صقر الظلام

صقر الظلام ١٣

صقر الظلام ١٣
**************
أسألك بنورك يارب أن تشرحلى صدرى .. أسألك بنورك يارب أن توسع لى فيه ..أسألك بنورك يارب أن تنوره لى بنورك العظيم

اللهم إني أعوذ بك من جهد البلاء ودرك الشقاء وسوء القضاء وشماتة الأعداء.

اللهم إني أعوذ بك من زوال نعمتك وتحول عافيتك وفجاءة نقمتك وجميع سخطك.

لا إله إلا أنت سبحانك إني كنت من الظالمين.

اللهم ارفع مقتك وغضبك عنا اللهم إنا نستغيث بك فأغثنا نشكو إليك ضعف قوتنا وقلة حيلتنا.
اللهم صل وسلم وبارك على سيدنا محمد وعلى آله وصحبه أجمعين

❤❤🧡🧡🧡💛💛💛💚💚💚💙💙💜💜💜💜

تاليا وقفت قدام أدم بتزقه وبحده شديده : على الله تمد ايدك عليه تانى على الله
أدم مسك إيديها الاتنين وبالهجه كلها غيره : أنتى إيه .. مالك وإلا جرالك إيه مش معقول مغيبه للدرجه دى
ياسين بيقوم لسا ها يقرب عليهم ذكريا مسكه : ميصحش تتدخل بين راجل ومراته خليك فى حالك
ياسين زعق : أنتو عايزين إيه مننا 
ذكريا بصله بحده : ماهو لو حضرتك سمعت الكلام ومشيت معانا من غير شوشره ماكنش دا كله حصل
ياسين : يعنى لما امشى معاكو مش ها تأذو تاليااا
ذكريا بجديه : فى كل الاحوال مش هانأذيها دا جوزها وانا بحميها اطمن وأمشى معايا
ياسين بقلق : وإخواتى
ذكريا : يابنى ماتخافش هانتكلم مع بعض ونفهم بعض الأمور وروح  وزى ماخدتك من هنا ها أرجعك تانى
ياسين سلم امره لله ومشى معاه لسا تاليا ها تتكلم ..
أدم شدها  : تعالى معايا
تاليا عيطت : والنبى يا أدم سيبه فى حاله فى راقبته خامسه اقسم بالله مافى اى حاجه بينى وبينه .. أقسم بالله
أدم وقف بصلها بصدمه : أنتى متخيله إنى شاكك فى اخلاقك .. شدها .. قدامى .. هاتى مفاتيح عربيتك
تاليا كل شويه تبص وراها لحد ما ذكريا طلع بالعربيه هو وياسين ومشى .. زقها .. هاتى مفاتيحك
تاليا طلعتها من الشنطه وناولتهالو  مد ايده  خدها ركبها قدام ورزع الباب وركب جمبها  طلع بالعربيه على شقته تاليا بتعب شديد : أنت جايبنى هنا ليه روحنى
أدم نزل وقفل الباب لف مسكها نزلها وقفل العربيه وطالع بيها على فوق فتح شقته ودخلها جوا قفل الباب بالمفتاح وحط المفتاح فى جيبه وهى بتتفرج بتعب وإستسلام .. شاور .. أقعدى
تاليا قربت وقعدت من سكات ماسكه بطنها من تحت بتتألم فى صمت .. قعد قدامها وبصرامه .. مالك عامله ثوره عليا ليه
تاليا سندت راسها وبصاله بتتأمله شايفه قصادها شخص مختلف غير إلا تعرفه .. شخص شديد ما بيتفاهمش مش عايز يلين
أدم : وبعدين فيكى وفى أفعالك جننتينى بقلة سمعانك الكلام
تاليا هزت راسها وبهدوء شديد : اتجوزتنى ليه
أدم بعصبيه : عشان متنيل بحبك
تاليا عيطت وضغطت  على بطنها : بس أنا كرهتك سيبنى فى حالى وسيب أهلى فى حالهم  هما خلاص بيعرفو غلطهم أخويا جه صالحنى وانا واثقه ان اختى جايه هى ورامى مش ها يستغنو عنى .. أما عمى انا ها أحل كل إلا بينى وبينه
أدم هز راسه : هاتحلى إلا بينك وبينه ليه عشان إبنه جه رمالك حسنه بيثبتك بيها حسن نيته
تاليا اتصدمت : أنت عرفت منين
أدم شاور عليها وعلى نفسه : عشان أنتى مش فاهمه إنك ضلى .. يعنى طول الوقت شايفك حتى لو بعيده عنى عارف بتعملى إيه ومين محاوطك
تاليا بتعب بدئت تنهج : أدم تعبانه أنا حاسه إنى بمو.ت يا أدم .. وشها بدء يصفر جاامد  قام بخضه .. تاليا .. طلع يجرى على المطبخ عمل لها لمون وهو راجع لاحظ ان خطوات رجله طابعه دم على الارض .. ساب الكوبايه وطار على برا اتفاجئ بالمنظر تحت رجليها .. فتح الباب وشالها ونزل جرى بقى يسابق الزمن بيها  .. وصل المشفى شايلها وبيجرى على جوا زعق بعلو صوته .. دكتور  بسرعه
جابو ترولي حطها عليه ودخلو بيها غرفة العمليات بعد ما كشفو سونار فى اوضة الكشف .
أدم أول ما الدكتور طلع مسكه : دكتور طمنى عليها
الدكتور باسف  : نزيف لو اتوقف كل الأمور تمام ما اتوقفش هانضطر نضحى باإلا فى بطنها  .. سابه ومشى وأدم ركن ضهره على الحيطه .. باصص للاوضه وبيدعى من قلبه ربنا ينجيهم ويحفظهم  .. بيمر الوقت ببطئ شديد جداااا عليه لدرجه إنه فكر يدخلهم جوا من كتر قلقه لسا بيقرب على الباب الدكتور طلع .. بيقلع البلطو .. عاملين ايه
الدكتور أتنهد : الحمد لله وقفنا النزيف بس هى هاتفضل تحت الملاحظه هنا
أدم : هاتقعد أد ايه
الدكتور : من يومين لتلاته
أدم : خليها هنا أسبوع مرتاحه والكل بيطمن عليها أول بأول حضرتك والممرضين
الدكتور رفع كتافه : زى ماتحب أنزل أحجز لها غرفه وادفع الفلوس حتى لو عايز تقعدها شهر
ادم  هز راسه : تمام .. عايز اشوفها
الدكتور : لماتطلع وتتنقل الغرفه العاديه شوفها .. اتفضل انزل تحت كمل إجراءات دخولها وحجز الغرفه
أدم مشى من قدامه ونزل فعلا حجز وعمل كل حاجه  .. اتصل على عصام : ايوا .. الحمد لله .. كلم ساميه عشان تيجى تقعد مع تاليا فى المشفى
عصام اتعدل : فى حاجه حصلت
ادم بزعل : جالها نزيف وتعبانه
عصام هز راسه : حاضر ... لا ياحبيبى مع السلامه
أدم قفل معاه ودخل لها الاوضه بعد ما أتنقلت فيها  .. نايمه على السرير مغمضه عيونها وبرغم نومها  بس دموع بتهرب من وقت للتانى كأنها بتصرخ جواها ومحدش سامعها ولا حاسس بيها .. قعد جمبها على الكرسى بيمسح دموعها قرب على عيونها باسها وهمس فى ودانها : حقك عليااا زعلك غالى بس انتى عنيده .. لأول مره يحط إيده على بطنها دموعه نزلت واتكلم بحريه .. تاليا حافظى على إبنى او بنتى اوعى تتخلى عنهم حتى لو شيفانى اتخليت عنك .. قرب على بطنها باسها حس بحاجه بتتحرك تحت ايده أبتسم .. شوفتى هو بيقولى لاء يا بابا مش ها اسيبك .. قرب من وشها تانى وهمس .. والله أنتى اغلى ماعندى بقيتى  حته من روحى راندا مجرد شئ  .. مجرد شئ يا تاليااا .  إنما انتى لاء .. شال ايديها باسها بكل حب .. كان نفسى تسمعينى .  كان نفسى أترمى فى حضنك بكل الهموم إلا انا شايلها وحاسس بيها  .. حط راسه على صدرها وضامامها بإيده .. يا حبيبتى الدنيا هاتضحك لنا وها اعملك كل إلا نفسك فيه بس أصبرى .. كل إلا محتاجه الصبر .. فضل على الحال دا لحد ما ساميه كلمته وقالها تروح تجيب لها هدوم من شقتها وتاخد المفتاح من ذكريا ها يكلمه يقابلها هى وعصام .. وفعلا تم الا قاله
ساميه راكبه جمب عصام مش زى عوايدها أبداااا ساكته وهو باصص للطريق وساكت .. لا هو بيتكلم ولا بيفتح موضوع ولا هى بتتكلم .. قالت بهدوء وصوت واطى : أول مره ما تسألنيش عامله إيه
عصام أتنهد ولف بالعربيه : شايفك  كويسه الحمد لله  مش محتاج أسألك
ساميه هزت راسها وكل إلا فى دماغها إن المعامله دى من التقرير إلا راحله عن جوزها  حاسه إن عصام مصدوم وغير رأيه فيها
ساميه بنفس الهدوء : مش ناوى تتجوز بقى وتعمل عيله
عصام بجديه : ناوى إن شاء الله أول حاجه ها أعملها
ساميه أتعدلت وببتسامه : بجد فرحتلك يا عصام الخطوه دى كان لازم تاخدها من زمان
عصام خد نفس طويل وخرجه بص من الشباك ورجع بص قدامه وايده بتلف الطاره بتاعت العربيه : فعلا يا ساميه خطوه أتأخرت فيها كتير جدا كان زمان ولادى طولى دلوقت .. زعلت أبويا وامى وحرمتهم يسمعو كلمه تيتا وجدو
ساميه بحزن جواها هى فاهمه إنه بيقولها أنتى السبب : ملحوقه ان شاء الله  .. وبفضول .. هاترجع لهايدى تانى
عصام ضحك بسخريه : اتخطبت الحمد لله محدش بيستنى حد  .. فى بنت عجبتنى ودخلت دماغى ها أكلم بابا وماما عليها وربك يسهل إدعيلى
ساميه من قلبها : ربنا يسعدك ويعوضك كل خير يارب
عصام بصلها : وأنتى كمان  ربنا يسعدك .. أرجوكى لما تحبى تتجوزى ركزى وأختارى صح بلاش تسرع وعند مع إلا حواليكى  إسمعى رأيهم وإدى نفسك فرصه تفهمى إلا قدامك وبعدين قررى
ساميه نطرت ايديها : دا لو اتجوزت أنا الحمد لله حاسه إنى كدا أحسن مش محتاجه راجل فى حياتى غير بابا وبس هو سندى فى الدنيا
عصام بصلها ورجع بص للطريق وبنوع من العصبيه  : إيه إلا بتقوليه دا .. وحيدة أبوكى وعايزا تحرميه يكون جد .. عمى ربنا يديله الصحه والعافيه لو عايش ليكى إنهارده مش عايش بكرا تعيشى أنتى كمان وحيده وتموتى وحيده
ساميه : الوحده أحسن مليون مره من لص يسرق حياتك ويضيع باقى عمرك على صراعات أنت فى غنى عنها
عصام : إرحمى إلا جابونا وابعدى عن اللصوص وخليكى فى قسم تانى غيرهم يا ساميه شعارات
ساميه لأول مره تضحك من ساعة ما ركبت معاه .. لف وشه ورجع بص للطريق .. حلوه دى والله بتغنى وتردى على نفسك
ساميه : أنا نفسى أقولك حاجه ماتتريقش عليا
عصام : لازم أتريق واحده دماغها فاضيه زيك طبيعى نتريق عليها 
ساميه بصاله ومبتسمه مستمتعه ان عصام بدء يفك ويرجع لطبيعته معاها ساكته تماما وهو سكت مره واحده لما حس إن نظرها ثابت عليه .. بصلها ورجع بص للطريق أتكلم بصوت هادى  .. مالك متنحالى كدا ليه كأنك بتتعرفى عليااا
ساميه أتعدلت : أنا فعلا بتعرف عليك لأول مره .. لأول مره تنزل لا تعبرنى ولا تعبر عمك وتتطمن عليه .. لأول مره أركب معاك ماتفتحش بوئك ولا تسألنى حتى مالك ولما سألتك تقولى شايفك كويسه  .. طب أخبارك إيه .. هو أنا كنت ضغطا عليك قوى كدا
عصام دارى إرتباكه من أسألتها له : عادى يعنى كنت مشغول شويه وبعدين عمى كدا كدا كنت ها أروحله مفيش أى حاجه من الخفافيش إلا فى دماغك
ساميه سندت ضرها ورجعت راسها  لورا وفضلت الصمت .. منين عايزاه يبعد ويشوف حياته ومنين دلوقت زعلانه على بعده بقت حاسه إن فى تناقد جواها مش قادره تتقبل معامله تانيه من عصام لها .. عصام بالنسبلها حاله خاصه صعب تتكرر تانى مع أى حد مهما كان  
عصام أختار نفس أسلوب الانسحاب والصمت بيدوس على نفسه بطريقه بش.عه عشان ينسحب وينسى وجودها وهى موجوده 
مر الوقت وصلو فعلا المشفى وأدم أستأذن منهم ومشى
ساميه بخوف قربت من تاليا وبمجرد ما ساميه قربت فتحت عيونها وفضلت تعيط كتير ..
عصام واقف على الباب مش عايز يدخل : أجيلك
ساميه بخوف : مش عارفه مالها كانت نايمه وقامت تعيط مره واحده
عصام : انادى للدكتور
ساميه لسا هاتقول اه تاليا شدت ايديها وقالت لاء أنا كويسه الحمد لله ..
ساميه مسدت عليها :  إهدى يا حبيبتى .. أبتسمت .. الحمد لله ان أنتى والبيبى بخير .. بت يا تاليا ماتستهبليش أنا نفسى أبقى خالتو وأشيل بيبى ادلعه
عصام متابع ساميه من بعيد اول ما سمع كلمتها رفع راسه بصلها و من جواه بيقولها الله يسامحك 
تاليا بصت لساميه : روحينى مش عايزا أقعد هنا
ساميه بنفى : ماينفعش يا حبيبتى لازم تفضلى تحت المتابعه  أسبوع أدم إلا قالنا
تاليا بصت على الباب عدلت نفسها وغطت شعرها : قولى لعصام يدخل عايزاه
ساميه شاورت : تعالى كلم تالياااا
عصام دخل وفضل واقف بعيد عنها ابتسم : ألف سلامه عليكى
تاليا هزت راسها : الله يسلمك .. قرب عايزاك .. قومى يا ساميه
ساميه قامت وتنحت بصت لعصام : يانهار ابيض دى بتطردنى
عصام أبتسم وشاور خدها بهزار : أتكلى محدش طايقك
ساميه قلبت وشها وبصعبانيه : كدا يا أوسه ماشى شكرا .. بصت لتاليا .. إشبعى بيه
تاليا انتظرت عصام يقعد ويقرب اتكلمت برجاء : أدم مشى راح فين
عصام ضم حواجبه : مش عارف
تاليا :  أدم خد ياسين إبن عمى هو وذكرياااا لولا إلا حصلى كان زمانه مع ذكريا من ساعتين .. أرجوك كلمه وروحلهم طمنى أوعى تخليهم يعملو فيه حاجه إخواته البنات ملهمش غيره .. وبحلفان  والله لو جراله حاجه مش ها أسامح نفسى ولا ها أسامحه
ساميه بصدمه : خده .. يعنى إيه خده
عصام بصلها بحده : إهدى يا ساميه
ساميه بإنفعال : لاء مش ها أهدى هى الدنيا سايبه ياعصام هو ياسين عملهم إيه وإلا فى ايده ايه ماتسيبوه فى حاله الراجل ماشى جمب الحيط
عصام قام وقف قرب منها قوى : إنتى إيش عرفك انه جمب الحيط عايشه معاه وإلا تعرفى عنه حاجه
ساميه بتأكيد : أيوا مع اخواته طول الوقت وهو مع بابا طول الوقت وعارفه حكياته وكل حاجه تخصه
عصام هز راسه وابتسم : برافووو عليكى هبلك ما أتغيرش .. رفع إيده .. يارب  تتحسدى عليه .. سابها وخرج برا
ساميه هزت راسها وبتقلده وهى خانفه .. بتريقه : بنافو  عليكى .. هو ماله دا .. قربت من تاليا .. انتى تعبتى عشان كدا
تاليا بتاكيد : أيوا بس انا تعبانه من قبلها .. ساميه إهدى على عصام وبطلى رخامه عليه أرجوكى 
ساميه : والله ما بتراخم ولا قصدى اتراخم .. تاليا أنا مابحبش حد فيهم يمارس سلطته علينااا شغلهم لنفسهم مش علينا إحنا .   هما مش ها يمشو مكاتب برا البيت وجوا
عصام طلع التليفون واتصل على ادم :  واخد ياسين انت وذكريا
أدم وهو راكب عربية تاليا ماشى بيها  : أيوا هى لحقت فاقت وبلغتك
عصام : أيوا فاقت
أدم اتنهد : هى عامله ايه دلوقت
عصام : الحمد لله كويسه .. ناوى على إيه هاتعمل فيه حاجه
أدم : لحد ما أتاكد انه تمام .. لاء .. ولحد ماعرف منه إلا انا عايزه بردو لاء
عصام : خد بالك الكل بيقول ان الواد ماشى فى السليم وملوش علاقه بأى حاجه بتحصل دلوقت حتى أبويا
أدم بتأكيد : عارف بس أنت بردو عارف ومتاكد انى مش ها اخد با إلا بيتقال ولا الظاهر .. طمنها وخليك مع ساميه عشان لو أحتاجو حاجه
عصام : ماتقلقش .. ها استنى تليفونك
أدم : تمام
عصام قفل الفون ودخل مبتسم : ايه ياستى مكبره الموضوع وبتعيطى .. ياسين زى الفل ادم عايز يتكلم معاه فى أمور تخص عمك مش اكتر
تاليا بعصبيه : أنا مش عايزا منه حاجه ولا عايزاه يعملى حاجه
عصام : اى إن كان إلا مزعلك منه بس انا بقولك هو بيعملك الصح  لهفتهم عليكى وتربصهم طول الوقت بيكى كان موريب وبياكد إن الموضوع كبير مش هايعدى بالساهل .. ساعدى أدم بدال ما تهدى المعبد على إلا فيه
تاليا ركبت دماغها : لاء يا عصام انا عايزاه يخرج برا حياتى كلها هو مش فاهم ليه إنى تعبت منه هو  .. جبت أخرى منه هو .. بتعد على صوابعها .. انا لا خايفه من عمى ولا ابنه ولا اخواتى ولا أى حد .. الحمد لله انا بعرف احمى نفسى
عصام بياخدها على قد عقلها : ماشى  ربنا يديكى الصحه والعافيه
تاليا : قوله يبعد عننا بقى
عصام هز راسه : ها اقوله بس لما تخرجى بالسلامه  ان شاء الله .. مفيش عصير ولا حاجه نبل بيها ريقنا نشفتو ريقى وصدعتونى
ساميه بتبص حواليها مالقتش حاجه خالص  نطرت ايديها : روح بل ريقك من اى حنفيه
عصام قلب شفته : أى حنفيه انتى بقيتى عشوائيه كدا ليه
ساميه بصت لتاليا والاتنين ضحكو من قلبهم وتاليا ماسكه بطنها
ابتسم وقالها بتلقائيه .. قولت نكته وإلا أدهور حالك من بعدى
ساميه بصتله : على فكره انا تلقائيه مش عشوائيه
عصام شاور عليها  : أنتى تلقائيه .. ماشى ماعلينا .  ها انزل اجيب لكم شوية حاجات من تحت عايزين حاجه معينه من السوبر ماركت
ساميه بتأكيد : ايوا فى عربية سجق وكبده ورا المشفى واقفه على  ناصيه كدا بعدها صندوق ز.باله  بعد صندوق الز.باله على طول هاتلى منها عشرين سندوتش ناكلهم انا وتاليا
عصام متنح بجد رفع حواجبه الاتنين : إيه النتا.نه إلا بسمعها منك دى يا ساميه من امتى بتاكلى الحاجات دى فى الشارع .. اتريق بطريقه خرجت تاليا من إلا هى فيه .. جنب صندوق ز.باله .. دا مخك هو إلا ز.باله .. وعايزا عشرين سندوتش ليه طالعه مطلع  هاترمى فى بلاعه والا فى كرشك طب ما اجيبه هو وعريبته يقعدلك فى الاوضه كل ماتجوعى افتحى بوئك يصب فيه صبه
ساميه : ههههههههه .. هههههههه .. عصام ماتدخلش معايا فى جدال عشان هاتسمع منى إلا عمرك ما شفته
عصام بعصبيه : ها اسمع والا ها اشوف أنتى بقى عندك حول فى الكلام .. الكلام بيتقال عند الناس  معاكى  بقى يتشاف .. ضرب ايد على ايد وخرج برا
ساميه نامت على تاليا وهربت منهم الاتنين صوت ضحكهم بقى عالى جدااا وتاليا بتصرخ من الوجع ومش قادره توقف ضحك
ساميه بضحك فظيع وكلام مقطع : ولاد عمك قضو عليااا عملولى تخلف عقلى نهارى مش فايت مع عصام بالذات
تاليا : هههههه .. ضربتها .. بس بقى
ساميه : عصام هاياخدنى يتاوينى مش ها يروحنى لو فضلت كدا
تاليا بتعب : عنده حق .. إبعدى يا ساميه مش قادره بطنى وجعتنى تانى أنا عارفه مابعرفش أتكلم جد وانتى موجوده
**
عبدالعزيز قاعد فى المشفى هو وحكمت  وقاسم  .. قام بعصبيه لما شاف الدكتور : إحنا مرمين هنا من إمبارح فين مراتى وجرا فيها ايه
الدكتور : إحنا بنحاول من إمبارح ننقذ إلا فى بطنها هى وقعت عليها والا حصل إيه
عبدالعزيز بخوف : ماعرفش جرا فيها إيه الحزينه .. هو بيحصل فيك ليه كدا يا عبدالعزبز .. عملت ايه فى دنيتى  بس يارب عشان يجرا دا كله .. ضرب على رجله ..
قاسم قرب عليه : بنتى جرا فيها إيه الدكتور قالك حاجه شينه
عبدالعزيز بيضرب على رجله : ما قالش يا اخويا ما قالش إبعد عنى السعادى داهيه تاخدكم كلكم وتريحنى منكم
حكمت قربت : مالك  بتعامل الراجل ليه كدا قلبنا مخلوع على بنتنا وانت نازل فينا تهزيق
عبدالعزيز بتمتيقه وعصبيه : ولو ما بعدتيش عنى السعادى أنتى روخره ها أمد إيدى وليلتك هاتبقى سودا جاتكو القرف
قاسم مسك مراته : تعالى يا حكمت خليكى جارى لحد ما نتطمن على البت ..
حكمت ماشيه قالبه وشها بتبرطم .. قعدت بعيد عنه بس عيونها ماليانه غل بتبص عليه نفسها تروح تقوله يا شايب يا عا.يب كفايه ان بنتى رضيت تتجوزك شايف روحك على ايه دانت رجل برا ورجل جوا ..
مر وقت كبير .. والدكتور بلغه إنه للأسف خسر الولد .. ما سألش حتى هبه عملت ايه ولا صحتها جرا فيها .. خد بعضه ومشى من المشفى وساب هبه لوحدها مع أهلها 
حكمت : شوفت عمايل الراجل فينا شوفت مجايبك أنت وبنتك أهو سابها ومشى ولا فارق معاه حاجه البت تقوم ماتقمش مايهمش فى داهيه
قاسم بقلق : تفى من بوئك يا حكمت البت هاتقوم إن شاء الله سيبك منه دا راجل مؤذى أذى حاله وكل إلا حواليه انا عارفه قادر ومفترى
حكمت مسحت وش هبه وضربت ايد على ايد وبصعبانيه : هى مش ناويه تفوق والا إيه مالها كدا أنى قلقت
قاسم شاور وبزعل : خسرت ضناها وهو كبير فيه الروح فاضله شهر واحد  ياكبدى عليكى وعلى ضناكى  .. لا حول ولا قوة إلا بالله العلى العظيم وان لله وإن إليه لراجعون
**
أدم وصل وطلع لذكريا الشقه رن الجرس وانتظر يفتح .. اول ما فتح دخل بصله وبجديه : هو فين
ذكريا شاور : فى الاوضه جوااا
أدم دخل جوا ووراه ذكريا فضل واقف على الباب يبص لياسين وياسين يبصله بيفرز أدم وبيفحصه بمعنى الكلمه وكذالك أدم
ذكريا : هاتفضلو تبادلو النظرات كتير
أدم مد شفايفه وبص لذكريا وبتريقه : مش تضايفه يا ذكريا
ذكريا : مانا مضايفه وعامل أتنين قهوه مظبوط أهووو وبيشاور عليها
أدم قرب منه وقعد قدامه حط رجل على رجل .. فرد ضهره وايده ورا دماغه وبيتمطع .. أتعدل وهو بيتنهد : ااااه  .. الواحد تعبان مش عارف يلاحقها منين والا منين نفسى أخد راحه منكم كلكم
ياسين ببرود : عايز منى إيه
أدم مد ايده خد الفنجان شرب بوء : عايز كتير وأول حاجه عايزها إيه جابك ورا تاليا هنا
ياسين رد بدون تفكير  ؛ بنت عمى
أدم بنفس الهدوء والبرود : لاء مش دا السبب
ياسين : إمال إيه السبب
أدم أتعدل وبص فى عينه : بتحبها ولسا عايزها فاكر إنك هاتعرف تلعب عليها وترجعها ليك
ياسين أتحمق : أنت دخلت جوايا .. جايبنى هنا وحابسنى لجل ماتجر شكلى أنى فى حالى ومدايقتش تالياااا فى شئ
أدم ربع إيده : وبعدين
ياسين بعصبيه : وبعدين إيه يا راجل أنت
أدم اتعدل فى حركه فجائيه خضت ياسين شده من قبته عليه جااامد وبشده فى كلامه  قال بطريقه موريبه : إيه جايبك ورا تاليا عايز منها إيه جيب من الاخر عشان تطلع من هنا على رجلك  وبتحذير دا لو عايز تطلع
ياسين هز راسه يمين وشمال واتحمق بالعياط : والله ماعايز منها حاجه عايزها بخير لا أكتر ولا أقل
أدم : والفلوس إلا جبتها معاك  .. فاكر إنك كدا خلاص كسبت قلبها زى ماكنت بتعمل مع البنات زمان .. أرمى لها حاجه عشان تطمنلى وتعمل إلا أنت عايزه وتستغل وضعها يمكن تحن  صح يياسين .. يا روميو العزبه
ياسين مسح دموعه : أنى مقدر إنك غيران على مراتك منى بس لما وصلت هنا كنت بين الحياه والمو.ت وهى ساعدتنى وأسألها لقيت شغلانه قولت أقعد وأشتغل واجيب إخواتى جمبى وقصاد عينى .. وسبب مجى  ارجع جزء من حقها إلا الكل بينهبه سيبنى فى حالى لا تأذينى ولا أذيك
أدم ساب راقبته وزقه : أسيبك فى حالك وانا عارف كل بلاويك .. طب مراتى هبله وصدقتك
ياسين : هاتلى مصحف أحلف عليه .. خلاص تاليا ماتنفعنيش بقت فى عصمتك وربنا كرمها وهاتبقى أم ابصلها أزاى ياجدع أنت
أدم نطر راسه : زى  فاطمه بنت أبو زيد
ياسين وشه جاب ميت لون وسكت
أدم كمل : وإلا تسنيم البت إلا انتحرت بسببك .. رفع صباعه لفوق .. وإلا ماجده .. رفع حواجبه .. هااا ..  أكمل يمكن تفهم انى  عارف عنك كل بلاويك  .. نطر إيده ..  واحده متجوزه ما يضرش .. بنت تضحك على  عقلها ما يضرش وتروح ضحيه ليك عادى .. واحده هربانه وبتستنجد بساعتك عشان انت فتى احلامها ما يضرش .. كتير يياسين ماتعدش استغليت فلوس ابوك أو بمعنى اصح فلوس ولاد عمك واستغليت شكلك الحلو  عشان تلعب ببنات الناس
ياسين عيط : أنى مليش ذنب
ذكريا ابتسم وبص لأدم : هو لسانه اتعوج ليه تانى
أدم نطر ايده وميلها : يتعوج يتعدل مش مهم المهم أسمع منه إلا انا عايزه .. لعلمك لو فكرت أعملك قضيه مش هاتخرج ولا تشوف الأسفلت تانى
ياسين مسك ايد أدم  : والله توبت  كان طيش .. ابويا فهمنى إنى راجل والا نفسى فيه اعمله ماتحاسبنيش أنا حاسبه هو
أدم رفع حواجبه : ليه هو إلا عمل كل العمايل دى والا أنت مفيش مخ عند حضرتك
ياسين بنفى : مفيش مخ .. كبرتنى على إن الغلط من حقى أعمله وحق مشروع زى ما بتقولو هنا ...  يبقى حقى عمرى ما ها اشوفك صح .. الحساب  للعلمنى دا .. الحساب للراجل إلا قالى البنت إلا تسلم روحها ليك أعمل فيها مابدالك دى سايبه وتستاهل .. أنى ما ضربتش واحده على ايديها وقولتلها تعالى بالعافيه .. رفع ايده لفوق تقوم انت عايز تضربنى على ايدى .. تاليا مراتك
أدم اتعدل بإنتباه وبصله بصه رعبته بمعنى الكلمه : مالها مراتى
ياسين : ماعملتش ليه زيهم .. ياما حاولت والرد الوحيد إلا كان بيترد عليااا 
أدم حط رجل على رجل : إيه الرد
ياسين : أخد فوق دماغى .. حاولت كتير واتراخمت عليها أكتر ماقدرتش عليها ليييه عشان دى أخلاقها عشان هى واحده بتعرف تحافظ على نفسها من أى حد مهما إن كان .. ودا إلا خلانى حبيتها واتمسكت بيها .. لو كانت ادتنى إلا انا عايزه ها أحبها ليه والا ها اشوف فيها ايه مميز .. شاور على نفسه .. أنا راجل .. وشاور على أدم .. وأنت راجل وفاهم كويس معنى كلامى ولو جتلك الفرصه عمرك ما ها تضيعها
ذكريا ابتسم وأدم من جواه برغم ديقته انه بيتكلم على مراته بس فخور بيها .. فخور إنه فعلا عرف ينقى ويختار واحده لا غبار عليها .. محدش يعرف يقول عليها كلمه
ياسين : مراتك من اللحظه إلا عرفت انها حامل بقت بنت عمى  ربنا يعوضنى ويكرمنى بواحده كويسه أنا بتمنى دا ها أعمل بيت وعيله وأستقر .. كل همى إخواتى دلوقت خمسه متعلقين فى رابقتى قبل ما اطمن على نفسى عايز أطمن عليهم  سيبنى فى حالى الله يباركك فى مراتك وفى إبنك  إلا جاى 
أدم لف إيده :  كل إلا قولته دا ولا يفرق معاياااا أنااا مش ها أصدقك ولا ها أتثبت بكلمتين  بتعرف تضحك بيهم على إلا حواليك .. مراتى تاريخها كله عندى مش مستنى منك تقوله .. وتاريخك .. قرب براسه .. الأسود كله .. فاهم يعنى إيه .. كله عندى .. بتدينى حكم ومواعظ وبتعرفنى أد ايه انت عملت إلا اتربيت عليه .. شاور على برا .. وخايف على خمس بنات فى راقبتك .. خايف عليهم ليه ومن مين .. من واحد زيك ندل .. خايف عليهم ليه لو هما زى تالياااا  .. رفع حاجب .. وإلا مش واثق فيهم
ياسين زعق : إخواتى اشرف من الشرف
أدم : يبقى خلاص سيبهم هما ونصيبهم ..  وبنات الناس بردو اشرف من الشرف .. أغلبهم وقعو فى الغلط لما بينضحك عليهم مش ها اقولك كلهم بس أغلبهم .. لما يوصل الحال بواحده تمو.ت نفسها بسببك وبسبب عملتك وابنك إلا فى بطنها وتيجى تدينى درس طويل عريض وخايف على إخواتك يا أنت مجنون يا بتستهبل  .. المشكله إن قانونا مليش حق احاسبك طالما محدش اتهمك إتهام رسمى
ياسين عيط جااامد وهز راسه : أعمل ايه وأكفر عن ذنبى بإيه 
أدم شاور عليه : دى مشكلتك مش مشكلتى .. تعمل .. تكفر بتاعتك أنت ..  البنات دى خدت جزاء إلا عملته من سمعتها وشرفها وانت بردو هاتاخد جزائك مش  هاتعرف تهرب منه .. ربنا قالك ولا تقربو الزنا .. أنت بتحلل دا عشان راجل وعشان ابوك قالك العيب عليها .. يعنى مش هامك ان ربنا قالك دى منطقه محظوره إبعد عنها  .. المهم .. تاليا مراتى انا عارف بحميها ازاى ... أبوك
ياسين بصله : أنت كأنك بتحقق معايا ولا الظباط .. بتفتش ورانا ليه  
أدم ميل راسه : إعتبرنى ظابط .. مراتى لها حق كبير عندكم وعند أبوك .. وبتحذير .. على الله تنكر
ياسين بمنتهى السهوله : مش ناكر  وبقولك أهووو أيوا تاليا لها حق هى واخواتها عند ابويا بس حصل ايه ماعرفش ولا ليا علاقه بدا 
أدم :  أنا ما قولتش ليك علاقه .. أبوك حبسك وكان هايمو.تك ليه
ياسين افترض إن تاليا قالتله : أكيد تاليا قالتلك
أدم شاور بصباعه : أنا بسألك انت ملكش دعوه بتاليا ولا تجيب سيرتها على لسانك .. ودا تحذير
ياسين أتنهد وحكى له كل حاجه 
أدم بص لذكرياااا : هاتفضل واقف اقعد
ذكريااا جاب كرسى وقعد ربع إيده بص لياسين : فاكر يوم موت أمك
ياسين رجع بالذاكره وتذكر اليوم دا أتخنق وافتكر منظر أبوه والبرود إلا كان بيتعامل بيه رد بتوهان : ماله اليوم
أدم : إيه حصل  وازاى البيت اتحرق
ياسين بتذكر : كان فى قش كتير حوالين البيت الظابط قال لأبويا إن حد رمى سجاره ولعت فى القش والولعه مسكت فى البيت .. عندنا الناس بتنام بدرى  وعمى ومرات عمى وأمى كانو سهرانين عشان وهى طالعه عدت عليا فى الاوضه زعقتلى وقالتلى قوم ذاكر بدال قعدتك .. قولتلها راحه فين قالتلى راحه لعمك بالعشا ها اقعد معاهم حبه وارجع
ذكريا : ازاى كانو سهرانين ومحسوش بالولعه  لا صرخو ولا طلعو إلا اعرفه إنهم خرجو مي.تين ماعدا عمك كان لسا فيه الروح بس بردو لا خرج ولا جرى
ياسين بنفى : ماعرفش والله .. كل إلا اعرفه إنى خسرت أمى وعمى ومرات عمى فى ليله مشئومه علينا كلنا
أدم : مين بيشرب سجاير عندكم
ياسين : كلنا حتى عمى هشام وقالو ساعتها يمكن رمى السجاره من الشباك ونام وحصل إلا حصل
أدم : سبب مجيه فى اليوم دا من غير ولاده
ياسين بتذكر فلاش باك
*******************
هشام نازل من العربيه ومعاه ناديه مراته دخل جوا بعد ما أستقبله عبدالعزيز ورحب بيهم ترحيب كبير 
عبدالعزيز بضحكه : يا خطوه عزيزه  .. لسا بقول لأم ياسين مش عوايد اخويا يعوق علينا كدا
هشام ببتسامه : والله تعبان يا اخويا عندى ارق ومخنوق ومليش نفس اروح ولا اجى ماجبنيش غير الشديد القوى
ناديه بتاكيد : أنا إلا قولتله تعالى نروح العزبه نقعد مع عبدالعزيز يمكن تروق دماغك ضغط الشغل وحش وهو بينتح.ر مش بيشتغل
عبدالعزيز   بتأكيد : واجب بردو ماجبتش الولاد معاك
هشام : لاء لميس وتاليا ها يجو بكرا إن شاء الله
عبدالعزيز : إن شاء الله .. اتفضل .. اتفضلى يا ست ناديه يا خطوه عزيزه ..
ياسين بفرحه : يعنى هايقعدو معانا أسبوع بقى يا حلاوه يا ولاه .. بت يا منال .. انتى يابت
منال جايه جرى زقرده صغننه قوى : نعم يا اخويا
ياسين : تاليا جايه بكرا جهزى الكراسه والقلم
عبدالعزيز زغر له : ورقه ايه وقلم ايه انت مالك سيب البنات لحالها ياحزين أنى ماعنديش بنات تتعلم ويتفتح عنيها
ناديه : مش قادره افهمك لحد دلوقت ماله العلم حلو
هشام مسك ناديه : سيبى اخويا بدماغه مهما قولتى ما بيغيرش رأيه
عبدالعزيز شخط جامد فى ياسين : أنجر أجرى من هنا  .. بص لمنال  أنتى يا هبابه لو شفتك ماسكه ورقه والا قلم أقطع خبر.ك
هشام شده : براحه على عيالك مش كدا انت أبوهم حبيبهم
عبدالعزيز نطر إيده : ربنا بلانى بعشر تهم وواحد زى قلته ملوش دماغ
هشام : براحه بردو وبعدين البنات نعمه كبيره لميس وتاليا روحى من جواااا لو قالولى يا هشام هاناخد عيونك عشان نسيبلك بناتك ها أقولهم ما يغلوش عليهم
عبدالعزيز بصله وضحك : أنت  خدت اخلاق وطبع البندر مبقاش ليك فى سلونا البت هم تقيل وشيله ما يعلم بيها إلا ربنا لحد ما تسترها .. يا مخلف البنات يا شايل الهم للمما.ت
ياسين بزعل : أنى خارج
عبدالعزيز نطر ايده : غور وأطمن على شغل العمال
هشام شاور : أستنى يياسين يا حبيبى تعالى خده تحت ايده .تعالى ياعبدالعزيز عايزك فى موضوع مهم مش ها ينفع نتكلم فيه هنا ها اوصل ياسين ونروح المندره
ناديه : خدنى معاك ودينى المندره اغير هدومى
هشام شاور : تعالى
طلعو برا ووصل ياسين لأول المزرعه ومشى هو وناديه وعبدالعزيز
بااااك
*****
ياسين : دا كل إلا حصل قدامى ولحد اليوم دا وابويا راكب العربيه قال لعمى أنا مجهز حسابات العزبه لو عايزها قاله لاء لما تاليا تيجى تحاسبك انا مفيش فيا دماغ المزرعه تاليا مسئوله عنها  .. يعنى اليوم إلا حصل فيه الكارثه دى كانت كل حاجه بأسم وملك لعمى .. لحد اليوم دا كان مستنى تاليا لجل ما تحاسبه 
ذكريا بص لأدم ورفع حاجب : زى ماقولتلك بالظبط توقعى ١٠٠ فى الميه صح 
ياسين بعدم فهم : توقع ايه
ذكريا : يمكن فى شبهه جنائيه فى موت أمك وعمك ومرات عمك
ياسين بعدم فهم : يعنى إيه مش فاهمك
ذكريا : يعنى حد قتلهم مثلااا .. إلا له مصلحه ياخد الفلوس وكل إلا ورا وقدام ولاد عمك مين
ياسين بصدمه : أبويا .. تقصد القصد الشين داهون .. أنى اصدق كل حاجه فى أبويا إلا أنه يقتل .. زعق .. يقتل مين .. أمى أنى وبيخبط على صدره .. عمى ومراته  دا كان بيحبه وبيتمنى يجى يقعد معانا
أدم : الورق إلا يخص عمك اختفى من اليوم إلا مات فيه ليه
ياسين بتخبط : ماعرفش .. يمكن حصل زى ما بتقول وابويا لاقاه وطمع فيه إنما يعمل فيهم العمله دى .. لايمكن كانت الحكومه خدته سايبينه ليه لدلوقت
أدم : الحاجات المهمه أبوك بيشيلها فين
ياسين هز راسه بنفى : ماعرفش
أدم : يعنى عمرك ما شفته بيشيل ورق
ياسين : قبل موت عمى كان بيشيل اى حاجه فى البيت بعد عمى ماركزتش ولا كنت بشوفه عشان هو بطل يحيب أى حاجه فى البيت
أدم : عمك أشترى المزرعه من حد وإلا كانت ملكه من زمان
ياسين : لاء عمى وابويا كانو شغالين عند صاحب المزرعه راجل كبير جداااا 
ذكريا : أسمه ايه وراح فين يياسين
ياسين بيدعك فى أورته جااامد : أنا كنت صغير أوعى عليه وفاكره أسمه عم عم .. هز راسه مش فاكر دلوقت بس كان راجل الكل بيحبه ويحترمه فى حاله الوحيد إلا بيتعامل معاه ويعرف عنه كل حاجه عمى هشام الله يرحمه سره كله مع عمى
فضل أدم وذكريا يسئلو ويعصرو ياسين فى كل شئ يخصه ويخص أبوه وعمه والاتفاقات الا كانت بينه وبين ولاد عمه على تاليا  برغم إنهم مجمعين معلومات كتير جدااا بس بيتأكدو منه شخصيا وبيعرفو حاجات تانيه جديده  .. الليل هجم ولسا ياسين معاهم ..
أدم شاور : أتفضل روح وخلى عندك علم فى أى وقت ها أقولك تعالى تيجى بدون أى مشاكل ولا حد يعرف لو عايز الأمور تبقى حلوه بيناااا وتثبتلى صدق نواياك
ياسين خرج من تحت إيد ذكريا وأدم وعنده إحساس كبيرر إنه ظابط لايمكن يبقى شخص عادى 
ذكريا بيتمطع جااامد : أنا جوعت تعالى ناكل
أدم بنفى : لاء ها أروح أطمن على تاليا الاول
ذكريا : نروح مع بعض عايز اشوفها واطمن
أدم بنص عين : يا حنين ربنا يطمنك أنا شكلى غلطت لما زرعتك وسطنا
ذكريا ضحك بصوت عالى : أنت لسا شوفت حاجه دانت ربنا وقعك تحت إيدى عنياااا حاضر
أدم : هههههههههه انا حبيبك بلاش نداله
ذكريا هز صباعه ؛ توء توء أبدا تجيلى فرصه زى دى واضيعها ..
أدم بجديه : تفتكر أبو تاليا أتخلص من الراجل صاحب المزرعه  دى كلها وإلا عرف أخوه ف بالتالى اتخلص منه وخد كل حاجه
أدم بتفكيرررر : لاء ما اعتقدش أنا سألت على أبوا تاليا والكل بيأكد إنه راجل عارف ربنا وبيخافه وكان بيراعى كل إلا حواليه ومحبوب جدا عن عبدالعزيز .. إحنا نجيب تاريخ الارض  وهانعرف كانت بأسم مين قبل أبو تالياااا 
**
ياسين روح على البيت على طول دخل الأوضه من غير ما يرمى عليهم السلام ..
منال وامانى وكريمه وثريا وتوحيده  .. دخلو ورا بعض على باب الاوضه منال بصوت عالى : مالك داخل زى القطر ليه كدا لا سلام ولا كلام
ياسين قام زقهم كلهم على برا ورزع الباب قفله فى وشهم وتربسه من جوا
توحيده خبطت على صدرها : ياخرابى يا عرابى ياسين أتجن والنداهه ندهته
كريمه هزت ايديها ولوت شفتها : يالهوى يالهوى أول مره يعملها الحزين فى حياته ويوكروشنا كرشة الكلاب كداهون لاءلاء فيها إنا الحكايه
أمانى : مايمكن مدايق ما تتلمى منك لها .. خبطت جاامد وبصوت عالى .. ياسين .. ياسين ... تيك تيك تيك .. أنت يياسين
ياسين فتح وزعق فى وشها : عايزا ايه مش ناقصكم أنى دلوقت
أمانى : مالك فيك ايه مين زعلك وجاى تطلعه علينا
ياسين رزع الباب تانى وتربسه
أمانى شهقت ومدا بوذها : ياوقعتك إلا شبه قرص البهايم يا يياسين  ألا ما جبتلنا جلاتى ولا عبرتنا  يا حزين
توحيده بتريقه ؛ جايز حد مدايقه مالكم كِدا
ثريا زقتهم : سيبوه لحاله دلوقت خلى فى وشكم حبة دم
منال بتفكير : ليكون مدايق عشان تاليااا .. عارفين أنى صعبان عليا أخويا ومش عارفه اصفى لتاليا ماله اخويااا وبعدين فين جوزها دا ولا نعرف عنه أيوتها حاجه
راحو قعدو كلهم
أمانى : وانتى عايزا تعرفيه ليه  انتى إلا متجوازه أكيد نقت واحد شبه أخوكى قمر عشان تكيده
توحيده : اااه شغل بندر بقى فا أخوكى يغير زى المسلسل ويخط.فها ويتجوزو  
كريمه قربت عليهم وهمست كلهم قربو براسهم : وبطنها المترين دى يا حزينه هاتعمل فيها ايه اخوكو هاياخدها يربيها هى وابنها
ثريا ضحكت : هايوفر على روحه على الاقل يلاقى إلا يقوله يابا
فضلو على الحال دا وقت  وياسين قاعد جوا بيقلب كل كلام أدم وذكريا وخصوصا أخر جزء ... معقول أبوه وصل بيه الحال للإجرام .. لاء لايمكن فى اليوم دا بالذات كان قاعد معاهم وقام نام قالهم أمكم شكلها ها تسهر هناك .. أستبعد الفكره والكلام .. هو طماع ااه .. يصدق انه ممكن يسرق بس يعمل جر.يمه لاء لاء لاء ..
**
أدم وصل المشفى هو وذكرياااا وقف عند الباب خبط ساميه كانت نايمه على السرير إلا جمبها أتعدلت .. قالت بصوت مسموع : أتفضل
ذكريا دخل الاول بإتفاق مع أدم أول ماشافها : مش قولتلك الواد دا  لازم أ.ضربه .. قولتيلى لاء قلبك الحنين معاه ها يضيعك
تاليا أبتسمت واتعدلت بقت شبه قاعده : اتفضل يا ذكرياااا
ذكريا : ماشى ها اتفضل بس بشرط
تاليا ضمت حواجبها : ايه
ذكريا : سامحيه وبيمد فيها .. نطر ايده .. لله دا واد غلبان على نياته
تاليا بعصبيه : هو مين دا إلا على نياته .. وبعدين سيبك منى دلوقت فين ياسين عملتو فيه ايه ضر.به وحبسه صح
ادم دخل ببتسامه واسعه : ليه متجوزه بلطجى
تاليا ربعت إيديها ولفت وشها الناحيه التانيه 
أدم : براحه راقبتك تتلوح وتتعور واوه
ساميه : ههههههههههه حلو التلقيح دا بحب التلقيح قوى
ذكريا بصلها : لا دانتى تقعدى مع أدم وهاتشبعى تلقيح .. ست تالياااا الاخ أدم جاى وكله ندم
تاليا بجديه شديده : وأنا للاسف الشديد بقولك وبقوله خلصت مبقاش ينفع نكمل بأى شكل من الأشكال .. جوايا أتقفل ولو ما طلقنيش ها أخلعه
أدم قعد وسع صدره زى  ما ذكريا نبه عليه : هاتخلعينى ببنسه والا مفك ٢٠ يا أوسطى تاليا
تاليا لفت بصتله بغيظ وشر  وقالت بحمقه : ها أخلعك بأى حاجه يامعلم أدم .. أدم سيب شوية إحترام بينا خلينا ننفصل وإحنا مؤدبين .. أنا حبيتك وقدرتك وأتحملت إلا محدش يتحمله .. إنك تمشى من غير مخ ولا فكر ولا فاهم راسك من رجلك دى اوحش حاجه فى الدنيااا .. وبعدين بغض النظر عن طبيعة شغلك وعن حياتك أنا مش ها أقبل شريك فيك قولتها وبقولها تانى  .. يانا ياراندا يا أدم عايزنى أختار
أدم بكل وضوح : ولو قولتلك أنتى وهى
تاليا بصرامه : لاء .. يا أنا وشاورت على نفسها ياهى
أدم مط شفايفه وبتأكيد : أنتى وهى  وأحسن ليا وليكى ماتقفلش مخك وتصممى على رأيك عشان أنا مش ها أسيبك .. راجل مفتر.ى وظا.لم تعملى إيه نصيبك
تاليا بعصبيه : سامع يا ذكرياااا  شايف الأسلوب  
ذكريا بصلها : تاليا أسمعى كلامه وقولتلك وبقولهالك تانى أنا معاكى فى أى حاجه لصالحك
تاليا زعقت : أنت معايا لصالح يبقى تطلقنى منه يا ذكريا هى العيشه بالعافيه
أدم قرب عليها ومسكها جااامد خبط راسها  براسه وبتأكيد وابتسامه : ااااه بالعافيه ولو أطلقتى ها أخط.فك زى ما مهند عمل مع مراته الله يرحمه .. باس خدودها وبهدوء شديد ..  والله بحبك وكل إلا نفسك فيه ها أحققه راندا مش هاتأزيكى دى هبله .. عبيطه .. مكس كدا متخلف عن الطبيعه والحياه 
تاليا بصاله ومبرقه : لما هى كدا ها تتحوزها ليه
أدم : وعد فى راقبتى .. ندر ولازم أوفيه
ذكريا لف وشه وأبتسم لما قال ندر
ساميه بهجوم : هو الجواز فيه ندر كمان يا أدم فعلا حدد موقفك من دلوقت أنا أسفه إنى بتدخل بس مراتك كانت هاتخسر إلا فى بطنها بسبب زعلها منك خف شويه من عليها وريحها
أدم بصلها : تاليا لاخر مره ها أقولك ثقى فيااا مش اطلبها تانى أنا عارف ان عندكم حق فى مشاعركم تجاهى بس مش بطلب منك طلب مستحيل أبداااا
تاليا بتصميم : وانا بردو طلبى مش مستحيل أنت مصر على كلامك وانا مصره على موقفى رحم الله إمرء عرف قدر نفسه
أدم : ماشى يا تاليااا نأجل كلام لحد ماتقومى بالسلامه والا انتى عايزاه ها أعمله  عايزا تطلقى ها أطلقك عايزا تكملى ها نكمل  تمام
تاليا : أنت بتلعب بيا بتاخدنى على قد عقلى
أدم بنفى : لاء
ذكريا  : أنا شايفه حل مرضى لكل الاطراف
أدم شاور : بدون جدال كتير أنا وانتى لما أتجوزنا كان بإتفاق صح
تاليا بتأكيد : صح 
أدم : إعتبرى الفتره دى من ضمن الاتفاق أطمن على عليكى وعلى إبنى إلا فى بطنك 
تاليا دموعها نزلت : خايف على إبنك إلا فى بطنى
أدم بجديه وتاكيد : أيوا يا تاليا خايف .. حقى كأب أحميكى وأحمى إبنى مش مقتنعه ليه انى بحبك
تاليا : عشان أنت ما عملتش حاجه عشانى .. الحب افعال وأفعالك عكس كلامك بص يا أدم براحتك بس سيبنى براحتى لحد ما أولد وتتطمن على ابنك
أدم ماحبش يجادلها كتير  : ماشى كتر خيرك
تاليا خدت نفس : أنا عايزا أروح شقتى
أدم : لما الدكتور يقول تروحى ها أروحك تمام كدا  بص لساميه .. بقول حاجه غلط
ساميه بنفى : لاء 
ذكريا : أنا جعان تعالى نجيب أكل وناكل مع بعض
ساميه نطت من على السرير : أستنى عصام جاب لنا عشرين ساندوتش كبده وسجق باقى منهم كتير كلوهم
ادم بص لذكريا والاتنين أنفجرو فى الضحك حتى تاليا وساميه ذكريا : هو بيأمن عليكو لبكرا
ساميه حطت الاكل قدامهم الاتنين : اتفضلو .. الصراحه أنا إلا قولتله طفاصه
أدم : والله طافصتك جت فى وقتها
تاليا : أنتو الاتنين ماحدش فيكو ريحنى وقالى ياسين  فين
ذكريا رد عليها وأدم إدايق وسكت : روح يا تاليا وسط إخواته ماتخافيش عليه أنتى مجنونه هانعمل إيه وليه
ساميه : بصراحه ياسين إنسان طيب جدااا وغلبان ما يستحقش المعامله دى
أدم بصلها : ربنا يكفيكى شر الطيب الغلبان واتمنى فعلا  من  كل قلبى ما يخيبش ظنكم وخوفكم الزياده عليه سبحان الله من واحد بتستخبى وبتجرى فى كل حته بعيد عنه لواحد خايفه عليه وانتى إلا بتحميه
تاليا بحمقه : أهلى .. وبعدين الحمد لله كل أمورى بيهم بترجع كويسه من تانى زعلان عشان راجعو نفسهم من ناحيتى
أدم هز راسه ومسك الساندوتش بياكل قطم قطمه : راجل ظالم تعملى إيه
ساميه حبت تخفف حدة الجو بينهم لأنهم الاتنين أو تاليا بالذات فعلا مش طايقه كلمه لادم وبتصطاد له الغلط  : أدم
أدم بيكمل أكل : نعم
ساميه : هو فعلا كان ليكو صاحب خط.ف مراته
ادم بص لذكريا والاتنين أبتسمو
ذكريا : مهند الله يرحمه هو خطفها قبل ما تكون مراته
تاليا أنتبهت وبفضول شديد وهجوم فى نفس الوقت  : ليه أنتو عصا.به والا المفروض أمن بتحافظو على الناس
أدم بصلها : هو فهم إنه غلط بعد الجواز وإنه أمن المفروض يأمن نفسه أكتر من كدا
ساميه : ليه بقى
أدم : عشان أتهبب اتجوز  وجابه لنفسه
ذكريا وساميه : هههههههههههه
تاليا قلبت وشها : والله إلا مش قد الهباب ما يتهببش
أدم بصلها  بغمزه خد قطمه تانيه والابتسامه فظيعه على وشه لدرجة إن تاليا أستغربته جايب كمية البرود دى منين
ساميه : أنا مليش دعوه عايزا أعرف قصة صاحبكم الله يرحمه عندى شغف احس إن كان فى رومانتك واكشن وحركات
الباب خبط والتلاته قالو فى نفس واحد : أدخل
❤❤🧡🧡🧡🧡💛
بقلم : لبنى طارق
💛💛💛💚💙💙💜💜
يارب تفرحونى بتفاعلكم