زاد
بأيامي الاولى بالعراق صارت مشكلة
خلتني اضطر اروح لغير مكان وكأني مجرم وهارب
ما چانت بداية مُبشرة بخير
وما جنت راضي بقرار جدي
بس مجبور اسايرهم على اعتبارهم الكبار
طلعت لبيت جدي بأحدى قرى الموصل
چان معزول نوعاً ما واكو بيوت قليلة حوله
بس المحلات والشغلات الخدمية تحتاج سيارة
بالبداية ما چنت مختلط بأولاد عمامي
من بعيد لبعيد
بس هالطلعة قربتنا واندمجنا
ونسينا حتى ليش جينا لهنا
ومن الملل اللي چان بالمنطقة قررنا نسوي اجواء
رحنا للمحلات وأجرنا شاشة حتى نشوف المباراة
واشترينا كثير شغلات نحتاجها
گعدنا اني ونوح بالحديقة
وعمرنا النرگيلة
ومن موضوع لموضوع
نوح : شنو اسم هالمنطقة ؟
زاد : ربيعة
نوح : وين الربيع كل اللي اشوفه صحراء
زاد : عادي مو شرط يكون الشي مطابق لأسمه
انت مثلاً معنى اسمك الراحة وبالحقيقة كتلة ازعاج
نوح : بيها وجهة نظر كذلك انت معنى اسمك الكرم والعطاء بس بالواقع بخيل
دحگت بأستغراب
زاد : اني بخيل ، شلك بهالسالفة ؟
نوح : اي والله
زاد : ويحلف هم ! ... بالله اذكرلي موقف چنت بخيل بي
نوح : اليوم مثلاً مع رند
زاد : وشلون چنت بخيل يعني ؟
نوح : شوف ياخوي البخل نوعين ، مادي ومعنوي
ومع رند طبقت الاثنين
كل الوكت جنت بخيل بالكلمة الحلوة والاسلوب الراقي
بخيل بالأبتسامة .. هذا اسمه بخل معنوي
اما المادي فما يحتاج اذكرك شلون خليت البنت تبجي علمود كاميرا
زاد : ما تگولي شلون ربطت المواضيع انت .. اني هذا طبعي مع الكل وهاي شخصيتي اما الكاميرا فتدري شگد غالية عليا هالكاميرا تحديداً وصراحة جنت تحت ضغط الشغل وهي ضوجتني ، كل شوية طالعة بمشكلة مرة قافلة الباب مرة كاسرة الحنفية
وختمتها بوگعة الكاميرا .. تريدني اصفگ الها مثلاً ؟!
نوح : رند تركت دوامها وجاية تساعدنا وهي ما مجبورة .. واذا تلاحظ فكلشي صار مو خطأها محد نبهها على الشغلات الما مضبوطة وهي رغم تعاملك وعصبيتك عليها كملت وما حجت شي
والكاميرا الغالية عليك ما بيها شي مو فحصتها وطلعت سليمة ... جرحتها بالكلام بدون ما تتأكد حتى اذا الكاميرا تأذت او لا
صفنت بكلامه وحسيت بتأنيب ضمير
زاد : يعني تشوف انه غلطت بحقها ولازم اعتذر ؟
نوح : اي طبعاً .. انت زاد الدارس المثقف ، من شوكت تعامل العالم من ورا خشمك .. ومن شوكت تنزل دموع بنت علمود كاميرا ؟
YOU ARE READING
إعوجاج الفنن
Romance" ما خفي كان اعظم " جملةٌ تستحقُ الوقوف والتفكير . كم من الاشياء ، الاحداث ، الاشخاص كان ظاهرهم بريء وما اخفوه كان مخالف ... تدور احداث الرواية حول فتاة عراقية يتيمة الاب تعيش مع عائلتها المتكونة من ام واخ وثلاثة اخوات لتواجه هذه العائلة البسيطة...
