تتمة
هضرة الناس من الاساس ماتهمهاش لي حاب يهضر العام طويل...اما تجي من الاقرب ليك هيا لي تقتلك تحس كانو موس تغرس في وسط قلبها... كانت كل ماتسمع كلمة بايرة ولا شارفة... تجيها عادي... والفت بيها... اما تسمعها من عند خوها لي في مقام باباها...
لهنا تحس في دنيا دور باها...تحس حتى من لكلام مابقاتش تقدر تخرجو
كمل كلامو يحكي
محمد: منا لجمعة راح تكتبو العقد
وهذا اخر كلام عندي... ومنها راح تحبسي لخدمة...يزي من مشي والجاي... طيش ليها هذو الكلمات وخرج يعرعر.. مخليها تشوف فالنقطة لي كان واقف... ورجعت هزت عينيها في مرت خوها... لي كانت تشوف معاها وتبسيمة استهزاء على فمها... بعد ماشعلتها بيناتهم عاد رتاحت... خرجت مخلية فلك غارقة في دموعها... وكلمة شارفة تتعاود في وذنيها...
رجعت تكات على سرير ومتكمشة في وضعية الجنين... وعينيها يقطرو بالدموع...لين بلت المخدة لي متكية عليها... كل حرف قالو وخرج من فمو بقى يتعاود في عقلها...
فلك كانت لبنت لي كبرت وسط العايلة لي كانت متكونة غير من والديها وخوها محمد 48 وهيا 32 سنة
حتى جا نهار لي ربي هز امانتو توفي الاب وهيا يلاه قفلت 18 عام... والام ديالها مطولتش من بعدو... بعد شهر على مماتو توفات حتى هيا.. عاشت مع خوها ومرت خوها...
قرات وشدت شهادتها... وجلست في الدار تعاون في مرت خوها حتى قررت تنوض تخدم وتعاون في مصروف الدار وتصرف على روحها.... بعد ماقالت خلاص دنيا عطاتها بضهرها... رجعت ضحكت ليها...
وشدت خدمة في احسن الشريكات..
هيا كانت كيف اي بنت... ...انها تحب وتتحب...كيف اي بنت في سنها... وقصة حبها تتوج بالزواج..تعيش الاستقرار وتكون مرتاحة وتجيب ولاد وتعيش سعيدة مع عايلتها صغيرة... كانت هذي اقصى امنياتها... ماهيش حابة تتزوج غير باش يقولو تزوجت.. ولا ترضي المجتمع...شنوا ذنبها هيا الا كانت حابة تتزوج.. عن حب... شنوا ذنبها... اذا كاين لي تزوجو غير باش مايقلوش عليهم باييرين ولا يفوتهم تران كيما يقولو...
المهم عندهم ارضاء الناس وتحبسي قيل والقال عليك ومايسموكش بايرة...
بكات حتى عيات متحسرة في داخلها من هضرة خوها... حتى عشات لعشية وهيا غير مخشية في بيتها... ياله كانت راح تغفى هوا يفيقها صوت تليفون
هزات تشوف شكون بانت ليها عايدة
فلك: بصوت غالبو لبكا... الوو
عايدة: ضمت حواجبها لبعضاهم... ونطقت... واش كنتي تبكي...
فلك: خرجت تنهيدة من صدرها... خليها ربي
عايدة: شنوا كاين...
فلك: والو غير شوية مشاكل
عايدة: محمد خوك تاني...
تنهدت فلك
عاودت ليها كل شيء، من لول حتى لخر... فشات قلبهة ليها... ولي ماقدرتش تقولو خوها... فرغاتو كامل لعايدة
عايدة: بربي ماتبكيش... واش هذا مريض تتزوجي بشارف من قلة الرجال...
فلك: هوا عندو المهم نتزوج وندرك راسي منا...
عدو وقت مع بعضاهم في تليفون... كل وحدة تفرغ في قلبها على الاخرى... تحس في روحها رتاحت شوية كي فرغت ليها قلبها من بعد...
ناضت خرجت للحمام...وقفت قدام لمرايا تشوف في حالتها كيفاش ولات وجها منفوخ وعينيها حمرين من قوة لبكا تنهدت
و خدات دوش دافي ورجعت لغرفتها... تلاحت على سرير تنعس... بعد تعب هذا اليوم...وهيا تتمنى خوها يرجع في قرارو يتبع
YOU ARE READING
مكتوبة على اسمك #مكتملة
Romanceقـــــــصــة كـــــامــــلة تـــــــــــحـــــت عــــنـــــــــــــوان مكـــــتوبة علــــى اسمـــــــك.... 🥀بِـــــقَــــــلَــــــمِــي✍️: 🌪 Marwa bzd🌪 القصة واقعية.... من الواقع المعاش فيها كمية كبيرة من...
