နတ်ဘုရားမအဖြစ် ပြန်လည်ပေါ်ထွက်လာခြင်း[ဘာသာပြန်] ✔️✔️✔️

Chapter [82.1]

နဉ်ရှီက Weibo ဖွင့်ကြည့်လိုက်သည်။ App System က သူမတွင် မဖတ်ရသေးသည့် မက်ဆေ့များနှင့် မှတ်ချက်ပေါင်း တစ်သောင်းမက ရှိနေပြီဖြစ်ကြောင်း အသိပေးလာခဲ့သည်။ မက်ဆေ့များကို ဖတ်ကြည့်လိုက်သောအခါ အများစုက သူမအတွက် စိုးရိမ်ပေးနေကြပြီး၊ အဆင်ပြေရဲ့လား.. နေကောင်းရဲ့လား မေးမြန်းထားကြသည်။ အမှုအခြေအနေတိုးတက်မှုကို စိုးရိမ်နေကြသူများပင် ရှိသေးသည်။

ထိုမက်ဆေ့များကို ဖတ်ရင်း နဉ်ရှီ ပြုံးလိုက်မိ၏။ သူမ၏ ပရိသတ်များက တကယ့်ကို ချစ်စရာကောင်းလွန်းသည်။

ထိုအကြောင်း တွေးနေစဉ်မှာပင် ကျန်းချင်းယွင်က ဖုန်းခေါ်လာသည်။ ထို့နောက် ကုမ္ပဏီတွင် သူမအတွက် လက်ဆောင်အမြောက်အမြား လက်ခံရရှိထားကြောင်း၊ သူ၏ ရုံးခန်းပင် လက်ဆောင်ထုပ်များဖြင့် ပြည့်နေပြီဖြစ်ကြောင်း ပြောပြလာ၏။ သူက ထိုလက်ဆောင်ထုပ်များကို သူမထံ ပို့ပေးရမလားဟူ၍ ဖုန်းဆက်မေးမြန်းလာခြင်းပင်။

“အဲတာဆို အစ်ကိုကျန်းကို အလုပ်ရှုပ်ရတော့မှာပဲ..” ဤနှစ်နှစ်အတွင်း ပရိသတ်များထံမှ လက်ဆောင်ပစ္စည်းများ မရေမတွက်နိုင်အောင် ရရှိခဲ့သည်။ သူမက တန်ဖိုးကြီးပစ္စည်းများကို ပြန်ပို့ပေးပြီး တချို့ပစ္စည်းများကို သိမ်းဆည်းထားသည်။ အများစုကိုမူ လှူဒါန်းပစ်လိုက်သည်။ သို့သော် ပရိသတ်များက သူတို့၏ လက်ဆောင်ပစ္စည်းကို သူတစ်ပါးအား ပေးပစ်လိုက်သည့်အပေါ် စိတ်မကွက်ကြပေ။ ထိုအစား စိတ်ထားကောင်းလိုက်တာ ဟူ၍ပင် ချီးမွမ်းခဲ့ကြသည်။

မိနစ်သုံးဆယ်ခန့် ကြာပြီးနောက် ကျန်းချင်းယွင်က လက်ဆောင်ပုံးကြီးများ သယ်ဆောင်ထားသော ဝန်ထမ်းနှစ်ယောက်နှင့်အတူ ရောက်ချလာခဲ့၏။ လက်ဆောင်ပစ္စည်းများက အစားအသောက်၊ အမှတ်တရပစ္စည်းလေးများနှင့် အခြေခံလူသုံးပစ္စည်းများပင်။

သို့သော် စားစရာပစ္စည်းဆိုလျှင် Anti-fan များ တစ်ခုခုလုပ်ထားမည်စိုး၍ ကျန်းချင်းယွင်က နဉ်ရှီကို စားခွင့်မပေးချေ။ ပုံမှန်အားဖြင့် တစ်ချက်သာ ပေးကြည့်ပြီး ပြန်ယူသွားတတ်သည်။