موسوعة القصص من واقع العراقي ( قصص قصيرة بكتاب واحد )

٥- الاخير من على ضفاف ضمائرنا

سوزان. ...واني...ما اعرف شسوي. ..مدري اصرخ. ..مدري اموت نفسي. ..ما اعرف شسوي. ..كل اللي أعرفه انو اني عفتها عالكاع وركضت عالتلفون. .وظليت أكلب. ..وجان الكى صور اختي سوزان منشورة على بيج. ..تحت مسمى. (.فضيحة سوزان ) ...والناس تعلق وتسوي لايكات ومشاركة. ...ظليت اسوي إبلاغنا. ...ظليت اتوسل بصاحب البيج يمسح الصور. ..بس لا حياة لمن تنادي ورى ساعة بالضبط. ..صار 4 آلاف منشور وبيج باسم سوزان. ...والناس تتفاعل. ..وتعلق. ...وتسوي شير. ...وكلهم متونسين عالفضيحة. ..وكلها ساهمت. ..والفيس بعد ماله موضوع غير سوزان وفضيحة سوزان. .انتشرت صورها هي وحيدر بأوضاع مخلة للشرف. ...بس محد جاب سيرة حيدر. ..ومحد كال حيدر غدر بحبيبته. ..حيدر طلع مو

رجال. ..حيدر ...خرب بنت العالم. ...محد كال هالعبارة. ...
شيصير بعد أكثر من هاي الفضيحة ؟ ....شنو نكدر نسوي بعد. ...حيدر فضح اختي وفضح عائلتنا وعشيرتنا كلها. ..والشعب العراقي كله صفك لهلفضيحة. ..الموضوع كبر. .صار موضوع الشعب. ..نسو الأوضاع اللي ديعيشها البلد وظلو يحجون بس بسوزان. ....
تعرفون منو هي سوزان ؟؟

سوزان بنيه يتيمة الام وابوها طالع خارج العراق وما مهتم بيهم اصلا .. ما عدها اخ عدها فقط اخت وحده وثنيناتهم عايشات ابيت جدهم ويستلمون راتب تقاعد امهن كل شهر ... سوزان ما تلقت التربيه الصحيحه لان ماكو ام ولا اب ولا اخ (بس اليتيم راح يفهم شنو العيشه بدون ام واب ) .. ما تلقت التوجيهات الي تلقيتوها  من اهلكم ..الي دتحجي ع سوزان اسأل نفسك ع رغم من انو انت تلقيت تربية ام واب ومع ذلك انت مو خالي من العيوب ..كيف بسوزان ؟ الي عاشت مراهقتها بدون احد يوجهها ... انت الشريف الي دتحجي ع سوزان أسالك سؤال .. لوما توجيهات اهلك وحرصهم عليك لوما عندك اب وام يعلموك الصح من الغلط ما راح تغلط ؟؟ تره الانسان الزين ما طلع من بطن امه زين والشرف ما يجي وي الوراثه تره الشرف يجي من البيئه الي يترعرع بيها الانسان من الرقابه وسوزان  كانت تفتقد لأهم شخصين بالدنيا ... اوكي اني وياك سوزان  طلعت من الطريق بس حضرتك شسويت ؟ بمكان ما تخلي مبررات الها خليت بيها مية عيب ..بمكان ما تكول البنيه جانت ناقصه حنان الام والاب واي واحد يكدر يضحك عليها ويقشمرها ويخليها تسوي الي يريده .. اولا وقبل كلشي سوزان بنيه وتبقه بنص عقل وثاني شي ما عدها دعم عائلي (معنوي ) هذا الشخص الي قشمرها بأسم الحب يمكن جان الها كلشي لان هي اصلا ما عدها شي (لا عائله ولا شي)

الانسان الي يمشي بهاي الدنيا بدون ام واب ما اعتبر حاله احسن من حال الاعمى
ولا اعتبر حاله احسن من حال الغركان الي يريد يتمسك بأي شي حتى يكمل حياته (وسوزان تمسكت بهذا الشاب ) يمكن انت تشوفها وحده مو زينه وشافت بهذا الشاب متعه وجنس .. بس بالحقيقه هي جانت تشوفه كلشي ام واب وجانت تكول للبنات هذا خطيبي بكد ما واثقه منه ومتاكده منه يخطبها

هذا الحجي مو من جيبي .. هذا عن لسان كل البنات الي يعرفون سوزان  معرفه شخصيه ..
واذا انتم شيعه فامامكم علي واذا جنتو سنه فخليفتكم الرابع علي كال ( لو رأيت مؤمن يرتكب الفاحشه لسترته بردائي )....كافي تحجون وتنشرون على سوزان. ...كافي. ...البنية انقتلت. ...أي لا تتفاجئون انقتلت. ....