مكتوبة على اسمك #مكتملة

___𝐏 𝐀 𝐑 𝐓 28___

تتمة
في يوم من الايام وقت خروجها وصل .. وقفت تعدل فلباسها  و فولارها .. خذات مرايتها تشوف مع روحها هزت بارفا ورشت في كف يديها في زوج .. ورجعت حطتهم في صاكها ...وجمعت دوزنها رتباتو..
ضربت بفولارها لوراء ... وهزت تليفونها لي كان يرن ...
فلك: الو .. وي ..
جواد(نطق بصوته الخشن): فلك
فلك:  وي... شكون معايا
جواد: جواد معاك
فلك: شكون جواد...  ماعرفتكش

كان يسوق زير على الفلون... غير من هذيك ماعرفتكش

جواد: (تنحنح ونطق)صاحب بدر... تعرفنا في عرسو
فلك : ( نطقت بخجل نوعا ما) عاد تفكرت اسمحلي خويا ماعرفتكش فالاول
جواد: لباس عليك؟
فلك : الحمد الله ..وانت لباس عليك؟
جواد: الحمد لله غير مع الخدمة  .. نتي فالدار؟
فلك : لا هذا وين خارجة من  الخدمة ..
جواد : ( تنحنح  و نطق) .. تسنايني انا قريب ليك ..

قبل ماتنطق ولا تسقسيه كيفاش تستناه... حتى لقاتو 
قطع الاتصال.. شافت في تليفون بحواجب مرفوعة وعلامة الدهشة على وجها...
هبطت لتحت...نازلة في دروج وعقلها يدي ويجيب ماعرفتش علاش اتصل بيها ومن عرفها خدامة لهنا...ونيمرو تليفونها كيفاش عندو... غير خرجت على برا حتى سمعت الكلاكصون .. طلعت راسها لقاتو هو خرج من السيارة و تسند عليها يكمي  ...
   توجهت لعندو بمشيتها  رقيقة حادرة راسها ماهزتوش فيه... بقى متبعها بعينيه حتى وصلت لعندو... طيش الگارو عافسو برجليه.. وتعدل في وقفتو...
فلك : سلام ..

جواد : ( جر لها يدها بحركة جريئة و سلم عليها بلابيز) صافا  ؟ هانيا ..

فلك : ( دور فعينيها ) وجبدت يديها فساع وبعدت راحعة بخطوة وراء  وي صافا . ..

جواد  :  راكي ليبر نقدرو  نديرو شي كافي ؟
فلك: حلت في عينيها من طلبو... ونطقت اسمحلي اذا تحتاج حاجة تقدر ﻏير تقولها ليا لهنا... بلاما نمشو لشيء كافي...
بعد لحظت وصل بسيارته لباب وحدة من المقاهي لي كان يتردد عليهم في وسط المدينة ...توجهو للطابلة لي كانت بعيدة على التجمعات.. جلست فوق واحد من الفوطاي  و جلس جواد  بجنبها .. كانت ريحتها في ريحة الياسمين مخلطة بالخزامة ريحة باينة  طبيعية و واضح انها خالية من الكحول .. مثل عطر الاطفال و حتى هو  كانت ريحتو القاصحة المجهدة عاطية و تفوح فالمكان  .. مزيج من عطرين ضد بعضهم

نادل : اهلاا بسي جواد.. ورجع.( شاف مع فلك ) .. مرحبا  ..

فلك : اومت براسها بدون ماتنطق ولا كلمة
هبطت راسها بخجل... من غير. ماتعاود تهزو... شاف مع النادل ونطق
جواد: كيف العادة ...(اوم ليه براسو ونطق والمدام)
هزات فلك راسها كانت راح تحكي هوا يقاطعها
جواد: شنوا تشربي
فلك: بلعت ريقها... وبصوت رقيق انثوي حكات... عصير ارونج
استاذن منهم النادل بعد ماخدا طلبهم...
فيساع رجعت هبطت راسها
(كان باين عليها التوتر غير من عينيها لي يدورو...في كل الاتجاهات معرفتش كيفاش حتى قدر  يقنعها وجات معاه لهنا...)  هبطت راسها وقعدت تفرك في يديها من كثرت التوتر لي باين غير في ملامحها حتى سمعاتو نطق
جواد: كي تعودي معايا ماتهبطيش راسك
حلت عينيها فيه على وسعهم على واش سمعت ... وجها خذا اللون الاحمر... هزت راسها فيه بطئ حتى جات عينيها في عينيه...
لقاتو يشوف معاها.. وهز يديه حطها على يديها وعاود نطق من اول وجديد مكمل على هضرتو
جواد: نحبك وقت تكون معايا راسك مرفوع... مانحبش يكون اي حد معايا وراسو لتحت... وخصوصي حد كيفك انت.... يتبع