နတ်ဘုရားမအဖြစ် ပြန်လည်ပေါ်ထွက်လာခြင်း[ဘာသာပြန်] ✔️✔️✔️

Chapter [80]

သူ့ဖုန်းက နောက်တစ်ဖန်မြည်လာပြန်သည်။ ချန်းရှီကွေ့ အနောက်လှည့်ပြီး အိပ်ပျော်နေသောနဉ်ရှီကို ကြည့်လိုက်သည်။ သူဖုန်းကိုင်လိုက်ပြီးတော့ လေသံတိုးတိုးနှင့်ပြောလိုက်သည်။ “အမေ၊ ဒီလောက်ညဉ့်နက်နေပြီကို၊ ဘာလို့မအိပ်သေးတာလဲ?”

“အမေ ဒီနေ့ခင်းတုန်းက အပြင်ထွက်တော့ ကော်ဖီနှစ်ခွက်လောက် သောက်လိုက်မိတယ်။ အဲ့ဒါနဲ့ အိပ်မရဖြစ်နေတာ...” ထောင်ဟွေ့ရွှယ်၏လေသံက တည်ငြိမ်နေပြီး သူမ၏အသံတွင် ညင်သာခြင်းနှင့်ချစ်ခြင်းတရားတို့က ပါဝင်နေသည်။ “နဉ်ရှီဘာဖြစ်နေလဲဆိုတာ အမေသိခဲ့ပြီးပြီ..”

ချန်းရှီကွေ့က တဒင်္ဂမျှတိတ်သွားပြီး အသံပြု၍ပြန်ဖြေသည်။

ချန်းရှီကွေ့က ထိုအကြောင်းကို ဆက်ပြောချင်စိတ်မရှိတာကို မြင်တော့ ထောင်ဟွေ့ရွှယ်ပြောလိုက်သည်။ “ကိစ္စကပေါ်သွားပြီဆိုမှတော့ အများကြီးတွေးမနေနဲ့တော့။ ဒီအချိန်မှာ သားအနေနဲ့ များများအနားယူပြီး သူမနဲ့အတူ ဒီထက်ပိုပြီး အချိန်ကုန်ဆုံးသင့်တယ်..“

“ကျွန်တော်သိပါတယ်..” ချန်းရှီကွေ့က နဉ်ရှီကိုလှည့်ကြည့်ကာ ပြောလိုက်သည်။ “နောက်ဆို ကော်ဖီအများကြီး မသောက်နဲ့တော့...”

“‌ဟုတ်ပါပြီရှင်၊ အမေကအိုနေပါပြီနော်၊ အမေ့ကို လိုက်ပြီး ဟိုပြောဒီ‌ပြောလုပ်နေစရာမလိုဘူး..” ထောင်ဟွေ့ရွှယ်က တခစ်ခစ်ရယ်ပြီးနောက် သက်ပြင်းထပ်ချပြန်သည်။ “ရှီကွေ့...အမေ သားရဲ့ကိုယ်ရေးကိုယ်တာကိစ္စတွေမှာ ဝင်စွက်ဖက်ချင်တာမဟုတ်ပါဘူးကွယ်၊ ဒါပေမဲ့ အမေလည်း မိန်းမသားတစ်ယောက်ပဲ။ အဲ့ဒါက မလွယ်ကူမှန်း အမေသိတာပေါ့။ အမေ နဉ်ရှီနဲ့ လူချင်းမတွေ့ရသေးဘူးဆိုပေမယ့် သူက အရမ်းကိုအံ့ဩစရာကောင်းတဲ့ မိန်းကလေးတစ်ယောက်ဆိုတာ အမေပြောနိုင်တယ်။ အခုချိန်က သူ့အတွက် စိတ်အဆင်းရဲရဆုံးအချိန်ပဲ။ အပြင်မှာ ဘယ်လိုကောလာဟလတွေထွက်နေပါစေ၊ ဘယ်လိုအပျက်သဘောဆောင်တဲ့ အတင်းအဖျင်းတွေပျံ့နေပါစေ၊ သားရဲ့ရပ်တည်ချက်ကို သားရှင်းရှင်းလင်းလင်းသိနေရမယ်။ အဲ့အခါကျမှ သူ့ကိုကောင်းကောင်းဂရုစိုက်ပေးလိုက် ဟုတ်ပြီလား..”