عسل
سمعت أذان المغرب
گمت توضيت وصليت
سابقاً لمن تضيگ بيا الدنيا واتشتت
سجادتي تلمني
هسه صايرة اتهرب من السجادة
احس نفسي منافقة واضحك على نفسي
تنقبلي صلاة بعد اللي صار ؟
يمكن هو صار غصب عني
بس ما انكر انه طلعت وياه بأرادتي
كملت صلاة وگعدت بالصالة صافنة بالفراغ
فجأة اندگ الباب
فزيت
صايرة افز من دگة الباب بشكل مخيف
صحت منو
جاني صوت عمر
فتحته
عمر : هلا عسول المختفية ، ما تگولين أخويا عمر ما تسألين .. هاي اني توأمج وهيج
چنت منتظرة حجة
وأجت الحجة الى يمي
بجيت وحضنته
عمر : ول ول شبيج عسل ليش تبجين
عسل : ماكو شي بس مشتاگتلك
عمر : لا تخوفيني عليج احجي شبيج
عسل : گتلك ماكو شي والله بس تعبانة هالفترة شوية
عمر : شلون صرتي ؟
عسل : الحمدلله
عمر : ليش الباب چان مقفول
عسل : وحدي بالبيت
عمر : الباقين وين ؟
عسل : رند ببيت عمو ناصر والباقي بالسوك
هز راسه
وتمدد على القنفة
وفتح موبايله
عسل : انت ليش راجع من وكت اليوم ؟
عمر : باجر حنة زيد فخالو سعد انطانا عطلة
عسل : جوعان اسويلك عشى ؟
صفن وگال
عمر : عندي فكرة احسن .. خلي يرجعون واجيب اكل من برا
عسل : صاير احوال وعشى جاهز وكذا
غمزلي وضحك
عمر : اي يابة جاية بيدي
عسل : ما متندم لأن تركت ؟
عمر : لأ ، الشغل ماشي بيدي
عسل : وشغلك صدك بي فلوس وهيج ؟
عمر : اييي بي بس لليعرف يلعبها
عسل : وانت دتعرف تلعبها ؟
عمر : تصلج الاخبار بعدين
عسل : بس مع ذلك ما مستوعبة شلون تركت .. انت طول عمرك ما تهتم للفلوس وصراحة مقابل دراستك الفلوس مو مهمة
سد موبايله
وعدل گعدته
عمر : بحياتج جربتي تكونين زلمة مجروحة كرامته ؟
عسل : لا
عمر : عود من تصيرين بهالوضع تعالي گولي الفلوس مو مهمة
عسل : ومنو جرح كرامتك ؟
غلس على الموضوع
وصار يسأل عن امتحاناتي
YOU ARE READING
إعوجاج الفنن
Romance" ما خفي كان اعظم " جملةٌ تستحقُ الوقوف والتفكير . كم من الاشياء ، الاحداث ، الاشخاص كان ظاهرهم بريء وما اخفوه كان مخالف ... تدور احداث الرواية حول فتاة عراقية يتيمة الاب تعيش مع عائلتها المتكونة من ام واخ وثلاثة اخوات لتواجه هذه العائلة البسيطة...
