ကျုပ်က ပါရမီရှင် (Chapter 401-600)

Chapter 495

စာစဉ် 33 Chapter 495 ဒီဇာတ်လမ်းတွဲက ... ထူးခြားတယ်

တီဗွီကို ဖွင့်လိုက်သောအခါ နောက်တစ်ခန်းကို ပြနေ၏။

ဝမ်ယွီသည် ဘတ်စ်ကားကို မြန်မြန်တား၍ ပြေးတက်လေသည်။ ထို့နောက် ကျန်းပေါင်၏ ဆွံ့အနေသော အကြည့်အောက်၌ သူမက ကျန်းပေါင်၏ ခုံအောက်တွင် ပုန်းလေသည်။

တစ်ခဏကြာသော် နေကာမျက်မှန်တပ်၍ အနက်ရောင်ဝတ်စုံကို ဝတ်ထားသည့် လူနှစ်ယောက်က ကားပေါ် အပြေး တက်လာသည်။ သူတို့ ဝတ်စားထားပုံအရ သူတို့သည် လူမိုက်များဖြစ်ကြောင်း ပြောနိုင်ပေသည်။ မမျှော်လင့်ဘဲ ပေါ်လာသောပုံစံက ကြည့်ရှုသူများ၏ အာရုံကို ဖမ်းစားသွားပြန်သည်။

ကျန်းပေါင် စိုးရိမ်ပူပန်လာပြီး မသိမသာ ခေါင်းငုံ့မိသည်။ ထိုအနက်ရောင်ဝတ်စုံနှင့်လူများ၏ ပစ်မှတ်က ဘယ်သူလဲ သိသာပေသည်။

အခြေအနေက လေးနက်လာချိန်တွင် ဘတ်စ်ကား ယာဉ်မောင်းက မထင်မှတ်ဘဲ အာဏာပြလာသည်။

"ဟေ့ ဟေ့ ဟေ့၊ မင်းတို့ အကြွေစေ့နဲ့ပေးတာဖြစ်ဖြစ်၊ ကဒ်နဲ့ရှင်းတာ ဖြစ်ဖြစ်လုပ်၊ မဟုတ်ရင်လည်း ဂျောင်းတော့"

သူသည် တူညီသော စကားကိုသာ ပြော၍ လေးနက်နေသော အခြေအနေအား ချိုးဖျက်လာသည်။

ထို့နောက်တွင်မူ အနက်ရောင်ဝတ်စုံနှင့် လူနှစ်ယောက်သည် ဟန်မပျက်ချင်၍ ဘတ်စ်ကားပေါ်မှ မောင်းထုတ်ခံ လိုက်ရသည်။

"ကျစ် ... Matrix ဇာတ်လမ်းထဲကလိုသာ ဝတ်ထားတာ၊ ဘတ်စ်ကားခတော့ မပေးနိုင်ဘူး"

ယာဉ်မောင်းက အထင်သေးစွာ ဝေဖန်လေသည်။

"ဖွီး"

စားပွဲ၌ ရေသောက်နေသည့် ကျောင်းသားတစ်ယောက် ရေသီးကုန်သည်။ တစ်ချိန်တည်းမှာပင် သူတို့၏ အတွေးထဲ၌ အတွေးတစ်ခု ပေါ်လာသည်။

*ဒီဘတ်စ်ကားမောင်းတဲ့သူက တော်တယ်ဟ*

ထို့နောက် ဇာတ်လမ်းတွဲက ဆက်လက်ပြသနေ၏။ ကျားကျားယားယား ဟူရီဖေး ပေါ်လာသည်။ သူမ၏ ခက်ထန်၍ အနည်းငယ် ရယ်ချင်စရာကောင်းသော ပုံစံက ဖမ်းစားသွားပြန်သည်။ ထို့နောက်တွင်မူ ကျန်းပေါင်နှင့် ဝမ်ယွီသည် ကားမှားစီးမိပြီးနောက် လမ်းပေါ်၌ စက်တပ်ယာဉ်ငယ်လေးများ ပြိုင်သည့် မြင်ကွင်း ပေါ်လာသည်။