زيك بيعانو من نفس المشكله "اختلال الشكل" يعنى فى اللى بيشتكى من شفايفهم طخينه او رفيعه زياده عن الزوم والدقن مدببه او عريضه او طويله والحواجب العاليه او المنخفضه والطخن والرفع ,,يعني مثلا مره شاب عمره 21 سنه كان مقتنع ان ايده اليمين اقصر من ايده الشمال ورجل اطول من رجل لانه سمع تعليقات بكده بين اصحابه فعملتله مقاسات علشان اثبتله ان الفرق مش كبير لدرجه التدخل الجراحي وان كله مضبوط ومع ذلك كذب المقاسات واراء اللى حواليه منهم الدكاتره المختصيين لانه مصدق ان فى حاجه غلط ,,صدق الفكرة اللى اترسخت فى مخه ..مد ايده ع المكتب ويطلب منى ابص كويس تاني والاحظ الغلط اللى هو شافه ولما صممت ع راي قال عليا كذاب لانه شايف ان فى غلط وهو اصلا مش موجود .. الناس اللى كده بيعيشو حياتهم وبتقف ع المشكله دى ينامو ويصحو الفكره مسيطره عليهم ان فى غلط وفلان وفلان قالولى كده وفلانه بصت واتكلمت عليا وفلان اتكلم من ورايا لما شافني ..فى منهم بيسيب شغله ودراسته وبينعزل عن الناس وبيتوجهو لعيادات الاطباء المتختصيين ل اصلاح الغلطة اللى فى جسمهم ونادرا جدااا لما يحسوا ويعرفو ان عندهم مشكله نفسيه زيك...
_لكن فى ناس بيبقى عندهم مشكله فى ملامحهم فعلا مش تهيات ولا خلل زى ما بتقول ..
_ ايوه وبيكون ضروري التدخل الجراحي لان مفيش حل غيره ودى الحالات الكبيره لكن فى حالات بيكون فى اختلاف بسيط ومش بيتلاحظ حجم ولا شكل ..معظم الناس عندهم عيوب فى شكلهم ومش كل الناس بيتمتعو بجمال الشكل او التناسق وفى ناس حظهم من الشكل متواضع جدااا لكن عايشين ومتقبليين لان كل انسان طبيعى بيتعود ع شكله وبيقبله لانه راضى عن شكله مهما كان و بيحب شكله وبيلاقى اللى بيحبوه بالشكل دا ...
طلب "طارق" حضور اخت ووالده المريضه :
_ حقكم تفهموا حالتها علشان تساعدوها حالتها هى عندها خلل فى الادراك حصل نتيجه اضطراب تفكيرها مع احساسها الاتنين منفصليين عن بعض لما بتبص فى المرايا مبتشوفش وشها كله بتشوف مناخيرها بس اللى التعليقات والكلام كان موجه عليها ف اقنعت نفسها ان فيها مشكلة لكن لو كان تفكيرها واحساسها الاتنين مندمجين مع بعض كانت هتشوف وشها كله ع بعض ومش هتلاحظ اى اختلاف حتى لو موجود ...
تدخلت اخت المريضه : ايه السبب اللى وصلها لمرحله دى يا دكتور ؟
- بتحصل الحاله دى غالبا فى فتره المراهقه او بعدها وخصوصا بعد حصول التغييرات الفيسولوجيه المتلاحقه فى فتره المراهقه ..التغييرات دى بتكون مفاجئه وسريعة وورا بعض ومرتبطه بالجنس ودور الانسان فى المجتمع اللى عايش فيه ومع الجنس الاخر ونظره المجتمع المحيط به له بتتغير ,, فبيحس بتغييرات ونمو جسدى بيسبق النمو النفسى فى المرحله دى فبيودى اللى تشتيت نتيجه كلام واراء الاشخاص اللى حواليهم هزار او تريقه هو بيصدق انه فعلا عنده مشكله ومشكله كبيره فبينحصر تفكيره ورؤيته فيها بس وبيعيش حياته فى محاولات تحسين المشكلة دى ,, الحاله عاده بتحصل ل مرتفعى الذكاء بيحبوا يفكرو فى كل حاجه وتفكيرهم بيكبر وبتحصل ل الاشخاص الانطوائيين الخجوليين الحساسين بيتحرجوا يتكلموا فبيعتمدوا ع نفسهم وافكارهم اللى بيوصلولها وبيصدقوها والشخص المحب لذاته اللى بيهتم بكل حاجه فى هيئته بيبقى عاوز كل حاجه مظبوطه واحلى حاجه وبتحصل ل الاشخاص الموسوسين والمترددين ,,
استكمل "طارق" كلامه موجهها ل المريضه : المشكله هنا انهم لما بيصرو ع الجراحه والدكتور بيوافق علشان المريض يسكت او تجنب تهديده الدائم ب الانتحار وبتتعمل العمليه لكن حالته بتسوء اكتر لان الصوره اللى موجوده فى عقله لسه متحققتش لان العمليه غيرت شكل العضو اللى بيشتكى منه فى جسمه لكن مغيرتش اداركه وتفكيره واعتقاده وهنا بيؤكد غياب الوعى والتفكير المنفصل عن احساسه هيدخل دوامه عمليات وهيكون غير راضى وهنا بيأذى وبيشوه نفسه نفسيا وجسديا ,,, (نظر ل اهل المريضه ) الحاله دى بتكون اوقات عرض لمرض تانى زى الفصام لكن الحمد الله هى موصلتش لمرحله دى ... علشان كده بنقول دايما بلاش الكلام الجارح والتعليقات او الهزار اللى بيكون موجهه لجزء موجود فى جسم الانسان هو مش واخد باله منها او بيتعامل عادي ومتقبلها ولكن بيسمع كلام مجرد هزار بيجرح روحه وبيحول تفكيره ورؤيته للجزء دا وبيلغي كل الجسم وكل الاراء التانية ومع الوقت الجرح بيكبر جواه بيكيبر وبيعاني منه الشخص نتيجه تعليق بهزار ,,الكلمه الطيبه بتكون افضل غير كده يبقي بلاش لان دى اذيه بتبدء ب اذي النفس وبتنتهي ب أذى الروح ,, كلنا بشر ..!
مسك "طارق" ايد المريضه " وطبطب عليها وب ابتسامه : ربنا جميل بيحب الجمال ,, معناه ان كل حاجه جميله لكن معناه الاكيد انه مخلقش حاجه وحشة,, الانسان ربنا خلقه جميل والاختلاف اللى بينا دا علشان يميزنا كبشر مش يميزنا بين قبح وجمال ... قبح والجمال بيكون الروح اللى بتعيش معاه عمره كله الجسم متغير ,, الانسان الراضي الطبيعي بيقبل شكله زى ماهو لانه بيقبل الاشخاص التانين بنفس الطريقه ,, العلاقات بين الاشخاص بتتم بقبولهم لبعض بعيد عن الشكل زى مشاعر الحب والكراهيه مبتعتمدش خالص ع الشكل ,,لما واحد بيحب واحده بيحس ب انجذاب ليها لما بيتعامل معاها ملهاش علاقه بالشكل ممكن يكون شكلها عادى وهو شافها وقتها ملكه جمال ودا حصل لان الانسان دا من الاساس متقبل شكله وراضى والمعنى دا اتخزن فى ذاكراته ولما قابل الانسانه العادية البسيطة شكلها ارتبط بالمعنى القبول والرضا فى ذاكرته ولما شافها اتحركت مشاعر الحب اتجاهها ,, ولما بيقولها انا بحبك معناها انا حبيتك من اول ما عرفتك ومهما كنتى بحبك ...
رجع بضهره ورا وب ابتسامه :
_ هحكلكم موقف حصل لصديق ليا فى لندن مع مراته,,هى عادية و كانت دايما بتحب تكون فى اجمل شكل ففى يوم اشترت فستان جديد وعلقته قدامه علشان يشوفه ويقول رايه لكن هو شافه وسكت تاني يوم قاعدين مع بعض :
_ انت ملحظتش الفستان الجديد متعلق امبارح قدامك رغم انا بصر تكون انت اول شخص يشوف اى فستان جديد اشتريه ..؟
ابتسم ورد عليها وقالها : بصراحه انا شوفته لكن موصلنيش معناه عادى يعني ,,!
استغربت: وهو الفستانين ليها معانى ؟
قام وحضنها : بكل تاكيد ,,انتى اللى اخترتيه ب احساسك لما لاقتيه مناسب لجسمك ولما لبستيه اتحول لمعنى جميل مكنش باين وهو متعلق بعيد عنك ...!
_ وايه المعنى اللى اكتسبه الفستان لما لبسته ؟
قالها : جمال احساسك ..
ابتسموا كلهم :احنا متفقين ان الشكل مطلوب مننا نتقبل ونرضى و نهتم به لكن فى الطبيعى لانه متغير مع الوقت غير ثابت الاهم الروح منجملهاش علشان متتعبش ولا ترهق ولا تهرب مننا ,,الروح والاحساس هما الدائمين ,, ودايما نحاول منفصلش احساسنا عن تفكيرنا لان وقت ما يحصل فصل بيبدء المعاناه ,,,عمليات التجميل اتوجدت لتصليح الحروق والجروح وتنسيق ودى حالات منفرده لكن علشان الشكل يبقى بريفكت الانسان طماع مهما عمل هيطمع والنتيجه هيخسر شكله وراحته ,,,
بص "طارق" للمريضه: عرفتى ليه الدكتور طلب منك استشاره طبيب نفسى ..؟
_ ايوه ..
_ هتروحى بقى لطبيب نفسي لانك محتاجه جلسات مش كتير تساعدك تدمجى الفصل اللى حصلك .. وبعدها القرار اللى هتقرريه هيتنفذ وانا اوعدك ...هتروحى ؟
سكتت للحظات وهزت راسها : هحاول ..
ابتسم"طارق": يبقى هتروح ودكتور "عز" ممتاز وهيساعدك ,, "هدير" ظبطى انتى المواعيد ليها مع الدكتور "عز"
__ هو حضرتك مش دكتور ؟
_ انا مش مقيم هنا انا فى زياره لكن رقمى مع "هدير" اى وقت تحتاجو استشاره انا موجود ..!
_ شكرا يا دكتور ..
شاف "طارق" البنت ماسكة الماسك مسكه منها وقالها : ممكن استعير منك الماسك دا لان "هدير" عندها انفلونزا وعماله تعطس وانا مش عاوز امرض ونسيت اشتري ماسك ..
سابت الماسك :يلا يا هدير احنا بقى ...
مشيوا وابتسمت "هدير" ونظرت ل "طارق" ب ابتسامه مبهجه واتنهدت واتكلم "طارق" :
_ هتغدينى ولا هتجوعينى ..؟
ضحكت "هديل": لا هغديك داانت اتكلمت كلام اكيد هضمت اكل الاسبوع اللى فات
بهزار: اكل العيش مش ساهل يا اختى
_ بجد مش عارفه اشكرك ازاى ..
_ مش محتاج شكر .. بس حاولى تتاكدي من زياراتها لدكتور "عز" وانتهزي الفرصه قبل ما ترجع فى كلامها ..
_ اكيد بكره اول ميعاد معاها .. مش عارفه اقولك ايه من وقت ما رجعت وانت بتشتغل فين الاجازه انا لا اراها
_ ومين قال دا شغل .. دى مساعده اقدر عليها وبعملها ..
_ ربنا يزيد مساعداتك ..
_ يارب .. هاله هتكون موجوده صح ..؟
_ اها كلمتها وخرجت وهتسبقنى ع المطعم ..
_ تمام ..يلا بينا يا شوفير
_ تمام يا دكتور ...
ضحكوا وكملوا كلامهم فى العربيه واتحركو ع مطعم واتوجهوا للمستشفى .....

"ماجد " كان بيزور والدته ودخل :
_ "فونا " انا جعااااااااااااااااااااااااان يا "فوووووووووووووونا "
_ ايه دا ايه الازعاج دا كذا مرة اقولك لما تيجي كده متخضنيش
_ وتتخضى ليه يا حسره هو فى غيرى بعبركم
كانت ماسكه فوطة مطبخ وحدفتها عليه : معرفتش اربي
_ انتي لسه مكتشفه الاكتشاف الرهيب دا ولا ايه .. فكك يا "فونا" اعطينى بعض من الطعام
_ بس خير ايه جابك انهارده هما بيطلعوا امتى ؟
بص ع ساعته: من الساعه 4 ل 6 هاهاهاهاها
_ ظريف ياواد
_ ميرسى طالع لمامتى ,, عندك اكل ولا انزل اضرب كشرى ؟
_ ومروحتش ع بيتك ليه تتغدى مع مراتك وولادك ..؟
_ لا احنا اتخنقنا امبارح انا و "حزينة" وطبيعي تانى يوم الخناقة الناس كلها بتنسي وتعيش الا هى بتعاقبني وبتعمل سبانخ وانا ك "ماجد" انسان طبيعي مبحبش السبانخ ..
_ وانت ايه عرفك انها هتعمل سبانخ ؟
_لا ماهي بتعمل ايه عارف ان انا اول حاجه بعملها لما اصحي بتجهه ع التلاجه واول ما فتحت التلاجه شوفت السبانخ ع الصبح ,, وانتي عارفه يعنى ايه سبانخ بالنسبالى ..؟
_ كذا مره اقولها بلاش الموضوع دا ..بتدخل الاكل ليه فى خناقتكم ؟
قاطعها : وبترد عليكى بمنتهى البساطه انا عاملاه ل الاولاد السبانخ يعنى حديد وهما محتاجين غذا ويولع ابوهم ..
_ مش هتبطلوا خناقكم دا انا زهقتلكم ..؟
_ منبقاش متجوزيين ..!
_ ماانا وابوك اهو شوفتنا بنسيب البيت لبعض ولا بنتخانق ..؟
_ وهو انتى بتديله فرصه .. الراجل ع طول طفشان يا ع القهوة مع اصدقاء السوء يا فى الكنيسة بيصلي وبيطلب من ربنا يسامحه ع قرار اللى اخده وقلب حياته انا خايف ليترهبن ويسيبك ونا هطفش معاه متضامن ..
ضربته بالفوطه : بالسلامه انت وهو يااكبر ذنب فى حياتى
_ طيب كفري عن ذنبك و اكلينى طيب والذنب يبقي خير يلا ..
_اترزع مكانك عقبال ما احضرلك الغدا ..!
_ اوعى يكون سبانخ هنطلك من بير السلم وقبلها هكتب رساله انتحار انت و"حزينه" والسبانخ السبب
قامت من مكانها "ايفون" وخبطته بالفوطه وحضرتله الغدا :
_ كنت هكلمك بليل ..!
_ ليه ؟
_ ااكد عليك تيجى الخميس متبعتش العيال وتنزل تتسرمح مع "ياسر" وتقعد معاه وتعدى بليل تاخدهم وتروح بس ...
_ ليه فى حاجه ؟
_ فى مفاجاءه ..
_ مفاجاءه و"اميره" موجوده لا شكرااا ..اتفاجئو انتو براحتكم وانا لما ارجع ابقو قولولى ملخص المفاجاءه ايه وانا هتفاجئ وهفرح اوى اوى صدقينى ..
خبطته ع راسه : بطل ظرافتك دى وهتكون موجود ومش هتروح فى مكان فاهم..؟
_ ليه بس طيب قوليلى اول 6 كلمات من المفاجاءه وانا هنجم الباقى ...|
_ فاكر من اسبوع واحنا قاعدين مع بعض واتكلمنا ..؟
_ اها ..
_ مين اللى قولتلى نفسك تشوفه وقتها ؟
_ ربنا ..ياخدنى علشان ارتاح من "حزينه"
خبطته ع راسه: بطل هبل ..
_ مين يعنى مش هفتكر انا كلام قولته من اسبوع انا بنسى لسه قايل ايه من شويا ..
_ "طارق"
_ طارق علام بتاع دهب دهب دهب
خبطته ع راسه : بطل استظراف ياابن "وليم" ..؟
_ مين "طارق " مين ؟
_ معقوله نسيت .. "طارق وفيق" الدور 3 ...
_ ياااااااه يا "فونا" ايوه قولتلك كده فعلا .. واهى كلها امنيات زى بالظبط كده تحصل معجزه واتخلص من "حزينه"
_ بطل تقول ع مرات الاسم دا وبعدين تعمل ايه للى يجبلك "طارق" وتشوفه وتقعد معاه ..
ب ابتسامه : يااااااااه هديله "اميره" وانتى هديه فوق البيعه ..!
خبطته ع راسه : انا غلطانه اللى بتكلم معاك كمل اكل كمل
مسكها من ايديها : ايه يا "فونا" بهزر معاكي انا مقدرش استغني عنك ..
_ ولا عن مراتك ..فاهم ..؟
_ لا كده فى كلام تانى هعيد تفكير .. المهم سيبك منها كملى انتى عرفتى حاجه عنه ولا ايه ؟
ب ابتسامه : امبارح "طارق" بذات نفسه كان قاعد معايا هنا ..
بملامح مفاجئه : ايه .... هنا فين .. انتى متاكدة انه "طارق"؟
_ يعنى انا مش هعرفه ولا مش هعرفه ؟
_ ماممكن يكون محصل الكهربا ماهو اسمه "طارق"
_ لا يا خفيف هو "طارق وفيق "
لاحظ الجديه فى كلامها ساب الاكل : بتتكلمي بجد .."طارق" نفسه هنا فى مصر ؟
_ ايوه ..نزل اجازه نسيت قد ايه وانا قولتله يجى ع الغدا يوم الخميس علشان انت هتكون موجود .. متتاخرش بقى
بملامح سعاده : ياااااه بعد 17 سنه رجع اخيرا .. شكله زى ماهو ولا اتغير يا "فونا"
_ لا دا بقى حاجه تانيه ..دكتور وحاجه حلوه كده مش زى ناس ..!
_ دكتور ... مبقاش مهندس يعنى كلنا احلامنا طارت فى الهوا ..
_ عموما اعمل حسابك والصايع التانى قوله يجى ..
_ "ياسر" .. مسافر بكره البلد ل اهله وهيرجع السبت
_هقوم اجبلك الشاى
ابتسم "ماجد " : يااااه يا "طارق" ,,,,


يوم الخميس صباحا اتجه "طارق" الى مستشفى دكتور "عزت" مع والده دكتور " عثمان " وقابل "هدير" :
_ "طارق" .. ايه المفاجاءه دى مكنتش اعرف انك جى انهارده ..مش المفروض انك معزوم ع الغدا ولا هتحضر ندوه الدكتور "عثمان" ؟
_ لا انا وصلته وجيت علشان عاوز منك خدمة انت الوحيدة اللى تقدرى عليها ..؟
_ طلباتك اوامر يا دكتور بس هتدفع كام ؟
ضحك "طارق": اللى انتى عاوزاه ..؟
_ نتعشى مع بعض انهارده .. مش هيعدى اليوم غير ما تحكيلي اول لقاء مع اصحابك بعد 17 سنه ؟؟
ضحك "طارق": انتي فاكره انه انهارده ..
_ انا منساش حاجه لك ابدا .. ها اتفقنا ..؟
_ بس كده اتفقنا
_ طيب تمام .. ايه نوع الخدمة ؟
_زى ماانتي عارفه انا معزوم عند "فونا" انهارده ..؟
_ ايوه وهتقابل "ماجد" ..
_ ايوه .. ف انا مش عارف نوعية الهدايا اللى اروح بيها ,, انا بعيد عنهم 17 سنه واكيد حاجات كتير اتغيرت واللى كانو بيحبوه من 17 سنه اكيد اتغير ومش عاوز اجبرهم ع حاجه مش بيحبوها ..
_ عاوز حاجه تكون كحل وسط منها تكون مقبوله ومضمومنه حاليا ..؟
_ ايوه .. وانا جاهل جداا فى موضوع الزيارات دا انتي عارفه فى لندن الموضوع ابسط عن مصر
_ بس كده مفيش مشاكل اعتبر الهدايا جاهزة ..
لحظت "هدير" توتر"طارق": ايه يا دكتور انت متوتر كده ليه بسيطه انت رايح تقابل صديق طفولتك
_ انا مش متوتر انا فرحان جداا لدرجه مش عارف افكر فى اى حاجة ..
_ هيكون يوم جميل وذكرى حلوة هتكمل بيها ذكرياتك لقديمه وحظك حلو انا قدامى ساعتين راحه هغير هدومي واجيلك ونروح نشتري الهدايا ؟
_ تمام ..
اتجهت "هدير" مع "طارق" الى وسط البلد وتجولو فى المحلات واشترو هدايا لعب ل اولاد "ماجد" وشوكولاتات وحلويات وجاتوه وهديه ل "ايفون" و "وليم" و"اميره" زوجه "ماجد" ووصلته "هدير" ل امام العماره :
_ انت كنت عايش فى المنطقه دى ؟
_ ايوه ..
_ فى العماره دى ؟
_ ايوه
_ وكنت بتقعد مع اصحابك ع السلم دا وبتشربو عصير عند محل العصير دا وبتاكلو كشرى من المحل دا
ضحكك"طارق": ايوه.. انتى بتسمعي ولا ايه ..؟..
_اعمل ايه .. انت طول السنين دى ملكش سيره غيرهم لدرجه انا حسيت ان كنت معاكم
_ طيب ما تيجى معايا ..؟
_ مره تانيه ..اولا هما مستنينك انت وثانيا مينفعش اكبس ع الناس كده وهما مش عاملين حسابهم وثالثا انا فعلا عندى شغل فى المستشفى ..
_ يبقى اعملى حسابك المره الجايه هتكونى معايا
ابتسمت"هدير": اكيد .. انبسط انت وقضى وقت حلو معاهم وهستناك نتعشى سوا وتحكيلى ع كله
_ تمام ..
نزل "طارق" من العربيه ودخل العماره وهو فى منتهى السعاده وطلع السلم وبيتخيل مقابله "ماجد" الاحضان والضحك ورن جرس الباب وفتح الباب "ماجد " بملامح جد : ايوه ..
_ انا "طارق "
بملامح جد : طارق مين حضرتك ..انت عاوز مين ؟
_ ماجد ..
_ اه تقصد "ماجد عليم " ساكن فى العماره اللى جنبنا
_ مين ع الباب ..
_ واحد غلطان فى العنوان يا "فونا" .. ع اذنك ,,
وقفل "ماجد" الباب وملامح صدمة اترسمت ع وجه "طارق" اتجمد مكانه ..!

يتبع ...