ကျုပ်က ပါရမီရှင် (Chapter 401-600)

Chapter 445

စာစဉ် 30 Chapter 445 အကောင်းဆုံး တိုင်းပြည်

ညစာစားပြီးနောက် အားလုံးသည် ရှုခင်းကြည့်သည့် တဲအိမ်လေးသို့ သွားကြပြီး တစ်ခဏမျှ လေညင်းခံကာ သူတို့၏ အခန်းသို့ ပြန်၍ စောစောနားကြသည်။

ရဲ့လင်းချန်က သူ့ခုတင်ပေါ် လှဲ၍ မျက်လုံး မှိတ်ထားသည်။ သူ အိပ်မပျော်သေးဘဲ ဤအစီအစဉ်၌ ပါဝင်ခြင်းမှ ရရှိသော သူ၏ အကျိုးရလဒ်များကို ဆက်လက် တွက်ချက်နေ၏။

ပထမဆုံးအချက်မှာ ငွေကြေး အမြတ်များ ဖြစ်သည်။ စာချုပ်အရ တစ်ဖက်လူသည် သူ့အား ရိုက်ကူးရေးအတွက် ငါးသန်း ပေးရန် လိုအပ်သည်။ သုံးရက်တည်းနှင့် ငါးသန်း ရရှိခြင်းပင်။ ယင်းက အဆင့်အေ အနုပညာရှင် တစ်ယောက်ကို ပေးသော အနုပညာကြေးပင်။ သို့သော် ရဲ့လင်းချန်၏ ရိုက်ကူးရေးမှ စွမ်းဆောင်ရည်နှင့် ရိုက်ကူးရေးမှ သူ၏ လက်ရှိ ကျော်ကြားမှု၏ အထောက်အကူ ဖြစ်မှုကြောင့် ဒါရိုက်တာက သူ့အတွက် စာချုပ်အသစ် ပြင်ဆင်ပေးခဲ့သည်။

၎င်းတွင် ငါးသန်းမှ သန်းနှစ်ဆယ်သို့ တက်သွားခဲ့သည်။ မူလတန်ဖိုးထက် လေးဆ တက်သွားခဲ့လေသည်။ ယင်းသည် လက်ရှိ ထိပ်တန်း အနုပညာနှင့် ယှဉ်နိုင်သော ငွေကြေးပင်တည်း။

ဤသည်မှာ ရဲ့လင်းချန်ကို အသိအမှတ် ပြုခြင်း ဖြစ်ပြီး ရိုက်ကူးရေးအဖွဲ့၏ သူနှင့် ဆက်ဆံရေးကောင်းကို ဆက်လက် ထားရှိလို၍ ဖြစ်သည်။ ရဲ့လင်းချန်၏ စွမ်းဆောင်မှုက ဘဝ၏ ရုန်းကန်ခြင်းအား အဆင့်အနည်းငယ်မျှ တက်လာစေခဲ့သည်။ ထို့အပြင် ရဲ့လင်းချန်၏ ကျော်ကြားမှုသည် ကံပေါ် မူတည်ခြင်း မဟုတ်ဘဲ သူ၏ လုပ်နိုင်စွမ်းအပေါ် မူတည်ခဲ့သည်။ နောင်အနာဂတ်တွင် ပို၍ တိုးတက်ရုံသာ ရှိပေမည်။ ထို့ကြောင့် ရိုက်ကူးရေးအဖွဲ့သည် ရဲ့လင်းချန်၏ မျက်နှာသာပေးမှု ရရန် အပိုပိုက်ဆံ ထပ်ပေးချင်စိတ် ရှိနေခြင်း ဖြစ်လေသည်။

သန်းနှစ်ဆယ်အပြင် ဧရာမ စပါးအုံးမြွေကြီးကို ရောင်းချခြင်းမှ ရရှိလာသ်ည့ ၆၉ သန်းကိုပါ ထပ်ပေါင်းလိုက်သောအခါ စုစုပေါင်း အမြတ်က ၈၉ သန်း ဖြစ်နေလေပြီ။

အပိုပိုက်ဆံကို ကြည့်ပြီး ရဲ့လင်းချန် သက်ပြင်းချရုံသာ ရှိတော့သည်။ အစွမ်းအစများ ရှိသော လူများသည် တကယ်ကို ပိုက်ဆံ မြန်မြန် ရနိုင်ပေသည်။ သူသည် နှိမ့်ချနေရန် ကြိုးစားနေသော်လည်း သူ၏ အရည်အချင်းများက ခွင့်မပြုချေ။