နတ်ဘုရားမအဖြစ် ပြန်လည်ပေါ်ထွက်လာခြင်း[ဘာသာပြန်] ✔️✔️✔️

Chapter [96]

နဉ်ရှီသည် ရဲစခန်းတွင် အမှုမဖွင့်ခင်ကတည်းက ဤအမှုက နဉ်မိသားစုနှင့်ပတ်သက်နေလိမ့်မည်ဟု ခန့်မှန်းထားမိသော်ငြား စာရွက်ကို ဖတ်ကြည့်ပြီးနောက် လူသတ်ချင်လာသည်အထိ ဒေါသထွက်လာရသည်။

သူတို့ခြောက်ယောက်… တကယ့်ကို သူတို့ခြောက်ယောက်ပဲ..!

သူမ၏အဖေ သက်ရှိထင်ရှားရှိစဉ်က သူမ၏အမေသည် အဖေဘက်မှ အဘိုးအဘွားများကို မိဘအရင်းသဖွယ် ပြုစုစောင့်ရှောက်ပေးခဲ့သည်။ အဖေ့ဘက်မှ မောင်နှမသားချင်းများကိုလည်း ဂရုစိုက်ပေးသည်။ သူမတို့မိသားစုက စီးပွားရေး ပြေလည်သဖြင့် တခြားမိသားစုဝင်များ အဆင်မပြေဖြစ်လျှင် အမြဲတမ်း ရှေ့ထွက်ကာ ကူညီပေးခဲ့သည်ချည်း။

သို့တိုင် ထိုလူများက သူမ၏အမေကို မည်သို့မည်ပုံ ဆက်ဆံခဲ့သနည်း။

သူမ၏အဖေ မတော်တဆမှုကြောင့် ကွယ်လွန်သွားချိန်တွင် ထိုလူများက သူမတို့မိသားစုပိုင် အိမ်နှစ်လုံး၊ အဖေ့ဘဝနှင့် ရင်းခဲ့ရသော လျော်ကြေးငွေများကို လိုချင်မက်မောလာကြသည်။ နောက်ဆုံးတွင် ထိုငွေကြေးဥစ္စာများအတွက် သူမ၏အမေကိုပင် သေစေခဲ့သည်။ ထိုလူများကို ဆွေမျိုးဟူ၍ ခေါ်ဆိုနိုင်ပါဦးမည်လော။ တကယ့်ကို ဂုတ်သွေးစုပ်မကောင်းဆိုးဝါးများပင်။

သူမအမေ မြေပြင်ပေါ်သို့ ပြုတ်ကျလာသည့် မြင်ကွင်း၊ နေရာအနှံ့ သွေးအစအနများ ပြန့်ကျဲသွားသော မြင်ကွင်းကို ပြန်မြင်ယောင်လာမိရင်း နဉ်ရှီခမျာ ရင်ဘတ်အောင့်လာပြီး အသက်ပင် မရှူနိုင်တော့ချေ။

“မစ်နဉ်..?!” အရာရှိလျှိုက နဉ်ရှီ၏မျက်နှာ သွေးရောင်ပျောက်သွားသည်ကို သတိပြုမိလိုက်သဖြင့် ချက်ချင်း ရုံးခန်းတံခါးဖွင့်ပြီး အမျိုးသမီးရဲဝန်ထမ်းတစ်ဦးကို အမြန်လှမ်းခေါ်လိုက်သည်။

အမျိုးသမီးရဲဝန်ထမ်းလည်း အခန်းထဲ ချက်ချင်းဝင်လာပြီး နဉ်ရှီ၏ နောက်ကျောကို အသာပုတ်ပေးကာ စိတ်ရှည်လက်ရှည် နှစ်သိမ့်ပေးသည်။ “မစ်နဉ်.. စိတ်လျော့ထားနော်.. အသက်ပြင်းပြင်းရှူလိုက်… အသက်ပြင်းပြင်းရှူလိုက်..”

ရဲဝန်ထမ်းများအနေဖြင့် သေရေးရှင်ရေးကိစ္စများစွာ မြင်တွေ့ခဲ့ဖူးပါသည်။ တချို့က အမှန်တရား၏ရှေ့မှောက် မတုန်မလှုပ်ဖြစ်နေပြီး တချို့က ကိုယ်နှင့်မဆိုင်သလို ပြုမူနေတတ်သည်။ တချို့ဆိုလျှင် ဝမ်းနည်းထိတ်လန့်မှုကြောင့် ရှော့ရသွားရသည်အထိ။ သို့ဖြစ်ရာ နဉ်ရှီ၏ အခြေအနေက သူတို့အတွက်တော့ အသစ်အဆန်းမဟုတ်ပေ။