عسل
رجعت من حنة زيد
وعيوني على موبايلي منتظرة خبر من غيث
لكن أختفى وماكو رد
دزيتله رسالة
: شسويت ؟
غلقت الموبايل وسبحت
رجعت أشوف إذا اكو رد
بس خابت أمالي
ما أعرف شسوي الموضوع كله اكبر مني
شوصلني لهنا اني ما المفروض اعيش هالأحداث
كل اللي اتذكره الاحلام اللي چنت بانيتها معاه
البيت الصغير ، أطفالي الاثنين ، العالم الحلو اللي چان يحجيلي عنه
شوكت وصلت لهنا ؟
وكأني بحلم ومنتظرة اگعد
ما متقبلة انه كل اللي صار واقع
بقيت انتظر ساعة وساعتين والنوم ما مرني
صرت اتصل بي
يدگ بس ما يشيله
اعصابي تدمرت
فجأة دگ موبايلي
الساعة ٢ ونص
فرحت حسبالي غيث
بس انصدمت من قريت الاسم " عمة سمر "
بهالوكت شتريد ؟
فتحته بسرعة
عسل : هلو عمة
سمر : هلا عسل ، اهلج نايمين
عسل : اي بس اني گاعدة
سمر : انزليلي محتاجتج بموضوع
سدته
ونزلت واني الف فكرة بدماغي
تريد تحجي وياي بموضوع الخطوبة
لو عرفت بموضوعنا اني وغيث
راح تگف ويانا لو ضدنا ؟
دقائق بيها الفين سؤال
وصلت وفتحت باب المطبخ
چانت گاعدة على القنفة
سمر : ادخلي تعالي اگعدي
دخلت گعدت يمها
گلت وبيا رجفة
عسل : ها عمة اكو شي ؟
سمر : عسل .. اني اعرف زين اللي بينج وبين غيث
تجمد الدم بجسمي
عيوني دمعت
نزلت راسي والخجل محتلني
سمر : اعرف تحبون بعض من زمان
رفعت راسي
وارتاحيت شوية
كلامها ما كأنه يلمح للشي اللي صار
سمر : كل اللي صار مجرد لعب وانتو بأعماركم طبيعي تحبون وتنعجبون بس مو كل شخص تحبي تحصلي ، صح ؟
رفعت حاجبي
اريد اعرف وين راح تصل بالكلام !
عسل : اي
سمر : گالي غيث يريد يتقدملج بس صراحة اني رفضت .. من زمان ببالي بنت وانتظره يتخرج حتى افتح الموضوع ، گلت احجيلج حتى يكون بعلمج
عسل : عمة اذا هو يريدني شبيا اني ليش رافضة ؟
سمر : اني اعرف اللي يناسب ابني ، اتركي هالامور للكبار .. تعرفين حق المعرفة احنا وانتو ما نتراهم
اني اقنعته بالبنت اللي رايدتها واللي اريده منج تبتعدين عنه وتشوفين دربج والله يوفقج مع غيره
YOU ARE READING
إعوجاج الفنن
Romance" ما خفي كان اعظم " جملةٌ تستحقُ الوقوف والتفكير . كم من الاشياء ، الاحداث ، الاشخاص كان ظاهرهم بريء وما اخفوه كان مخالف ... تدور احداث الرواية حول فتاة عراقية يتيمة الاب تعيش مع عائلتها المتكونة من ام واخ وثلاثة اخوات لتواجه هذه العائلة البسيطة...
