العمدة "مجنون ليلى"💙مكتملة💙

💙الجزء 138💙

كتشوف فيه ولمساتو على خدها وكلامو وشوقها ليه لي دفناتو هادي سنين غلبها قدامو قصحات قلبها من جيهتو بزاف ولكن دابة حسات بكلشي تلاشى وقلبها رطاب
كيزيد يدوي ويقرب ليها ويشوف فيها وفعويناتها شفايفها كلشي:عطينا فرصة ونعيشو تاحنا بحالنا بحال الناس انا راه عمر شي وحدة تجي فبلاصتك وتانتي عمر شي حد يجي فبلاصتي شنو خاص مازال
بلعات ريقها من قربو قلبها كيضرب فلمية فعلا عمرها تقدر تكون مع غيرو ..غير قرب لوجها وتخالطو انفاسهم همسات ليه:شكا دير
بدر ماقدرش يقاوم نطق:توحشتك اكنزة
طلعات معاها الحرارة شحال ماحسات بهاد الاحساس لي كانت كتحسو غير معاه حتى كتحس بشفايفو على شفايفها وبدا يبوسها وهي ترجع اللور :ويلي تسطيتي
مسح على راسو كان ريقو ناشف :سمحيلي ماقدرتش نمنع راسي
بقات كتشوف فيه تاهي غلبوهل احاسيسها عطاتو بالضهر وهو كيشوف فيها نطق:رجعت على قبلك ونيتي زوينة اكنزة باغي نعوضك على لي فات
وقفات شحال ونطقاات:يصبح ويفتح
خلاتو كيشوف فطيفهااا تنهد..
كانت فالبيت تخشات حدا ولدها حاضناه كلها كترجف لي عارفاه هو انه قلبها وعقلها تافقو باش يحنو ليه تعدبات بيما فيه الكفاية وقصحات قلبها بزاف وخلاتو يخوي لبلاد وحرمات راسها منو وحرماتو منها لمدة ست سنين ولقات انه قلبها مازال هو هو تمتمات:ياربي ماديرلي لي فيه الخييير….

نهار جديد..
كانو كيفطرو مازال ماعارفينو راه جا…كانت جالسة وكتشوف انه كلشي صاقر عرفات انه مازال ماعرفوه جا
.حتى كيسمعو صوتو:صباح الخير على الجميع
كلشي شاف فيه مامتيقينش انه سمعو صوتو..نور غوتات:ببدر خويااا
ناضت كطير تا قلبات الكاس وعنقاتو تبعاتها سعاد كيعنقوه ويبوسو فيه تقلبات الدنيا بالبكى ولغوات دالفرحة.
سعاد:عمرك تفرق علينااا والله مانسمح ليك وبعدتي تاني
باس راسها :ماتخافيش الواليدة
بااسيف باش بعدو عليه وقرب كيبوس راس الحاج ويديه والحاج كيرضي عليه:دابة عاد انرتاح ملي رجعتي على سلامتك فدارك ووسط عائلتك اولدي
بدر:الله يسلمك الحاج
قرب سلم على محمد وقرب عند بكر ..بكر وقف وشاف فيه بقة واحد كيشوف فلاخور فتالي حضنو بعض :على سلامتك وسط ناسك
بدر تبسم ليه:الله يسلمك
جلسو كاملين على الطبلة دالفطور كيديو ويجيبو معاه فالكلام كي دوز هاد السنين وشنو دار…كان كيقري الماط فالتناويات فلندن…ودابة رجع للمغريب من بعد ما قاد خدمة مع وحدة من المدارس لكبار هناا وباغي يدير سونطر للدعم خاص بالماط وشي مواد خرين لجميع المستويات ومازال يزيد يشوف شنو يدير…لي عارف انه ولا متصالح مع داتو وهكا كان باغي يكون يعيش حياتو ويدير داكشي لي باغي…
الحاج:هدشي لي بغيت الحمد لله هكا بغيت نشوفك اولدي
كلشي شاف انه بدر بصاح تبدل حتى كيفاش كيدوي مرزن ومهدن والابتسلمة لي على وجهو ملاميحو مرخين عكس كيف كان ديما كتحس بيه معصب واخة ماكاين والو ديما عاقد حواجبو وعروق يديه وجبينو بارزين هدا لي قدامهم بعقلو ومكالمي ومثقف عارف اش باغي من الحياة…كلشي فرح ليه تاهو تعدب فصغرو وكان ضحية عائلة فالطفولة ديالو نتح على داكشي عقد نفسية كلفاتو خسران حياتو وشخصيتو وكلشي
هز راسو فيها لقاها جالسة وكتتصنت وساكتة غير شاف فيها نزلات راسها..تقول اول مرة ايتلاقاو حيت فعلا حسات انه هدا لي جالس معاهم ماشي بدر المتهور المتصرع العصبيي لدرجة خلاهم تاهوما يهضرو معاه بالعقل والتاويل بحاليلا شي واحد برانيي …
سعاد:ولدي كتعجبك قهوة كحلة فالصبح نكب ليك شي فنجال
هز راسو بلا:لا اوليدة قطعتها ملي قطعت لكارو ..فطور عادي براك
سعاد فرحات:الحمد لله اولدي فرحانة بيك والله
باس يد مو بكل حب..
الحاج:شوف اولدي مزال بلاصتك فالشريكة ومزال كلشي ديالك هدشي كلو محقك لا بغيتي خدم هنا وهنا حنا محتاجين ليك ماتبدل والو اولدي
بدر:من بعد ونهضرو فهادشي ان شاء الله..
حمحم ووقع الصمت وهز راسو وشاف فكنزة وهي تحني راسها تاني..وكلشي كيشوف فيهم وفردة فعل كنزة كيقراو فعينيهم وشنو كاين ..
بدر نطق:باش نجيكم للصراحة انا شنو خلاني نتبدل ونرجع
كلشي شاف فيه يسمعون اش يقول
بدر:كلشي على قبل كنزة كون ماماكانتش هي عمري كنت انتبدل حبي ليها هو لي دار فيا هدشي ..تبدلت على قبلها ورجعت على قبلها مابغيتش داكشي لي قديم يتعاود انطلب منها السماحة تاني قدامكم كاملين
وشاف فيها:سمحيلي بزاف على لي فات اكنزة وانا باغي نعوضك على لي فات كامل لا قبلتي عليا وبغيتينيي
شاف فخوها وباها:انا باغيها للزواج تكون مراتي وام ولادي تا ولدها يكون بحال ولدي…نساو الماضي وتسمحولي
ليلى تبسمات وشافت فكنزة ماكانتش كتبغي تتدخل فهاد الموضوع ولكن فاش تأكدات انه كنزة مازال كتبغي بدر  ملي طلقات نطقات:كنزة من حقك تعيشي مرتاحة مع لي كتبغي
كنزة تزنكات ونزلات راسها كتفكر فكلشي توترات قلبها كيضرب فلمية لقات راسها فعلا عيات ماتكابر هزات راسها وشافت فباها وبكر بنضرة فهموها
بكر تنهد:سبق وقلت لك اني لي درتيها خوك معاك حيت عارف الحب شنو كيعني لا كان هدشي ايفرحك ويخليني نشوف الفرحة فعينيك لي سنين هدي ماشتهاش ماعنديش مشكل ننسا كلشيي..ونوقف معاك
محمد تنهد:كيف قال خوك لي بغيتيه حنا معاك غير تكوني فرحانة
كنزة بلعات ريقها تقول اول مرة اتشوفو عضات على شفايفها وتبسمات باحراج
خلات كلشي يتبسم وبدر ماكرهش ينوض دابة ويجرها يعنقها شد راسو بالسيف ايطير بالفرحة
بكر شاف فيه:شنو انقولك من غير مانبغيش نسمع شي حاجة خايبة درتيهالها ولو غير بالضحك ابدر كنقسم ليك هاد المرة نيشان للقبر
بدر:انديرها فعنيا يكفي هاد السنين دازو عليا بحال جهنام
دابة شنو انخطب ولا نديرو لاكط ولا العرس ولا لي بغيتو باغي كلشي يمشي بالاصول والمعقول
الحاج تبسم:حنا عائلة وعارفين وشايفين كلشي بغينا نفرحو شوية ونشوفكم فرحانين بغيتو العرس نديروه
كنزة مامتيقاش انه كيهضرو على زواجها هي وبدر شافت فيه لقاتو فرحان اول مرة تشوفو هكاا ديما كان كيبان ليها مأزم تبسمات بلا ماتحس ليه وهي كتسمعهم كيضهرو عليهم وشي كيبارك ليهم وشي كيعطي رأيوو..بجوج كيشوفو فبعضياتهم
ليلى:شمن عرس صافي بغينا المعقول نشوفهم مجموعين شنو بان لكا اكنزة
كنزة:اه بلا العرس
حنان:بصاح كنجيبو العين على والو وتاواحد ماكايبغي لينا الربح صافيي
بدر نطق:صافي لاكط فهاد تلتيام
نور:هاي هاي مزروب اخويا
فعلا كان مزروب مامتيقش انه صافي ايتجمع معها
مسح على راسو:بغيت نسافرو زعمة
كنزة تبسمات…
هضرو فالتفاصيل وكملات فرحتهم حسو انه حياتهم بدات كتتقاد شوية بشوية…سبحان من بيتها فشان وصبحها فشان..
بعد مرور شهر..
كانت هي وياه فواحد الباطو كيتسارا كاع البلدان تقريبا ..خمسطاش اليوم لولة سافرو وداو معاهم حمزة من بعد رجعو وجا موراه باه .ماكانش صعيب حمزة يتقبل بدر خصوصا انه كيشوف ادريس وكنزة متفاهمين عمرو شاف المشاكيل بيناتهم ادريس كيهضر فكنزة بالخير وكنزة كتهضر فادريس بالخير...وهاد خمسطاش اليوم التانية بغا بدر يدوزها معاها هي فقط…فعلا عوضها على كاع لي فات كيدير ليها بحال الما لقليل كلام زوين تعامل زوين خايف عليها من كلشيي..
كانو فواحد من المطاعيم فداك الباطو كلاس وجو رومانسي على البحر ..تعشاو بجوج..وراجل واقف كيعزف ليهم معزوفة رومانسية
بدر باس ليها يديها:فرحانة
كنزة حاطة راسها على كتافو:بزااف كنعيش اسعد ايام حياتي معاك
تبسم باس يديها تاني:داكشي لي بغيت ..عمر هاد الضحكة اتمشي من وجهك ماحدي عايش
كنزة:الله يخليك ليا
بدر وقف :صافي تسالات السهرة
كنزة:ويلي شوف الجو شحال زوين والناس مازال سهرانين
نوضها :شغا ندير بالناس انا باغيك نتيي سهرتنا عاد اتبدا لفوق
تبسمات وهو جارها من يديها.تا طلعو للجناح ديالهم مع الدخلة كتحس براسها مهزوزة فالسماا  ..غادي بيها للناموسية جلسها وهي كضحك:غير بشوية هنا نحيد حوايجي الراسي
بدر:نتي غير رتايحي لمك انا شكا ندير هنا
حاى كتشهق فاش قطع داك الكسوة فوتات:ويليييي غاالية
بدر:الله يهنيهااا
رما داك الكسوة وتهز كيحيد فحوايجوو…فعلا بدر كيبقة فريد من نوعو هو الوحيد لي مقنعها هو الوحيد لي كيحرك فيها شحال من حاجة وهو الوحيد لي كتبغي وساكن قلبها…فلحضة لقات راسها مرفوعة للسما السابعة من قبولاتو الحارين على جسمها العاري ولمساتو المتملكين كيخليها تنطق باسمو بكل حب وشهوة..وهو غير كتولي بين يديه كينسا راسو وكتولي تبان ليه غير هي الوحيدة لي كيحس معاها بانه فقمة الرجولتو وانه فعلا عايش اللحضات …معاها راحتو وفرحتوو وكلشي وهي كدالك…نساو كاع لي فات بحاليلا يلاه تعارفو من جديد بجوج تبدلو الا حبهم لبعض مازل كيفما هو وغادي وكيزيد…

فجيهة خرا..
كانت خطبتهم بصعوبة باش قدرات تقنعهم انه بغات تتزوج بكريم وانه تبدل فتالي خلاوها على خاطرها حيت لقات معاه راحتها وست سنين كافية باش تعرف راسها انه تاهي ولات تبغيه حيت بين ليها حبو ليها…

كريم كان فرحان بزاف ملي قبلو عليه وحددو موعد الزواج وداز كلشي مزيان…
خرجات وصلات معاه لبرى بقفطانها لكرونة كيهضرو
كريم:انا ماعندي حد لا اب لا اخت لا ام لا والو بقيتيلي غير نتي معاك انعيش كاع هدشي انور وكنواعدك انعيشك ديما فرحانة
تبسمات:تانا انكون ليك كلشي اكريم يكفي نعيشو مزيان
تبسم وباس يديها:الله يخليك ليااا…
بعد مرور ايام

كانو فلاتيراس بجوج يلاه قطعات مع ياسين وتبسمات:منى حاملة
بكر:الله يكمل بالخير..
حضنها:كيبانلي دابة كلشي ولا مزيان
تبسمات:اه دابة عاد نقولو راه تصلحات الامور خوتنا كلهم بيخير ومع عيالتهم ورجالهم ..شنو بغينا كتر الحاج مشا للحج هو وعمي وخالتي وخالتي سعاد بقينا انا وياك ..فاش كنشوف كنلقاك نت لي وقفتي على هدشي حبك لينا وكيفاش ضحيتي على قبلنا هوما لي وصلونا لهدشي سايستي معانا وخديتي بيدينا ماخليتيناش فالهاوية وبقيتي جامعنا فرحانة حيت راجلي والله عائلة العمدة بلا بيك كانت اضيع والله كنتي نعم الاب والاخ الحفيد والابن والزوج والعاشق وكلشيييي واخة الحد الان ماحققتيش داكشي لي كنتي باغي عارفة انه هدشي كامل ماعينكش فيه
تبسم كيبوس راسها:نفديكم بروحي لا جابتها الفرصة العائلة هي كلشي ضاروري خاص يضحي شي واحد باش تبقة هاد العائلة مجموعة…واصلا انا ربحت اكتر حاجة كنت باغيها فحياتييي وبلا بيها كنت انم..وت
تبسمات وهو كمل:ربحتك نتي وهدا بحد ذاتو انجاز الانسانة لي كنبغي معايا ومامات ولادي شنو بغيت كتر
عنقاتو:لهلا يحرمنييي منك
بكر حضنها تاهوو…

فعلا قصة العمدة كانت خاصة بعائلة العمدة وداكشي لي دازو منو ماضيهم ومشاكيلهم ومعاناتهم كل واحد فيهم وقصتو ..عائلة العمدة عرفنا معاها معنى الاخوة وقيمة اللم والاب والخوت وقيمة العائلة ككل…وانه العائلة اهم من لفلوس ومن اي حاجة خرا..ومع بكر شفنا هدشي كامل  كان الاخ والاب والزوج والعاشق والحفيد والصديق وكلشي..معاه عرفنا معنى الحب الحقيقيي حتى لاخر لحضة وماتخلاش على حبو ليلى خسر كلشي على قبلها فتالي فاز بيها هي ونسا اش خسر غير تبقة معاه هيي..ومازال مستاعد يخسر لا جابتها الضروف…

#يتبع