زهرة التوليب

( 7 )

دخل "ياسر" الشقه وقعد ع اول كرسي يقابله وسند راسه لورا واتنهد وبعد لحظات نظر في انحاء الشقه وتذكر اول لحظات لتوضيب الشقه مع "منة" وهى فى منتهي السعادة واول زواجهم وعاودته ذكرياته مع "منة" فى اول زواجهم ولحظات الرومانسيه التى جمعتهم سويا وابتسم ثم تذكر لحظات انتظارها له ساعات ومكوثتها بمفردها فى المنزل بين الجدران البارده ومقابلته البارده له فى عودته وتجهيزاتها للقائهم ومخالفه لوعوده وكم الفرص اللى ضيعيها ,, احساس الالم التى عاشت به "منة" امسك هاتفه واتصل ب " منة " :
_ الو ..
اتوتر لحظه : ايوه يا "منه" انا "ياسر" ..
_ ايوه يا "ياسر " فى حاجه ولا ايه ؟
_ انا صحيتك ولا معطلك ..؟
_ لا ابدا .. بس الساعه 3 بليل فى حاجه ؟
_ انتى عامله ايه ؟
_ الحمد الله وانت ؟
_الحمد الله ..
لحظات صمت :
_ ياسر ...
_ ايوه ..
_ انت متصل فى حاجه ؟
_ لا كنت حابب اطمن عليكى بس
_ انا الحمد الله كنا مع بعض انهاردة .. انت كويس ..؟
_ ايوه الحمد الله
لحظات صمت :
_ طيب يا"ياسر" انا هقفل علشان هنام و..
_ وحشتينى يا "منة"
_ ياسر ..
_ معقوله اكون موحشتكيش ..؟!
سكتت "منة"واستكمل "ياسر" كلامه :
_ انا مش عاوز اسمع حاجه انا بس اتصلت علشان وحشتيني و اسمع صوتك تصبحى ع خير
قفل "ياسر " الموبيل و "منة" متفاجئه من اتصال "ياسر" ونبره صوته المقلقه ,,كانت "صبا" موجوده لاحظت ملامح "منة" المتغيرة محبتش تتدخل وعملت نفسها مش شايفه ..!

مر يومين و"ماجد" حب يتصالح مع "اميره" ع اساس انه حاول .,, بص ع الساعه وكانت 10:30 ,, دخل ع غرفه ولاده طمن عليهم ووضع قبله ع جبينهم وكانت "اميره" نايمه...نظر اليها للحظات وقرر انه يبدء من جديد واول خطوة تكون منه وانه يحاول يصلح علاقتهم بدل الحرب يعيشو بالحب اللى ربطهم ... قرب من السرير :
_ اميره ..اميره
_ ايه يا ماجد فى ايه ..؟
_ قومى عاوزك ..
_ ايه متعشتش بره عندك الاكل فى التلاجه سخن لنفسك وكل
_ بقولك قومى عاوزك مش عاوز اكل ..فرصه والعيال نايمين و..
_ يوووه يا "ماجد" مش قادره انا ل قله الادب ..
تعجب "ماجد": قله ادب انتى فهمتى ايه ؟!.. بقولك قومى عاوز اقولك حاجه نتكلم ..نتكلم لوحدنا
بصوت عالى : بقولك مش قادره تقولى نتكلم .. الصباح رباح
نظر اليها "ماجد" بعصبيه : نامى ..نامت عليكى حيطه قال اتكلم معاها بهدوء قال ... انا متخلف علشان فكرت فى كده ...نامى ..نامي ...!

مر يومين وكان "ماجد" كان "ماجد " عند والدته "ايفون" :
_ حلوه البامية ؟
_ احسن بكتير عن السبانخ .. والكوسة اللى مفيش غيرهم فى البيت ..
_ انت مروحتيش ليه عند "ماري" ؟
_ اروح ليه ..انا قولت مش رايح وهى عارفة كده مبحبش القعدة هناك عالم قفيلة ..
_ كنت تروح علشان مراتك اقعد شويا وامشي زى ما بتعمل هنا ..
_ تقارني نفسك بيهم يا "فونا" والله عيب ..
_ اهو انت اللى بتجيب النكد لنفسك
_ "فونا" هى السبانخ دى مش المفروض انها مواسم ؟
_ ايوه فى الشتا ليه ؟
_ طيب ازاى موجوده طول السنه انا مش فاهم ..!
_ علشان بقى فى منها مجمده يا حمار ..!
_ انا فعلا حمار علشان اتجوزت .. ياريتني كنت سمعت كلام "وليم" وصيعت وقضيتها و ..
_ وتاخد ع دماغك .. وهو انت فاكر ابوك عدل اوى انا اتجوزته عقاب ..
بيغمزلها : عقاب برده مش حب يا "فونا" دا انتي اللى كعبلتيه ..
_ صدقني عقاب .. ستك ام ابوك كانت عاوزه تلم أبوك ف اختارتني المهولها ..
_ هو غسيل ع الحبل هتلميه ... وياتري لمتيه بقى ..؟
_ وهو يقدر يعمل حاجة وانا موجوده
_ ماهو اكيد مش هيعمل وانتي موجوده هيعمل من وراكي وانتي مش عارفه ولا هتعرفي اسمعي مني
_ انا سيباه لربنا بقى يجبلي حقي وقتها ..
كان بياكل وحط المعلقه فى الطبق : باااااااااس كده انا فهمت..
_ فهمت ايه ؟
_ انتي اول ما قولتلك ع "اميره" هوب مكدبتيش خبر وروحتي واتكلمتي واتفقتي اتاريكي انتي بقى اتبعتي طريقة اجدادك وقولتي تلميني صح ..؟
_ وياريت نفع طلعت انيل من ابوك و"اميره" غلبانه متقدرش عليك ..
_ غلبانه .. داانتي اللى غلبانه ..مشوفتيش وهى بتنكد عليا من يومين تحسي هالك واقف قدامي ..
_ انت نمرود ومش حاسس بالنعمة ..
_ مفيش نعمة فى الجوازة دى غير جاسمين ويوسف بس ..
_حتى دول خساره فيك ..كمل لغ لوغ ..
_ فينك يا "صبار " بتحب البامية باللحمة ..
_ فكرتني انا كنت عاوزاك ليه ..
_ مش علشان البامية وصعبت عليكي من "حزينه" ؟
_ اسمع وانت ساكت ...

مر اسبوع و"صبا" فى شرم الشيخ فى شغلها موابيلها رن وكان "ماجد" :
_ ميجووو ..
_ صبا ..
نبره صوته كانت مقلقه : فى ايه ؟
_ تعالى القاهره بكره يا "صبا" ضرورى "ايفون" جتلها الازمة واللى عليها عاوزه تشوفك
قلقت "صبا" : ايه ... ..؟
قفلت "صبا" واول ما الشمس ظهرت كانت "صبا" للقاهره واتجهت ع بيت "ايفون" وخبطت ع الباب وفتح "ماجد" وملامح حزينه:
_ فى ايه يا "ماجد" .. "فونا" فين ؟
شاور ع الغرفه واتجهت بخطوات سريعه للغرفه وكانت "ايفون" نايمه ع السرير ..:
_ "فونا" مالك فى ايه ؟
بصوت مريض : صبا ..انتي جيتي كنت عاوزة اشوفك قبل ..!
_ متقوليش كده يا "فونا" فى ايه ايه تعبك ..
_ صبا ..اسمعيني للاخر انا ..
_ متقوليش حاجه .. فين الدكتور,,فين يا "ماجد" الدكتور ..؟
_ اسمعيني الاول انا طلبت منك اشوفك ليه ؟
_ ليه ..؟
دخل "ماجد" وفى ايده تورته ومعاه "ياسر" و"طارق" و"منة" و"جهاد" و"اميره" :
قامت ايفون من ع السرير وحضنت "صبا" :
_ علشان اقولك كل سنه وانتي طيبه ياقلب "فونا"
من المفاجاءه "صبا" مقدرتش تتكلم وبصت ل اصحابها ول "ايفون" ودموعها نازله :
_ ايه دا .. ايه اللى عملتوه دا ؟
حضنتها "ايفون" وباستها :
_ احنا عارفين انك مبتحتفليش بعيد ميلادك زى كل مره بتسافري وتختفي علشان متتديناش فرصة ...واحنا لو قولنالك تعالى مكنتيش هتيجي بالسرعه دى وانتي مكنتيش هتنزلي اجازة الشهر دا اخر مره كنتي هنا قولتي انك مسافرة ف ع الاقل انا هحتفل به (بتمسح دموع "صبا") انتي عنهم كلهم اتولدتي ع ايدى هنا فى الاوضه دى ع السرير دا .. واهتميت بيكي لمده شهر ونص وليا حق زى ما بحتفل بعيد ميلاد الموكوس "ماجد" انتي كمان ليكي حق عليا ... انتي بنتي يا "صبا" ..
_ "فونا"...
_ ولا "فونا" ولا بتاع .. يلا قولي هوف ,, والمرادى كل اصحابك موجودين معاكي ..
دموع "صبا" نزلت وحضنتها "ايفون" وتدخل "ماجد":
_ انتي متاكدة ان انا ابنك مش هي ومتلغبطناش ..
_ ازاى يا موكوس وانت جيت قبلها ب 4 شهور ..
_ ليه يارب كده ..
ضحكوا كلهم: انتم جايبني اشيل التورته بس .. يلا ياعم "ياسر" ولع الشمعه خليها تقول هوف علشان الحق اخطف الكريز قبلها ..
وقفت "صبا" بعينك ...
_ تيجي نعمل سباق ونشوف ..
_ يلا .. بس اقول هوف الاول ..
_ يلا بينا ع ارض المعركة ...
_ يلا بينا ...
خرجوا بره ع السفره ووقفت "صبا" امام "ماجد" والباقي حواليهم واشعل "ياسر" الشمع وسط ترقب من "ماجد" و"صبا" وبسرعه طفت الشمع "صبا" وبسرعه مدت ايديها تخطف الكريز و"ماجد" وابتدوا يبهدلوا وشوش بعض و"منة" و"ياسر" و"طارق" و"جهاد" و"فونا" و"اميره" وكانوا فى منتهى السعاده وكانت "ايفون" فى منتهي السعادة وهى شايفاهم كلهم متجمعين ومبسوطين مع بعض ... انهو اليوم ونزل "ياسر " و"طارق" ع المطعم و "ماجد" يوصل "جهاد" لبيتها و"منة" و"صبا" قعدوا مع "ايفون" و"اميره"...دخلت "صبا" البلكونه ترد ع موابيلها وقعدت "اميره" مع "ايفون":
_ ولاد اللذينه بهدلو الشقه تعبتك يا "مرمر "
_ لا يا ماما مفيش تعب ..
_ ماهو احنا لو معملناش كده مكنتش المقلوبه "صبا" جت .. بس يوم لذيذ صح
_ اها جداا .. انا مبشفش "ماجد" مبسوط كده ولا ضحكته غير معاهم
_ هو مزعلك من حاجه ولا ايه ؟
_ وهو اصلا بيعمل حاجه غير انه يزعلني .. انا بجد مش عارفه هو اتجوزني ليه ..؟
دخلت "صبا": اتجوزك علشان بيحبك يا "اميره"
_ حب .. فين دا ..؟
_ بصي وراكي كده يا "فونا" يكون وقع من جيبهم وهما بيجرو..
ضحكت "ايفون": يخرب عقلك يا "صبا "
_ "اميره" قبل ما تسألي "ماجد" راح فين الحب اللى ربطكم مع بعض .. اسألى نفسك الاول هو راح فين .. لانه تاه منكم انتم الاتنين .. زهقتوا الراجل منكم وطفش وعيشكم فى توهان عقاب بتدورو عليه مش لقينه وانتم سبب طفشانه ..
_ وهو انا عملتله ايه علشان يطفش يعنى .."ماجد" السبب ..!
_ وانتى كمان السبب ..
_ انتى بتدفعي عنه علشان صاحبك انا عارفه ..!
_ انتى هبله .. صاحبي لو بيعمل حاجه غلط بقوله فى وشه انت غلطان ..ولانك تهمي صاحبي وبعتبرك اختي وواحده من المجموعه بقولك انتي السبب وانتي مش عاوزه تصدقي ..انتي عاوزه شماعه تعلقي عليها الفشل ومفيش حد قدامك غير "ماجد" ..
_ انتي مش عارفه حاجه ..!
_ اعرف اللى شايفاه اكيد .. شوفت من اول ما اتجوزتي وخلفتي بقى "ماجد" رقم 2 فى حياتك ,,وصلتيه لمرحله ان يفكر انك اتجوزتيه علشان تستغليه بس وتخلفي ..واهتمامك ب "جاسمين" كان اوفر اوى بصراحه وبعدها "يوسف" نسيتي ان فى راجل فى حياتك ومش عاوز اكل وشرب وهدوم مغسوله ماكل دا "فونا" بتعمله ..انتي اتغيرتي مش عاوزاه يتغير هو كمان .. الست العاقلة تكسب جوزها بالمعاملة الحلوة ..الكلمه الحلوة .. الاكلة الحلوه مش السبانخ والكوسة اللى جوزك مبيحبهمش ..لما الراجل يلاقي كده ومعوج هيتعدل غصب عنه لان الراجل بيحب اللى يدلعه ويحسسه انه رئيس وزراه الكون والوحيده اللى تحسسه كده مراته اللى بتحبه ويحبها ... ولا ايه يا فونا ..
_ ياخواتي ع العقل ..
_ لا داعي لتصفيق يا فونا دا ااقل حاجه عندي ...
كلام "صبا" عصب "اميره": ماهو انتي لا جربتي جواز ولا خلفه علشان تعرفي قد ايه المسؤليه بتكون كبيره والراجل المفروض يراعي كده ...
تدخلت "ايفون": "صبا" لو عاوزه تتجوز هتتجوز يا "اميره" هى اللى مش عاوزة ..
_ مش قصدى يا ماما ..
تدخلت "صبا": انا عارفه هى تقصد ايه ..
وانا لا اتجوزت ولا خلفت علشان اعرف المسؤؤليه اللى هى اكبر من اى كلام .. لكن المسؤؤليه مشتركة زوج وزوجة زى ما الجواز والخلفه مينفعش يحصل من واحد فيهم لوحده ومحتاجاهم الاتنين ف المسؤؤليه محتاجهم هما الاتنين مفيش حد اعلى من حد .. الاتنين متساويين ,, اللى يغلط يعترف ويتأسف ميقاوحش ويتلكك بغلط التاني .. انا عارفه "ماجد" غلطان لكن انتي بطريقتك سمحتيله يتمادي فى الغلط .. وسابك تتمادي فى غلطك لدرجة كل واحد شايف نفسه صح .. بالعقل يقولك اهتمامك ب جوزك بيقربه منك وهو انسان ..
_ وانا انسان الى صح ؟
_ يا بنتي افهميني .. مبتسمعيش انتي عن الستات اللى بتخلى اجوازهم يجرو ع البيت من العشا ..
_ نعم ..
ضحكت "ايفون": عاوزه تقولك اهتمامك بنفسك وبجوزك هتخليه يتلهف يرجع البيت ليكي يعني ..
_ وانا هجيب وقت وصحه ل البيت ولا الاولاد ولا ادلعله لما يرجع ..
_ هو انتى متعلمتيش فى الكلاس ان الجواز بيبقي باكدج واحد مسؤؤلية بيت وعيال وزوج ..
_ نعم ..
_ ايوه يعني زى ما بتهتمي ب البيت والاولاد.. الزوج كمان له جزء من الاهتمام .. والواضح انك اكتفيتي ب ليفل البيت والاولاد ونسيتي ان فى ليفل الزوج ...
_ طيب ليه مبتقوليش الكلام دا ل "ماجد " ؟
_ بقوله بس بيلاقي صد منك بيقفله... فكي كده وابدأي انتي الاول صلحي من عندك علشان لو هو مشفش وقصر يبقى واضح مين المسؤؤل انما كده انتم الاتنين متعادليين فى تحمل المسؤؤليه وللاسف للاسف يعنى عيالكم هما اللى بيدفعوا التمن .. ذنبهم ايه يخليهم يجو لدنيا شايفين اب وام كل ما بيتقابلو بيتخانقوا ولما بيبصوا فى وشوش بعض ابا الغضب مرسوم ع وشهم مفيش ابتسامه..انتم واللى زيكم بيوصلوا لعيالكم معني غلط عن الجواز والحياة عموما ... اسمعي مني بس وجربي ..جربي كده مش هتخسري ...
موابيلها رن وقامت :
_ اسمعي كلامها يا "اميره" وجربي واهي محاوله منك لتصليح ما افسده ابني ؟؟
_ انتي عارفه اللى بتكلمني وبتنصحني دى ..هى اكبر سبب للى بيعمله "ماجد" .. عارفه وشايفه انه بيكلم بنات وبيسهر معاهم وبيقابلهم قدام عينيها .. وعامله صاحبتي قال ..هى مبتحبش غير صاحبها غير كده لا ..
_ انتي هتدخلي فى قلوب البشر يا "اميره" ..وبعدين "صبا" انا اللى مربياها وعارفه هى ايه ؟
_ مش قصدى يا ماما ..بس فعلا مفيش حد حاسس بيا خالص
_ انتي محتاجة تحسي باللى حواليكي علشان وقتها هتحسي بنفسك ..
وقامت "اميره" بعصبيه وسمعت "صبا" كلامها ودخلت :
_ هو انا قولت حاجه ضايقتها ؟
_ سيبك منها .. هى بتخبط فى الكلام لكن قلبها طيب ...
_ تيجي نضرب حواوشي يا "فونا" من عند "اشرف"
_ واتوصي بالفلفل ..
_ جدااااا ...
ونزلت "صبا" تشتري الحواوشي...!

وفى المطعم كان "طارق" فى انتظار " ماجد وكان "طارق" بيكمل فرجه ع الصور ولاحظ صور "صبا" بفستان زفاف وصور ليها بالفستان مع والدتها ومعاهم ...:
_ ايه دا .. سيشن فرح وكان مين العريس بقى ؟
ابتسم "ياسر" نص ابتسامه وبملامح حزينه:
_ اليوم دا من اصعب الايام فى حياتنا وحياه "صبا"
_ ليه ايه حصل ..؟
_ انا مش هقدر احكيلك عن حاجه غير ان اللى مرت ب "صبا" كان صعب وصعب جداا ,,وافضل هى اللى تبقي تحكيلك لكن هحكيلك حكايه الصور دى ... انت عرفت ان مامت "صبا" اتوفت بالكانسر صح ..
_ ايوه ..ماجد قالى ..
_ مامت "صبا" فى اخر ايامها كانت عاوزة تشوفها بالفستان وتفرح بيها زى اى ام يعني ولان "صبا" كانت تحت ظروف وضغط صعبة رفضت تخضع ليها ففي يوم اتصلت "صبا" ب "ماجد" وجمعنا وبعد جلسة الكيماوي راحت مامتها مع ايفون فى كافية وراحت "صبا" و"منة" و"جهاد" اجرو فستان فرح وعملت ميكب وانا اتفقت مع فوتوغرافر وفاجئنا مامتها ب "صبا" بالفستان قالتلها " كنتي عاوزة تشوفيني وتتصوري معايا بالفستان وانا حققتلك امنيتك وهنتصور كتير " واتصورت واتصورنا معاها وزى ماانت شايف الصور اغلبنا كنا بنعيط ,, فكرة مجنون من شخصية مجنونه "صبا" ,, المصدم بقي ان بعد الفوتوسيشن دا ب اسبوع اتوفت مامتها ..
_ موقف صعب اوى .. وقدرت تتخطاه ؟
_ طبعا كان صعب لكن زى ماانت شايفها دلواقتي مستقرة فى شغلها ومعانا وهو دا اللى هى عاوزاه ..
سكت "طارق" : علشان كده مبتحتفلش بعيد ميلادها ..؟
_ يعني هى من زمان مكنتش بتحب اعياد الميلاد لو فاكر وزاد اكتر بسبب اللى حصلها لما بتحتفل حالتها النفسية بتبقي وحشه لانها بتفتقد اخوها ومامتها وباباها وبتفتكر انها لوحدها وبتدخل فى مود وحش واحنا محبناش نضغط عليها لكن "فونا" مبتتوصاش عليها خطط تخلى "صبا" تيجي اسرع من الريح .. وبنحاول نحتفل بعيد ميلادها بطرق مختلفه من غير ما تعرف ,, فى مره كبسنا عليها فى شرم من غير ما تعرف مدنهاش فرصه تفكر حتي هى بقي عندها كام سنه ..
سكت "طارق" وابتسم "ياسر": ايه رأيك فى الكوكتيل بتاعنا اكتئاب ع حالات ميؤؤس منها الامل رائع صح ..
_ مكنتش اتوقع حياتكم كده خالص ..
_ وياما هتشوف معانا انبهارات يا دكتور
دخل "ماجد": مين اللى هينبهر ...
_ كل دا كنت فين ...حاله انسانيه ؟
_ بتعب جدا والله ..
_ انت مش هتسكت غير لما تجيب لنفسك مشكله كبيره
_ انت متعرفش ميجو ولا ايه ..
وهما قاعدين "صبا" دخلت المطعم :
_ قفشتوكو بتعملو ايه ؟
_ خير ايه اللى هبك علينا ؟
_ "منه" بتزور خالتها وجهاد مش طالبه رغيها البتاع دا بكذا ودا بكذا ودول معاهم قد كده مش طلباها و"اميره" مش طيقاني فسيبتها مع "فونا" ..فقولت تروحي فين يا "صبصوبا يا قمر " قولت اجي اقعد مع الرجاله هنا ..
ضحكوا وقعدو :
_ تشربي ايه يا "صبا" ؟
_ انت بتسال سؤال غلط ودا هيزعلني ..
ضحكك "ياسر": تاكلي ايه يا "صبا"؟
_ اممم هاتلى حاجه خفيفه اتنين شاورما وبطاطس وميني بيتزا لانى لسه ضاربه حواوشي مع "فونا"
_ كل دا وبسيطة اومال لو كتيره هتأكلينا
|_ ايه معترضيين اومال اخواتك ومكانك و .. و..
_خلاااص احنا اسفين .. بس حواوشي انتى هتخلصي ع امي عارف ..
_ ان جينا للحق انت ومراتك اللى هتخلصوا عليها بعمايلكم ... متلم نفسك بقى يا "ميجو" واظبط امورك مع "اميره"وكفاية عك بقي ..
_ هى قعدت تشتكي برده ..؟
_ مش شكوي بمعني شكوي .. رغي بنات مع بعض وفضفضه ..
_ وطبعا قالتلك انا اللى سبب والخ الخ الخ ..
_ بصراحة قالت كده لكن مسكتش وقولتلها انتى كمان السبب ..
_ صاحبتي وكفاءه ..
_ بس هى مكدبتش انت متحمل نص مسؤؤلية يعني انت السبب ..علشان انت مهزء حالاتك الانسانية اخدتك عن مراتك وبيتك ونسيتهم واتحولت لبنك يصرف بس ..ما تتكلم يا "ياسر" ..!
_ مش فاهمه انتي الحالات الانسانيه دى اللى مهونه عليا الحياه مع "اميره" .. مفيش نكد ولا تكدير غير معاها .. وانا انسان عاوز اعيش وانتعش ..
_ عاوز تنتعش خدلك شور ,,
_ ايه يابت العسل دا ..
_ متعيش مع مراتك ياعم انت اومال متجوز ليه ؟
_ ماانا قولتلكم علشان اجبلها عيال وبس ...
_ ماتقول حاجه يا دكتور فى الحاله المهزءه دى ..؟
ادخل "طارق": "صبا" بتتكلم بجد ..
_ تقصد انا مهزء بجد
_ "ماجد" احنا بنتكلم بجد انت بتهرب من مشكلتك مع "اميره" وواخد سكة مش لطيفه ..!
_ لطيفه اللى بتغني هاهاهاهاها
ضحكوا ومسكت "صبا" كوبايه المايه ودلقتها فى وش "ماجد":
_ يا مجنونه ايه دا ...
_ علشان تفوق لانك بتستعبط وعامل مش فاهم وانت بتخرب حياتك وعندك اولاد ها بنت وولد ..
_ فى ايه يا "صبا" ..
_ فى انك مجربتش تكون كويس معاها وتعاملها معاملة الزوج لزوجته علشان يكملوا مع بعض الحياه .. جرب من ناحيتك تبقي كويس معاها وهى لما تحس بكده هتتعدل هى كمان .. انتم الاتنين تصرفاتكم عباره عن رد فعل ل افعالكم لبعض ..البقاء للاقوي
_ يعنى اعمل ايه ؟
اتكلم"ياسر": قرب منها وافهمها اعمل خط تواصل وكلام مع بعض,, اسمعها وتسمعك وهتعرف ايه اللى بتحبه وايه اللى بتكره,, اخرجوا مع بعض ,, حسسها بااهميتها فى حياتك .. صدقني هتتجنبوا حاجات كتير اسالني انا ,,,
_ وبعدين ..
اتكلم "طارق": حاول يا "ماجد"... انت قدامك فرص استغلها صح بلاش تضيع الفرص دى ...
سكت لحظات:
_ تمام .. انا هحاول وعلشان تعرفوا انى مش مستسهل الحالات الانسانيه ..
فى اللحظه دى دخلت المطعم واحده وشاورت ل "ماجد" وقام:
_ عن اذنكم دقيقتين ..
بصت "صبا" للبنت واستغربت : المهزء لسه معداش دقيقه ع كلامه وشوفت بيعمل ايه ...؟
الويتر قرب منهم وطلبو : ثواني وراجعلكم ..
_ رايحه فين يا "صبا"
ضحكك"ياسر": هتعرف دلواقتي هتضحكك ضحك ..

شويا ورجعت "صبا" وقعدت وكان الاكل موجود واتقدم عصير ل "ماجد" والبنت وبعد دقيقتين بطنهم وجعتهم واتجهوا ل الحمام و"ماجد" وهو قايم بص ع "صبا" وشافها بتضحك ونظرلها نظره عصبيه وانهارت فى الضحك و"ياسر" و"طارق" مش فاهم حاجه :
_ هو حصل ايه ؟
_"صبا" حطتت ماده بتعمل اسهال فى العصير بس واضح انها اتوصت ..
ضحكت "صبا": ماهو السبب استفزني دا ممر دقيقه ع كلامه وراح لحاله انسانيه ..
ضحكك "طارق": يخرب عقلك ..
_ لا هى ع طول مع "ماجد" كده ..علشان كده بيتجنب "ماجد" تواجد "صبا" ولو موجوده يحطها تحت المراقبة وبصراحه انا طنشت ...
_ انتم فظاع ...
ضحكوا كلهم وهما شايفين "ماجد" والبنت كل دقيقه يدخلو الحمام ....!


بعد ما انهيت "صبا" قعدتها مع الشباب وتوجهت ل "منه" فى البيت وهما قاعدين فى اوضه "منه" و"صبا" ماسكة الموبيل :
_ مش عارفه انا "ياسر" دا مبيتعبش من تلميحاته دى ..
_ تلميحات ايه ؟
_ افتحي جروب الواتس واسمعي السونج اللى حاططها ...
_ مش هفتح حاجه ؟
- عيني فى عينك كده ..؟
_ "صبا" خلاص ..
انا قولتلك قفلنا الصفحه دى واللى بيعملوا "ياسر" مش هيرجعنى فى كلامي .. سبيه ..
_ والله انتم صعبانين عليا بتقطعوا شرايين عواطفكم ب ايدكم ...
_ خليكي فى نفسك ...
_ تمام .. يبقي قضي الامر تاكلي ..
_ انتي مبتشبعيش مش قولتيلى اكلتي مع فونا واكلتي مع ياسر وطارق وماجد ..
_ ايوه واتهضموا ..انا ربنا اداني ميزه وهو الاكل بيتهضم اسرع مما تتخيلي والميزة دى بيخصها ل السينجلز اللى لا مجروحين ولا هيمانين ولا مترددين ...
_ مفجوعه ..
_ طيب ع الله تقربي من سندوتش ..
_ هاكل
_ ع الله احط السندوتشات ومتاكليش معايا هااكلك عافيه ..
ضحكت " منه": يلا قدامي ع المطبخ ..
_ جيبتي البسطرمة هظبطك بيض ببسطرمه ..

تانى يوم و"ماجد" راجع من الشغل فى طريق رجوعه للبيت وقف فى اشاره وع الجانب محل لفت انتباه برفانات للحظات فكر فى طريقه رومانسيه يبدء بها الكلام مع "اميره" ويبدء هو زى ما وعد اصحابه انه هيستغل الفرصة ونزل اشترى واحده هديه ورجع البيت واول ما فتح الباب سمع صريخ "اميره " فى اولاده قرب منها :
_ مالك صوتك عالى كده ليه ؟
_ بنتك يا استاذ مش راضيه تذاكر وماسكه الزفت التاب تلعب طول اليوم و ابنك ..
_ باااس باااس هو زعيقك حل يعنى براحه كده ( بص ل بنته ) جيسي يا حبيبه بابا تخلصى الجيم دا وتذاكرى ع طول تخلصي الهوموورك علشان نلون مع بعض و ..
نظرت له نظره استغراب وقاطعته بعصبيه : لا بجد .. لا هى تسيب التاب دلواقتى وتتنيل تذاكر
_ انتى ليه عصبيه كده.. اهدي ؟
_ ايه البرود اللى انت فيه دا اه ماهو انت بره البيت طول اليوم وانا اللى مرزوعه معاهم و...
لاحظ "ماجد" نظرات ولاده ) : باااس باااس ,,هتبدائي انا داخل اغير فى اكل ولا مفيش ؟
_ لا فى ..
دخل اوضته يغير هدومه وبيحاول يهدى اعصابه وبص ع الهديه ومسكها :
بيبص فى الغرفه : احطك فين .. احطك فين ..احط امك فين ..
فقرر يفاجئها بيها وحطها ع التسريحه وخرج اتغدى وقعد يشرب الشاى و بيراقب تحركات "اميره" لوقت ما دخلت اوضه النوم وبعد 10 دقائق بصوت عالى "مااااااجد " رغم انه اتفاجئ من صوتها لكن ابتسم "ايوووه" خرجت بغضب ماسكه البرفان :
_ ايه دا .. انت اللى جايبه ؟
بهدوء وب ابتسامة : اكيد يعنى مين هيجيب الحاجات الجميله دى غيرى ..!
بعصبية: نسيتها وحطيتها ع تسريحه ؟
_ لا منستهاش دى ليكي ..
بسخرية: ليه ان شاء الله فى مناسبه ولا كان معاك قرشين محيرينك
بيتمالك انفعاله :لا يا حبيببتى من غير مناسبه حبيت اشترى هديه لمراتى حبيببتى
ضحكت "اميره" بسخرية : قولى بتداري ايه بيها ؟
ب استغراب : ايه؟
_ ماهو انت مبتعملش كده طبيعى لازم فى سبب انت عارف واحده عليا وكانت دى ليها لكن معجبتهاش فقولت تتديهالى اهو احط لساني فى بوقي واسكت و ....
قاطعها بعصبيه: ايه اللى بتقوليه دا واحده مين ؟
_ واحده من الحالات الانسانية .. وقولت توديها فين فقولت للهبله اللى فى البيت صح ..
بعصبيه وقف وقاطعها "ماجد ": ايه الكلام العبيط دا .. انتى فاهمه بتقولى ايه وعيالك قاعدين وسامعين فوقى يا "اميره" وركزي فى كلامك ...
_ عاوزاني اكدب الحقيقه وانت مقضيها بره
_ لا فى دا لو بتفكرى .. زوج حب يهادى زوجته هديه من غير سبب ..هديه تعبر عن مشاعره ليها .. واحده تانيه ومعرفش ايه .. بجد يا "اميره" انتى مفيش فايده منك ...
بص ل اطفاله وهما باصيين ليهم وسكت وبعصبيه دخل اوضته غير هدومه وخرج بعصبيه اتجه ل "ياسر " ....!

جلس مع "ياسر:
_ اهدى كده هى اول مره تتخانقوا ..
_ لا دى وسعت منها دى بتفكر انى اعرف عليها واحده
_ وايه الجديد ما انت عارف فعلا مكدبتش هي ..
_ ياسر ..مش فايقلك ؟
_ لا نتكلم بالعقل كده .. هى قالت حقيقه فعلا ...!
_ تمام .. وانا جربت زى ما قولتو فرصه وبتاع اهو الفرصه اتفرمت .."اميره" فرمتها ... اديها الهديه تقولى كده بدل شكرا ...
_ ممكن تكون عملت حاجه وهى فهمت كده ..؟
_ عملت ايه احنا يا بنتخانق يا بنتخانق مفيش حل تالت ا لا و"طارق " يقولى نتكلم بهدوء ونحل مشاكلنا وهى اساسا اصل المشكله وفكره اننا نتكلم مشكله ...
_ طيب روق كده ...
_ اروق ايه هاتلى صندوق حاجه ساقعه ارطب ,,,

فى نفس اليوم ذهب "طارق" لمستشفي الدكتور عزت" يقابل "هدير" وكان فى مجموعه اشخاص كانوافى زياره لصديق فى المستشفي والصدفه جمعتهم ب "طارق" فجلس معاهم "طارق" ل انشغال "هدير" وانتظارها ودار الحوار بينهم بعد التعارف ابتدوا يوجهوله اسئلة :
_ الناس بقت وحشه اوى يا دكتور يعني تعمل خير يتردلك شر ومبقناش عارفين نعمل ايه ولا نعرف مين بيحبنا ولا مين بيكرهنا ولما بنسامح بيتقال عني انا اهبل من اللى حواليا اهلي او اصحابي ..؟
_بلاش نفكر فى مين بيحبنا ولا مين بيكرهنا ولا مين بعد عنا ولا مين قرب ولا مين بيحب يتكلم معانا ولا مين مش طايقنا ولا مين شايفنا طيبين ولا مين شايفنا هبل ..الخلاصة ببساطة اعمل اللى انت شايفه صح ومقنع به وملكش دعوة برد فعل الناس ايه علشان مهما حاولت تراضيهم وانهم كلهم يتفقوا ع حاجه مش هيحصل وهتتعب انت وهتضيع عمرك ,, انت حر اختيارك وقرارك ميمنعش انك تستشير وتسمع اراء لكن مش مجبر تسمعهم وتنفذ انت اللى هتتحمل مسؤؤلية افعالك ,, ربنا شاهد ع كل افعالك وع كل حاجة وهيجي اليوم اللى هيتاكدو انك اكتر انسان حبيتهم وانهم غلطو فى حقك وان الطيبة دى مش هبل زى ما فاكرين ..؟
_صحيح يا دكتور ان الضحك بيكون وسيلة علاج ؟
_ ايوه .. بيكون تفريغ طاقة من الجسم ..
_ انا اتقالي مره مهما حصلك اضحك ,,دا صح ؟
_ ايوه طبعا دا لو تقدر تعمل كده يبقي حاجه ممتازه ..
_ بس كتر الضحك بيميت القلب يا دكتور ..؟
_ وكتر الهم والحزن بيميت القلب كمان ..
_ يعني نضحك ..؟
_ايوه اضحك .. اضحك لما تركب مترو او اتوبيس زحمة ومش لاقي مكان تقف فيه لان فى غيرك نفسهم يحسوا ان فى ناس حواليهم لكن مش قادرين ,, اضحك لما تحط ايدك فى جيبك ومتلاقيش غير 20 جنيه مغسوله كويس وان مامتك سبتهملك مقبلتش البنطلون زى كل مره ,, اضحك لما تمسك ريموت التليفزيون وتقلب كده وانت زهقان وتشوف فيلم ابيض واسود ل اسماعيل ياسين ,, اضحك لما حد يستندل معاك قوله بضحكك طز .. اضحك لما رجلك تفقفق من كتر اللف ع شغل كفايه انك بتسعي ومش واقف مكانك واتمشيت وغيرت هوا ,, اضحك ع ذكرياتك اللى كلها الالم ووجع وخليك ع يقين ان عوض ربنا اكبر ,,اضحك لما الهم يكتر والحزن يغيم ع حياتك حارب همومك بالضحك لان كله هيعدي ,, متخليش الحزن والهم يسرقوا عمرك بدلهم بضحك وهونها ع نفسك اضحك طوول ما انت عايش وقادر تضحك ,, الضحك عدوي خليك انت صاحب العدوي للى حواليك فى همهم خرجهم ويضحكوا وكل حاجه هتمر لان مفيش وضع ثابت.. بالعقل كده لما تحزن وتنكد ع نفسك هتتحل المشكله لا بالعكس هتتخنق اكتر وهيظهر عليك اعراض بدانيا ل امراض عضوية نتيجه زعل لكن بالضحك بتهونها ع نفسك وهتلاقي حل ...
_ انا بقي كل ما احكي لحد من أهلي او اصحابي ع حلم ولا امنيه بيتريقوا عليا وبيعجزوني وبعد ما بكون متشجع وعاوز ابدء برجع فى كلامي ع انهم صح ومش عاوزيني افشل ..؟
_ غلط .. الاحلام والامنيات دى شخصية مفيش حد له اى حقوق انه يتدخل فى حلمك ولا امنيتك ومعني انك حلمت يعنى انت عندك القدرة لتحقيقة ولو محصلش يبقي عندك القدرة لتحقيق حلم ما هتوصله .. ف اسعي لو فشلت هيظهرلك حلم تاني وهكذا لغايه ما تحقق حلم الكل كانوا فاكرينه مستحيل .. لما يتعلق الامر بحلمكم اسعوا واقفلوا ودانكم والمجال السمعي يتقفل ل الاصوات الساخرة واللى بتقلل من عزيمتكم لغايه ما تحققه او تحقق غايه الحلم وهتثبتلكم نفسك ب ابتسامتك فى الاخر ...!

كانت "هدير" واقفه قريب من "طارق" والمجموعه وكانت سعيده اوى بكلامه ليهم .. انتهي من جلسته معاهم ولاحظ وجود "هدير" واتحركوا علشان يتغدوا مع بعض :
_ حسيت وانا واقفه انك فى جلسة علاج نفسي او تنميه بشريه لشباب اللى كنت قاعد معاهم ..
_ بجد ...
_ اه والله كنت مستمتعه جداا انا واللى واقفين ...
_ حرام شباب لسه فى اول العشرين والظروف والاهل او المعارف يهدموهم بمنطلق انهم عارفين مصلحتهم .. دول بشر ولازم يغلطوا علشان يتعلموا ونساعدهم فى كل خطوه ونشجعهم حتى لو غلطوا دا طبيعي ..مفيش انسان ناجح بدء بنجاح واستمر بنجاح فى ثغرات فشل وقفته ووقعته ورجع وقف ودا بمساندته لنفسه واللى حواليه ..لكن تعجيز وكلام محبط وسخرية غلط ...
_ مش قولتلك جلسه علاج نفسي ..
_ يلا كلي ..
_لكن دا ميمنعش ان بعد كده هبقى اقدم على طلب يا "طارق" علشان اشوفك ..!
_ ليه كده ماانا من اول اليوم معاكي اهو ...؟
_ من وقت ما اتجمعت مع اصحابك وكل يوم معاهم ومبشوفكش حتى انك تيجى المستشفى بقى قليل اوى دا لما دكتور "عثمان" يكلمك ... انا مليش حق زيهم ولا ايه ؟
_ طبعا ليكى ونص وليكى كل حاجه
بتضحكك"هدير": لا لا انا بيضحك عليا يا ناس
_ وانا اقدر ...
_ ماشى انا مش معترضه انك تقابل وتشوف اصحابك بس تشوفنى زيهم او معاهم لاحظ ان اجازتك بتكش دلواقتى ومفضلش غير شهر ونص وياعالم هتنزل تانى امتى ؟
_ فعلا الاجازه بتخلص بسرعه جدااا مكنتش متوقع كده .. تعرفى كنت هعمل الاجازه شهر بس لولا بابا قالى خليها 5 شهور ولو مرتحتش ارجع ...
_ خلاص احنا فيها مدها شويا شهر ولا شهريين ولا 3 كمان
ضحك "طارق" 3 شهور ... لا صعبه جدااا عندى شغل ومرضى مستنينى مينفعش اتاخر كده عليهم وانا مظبط احوالى ع 5 شهور بس وبعدين ان شاء الله هكررها متقلقيش يعنى ماجد وياسر وجهاد و"منه" و"صبا "وانتى اسيبكم لمين وانتم كل حاجه حلوه فى حياتى
_ بجد .. انت بتكون مبسوط معايا ..؟
_ طبعا .. الوقت اللى بقضيه معاكى دا حتى لو نص ساعه واشوف ابتسامتك الجميله دى بكون مش محتاج حاجه تانى خلاص ..
اتحرجت "هديل": وانا كمان ياطارق ربنا يخليك ليا ..
_ يلا ناكل بقى ..
_ يلا ... قولى صحيح مفيش اخبار عن صاحبه السلسله ؟
اتنهد:طارق": لا للاسف .. مفيش حد عارف يوصل ل اى حاجه ليها
_ كنت عاوز تشوفهم كلهم مش كده ؟
_ اكيد... هى اكيد اتجوزت ومعاها طفل او اتنين وعايشه فى سعاده مع شخص بيحبها وبتحبه ومدام هى كويسه وبخير مش هحتاج اكتر من كده زى ما اطمنت على الباقيين ..
_ والسلسله هتفضل معاك مينفعش تسيبها لحد فيهم لما يوصلها يدهالها ؟
_ لا مش هينفع زى ماانا اخدتها منها زمان ووعدتها انا اللى هرجعهالها ف انا اللى هرجعهالها وزى ماقولتلك اكيد نازل مصر تانى ..
_ ان شاء الله ...
وهما بيتكلموا رن موبيل "طارق " وكان "ماجد " اتكلم معاه وقفل :
_ متقوليش انك هتروحلهم انت قولت اليوم ليا واحنا لسه فى اوله فاضل السينما والايس كريم
ضحكك"طارق": لالا متقلقيش مش هروح فى مكان انا معاكى .. هو بيكلمنى بلغنى ان حماه "جهاد" هتعمل عمليه بكره وهو وياسر هيكونوا معاها وومنه" لان مفيش حد هيكون معاهم فقالى علشان كنت متفق معاه هنروح مشوار ..
_ لا الف سلامه عليها .. تحب افضى نفسى واجى معاك
_ لالا خليكى لشغلك
_ طيب ابقى طمنى
_ حاضر .. يلا بقى علشان موعد السينما
_ يلا ...
خرج "طارق" مع "هدير" وكملوا اليوم دخلوا فيلم واكلوا ايس كريم ووصلها للبيت ورجع الفندق ...


تانى يوم طلب عربية ووصل للمستشفى وكان هناك "ماجد" و"ياسر"و"منه" و"جهاد
_ صباح الخير
_ اهلا يا "طارق" .. صباح الخير
_ دخلت العمليات ولا لسه ؟
_ بيجهزوها جوه اهو ..
قرب من "جهاد": ان شاء الله هتكون بخير متقلقيش
_ ان شاء الله .. مكنش لازم تتعب نفسك يا "طارق"
_ عيب تقولى كده هو انا مش زى"ماجد"و "ياسر" ولا ايه ؟
_ تسلمولى يااغلى اخوات
_ امال ولادك فين ؟
_ مع "اميره" مكنش هينفع اجيبهم المستشفى
_ ان شاء الله اليوم يمر ع خير
_ ان شاء الله
قربت "منه" وسلمت ع "طارق" ووزعت الشاى عليهم ودخلت "حماه"جهاد" العمليات وكانوا فى الانتظار .. نظر حواليه "طارق" بيدور ع اقارب "جهاد" وزوجها ومكنش في غيرهم .. دار الحوار مع "ماجد" :
_ "ميجو".. هو زوج "جهاد" ملوش اخوات ؟
_ ولا قرايب ..!
بتعجب : ازاى ..؟
_ يعنى هو وحيد امه وقرايبه كلهم فى الصعيد وهو شغله كان هناك فى الاساس ..!
_ و"جهاد" عرفته ازاى ؟
_ لا "جهاد" كانت منجزه ..يعني كانت محدده هى عاوزه تتجوز مين .. عاوزه واحد وظيفته كويسه ودخله محترم وكده يعني ,, فهو كان نازل مأمورية لشغله فى القاهرة وحضر فرح لصديق وكانت العروسة صاحبه "جهاد" من الكليه ..ومن هنا اتعرفوا هتقولى ازاى هقولك معرفش البت بلفته فى 10 ايام ازاى معرفش ,,رجع بلدهم اسبوع ورجع ب امه فى ايده وبيتقدملها ...
ضحك "طارق" لا يا راجل ..
_ لا ميغركش قصرها ..هى قصيره لكن تحير
_ وبعدين ..
_ "جهاد" فى اول جوازها عاشت هناك فى الصعيد معاهم ولما اتنقل لشغل القاهره اتنقل هو وامه وجهاد وعاشوا هنا استقرو ... وانت عارف ان" جهاد" وحيده هى كمان وباباها اتوفى من صغرها وبعد جوزها بسنتين اتوفت مامتها وقرايبها بيسألو من بعيد لبعيد يعني زى ناس كتير .. فحياتها عباره عن جوزها وامه وبناتها .. ولما جاله عقد عمل فى السعودية من غير تفكير وافقت "جهاد" واقنعته يوافق رغم انه كان رافض علشان ميبعدش عنهم لكن "جهاد" بقى والفلوس والتفكير الراسمالي ..دخل كويس يعنى حياه كويسه لبناتها ..سافر وطمناه اننا معاها ف انا و"ياسر " معاها ومش بنسبها لوحدها فى اى ظرف جوزها عارف ومطمن وع تواصل معانا ..
_ طيب ما ياخدهم عنده فى السعودية .. واضح ان حياتهم كويسه يعنى ؟
_ هى فعلا حياتهم كويسه ويقدر ياخدهم هناك لكن "جهاد" وهو اتفقوا ان كده هيقدروا يوفرو اكتر ل المستقبل يعنى ,,
_ متفقين ... وبينزل شهر فى السنه ؟
_ ايوه
_ وشهر واحد بيكفى بناته وامه ومراته ؟
_ دا فى سنه نزل اسبوع بس .. المهم هى راضيه ومبتشتكيش وعاجبها فهى بقى حره فى حياتها
_ ومين قالك انها مبتشتكيش مش شرط تشتكى بلسانها كفايه نظراتها دلواقتى رغم انكم حواليها هى كانت محتاجه جوزها جنبها .. مهما الواحده بينت انها قويه جواها بيكون عكس
_ مش وقت تشخيص يا دكتور .. وبعدين" جهاد" لسانها متبرى منها لو فى حاجه هتتكلم ع طول .. واحنا سألناها كتير واتكلمنا معاها وكان ردها انا مرتاحه ومش مضايقه من الوضع دا ..
موبيل "ماجد" رن : شوفت بقى هتسمعنى تهزيق ع الصبح من "صبا " قولتلها هتابعك وانت بكلامك نسيتني .. هقوم ارد بعيد علشان اتهزق براحتي ..
ضحك"طارق": سلملي عليها ..
_ الو ..يا "صبار" حياتي
_ تصدق انك مهزء كلكم مهزئيين .. ولا حد فيكم كلمني قالى طنط دخلت العمليات ولا لسه ..؟
_ الشبكه هنا يابنتى مش كويسه .. داانا سيبهم جوه وكنت بشرب سجاره بره والموبيل رن
_ طيب طمني ايه الاخبار ؟
_ دخلت العمليات اهو ادعيلها انها الان تسأل
ضحكت "صبا ": والله هقول ل "جهاد" وهسجل المكالمه انك بتقول ع حماتها كده ..
_ يوووه .. وهو انا غلطت مش الواحد فى العمليات تحت تأثير البنج بيكون بين الحياه والموت والست هيفتحولها قلبها ..
_ يا ساتر عليك .. بكلم عزرائيل ...!
_ وهو فى عزرائيل واسمه ميجو
_ طيب يا "ميجو" يا سكر ..انا معايا شغل ابقى تابعني واتس وطمني ع "جهاد" وبدل السجاير دى روح ل "جهاد" اكيد خايفه ومرعوبه هي مش هتبين لكن خليكوا معاها ..
_ حاضر يا ماما "صبا"..
قفل "ماجد" الموبيل وبص قدامه شاف ممرضه ضحكتله ضحكلها وراح يتكلم معاها :
_ لو سمحت يا نيرس ؟
_ ايوه ...
_ انا عندى صداع بيروح وبيجي ممكن مسكن ..
_ وهو دلواقتي موجود ..
_ لا شويا وجي هو قالى مش هيتاخر ممكن نستاه مع بعض ...
ضحكت : لكن انا عندى شغل دلواقتي ..
_ خلاص نستنى وقت الراحه هيكون جه وارتاح ونشوف الموضوع مع بعض ..
ضحكت : عن اذنك..
_ هستني.. هيستناكي متتاخريش يا نيرس ..
مشيت وانتبه "ماجد" ب اتصال من "ياسر": اوووبا نسيتهم ...


وقف "طارق " بيراقب رايأكشنات اصحابه ,, توتر وخوف "جهاد" اللى مش باين ومبينه العكس و نظرات" ياسر" ل منة" وهو بيتكلم معاها .. ومحاولات هروب "منة" فى الوقت دا اتصلت "هدير" وطمنها وبعد ساعه كانت "هدير"امام "طارق" واتفاجئ بوجودها :
_ هدير .. انتي هنا ؟
_ بصراحة مقدرتش تكون "جهاد" لوحدها ولوحدكم فى الموقف دا
_ وشغلك ..؟
_ انا استأذنت متقلقش ..
... خرجت حماه "جهاد" من العمليات واتكلمت "هدير" مع الدكاتره وفهمت واطمنت ع الحاله واطمنوا عليها وسابوها ترتاح :
خارج غرفه "حماه "جهاد" وقفت "جهاد" ب ابتسامه ودموع فى عينيها :
_ بجد يا جماعه مش عارفه اشكركم ازاى وجودكم فرق جدا معايا طول اليوم مسبتونيش ..انا كنت خايفه ووجودكم معايا طمني ..شكرا بجد
"ماجد" بهزار: لا طلعى 100 جنيه وكرمشيها فى ايد كل واحد ملناش فى البوقيين دول
خبطته ع كتفه: غلس
_ يابت طلعى من تحت السيراميك دا ع قلبك انتى وجوزك قد كده ..!
_ قل اعوذ برب الفلق ..
_ يبقى عاوزه احنا اللى نكرمشلها فى ايديها يلا ياجماعه جمعوا من بعض
خبطته تانى وضحكوا كلهم : ايوه كده فكك من جو الانسانيات ده المهم انها بخير وان شاء الله تخرج ع خير لبيتها ...
_ ميرسى يا "طارق" وميرسى يا"هدير" ع اهتمامك وانك اتكلمتى مع الدكاتره انتى و "طارق"
_ حبيببتى متقوليش كده انتم غاليين "ل طارق" وانا اعتبرت نفسى واحده منكم دا لو مش يضايقكم يعني
_ حبيببتى دى حاجه تسعدنا
بيهزر "ماجد": طبعا هيسعدها وهيسعدها جدااا ,, هتلاقي منين دكتور اطفال شاطره وقت ما تحتاجها يلا هتكشفى ع البنات ببلاش
خبطته تانى وضحكوا اتكلم "ياسر":
_ دلواقتى متفكريش فى اى حاجه احنا معاكى بكره من الصبح هنكون عندك
_ تسلم يا"ياسر" تسلمولى
_ يلا احنا يا جماعه والصبح نكون هنا
_ يلا بينا
_ يلا يا "منه" اوصلك
_ لا روح انت انا لسه همر ع بيت "جهاد" اجيبلها شويا حاجات وارجع ليها هنا وبعدين هروح ..
_ هوصلك لبيتها وهستناكى واوصلك البيت الوقت اتاخر
_ اوكيه
ندهت "جهاد"ع "ماجد": "ماجد".. بناتى امانه عندك ..
_ متقلقيش هعذبهم وهنيمهم تحت الحوض من عينيا
ضحكوا كلهم ومشيوا ....!
فى الطريق فى العربيه دار حوار بين "هدير" و"طارق" :
_ بجد شكرا يا "هدير" ع وجودك ومساعدتك انهارده ..
_ متقولش كده انت معتبرني غريبة ولا ايه هما اصحابك ويهموك واللى يهمك يهمني يا دكتور ..
_ انتي مفيش زيك اصلا ..
_ بس بجد يا "طارق" منظركم انهاردة كان حلو اوى .. وجودكم مع جهاد وهى لوحدها كان مطمن وحاجه جميله .. التكاتف اللى بينهم حاجه جميلة مبقتش موجوده الايام دى ..
_ فعلا .. انا مكنتش اتوقع انهم كده مع بعض زى زمان بالظبط واكتر رغم انشغالهم وحياتهم اللى اختلفت والناس اجديده اللى دخلت حياتهم لكن متمسكين ببعض وعلاقتهم مختلفه ..
_ تحسهم كده بوكيه ورد متجمع بربطه واحده شكلها حلو اوى وهما مع بعض ..
_ فعلا .. يا تشبيهاتك ..
_ اى خدعه يا دكتور ..

فى الطريق و "ياسر" مع "منه" اتكلمت "صبا":
_ طمنيني الاخبار ..
_ لا تمام الحمد الله حالتها مستقره وانا هجيب ل "جهاد" حاجات من شقتها وارجعلها والصبح هكون عندها ...
_ والله حاولت اخلع يومين اجازه معرفتش فى زحمه شغل والمدير مركز معايا اوى ..
_ لا "جهاد" فاهمه وعارفه ووصلتلها كل كلامك ..
_ قوليلى ..انتي لوحدك ولا اوبر ؟
_ لا "ياسر" معايا ..
_ ياسر .. تيرارارارا رارارا ..
_ مش عاوزه حاجه يلا اقفلي ..
_ طيب استني متنسيش تأكدي عليهم كمان اسبوع هتكونوا هنا انا حجزتلكم ..الفندق بيحتفل بذكرى السنويه وعامل خصومات وكده وانا استغلتها افسحكم يلا غلابه ..
ضحكت"منه": يخليكي لشعب .. هقولهم حاضر ..؟
_ وانتي ظبطي اجازتك متقوليش معرفتش زى المره اللى فاتت ..انا مش هنزل لشهريين مترخميش وحشاني ..
_ حاضر والله هشوف المكتب ايه نظامه ..
_ لو عاوزاني اكلم صاحب المكتب اكلمه
_ "صبا" لمي نفسك ..
_ تمام وانا هستناكو ..دا احنا هنقضي يومين زمبريطا خالص ..
_ ماشى يلا سلام ..
_ سلميلى ع "ياسر" سلام ..
قفلت "منه" :
_ بتأكد عليكي السفر ..؟
_ ايوه.. مش هتنزل شهريين ف فرصه تشوفنا وكده ..
_ وانتى طلبتى الاجازه ورفضو ولا ايه ؟
_ لا لسه بصراحه مردوش هبقى بكره اسأل علشان كده مأكدتش عليها انى هاجي ..
_ لازم تيجي ع فكره ..
_ ليه ؟
_ لان انتي لو مروحتيش انا مش هروح ودا مفيهوش نقاش
_ نعم ...؟
_ ايوه انتي لو مش هتروحي انا مش هروح ..
_ ليه بقي ..طيب انا وعلشان شغلي انت ليه بقي ..؟
_ علشان انتي مش موجوده ..
_ ياسر ..
_ مفيش ياسر .. المره اللى فاتت مجتيش وانا مستحملتش المكان من غيرك ورجعت تاني يوم بليل وسيبت "ماجد" لوحده هناك مع "صبا" ...
_ ياسر ..
_ انا مبحسش ب اى حاجه وانتى مش موجوده يا "منه" وانتى عارفه كده من زمان .. بيبقى اليوم طويل جدااا والساعه بطيئه جدااا والاكل ملوش طعم و ..
_ ياسر وبعدين ..
ركن العربيه ووقف : ولا قبلين انتي قفلتي الموضوع واتفقنا اننا اصحاب صح تمام معترضتش رغم دا مش حقيقي لكن دا يرضيكي .. ولو تفتكري الشروط اللى اتفقنا عليها علشان يحصل الطلاق ووعدتي تنفذيها فاكراهم .. افكرك ..
1_ لما اتصل بيكي تردي عليا ..
2_ متهربيش من اى تجمع اكون فيه علشان اشوفك ..
3_متتجنبنيش لما تشوفيني ..
4_ لو حسيتي انك اتسرعتي فى قرارك تقوليلي
_ واتفقنا انك متضغطش عليا
_ وانا مبضغطش يا "منة" انا بتصرف بطبيعتي اللى انتي عارفاها
_ تقصد كنت عارفاها خلاص اللى فات مبفكرش فيه ولا عندي نية يرجع
_ تمام يا "منة" يبقي تنفذى اتفقنا ..؟
_ وانا بعمل بكلامي ..
_ يبقي هتيجي ولاننا اصحاب واحنا ك اصحاب كنا بنعمل كل حاجه مع بعض سفر وخروج وكل حاجه .. فمتجيش دلواقتي وتخلفي انتي اتفاقك وتقولى اعذار الا بقى دا اعتراف منك انك لسه منستيش حبي واتسرعتي ومش عارفه تواجهي وتعترفي ....
_ انا قفلت الصفحه دى يا "ياسر" وقولتلك ..
_تمام يا "منة" .. يعنى هتكونى موجوده الاسبوع اللى جى معانا ..؟
_ هحاول ..
_ لا هتيجي يا "منة" ..
بنظره غضب : عافية ولا ايه قولتلك بلاش تضغط عليا يا "ياسر" ..؟
حاول يحسن من نبرته : لا طبعا انتي حرة ومفيش ضغط لكن .. لكن "طارق" معانا ودى اول مره وكمان شهر ونص هو مسافر وياعالم هيرجع تاني امتي وفرصه كلنا مع بعض .. وعدم وجودك يعنى انا مش موجود و"جهاد" مش هينفع تكون موجوده وهيكون معاه "ماجد" و"صبا" وانتى عارفه الاتنين لاسعيين و"طارق" مش هيعرف يسلك معاهم ..
_ باااس باااااس خلاص ..
_ يبقى هنسافر .. هنسافر ..
دار ماتور العربيه واتحرك و حست "منه" بضغط من "ياسر" وبصتله وشافته وهو مبتسم وهو بيبص ع الطريق ...!


قفلت "صبا" الموبيل وندهوها فى المطعم وكان فى اكل كتير :
_ ايه دا يا شباب مين اللى ورث علشان يعزمنا ع كل الاكل دا ومنشل ع الاكل اللى بحبه مين دا ..
صوت من وراها : انا اللى عازمكم ع العشا انهارده ؟
بصت "صبا"واتفاجئت : حمزة ..
ابتسم: ازيك يا "صبا"..

يتبع ...