رنا
اليوم أخر أمتحان
والمفروض بعدها ألتقي بأحمد
تأنقت كثير
وكل شوية أشوف شكلي بالمرايا
متوترة وفرحانة
ومشاعر أعيشها لأول مرة
وصلت للكلية
وكالعادة توزعت الاسئلة وجاوبت
وطلعت راضية
توجهت للباب اللي أتفقنا ياخذني منا
وأتصلت بي ابلغه وصولي
وبظرف دقايق چانت سيارته واگفة گدامي
صعدت وسلمت عليه
وچنت خجلانة لأن أول مرة نلتقي بالواقع
صار يحجي ويفتح مواضيع
بس أني مستغربة
ما أحسه نفس الشخص اللي چنت احجي وياه بالموبايل .. رغم نفس الشكل والصورة اللي مخليها
لكن الصوت يختلف
وأسلوب الكلام
يمكن لأن متوتر على اعتبار بالواقع
وعلى الموبايل يكون مرتاح أكثر
رنا : احمد صوتك بالحقيقة يختلف تماماً عن المكالمات
أحمد : حتى صوتج مختلف .. عادي أغلبنا تتغير أصواتنا بالموبايلات
ما چنت ماخذة راحتي
بس أحاول أكسر الخجل
واتعامل طبيعي مثل كلامنا بالعادة
وصلنا لمطعم ما مبين ولا معروف
أول مرة أشوفه
أرتاحيت نوعاً ما لأن طول الوكت خايفة أحد يشوفنا
گعدنا بالمقاعد
وطلبنا الاكل
وسولفنا كثيير
بس اللي چان مضوجني
شخصية احمد
ولا عبالك نفس الشخص اللي چنت احجي وياه
گلبي وجعني حسيت أكو شي غريب
لدرجة بس چنت أريد أرجع للبيت
جهز الاكل وصارحني بفكرة الخطوبة
وانه ناوي هالفترة يتقدملي إذا موافقة
وفرحت بهالخبر ورجعلي شوية الهدوء
بعد الاكل وصلته رسالة
بعد ما قراها گال
احمد : أعتذر رنا لازم أطلع هسه ، يلا أرجعج
رنا : خوما صاير شي ؟
أحمد : مو شي خطير بس طلعلي شغل
ضجت شوية
بس ما حجيت
رجعني للكلية وطلع
وبقيت انتظر غيث
وبعد ما وصل غيث رجعت للبيت
چنت تعبانة حيل وكل اللي أريده أنام
غيرت ملابسي ورحت بالنوم
گعدت المغرب
وبعد العشى فتحت الواتساب
مستغربة ليش أحمد ما دز شي مو من عادته
وخفت يكون صار وياه شي لأن طلع بسرعة
أخر ظهور اله چان بالساعة ١٢ ونص
چان وياي بهالوكت !
أتصلت عليه ما عنده نت
وكل شوية أتصل لكن ماكو رد
أتصل على الخط مغلق
القلق سيطر عليا
وببالي ألف حساب
لثاني يوم وهو مختفي
للعصر وأني بيدي الموبايل
ومنتظرة اي خبر
YOU ARE READING
إعوجاج الفنن
Romance" ما خفي كان اعظم " جملةٌ تستحقُ الوقوف والتفكير . كم من الاشياء ، الاحداث ، الاشخاص كان ظاهرهم بريء وما اخفوه كان مخالف ... تدور احداث الرواية حول فتاة عراقية يتيمة الاب تعيش مع عائلتها المتكونة من ام واخ وثلاثة اخوات لتواجه هذه العائلة البسيطة...
